Miracle d'une femme nommée Théodore

Cy conmence un miracle de Nostre Dame d' une
femme nommée Theodore qui pour son pechié se
mist en habit de homme et pour sa penance faire
devint moine et fut tenue pour homme jusques
après sa mort.
LE MARI.
Belle doulce suer Theodore,
Je vous dy bien je deusse ore
Estre avec mon seigneur en guerre
Pour honneur et prouffit acquerre.
Mes gens en sont pieça alez.
D' estre plus ci ne me parlez:
G' y vois; ne sçay quant revenray
Ne conment je besongneray.
A Dieu vous dy.
THEODORE. Mon seigneur, pas ne vous desdi.
Alez, a la vierge Marie
Qui vous soit et dame et amie!
Cy demourray.
L' AMANT. Amours, conment me cheviray?
Tu me fais une dame amer
Dont trop me puis pour fol clamer.
Car elle est belle et bonne ensemble.
Ainsi pers mon temps, ce me semble,
Qu' elle ne scet point que je l' aime.
Pour ç' a toy m' en complains et claime,
Amours, car com plus la desir,
Plus me truis des roiz de desir
Pris et lacié de jour en jour,
Et plus ay peine sanz sejour,
Et n' est qui me puist esjouir
Fors seulement d' elle jouir,
Et c' est chose a faire moult fort
Conment j' aie d' elle confort:
Car onques a li ne parlay,
Ne de l' amistié qu' a li ay
N' a elle encore riens sceu;
Si me pourray pour deceu
Tenir se ne li fas savoir
Que de moy merci vueille avoir.
Pour ce m' en vueil de cy aler
Savoir s' a li pourray parler.
Seule la voy; c' est bien a point.
Theodore, bon jour vous doint
Li doulx Jhesus.
THEODORE. Sire, et vous bien soiez venuz
En cest hostel.
L' AMANT. Dame, je sui pour vous a tel
Meschief que je ne le puis dire.
Vostre amour mon cuer tel atire
Que je ne say penser qu' a vous
Ne ne fis grant temps a, cuer doulx.
Je ne le vous puis plus celer:
Et s' il vous plaist moy appeller
Et tenir pour vostre ami, dame,
Je vous donrray robes, par m' ame,
Et joyaux telx qu' il vous plaira,
Si qu' en ceste ville n' ara
Vostre pareille.
THEODORE. Ne plaise Dieu que m' apareille
Ne consente vous acointier
Pour telles choses convoitier!
Sire, trop seroit grant damage
Que je brise mon mariage.
Ne m' avenra ja, se Dieu plaist.
Si ne m' en tenez plus de plait,
Car vostre deshonneur feriez
Et vos paroles gasteriez,
Je vous promet.
L' AMANT. Dame, en vostre mercy me met.
Mors sui se vous n' avez pitié
De moy, et que vostre amistié
Me soit donnée.
THEODORE. Dieu, qui me souffri estre née,
Face que male mort me morde
Avant qu' a tel pechié m' amorde.
Fuiez de cy.
L' AMANT. Elas! en paine et en souci
Me convient dès ore mais vivre,
Ne je ne voy conment delivre,
Dame, en seray pour ce refus.
Partir de vous dolent, confus
Me faites, plain de desconfort.
Or ne sçay ou prendre confort,
Car nu me voy et esgaré
De toute joie et separé;
Ne ne puis qu' est joie savoir,
Puis que l' amour ne puis avoir
De celle que j' ains ne la grace,
Qui les autres en biauté passe.
Mais ainsi pas ne la lairay
En paiz, ains y envoieray
Telle pour ma besongne faire
Qui scet qui faut a tel affaire.
Querir la vois sanz estre lent.
La la voy. Margot de Mulent,
Qu' est ce? ou vas tu?
LA MAQUERELLE. Ne scé qui a trop bien batu
La Mignote, ce me dit on;
Si vois savoir en sa maison
Que ce peut estre.
L' AMANT. Je te vueil en besongne mettre,
Mais qu' il t' agrée.
LA MAQUERELLE. Est ce chose qui soit secrée?
Ne me ment mie.
L' AMANT. Tout te diray conme a m' amie.
J' ains Theodore vraiement
Tant con je puis, mais nullement
Ne veult mes paroles ouir.
Se tu me peuz faire jouir
De lui, je te promet sanz lobe
Que je te donray une robe
Trestoute neuve.
LA MAQUERELLE. Feras? et j' en feray l' espreuve
Ens en l' eure, je te promet;
Et s' en tel tour ne la te met
Qu' en jouiras com de t' amie,
Si di que ce ne suis je mie
Hardiement.
L' AMANT. Et tu l' aras certainement:
Va besoingnier.
LA MAQUERELLE. En l' eure sanz plus esloingnier,
Mais qu' elle seulement m' escoute,
La besongne feray sanz doubte.
Dieux y soit, dame Theodore.
Egar! estes vous ci seule ore?
Ou sont voz gens?
THEODORE. Dame, il n' y a que moy ceens
Quant a ore. Venez vous querre
Riens qui soit? Dites moy bonne erre,
Que voulés vous?
