fol. 81 ro - vo
Ge Raous de Soissons, frere le Conte de Soissons, fas savoir a tous ces qui
ces presentes lettres verront que j'ai receu de monsignor Thiebaut, par la
grace de Dieu Roi de Navarre, de Champagne et de Brie conte palasin, trois
cens livres de provenisiens, lesquex je li sui tenu a rendre dedanz
quarente jours que il ou ses mandemenz le requerront. Et s'il avenoit que je
fusse hom le Roi devant dit de terre que je tenisse de lui en mon domaine de
qui il n'eust oncques mais eu hom quand ces lettres furent données, je seroi
quittes et delivrés de trois cenz livres qui ci sont devisées et nommées en
telle maniere que se je defailloie de paier ces trois cens livres si comme
il est dessus devisé, que il ou ses commandemens poist pranre de mes choses
ou qu'il les trouvast, et ce jusqu'a tant qu'il fust paié de la somme
devantdite et des domages qu'il auroit eus par mon defaut. Et en tesmoignance de ceste chose j'ai fait sceller ces presentes lettres de mon
scel. En l'an de l'Incarnation nostre Signor MCC et xlv ou Mois de
Novembre
fol. 81 vo - 82 ro
Ge Raous de Soissonz, freres le Conte de Soissons, fas savoir a touz cels qui
ces lettres verront que je ai fait homage lige a monsignor Thiebaut, par la
grace de Dieu Roi de Navarre, de Champagne et de Brie conte palasin, sauf
l'hommage mon frere Jean conte de Soissons. Et ai promis a Roi devantdit a aidier contre tous homes qui puissent ne vivre ne morir, fors que encontre
mon frere, et lors tant seulement por la propre querele. Et en tesmoignance des choses
devantdites j'ai fait sceller ces presentes lettres de mon scel. An l'an de l'Incarnation nostre
Signor Mil deux cenz quarente cinq, le samedi devant la feste Sainct andriau
l'apostre [le 30 novembre 1245]
fol. 82 ro - vo
Ge Raous de Soissons, frere le Conte de Soissons, fas savoir a tous cels qui
ces presentes lettres verront que j'ai receu a Lagny de mon cher signor Thiebaut, par la
grace de Dieu Roi de Navarre, de Champagne et de Brie conte palasin, par la
main Girart de Nivil son chambellan, trois
cens livres de bons provenisiens, desquex je me tieng por bien paiez.
Et en tesmoignance de ceste chose j'ai scellées ces presentes lettres de mon
scel. Ce fut fait an l'an de l'Incarnation nostre Signour Mil deux cenz quarente cinq, ou mois de fevrier le juedi devant
caresme prenant [le 22 février 1246]
|