retour

UNIVERSITÉ D'OTTAWA Faculté des Arts

Laboratoire de français ancien

Chrétien de Troyes
Le Chevalier au Lion (Yvain)

Texte complet

Mout fui bien la nuit ostelez,
Et mes chevax fu establez,
Que g' en oi mout proié le soir.
Lors que l' en pot le jor veoir,
Si fu bien fette ma proiere;
Mon boen oste et sa fille chiere
Au Saint Esperit comandai;
A trestoz congié demandai,
Si m' en alai lués que je poi.
L' ostel gaires esloignié n' oi
Qant je trovai en uns essarz
Tors salvages, ors et lieparz
Qui s' antreconbatoient tuit
Et demenoient si grant bruit
Et tel fierté et tel orguel,
Se voir conuistre vos an vuel,
C' une piece me treis arriere,
Que nule beste n' est tant fiere
Ne plus orguelleuse de tor.
Uns vileins, qui resanbloit Mor,
Leiz et hideus a desmesure,
Einsi tres leide criature
Qu' an ne porroit dire de boche,
Assis s' estoit sor une çoche,
Une grant maçue en sa main.
Je m' aprochai vers le vilain,
Si vi qu' il ot grosse la teste
Plus que roncins ne autre beste,
Chevox mechiez et front pelé,
S' ot pres de .ii. espanz de lé,
Oroilles mossues et granz
Autiex com a uns olifanz,
Les sorcix granz et le vis plat,
Ialz de çuete et nes de chat,
Boche fandue come lous,
Danz de sengler aguz et rous,
Barbe rosse, grenons tortiz,
Et le manton aers au piz,

80e. 305

Longue eschine torte et boçue.
Apoiez fu sor sa maçue,
Vestuz de robe si estrange
Qu' il n' i avoit ne lin ne lange,
Einz ot a son col atachiez
.II. cuirs, de novel escorchiez,
Ou de .ii. tors ou de .ii. bués.
An piez sailli li vilains lués
Qu' il me vit vers lui aprochier.
Ne sai s' il me voloit tochier
Ne ne sai qu' il voloit enprendre,
Mes je me garni de desfandre
Tant que je vi que il estut,
En piez toz coiz, ne ne se mut,
Et fu montez desor .i. tronc,
S' ot bien .xvii. piez de lonc;
Si m' esgarda ne mot ne dist,
Ne plus c' une beste feïst;
Et je cuidai qu' il ne seüst
Parler ne reison point n' eüst.
Totevoie tant m' anhardi
Que je li dis: « Va, car me di
Se tu es boene chose ou non! »
Et il me dist qu' il ert uns hom.
« Quiex hom ies tu? - Tex con tu voiz;
Si ne sui autres nule foiz.
- Que fez tu ci? - Ge m' i estois,
Et gart les bestes de cest bois.
- Gardes? Par saint Pere de Rome,
Ja ne conuissent eles home;
Ne cuit qu' an plain ne an boschage
Puisse an garder beste sauvage,
N' en autre leu, por nule chose,
S' ele n' est liee et anclose.
- Je gart si cestes et justis
Que ja n' istront de cest porpris.
- Et tu, comant? Di m' an le voir.
- N' i a celi qui s' ost movoir
Des que ele me voit venir;
Car quant j' en puis une tenir,
Si l' estraing si par les .ii. corz,
As poinz que j' ai et durs et forz,
Que les autres de peor tranblent
Et tot environ moi s' asanblent

80f. 349

Ausi con por merci crier;
Ne nus ne s' i porroit fier,
Fors moi, s' antr' eles s' estoit mis,
Qu' il ne fust maintenant ocis.

Einsi sui de mes bestes sire,
Et tu me redevroies dire
Quiex hom tu ies et que tu quiers.
- Je sui, fet il, uns chevaliers
Qui quier ce que trover ne puis;
Assez ai quis, et rien ne truis.
- Et que voldroies tu trover?
- Avanture, por esprover
Ma proesce et mon hardemant.
Or te pri et quier et demant,
Se tu sez, que tu me consoille
Ou d' aventure ou de mervoille.
- A ce, fet il, faudras tu bien:
D' aventure ne sai je rien,
N' onques mes n' en oï parler.
Mes se tu voloies aler
Ci pres jusqu' a une fontainne,
N' en revandroies pas sanz painne,
Se ne li randoies son droit.
Ci pres troveras orendroit
.I. santier qui la te manra.
Tote la droite voie va,
Se bien viax tes pas anploier,
Que tost porroies desvoier:
Il i a d' autres voies mout.
La fontainne verras qui bout,
S' est ele plus froide que marbres.
Onbre li fet li plus biax arbres
C' onques poïst former Nature.
En toz tens sa fuelle li dure,
Qu' il ne la pert por nul iver.
Et s' i pant uns bacins de fer
A une si longue chaainne
Qui dure jusqu' an la fontainne.
Lez la fontainne troverras
.I. perron, tel con tu verras;
Je ne te sai a dire quel,
Que je n' en vi onques nul tel;
Et d' autre part une chapele,
Petite, mes ele est mout bele.

81a. 393

S' au bacin viax de l' eve prandre
Et desus le perron espandre,
La verras une tel tanpeste
Qu' an cest bois ne remanra beste,
Chevriax ne cers ne dains ne pors,
Nes li oisel s' an istront fors;
Car tu verras si foudroier,
Vanter, et arbres peçoier,
Plovoir, toner et espartir
Que, se tu t' an puez departir
Sanz grant enui et sanz pesance,
Tu seras de meillor cheance
Que chevaliers qui i fust onques. »
Del vilain me parti adonques,
Qu' il i ot la voie mostree.
Espoir si fu tierce passee
Et pot estre pres de midi
Quant l' arbre et la fontainne vi.
Bien sai de l' arbre, c' est la fins,
Que ce estoit li plus biax pins
Qui onques sor terre creüst.
Ne cuit c' onques si fort pleüst
Que d' eve i passast une gote,
Einçois coloit par desor tote.
A l' arbre vi le bacin pandre,
Del plus fin or qui fust a vandre
Encor onques en nule foire.
De la fontainne, poez croire
...*
Li perrons ert d' une esmeraude,
Perciee ausi com une boz,
Et s' a .iiii. rubiz desoz,
Plus flanboianz et plus vermauz
Que n' est au matin li solauz,
Qant il apert en oriant.
Ja, que je sache a esciant,
Ne vos an mantirai de mot.
La mervoille a veoir me plot
De la tanpeste et de l' orage,
Don je ne me ting mie a sage,
Que volentiers m' an repantisse
Tot maintenant, se je poïsse,
Quant je oi le perron crosé
De l' eve au bacin arosé.
Mes trop en i verssai, ce dot;

81b. 438

Que lors vi le ciel si derot
Que de plus de .xiiii. parz
Me feroit es ialz li esparz
Et les nues tot mesle mesle
Gitoient pluie, noif et gresle.
Tant fu li tans pesmes et forz
Que cent foiz cuidai estre morz
Des foudres qu' antor moi cheoient
Et des arbres qui peceoient.
Sachiez que mout fui esmaiez,
Tant que li tans fu rapaiez.
Mes Dex tost me rasegura,
Que li tans gaires ne dura
Et tuit li vant se reposerent;
Des que Deu plot, vanter n' oserent.
Et quant je vi l' air cler et pur,
De joie fui toz asseür,
Que joie, s' onques la conui,
Fet tot oblier grant enui.
Jusque li tans fu trespassez,
Vi sor le pin toz amassez
Oisiax, s' est qui croire le vuelle,
Qu' il n' i paroit branche ne fuelle
Que tot ne fust covert d' oisiax;
S' an estoit li arbres plus biax;
Doucemant li oisel chantoient
Si que mout bien s' antracordoient;
Et divers chanz chantoit chascuns,
C' onques ce que chantoit li uns
A l' autre chanter ne oï.
De lor joie me resjoï,
S' escoutai tant qu' il orent fet
Lor servise trestot a tret;
Que mes n' oï si bele joie
Ne ja ne cuit que nus hom l' oie
Se il ne va oïr celi
Qui tant me plot et abeli
Que je m' an dui por fos tenir.
Tant i fui que j' oï venir
Chevaliers, ce me fu avis,
Bien cuidai que il fussent dis,
Tel noise et tel bruit demenoit
Uns seus chevaliers qui venoit.

81c. 481

Quant ge le vi tot seul venant,
Mon cheval restraing maintenant
N' a monter demore ne fis;
Et cil, come mautalentis,
Vint plus tost c' uns alerions,
Fiers par sanblant come lions.
De si haut con il pot crier
Me comança a desfier,
Et dist: « Vassax, mout m' avez fet,
Sanz desfiance, honte et let.
Desfier me deüssiez vos
Se il eüst reison an vos,
Ou au moins droiture requerre
Einz que vos me meüssiez guerre.
Mes se je puis, sire vasax,
Sor vos retornera cist max
Del domage qui est paranz;
Environ moi est li garanz
De mon bois qui est abatuz.
Plaindre se doit qui est batuz;
Et je me plaing, si ai reison,
Que vos m' avez de ma meison
Fors chacié a foudre et a pluie.
Fet m' avez chose qui m' enuie,
Et dahez ait cui ce est bel,
Qu' an mon bois et an mon chastel
M' avez feite tele envaïe
Ou mestier ne m' eüst aïe
Ne de grant tor ne de haut mur.
Onques n' i ot home asseür
An forteresce qui i fust
De dure pierre ne de fust.
Mes sachiez bien que desormés
N' avroiz de moi trives ne pes. »
A cest mot, nos antrevenimes,
Les escuz anbraciez tenimes,
Si se covri chascuns del suen.
Li chevaliers ot cheval buen
Et lance roide; et fu sanz dote
Plus granz de moi la teste tote.
Einsi del tot a meschief fui,
Que je fui plus petiz de lui
Et ses chevax miaudres del mien.
Parmi le voir, ce sachiez bien,

81d. 525

M' an vois por ma honte covrir.
Si grant cop con je poi ferir
Li donai, c' onques ne m' an fains;
El conble de l' escu l' atains;
S' i mis trestote ma puissance
Si qu' an pieces vola ma lance;
Et la soe remest antiere,
Qu' ele n' estoit mie legiere,
Einz pesoit plus, au mien cuidier,
Que nule lance a chevalier,
Qu' ainz nule si grosse ne vi.
Et li chevaliers me feri
Si duremant que del cheval
Parmi la crope, contreval,
Me mist a la terre tot plat;
Si me leissa honteus et mat,
C' onques nus ne me regarda.
Mon cheval prist et moi leissa,
Si se mist arriere a la voie.
Et je, qui mon roi ne savoie,
Remés angoisseus et pansis.
Delez la fontainne m' asis
.I. petit, si me sejornai;
Le chevalier siudre n' osai,
Que folie feire dotasse.
Et, se je bien siudre l' osasse,
Ne sai ge que il se devint.
En la fin, volantez me vint
Qu' a mon oste covant tanroie
Et que a lui m' an revanroie.
Ensi me plot, ensi le fis;
Mes jus totes mes armes mis
Por plus aler legieremant;
Si m' an reving honteusemant.

Qant je ving la nuit a ostel,
Trovai mon oste tot autel,
Ausi lié et ausi cortois
Come j' avoie fet einçois.
Onques de rien ne m' aparçui,
Ne de sa fille ne de lui,
Que moins volentiers me veïssent
Ne que moins d' enor me feïssent
Qu' il avoient fet l' autre nuit.
Grant enor me porterent tuit,

81e. 569

Les lor merciz, an la meison;
Et disoient c' onques mes hom
N' an eschapa, que il seussent
Ne que il oï dire eussent,
De la don j' estoie venuz,
Qu' il n' i fust morz ou retenuz.
Ensi alai, ensi reving;
Au revenir por fol me ting.
Si vos ai conté come fos
Ce c' onques mes conter ne vos.
- Par mon chief, fet messire Yvains,
Vos estes mes cosins germains,
Si nos devons mout entramer;
Mes de ce vos puis fol clamer
Quant vos tant le m' avez celé.
Se je vos ai fol apelé,
Je vos pri qu' il ne vos an poist,
Que se je puis et il me loist,
G' irai vostre honte vangier.
- Bien pert que c' est aprés mangier,
Fet Kex, qui teire ne se pot.
Plus a paroles an plain pot
De vin qu' an un mui de cervoise.
L' en dit que chaz saous s' anvoise.
Aprés mangier, sanz remuer,
Vet chascuns Loradin tuer,
Et vos iroiz vengier Forré!
Sont vostre panel aborré
Et voz chauces de fer froiees
Et voz banieres desploiees?
Or tost, por Deu, messire Yvain,
Movroiz vos enuit ou demain?
Feites le nos savoir, biax sire,
Quant vos iroiz an cest martire,
Que nos vos voldrons convoier;
N' i avra prevost ne voier
Qui volantiers ne vos convoit.
Et si vos pri, comant qu' il soit,
N' en alez pas sanz noz congiez.
Et se vos anquenuit songiez
Malvés songe, si remenez!
- Comant? Estes vos forssenez,
Messire Kex, fet la reïne,
Que vostre leingue onques ne fine ?

81f. 613

La vostre leingue soit honie,
Que tant i a d' escamonie!
Certes, vostre leingue vos het,
Que tot le pis que ele set
Dit a chascun, comant qu' il soit.
Leingue qui onques ne recroit
De mal dire soit maleoite!
La vostre leingue si esploite
Qu' ele vos fet partot haïr:
Mialz ne vos puet ele traïr.
Bien sachiez, je l' apeleroie
De traïson, s' ele estoit moie.
Home qu' an ne puet chastier
Devroit en au mostier lier
Come desvé, devant les prones.
- Certes, dame, de ses paroles*,
Fet messire Yvains, ne me chaut.
Tant puet et tant set et tant vaut
Messire Kex an totes corz
Qu' il n' i iert ja müez ne sorz.
Bien set ancontre vilenie
Respondre san et corteisie,
ne nel fist onques autremant.
Or savez vos bien se je mant.
Mes je n' ai cure de tancier
Ne de folie ancomancier;
Que cil ne fet pas la meslee
Qui fiert la premiere colee,
Einz la fet cil qui se revanche.
Bien tanceroit a un estrange
Qui ranpone son conpaignon.
Ne vuel pas sanbler le gaignon
Qui se herice et se reguingne
Qant autres gaingnons le rechingne. »

Queque il parloient ensi,
Li rois fors de la chanbre issi,
Ou il ot fet longue demore,
Que dormi ot jusqu' a ceste ore.
Et li baron, quant il le virent,
Tuit an piez contre lui saillirent
Et il toz raseoir les fist.
Delez la reïne s' asist,
Et la reïne maintenant
Les noveles Calogrenant

82a. 657

Li reconta tot mot a mot,
Que bien et bel conter li sot.
Li rois les oï volantiers
Et fist trois sairemanz antiers,
L' ame Uterpandagron son pere
Et la son fil et la sa mere,
Qu' il iroit veoir la fontaine,
Ja einz ne passeroit quinzaine,
Et la tempeste et la mervoille,
Si que il i vanra la voille
Monseignor saint Jehan Baptiste,
Et s' i panra la nuit son giste,
Et dit que avoec lui iroient
Tuit cil qui aler i voldroient.
De ce que li rois devisa
Tote la corz mialz l' en prisa,
Car mout i voloient aler
Li baron et li bacheler.
Mes qui qu' an soit liez et joianz,
Messire Yvains an fu dolanz,
Qu' il i cuidoit aler toz seus;
Si fu destroiz et angoisseus
Del roi, qui aler i devoit.
Por ce seulemant li grevoit
Qu' il savroit bien que la bataille
Avroit messire Kex, sanz faille,
Einz que il, s' il la requeroit;
Ja vehee ne li seroit;
Ou messire Gauvains meïsmes,
Espoir, li demandera primes.
Se nus de ces deus la requiert,
Ja contredite ne lor iert.
Mes il ne les atendra mie,
Qu' il n' a soing de lor conpaignie,
Einçois ira toz seus, son vuel,
Ou a sa joie ou a son duel,
Et, qui que remaigne a sejor,
Il vialt estre jusqu' a tierz jor
An Broceliande, et querra,
S' il puet, tant que il troverra
L' estroit santier tot boissoneus,
Que trop an est cusançoneus,
Et la bande* et la meison fort
Et le solaz et le deport

82b. 701

De la cortoise dameisele
Qui mout est avenanz et bele,
Et le prodome avoec sa fille,
Qui a enor feire s' essille,
Tant est frans et de boene part.
Puis verra la tor et l' essart
Et le grant vilain qui le garde.
Li veoirs li demore et tarde
Del vilain qui tant par est lez,
Granz et hideus et contrefez
Et noirs a guise d' esperon.
Puis verra, s' il puet, le perron
Et la fontainne et le bacin
Et les oisiax desor le pin;
Si fera plovoir et vanter.
Mes il ne s' en quiert ja vanter
Ne ja, son vuel, nus nel savra
Jusque tant que il en avra
Grant honte ou grant enor eüe,
Puis si soit la chose seüe.

