XXXII. Des ardans qui furent esteins par Nostre Dame et son enseignement

1. Dex, qui fontaine est de pitié,

2. Monstre au pecheurs amitié,

3. Car, nuit et jor, ses bras leur tent

4. Et, de jor en jor, les atent

5. Que il viengnent a penitance

6. Et leur donne grant porveance

7. D'amender els de leur pichiez;

8. Mes il ont si les cuers sechiez

9. Et vuit d'amor, de charité,

10. Que en voie de verité

11. Ne veillent venir ne a amende

12. Devant que desus aus descende

13. Dou ciel la devine venchance.

14. Un tens fu qu'ou reigne de France

15. Et par autre terres pleuseurs

16. Pecherresses et pecheurs

17. Pugni Dex por droite sentence,

18. Car sus cels grieve pestillence

19. Envoia dou feu infernal,

20. Ausint com plaie general,

21. Pour leur pesmes iniquités.

22. Par bors, par villes, par cités,

23. Homes, fames generaument

24. Ardoient de ce grief torment

25. Par droite vanchance devine,

26. Ne nulle humeine medecine

27. Contre ce mal n'estoit trouvee.

28. Mes la haute Virge ennoree

29. Qui puet seur toute force humeine,

30. De misericorde fonteine,

31. A cui la puissance s'estent

32. De son filz, pere omnipotent,

33. Icelle tres puissant raïne

34. Au mal porchaça medecine,

35. Qu'el s'aparut, si com l'en troeve

36. Escrit, a une fame vueve,

37. Moult honeste et bien renommee;

38. De Joï Le Chatel ert nee.

39. Il estoit nuit, a premier somme,

40. Que la fame se dormoit comme

41. L'en doit dormir a tel hore,

42. Quant la dame que l'en aore

43. Vint a lé et si l'esveilla,

44. Dom la fame se merveilla.

45. Pluseurs clers et lei bien creables

46. En distrent tesmoign veritables,

47. Qu'el s'apela, por verité,

48. Dame de Chartres la cité

49. Et dit: " Fei joie, bonne fame,

50. Saches que de Chartres sui dame.

51. Tes oroisons et tes prieres

52. Et tes aumonnes bien plenieres

53. Et tes jeunes m'ont si esmeue

54. Que ge sui ci a toi venue,

55. Car ge ai tant mon filz prié

56. Que il m'a un don otrié

57. Par quoi li ardant esteindront;

58. Mes mon enseignement tendront

59. Que ge te sui venue dire:

60. Fei leur feire ymages de cire,

61. Chacune trois deniers pesant,

62. En l'enneur Dieu, le tot puissant,

63. Qui est un Dieu en trinité

64. Et est treibles en unité.

65. Celles a Chartres offerront

66. Ou par autres offrir feront,

67. Ainsi que fraudre n'i ait feite

68. Ne que chouse n'en seit detreite.

69. Desus mon autel sera mise

70. L'offrende a l'euvre de m'iglise.

71. Se ce font, le feu esteindra,

72. Que tant ne quant ne revieindra;

73. Si esteindra en tel maniere

74. N'alumera jamés arriere.

75. Lieve toust sus sanz deleiance

76. Et aies bien ferme creance

77. Et va a Johen, ton provoire,

78. Conte li ceste chose a voire

79. Que ge t'ei diste et revelee

80. Et li di qu'en ceste contree

81. La preeche par les iglises

82. Qui sont en la province mises. "

83. La fame, qui fu bien creant

84. De ce qu'ert oiant et voiant,

85. Moult ignelement se leva

86. Tantout que rien ne la greva

87. Ne ne retarda point d'eslesce.

88. Au provoire vint a elesce,

89. O fei e o devocion,

90. Si li conta sa vision.

91. Quant cil la vision oï,

92. Bien la crut et bien s'esjoï

93. Et de joie prist a plorer,

94. Dieu et Nostre Dame a loer.

95. A preschier tantost commença

96. Par le païs, de la en ça.

97. Sa parole et son preeschement

98. Ot tantout tel enfeissement

99. Que a touz les auditeurs pleisoit;

100. La haute dame li feisoit,

101. De cui la parole venoit;

102. Le seint esprit li aprenoit

103. Ce qu'il disoit et i ovroit:

104. Les cuers des auditeurs ovroit

105. A la parole recevoir.

106. Li ardant le crurent por voir,

107. Qui dou feu erent tormenté,

108. Homes et fames a plenté,

109. Pouvres et riches tot en commun;

110. Touz les menbres orent li un

111. Perdu et li autre partie,

112. Si com aloit la maladie.

113. Au prouveire tuit obeïrent

114. Et vous de cire fere firent

115. Dou pois qu'il orent comendé

116. Et a la haute mere Dé,

117. Dame de Chartres, les voerent,

118. Que a Chartres les envoerent

119. Par leur amis, leiaus mesages.

120. Le nombre truis bien des ymages:

121. Deus cens en i ot et sexante,

122. Si com li livres le me chante.

123. Chacune fu sus l'autel mise;

124. Et vindrent par[l. por] l'oevre de l'iglise.

125. Meintenant la vertu devine

126. Dou ciel envoia medecine

127. Que li ardant tantoust estaindrent,

128. Nul signe de feu ne remeindrent.

129. Oncore Dex plus i ouvra:

130. Chacun ses menbres recouvra

131. Touz entiers, sanz point de defaute;

132. Ci ot vertu poissant et haute!

133. Et quant l'ardeur fu toute esteinte,

134. La char, qui ert de verte teinte,

135. Comme charbon arse et broïe,

136. Devint belle, saine et blanchie,

137. Qui ert et noire et orible.

138. Cil a qui rien n'est impossible

139. I demostra bien sa poissance

140. Et que vers lui grant acointance

141. Ha la Virge qui l'enfanta.

142. La mere vers son effant a

143. Poer d'empetrer quant qu'el quiert:

144. Le poer qui au filz afiert

145. A la mere a sa volenté;

146. L'un poer est a l'autre enté

147. Ainsint con li rains en la souche.

148. Or prion de cuer et de bouche

149. La dame qu'elle, par sa grace,

150. Vers son filz soit nostre avocace,

151. D'empetrer nous dou ciel la joie.

152. La mere et le filz nos en oie,

153. Qui par la priere sa mere

154. Nos conduie devant son pere,

155. A cui est reyaume et enpire