UNIVERSITÉ D'OTTAWA Faculté des Arts
Laboratoire de français ancien
Jean le Conte
Miracles de Notre-Dame
CI-CX
CI
Du riche homme puissant que Nostre Dame garda de dampnacion.
Jadis fut ung païsant riche, maiz sa richesse estoit mal acquise, car quant il labouroit, il acuilloit la terre de ses voisins avec la sienne et par ceste menniere, vint en grant puissance corporelle. Et cestuy avoit, sur tous, devocion a la Virge Marie et, chascun jour, la saluoit devotement. Si advint que il fut tres fort malade et tant qu'il mourut. Si estoint les ennemis venus a sa fin, qui prindrent l'ame comme leur, des qu'elle yssi du corps. Et tantost les angres de paradis y mirent contredit. Adonc recorderent les ennemis tous les grans maulx qu'il avoit faiz et d'aultre part, les angres de paradis si racompterent tous les biens; maiz les malx montoint plus. Adonc mirent les ennemis grant debat et dirent qu'elle leur appartenoit; et la vouloint porter en enfer pour estre tormentee quant ung angre alega pour
74b
luy que, chascun jour, il saluoit Nostre Dame, laquelle l'avoit prins en sa garde et proteccion. Ce ouy, tous les ennemis s'en fouirent a grant confusion et les angres de paradis le prindrent et le presenterent a la Virge Marie, en paradis ou elle est couronnee. Et ainssi le dist il a sa femme tantost aprés sa mort, pour ce qu'elle pria plusieurs fois a Jhesu Crist et a sa mere que eulx luy voulsissent demonstrer en quel estat l'ame de son mary estoit.
CII
De l'omme qui out le pié coupé, que Nostre Dame luy remist.
A Envers, a une eglise de Nostre Dame a laquelle venoint ceulx qui estoint malades de diverses maladies, si en vint ung, entre les aultres, qui avoit eu ou pié une diverse maladie qui est nommee le feu d'enfer. Si sentoit tres grans douleurs et, en plourant, pria la Virge Marie plusieurs foiz qu'elle, par sa grace, luy donnast confort et voulsist destaindre la grant chaleur que il avoit au pié. Et quant il vit qu'il ne garissoit point, par le consail des medicins il se fist le pié couper a grant douleur. Aprés advint, par longtemps, que il vint a l'eglise devant dicte et se agenoilla devant l'ymage Nostre Dame et la commencha a prier devant son ymage et plourer devant elle en disant qu'il avoit esté né en povre heure, car
75a
les aultres avoint trouvee grace devant elle et luy non. si commencha donc a dire une devote oraison de la Virge Marie. En la disant, il s'endormit. Et tantost luy apparu Nostre Dame en grant clarté, a grant foison d'angres, et prinst la jambe de quoy le pié avoit esté coupé et mist sa main dessus le pié de sa coupeure et luy tinst ung pou de temps et puis l'en osta. Et le bon homme s'esveilla et vit que la doulce dame luy avoit rendu son pié, et saillit devant tout le peuple dessus et monstra la grant grace que Dieu luy avoit faite. De quoy tous congnurent et confesserent la puissance de la Virge Marie.
CIII
De l'angre qui getoit ung brandon de feu et Nostre Dame le recevoit.