Messire Yvains de la cort s' anble
Si qu' a nul home ne s' asanble,
Mes seus vers son ostel s' en va.
Tote sa mesniee trova,
Si comande a metre sa sele
Et un suen escuier apele
Cui il ne celoit nule rien.
« Di, va! fet il, avoec moi vien
La fors et mes armes m' aporte!
Je m' an istrai par cele porte
Sor mon palefroi, tot le pas.
Garde ne demorer tu pas,
Qu' il me covient mout loing errer.
Et mon cheval fai bien ferrer,
Si l' amainne tost aprés moi,
Puis ramanras mon palefroi.
Mes garde bien, ce te comant,
S' est nus qui de moi te demant,
Que ja noveles li an dies.
Se or de rien an moi te fies,
Ja mar t' i fieroies mes.
- Sire, fet il, or aiez pes,
Que ja par moi nus nel savra.
Alez, que je vos siudrai la. »

82c. 745

Messire Yvains maintenant monte,
Qu' il vangera, s' il puet, la honte
Son cosin einz que il retort.
Li escuiers maintenant cort
Au boen cheval, si monta sus,
Que de demore n' i ot plus,
Qu' il n' i failloit ne fers ne clos.
Son seignor siust toz les galos
Tant que il le vit descendu,
Qu' il l' avoit un po atendu
Loing del chemin, en .i. destor.
Tot son hernois et son ator
En aporte; cil l' atorna.
Messire Yvains ne sejorna,
Puis qu' armez fu, ne tant ne quant, .
Einçois erra chascun jor tant,
Par montaignes et par valees
Et par forez longues et lees,
Par leus estranges et salvages,
Et passa mainz felons passages
Et maint peril et maint destroit
Tant qu' il vint au santier estroit
Plain de ronces et d' oscurtez;
Et lors fu il asseurez
Qu' il ne pooit mes esgarer.
Qui que le doie conparer,
Ne finera tant que il voie
Le pin qui la fontainne onbroie,
Et le perron et la tormante
Qui grausle et pluet et tone et vante.
La nuit ot, ce poez savoir,
Tel oste com il vost avoir;
Car plus de bien et plus d' enor
Trueve il assez el vavasor
Que ne vos ai conté et dit;
Et an la pucele revit
De san et de biauté cent tanz
Que n' ot conté Calogrenanz,
Qu' an ne puet pas dire la some
De prode fame et de prodome,
Des qu' il s' atorne a grant bonté.
Ja n' iert tot dit ne tot conté,
Que leingue ne puet pas retreire
Tant d' enor con prodon set feire.

82d. 789

Messire Yvains cele nuit ot
Mout boen ostel, et mout li plot.
Et vint es essarz l' andemain,
Si vit les tors et le vilain,
Qui la voie li anseingna;
Mes de cent foiz se seingna
De la mervoille que il ot,
Comant Nature feire sot
Oevre si leide et si vilainne.
Puis erra jusqu' a la fontainne,
Si vit qanqu' il voloit veoir.
Sanz arester et sanz seoir,
Verssa sor le perron de plain
De l' eve le bacin tot plain.
Et maintenant vanta et plut
Et fist tel tans con faire dut.
Et quant Dex redona le bel,
Sor le pin vindrent li oisel
Et firent joie merveilleuse
Sor la fontainne perilleuse.
Einz que la joie fust remeise,
Vint, d' ire plus ardanz que breise,
Uns chevaliers a si grant bruit
Con s' il chaçast .i. cerf de ruit.
Et maintenant qu' il s' antrevirent,
S' antrevindrent et sanblant firent
Qu' il s' antrehaïssent de mort.
Chascuns ot lance roide et fort;
Si s' antredonent si granz cos
Qu' an.ii. les escuz de lor cos
Percent, et li hauberc deslicent;
Les lances fandent et esclicent,
Et li tronçon volent an haut.
Li uns l' autre a l' espee assaut;
Si ont, au chaple des espees,
Les guiges des escuz colpees
Et les escuz dehachiez toz,
Et par desus et par desoz,
Si que les pieces an depandent
N' il ne s' an cuevrent ne desfandent;
Car si les ont harigotez
Qu' a delivre sor les costez
Et sor les piz et sor les hanches
Essaient les espees blanches.

82e. 833

8Felenessemant s' antrespruevent
N' onques d' un estal ne se muevent
Ne plus que feïssent dui gres;
Einz dui chevalier plus angrés
Ne furent de lor mort haster.
N' ont cure de lor cos gaster,
Que mialz qu' il pueent les anploient.
Les hiaumes anbuingnent et ploient
Et des haubers les mailles volent,
Si que del sanc assez se tolent;
Car d' ax meïsmes sont si chaut
Lor hauberc que li suens ne vaut
A chascun gueres plus d' un froc.
Anz el vis se fierent d' estoc,
S' est mervoille comant tant dure
Bataille si fiere et si dure.
Mes andui sont de si fier cuer
Que li uns por l' autre, a nul fuer,
De terre .i. pié ne guerpiroit
Se jusqu' a mort ne l' enpiroit.
Et de ce firent mout que preu
C' onques lor cheval an nul leu
Ne ferirent ne maheignierent,
Qu' il ne vostrent ne ne deignierent,
Mes tozjorz a cheval se tienent
Que nule foiz a pié ne vienent;
S' an fu la bataille plus bele.
En la fin, son hiaume escartele
Au chevalier messire Yvains.
Del cop fu estonez et vains
Li chevaliers; mout s' esmaia,
Qu' ainz si felon cop n' essaia,
Qu' il li ot desoz le chapel
Le chief fandu jusqu' au cervel,
Tant que del cervel et del sanc
Taint la maille del hauberc blanc,
Don si tres grant dolor santi
Qu' a po li cuers ne li manti.
S' il s' an foï, n' a mie tort,
Qu' il se santi navrez a mort;
Car riens ne li valut desfansse.
Si tost s' an fuit, com il s' apansse,
Vers son chastel, toz esleissiez,
Et li ponz li fu abeissiez

82f. 877

Et la porte overte a bandon;
Et messire Yvains de randon
Quanqu' il puet aprés esperone.
Si con girfauz grue randone,
Qui de loing muet et tant l' aproche
Qu' il la cuide panre et n' i toche,
Ensi cil fuit, et cil le chace
Si pres qu' a po qu' il ne l' anbrace,
Et si ne le par puet ataindre;
Et s' est si pres que il l' ot plaindre
De la destrece que il sant.
Mes tozjorz a foïr entant
Et cil de chacier s' esvertue,
Qu' il crient sa poinne avoir perdue
Se mort ou vif ne le retient,
Que des ranpones li sovient
Que messire Kex li ot dites.
N' est pas de la promesse quites
Que son cosin avoit promise,
Ne creüz n' iert an nule guise
S' anseignes veraies n' an porte.
A esperon jusqu' a la porte
(A esperon jusqu' a la porte)*
De son chastel l' en a mené;
Si sont anz enbedui antré.
Home ne fame n' i troverent
Es rues par ou il antrerent,
Si vindrent anbedui d' eslés
Parmi la porte del palés.

La porte fu mout haute et lee,
Si avoit si estroite antree
Que dui home ne dui cheval
Sanz anconbrier et sanz grant mal
N' i pooient ansanble antrer
N' anmi la porte entrancontrer;
Car ele estoit autresi faite
Con l' arbaleste qui agaite
Le rat, quant il vient au forfet;
Et l' espee est an son aguet
Desus, qui tret et fiert et prant,
Qu' ele eschape lors et descent
Que riens nule adoise a la clef,
Ja n' i tochera si soef.
Ensi desus la porte estoient

83a. 920

Dui trabuchet qui sostenoient
Amont une porte colant
De fer esmolue et tranchant;
Se riens sor ces engins montoit,
La porte d' amont descendoit;
S' estoit pris et dehachiez toz
Cui la porte ateignoit desoz.
Et tot enmi a droit conpas
Estoit si estroiz li trespas
Con se fust uns santiers batuz.
El droit santier s' est anbatuz
Li chevaliers mout sagemant
Et messire Yveins folemant
Hurte grant aleüre aprés,
Si le vint ateignant si pres
Qu' a l' arçon derriere le tint;
Et de ce mout bien li avint
Qu' il se fu avant estanduz:
Toz eüst esté porfanduz,
Se ceste avanture ne fust,
Que li chevax marcha le fust
Qui tenoit la porte de fer.
Si con li deables d' anfer,
Descent la porte et chiet aval
Sanz enconbrier et sanz grant mal
Derriere, et tranche tot par mi;
Mes ne tocha, la Deu merci,
Monseignor Yvein maintenant,
Qu' a res del dos li vint reant,
Si c' anbedeus les esperons
Li trancha a res des talons,
Et il cheï mout esmaiez;
Cil qui estoit a mort plaiez
Li eschapa en tel meniere.
Une autel porte avoit derriere
Come cele devant estoit.
Li chevaliers qui s' an fuioit
Par cele porte s' an foï
Et la porte aprés lui cheï.
Ensi fu messire Yvains pris.
Mout angoisseus et antrepris
Remest dedanz la sale anclos,
Qui tote estoit cielee a clos
Dorez, et pointes les meisieres

83b. 964

De boene _vre et de colors chieres.
Mes de rien si grant duel n' avoit
Con de ce que il ne savoit
Quel part cil an estoit alez.
Une chanbrete iqui delez
Oï ovrir; d' un huis estroit,
Queque il ert an son destroit,
S' an issi une dameisele,
Gente de cors et de vis bele,
Et l' uis aprés li referma.
Qant monseignor Yvein trova,
Si l' esmaia mout de premiers:
« Certes, fet ele, chevaliers,
Je criem que mal soiez venuz:
Se vos estes ceanz tenuz,
Vos i seroiz toz depeciez,
Que mes sire est a mort plaiez
Et bien sai que vos l' avez mort.
Ma dame an fet .i. duel si fort,
Et ses genz anviron lui crïent,
Que par po de duel ne s' ocïent;
Si vos sevent il bien ceanz,
Mes entr' ax est li diax si granz
Que il n' i pueent or entandre;
Si vos voelent ocirre ou pandre:
A ce ne pueent il faillir,
Qant il vos voldront assaillir. »
Et messire Yvains li respont:
« Ja, se Deu plest, ne m' ocirront
Ne ja par aus pris ne serai.
- Non, fet ele, que g' en ferai
Avoec vos ma puissance tote.
N' est mie prodon qui trop dote;
Por ce cuit que prodom soiez
Que n' iestes pas trop esmaiez.
Et sachiez bien, se je pooie,
Servise et enor vos feroie,
Car vos la feïstes ja moi.
Une foiz, a la cort le roi
M' envoia ma dame an message.
Espoir, si ne fui pas si sage,
Si cortoise, ne de tel estre
Come pucele deüst estre;
Mes onques chevalier n' i ot

83c. 1008

Qu' a moi deignast parler .i. mot
Fors vos, tot seul, qui estes ci;
Mes vos, la vostre grant merci,
M' i enorastes et servistes.
De l' enor que vos m' i feïstes
Vos randrai ja le guerredon.
Bien sai comant vos avez non
Et reconeü vos ai bien:
Filz estes au roi Urien
Et s' avez non messire Yvains.
Or soiez seürs et certains
Que ja, se croire me volez,
N' i seroiz pris ne afolez;
Et cest mien anelet prendroiz
Et, s' il vos plest, sel me randroiz
Quant je vos avrai delivré. »
Lors li a l' anelet livré,
Si li dist qu' il avoit tel force
Com a, desus le fust, l' escorce,
Qu' el le cuevre, qu' an n' en voit point;
Mes il covient que l' en l' anpoint
Si qu' el poing soit la pierre anclose;
Puis n' a garde de nule chose
Cil qui l' anel an son doi a,
Que ja veoir ne le porra
Nus hom, tant ait les ialz overz,
Ne que le fust qui est coverz
De l' escorce, qu' an n' en voit point.
Monseignor Yvain ce anjoint,
Et, quant ele li ot ce dit,
Sel mena seoir en .i. lit
Covert d' une coute si riche
Qu' ainz n' ot tel li dus d' Osteriche;
Cele dit que, se il voloit,
A mangier li aporteroit;
Et il dist qu' il li estoit bel.
La dameisele cort isnel
En sa chanbre et revint mout tost,
S' aporta .i. chapon en rost
Et vin qui fu de boene grape,
Plain pot, covert de blanche nape;
Si li a a mangier offert
Cele qui volentiers le sert;
Et cil, cui bien estoit mestiers,

83d. 1049

(Et cil cui bien estoit mestiers)*
Menja et but mout volentiers.