LA MAQUERELLE. Puis qu' il n' a icy que nous
Deux femmes, s' il vous vient a gré,
Un po vous diray de secré;
Et ne prenez a villenie,
Pour Dieu, chose que je vous die,
Je vous en pri.
THEODORE. Nanil, dame, ce vous ottry.
Dites touzjours.
LA MAQUERELLE. Mon enfant, il a plusieurs jours
Qu' un riches homs, gaiz et jolis,
A du tout son cuer en vous mis
Et vous aime tant sanz faucer
Que riens nulle ne peut penser
Fors conment de vous soit amez,
Et tout aussi qu' uns affamez
Seiche et languist pour vous sur terre.
Si vous vien prier et requerre
Que pour li me vueilliez entendre.
Vous estes femme, si que tendre
Cuer devez avoir et piteux:
Ce dont il est si diseteux,
C' est la vostre amour qu' il requiert,
Li donnez, dame: plus ne quiert.
Il vous sera amis loyaux;
Robes vous donrra et joyaux.
Autre foiz le vous a il dit,
Mais refusé et escondit
L' avez, si qu' il ne scet qu' il face;
Et certes s' il n' a vostre grace,
Perduz sera.
THEODORE. Dame, je ne scé qu' il fera:
Dieu li doint bien faire ou qu' il voit;
Mais devant mon Dieu qui tout voit
Jamais tel pechié ne feroie;
Certainement miex ameroie
La mort encorre.
LA MAQUERELLE. Dame, bien le pouez secourre,
Se vous voulez; vezci conment.
Il est voir que Dieu clérement
Voit quanque on fait de jours: pour quoi?
Pour la clarté du jour, par foy.
Mais riens ne scet, ne vous ennuit,
De chose c' on face de nuit;
Et c' est pour ce qu' il n' y voit mie
Aussi com de jours, belle amie,
Pour l' obscurté.
THEODORE. Dame, dites vous verité,
Se Dieu vous gart?
LA MAQUERELLE. Aussi voir com je vous regart
Vous di je voir.
THEODORE. Ore vous li ferez savoir
Qu' a moy viengne quant nuit sera,
Et je li promet qu' il ara
Ce qu' il desire.
LA MAQUERELLE. E! mon enfant, Dieu le vous mire.
Je li vois de par vous nuncier.
Pense de ton cuer eslessier,
Meschant ribaut.
L' AMANT. Conment va? di, pour saint Thibaut,
As tu riens fait?
LA MAQUERELLE. Oil: il m' est promis de fait
Qu' après l' anuittier tu yras
Chiez li, et lors tu joiras
Tout a plain d' elle.
L' AMANT. Par foy, ci a bonne nouvelle:
Nous yrons souper moy et toy,
Et si aras je say bien quoy
Que te donrray.
LA MAQUERELLE. J' ay grant fain; voulentiers yray.
Or alons; il est près du soir.
Mais nient moins je voulray avoir
Ma robe entiére.
L' ABBESSE. Suer Ysabiau, m' amie chiére,
La journée est près de complie.
Je vueil que nous disons complie:
Il en est temps.
SUER YSABEL. Dame, vostre vouloir attens.
Conmandez et je respondray.
L' un ver direz, et je diray
L' autre ensuivant.
L' ABBESSE. Pour estre a nous mains ennuiant,
Tout bas disons.
SUER YSABEL. Dame, il me plaist, et c' est raisons,
Quant le voulez.
L' AMANT. Desvez seroie et affolez
Se d' aler mettoie en detri
Vers ma dame, de qui l' ottri
J' ay que je doy avoir s' amour.
Pour c' y vueil aler sanz demour.
J' ay plus chier la entour attendre
Que par trop demourer mesprendre,
Et aussi le me vault il miex.
Vezla la ou elle ses yex
M' a jetté. Je vois celle part.
Ma chiére dame, Dieu vous gart
De mal et d' ire.
THEODORE. Vous soiez li bien venuz, sire.
Passez oultre hardiement:
Il n' y a que moy seulement.
En ma chambre vous vueil mener;
La pourrons ensemble parler
Privéement.
L' AMANT. Granz merciz, dame. Vraiement
De ma vie estoie en balance
Se n' eusse vostre acointance,
Je vous di voir.
THEODORE. Sire, je vous fas assavoir
Qu' aussi avez vous m' amistié
Pour une amoureuse pitié
Que de vous ay.
L' AMANT. Ma chiére dame, bien le sçay,
Et je vous en scé si grant gré
Qu' a touz sera par moy secré,
Je vous promet.
THEODORE. Sire, en vous m' onneur toute met.
Je vous pri, si me soit gardée
Qu' estre ne puisse diffamée
De nul par vous.
L' AMANT. Dame, miex voulroie avoir roups
Les braz par my.
THEODORE. Ore il m' est avis, chier ami,
Qu' a ce premier conmencement
Nous avons assez longuement
Ensemble esté.
L' AMANT. Dame, vous dites verité.