A Saint Françoys des Assises advint que ung preudomme y avoit qui estoit en oraison, et penssa parfaitement aux biens de paradis et regarda vers le ciel. Et adonc vit ung angle bel et gracieux, qui estoit en l'air en estant, maiz monstroit semblant d'estre couroucé; et estoit saint par dessus la robe, et de sa sainture yssoit ung grant brandon de feu. Et d'autre part il vit ugne dame, tant belle que ceur humain ne pourroit pensser plus grant biaulté; et fut vestue d'un vestement plus blanc que nef. Et tantost regarda que l'angre prinst en sa sainture ung grant brandon de feu et le geta par tel aïr qu'il sembloit qu'il
75b
voulsist tout le monde gaster; mais la glorieuse dame estendit son geron et receut le feu sans ce qu'il fist mal, et prinst le feu entre ses mains et le destaingnit. Et quant l'angre vit ce, il en prinst encoure ung brandon et le geta plus fierement qu'il n'avoit fait l'autre foiz; et se gardoit a son pouvoir qu'il ne touchast a la dame, mais geta de l'autre part. Et tantost la Virge Marie saillit avant - et en la part ou il avoit geté en l'air, estoit ja tout enflambé - et prinst le feu et le destaingnit. Et tantost il prinst ung aultre brandon et le geta, et la dame en fist comme des aultres. Et dura tant celle guerre que l'autre out geté tout le feu qu'il avoit. Si ploura moult tendrement le preudomme qui ce voioit pour la tres grant merveille de sa vision et pria devotement Nostre Signour qu'il luy voulsist demonstrer la signifiance de la vision, et tantost il s'endormist. Adonc luy envoya Nostre Signour ung angre qui luy dist que l'angre qui getoit feu estoit de paradis et bon angre, et l'avoit envoyé Dieu pour faire justice des mauvoises personnes et perilleuses qui sont au monde, et il en fist tout son pouvoir, maiz ugne glorieuse femme - c'est assavoir celle qui enfanta pucelle - par sa grant misericorde a empeschié tout son fait en telle menniere qu'elle a gardé tout le monde de peril, lequel est tout plain de grans et horribles pechiés.
76a
Adonc se esveilla le preudomme et se trouva plourant et les yeus tous moilliez, et rendit graces a la Virge Marie des grans biens qu'elle fait.
CIV
De Nostre Dame qui delivra l'enfant qui estoit pendu.
A Romme advint que ung preudomme y avoit et ugne preude femme qui avoint ung enfant de mauvoises condicions et tres pervers, et fut tres mal renommé par sa mauvoise vie et blasmé de tout le monde et hay, car il estoit ribault glouton. Et la bonne femme demeura veufve, laquelle tres devotement servoit la Virge Marie et ce avoit acoustumé de son enfance. Et demeuroit emprés ung eglise dedens lequel elle avoit ugne oratore ou elle avoit fait mettre ung moult bel ymage devant laquelle elle fesoit sa devocion a la Virge Marie, et devant lequel ymage tenoint deux cierges. De quoy les aultres femmes la mengoint, pour ce qu'elles savoint bien qu'elle estoit pouvre; si l'apelloint papelarde, mengeresse d'ymages. Et ung samedi au soir, comme la bonne femme avoit acoustumé, elle avoit les deux cierges alumés et estoit en devocion devant l'ymage de la Virge Marie et, a celle heure, l'enfant de la preude femme fut prins, saisi d'une larrecin et admené au prevost, qui tantost l'amena au gibet pour estre pendu. Et fut grant noise et grant criee parmy la ville, et aucuns qui le voioint disoint que c'estoit le filz a la papelarde. Si fut le cas
76b
tantost seu de la bonne femme et estoit grande la murmure contre la proude femme pour ce qu'elle ne se mouvoit de riens pour son filz que l'en menoit pendre. Adonc s'en vint a luy ugne vielle qui l'encontra au moustier et luy dist qu'elle estoit bien meschante femme de mere et desloyalle, qui entendoit a rongier les ymages tant que l'en menoit son filz pendre au gibet. Adonc la preude femme, molt effraye, si retourna devant l'ymage Nostre Dame et, en estant devant luy, elle la pria tres devotement, a lermes et a plours, qu'elle luy voulsist donner confort et rendre son enfant, disant se Nostre Dame ne luy rendoit son filz qu'elle auroit l'enfant de la Virge Marie. Et en disant ces parolles elle saillit avant et prinst l'enfant de la Virge et le tira fort parmy les piez, en disant a la Virge Marie qu'elle luy rendist son enfant ou qu'elle luy lessast le sien. Et comme le bourrel luy avoit mis la hart ou col pour le pendre, le peuple regarda vers le ciel et virent clerement venir ugne dame tant belle et enluminee que c'estoit grant soulas a regarder; et estoit acompaignie de grant multitude d'angres de paradis; laquelle prinst l'enfant de ses deux mains et devant tous l'emporta du gibet et le mist au moustier ou la preude femme estoit en devocion, qui tenoit encore et tiroit a son pouvoir les piés de l'enfant Nostre Dame. Et tantost l'enfant vint a sa mere et luy dist qu'elle se deportast,
77a
car certainnement il avoit la hart ou col pour estre pendu et avoit veu sa place toute apparillie en enfer, maiz la Virge Marie l'avoit de tout ce delivré. Et dist qu'il se repentoit et amenderoit sa vie, et requist a sa mere qu'elle le menast en ugne abbaye, pour entrer en religion. Et ainssi le fist et fut aprés bon religieux et servit Dieu et la Virge Marie.