Quant il ot mangié et beü,
Furent par leanz espandu
Li chevalier qui le queroient,
Qui lor seignor vangier voloient,
Qui ja estoit an bieres mis.
Et cele li a dit: « Amis,
Oez qu' il vos quierent ja tuit;
Mout i a grant noise et grant bruit,
Mes, qui veigne et qui que voise,
Ne vos movez ja por la noise,
Que vos ne seroiz ja trovez,
Se de cest lit ne vos movez;
Ja verroiz plainne ceste sale
De gent mout enuieuse et male
Qui trover vos i cuideront;
Et si cuit qu' il aporteront
Par ci le cors por metre an terre;
Si vos comanceront a querre
Et desoz bans et desoz liz.
Si seroit solaz et deliz
A home qui peor n' avroit,
Quant gent si avuglez verroit;
Qu' il seront tuit si avuglé,
Si desconfit, si desjuglé
Que il anrageront tuit d' ire;
Je ne vos sai ore plus dire
Ne je n' i os plus demorer.
Mes Deu puisse je aorer,
Qui m' a doné le leu et l' eise
De feire chose qui vos pleise,
Que mout grant talant en avoie. »
Lors s' est arriers mise a la voie
Et, quant ele s' an fu tornee,
Fu tote la genz atornee,
Qui de .ii. parz as portes vindrent
Et bastons et espees tindrent;
Si ot mout grant fole et grant presse
De gent felenesse et angresse;
Et virent del cheval tranchié,
Devant la porte, la mitié.
Lors si cuidoient estre cert,
Qant li huis seroient overt,

83e. 1095

Que dedanz celui troveroient
Que il por ocirre queroient.
Puis firent traire amont les portes,
Par coi maintes genz furent mortes,
Mes il n' i ot a celui siege
Tandu ne paveillon ne piege,
Einz i entrerent tuit de front;
Et l' autre mitié trovee ont
Del cheval mort devant le suel;
Mes onques entr' ax n' orent oel
Don monseignor Yvain veïssent,
Que mout volentiers oceïssent;
Et il les veoit anragier
Et forssener et correcier;
Et disoient: « Ce, que puet estre?
Que ceanz n' a huis ne fenestre
Par ou riens nule s' an alast,
Se ce n' ert oisiax qui volast
Ou escuriax ou cisemus
Ou beste ausi petite ou plus,
Que les fenestres sont ferrees,
Et les portes furent fermees
Lors que mes sire en issi fors;
Morz ou vis est ceanz li cors,
Que defors ne remest il mie.
La sele assez plus que demie
Est ça dedanz, ce veons bien,
Ne de lui ne trovomes rien
Fors que les esperons tranchiez
Qui li cheïrent de ses piez.
Or au cerchier par toz ces engles,
Si lessomes ester ces gengles,
Qu' ancor est il ceanz, ce cuit,
Ou nos somes anchanté tuit,
Ou tolu le nos ont maufé. »
Ensi trestuit d' ire eschaufé
Parmi la sale le queroient
Et parmi les paroiz feroient
Et par les liz et par les bans;
Mes des cos fu quites et frans
Li liz ou cil estoit couchiez,
Qu' il n' i fu feruz ne tochiez.
Mes assez ferirent antor
Et mout randirent grant estor

83f. 1139

Partot leanz de lor bastons,
Com avugles qui a tastons
Va aucune chose cerchant.
Quequ' il aloient reverchant
Desoz liz et desoz eschames,
Vint une des plus beles dames
C' onques veïst riens terriene.
De si tres bele crestiene
Ne fu onques plez ne parole;
Mes de duel feire estoit si fole
Qu' a po qu' ele ne s' ocioit.
A la foiee, si crioit
Si haut com ele pooit plus,
Et recheoit pasmee jus.
Et quant ele estoit relevee,
Ausi come fame desvee,
Se comançoit a dessirier
Et ses chevols a detranchier;
Ses mains detuert et ront ses dras,
Si se repasme a chascun pas,
Ne riens ne la puet conforter,
Que son seignor en voit porter
Devant li, en la biere, mort,
Don ja ne cuide avoir confort;
Por ce crioit a haute voiz.
L' eve beneoite et les croiz
Et li cierge aloient avant
Avoec les dames d' un covant,
Et li texte et li ancenssier
Et li clerc, qui sont despanssier
De feire la haute despansse
A cui la cheitive ame pansse.

Messire Yvains oï les criz
Et le duel, qui ja n' iert descriz,
Ne nus ne le porroit descrivre,
Ne tex ne fu escriz an livre;
Et la processions passa,
Mes enmi la sale amassa
Entor la biere uns granz toauz,
Que li sans chauz, clers, et vermauz
Rissi au mort parmi la plaie;
Et ce fu provance veraie
Qu' ancor estoit leanz, sanz faille,
Cil qui ot feite la bataille

84a. 1183

Et qui l' avoit mort et conquis.
Lors ont partot cerchié et quis
Et reverchié et tremué,
Si que tuit furent tressué
De grant angoisse et de tooil
Qu' il orent por le sanc vermoil
Qui devant aus fu degotez.
Puis fu mout feruz et botez
Messire Yveins, la ou il jut;
Mes ainz por ce ne se remut.
Et les genz plus et plus crioient
Por les plaies qui escrevoient;
Si se mervoillent por coi seinnent,
N' il ne truevent de coi se pleingnent,
Et dit chascuns et cil et cist:
« Entre nos est cil qui l' ocist,
Ne nos ne le veomes mie:
Ce est mervoille et deablie. »
Por ce tel duel par demenoit
La dame qu' ele forssenoit
Et crioit come fors del san:
« Ha! Dex, don ne trovera l' an
L' omecide, le traïtor
Qui m' a ocis mon boen seignor?
Boen? Voire le meillor des buens!
Voirs Dex, li torz an seroit tuens
Se tu l' en leisses eschaper.
Autrui que toi n' en doi blasmer,
Que tu le m' anbles a veüe.
Einz tex force ne fu veüe
Ne si lez torz con tu me fez,
Que nes veoir ne le me lez,
Celui qui est si pres de moi.
Bien puis dire, quant je nel voi,
Que antre nos s' est ceanz mis
Ou fantosmes ou anemis;
S' an sui anfantosmee tote;
Ou il est coarz, si me dote;
Coarz est il, quant il me crient:
De grant coardise li vient
Qant devant mostrer ne s' ose.
Ha! fantosme, coarde chose,
Por qu' ies vers moi acoardie
Quant vers mon seignor fus hardie?

84b. 1227

Que ne t' ai ore an ma baillie?
Ta puissance fust ja faillie!
Por coi ne te puis or tenir?
Mes ce, comant pot avenir
Que tu mon seignor oceïs
Se an traïson nel feïs?
Ja voir par toi conquis ne fust
Mes sires, se veü t' eüst,
Qu' el monde son paroil n' avoit,
Ne Dex ne hom ne l' i savoit,
Ne il n' en i a mes nul tex.
Certes, se tu fusses mortex,
N' osasses mon seignor atendre,
Qu' a lui ne se pooit nus prendre. »

Ensi la dame se debat,
Ensi tot par li se conbat,
Ensi tot par li se confont
Et, avoec lui, ses genz refont
Si grant duel que greignor ne pueent.
Le cors an portent, si l' anfueent;
Et tant ont quis et tribolé
Que de querre sont saolé;
Si le leissent tot par enui,
Qu' il ne pueent veoir nelui
Qui de rien an face a mescroire.
Et les nonains et li provoire
Orent ja fet tot le servise;
Repeirié furent de l' iglise
Et venu sor la sepouture.
Mes de tot ice n' avoit cure
La dameisele de la chanbre;
De monseignor Yvain li manbre;
S' est a lui venue mout tost
Et dit: « Biau sire, a mout grant ost
A ceanz ceste gent esté.
Mout ont par ceanz tanpesté
Et reverchiez toz ces quachez,
Plus menuemant que brachez
Ne vet tracent perdriz ne caille.
Peor avez eü sanz faille.
- Par foi, fet il, vos dites voir;
Ja si grant ne cuidai avoir.
Encores, se il pooit estre,
Ou par pertuis ou par fenestre

84c. 1271

Verroie volentiers la fors
La procession et le cors. »
Mes il n' avoit en la meison_
N' au cors n' a la procession,
Qu' il volsist qu' il fussent tuit ars,
Si li eüst costé cent mars.
Cent mars? Voire, plus de cent mile.
Mes por la dame de la vile,
Que il voloit veoir, le dist;
Et la dameisele le mist
A une fenestre petite.
Quanqu' ele puet vers lui s' aquite
De l' enor qu' il li avoit feite.
Parmi cele fenestre agueite
Messire Yvains la bele dame,
Qui dit: « Biau sire, de vostre ame
Ait Dex merci, si voiremant
Com onques, au mien esciant,
Chevaliers sor cheval ne sist
Qui de rien nule vos vausist.
De vostre enor, biax sire chiers,
Ne fu onques nus chevaliers,
Ne de la vostre conpaignie;
Largesce estoit la vostre amie
Et hardemanz vostre conpainz.
En la conpaignie des sainz
Soit la vostre ame, biax dolz sire! »
Lors se deront et se dessire
Trestot quanque as mains li vient.
A mout grant poinne se retient
Messire Yveins, a que qu' il tort,
Que les mains tenir ne li cort.
Mes la dameisele li prie
Et loe et comande et chastie,
Come gentix et deboneire,
Qu' il se gart de folie feire
Et dit: « Vos estes ci mout bien.
Gardez, ne vos movez por rien
Tant que cist dist* soit abeissiez;
Et ces genz departir leissiez,
Qu' il se departiront par tens.
S' or vos contenez a mon sens,
Si con je vos lo contenir,
Granz biens vos an porra venir.

84d. 1315

Ci poez ester et seoir,
Et anz et fors les genz veoir
Qui passeront parmi la voie,
Ne ja n' iert nus hom qui vos voie,
Si avroiz mout grant aventage;
Mes gardez vos de dire outrage,
Car qui se desroie et sormoinne
Et d' outrage feire se poinne
Qant il en a et eise et leu,
Je l' apel plus malvés que preu.
Gardez, se vos pansez folie,
Que por ce ne la feites mie.
Li sages son fol pansé cuevre
Et met, s' il puet, le san a oevre.
Or vos gardez bien come sages
Que n' i lessiez la teste an gages,
Qu' il n' en panroient reançon;
Soiez por vos an cusançon,
Et de mon consoil vos soveigne;
S' estez an pes tant que je veigne,
Que je n' os plus ci arester,
Car g' i porroie trop ester,
Espoir, que l' en m' an mescresroit
Por ce que l' en ne me verroit
Avoec les autres an la presse,
S' an panroie male confesse. »
Atant s' en part et cil remaint,
Qui ne set an quel se demaint,
Que del cors qu' il voit qu' an enfuet
Li poise, quant avoir n' en puet
Aucune chose qui l' an port
Tesmoing qu' il l' a ocis et mort.
S' il n' en a tesmoing et garant
Que mostrer puisse a parlemant,
Donc iert il honiz en travers,
Tant est Kex et fel et pervers,
Plains de ranpones et d' enui,
Qu' il ne garra jamés a lui,
Einz l' ira formant afeitant
Et gas et ranpones gitant,
Ausi con il fist l' autre jor.
Males ranpones a sejor
Li sont el cors batanz et fresches.
Mes de son cuer et de ses lermes

84e. 1359

Li radolcist novele amors
Qui par sa terre a fet .i. cors;
S' a tote sa proie acoillie;
Son cuer a o soi s' anemie,
S' aimme la rien qui plus le het.
Bien a vangiee, et si nel set,
La dame la mort son seignor;
Vangence en a feite greignor
Que ele panre n' an seüst
S' Amors vangiee ne l' eüst,
Qui si dolcemant le requiert
Que par les ialz el cuer le fiert;
Et cist cos a plus grant duree
Que cos de lance ne d' espee:
Cos d' espee garist et sainne
Mout tost, des que mires i painne;
Et la plaie d' Amors anpire
Qant ele est plus pres de son mire.

Cele plaie a messire Yvains,
Dom il ne sera jamés sains,
Qu' Amors s' est tote a lui randue.
Les leus ou ele ert espandue
Vet reverchant, et si s' an oste;
Ne vialt avoir ostel ne oste
Se cestui non, et que preuz fet
Quant de malvés leu se retret
Por ce qu' a lui tote se doint.
Ne cuit qu' aillors ait de lui point;
Si cerche toz ces vix ostex;
S' est granz diax quant Amors est tex
Et quant ele si mal se prueve
Qu' el plus despit leu qu' ele trueve
Se herberge ele autresi tost
Com an tot le meillor de l' ost.
Mes or est ele bien venue,
Ci iert ele bien maintenue
Et ci li fet boen sejorner.
Ensi se devroit atorner
Amors, qui est mout haute chose,
Car mervoille est comant ele ose
De honte an malvés leu descendre.
Celui sanble qui an la cendre
Et an la poudre espant son basme,
Et het enor et ainme blasme,

84f. 1403

Et destranpre suie de miel
Et mesle çucre avoeques fiel.
Mes or n' a ele pas fet cue,
Logiee s' est an franc alue,
Dom nus ne li puet feire tort.
Qant en ot anfoï le mort,
S' an partirent totes les genz;
Clers ne chevaliers ne sergenz
Ne dame n' i remest, que cele
Qui sa dolor mie ne cele.
Mes iqui remest tote sole,
Et sovant se prant a la gole,
Et tort ses poinz et bat ses paumes,
Et list en .i. sautier ses saumes,
Anluminé a letres d' or.
Et messire Yvains est ancor
A la fenestre, ou il l' esgarde;
Et quant il plus s' an done garde,
Plus l' ainme et plus li abelist.
Ce qu' ele plore et qu' ele list
Volsist qu' ele lessié eüst
Et qu' a lui parler li pleüst.
An ce voloir l' a Amors mis,
Qui a la fenestre l' a pris;
Mes de son voloir se despoire,
Car il ne puet cuidier ne croire
Que ses voloirs puisse avenir,
Et dit: « Por fos me puis tenir,
Quant je vuel ce que ja n' avrai;
Son seignor a mort li navrai
Et je cuit a li pes avoir!
Par foi, je ne cuit pas savoir,
Qu' ele me het plus orendroit
Que nule rien, et si a droit.
D' orendroit ai ge dit que sages,
Que fame a plus de cent corages.
Celui corage qu' ele a ore,
Espoir, changera ele ancore;
Ainz le changera sanz espoir;
Mout sui fos quant je m' an despoir,
Et Dex li doint ancor changier,
Qu' estre m' estuet an son dongier
Tozjorz mes, des qu' Amors le vialt.
Qui Amor en gré ne requialt

85a. 1447

Des que ele antor li l' atret,
Felenie et traïson fet;
Et je di, qui se vialt si l' oie,
Que cil n' a droit en nule joie.
Mes por ce ne perdrai je mie,
Tozjorz amerai m' anemie,
Que je ne la doi pas haïr
Se je ne voel Amor traïr.
Ce qu' Amors vialt doi je amer.
Et doit me ele ami clamer ?
Oïl, voir, por ce que je l' aim.
Et je m' anemie la claim,
Qu' ele me het, si n' a pas tort,
Que ce qu' ele amoit li ai mort.
Donques sui ge ses anemis ?
Nel sui, certes, mes ses amis.
Grant duel ai de ses biax chevox,
C' onques rien tant amer ne vox,
Que fin or passent, tant reluisent.
D' ire m' espranent et aguisent
Qant je les voi ronpre et tranchier;
N' onques ne pueent estanchier
Les lermes, qui des ialz li chieent:
Totes ces choses me dessieent!
Atot ce qu' il sont plain de lermes,
Si qu' il n' en est ne fins ne termes,
Ne furent onques si bel oel.
De ce qu' ele plore me duel
Ne de rien n' ai si grant destrece
Come de son vis qu' ele blece,
Qu' il ne l' eüst pas desservi:
Onques si bien taillié ne vi
Ne si fres ne si coloré;
Mes ce me par a acoré
Que ele est a li enemie.
Et voir, ele ne se faint mie
Qu' au pis qu' ele puet ne se face;
Et nus cristauz ne nule glace
N' est si clere ne si polie.
Dex ! Por coi fet si grant folie
Et por coi ne se blece mains ?
Por coi detort ses beles mains
Et fiert son piz et esgratine ?
Don ne fust ce mervoille fine

85b. 1491

A esgarder, s' ele fust liee,
Qant ele est or si bele iriee ?
Oïl, voir, bien le puis jurer,
Onques mes si desmesurer
Ne se pot an biauté Nature,
Que trespassee i a mesure
Ou ele, espoir, n' i ovra onques.
Comant poïst ce estre donques ?
Don fust si grant biauté venue ?
Ja la fist Dex, de sa main nue,
Por Nature feire muser.
Tot son tans i porroit user
S' ele la voloit contrefere,
Que ja n' en porroit a chief trere;
Nus d' aus, s' il s' an voloit pener,
Ce cuit, ne porroit asener
Que jamés nule tel feïst
Por poinne que il i meïst. »

Ensi messire Yvains devise
Celi qui de duel se debrise,
N' ainz mes ne cuit qu' il avenist
Que nus hom qui prison tenist,
Tel con messire Yvains la tient,
Que de la teste perdre crient,
Amast an si fole meniere,
Dom il ne fera ja proiere
Ne autres por lui, puet cel estre.
Tant demora a la fenestre
Qu' il an vit la dame raler
Et que l' en ot fet avaler
Anbedeus les portes colanz.
De ce fust uns autres dolanz,
Que mialz amast sa delivrance
Qu' il ne feïst la demorance;
Et il met tot autant a oevre
Se l' en les clot, con s' an les oevre.
Il ne s' an alast mie, certes,
Se ele* li fussent overtes
Ne se la dame li donast
Congié et si li pardonast
La mort son seignor boenemant,
Si s' en alast seüremant,
Qu' Amors et Honte le retient,
Qui de .ii. parz devant li vient.