Par vostre congié m' en iray.
Une autre foiz vous reverray
Plus a loisir.
THEODORE. Sire, tout a vostre plaisir
En ordenez.
L' AMANT. Or sui je de bonne heure nez
Quant j' ay de la belle jouy,
Qui tant a mon cuer esjouy
Que je n' en sçay dire le conte.
Car se j' estoie duc ou conte,
Si me doit il souffire voir
Telle dame a amie avoir.
Pour ce sera touzjours amée
De moy et ma dame clamée
Et ma maistresse.
QUEREUR DE SERM0NS. Dame, par devers vous m' adresce
Pour vous dire, n' est pas secrez,
Qu' un vaillant clerc, maistre en decrez,
Dit maistre Guillaume Rousée,
De qui n' est pas science ostée,
Sermonnera presentement.
Venez y, dame, appertement,
Se me creez.
THEODORE. Perrin, est il maistre en decrez,
En bonne foy?
QUEREUR DES SERMON. Oil, dame, et sire de loy.
Onques n' oistes telle bouche.
C' est merveille conment il touche
Biau son parler.
THEODORE. Atens moy; je vueil donc aler
A son sermon.
LE PRESCHEUR. In ecclesiis altissimi apperuit os suum. Ecclesiastici
XXIIIJ. Ou conmencement de nostre bréve colacion saluons
tuit la vierge benoite pour grace empetrer et li
disons: Ave Maria, etc. . In ecclesiis, etc. . Pour avoir
matére de devocion a la vierge mére Marie, nous pouons
dire de elle les paroles proposées qui veulent ainsi dire
en françois: es eglises de Dieu le pére. La a parlé la
vierge mére. Es quelles paroles la vierge benoite pour
qui amour et reverence nous sommes ci assemblez est
reconmandée d' aucunes choses a lui proprement appartenens
et especiaument de discrecion de parole. Car elle
est monstrée avoir en ses paroles meurté, opportunité
et sobriété, conment il dit. Es eglises du treshault: par
les eglises je n' entens fors la congregacion et l' assemblée
des saintes personnes aunez et assemblez a l' onneur du
treshault, c' est de Dieu le pére. En telles eglises la glorieuse
vierge ouvri sa bouche, voire pour parler discrétement,
meurement et soubrement, et en signe de ce est
il dit de la forte femme, Proverbiorum ultimo: Os suum
apperuit sapiencie et lex clemencie sub lingua ejus. Il est
dit que la forte femme ouvri sa bouche a sagesce et la
loy de doulceur estoit sur sa lengue. Or doiz tu savoir
que je truis quatre eglises, se sont quatre assemblées,
ou la glorieuse vierge ouvri sa bouche. La premiére fu
de lui et de Gabriel l' archange: ileuc dist elle deux paroles,
l' une de meure inquisicion, ce fu quant Gabriel
lui dist que elle concevroit le filz de Dieu et elle li demanda:
Conment me sera ce fait? la seconde si fu de
l' umble et paisible octroy et concession, quant l' ange
lui ot dit la maniére et elle respondi: Ecce ancilla
domini, etc. : Vezci la chamberiére de Dieu; il me soit
fait conme tu me dis. La seconde eglise ou assemblée si
fu entre lui et Elizabeth sa cousine, quant le benoist
Baptiste s' esjouy de sa venue ou ventre de sa mére; la
ouvri sa bouche en Elizabeth saluant et en Dieu devotement
regraciant, quant elle dit: Mon ame magniffie
nostre seigneur. La tierce eglise fu la compagnie de li,
de Joseph, et de Jhesu son filz; la dit l' evangeliste saint
Luc, Luce II^o: Cum factus esset Jhesus duodecim annorum,
etc.., sequitur: Invenerunt eum in templo, etc. ,
Quant Jhesus ot douze ans, ses parens et Jhesus montérent
ou temple en Jherusalem selon la coustume du
jour de la feste; et quant ilz s' en revindrent, ilz obliérent
l' enfant Jhesu en Jherusalem et le perdirent trois
jours; et après ces trois jours ilz le trouvérent ou temple
entre les maistres et les docteurs de la loy; la ouvri la
vierge benoite sa bouche, en disant: Fili, quid fecisti
nobis sic? Biau filz, que nous as tu fait? vezci que ton
pére et moy dolens te querion; et ceste parole fu d' une
amoderée reprehencion. La quarte eglise fu de la compagnie
du benoist Jhesu, de Marie, et des disciples Jhesu,
quant ilz furent appellez aux noces; la ouvri la vierge
sa bouche a parole de doulce compassion, disant a son
filz Johannis II^o: Vinum non habent, Biau filz, ilz
n' ont point de vin; a parole de seure informacion quant
elle dist aux menistres: Faites tout ce qu' il vous dira.
