VII. D'une meschine de Seint Prest que Nostre Dame resoucita de mort a vie

1. Ge ne voill mie me recreire

2. Des miracles qui font a creire

3. Que ge la verité n'en die,

4. Que Dieu fit por sa chiere amie,

5. La douce mere glorieuse.

6. Ge ne travail pas en oeseuse

7. Se ge faz chouse qui apere

8. A l'enneur de Dieu et sa mere.

9. Quant il m'en ont le sen presté,

10. Drois est que je soie apresté

11. A leur seintes oevres descrire.

12. Quant d'ouvrer me donnent matire,

13. Bien voil que il m'i truissent prest.

14. En ce tens avint a Seint Prest

15. Aventure d'autre maniere

16. C'une fame qui ert teissiere

17. En cele vile que g'ei dite

18. Avoit une fille petite.

19. Quant la mere en son ovroer

20. Teissoit, l'enfant s'ala joer,

21. Si comme a coutume l'avoit,

22. Ne la mere mot ne savoit

23. Qui entendoit sa teille a teistre;

24. N'avoit pas veü sa fille eistre

25. De sa meson, dom ert eissue.

26. La garce fu enmy la rue,

27. Par la ville s'ala joant;

28. Entor l'eive ala rouant

29. D'uns foussés grant et parfons:

30. Estoit plein d'amont dusqu'an fons.

31. L'enfantet ou foussé chaï,

32. Dom a sa mere meschaï,

33. Car sa filleite fu neiee

34. Ne ceste aventure naiee

35. Ne poet pas n'estre teüe,

36. Car une fame de la rue

37. Delez le foussé tint sa voie

38. Si pres qu'il estut qu'elle voie

39. L'aventure et aperceive.

40. L'enfant vit enfondree en l'eive,

41. Qui n'en paroit fors que seul tant

42. La robe qui aloit flotant.

43. La fame fu enpoentee;

44. Comme fame s'est escriee,

45. Qui est toz jors de crier preste;

46. Grant noise fist et grand moleste.

47. Ses voisines huche et escrie

48. Et tous ses voisins que aïe

49. Et secors li vienent tout feire

50. A un enfant de l'eive treire

51. Qu'a trové ou foussé cheü.

52. Tuit li voisin sunt esmeü

53. Et corent au cri tuit a orne.

54. Neïs la mere triste et morne,

55. Pale, esbahie et esperdue

56. I est o les autres courue

57. Et ja pensoit en son courage

58. Son grant ennui, son grant dommage;

59. Criant aloit o vois hauteine:

60. " Dame de Chartres souvereine

61. Qui les besoigneus regardez,

62. Dame, ma fille me gardez.

63. Virge pucelle, neste et pure,

64. Ma fille met en vostre cure.

65. Dame de Chartres, entendez

66. Mon cri: mon enfant me rendez.

67. Einsint crieit por sa fillete

68. Qui de l'eive estoit ja treite

69. Tele comme chouse naiee.

70. Tant avoit de l'eive engorgiee

71. Que esteinz estoient ses esperis

72. Et l'alennissement peris,

73. Qu'el n'espiroit ne n'alenoit,

74. La boche et les eulz clos tenoit,

75. Pale ot le vis et sans coulor.

76. La mere, qui ert en doulour

77. Et toutes voies avoit fiance

78. En Nostre Dame et esperance,

79. Por ce que l'avoit appellee

80. Et sa fille a lé commandee,

81. En ses bras sa fille a seisie;

82. A la dame en qui el se fie,

83. A Chartres, acoilli sa voie.

84. Tretout son vignez la convoie;

85. Vers Chartres li font compaignie,

86. Et si ne cuidoient il mie

87. Que sa fille mes recovrast

88. Se Dex par virtu n'i ovrast.

89. La mere, triste et irascue,

90. Plorant, a Chartres est venue.

91. Son deul feisant entre en l'iglise;

92. Sa fille a devant l'autel mise,

93. Qui en verité ert sans vie.

94. La haute dame, en plorant, prie

95. Que sa priere einsi entende

96. Que sa fille vive li rende.

97. La douce dame glorieuse

98. La mere qui ert angoisseuse

99. Regarda piteiablement

100. Et oï debonneirement

101. Son pleint, son plor et ses prieres,

102. Qu'il avint, ne demora guieres,

103. Que li enfés, qui estoit mort,

104. Mist hors, par la bouche, a grant gort

105. L'eive qui ert ou corps entree,

106. Dom el avoit pris tel ventree

107. Qu'a pou le ventre ne creva,

108. Mes par miracle s'esseva,

109. Que l'eive s'en eissi tretoute

110. Si que ou ventre n'en remest goute.

111. Dex la fame einssi regarda

112. Que guieres enprés ne tarda

113. Qu'a sa fille, la pucellete,

114. Furent ouverz eulx et boucheite,

115. Car li esperiz repera

116. Qui tout ses menbres espira.

117. La mere fut eslaicee,

118. Qui devant estoit courrouciee,

119. Quant sa fille revint en vie.

120. A ma dame seinte Marie,

121. Dame de Chartres renommee,

122. Qui sa fille ot resuscitee,

123. Rendi graces o liee chiere.

124. A Seint Prest s'en ala arriere,

125. Sa fille seine en remena,