85c. 1535

Il est honiz se il s' en va,
Que ce ne recresroit en ja
Qu' il eüst ensi esploitié;
D' autre part, ra tel covoitié
De la bele dame veoir
Au moins, se plus n' en puet avoir,
Que de la prison ne li chaut:
Mialz vialt morir que il s' en aut.
Mes la dameisele repeire,
Qui li vialt conpaignie feire
Et solacier et deporter
Et porchacier et aporter
Quanque il voldra a devise.
De l' amor qui en lui s' est mise,
Le trova trespansé et vain;
Si li a dit: « Messire Yvain,
Quel siegle avez vos puis eü?
- Tel, fet il, qui mout m' a pleü.
- Pleü? Por Deu, dites vos voir?
Comant puet donc boen siegle avoir
Qui voit qu' an le quiert por ocirre?
Cil ainme sa mort et desirre!
- Certes, fet il, ma dolce amie,
Morir n' i voldroie je mie,
Et si me plot mout totevoie
Ce que je vi, se Dex me voie,
Et plot et pleira tozjorz mes.
- Or le leissons atant an pes »,
Fet cele qui bien set antendre
Ou ceste parole vialt tendre.
« Ne sui si nice ne si fole
Que bien n' entande une parole.
Mes or an venez aprés moi,
Que je panrai prochein conroi
De vos gitier fors de prison.
Bien vos metrai a garison,
S' il vos plest, enuit ou demain;
Or an venez, je vos an main. »
Et il respont: « Soiez certainne,
Je n' an istrai fors, de semainne,
En larrecin ne an enblee.
Qant la genz iert tote asanblee
Parmi ces rues, la defors,
Plus a enor m' en istrai lors

85d. 1579

Que je ne feroie nuitantre. »
A cest mot, aprés li s' en antre
Dedanz la petite chanbrete.
La dameisele, qui fu brete,
Fu de lui servir an espans,
Si li fist creance et despans
De tot quanque il li covint.
Et quant leus fu, si li sovint
De ce que il li avoit dit,
Que mout li plot ce qu' ele* vit
Que par la sale le queroient
Les genz qui de mort le haoient.

La dameisele estoit si bien
De sa dame que nule rien
A dire ne li redotast,
A que que la chose montast,
Qu' ele estoit sa mestre et sa garde.
Et por coi fust ele coarde
De sa dame reconforter
Et de son bien amonester?
La premiere foiz a consoil
Li dist: « Dame, mout me mervoil
Que folemant vos voi ovrer.
Dame, cuidiez vos recovrer
Vostre seignor por vostre duel?
- Nenil, fet ele, mes mon vuel
Seroie je morte d' enui.
- Por coi? - Por aler aprés lui.
- Aprés lui? Dex vos an desfande,
Qui ausi boen seignor vos rande
Si com il an est posteïs.
- Einz tel mançonge ne deïs,
Qu' il ne me porroit si boen randre.
- Meillor, se vos le volez prandre,
Vos randra il, sel proverai.
- Fui! Teis! Ja tel ne troverai.
- Si feroiz, dame, s' il vos siet.
Mes or dites, si ne vos griet,
Vostre terre, qui desfandra
Quant li rois Artus i vendra,
Qui doit venir l' autre semainne
Au perron et a la fontainne?
N' en avez vos eü message
De la dameisele sauvage

85e. 1623

Qui letres vos en anvea?
Ahi! con bien les anplea!
Vos deüssiez or consoil prendre
De vostre fontainne desfandre,
Et vos ne finez de plorer!
N' i eüssiez que demorer,
S' il vos pleüst, ma dame chiere,
Que certes une chanberiere
Ne valent tuit, bien le savez,
Li chevalier que vos avez:
Ja par celui qui mialz se prise
N' en iert escuz ne lance prise.
De gent malveise avez vos mout,
Mes ja n' i avra si estout
Qui sor cheval monter en ost,
Et li rois vient a si grant ost
Qu' il seisira tot sanz desfansse. »
La dame set mout bien et pansse
Que cele la consoille an foi;
Mes une folie a en soi
Que les autres fames i ont:
Trestotes, a bien pres, le font,
Que de lor folie s' ancusent
Et ce qu' eles voelent refusent.

« Fui! fet ele, lesse m' an pes.
Se je t' an oi parler jamés,
Ja mar feras, mes que t' an fuies:
Tant paroles que trop m' enuies.
- A beneor, fet ele, dame,
Bien i pert que vos estes fame,
Qui se corroce quant ele ot
Nelui qui bien feire li lot. »
Lors s' an parti, si la leissa;
Et la dame se rapanssa
Qu' ele avoit si grant tort eü;
Mout volsist bien avoir seü
Comant ele poïst prover
Qu' an porroit chevalier trover
Meillor c' onques ne fu ses sire;
Se li orroit volentiers dire,
Mes ele li a desfandu.
An ce panser a atendu
Jusque tant que ele revint;
Mes onques desfansse n' en tint,

85f. 1667

Einz li redit tot maintenant:
« Ha! dame, est ce ore avenant,
Qui si de duel vos ociez ?
Por Deu, car vos en chastiez,
Si le lessesiez viax de honte:
A si haute dame ne monte
Que duel si longuemant mainteigne.
De vostre enor vos resoveigne
Et de vostre grant gentillesce.
Cuidiez vos que tote proesce
Soit morte avoec vostre seignor?
Que autresi boen ou meillor
An sont remés parmi le monde.
- Se tu ne manz, Dex me confonde!
Et neporquant .i. seul m' an nome
Qui ait tesmoing de si preudome
Con mes sire ot tot son ahé.
- Et vos m' an savriez mal gré,
Si vos recorroceriez
Et m' en remenaceriez.
- Nel ferai, je t' en asseür.
- Or soit a vostre boen eür,
Qui vos en est a avenir,
Se il vos venoit a pleisir.
Et ce doint Dex que il vos pleise!
Ne voi rien por coi je m' an teise,
Que nus ne nos ot ne escoute.
Vos me tanroiz ja por estoute,
Mes bien puis dire, ce me sanble:
Quant dui chevalier sont ansanble
Venu a armes en bataille,
Li quex cuidiez vos qui mialz vaille,
Quant li uns a l' autre conquis?
Androit de moi doing je le pris
Au veinqueor. Et vos, que feites?
- Il m' est avis que tu m' agueites,
Si me viax a parole prandre.
- Par foi, vos poez bien entandre
Que je m' an vois parmi le voir,
Et si vos pruef par estovoir
Que mialz valut cil qui conquist
Vostre seignor que il ne fist:
Il le conquist et sel chaça
Par hardemant anjusque ça,

86a. 1711

Et si l' enclost an sa meison.
- Or ai ge oï desreison,
La plus grant c' onques mes fust dite.
Fui! plainne de mal esperite,
Ne mes devant moi ne reveingnes
Por coi de lui parole teignes.
- Certes, dame, bien le savoie
Que ja de vos gré n' en avroie,
Et jel vos dis mout bien avant.
Mes vos m' eüstes an covant
Que ja ire n' en avriez
Ne mal gré ne m' an savriez.
Mal m' avez mon covant tenu.
Si m' est or ensi avenu
Et dit m' avez vostre pleisir;
Si ai perdu .i. boen teisir. »

Atant vers sa chanbre retorne,
La ou messire Yvains sejorne,
Cui ele garde a mout grant eise;
Mes n' i ot chose qui li pleise
Qant la dame veoir ne puet,
Et del plet que cele li muet
Ne se garde ne n' an set mot.
Mes la dame tote nuit ot
A li meïsmes grant tançon,
Qu' ele estoit en grant cusançon
De sa fonteinne garantir.
Si se comance a repantir
De celi qu' ele avoit blasmee
Et leidie et mesaamee,
Qu' ele est tote seüre et certe
Que por loier ne por desserte
Ne por amor qu' a celui ait
Ne l' en mist ele onques en plait.
Et plus ainme ele li que lui,
Ne sa honte ne son enui
Ne li loeroit ele mie,
Que trop est sa leax amie.
Ez vos ja la dame changiee:
De celi qu' ele ot leidangiee
Ne cuide jamés a nul fuer
Que amer la doie an son cuer,
Et celui qu' ele ot refusé
Ra mout lëaumant escusé

86b. 1755

Par reison et par droit de plet,
Qu' il ne li avoit rien mesfet.
Si se desresne tot ensi
Con s' il fust venuz devant li;
Lors sel comance a pleidoier:
« Viax tu donc, fet ele, noier
Que par toi ne soit morz mes sire?
- Ce, fet il, ne puis je desdire,
Einz l' otroi bien. - Di donc por coi.
Feïs le tu por mal de moi,
Por haïne ne por despit?
- Ja n' aie je de mort respit
S' onques por mal de vos le fis.
- Donc n' as tu rien vers moi mespris
Ne vers lui n' eüs tu nul tort,
Car s' il poïst, il t' eüst mort.
Por ce, mien esciant, cuit gié
Que j' ai bien et a droit jugié. »
Ensi par li meïsmes prueve
Que droit san et reison i trueve
Qu' an lui haïr n' a ele droit,
Si an dit ce qu' ele voldroit;
Et par li meïsmes s' alume
Ensi come li feus qui fume
Tant que la flame s' i est mise,
Que nus ne la soufle n' atise.
Et s' or venoit la dameisele,
Ja desresneroit la querele
Dom ele l' a tant pleidoiee,
S' an a esté bien leidoiee.
Et cele revint par matin,
Si recomança son latin
La ou ele l' avoit leissié.
Et cele tint le chief bessié,
Qui a mesfete se santoit
De ce que leidie l' avoit;
Mes or li voldra comander
Et del chevalier demander
Le non, et l' estre, et le linage;
Si s' umelie come sage,
Et dit: « Merci crier vos vuel
Del grant oltrage et de l' orguel
Que je vos ai dit come fole,
Si remanrai a vostre escole.

86c. 1799

Mes dites moi, se vos savez,
Del chevalier don vos m' avez
Tenue a plet si longuemant:
Quiex hom est il et de quel gent?
Se il est tex qu' a moi ateigne,
Mes que de par lui ne remaigne,
Je le ferai, ce vos otroi,
Seignor de ma terre et de moi.
Mes il le covanra si fere
Qu' an ne puisse de moi retrere
Ne dire: « C' est cele qui prist
Celui qui son seignor ocist. »
- E non Deu, dame, ensi iert il.
Seignor avroiz le plus gentil
Et le plus gent et le plus bel
Qui onques fust del ling Abel.
- Comant a non? - Messire Yvains.
- Par foi, cist n' est mie vilains,
Einz est mout frans, je le sai bien,
Et s' est filz au roi Urien.
- Par foi, dame, vos dites voir.
- Et quant le porrons nos avoir?
- Jusqu' a quint jor. - Trop tarderoit,
Que, mon vuel, ja venuz seroit.
Veigne enuit ou demain, seviax.
- Dame, ne cuit pas c' uns oisiax
Poïst tant en .i. jor voler.
Mes je i ferai ja aler
.I. mien garçon qui mout tost cort,
Qui ira bien jusqu' a la cort
Le roi Artus, au mien espoir,
Au moins jusqu' a demain au soir,
Que jusque la n' iert il trovez.
- Cist termes est trop lons assez:
Li jor sont lonc. Mes dites li
Que demain au soir resoit ci
Et voist plus tost que il ne siaut,
Car bien s' esforcera, s' il vialt:
De .ii. jornees fera une;
Et anquenuit luira la lune,
Si reface de la nuit jor,
Et je li donrai au retor
Quanqu' il voldra que je li doingne.
- Sor moi leissiez ceste besoingne,

86d. 1843

Que vos l' avroiz, a tot le mains,
Jusqu' a tierz jor antre voz mains.
Et au demain remanderoiz
Voz genz et si demanderoiz
Consoil del roi qui doit venir.
Por la costume maintenir
De vostre fontainne desfandre
Vos covendroit boen consoil prandre;
Et il n' i avra ja si haut
Qui s' ost vanter que il i aut.
Lors porroiz dire tot a droit
Que marier vos covendroit.
Uns chevaliers mout alosez
Vos requiert, mes vos ne l' osez
Panre s' il nel vos loent tuit
Et s' il nel pranent an conduit.
Tant les quenuis je a malvés
Que, por autrui chargier le fes
Dom il seroient tuit chargié,
Vos an vanront trestuit au pié
Et si vos an mercieront,
Que fors de grant peor seront.
Car qui peor a de son onbre,
S' il puet, volentiers se desconbre
D' ancontre de lance ou de dart,
Que c' est malvés jex a coart. »
Et la dame respont: « Par foi,
Ensi le vuel, ensi l' otroi,
Et je l' avoie ja pansé
Si con vos l' avez devisé,
Et tot ensi le ferons nos.
Mes ci por coi demorez vos?
Alez! Ja plus ne delaiez!
Si faites tant que vos l' aiez,
Et je remanderai mes genz. »
Ici fine li parlemanz.
Cele fet sanblant qu' anvoit querre
Monseignor Yvain en sa terre,
Si le fet chascun jor baignier,
Son chief laver et apleignier;
Et avoec ce li aparoille
Robe d' escarlate vermoille,
De veir forree atot la croie.
N' est riens que ele li acroie

86e. 1887

Qui coveigne a lui acesmer:
Fermail d' or a son col fermer,
Ovré a pierres precieuses
Qu' il font leanz mout gracieuses,
Et ceinturete et aumosniere
Qui fu d' une riche sainiere;
Bien l' a de tot apareillié.
Et a sa dame a conseillié
Que revenuz est ses messages,
Si a esploitié come sages.
« Comant? fet ele. Quant venra
Messire Yveins? - Ceanz est ja.
- Ceanz est il? Venez donc tost,
Celeemant et an repost,
Demantres qu' avoec moi n' est nus.
Gardez que n' en i veigne nus,
Que g' i harroie mout le cart. »
La dameisele atant s' an part;
S' est venue a son oste arriere,
Mes ne mostra mie a sa chiere
La joie que ses cuers avoit,
Einz dit que sa dame savoit
Qu' ele l' avoit leanz gardé,
Et dit: « Messire Yvain, par Dé,
N' a mes mestier neant celee.
Tant est de vos la chose alee
Que ma dame ceanz vos set,
Qui mout me blasme et mout me het,
Et mout m' en a acoisonee;
Mes tel seürté m' a donee
Que devant li vos puis conduire
Sanz vos de rien grever ne nuire.
Ne vos grevera rien, ce croi,
Fors tant, don mantir ne vos doi,
Que je feroie traïson,
Qu' avoir vos vialt en sa prison,
Et si i vialt avoir le cors
Que nes li cuers n' an soit defors.
- Certes, fet il, ce voel je bien,
Que ce ne me grevera rien,
Qu' an sa prison voel je mout estre.
- Si seroiz vos, par la main destre
Don je vos teing! Or an venez,
Mes a mon los vos contenez

86f. 1931

Si sinplemant devant sa face
Que male prison ne vos face.
Ne por ce ne vos esmaiez:
Ne cuit mie que vos aiez
Prison qui trop vos soit grevainne. »
La dameisele ensi l' enmainne;
Si l' esmaie, et sel raseüre,
Et parole par coverture
De la prison ou il iert mis,
Que sanz prison n' est nus amis;
Por ç' a droit se prison le clainme
Que sanz prison n' est nus qui ainme.