Ce furent quatre eglises qui proprement furent du treshault;
car ce furent quatre assemblées faites a l' onneur
du treshault, c' est de Dieu le pére; et en ces quatre
eglises est dit que la glorieuse vierge ouvri sa bouche a
parler, set foiz et non plus. Mais regarde conment elle
l' ouvri fructueusement, car elle parla meurement, prouffitablement
et sobrement. Dont saint Jehan Crisostomes
dit: Marie ne fut ne ligiére parlerresse, ne jouerresse, ne
chanterresse ne de laides paroles amaresse, conme sont
plusieurs pucelles a il ou monde; pour ce dit saint Anseaumes
de elle en ses meditacions: O famme singuliére
merveilleusement, o famme merveilleuse singuliérement,
par qui li ellement sont renouvellé et li fil d' enfer ont
reméde trouvé, par qui li hommes sont sauvé et li anges
reintegré; dame, tes benefices trepercent les enfers et
surmontent les cieulx, car par la planté de ta grace
ceulx qui estoient en enfer sont liement delivrez et ceulx
qui sont es cieulx joieusement retorez. Et saint Bernart
si dit que elle est la clére estoille née de Jacob qui par
ses raiz enlumine tout le monde, qui tout treperce par
exemples et reluit par merites. Pour ce, tu quiconques
es, qui te vois es ondes du fluve de ce monde plus plungier
que sur terre aler, ne ostes onques tes yex de la
lueur de ceste estoille regarder, se tu ne veulz trebuchier.
Car se dit saint Bernart: Se tu la suiz, tu ne peuz forsvoier;
se tu la pries, ne te doiz desesperer; se tu penses
a li, tu ne peuz errer; se elle te deffent, tu n' as ame a
doubter; se elle te mainne, tu ne te peuz lasser; se elle
t' est propice, ne t' estuet de parvenir a la gloire de paradis
doubter. Laquelle gloire nous ottroit/>FCI> >LT>ille qui est
Deus benedictus in secula seculorum. Amen.
THEODORE. Lasse! pecherresse! en quel an
Sui je, lasse, plaine de rage?
Qu' ay je fait? j' ay mon mariage
Brisé, et a perdicion
Mis m' ame, et a destruccion
Ma biauté, mon honneur, mon corps.
Ha! tresdoulx Dieu misericors,
Conment ay je esté si surprise?
Lasse! lasse! a tart m' en avise.
Certes du dueil morir voulroie.
Lasse! jamais jour n' aray joie
Et a bon droit.
LE MARI. Qu' est ce? Qu' avez vous orendroit,
Ma suer? Estes vous affolée,
Qui ainsi estes esplourée?
Je vous dy bien que je m' en dueil;
Et certainement savoir vueil
Dont ce dueil vient.
THEODORE. Mal ait la vie qui me tient!
Lasse! lasse! que pourray faire?
Lasse! trop mal va mon affaire.
Laissiez m' en paiz.
LE MARI. Et ne finerez vous hui mais
Autrement? Au mains dites moy
Que vous avez, je vous en proy,
Et pour m' amour vous deportez
De tel dueil, et vous confortez;
Et s' en y peut reméde mettre,
Je vous jur par le roy celestre
Je l' i mettray.
THEODORE. C' est pour nient. Ce dueil maintendray
Certes tant conme j' aray vie.
Si n' ay de nulle riens envie
Fors de la mort.
LE MARI. Puisque vostre vouloir s' amort
Que ce dueil point ne laisserez
Et qu' autre riens ne me direz,
Je vois souper chiez mon compére.
Cy ne pourroie a telle chiére
Mengier ne boire.
THEODORE. Souveraine dame de gloire,
Fontaine de misericorde,
Quant de mon pechié me recorde
De paour me tremblent li membre.
E! dame, de moy vous remembre,
Car je ne scé s' il peut voir estre
Qu' en sache riens le roy celestre,
Pour ce que je l' ay fait de nuit.
Mais maintenant, quoy qu' il m' ennuit,
L' iray demander a l' abbesce:
Elle est assez bonne clergesce,
Elle ne m' en mentira mie.
Je vois a li en s' abbaie.
Je vieng bien a point; la la voy.
Ma dame, pour Dieu, dites moy:
Voit Diex et scet aussi le fait
Du pechié qui de nuiz est fait
Conme de jours?
L' ABBESSE. Certes, m' amie, oil, touzjours:
Soit bien, soit mal, quanque faisons,
Quanque pensons, quanque disons
Soit de jours, soit de nuit sanz doubte,
Il en scet la verité toute
Sanz ficcion.
THEODORE. Pour miex a vostre oppinion
Croire, ma dame, je vous pri
Q' un livre aie cy sanz detri
D' evangilles, car g' y voulray
Je mesmes sortir; si verray
S' il est ainsi.
L' ABBESSE. Voulentiers. Apportez me cy,
Suer Ysabiau, sanz detrier
Nostre grant evangelier:
Faites bonne erre.
SUER YSABEL. Dame, en l' eure le vous vois querre.
Vezci celui que demandez.
Ou le mettray je? Conmandez
Que j' en feray.
THEODORE. Bailliez ça, suer; je l' ouverray.
De ceste premiére ouverture,
Dame, qu' a il en l' escripture
De ce mot cy?
