UNIVERSITÉ D'OTTAWA Faculté des Arts
Laboratoire de français ancien
Jean le Conte
Miracles de Notre-Dame
XXI-XXX
XXI
De la femme et de l'omme qui avoint devocion a la Virge Marie.
Deux bones persones conjointes par mariage aimmerent parfaitement la Virge Marie et, pour sa reverence, chascun jour de semmedi faisoint dire ugne messe de Nostre Dame et tenoint tous les prestres et les clers que ilz pouvoint assembler. Et ces deux bonnes gens n'avoint que ung filz. Lequel entra en la cuisine; si le prinst l'ennemy et le geta dedens la chaudiere, ou bouilloit la viande. Et les varlés, ce fait, l'entendirent et l'osterent tout mort. Si vint a la noise la mere de l'enfant Et, quant elle vit le cas, elle dist: « L'ennemi pour tant ne nous empeschera point nostre devocion. » Si commanda aux servans que nul n'en parlast, maiz servissent plus que oncquez n'avoint fait; et fist l'enfant tout mort couchier en son lit, aussi comme s'il dormist. Et quant ilz furent assis ou disner,
16a
ceulx qui ignoroint le fait demandoint l'enfant et la mere faingnoit qu'il dormist; maiz pour ce que les prestres et les clers demandoirent o grant instance a voir l'enfant, le pere dist a la mere que elle le alast esveillier ou qu'il iroit. Si se mist la mere en la voye pour y aler et en alant pria la Virge Marie qu'elle luy donnast joye de son enfant. Et quant elle vint a l'uys de la chambre, elle regarda son enfant gesant ou lit et le trouva aussy sain comme il avoit oncquez esté par devant. Si l'amena a celx qui estoint a la table et leur compta comme la chose estoit alee, qui tous ensemble louerent et rendirent graces a la Virge Marie.
XXII
D'un paintre qui fist l'ymage Nostre Dame.
Ung paintre fut qui fist ung image de Nostre Dame, tres gracieuse et belle; et fist ung aultre ymage de l'ennemi, treshorrible a voier. De quoy l'ennemy fut tresmarry. Si fist tant par sa malice que il trebucha le paintre. Mais ainssi que il chaït, l'image de la Virge Marie estendit les bras et le receut et le soubstinst, qu'il ne fust point blechié.
XXIII
Miracle de l'empereur de Constantinnoble.
L'empereur de Constantinnoble fist faire ugne noble fosse moult profonde pour traire divers metaulx, et y descendit avec les ouvriers. Si chaÿ la terre, qui mist a
16b
mort tous celx qui estoint dedens, fors luy, qui fut sauvé en ung petit retrait. Lequel empereur avoit espousé ugne femme qui tendrement aimmoit la Virge Marie et avoit fait faire son ymage devant laquelle elle se agenoilloit sept foiz le jour, requerant humblement et devotement l'aide de la Virge Marie. Laquelle, quant elle ouit les nouvelles du signour, icelle dame vint devant l'ymage, graces requerant pour son mary; et ordonna ung prestre qui tous les jours d'un an en celebreroit messe pour luy, qui ainssi le fist. Et la Virge Marie venoit a l'empereur avec grant multitude d'angres en la fosse, chascun jour, qui luy aportoit sa vie a soubstenir; et luy disoit la Virge Marie: « Ta loyale espouse te procure ta refection, que je te aporte, et a moy est faite toute l'ennee. » Et en la fin de l'an, Nostre Dame s'aparut a l'esvesque et luy dist que sans atente il alast a la fosse et meist hors l'empereur, lequel y avoit par ung an soubstenu pour l'amour de sa femme. Et tantost l'esvesque assembla grant foison de clergie et ala a la fosse et trouva l'empereur tout sain et en bon point, et le admena hors. Et adonc trestous celx qui le virent, a haulte voix et avecques grant joye, mangifierent le nom de Dieu et de la glorieuse Virge Marie sa mere.
XXIV
De la bonne femme qui se complaingnoit a Nostre Dame de la mauvoise femme.
17a
Ugne femme fut en l'esveschié d'Arras, qui avoit ung mary, lequel luy faisoit moult de grans durtés et vilanies, car il estoit de mauvoise vie. Si avoit ugne aultre femme a qui il faisoit moult de grans biens. Et ceste qui estoit tant durement traitie n'avoit nul refuy fors a la Virge Marie, a laquelle moult souvent se complaignoit et luy demandoit justice de la mauvoise femme qui son mary luy avoit fortrait. Advint ugne journee, quant elle out plouré et villé devant l'ymage de la Virge Marie, elle s'endormist et luy fut advis que l'ymage luy disoit: « Je ne t'en puis faire justice, de la femme que ton mary tient; car, combien qu'elle soit pecheresse, si me saluaille cent foiz a genoulx pour jour en disant Ave Maria. » Adonc se esveilla la bonne fenme, moult dolente, et se parti d'une eglise; et aprés, en ung aultre, jour elle trouva la concubine de son mary et luy dist: « Tres mauvoise et tresfolle femme, pour quoy m'as tu toulu mon mary? Je me suis plainte de toy a la Virge Marie; mais elle m'a responnu qu'elle n'en pout riens faire pour ce que tu la salues cent foiz pour jour. Maiz je me plaindroy a son filz, qui m'en fera justice. » Et tantost que la folle femme ouit ces parolles, que la * Virge Marie luy estoit en aide combien qu'elle fust pecheresse, elle luy faisoit honneur,
17b
si se repentit tres amerement et se mist a genoulx devant la bonne femme et luy demanda pardon, et promist amendement a Dieu et a la femme et que jamaiz avec son mari ne pecheroit. Et ainssy le fist elle seurement; et aprés bons amis furent et aimmoirent parfaitement la Virge Marie.