La dameisele par la main
Enmainne monseignor Yvain
La ou il iert mout chier tenuz;
Si crient il estre mal venuz,
Et s' il le crient, n' est pas mervoille.
Sor une grant coute vermoille
Troverent la dame seant.
Mout grant peor, ce vos creant,
Ot messire Yvains a l' entree
De la chanbre, ou il ont trovee
La dame, qui ne li dist mot;
Et por ce grant peor en ot,
Si fu de peor esbaïz,
Qu' il cuida bien estre traïz,
Et s' estut loing cele part la,
Tant que la pucele parla
Et dit: « .V..c. dahez ait s' ame
Qui mainne an chanbre a bele dame
Chevalier qui ne s' an aproche
Et qui n' a ne lengue, ne boche,
Ne san, dom acointier se sache! »
Maintenant par le braz le sache,
Si li dit: « En ça vos traiez,
Chevaliers, ne peor n' aiez
De ma dame, qu' el ne vos morde;
Mes querez la pes et l' acorde,
Et g' en proierai avoec vos
Que la mort Esclados le Ros,
Qui fu ses sires, vos pardoint. »
Messire Yvains maintenant joint
Ses mains, si s' est a genolz mis
Et dit, come verais amis:

87a. 1975

« Dame, voir, ja ne vos querrai
Merci, einz vos mercierai
De quanque vos me voldroiz feire,
Que riens ne m' en porroit despleire.
- Non, sire? Et se je vos oci?
- Dame, la vostre grant merci,
Que ja ne m' an orroiz dire el.
- Einz mes, fet ele, n' oï tel,
Que si vos metez a devise
Del tot an tot en ma franchise
Sanz ce que nes vos en esforz.
- Dame, nule force si forz
N' est come cele, sanz mantir,
Qui me comande a consantir
Vostre voloir del tot an tot.
Rien nule a feire ne redot
Que moi vos pleise a comander,
Et, se je pooie amander
La mort don j' ai vers vos mesfet,
Je l' amanderoie sanz plet.
- Comant? fet ele. Or le me dites,
Si soiez de l' amande quites,
Se vos de rien me mesfeïstes,
Quant vos mon seignor m' oceïstes.
- Dame, fet il, vostre merci;
Quant vostre sires m' asailli,
Quel tort oi je de moi desfandre?
Qui autrui vialt ocirre ou prandre,
Se cil l' ocit qui se desfant,
Dites se de rien i mesprant.
- Nenil, qui bien esgarde droit;
Et, je cuit, rien ne me vaudroit
Qant fet ocirre vos avroie.
Et ce mout volentiers savroie
Don cele force puet venir
Qui vos comande a contenir
A mon voloir, sanz contredit;
Toz torz et toz mesfez vos quit,
Mes seez vos, si me contez
Comant vos iestes si dontez.

- Dame, fet il, la force vient
De mon cuer, qui a vos se tient;
An ce voloir m' a mes cors mis.
- Et qui le cuer, biax dolz amis?

87b. 2019

- Dame, mi oel. - Et les ialz, qui?
- La granz biautez que an vos vi.
- Et la biautez qu' i a forfet?
- Dame, tant que amer me fet.
- Amer? Et cui? - Vos, dame chiere.
- Moi? - Voire voir. - An quel meniere?
- An tel que graindre estre ne puet;
En tel que de vos ne se muet
Mes cuers, n' onques aillors nel truis;
An tel qu' aillors pansser ne puis;
En tel que toz a vos m' otroi;
An tel que plus vos aim que moi;
En tel, s' il vos plest, a delivre,
Que por vos vuel morir ou vivre.
- Et oseriez vos enprandre
Por moi ma fontainne a desfandre?
- Oïl, voir, dame, vers toz homes.
- Sachiez donc, bien acordé somes. »
Ensi sont acordé briemant.
Et la dame ot son parlemant
Devant tenu a ses barons
Et dit: « De ci nos en irons
An cele sale ou ces genz sont
Qui loé et conseillié m' ont,
Que mari a prendre m' otroient
Por le besoing que il i voient.
Ci meïsmes a vos me doing
Ne ge n' en irai ja plus loing,
Qu' a seignor refuser ne doi
Boen chevalier et fil de roi. »

Or a la dameisele fet
Quanqu' ele voloit antreset;
Messire Yvains n' en ot pas ire,
Ce vos puis bien conter et dire,
Que la dame avoec li l' enmainne
En la sale, qui estoit plainne
De chevaliers et de sergenz;
Et messire Yvains fu si genz
Qu' a mervoilles tuit l' esgarderent,
Et encontre ax tuit se leverent
Et tuit saluent et anclinent
Monseignor Yvain, et devinent:
« C' est cil qui ma dame prendra;
Dahez ait qui li desfandra,

87c. 2063

Qu' a mervoilles sanble prodome.
Certes, l' empererriz de Rome
Seroit an lui bien mariee.
Car l' eüst il ja afiee
Et ele lui de nue main,
Si l' espousast hui ou demain. »
Ensi parloient tuit d' un ranc.
Au chief de la sale ot un banc
Ou la dame s' ala seoir,
La ou tuit la porent veoir.
Et messire Yvains sanblant fist
Qu' a ses piez seoir se volsist,
Qant ele l' an leva amont;
Et de la parole semont
Son seneschal, que il la die,
Si qu' ele soit de toz oïe.
Lors comança li seneschax,
Qui n' estoit ne estolz ne chax:

« Seignor, fet il, guerre nos sourt:
N' est jorz que li rois ne s' atourt,
De quanqu' il se puet atorner,
Por venir noz terres gaster.
Ençois que la quinzainne past,
Sera trestote alee a gast,
Se boen mainteneor n' i a.
Qant ma dame se maria,
N' a mie ancor .vi. anz parclos,
Si le fist ele par voz los.
Morz est ses sires, ce li poise.
N' a or de terre c' une toise
Cil qui tot cest païs tenoit
Et qui mout bien i avenoit;
C' est granz diax que po a vescu.
Fame ne set porter escu
Ne ne set de lance ferir;
Mout amander et ancherir
Se puet de panre .i. boen seignor.
Einz mes n' en ot mestier graignor.
Loez li tuit que seignor praingne,
Einz que la costume remaingne
Qui an cest chastel a esté
Plus de .lx. anz a passé. »
A cest mot dïent tuit ansanble
Que bien a feire lor resanble.

87d. 2107

Et trestuit jusqu' aus piez li vienent,
De son voloir an grant la tienent;
Si se fet preier de son buen,
Tant que, ausi con maugré suen,
Otroie ce qu' ele feïst
Se chascuns li contreïst*,
Et dit: « Seignor, des qu' il vos siet,
Cil chevaliers qui lez moi siet
M' a mout proiee et mout requise
De m' enor, et an mon servise
Se vialt metre, et je l' an merci;
Et vos l' en merciez ausi.
N' onques mes, certes, nel conui,
S' ai mout oï parler de lui:
Si hauz hom est, ce sachiez bien,
Con li filz au roi Urien.
Sanz ce qu' il est de haut parage,
Est il de si grant vasselage
Et tant a corteisie et san
Que desloer nel me doit an.
De monseignor Yvain, ce cuit,
Avez bien oï parler tuit;
Et ce est il qui me requiert.
Plus haut seignor qu' a moi n' afiert
Avrai au jor que ce sera. »
Tuit dïent: « Ja ne passera
Cist jorz, se vos feites que sage,
Q' ainz n' aiez fet le mariage,
Que mout est fos qui se demore
De son preu feire une seule ore. »
Tant li prïent que ele otroie
Ce qu' ele feïst totevoie,
Qu' Amors a feire li comande
Ce don los et consoil demande;
Mes a plus grant enor le prant
Qant congié en a de sa gent;
Et les proieres rien n' i grievent,
Einz li esmuevent et soulievent
Le cuer a feire son talant.
Li chevax qui pas ne va lant
S' esforce quant an l' esperone;
Veant toz ses barons se done
La dame a monseignor Yvain.
Par la main d' un suen chapelain

87e. 2151

Prise a la dame de Landuc
L' endemain, qui fu fille au duc
Laududez, dom an note .i. lai.
Le jor meïsmes, sanz delai,
L' espousa et firent lor noces.
Asez i ot mitres et croces,
Que la dameisele ot mandez
Les esvesques et les abez.

Mout i ot gent de grant noblesce,
Et mout i ot joie et leesce,
Plus que conter ne vos porroie
Qant lonc tans panssé i avroie;
Einz m' an vuel teire que plus dire.
Mes or est messire Yvains sire
Et li morz est toz obliez;
Cil qui l' ocist est mariez;
Sa fame a, et ensanble gisent;
Et les genz ainment plus et prisent
Le vif c' onques le mort ne firent.
A ces noces mout le servirent,
Qui durererent* jusqu' a la voille
Que li rois vint a la mervoille
De la fontainne et del perron,
Et avoec lui si conpaignon,
Que trestuit cil de sa mesniee
Furent an cele chevalchiee,
C' uns trestoz seus n' an fu remés.
Et si disoit messire Ques:
« Por Deu, qu' est ore devenuz
Messire Yvains, qui n' est venuz,
Qui se vanta aprés mangier
Qu' il iroit son cousin vangier?
Bien pert que ce fu aprés vin!
Foïz s' an est, je le devin,
Qu' il n' i osast venir por l' uel.
Mout se vanta de grant orguel.
Mout est hardiz qui loer s' ose
De ce dont autres ne l' alose,
Ne n' a tesmoing de sa loange
Se ce n' est por fausse losange.

Mout a entre malvés et preu,
Que li malvés antor le feu
Dit de lui une grant parole,
Si tient tote la gent por fole

87f. 2195

Et cuide que l' en nel conoisse.
Et li preuz avroit grant angoisse
S' il ooit redire a autrui
Les proesces qui sont an lui.
Neporqant, certes, bien m' acort
A malvés, qu' il n' a mie tort:
S' il ne le dit, qui le dira?
Tant se teisent d' ax li hera,
Qui des vaillanz crïent le banc
Et les malvés gietent au vant,
Qu' il ne truevent qui por aus mante;
Fos est qui se prise ne vante. »
Ensi messire Kex parloit,
Et messire Gauvains disoit:
« Merci, messire Kex, merci!
Se messire Yvains n' est or ci,
Ne savez quele essoine il a.
Onques voir si ne s' avilla
Qu' il deïst de vos vilenie,
Tant com il set de corteisie.
- Sire, fet il, et je m' an tes,
Ne m' an orroiz parler huimés,
Des que je voi qu' il vos enuie. »
Et li rois por veoir sa nuie*
Versa de l' eve plain bacin
Sor le perron, desoz le pin;
Et plut tantost mout fondelmant.
Ne tarda puis gueires granmant
Que messire Yvains sanz arest
Entra armez en la forest
Et vint plus tost que les galos
Sor .i. cheval mout grant et gros,
Fort et hardi et tost alant.
Et messire Kex ot talant
Qu' il demanderoit la bataille,
Car, quiex que fust la definaille,
Il voloit comancier tozjorz
Les meslees et les estorz
Ou il i eüst grant corroz.
Au pié le roi vient devant toz
Que ceste bataille li lest.
« Kex, fet li rois, des qu' il vos plest
Et devant toz l' avez rovee,
Ne vos doit pas estre vehee. »

88a. 2239

Kex l' en mercie et puis si monte.
S' or li puet feire .i. po de honte
Messire Yvains, liez an sera
Et mout volantiers li fera,
Que bien le reconuist as armes.
L' escu a pris par les enarmes
Et Kex le suen, si s' antresleissent,
Chevax poignent et lances beissent
Que il tenoient anpoigniees;
.I. petit les ont aloigniees
Tant que par les quamois les tienent,
Et a ce que il s' antrevienent,
De tex cos ferir s' angoissierent
Que an.ii. les lances froissierent
Et vont jusqu' anz es poinz fandant.
Messire Yvains cop si puissant
Li dona que de sus la sele
A fet Kex la torneboele
Et li hiaumes an terre fiert.
Plus d' enui feire ne li quiert
Messire Yvains, ençois descent
A la terre et son cheval prent.
Ce fu mout bel a tel i ot,
Et fu assez qui dire sot:
« Ahi! ahi! con or gisiez,
Vos qui les autres despisiez!
Et neporquant s' est il bien droiz
Qu' an le vos pardoint ceste foiz
Por ce que mes ne vos avint. »
Entre tant, devant le roi vint
Messire Yvains, et par le frain
Menoit le cheval en sa main,
Por ce que il li voloit rendre;
Si li dist: « Sire, feites prendre
Ce cheval, que je mesferoie
Se rien del vostre detenoie.
- Et qui estes vos? fet li rois.
Ne vos conoistroie des mois
Au parler se ne vos veoie
Ou se nomer ne vos ooie. »
Lors s' est messire Yvains nomez;
S' an est Kex de honte essomez
Et maz et muz et desconfiz,
Qu' il dist qu' il s' an estoit foïz.

88b. 2283

Et li autre mout lié an sont,
Que de s' enor grant joie font.
Nes li rois grant joie an mena;
Mes messire Gauvains en a
Cent tanz plus grant joie que nus,
Que sa conpaingnie amoit plus
Que conpaignie qu' il eüst
A chevalier que l' en seüst.
Et li rois li requiert et prie,
Se lui ne poise, qu' il lor die
Comant il avoit esploitié,
Car mout avoit grant covoitié
De savoir tote s' avanture;
De voir dire mout le conjure.
Et il lor a trestot conté
Et le servise et la bonté
Que la dameisele li fist;
Onques de mot n' i entreprist,
Ne riens nule n' i oblia.
Et aprés ce le roi pria
Que il et tuit si chevalier
Venissent a lui herbergier,
Qu' ennor et joie li feroient
Qant a lui herbergié seroient.
Et li rois dit que volantiers
Li feroit il, .viii. jorz antiers,
Amor et joie et conpaignie.
Et messire Yvains l' en mercie,
Ne de demore plus n' i font,
Maintenant montent, si s' an vont
Vers le chastel la droite voie.
Et messire Yvains envoie
Devant la rote .i. escuier,
Qui portoit .i. faucon gruier,
Por ce que il ne sorpreïssent
La dame et que ses genz feïssent
Contre le roi ses meisons beles.
Qant la dame oï les noveles
Del roi qui vient, s' en a grant joie.
N' i a nul qui la novele oie,
Qui n' an soit liez et qui n' en mont.
Et la dame toz les semont
Et prie que contre lui voisent;
Et cil n' en tancent ne ne noisent,

88c. 2327

Que de feire sa volanté
Estoient tuit antalanté.