L' ABBESSE. Il y a: Quod scripsi, scripsi,
Qui veult ytant dire en françoys:
Ce que j' é escript une fois
Si est escript.
THEODORE. Que feray je, doulx Jhesu Crist?
M' amie, tenez vostre livre.
Dame, je voi tout a delivre
Que ce que m' avez dit est voir.
J' ay bien cause de plourer, voir.
Lasse! dolente, que feray,
Ne conment du dueil cheviray
Que j' ay au cuer?
L' ABBESSE. Et qu' avez vous, ma doulce suer,
Qui si amérement plorez?
Pour Dieu, ne vous desesperez.
S' ore avez tribulacion,
Requerez par devocion
Aide a la vierge Marie,
Et vraiement je ne doubt mie
Que ne l' aiez.
SUER YSABEL. A telz cuers ainsi esmaiez
Vient a la foiz li ennemis,
Et sachiez que plusieurs a mis
En desespoir; trop est soubtil.
Je vous dis bien c' est grant peril
De tel dueil faire.
THEODORE. Certes, je ne m' en puis retraire,
Tant sui plaine de grant tristesce.
A Dieu, ma dame l' abbeesse!
Priez pour moy.
L' ABBESSE. Jhesu Christ, le souverain roy,
M' amie, vous doint son confort.
Pitié m' a fait du desconfort
Ou l' ai veu.
SUER YSABEL. Le cuer m' en est si esmeu
Que je n' ay oeil qui n' en lermoie.
Jetter l' en vueille et donner joie
Dieu bonnement!
L' ABBESSE. Ainsi soit il. Suer, alons ment
En noz jardins un po deduire:
Tantdis pourra pour souper cuire
Nostre viande.
SUER YSABEL. Ma dame, de voulenté grande
A vo vouloir obeiray,
Et vostre voulenté feray:
C' est de raison.
THEODORE. J' ay bien plaine de traison
Esté contre mon bon mari,
Mais j' ay de ce cuer plus marri
Que je t' ay, mon Dieu, courroucié
Et par mon pechié delaissié.
Sire, si le t' amenderay:
Dès maintenant conmenceray.
Vezla mes tresses jus copées;
Plus ne seront de moy portées.
Ma propre robe aussi lairay
Et robe d' omme vestiray
Pour aler aval le pais.
Li ennemis s' est envais
Contre moy et m' a fait pechier,
Mais voir je le pense trichier.
Puis que conme homme suis vestue,
Aler m' en vueil sanz attendue:
Hostel et meubles, je vous lais;
Mes amis touz et clers et lais,
Le mendre aussi com le greigneur,
Conmant a Dieu nostre seigneur;
Mais sur touz par especial
A Dieu, mon chier seigneur loyal,
Qui vous et moy ait en sa garde!
E! doulce mére Dieu, regarde
En pitié ceste pecherresce,
Et prie ton filz qu' il m' adresce
Et me sequeure a ce besoing.
De mon pais sui ja si loing,
Tant ay erré par champs et villes,
Que j' en sui a plus de dix milles,
Si que je sui toute esbahie.
Aler vueil en celle abbaie
Savoir s' il pourroit avenir
Que l' en m' y voulsist retenir.
L' en tient que c' est un devot lieu.
Pais soit entre ces hommes Dieu.
Est l' abbé ci?
L' ABBé. Oil, mon ami, vez me cy.
Que voulez vous?
THEODORE. Je vous requier, sire, et a touz
Voz autres fréres qui sont cy
Que par la vostre et leur mercy
Vous me deigniez en frére prendre
Et pour m' ame sauver apprendre
A Dieu servir devotement.
Car je vous di bien vraiement
Pour miex entendre a servir Dieu
J' ay guerpi mes gens et mon lieu;
Et ne vous soit point en ennui
Se je ne vous ai dont je sui
Dit quant a ore.
L' ABBé. Conment avez nom? THEODORE. Theodore
Sui nommez, sire.
L' ABBé. Biaux seigneurs, que voulez vous dire?
Vous avez ouy qu' il requiert
Et qu' a Dieu servir sanz plus quiert,
Si conme il dit.
PREMIER MOINE. Mettre ne vueil nul contredit
Qu' il ne soit frére.
SECOND MOINE. Ne moy. Vezci pour quoy, biau pére:
Il est jounes homs; moult pourra
Besongnier pour nous, qu' il voulra
Et ça et la pour nous aler:
Si conseil que sanz plus parler
Le recevez.
L' ABBé. Il me plaist, puis qu' en gré l' avez.
Theodore, amis, vien avant.
Frére te fas de ce convent
Par cy que tu obeiras
A nous touz, et chaste seras
Sanz propre avoir.
THEODORE. Sire, je le vous promet voir,
Et c' est raison.
L' ABBé. Menez le sanz arretoison
La de sa robe desvestir
Et de nostre habit revestir.
Or tost, alez.
PREMIER MOINE. Voulentiers, puis que le voulez.
ça, Theodore.
LE MARI. Je ne scé se ma femme encore
Fait autel dueil conme yer faisoit.