CV
De la joenne femme qui convertit ceulx qui la vouloint efforcier.
Une bonne femme estoit, laquelle avoit une jonne fille qui estoit moult belle et moult gracieuse; laquelle avoit aprins les cinq joies Nostre Dame, et luy commanda que, chascun jour, devotement elle les deist. Si advint ugne fois que sa mere l'envoya garder se les bestes y estoint et se elles avoint point de mal. Adonc la jonne fille obaist presentement au commandement de sa mere et se mist a la voye. Si avoit en la ville ou celle bonne femme demeuroit compaignons qui moult convoitoint sa fille et ne savoint trouver menniere comment ilz la peussent avoir. Si commencerent a regarder quelle part celle fille iroit, car, chascun jour, c'estoit quant qu'ilz faisoint que de guetter la jonne fille. Et tantost qu'elle fut dedens le boiz, ilz vindrent a elle et luy dirent qu'elle feist tantost leur voulenté. Adonc elle leur demanda que c'estoit qu'ilz luy vouloint faire;
77b
et ilz respondirent qu'ilz eussent compaignie a luy. Et quant la joenne fille entendit leur voulenté, elle regarda qu'elle estoit seulle et qu'elle ne pouvoit la force d'eulx. Si leur dist en ceste menniere: « Biaux compaignons et signours, puisqu'il est ainssi que vous estes menés de mauvoiz esprit et que vous me voulés oster la fleur de virginité, je vous requier tant que je puis que vous me donnés espasse de dire ung pou de chose que ma mere m'a aprinse. » Et tantost les compaignons luy acorderent. Adonc la joenne fille se mist devotement a genoulx et commença a requerir l'aide de la Virge Marie en disant les cinq joies de la Virge Marie. Et tantost ceulx qui la vouloint desflourer churent a terre comme mors. Et tantost la Virge Marie leur apparut et les commencha a reprendre de la mauvoisité qu'ilz vouloint faire a celle qui la servoit, et leur commanda que jamaiz jour de leur vie, ne attemptassent a faire mal a personne qui la servist. Lesquelx luy crioirent mercis et furent bonnes gens et entrerent en religion et la servirent devotement.
CVI
Comme Salve Sancta Parens fut trouvé.
A Romme avoit ung vaillant docteur apellé Damassene, lequel fist ugnes sentences. Si advint que il out ennemis, comme moult de gens ont, et fut accusé que luy, de sa propre main, avoit escriptes letres contre l'empire et contre les senateurs
78a
et toute la signourie de Romme. Si advint qu'il fut mené devers l'empereur et les senateurs. Et demanderent l'ung a l'autre quelle pugnicion ilz en feroint; si regarderent entre eulx qu'il seroit bon qu'il eust le poing coupé de quoy il avoit escrites les letres, a celle fin que jamaiz contre la signourie des Romains ne peust escrire. Et tantost il out le poing coupé, et ce grief et ceste adversité il porta. Et quant vint par espasse de temps, il regarda et considera que la Virge Marie n'avoit point de propre hystore comment aucuns sains et que ce n'estoit pas honneste chose que elle qui est royne des cielx n'avoit aussi bien propre introite comme les aultres sains; si dist que briefvement il luy en vouloit faire ugne. Et adonc fist ceste cy: Salve Sancta Parens. Puis quant il out fait, si se doubta qu'il ne l'oubliast; si appella son clerc et luy commanda qu'il luy apportast son escritore. Et luy qui ne se remembroit pas qu'il avoit la main coupee, tendit son moygnon a prendre sa plume et tantost il fut gari et receu sa main, laquelle estoit coupee, toute aussi sainne comment elle avoit oncquez esté par la grace de Dieu et de la Virge Marie qui le garit.