Encontre le roi de Bretaingne
Vont tuit sor granz chevax d' Espaingne,
Si saluent mout hautemant
Le roi Artus premieremant
Et puis sa conpaignie tote:
« Bien vaingne, font il, ceste rote
Qui de tant prodomes est plainne.
Beneoiz soit cil qui les mainne
Et qui si boens ostex lor done. »
Contre le roi li chastiax sone
De la joie que l' en i fet.
Li drap de soie sont fors tret
Et estandu a paremant,
Et des tapiz font pavemant,
Que par les rues les estandent
Contre la joie qu' il atandent;
Et refont .i. autre aparoil:
Entre le roi et le soloil
Cuevrent les rues des cortines.
Li sain, li cor et les buisines
Font le chastel si resoner
Que l' en n' oïst pas Deu toner.
La ou descendent les puceles,
Sonent flaütes et vieles,
Tympre, freteles et tabor;
D' autre part refont lor labor
Li legier sailleor qui saillent;
Trestuit de joie se travaillent,
Et a ceste joie reçoivent
Lor seignor, si con feire doivent.
Et la dame rest fors issue,
D' un drap emperial vestue,
Robe d' ermine tote fresche,
An son chief une garlendesche
Tote de rubiz atiriee;
Ne n' ot mie la chiere iriee,
Einz l' ot si gaie et si riant
Qu' ele estoit, au mien esciant,
Plus bele que nule contesse.

88d. 2367

(Plus bele que nule contesse.)*
Tot antor fu la presse espesse
Et disoient trestuit a tire:
« Bien veigne li rois et li sire
Des rois et des seignors del monde! »
Ne puet estre qu' a toz responde
Li rois, qui vers lui voit venir
La dame a son estrié tenir.
Et ce ne vost il pas atendre,
Einz se haste mout de descendre;
Si descendi lués qu' il la vit,
Et ele le salue et dit:
« Bien veigne, par cent mile foiz,
Li rois mes sire, et beneoiz
Soit messire Gauvains, ses niés.
- Et vostre cors et vostre chiés,
Fet li rois, bele criature,
Ait joie et grant boene aventure! »
Puis l' enbraça parmi les flans
Li rois, come cortois et frans,
Et ele lui tot a plain braz.
Des autres parole ne faz
Comant ele les conjoï,
Mes onques mes parler n' oï
De nes une gent tant joïe,
Tant enoree et tant servie.
De la joie assez vos contasse
Se ma parole n' i gastasse.
Mes seulemant de l' acontance
Voel feire une brief remanbrance
Qui fu feite a privé consoil
Entre la lune et le soloil.
Savez de cui je vos voel dire?
Cil qui des chevaliers fu sire
Et qui sor toz fu reclamez
Doit bien estre solauz clamez.
Por monseignor Gauvain le di,
Que de lui est tot autresi
Chevalerie anluminee
Come solauz, la matinee,
Oevre ses rais et clarté rant
Par toz les leus ou il s' espant.
Et de celi refaz la lune
Dom il ne puet estre que une,

88e. 2411

De grant foi et de grant aïe.
Et neporoec je nel di mie
Seulemant por son grant renon,
Mes por ce que Lunete ot non.

La dameisele ot non Lunete
Et fu une avenanz brunete,
Mout sage et veziee et cointe.
A monseignor Gauvain s' acointe,
Qui mout la prise et qui mout l' ainme,
Et por ce s' amie la clainme
Qu' ele avoit de mort garanti
Son conpaignon et son ami;
Si li offre mout son servise.
Et ele li conte et devise
A con grant poinne ele conquist
Sa dame, tant que ele prist
Monseignor Yvain a mari,
Et comant ele le gari
Des mains a cez qui le queroient:
Entr' ax ert, et si nel veoient!
Messire Gauvains mout se rit
De ce qu' ele li conte et dit:
« Ma dameisele, je vos doing
Et a mestier et sanz besoing
.I. tel chevalier con je sui;
Ne me changiez ja por autrui,
Se amander ne vos cuidiez;
Vostres sui, et vos resoiez
D' ore en avant ma dameisele.
- Vostre merci, sire », fet ele.
Ensi cil dui s' antracointoient,
Li uns a l' autre se donoient,
Que d' autres i ot tel nonante
Que aucune i ot bele et gente
Et noble et cointe et preuz et sage,
Gentix dame et de haut parage;
Si s' i porront mout solacier
Et d' acoler et de beisier
Et de parler et de veoir
Et de delez eles seoir,
Itant en orent il au mains.
Or a feste messire Yvains
Del roi, qui avoec li demore;
Et la dame tant les enore,

88f. 2455

Chascun par soi et toz ansanble,
Que tel fol i a cui il sanble
Que d' amors veignent li atret
Et li sanblant qu' ele lor fet.
Et cez puet an nices clamer
Qui cuident qu' el les voelle amer
Qant une dame est si cortoise
Qu' a un maleüreus adoise
Qu' ele li fet joie et acole;
Fos est liez de bele parole,
Si l' a an mout tost amusé.
A grant joie ont le tans usé
Trestote la semainne antiere:
Deduit de bois et de riviere
I ot mout qui le vost avoir;
Et qui vost la terre veoir
Que messire Yvains ot conquise
En la dame que il ot prise,
Si se repot aler esbatre
Ou .vi. liues, ou .v., ou quatre,
Par les chastiax de la entor.
Qant li rois ot fet son sejor
Tant que n' i vost plus arester,
Si refist son oirre aprester.
Mes il avoient la semainne
Trestuit proié et mise painne,
Au plus qu' il s' an porent pener,
Que il en poïssent mener
Monseignor Yvain avoec ax.
« Comant! Seroiz vos or de çax,
Ce disoit messire Gauvains,
Qui por leur fames valent mains?
Honiz soit de sainte Marie
Qui por anpirier se marie!
Amander doit de bele dame
Qui l' a a amie ou a fame,
Que n' est puis droiz que ele l' aint
Que ses los et ses pris remaint.
Certes, ancor seroiz iriez
De s' amor se vos anpiriez;
Que fame a tost s' enor reprise,
Ne n' a pas tort, s' ele despise
Celui qui devient de li pire
El rëaume dom il est sire.

89a. 2499

Or primes doit vostre pris croistre.
Ronpez le frain et le chevoistre,
S' irons tornoier moi et vos,
Que l' en ne vos apiaut jalos.
Or ne devez vos pas songier,
Mes les tornoiemanz ongier
Et anpanre, et tot fors giter,
Que que il vos doie coster.
Assez songe qui ne se muet!
Certes, venir vos an estuet,
Que ja n' i avra autre essoine.
Gardez que en vos ne remoingne,
Biax conpainz, nostre conpaignie,
Que en moi ne faura ele mie.
Mervoille est comant en a cure
De l' eisse qui tozjorz li dure.
Bien a donc cist ou delaier,
Et plus est dolz a essaier
Uns petiz biens, quant il delaie,
C' uns granz, qui tot adés l' essaie.
Joie d' amors qui vient a tart
Sanble la vert busche qui art,
Qui dedanz rant plus grant chalor
Et plus se tient en sa valor,
Quant plus demore a alumer.
An puet tel chose acostumer
Qui mout est greveuse a retrere;
Quant an le vialt, nel puet an fere.
Ne por ce ne le di ge mie,
Se j' avoie si bele amie
Con vos avez, biax dolz conpainz!
Foi que je doi Deu et toz sainz,
Mout a enviz la leisseroie.
A esciant, fos an seroie.
Tex done boen consoil autrui,
Qui ne savroit conseillier lui,
Ausi con li preescheor
Qui sont desleal lecheor,
Enseignent et dïent le bien
Dom il ne vuelent feire rien! »

Messire Gauvains tant li dist
Ceste chose et tant li requist
Qu' il creanta qu' il le diroit
A sa fame et puis s' an iroit

89b. 2543

S' il an puet le congié avoir;
Ou face folie ou savoir,
Ne leira que congié ne praigne
De retorner an la Bretaigne.
La dame en a a consoil trete,
Qui de ce congié ne se guete,
Si li dist: « Ma tres chiere dame,
Vos qui estes mes cuers et m' ame,
Mes biens, ma joie et ma santez,
Une chose m' acreantez,
Por vostre enor et por la moie. »
La dame tantost li otroie,
Qu' el ne set qu' il vialt demander
Et dit: « Biax sire, comander
Me poez ce qui boen vos iert. »
Congié maintenant li requiert
Messire Yvains, de convoier
Le roi et d' aler tornoier,
Que l' an ne l' apialt recreant.
Et ele dit: « Je vos creant
Le congié jusqu' a .i. termine.
Mes l' amors devanra haïne,
Que j' ai en vos, toz an soiez
Seürs, se vos trespassiez
Le terme que je vos dirai;
Sachiez que ja n' en mantirai.
Se vos mantez, je dirai voir.
Se vos volez m' amor avoir
Et de rien nule m' avez chiere,
Pansez de tost venir arriere,
A tot le moins jusqu' a .i. an,
.VIII. jorz aprés la Saint Johan,
C' ui an cest jor sont les huitaves.
De m' amor soiez maz et haves,
Se vos n' iestes jusqu' a ce jor
Ceanz avoec moi au retor. »

Messire Yvains pleure et sopire
Si fort qu' a poinnes le pot dire:
« Dame, cist termes est mout lons.
Se je poïsse estre colons
Totes les foiz que je vouroie,
Mout sovant avoec vos seroie.
Et je pri Deu que, s' il li plest,
Ja tant demorer ne me lest.

89c. 2587

Mes tex cuide tost revenir
Qui ne set qu' est a avenir.
Et je ne sai que m' avenra,
Se essoines me detanra
De malage ne de prison;
S' avez de tant fet mesprison
Quant vos n' en avez mis defors
Au moins l' essoine de mon cors.
- Sire, fet ele, et je l' i met;
Et neporquant bien vos promet
Que, se Dex de mort vos desfant,
Nus essoines ne vos desfant
Tant con vos sovanra de moi.
Mes or metroiz an vostre doi
Cest mien anel, que je vos prest;
Et de la pierre quex ele est
Vos voel dire tot en apert:
Prison ne tient ne sanc ne pert
Nus amanz verais et leax,
Ne avenir ne li puet max;
Mes qui le porte et chier le tient
De s' amie li resovient
Et si devient plus durs que fers.
Cil vos iert escuz et haubers
Et voir einz mes a chevalier
Ne le vos prester ne baillier,
Mes por amors le vos doing gié. »
Or a messire Yvains congié:
Mout out ploré au congié prendre.
Et li rois ne vost plus atendre
Por rien qu' an dire li seüst,
Einz li tardoit que l' en eüst
Toz lor palefroiz amenez,
Apareilliez et anfrenez.
Des qu' il le vost, il fu tost fet;
Li palefroi lor sont fors tret,
Si n' i a mes que del monter.
Ne sai que plus doie conter,
Comant messire Yvains s' en part,
Ne des beisiers qu' an li depart,
Qui furent de lermes semé
Et de dolçor anbaussemé.
Et del roi, que vos conteroie,
Comant la dame le convoie

89d. 2631

Et ses puceles avoec li
Et tuit li chevalier ausi?
Trop i feroie de demore.
La dame, por ce qu' ele plore,
Prie li rois de remenoir
Et de raler a son menoir;
Tant li prie qu' a mout grant poinne
S' an retorne, et ses genz an moinne.

Messire Yvains, mout a enviz,
Est de s' amie departiz,
Ensi que li cuers ne se muet.
Li rois le cors mener an puet,
Mes del cuer n' en manra il point;
Car si se tient et si se joint
Au cuer celi qui se remaint
Qu' il n' a pooir que il l' en maint;
Des que li cors est sanz le cuer,
Don ne puet il estre a nul fuer;
Et se li cors sanz le cuer vit,
Tel mervoille nus hom ne vit.
Ceste mervoille est avenue
Que il a l' ame retenue
Sanz le cuer, qui estre i soloit,
Que plus siudre ne le voloit.
Li cuers a boene remenance
Et li cors vit en esperance
De retorner au cuer arriere;
S' a fet cuer d' estrenge meniere
De s' esperance qui se vant,
Traïte, et fause de covant.
Ja, ce cuit, l' ore ne savra
Qu' esperance traï l' avra;
Car s' il .i. tot seul jor trespasse
Del terme qu' il ont mis a masse,
Mout a enviz trovera mes
En sa dame trives ne pes.
Et je cuit qu' il le passera,
Que departir ne le leira
Messire Gauvains d' avoec lui.
Aus tornoiemanz vont andui
Par toz les leus ou l' en tornoie.
Et li anz passe totevoie,
Sel fist tot l' an messire Yvains
Si bien que messire Gauvains

89e. 2675

Se penoit de lui enorer.
Et si le fist tant demorer
Que toz li anz fu trespassez
Et de tot l' autre encor assez,
Tant que a la mi aost vint,
Que li rois cort et feste tint.
Et furent la voille devant
Revenu del tornoiemant
Ou messire Yvains ot esté;
S' an ont tot le pris aporté,
Ce dit li contes, ce me sanble.
Et li dui chevalier ansanble
Ne vostrent en vile descendre,
Einz firent lor paveillon tendre
Fors de la vile et cort i tindrent,
C' onques a cort de roi ne vindrent,
Einçois vint li rois a la lor,
Car avoec ax sont li meillor
Des chevaliers et toz li plus.
Entr' ax seoit li rois Artus,
Quant Yvains tant encomança
A panser, que des lors en ça
Que a sa dame ot congié pris,
Ne fu tant de panser sorpris
Con de celui, car bien savoit
Que covant manti li avoit
Et trespassez estoit li termes.
A grant poinne tenoit ses lermes,
Mes hont* li feisoit tenir.
Tant pansa qu' il virent venir
Une dameisele a droiture;
Et vint mout tres grant aleüre
Sor un noir palefroi baucent;
Devant lor paveillon descent,
Que nus ne fu a son descendre,
Ne nus n' ala son cheval prendre.
Et lors que ele pot veoir
Le roi, se leissa jus cheoir
Son mantel, et desafublee
S' en est el paveillon antree
Et tres devant le roi venue;
Si dist que sa dame salue
Le roi et monseignor Gauvain
Et toz les autres, fors Yvain,

89f. 2719

Le mançongier, le guileor,
Le desleal, le tricheor,
Qu' il l' a guilee et deceüe;
Bien a sa guile aparceüe,
Qu' il se feisoit verais amerres,
S' estoit fos, souduianz et lerres.
Sa dame a cil lerres souduite,
Qui n' estoit de nus max estruite
Ne ne cuidoit pas, a nul fuer,
Qu' il li deüst anbler son cuer.
Cil n' anblent pas les cuers qui ainment,
Si a tex qui larrons les claiment,
Qui en amer sont non veant
Et si n' an sevent nes neant.
Li amis prant le cuer s' amie
Ensi qu' il ne li anble mie,
Einz le garde, et cil qui les anblent,
Li larron qui prodome sanblent,
Icil sont larron ipocrite
Et traïtor, qui metent lite
En cuers anbler don ax ne chaut;
Mes li amis, quel part qu' il aut,
Le tient chier et si le raporte.
Messire Yvains la dame a morte,
Qu' ele cuidoit qu' il li gardast
Son cuer et si li raportast
Einçois que fust passez li anz.
« Yvain, mout fus or oblianz
Quant il ne t' an pot sovenir
Que tu devoies revenir
A ma dame jusqu' a .i. an;
Jusqu' a la feste saint Jehan
Te dona ele de respit;
Et tu l' eüs an tel despit
C' onques puis ne t' an remanbra.
Ma dame en sa chanbre poinz a
Trestoz les jorz et toz les tans,
Car qui ainme, il est en espans,
N' onques ne puet panre boen some,
Mes tote nuit conte et asome
Les jorz qui vienent et qui vont.
Ensi li leal amant font
Contre le tans et la seison.
N' est pas venue a desreison

90a. 2763

Sa conplainte ne devant jor,
Si ne di ge rien por clamor,
Mes tant dit que traïz nos a
Qui a ma dame tresposa.