Vraiement il me desplaisoit,
Quant savoir n' en puis l' achoison.
Je m' en vois veoir a maison
Sa contenance et sa maniére.
Theodore, m' amie chiére,
Estes vous la? dites, parlez.
Egar! sui je ci affolez
Ou s' il n' a ceens homs ne famme?
Estes vous lassus, dites, dame?
Je voi bien qu' elle n' y est pas.
Je vueil savoir isnel le pas
S' elle est chiez nulz de ses amis.
Le dueil ou l' ai laissié m' a mis
En une souspeçon mauvaise.
Le cuer ne pourroie avoir aise
Tant que la voie.
PREMIER MOINE. Theodore, il nous fault a voie
Mettre de raler au moustier,
Pour faire le divin mestier
Et nostre office.
THEODORE. Conmandez moy conme a novice
Et j' humblement obeiray.
Devant conme novice iray,
Se vous voulez.
SECOND MOINE. Vous dites bien: oil, alez.
Nous vous suivrons.
L' ABBé. Or ça, seigneurs, ça, si dirons
Conmendances qu' avons a dire
En voz livrez pensez de lire
A voiz bassete.
PREMIER MOINE. Vostre voulenté sera faite,
Sire, c' est droiz.
LE MARI. Or sui je bien en touz endroiz
Povre et nu de beneurté
Et venuz a maleurté,
Quant j' ay ma compaigne perdue.
Je doy bien avoir esperdue
La pensée, et si ay je voir,
Quant nouvelles n' en puis savoir.
Nulz ne la me scet enseigner.
Elas! je me doy bien seignier
Et esbahir de ceste perte.
Las! que feray? au cuer apperte
Douleur en ay.
SECOND MOINE. Mon seigneur, conment cheviray?
Sachiez que nostre huille deffault.
Garnison faire nous en fault:
Point n' en avons.
L' ABBé. Si feray que nous en arons.
Theodore, vous en rirez
Querre et nous en achetterez
A la cité de Rougeval.
Prenez en tant com le cheval
De ceens en pourra porter.
Alez y sanz plus deporter,
Et vous tenez entre la gent
Simplement. Vezci de l' argent.
Alez bonne erre.
THEODORE. Sire, je vois le cheval querre;
Si l' en menray avecques moy.
Je feray le miex, par ma foy,
Que saray faire.
LE MARI. Et! doulce amie debonnaire,
Conment estes ainsi perdue?
Voir d' aucun estes deceue
Qui vous en maine, je l' espoir.
A po que ne me desespoir,
Certes, pour vous, tant hé ma vie.
Las! conment m' estes vous ravie
Si faucement?
DIEU. Gabriel, va t' en erranment
Dire au mari de Theodore
Que plus en son dueil ne s' acore,
Mais qu' il s' appareille et atire
D' aler au chemin du martire
Saint Pére et saint Pol, et pour voir
La pourra sa femme veoir
Venir sanz doubte.
GABRIEL. Sire, vostre voulenté toute
Vois faire sanz arrestoison.
Biaux amis, entens ma raison.
Dieu te mande, qui ci m' envoie,
Que tu t' en voises en la voie
C' on dit le martire saint Pére
Et saint Pol, des docteurs le pére,
Et que la quant tu y seras
Ta femme veoir y pourras;
Je te creant.
LE MARI. E! Diex, trop seray recreant.
Se plus sui cy. Certes g' y vois
La ou m' a endicté la vois.
Bien say le chemin et la voie.
Ne m' en chaut mais que je la voie.
En ce quarrefour me tendray
Et si endroit l' attenderay:
Trop me fait mal.
THEODORE. Puis que j' ay dessus ce cheval
Troussé mes barilz et mon bas,
Le chemin m' en vois hault et bas
Tant qu' a Rougeval venir puisse:
Dieu doint que marché d' uile truisse.
Lasse! je voy la mon mari.
Je croy pour moy est moult marri,
Car je le voy pensis et morne.
Ne sçay s' il vaut miex que retourne
Ou qu' en passant a li me moustre.
E! Diex, je m' en iray tout oultre.
Saluer le vueil en passant.
Mon seigneur, Dieu le tout puissant
Joye vous doint.
LE MARI. Amen, dan moine, et si pardoint
A vous et a moy les pechiez
Dont les cuers avons entechiez
Et enlaidiz.
THEODORE. Ha! mon bon mari, conme en diz
Et en faiz de nuit et de jour
Je travaille et ay de labour,
Afin qu' eschaper le meffait
Puisse que j' ay contre toy fait
Et conceu!
LE MARI. Las! je me tieng pour deceu.
Je voi bien que l' en m' a rusé.
J' ay toute jour icy musé
Et si n' est point venue encore
Celle qu' atens. Hé! Theodore,
Je voi bien que perdu vous ay.
Ci endroit plus ne museray.
Dieu, qui souffri son corps pener,
Suer, te vueille en tel lieu mener
Et ta vie si maintenir
Qu' a bonne fin puisses venir,
Et la paine que tu me fais
Te pardoint, et touz tes meffaiz
Autres aussi.