CVII
D'une recluse qui chassa l'ennemy pour dire Ave Maria.
Une femme recluse
78b
estoit a laquelle l'ennemy d'enfer faisoit moult de painne et de moleste. Lequel, quant il vit qu'il ne pouvoit vaincre, il se transfigura en forme d'un angre de paradis et dist a la bonne femme que certainnement il estoit ung des angres de paradis, lequel estoit envoyé de Dieu pour luy gerdonner ses merites et les biens qu'elle avoit faiz. Laquelle en fut moult esjouie et gracia et loua Dieu. Si advint le jour ensuyvant qu'elle le dist a son confessour que celle vision luy estoit venue, qui estoit bien bonne personne, et luy dist comme devant est dit. Adonc se doubta le preudomme que ce ne fust illusion d'ennemy d'enfer et commencha a dire a celle femme qu'elle ne creust pas tout ce qu'il luy diroit et que, se l'angre luy apparoissoit, qu'elle luy dist qu'il luy monstrast la Virge Marie et, sitost qu'elle il luy auroit monstree, qu'elle deist Ave Maria. Laquelle le fist ainssi. Si advint que, la nuit ensuyvant, l'ennemy d'enfer luy apparut comment devant, et tantost la bonne femme luy dist en ceste menniere: « Puisqu'il est ainssi que tu es angre de Dieu, je te pry que tu me monstres la Virge Marie. » Adonc l'ennemy respondit: « Souffise toy que tu voiz la presence de moy, qui suis angre de paradis. » Et tantost * la bonne femme luy dist qu'elle vouloit voir la Virge Marie. Adonc commença l'ennemy a former le corps d'une joenne pucelle et luy monstra. Et tantost
79a
la bonne femme se agenoilla devotement en disant Ave Maria. Adonc l'ennemy d'enfer s'enfouit et ne seut la bonne femme qu'il estoit devenu. Si se advisa que c'estoit illusion d'ennemy et depuis elle servit devotement a la Virge Marie.
CVIII
Du moygne que Nostre Dame garda de dampnement.
En une abbaïe de moygnes qui est appellee Cersey avoit esté ung moygne qui estoit de mauvoise vie, et desordonnee et ne vouloit riens faire pour l'abbé, ne obeir a luy en une quelque menniere; de quoy son abbé estoit moult couroucé. Maiz tant y avoit de bien en luy qu'il disoit tres devotement tous les jours ses heures de la Virge Marie et, chascune sepmaine, en disoit ugne messe. Si advint qu'il chay en ugne tres grant maladie et pria ses freres affectueusement qu'ilz alassent querir l'abbé et qu'il se vouloit reconsilier a luy. Si advint que la maladie le commencha a contraindre tres fort et angeisseusement. Adonc pria tous les freres qu'ilz alassent a l'eglise et priassent devotement la Virge Marie qu'elle le voulsist garder de dampnacion et aussy qu'il se peust reconsilier a son abbé devotement; lesquelx le firent ainssy. Et quant ilz furent retournés de l'eglise, ilz trouverent qu'il avoit perdu tout son sens et ne mouvoit maiz membre qu'il eust. Lequel fut moult longuement en cest estat. Si advint qu'il reprinst ses espris et commencha tres hault a
79b
crier: « O domina sancta Maria! A! tres doulce dame sainte Marie, je te rent graces et mercis. Par toy certainnement je suis quite de la dampnacion perpetuele a laquelle j'estoye livré par mes deffaultes et pechiés. » Et adonc il appella le prieur et luy pria qu'il le voulsist ouir de confession. Et tantost ses pechiés il confessa et receut ses sacremens ordonnés tres devotement, et fina sa vie ou service de la Virge Marie.