Yvain, n' a mes cure de toi
Ma dame, ainz te mande par moi
Que jamés vers li ne reveignes
Ne son anel plus ne reteignes.
Par moi, que ci an presant voiz,
Te mande que tu li envoiz:
Rant li, qu' a randre le t' estuet. »
Yvains respondre ne li puet,
Que sans et parole li faut;
Et la dameisele avant saut,
Si li oste l' anel del doi;
Puis si comande a Deu le roi
Et toz les autres, fors celui
Cui ele leisse an grant enui.
Et ses enuiz tot adés croist,
Que quanque il vit li angroist
Et quanque il ot li enuie;
Mis se voldroit estre a la fuie
Toz seus en si salvage terre
Que l' en ne le seüst ou querre,
Ne nus hom ne fame ne fust
Qui de lui noveles seüst
Ne plus que s' il fust en abisme.
Ne het tant rien con lui meïsme
Ne ne set a cui se confort
De lui, qui soi meïsme a mort.
Mes ainz voldroit le san changier
Que il ne se poïst vengier
De lui, qui joie s' a tolue.
D' antre les barons se remue,
Qu' il crient entr' ax issir del san;
Et de ce ne se gardoit l' an,
Si l' an leissierent seul aler:
Bien sevent que de lor parler
Ne de lor siegle n' a il soing.
Et il va tant que il fu loing
Des tantes et des paveillons.
Lors se li monte uns torbeillons
El chief, si grant que il forsane;
Si se dessire et se depane

90b. 2807

Et fuit par chans et par arees,
Et lessa ses genz esgarees,
Qui se mervoillent ou puet estre:
Querant le vont destre et senestre
Par les ostex as chevaliers
Et par haies et par vergiers;
Sel quierent la ou il n' est pas.
Et il s' an vet plus que le pas
Tant qu' il trova delez un parc
.I. garçon qui tenoit .i. arc
Et .v. saietes barbelees
Qui mout erent tranchanz et lees.
Yvains s' en va jusqu' au garçon,
Cui il voloit tolir l' arçon
Et les saietes qu' il tenoit.
Porqant mes ne li sovenoit
De rien que onques eüst feite.
Les bestes par le bois agueite,
Si les ocit; et se manjue
La venison trestote crue.
Et tant conversa el boschage,
Com hom forsenez et salvage,
C' une meison a .i. hermite
Trova, mout basse et mout petite;
Et li hermites essartoit.
Quant vit celui qui nuz estoit,
Bien pot savoir, sanz nul redot,
Qu' il n' ert mie an son san del tot;
Et si fist il, tres bien le sot;
De la peor que il en ot
Se feri an sa meisonete.
De son pain et de sa porrete
Par charité prist li boens hom,
Si li mist fors de sa meison
Desor une fenestre estroite.
Et cil vient la qui mout covoite
Le pain, sel prant et si i mort;
Ne cuit que onques de si fort
Ne de si aspre eüst gosté;
N' avoit mie .xx. solz costé
Li setiers dom fu fez li pains;
Qu' a toz mangiers est force fains
Desatranpree et desconfite.
Tot menja le pain a l' ermite

90c. 2851

Messire Yvains, que boen li sot;
De l' eve freide but au pot.
Quant mangié ot, si se refiert
El bois, et cers et biches quiert;
Et li boens hoem desoz son toit
Prie Deu, quant aler l' en voit,
Qu' il le desfande et qu' il le gart
Que mes ne vaingne cele part.
Mes n' est nus, tant po de san ait,
Qui el leu ou l' en bien li fait
Ne revaigne mout volentiers.
Puis ne passa .viii. jorz antiers,
Tant com il fu an cele rage,
Que aucune beste salvage
Ne li aportast a son huis.
Iceste vie mena puis,
Et li boens hom s' antremetoit
De lui colchier, et si metoit
Asez de la venison cuire;
Et li peins et l' eve et la buire
Estoit tozjorz a la fenestre
Por l' ome forsené repestre;
S' avoit a mangier et a boivre
Venison sanz sel et sanz poivre
Et aigue froide de fontainne.
Et li boens hoem estoit an painne
De cuir vandre et d' acheter pain
D' orge et de soigle sanz levain.
S' ot puis tote sa livreison,
Pain a planté et veneison
Qu' il li dona tant longuemant
C' un jor le troverent dormant
En la forest .ii. dameiseles
Et une lor dame avoec eles
De cui mesniee eles estoient.
Vers l' ome nu que eles voient
Cort et descent une des trois;
Mes mout le regarda einçois
Que rien nule sor lui veïst
Qui reconuistre li feïst;
Si l' avoit ele tant veü
Que tost l' eüst reconeü
Se il fust de si riche ator
Com il avoit esté maint jor.

90d. 2895

Au reconoistre mout tarda
Et totevoie l' esgarda
Tant qu' an la fin li fu avis
D' une plaie qu' il ot el vis;
C' une tel plaie el vis avoit
Messire Yvains, bien le savoit,
Qu' ele l' avoit assez veü.
Por la plaie l' a coneü,
Que ce est il, de rien n' en dote;
Mes de ce se mervoille tote
Comant ce li est avenu
Que si l' a trové povre et nu.
Mout s' an seigne et si s' an mervoille;
Cele ne le bote n' esvoille,
Einz prant le cheval, si remonte
Et vient as autres, si lor conte
S' aventure tot an plorant.
Ne sai qu' alasse demorant
A conter le duel qu' ele an fist;
Mes plorant a sa dame dist:
« Dame, je ai Yvain trové,
Le chevalier mialz esprové
Del monde et le mialz antechié;
Mes je ne sai par quel pechié
Est au franc home mescheü;
Espoir, aucun duel a eü
Qui le fet ensi demener;
An puet bien de duel forsener,
Et savoir et veoir puet l' an
Qu' il n' est mie bien an son san,
Que ja voir ne li avenist
Que si vilmant se contenist
Se il le san n' eüst perdu.
Car li eüst or Dex randu
Le san au mialz que il ot onques
Et puis si li pleüst adonques
Qu' il remassist en vostre aïe!
Car trop vos a mal envaïe
Li cuens Aliers, qui vos guerroie.
La guerre de vos .ii. verroie
A vostre grant enor finee
Se Dex si boene destinee
Li donoit qu' il se remeïst
En son san et s' antremeïst

90e. 2939

De vos eidier a cest besoing. »
La dame dist: « Or n' aiez soing,
Que certes, se il ne s' an fuit,
A l' aïde de Deu, ce cuit,
Li osterons nos de la teste
Tote la rage et la tempeste.
Mes tost aler nos an covient,
Car d' un oignemant me sovient
Que me dona Morgue la sage;
Et si me dist que si grant rage
N' est an teste, qu' il ne l' en ost. »
Vers le chastel s' an vont mout tost,
Qu' il ert si pres qu' il n' i ot pas
Plus de demie liue .i. pas,
Des liues qui el païs sont,
Car a mesure des noz sont
Les .ii. une, les quatre .ii. .
Et cil remaint dormant toz seus,
Et cele ala l' oignemant querre.
La dame .i. suen escrin desserre,
S' an tret la boiste et si la charge
A la dameisele, et trop large
Li prie que ele n' en soit,
Les temples et le front l' en froit,
Qu' aillors point metre n' en besoingne.
Les temples et le front l' en oingne,
Et le remenant bien li gart,
Qu' il n' a point de mal autre part
Et le remenant bien li gart*
Fors que seulemant el cervel.
Robe veire, cote et mantel
A fet porter, de soie an greinne.
Cele li porte et si li meinne
An destre .i. palefroi mout buen,
Et avoec ce i met del suen:
Chemise et braies deliees,
Et chauces noires et dougiees.
Atot ce, si tres tost s' an va,
Qu' ancor dormant celui trova
La ou ele l' avoit leissié.
Ses chevax met en .i. pleissié,
Ses atache et lie mout fort,
Et puis vient la ou cil se dort,
Atot la robe et l' oingnemant,

90f. 2982

Et fet .i. mout grant hardemant
Que del forsené tant s' aproche
Qu' ele le menoie et atoche;
Et prant l' oignemant, si l' en oint
Tant con en la boiste an ot point,
Et tant sa garison covoite
Que de l' oindre partot esploite;
Si le met trestot an despanse,
Que ne li chaut de la desfanse
Sa dame ne ne l' en sovient.
Plus en i met qu' il ne covient;
Mout bien, ce li est vis, l' enploie:
Les temples et le front l' en froie,
Trestot le cors jusqu' an l' artuel.
Tant li froia au chaut soloil
Les temples et trestot le cors
Que del cervel li trest si fors
La rage et la melencolie.
Mes del cors fist ele folie,
Qu' il ne li estoit nus mestiers.
S' il en i eüst .v. setiers,
S' eüst ele autel fet, ce cuit.
La boiste anporte, si s' an fuit,
Si s' est vers ses chevax reposte;
Mes la robe mie n' en oste
Por ce que, se cil se ravoie,
Vialt qu' apareilliee la voie
Et qu' il la preigne, si s' an veste.
Derriers .i. grant chasne s' areste
Tant que cil ot dormi assez,
Qui fu gariz et respassez,
Et totz son san et son mimoire.
Mes nuz se voit com un yvoire,
S' a grant honte, et plus grant eüst
Se il s' aventure seüst,
Mes ne sot por coi nuz se trueve.
Devant lui voit la robe nueve,
Si se mervoille a desmesure
Comant et par quel aventure
Cele robe estoit la venue;
Et de sa char que il voit nue
Est trespansez et esbaïz,
Et dit que morz est et traïz
S' einsi l' a trové ne veü

91a. 3026

Riens nule qui l' ait coneü.
Et totevoie si se vest
Et regarde vers la forest
S' il verroit nul home venir.
Lever se cuide et sostenir,
Mes ne puet tant qu' aler s' an puisse.
Mestiers li est qu' aïde truisse
Qui li aïst et qui l' en maint,
Que si l' a ses granz max ataint
Qu' a poinnes puet sor piez ester.
Or ne vialt mes plus arester
La dameisele, ainz est montee
Et par delez lui est passee,
Si con s' ele ne l' i seüst.
Et cil, qui grant mestier eüst
D' aïde, ne li chausist quel,
Qui l' en menast jusqu' a ostel
Tant qu' il fust auques en sa force,
De li apeler mout s' esforce.
Et la dameisele autresi
Vet regardant environ li
Con s' ele ne sache qu' il a.
Esbaïe, vet ça et la,
Que droit vers lui ne vialt aler.
Et cil comance a rapeler:
« Dameisele, de ça, de ça! »
Et la dameisele adreça
Vers lui son palefroi anblant.
Cuidier li fist par ce sanblant
Qu' ele de lui rien ne seüst
N' onques la veü ne l' eüst;
Et san et corteisie fist.
Quant devant lui vint, si li dist:
« Sire chevaliers, que volez,
Qui a tel besoing m' apelez?

- Ha! fet il, dameisele sage,
Trovez me sui an cest boschage,
Je ne sai par quel mescheance.
Por Deu et por vostre creance
Vos pri que an toz guerredons
Me prestez ou donez an dons
Ce palefroi que vos menez.
- Volentiers, sire, mes venez
Avoec moi la ou ge m' an vois.

91b. 3070

- Quel part? fet il. - Fors de cest bois,
Jusqu' a .i. chastel ci selonc.
- Dameisele, or me dites donc
Se vos avez besoing de moi.
- Oïl, fet ele, mes je croi
Que vos n' iestes mie bien sains;
Jusqu' a quinzainne, a tot le mains,
Vos covendroit a sejor estre;
Le cheval que je maing an destre
Prenez, s' irons jusqu' a ostel. »
Et cil, qui ne demandoit el,
Le prant et monte; si s' an vont
Tant qu' il vindrent a Oripont,
Don l' eve estoit roide et bruianz.
Et la dameisele giete anz
La boiste qu' ele portoit vuide,
Qu' ainsi vers sa dame se cuide
De son oignemant escuser,
Qu' ele dira que au passer
Del pont ensi li mescheï
Que la boiste an l' eve cheï:
Por ce que desoz li çopa
Ses palefroiz, li escapa
Del poing la boiste et a bien pres
Que ele ne sailli aprés,
Mes adonc fust la perte graindre.
Ceste mançonge voldra faindre
Qant devant sa dame iert venue.
Lor voie ont ansanble tenue
Tant que au chastel sont venu;
Si a la dame retenu
Monseignor Yvain lieemant;
Et sa boiste et son oingnemant
Demanda a sa dameisele,
Mes ce fu seul a seul; et cele
Li a la mançonge retreite,
Si grant com ele l' avoit feite,
Que le voir ne l' en osa dire.
S' en ot la dame mout grant ire
Et dit: « Ci a mout leide perte,
Que de ce sui je tote certe
Qu' ele n' iert jamés recovree.
Mes des que la chose est alee,
Si n' i a que del consirrer.