DIEU. Michiel, liéve sus tost de cy.
Va dire au mari Theodore
Que le moine qui passa ore
Par devant lui, c' estoit sa fame
Et qu' il n' en die nul diffame,
Qu' il aroit tort.
MICHIEL. Sire, bien feray ce recort.
Dieu te gart, amis; or entens.
Tu crois avoir perdu ton temps
Et si te tiens pour deceu:
Sachiez le moinne qu' a veu
Si est ta femme en verité.
Dieu s' est vers toy bien acquitté
De sa promesse.
LE MARI. Elas! dolens, mon Dieu, et qu' est ce?
Conment ay je esté si avugle,
Si malostru, si fol, si bugle
Que je ne l' ay pas ravisée?
Las! malement s' est deguisée.
La suiveray je? que feray?
Oil, voire, mais ou iray?
Las? je ne scé de quelle part.
Le cuer de dueil pour li me part.
Confortez moy, biau sire Diex!
Retourner m' en vueil pour le miex
En mon droit estre.
THEODORE. E? mére Dieu, s' il peust estre
Qu' en nostre abbaie ore fusse
Ou soupper et couchier sceusse
Bien! mais n' y puis hui mais aler.
Leens me fauldra hosteller:
C' est mon repaire.
L' ENNEMI. Fole musarde deputaire,
Qui brisié as ton mariage,
As tu pris cest abit sauvage?
Pour ce que si tu me desprises
Que mes faiz ne moy riens ne prises,
Par mes vertus c' on doit bien craindre,
Briefment te feray si contraindre
D' aversité et si lier
Que je te feray renier
Ton crucefiz.
THEODORE. Biau sire Dieux, péres et filz,
Gardez moy de cest ennemi
Qu' il n' ait de riens pouoir sur my.
Je te conjur, faux Sathanaz,
Tantost en sus de ci t' en vaz
Sanz moy touchier.
L' ENNEMI. Haro! ne la puis approuchier:
Le signe a fait qui tant me nuit.
Je te feray ains qu' il soit nuit
Assez contraire.
THEODORE. Biaux hostes, ceens me vieng traire
Pour herbergier; ne vous ennuit.
Je voy qu' il est près de la nuit
Et me sens un po travaillié.
Avez vous riens appareillié
C' on puist mengier?
L' OSTE. Vous arez assez sanz dangier.
Alez faire mettre la table.
Ce cheval menray en l' estable
Et si le vous destrousseray
Et courreer le vous feray
De bonne pille.
THEODORE. C' est bien dit. Dieu gart celle fille
Que ci voy ore.
LA FILLE. Bien veigniez, frére Theodore.
Conment vous est?
THEODORE. M' amie, il m' est bien, se Dieu plaist.
Et vous conment?
LA FILLE. Sire, a vostre conmandement,
Com celle qui vous aime bien
Et qui pour mon ami vous tien,
N' en doubtez mie.
THEODORE. Dieu le vous rende, doulce amie.
La table mettez, je vous pri.
Souper vueil et puis sanz detri
Aler couchier.
LA FILLE. Puis qu' il vous plaist, mon ami chier,
Sanz plus delaier la vois mettre,
Et si me voulray entremettre
De vous servir.
THEODORE. Et je le voulray desservir,
M' amie chiére.
L' OSTE. Vostre cheval si a littiére,
Ce sachiez, frére Theodore,
Jusqu' au genoil et plus encore.
ça souppons. Servez nous, pucelle;
Apportez nous celle escuelle
Ou est le rost.
LA FILLE. Mon seigneur, vous l' arez tantost.
Tenez, chier sire.
THEODORE. Ce mès vault bien eufs, par saint Cire;
Puisqu' il est ci, j' en vueil mengier;
De la jeune me vueil vengier
Que j' ay hui fait.
L' OSTE. Ce ne sera mie mal fait.
Or mengiez et je trancheray
Devant vous, et si mengeray
Avec vous, frére.
THEODORE. Et je vous em pri, qu' il m' appére
Combien pouez avoir grant fain.
Or avant: mettez ci la main
A la viande.
LE VALLET. Je ne suis pas filz de truande:
Je vien bien a point, ce me semble.
Dieu gart la compagnie ensemble
Que je cy voy.
L' OSTE. Qu' as tu fait? dont tu viens? di moy,
Ne me mens point.
LE VALLET. La besongne va bien a point.
L'en ma [l. L' en m' a] dit, ne vous esmaiez,
Que dymenche serez paiez
Certainement.
THEODORE. Nous avons assez longuement
Sis a table. Lever m' en vueil,
Biaux hostes, car j' ay grant sommeil,
Je vous promet.
L' OSTE. Frére, vostre lit est tout prest.
Menez le couchier, belle fille.
Je m' en vois un po en la ville.
Guillot, quant elle revenra,
Souppez de ce qu' il y ara
Tout a vostre aise.
LE VALLET. Si ferons nous, par saint Nicaise,
Et a loisir.