CIX
Du mauvais clerc que Nostre Dame fist mettre en terre benoiste.
A Rouen avoit ung clerc de mauvoise vie et de mauvoiz estat, qui estoit infemme et estoit tres luxurieux; maiz tant de bon advis avoit en luy que tres souvent et tres devotement il saluoit la Virge Marie et s'agenoilloit devant luy toutes foiz qu'il voioit son ymage. Lequel fut tres grandement malade tant que il mourut. Si advint que l'arcevesque ouit parler de sa mauvoise conversacion et commanda qu'il ne fust point mis en terre benoiste avec les bons crestiens et qu'il n'estoit pas digne pour sa mauvoise vie; si advint qu'il fut enterré hors du cymentiere. Adonc la Virge Marie, qui voult tousjours garder de mal et de vilennie tous ceulx qui la servent, si apparut en vision a l'archevesque en soy complaignant de luy pour la cause qu'il n'avoit voulu enterrer en cymitiere celuy qui la servoit. Adonc tantost luy commanda
80a
que il faist desfouir son serviteur et mettre avecquez les aultres, car il estoit en voye de sauvement pour la cause qu'il l'avoit aimmee et servie et qu'en la fin il * avoit eu, par la grace de la Virge Marie, repentance de toutes ses deffaultes. Et luy dist que en signe il trouveroit en la fosse ung lys, lequel venoit de sa bouche. Et en ceste menniere l'archevesque le fist et servit depuis la Virge Marie tout le temps de sa vie.
CX
Du chartreus que Nostre Dame delivra des enemis.
Un docteur nommé Pierre de Sigi dit que en l'ordre des chartreus avoit ung convers de moult sainte vie et de sainte conversacion, lequel chascun jour et nuit penssoit tres devotement aux biens que Jhesu Crist a apparilliez a ceulx qui l'aiment du bon du ceur. Auquel penssant a ses grans biens apparut ugne grant multitude d'ennemis d'enfer en menniere de pors saingliers, lesquelx rechignoint et graingnoint tres horriblement et le vouloint mettre a mort de leurs ongles et de leurs dens. Adonc quant il vit * celle horrible vision, commencha a hanner de la grant paour qu'il avoit. Et tantost il luy fut advis que avec celle multitude devant dite vint ung grant porc sanglier qui estoit grignour la moitié que les aultres, lequel fut prince et maistre des aultres, qui commencha a reprendre les aultres tres durement en disant qu'ilz
80b
ne valoint riens qu'ilz ne l'avoint desja mis a mort. Lesquelx respondirent certainnement ilz ne pouvoint, car ilz n'avoint point de puissance sur luy. Adonc dist le tres horrible: « Lessiés moy faire tout seul et certainnement je le mettray tantost a mort et le despieceroy piece a piece. » Et tantost commença a estendre ses ongles de fer pour le devourer et mettre a mort. Adonc le convers de celle horrible beste out si grant paour que tous ses membres deffailloint. Et tantost il commença a dire tres devotement: « Et ne nos inducas in temptacionem! Et tres doulx Jhesus, je te requier et ta doulce mere que vous me vieulliés garder que je ne chaie en temptacion. » Adonc la mere de misericorde, la glorieuse Virge Marie, si vint tantost a l'aide du bon homme, lequel l'apelloit, qui tenoit ugne petite verge en son poing, en menassant les ennemis d'enfer. Adonc les ennemis l'ouirent; si ourent tres grant paour, qui se departirent ainssi comment fumee. Et puis laVirge Marie commencha le bon preudomme a reconforter moult doulcement en luy disant par doulce menniere: « Parfay et acomplis la bonne operacion que tu as commencee et perservere toujours ardamment en l'amour de mon filz et de moy, et certainnement tu acquerras lassus ou ciel ta demourance avecquez moy. » Et ce dit, la Virge Marie se part de luy et le bon homme la servit toute sa vie.
Pour toute question au sujet de ce site, veuillez vous adresser à :
labo@francaisancien.net