91c. 3115

...*
Sot* bien qu' an desirre son mal;
Si con je crui, de cest vasal
Don cuidai bien et joie avoir,
Si ai perdu de mon avoir
Tot le meillor et le plus chier.
Neporquant bien vos vuel prier
De lui servir sor tote rien.
- Ha! dame, or dites vos mout bien,
Que ce seroit trop vileins geus
Qui feroit d' un domage deus. »

Atant de la boiste se teisent;
Et monseignor Yvain aeisent
De quanqu' eles pueent ne sevent;
Sel baignent et son chief li levent,
Et sel font rere et reoignier,
Que l' en li poïst anpoignier
La barbe a plain poing sor la face.
Ne vialt chose qu' an ne li face:
S' il vialt armes, et an li done;
S' il vialt cheval, en li sejorne,
Grant et bel et fort et hardi.
Tant sejorna qu' a .i. mardi
Vint au chastel li cuens Aliers
A sergenz et a chevaliers,
Et mistrent feu et pristrent proies.
Et cil del chastel totevoies
Montent et d' armes se garnissent;
Armé et desarmé s' an issent
Tant que les coreors aceignent,
Qui por ax movoir ne se deignent,
Einz les atendent a .i. pas.
Et messire Yvains fiert el tas,
Qui tant a esté sejornez
Qu' an sa force fu retornez;
Si feri de si grant vertu
.I. chevalier parmi l' escu
Qu' il mist en .i. mont, ce me sanble,
Cheval et chevalier ansanble,
N' onques puis cil ne se leva,
Qu' el vantre li cuers li creva
Et fu parmi l' eschine frez.
.I. petit s' est arrieres trez
Messire Yveins, et si recuevre;

91d. 3157

(Messire Yvains, et si recuevre)*
Trestoz de son escu se cuevre
Et cort por le pas desconbrer.
Plus tost ne poïst an nonbrer
Anpreu et .ii. et trois et quatre,
Que l' en ne li veïst abatre
Quatre chevaliers araumant,
Plus tost et plus delivremant.
Et cil qui avoec lui estoient
Por lui grant hardemant prenoient;
Que tex a poinne ovrer antasche,
Qant il voit c' uns prodon alasche
Devant lui tote une besoingne,
Que maintenant honte et vergoingne
Li cort sus et si giete fors
Le povre cuer qu' il a el cors,
Si li done sostenemant,
Cuer de prodome et hardemant.
Ensi sont cil devenu preu,
Si tient chascuns mout bien son leu
En la meslee et an la tor*.
Et la dame fu en la tor
De son chastel montee an haut
Et vit la meslee et l' asaut
Au pas desresnier et conquerre,
Et vit assez gisanz par terre
Des afolez et des ocis,
Des suens et de ses anemis,
Et plus des autres que des suens.
Mes li cortois, li preuz, li buens,
Messire Yvains trestot ausi
Les feisoit venir a merci
Con fet li faucons les cerceles.
Et disoient et cil et celes
Qui el chastel remés estoient
Et des batailles l' esgardoient:
« Haï! Con vaillant soldoier!
Con fet ses anemis ploier!
Con roidemant il les requiert!
Tot autresi antr' ax se fiert
Con li lyons antre les dains
Quant l' engoisse et chace la fains.
Et tuit nostre autre chevalier
An sont plus hardi et plus fier,

91e. 3201

Que ja, se par lui seul ne fust,
Lance brisiee n' i eüst
N' espee traite por ferir.
Mout doit an amer et cherir
.I. prodome quant en le trueve.
Veez or comant cil se prueve,
Veez com il se tient el ranc;
Or veez com il taint de sanc
Et sa lance et s' espee nue,
Veez comant il les remue,
Veez comant il les antasse,
Com il lor vient, con il lor passe,
Com il ganchist, con il retorne!
Mes au ganchir petit sejorne
Et mout demore an son retor;
Veez, quant il vient an l' estor,
Com il a po son escu chier,
Com il le leisse detranchier;
N' en a pitié ne tant ne qant,
Mes de ce se voit mout en grant
Des cos vangier que l' en li done.
Qui de trestot le bois d' Argone
Li avroit fet lances, ce cuit,
N' i avroit il nule anquenuit,
Qu' an ne l' en set tant metre an fautre
Com il peçoie devant autre.
Et veez comant il le fet
De l' espee quant il la tret!
Onques ne fist par Durandart
Rolanz, des Turs, si grant essart
En Roncevax ne an Espaigne.
Se il eüst an sa conpaigne
Auques de si fez conpaignons,
Li fel de coi nos nos pleignons
S' en alast come desconfiz
Ou il en remassist honiz. »
Et dïent que buer seroit nee
Cui il avroit s' amor donee,
Qui si est as armes puissanz
Et desor toz reconoissanz,
Si con cierges antre chandoiles
Et la lune antre les estoiles
Et li solauz desor la lune;
Et de chascun et de chascune

91f. 3245

A si les cuers que tuit voldroient,
Por la proesce qu' an lui voient,
Que il eüst lor dame prise
Et fust la terre an sa justise.

Ensi tuit et totes prisoient
Celui don verité disoient,
Que cez de la a si atainz
Que il s' an fuient qui ainz ainz;
Mes il les chace mout de pres
Et tuit si conpaignon aprés,
Que lez lui sont ausi seür
Con s' il fussent tuit clos a mur
Haut et espés de pierre dure.
La chace mout longuemant dure
Tant que cil qui fuient estanchent
Et cil qui chacent lor detranchent
Toz lor chevax et esboelent.
Les vis desor les morz roelent
Qui s' antrafolent et ocïent,
Leidemant s' antrecontralïent.
Et li cuens tot adés s' an fuit,
Mes messire Yvains pas ne fuit,
Qui de lui siudre ne se faint;
Tant le chace que il l' ataint
Au pié d' une ruiste montee,
Et ce fu mout pres de l' antree
D' un fort recet qui estoit suens.
Iqui fu retenuz li cuens,
C' onques riens ne li pot eidier;
Et sanz trop longuemant pleidier
An prist la foi messire Yvains,
Que, des que il le tint as mains
Et il furent seul per a per,
N' i a neant del eschaper,
Ne del ganchir, ne del desfandre,
Einz li plevist qu' il s' iroit randre
A la dame de Norison,
Si se metroit an sa prison
Et feroit peis a sa devise.
Et quant il en ot la foi prise,
Si li fist son chief desarmer
Et l' escu jus del col oster,
Et l' espee li randi nue.
Ceste enors li est avenue

92a. 3289

Qu' il an mainne le conte pris,
Si le rant a ses anemis,
Qui n' en font pas joie petite.
Mes ainz fu la novele dite
Au chastel, que il i venissent;
Encontre ax tuit et totes issent,
Et la dame devant toz vient.
Messire Yvains par la main tient
Le prisonier, si li presante.
Sa volanté et son creante
Fist lors li cuens oltreemant,
Et par foi et par seiremant
Et par ploiges l' en fist seüre;
Ploige li done et si li jure
Que tozjorz mes pes li tanra
Et que ses pertes li randra,
Quanqu' ele an mosterra par prueves,
Et refera les meisons nueves
Que il avoit par terre mises.
Qant ces choses furent asises
Ensi com a la dame sist,
Messire Yvains congié an quist,
Que ele ne li donast mie
Se il a fame ou a amie
La volsist panre et noçoier.
Neïs siudre ne convoier
Ne s' i vost il lessier un pas,
Einz s' an parti eneslepas,
C' onques rien n' i valut proiere.
Or se mist a la voie arriere
Et leissa mout la dame iriee
Que il avoit mout feite liee.
Et con plus liee l' avoit feite,
Plus li poise et plus se desheite
Quant il ne vialt plus demorer,
C' or le volsist ele enorer,
Et sel feïst, se lui pleüst,
Seignor de quanque ele eüst,
Ou ele li eüst donees
Por son servise granz soldees,
Si granz com il les volsist prendre.
Mes il n' en vost onques entendre
Parole d' ome ne de fame;
Des chevaliers et de la dame

92b. 3333

S'est partiz, mes que bien l'en poist
Que plust* remenoir ne li loist.

Messire Yvains pansis chemine
Par une parfonde gaudine
Tant qu' il oï enmi le gaut
.I. cri mout dolereus et haut.
Si s' adreça lors vers le cri,
Cele part ou il l' ot oï,
Et, quant il parvint cele part,
Vit .i. lyon, en un essart,
Et .i. serpant qui le tenoit
Par la coe, et si li ardoit
Trestoz les rains de flame ardant.
N' ala mie mout regardant
Messire Yvains cele mervoille;
A lui meïsmes se consoille
Auquel d' aus .ii. il aidera.
Lors dit qu' au lyon se tanra,
Qu' a venimeus ne a felon
Ne doit an feire se mal non,
Et li serpanz est venimeus,
Si li saut par la boche feus,
Tant est de felenie plains.
Por ce panse messire Yvains
Qu' il l' ocirra premieremant;
S' espee tret et vint avant
Et met l' escu devant sa face,
Que la flame mal ne li face
Que il gitoit parmi la gole,
Qui plus estoit lee d' une ole.
Se li lyons aprés l' asaut,
La bataille pas ne li faut;
Mes que qu' il l' en aveingne aprés,
Eidier li voldra il adés,
Que pitiez li semont et prie
Qu' il face secors et aïe
A la beste gentil et franche.
A s' espee, qui soef tranche,
Va le felon serpant requerre;
Si le tranche jusqu' anz enz* terre
Et les .ii. mitiez retronçone,
Fiert et refiert, et tant l' en done
Que tot le demince et depiece.
Mes il li covient une piece

92c. 3377

Tranchier de la coe au lion,
Por la teste au serpant felon
Qui par la coe le tenoit;
Tant con tranchier an covenoit
En trancha, c' onques moins ne pot.
Quant le lyon delivré ot,
Si cuida qu' il li covenist
Conbatre et que sus li venist;
Mes il ne le se pansa onques.
Oez que fist li lyons donques,
Con fist que preuz et deboneire,
Com il li comança a feire
Sanblant que a lui se randoit,
Que ses piez joinz li estandoit
Et vers terre encline sa chiere;
Si s' estut sor ses piez derriere
Et puis si se ragenoilloit
Et tote sa face moilloit
De lermes, par humilité.
Messire Yvains, por verité,
Set que li lyons le mercie
Et que devant lui s' umilie
Por le serpant que il a mort
Et lui delivré de la mort;
Si li plest mout ceste aventure.
Por le venin et por l' ordure
Del serpant, essuie s' espee,
Si l' a el fuerre rebotee,
Puis si se remet a la voie.
Et li lyons lez lui costoie,
Que jamés ne s' an partira,
Tozjorz mes avoec lui ira,
Que servir et garder le vialt.
Devant a la voie s' aquialt
Si qu' il santi desoz le vant,
Si com il en aloit devant,
Bestes salvages en pasture;
Si le semont feins et nature
D' aler an proie et de chacier
Por sa vitaille porchacier;
Ce vialt nature que il face.
.I. petit s' est mis en la trace
Tant qu' a son seignor a mostré
Qu' il a senti et ancontré

92d. 3421

Vant et fleir de salvage beste.
Lors le regarde et si s' areste,
Que il le vialt servir an gré,
Car encontre sa volenté
Ne voloit aler nule part.
Et cil parçoit a son esgart
Qu' il li mostre que il l' atant;
Bien l' aparçoit, et bien l' entant,
Que s' il remaint, il remanra,
Et, se il le siust, il panra
La veneison qu' il a santie.
Lors le semont et si l' escrie
Ausi com uns brachez feïst;
Et li lyons maintenant mist
Le nes au vant qu' il ot santi;
Ne ne li ot de rien manti,
Qu' il n' ot pas une archiee alee
Quant il vit en une valee
Tot seul pasturer .i. chevrel.
Celui panra il ja son vuel,
Si fist il au premier asaut,
Et si an but le sanc tot chaut.
Qant ocis l' ot, si le gita
Sor son dos, et si l' en porta
Tant que devant son seignor vint,
Et puis an grant chierté le tint
Por la grant amor qu' an lui ot.
Ja fu pres de nuit, se li plot
Qu' ilueques se herbergeroit
Et le chevrel escorcheroit
Tant com il en voldroit mangier.
Lors le comance a escorchier;
Le cuir li fant desus la coste,
De la longe .i. lardé li oste;
Et tret le feu d' un chaillot bis,
Si l' a de busche sesche espris;
Puis mist en une broche an rost
Son lardé cuire au feu mout tost;
Sel rostist tant que il fu cuiz,
Mes del mangier ne fu deduiz,
Qu' il n' i ot pein ne vin ne sel
Ne nape ne coutel ne el.
Quequ' il manja, devant lui jut
Ses lyons, c' onques ne se mut;

92e. 3465

Einz l' a tot adés regardé
Tant qu' il ot de son gras lardé
Tant mangié que il n' en vost plus.
Et del chevrel le soreplus
Manja li lyons jusqu' as os.
Et il tint son chief an repos
Tote la nuit sor son escu,
A tel repos come ce fu;
Et li lyons ot tant de sens
Qu' il veilla et fu an espens
Del cheval garder, qui pessoit
L' erbe, qui petit l' engressoit.

Au main s' an alerent ensanble
Et itel vie, ce me sanble,
Com il orent la nuit menee
Remenerent a la vespree,
Et presque tote une quinzainne,
Tant qu' aventure a la fontainne
Desoz le pin les amena.
Las! par po ne reforsena
Messire Yvains, cele foiee,
Quant la fontainne a aprochiee,
Et le perron, et la chapele.
Mil foiz las et dolanz s' apele
Et chiet pasmez, tant fu dolanz.
Et s' espee, qui ert colanz,
Chiet del fuerre, si li apointe
Es mailles del hauberc la pointe,
Enprés le col, pres de la joe.
N' i a maille qui ne descloe,
Et l' espee del col li tranche
La pel desoz la maille blanche,
Si qu' il an fist le sanc cheoir.
Li lyons cuide mort veoir
Son conpaignon et son seignor;
Einz de rien n' ot ire graignor,
Qu' il comança tel duel a fere,
N' oï tel conter ne retrere,
Qu' il se detuert et grate et crie
Et s' a talant que il s' ocie
De l' espee qu' il li est vis
Qu' il ait son boen seignor ocis.
A ses danz l' espee li oste
Et sor .i. fust gisant l' acoste

92f. 3509

Et derriers a un tronc l' apuie,
Qu' il a peor qu' el ne s' an fuie
Qant il i hurtera del piz.
Ja fust ses voloirs aconpliz
Quant cil de pasmeisons revint;
Et li lyons son cors retint,
Qui a la mort toz escorsez
Coroit come pors forsenez
Qui ne prant garde ou il se fiere.
Messire Yvains en tel meniere
Devant le perron se pasma.
Au revenir mout se blasma
De l' an que trespassé avoit,
Por coi sa dame le haoit,
Et dit: « Que fet quant ne se tue
Cil las qui joie s' est tolue?
Que fais je, las, qui ne m' oci?
Comant puis je demorer ci
Et veoir les choses ma dame?
En mon cors por coi remaint ame?
Que fet ame an si dolant cors?
Se ele an ert alee fors,
Ne seroit pas en tel martire.
Haïr et blasmer et despire
Me doi, voir, mout, et je si faz.
Qui pert sa joie et son solaz
Par son mesfet et par son tort
Mout se doit bien haïr de mort.
Haïr et ocirre se doit;
Et je, tant con nus ne me voit,
Por quoi m' esparg que ne me tu?
Donc n' ai je ce lyon veü,
Qui por moi a si grant duel fet
Qu' il se volt m' espee antreset
Parmi le cors el piz boter?
Et je doi la mort redoter,
Qui ai ma joie a duel changiee?
De moi s' est leesce estrangiee
Et tuit solaz. N' en dirai plus,
Que ce ne porroit dire nus;
S' ai demandee grant oiseuse.
Des joies fu la plus joieuse
Cele qui m' ert aseüree;
Mes mout ot petite duree.

93a. 3553

Et qui ce pert par son mesfet,
N' est droiz que boene aventure et. »

Queque cil ensi se demante,
Une cheitive, une dolante,
Estoit en la chapele anclose,
Qui vit et oï ceste chose
Par le mur qui estoit crevez.
Maintenant qu' il fu relevez
De pasmeisons, si l' apela:
« Dex! fet ele, que voi ge la?
Qui est qui se demante si? »
Et cil li respont: « Et vos, qui?
- Je sui, fet ele, une cheitive,
La plus dolante riens qui vive. »
Cil li respont: «Tes, fole riens!
Tex diax est joie! Tex est biens
Envers les max don ge lenguis.
Tant con li hom a plus apris
A delit et a joie vivre,
Plus le desvoie et plus l' enivre
De quanqu' il a que un autre home;
Li foibles hom porte la some,
Par us et par acostumance,
C' uns autres de plus grant puissance
Ne porteroit por nule rien.
- Par foi, fet ele, jel sai bien,
Que c' est parole tote voire;
Mes por ce ne fet mie a croire
Que vos aiez plus mal de moi,
Et por ce mie ne le croi,
Qu' il m' est avis que vos poez
Aler quel part que vos volez,
Et je sui ci anprisonee;
Si m' est tex faesons donee
Que demain serai ceanz prise
Et livree a mortel juise.
- Ha! Dex, fet il, por quel forfet?
- Sire chevaliers, ja Dex n' et
De l' ame de mon cors merci
Se je l' ai mie desservi!
Et neporquant si vos dira*
Le voir, que ja n' en mantirai.
Por ce ceanz sui an prison
Qu' an m' apele de traïson,

93b. 3597

Ne je ne truis qui m' an desfande,
Que l' endemain ne m' arde ou pande.