XXV
De celuy qui ne vouloit renoier la Virge Marie.
Il fut ung homme que, pour ce qu'il avoit perdue toute sa chevance, estoit cheu en grant povreté; et se desespoira et print a regnoier Dieu et a parler de l'ennemy en le requerant a son aide. Si ala a ung juif qui usoit de mauvaiz art, lequel luy dist qu'il renoyast Jhesu Crist et sa mere et tous les sains de paradis, et il le feroit plus riche que oncques mais n'avoit esté. Et il luy respondit que Dieu et les sains renoyroit bien, mais pour nulle chose c'on luy peust promettre il ne renoyroit la Virge Marie. Et ce dit, le juif le bouta hors de sa maison. Si advint aprés que il passoit par devant ugne ymage de la Virge Marie et l'image s'enclina vers luy *, faisant luy reverence. Et ce vit ung homme moult puissant. Et secondement il rapassa par devant l'ymage et tantost l'image s'enclina vers luy comme devant. Et ce vit le riche homme et adonc il l'apella et luy demanda
18a
que ce pouvoit estre et pour quoy l'ymage Nostre Dame luy faisoit reverence; et luy demanda quel bien il avoit fait et pour quoy c'estoit. Et il respondit que il estoit pecheur grant et que il n'avoit nul bien fait de quoy luy souvensist, fors que ung juif qui luy vouloit faire renoyer la Virge Marie, maiz il ne s'i vouloit consentir pour nulle richesse avoir. Pour quoy le riche homme out de luy grant compassion et luy dist qu'il avoit tresbien fait, et luy donna sa fille a femme, avec grant planté de biens.
XXVI
Comme la Virge Marie rendit la veue a saint Jehan Bouche d'Or.
Saint Jehan Bouche d'Or, patriarche de Constantinnoble, si avugla et vint a povreté grant. Si aloit ugne foiz par le païs et ugne grant multitude de mouches le assaillirent et le tourmentoirent a desmesure, et en tel tourment le misdrent. Il commencha a louer Dieu et la Virge Marie et les deprier devotement. Et la Virge Marie, tant que il soubstinst ceste painne, se apparut a luy et luy demanda se il vouloit ravoir sa veue; lequel respondi que jamaiz il ne vouloit voir le monde se elle ne luy monstroit celuy qui est son filz et vault * mielx que le monde. Et la nuit ensuivant luy apparut la Virge Marie, et son filz entre
18b
ses bras, lequel tenoit entre ses mains les memmelles sa mere. Et luy rendit la veue et luy dist: « Voy clerement entre ces bras celuy que tu as tant desiré a voir. » Et pour ce, la Virge Marie le restitua a sa premiere dignité. Pour quoy il apert que la Virge Marie aide a ceulx qui la deprient humblement.
XXVII
Comme la Virge Marie recousi la haire saint Thommas.
La haire saint Thomas de Canthorbie, archevesque, estoit descousue sus les espaulles. Si entra le saint homme en sa chambre pour la rapareillier. Et tandis comme il la cousoit, il vint ung homme honnourable qui vouloit parler a luy; si lessa la haire cousue pour partie et non pour aultre. Et tandis comme ilz parloint, la Virge Marie entra en la chambre et recousit la haire. Si retourna saint Thomas en sa chambre quant leur parler fut finé, et trouva sa haire bien appointie. Si fut moult merveillié, car il avoit emporté la clef de sa chambre; nul, se luy sembloit, n'y pouvoit avoir entré. Et tantost advint aprés que ung pretre fut devant luy accusé que il ne savoit riens de clergie pour ce que il ne chantoit nulle messe que de Nostre Dame; et fut trouvé pour voir. Si luy osta saint Thommas son benefice et luy deffendit le celebrer; de quoy il fut parfaitement
19a
dolent. Pour quoy il retourna vers la Virge Marie en la priant en grant devocion qu'elle luy vousist en ce fait aidier. Et quant il out longuement prié, la Virge Marie se apparut a luy et luy dist: « Ne craing rien, maiz va tantost a Thommas et luy di que la dame qui luy cousi sa haire luy mande qu'il te rende ton benefice et tout ce qu'il t'a toulu. » Adonc fina le prestre son oraison et se leva tout joieux, et ala a saint Thommas et luy dist ce que la Virge Marie luy out dit. De quoy il fut moult merveillié et appella saint Thomas le pretre en sa chambre, et penssa tantost que c'estoit la Virge Marie. Si se repenti et demanda pardon au pretre, et luy restitua tout ce que toulu luy avoit et luy donna moult d'autres biens et luy commanda que, tout le temps de sa vie, il chantast de la Virge Marie.
XXVIII
D'un chevalier qui disoit que il n'avoit que faire de l'aide Nostre Dame.
Ung chevalier chevauchoit, et ung sien sergent avec luy; lequel sergent aimmoit parfaitement la Virge Marie et le chevalier la prisoit moult petit. Si advint que ilz vindrent en ung moult perilleux pas et que ilz furent au peril de mort. Le sergent dist: « Douce Virge Marie, vieulliez estre en nostre aide. » Et lors tous deux echaperent du peril. Et quant ilz furent
19b
hors, le chevalier dist: « Je n'ay mestier de l'aide de la Virge Marie maintenant. » Et si tost comme il out dit, son cheval chaÿ a terre et le chevalier se rompi le col et demeura gesant mort en place, pour ce qu'il n'avoit pas rendu graces a Dieu ne a la Virge Marie.
XXIX
Du chanoigne qui estoit mesel, que la Virge Marie garit.
En ugne abbaïe avoit ung chanoyne tresdevot a la Virge Marie; lequel devint tres abhominable mesel, maiz nulluy ne luy osoit dire, car il estoit de grant lignage et moult noble homme, et ne se osoint les aultres separer d'avec luy. Si vint l'esvesque pour visiter l'eglise et ouy les grans parolles qui en estoint; et luy dist que il vouloit qu'il fust separé. Et l'esvesque luy dist et le mesel luy acorda moult doucement. Si assigna l'esvesque jour qu'il fust separé. Pour quoy la nuit precedente le jour de sa separacion, ledit chanoine mesel entra en ugne chapelle de Nostre Dame et se agenouilla devant la Virge Marie et la pria tresdevotement que par sa grace le vousist garder de celle villennie. Et quant il out longuement adouré, il s'endormy. Et s'aparut a luy la Virge Marie, qui trait ses memmelles de son sain, qui luy emplit les deux mains de son precieux lait et luy dist que il en
20a
meist desus son corps et qu'il seroit garri de la mesellerie. Si se esveilla et trouva ses mains plainnes de lait, et appella ceulx qui le servoint et leur dist que il apportassent ung hanap d'argent. Et quant ilz l'eurent apporté, il y mist le lait que il avoit en ses mains et s'en lava. Si fut curé de sa maladie, et rendi graces a Dieu et la Virge Marie. Et quant l'esvesque vint au matin pour separer ledit chanoyne et tous les aultres *, et raconta a l'esvesque ledit chanoigne comme la Virge Marie luy avoit faicte grant grace. Si louerent, tant l'esvesque comme les aultres, la roigne de paradis.
XXX
Du filz au roy de Hongrye, qui fut gari par la grace de la Virge Marie.
Le roy de Hongrie out ung filx moult perilleusement malade, maiz il fut gary par la grace de la Virge Marie. Et pour ce, il se ordonna * et promist a honnourer la Virge Marie toute sa vie et a dire ses heures tous les jours. Et quant son pere, le roy, fut mort, tous les signours du païs l'establirent pour leur roy et luy firent femme fiancer. Maiz ainssy comme l'esvesque donnoit la benedicion sur tous les deux, le jenne homme se remembra que il n'avoit pas dites ses heures de Nostre Dame, ce jour. Si fist tous celx qui estoint en l'eglise mettre dehors et se mist a genoulx devant l'ymage de la
20b
Virge Marie, et dist matines, prime, tierce, midi et nonne. Et quant il dist celle anchene Pulchra es et decora, etc., qui vault autant a dire en franchois « Comme tu es belle et gracieuse, douce Virge Marie », adonc luy apparut la Virge Marie, a tresgrant clerté, qui avoit ung angre a dextre et l'autre a senestre; et luy dist: « Puis que tu dis que je suis tant belle et gracieuse, pour quoy me veulx tu lesser? Tu me auras a espouse ou royaulme de paradis pardurablement, ou tu auras parfaite joye. » Et tantost que le jenne homme ouit les parolles de la Virge Marie, il s'en ala segretement de la cité, en ung desert sur ugne riviere, ou par sept ans mena vie de hermite en servant devotement a la royne de paradis. Et quant le patriarche de Aquillee fut mort, il fut ordonné en son lieu, ou il gouverna noblement et puis ala en la glore pardurable.
Pour toute question au sujet de ce site, veuillez vous adresser à :
labo@francaisancien.net