LA FILLE. Frére, s' il vous vient a plaisir
Et a gré, je sui vostre amie.
Onques homme en jour de ma vie
Je n' amay tant com je fas vous.
Il n' a ame ci fors que nous;
Si vous pri vostre amour m' offrez,
Et ja quant point sera souffrez
Qu' avecques vous viengne couchier,
Conme avecques mon ami chier
Que j' ain de cuer.
THEODORE. Certes, belle fille, a nul feur
Je ne feroie tel oultrage
Que j' aie vostre pucellage.
Haro! conment l' osez vous dire?
Vous devriez celi maudire
Et hair tant con l' en pourroit
Qui tel chose vous requerroit.
Ou avez vous mis vostre assenz?
Vous estez, je croi, hors du senz,
Qui requerez c' on vous ahonte.
Ha! mére Dieu! n' avez vous honte?
Vuidez: fi! fi!
LA FILLE. Theodore, je vous affi
Que je ne l' ay dit que par ruse,
Pour vous faire paier la muse
Se je pouoie.
THEODORE. Gardez que maishui ne vous voie;
Alez vous ent.
LA FILLE. Bien doy avoir le cuer dolent
Quant de celi sui refusée
Ou estoit toute ma pensée,
Que j' ay si longuement amé,
Et il m' a vilment refusé
Pour ce que li ay descouvert
Mon cuer et mon desir ouvert:
C' est mesprison.
LE VALLET. Sa, souppons; il en est saison,
Ce m' est avis.
LA FILLE. Guillot, soit fait a ton devis.
Seoir me vueil encontre toy,
Et si vueil mengier, par ma foy,
En t' escuelle.
LE VALLET. Et donc s' en suivra il, pucelle,
Que nous tant nous entramerons
Que nous deux q' un lit ne ferons:
C' est mes recors.
LA FILLE. Et par ma foy, je le t' acors.
Mais je te pri qu' il soit secré,
Et je feray du tout ton gré.
Quant mon seigneur couchié aras,
En ma chambre droit t' en venras
Sanz nul mot dire.
LE VALLET. De ce ne vous vueil escondire.
Ore a tant pais.
L' OSTE. Sa, je vieng; il est temps hui mais
Que chascun resposer se voise.
Avant, sans point faire de noise,
Fille, alez y.
LA FILLE. Mon seigneur, point ne vous desdy.
G' y vois en l' eure.
L' OSTE. Et je sanz plus faire demeure.
Guillot, vien, si me couverras
Et puis aussi couchier t' iras
Quant le seray.
LE VALLET. Sire, voulentiers le feray;
N' en doubtez pas.
L' OSTE. Je sui bien, Guillot; or t' en vas.
Quant Theodore s' en voulra
Aler et il appellera,
Va mettre a son cheval le bas
Et le trousse. Or ne laisse pas:
Tu m' entens bien?
LE VALLET. Se fas mon. N' en doubtez de rien.
A Dieu, qui bonne nuit vous doint!
Je m' en vois, car il est a point,
Devers m' amie.
LA FILLE. Haro! Guillot, tu ne scez mie
Qu' anuié m' a.
LE VALLET. Et a moy quoy? mais ainsi va:
Je n' ay peu plus tost venir.
Encor ne me puis je tenir
Yci q' un po, car il me fault
Garder que par moy n' ait deffault
Ce moine quant il s' en voulra
Aler, et il m' appellera,
Que prest ne soie.
LA FILLE. Ha! sire, Dieu doint qu' il se noye
Ençois qu' en s' abbaie viengne,
Ou qu' il se puist, tant li mesviengne,
Briser le col.
THEODORE. De plus ci estre seray fol.
Je vueil le vallet appeller
De ceens: il m' en fault aler.
Guillot, sus, sus.
LE VALLET. Cy ne puis, m' amie, estre plus.
Je vois la, sire.
THEODORE. Guillot, par amours te vueil dire
Pour moy que tant faces et paines
Que mon cheval troussé m' amaines
Yci devant.
LE VALLET. Il vous sera fait maintenant.
Sa, vez le cy.
THEODORE. La teue tresbonne mercy.
A Dieu! salue moy mon hoste.
Aler m' en vueil par ci de coste.
Je voy bien a mon cheminer
Qu' en l' abbaie devant diner
Venrray. Vez la la ci devant.
Avant que m' en monstre au convent,
Je vois mon cheval destrousser,
Establer, froter et housser
Et sa prouvende li donrray.
C' est fait. Au moustier m' en iray
Avec mes fréres Dieu prier.
Je ne m' en vueil plus detrier.
Mes fréres, Dieu soit avec vous,
Dans abbes, et, par dessus touz,
Vous doint sa gloire.
L' ABBé. Bien veigniez, frére Theodore.
Conment avez vous puis marchié?
Avons nous d' uille bon marchié?
Dites moy voir.
THEODORE. Sire, je vous fas assavoir,
Combien que je soie sot homme,
J' en ay acheté tant en somme
Que jusques a la saint Jehan
En avez, voire a plus d' un an.
Soiez en seur.
PREMIER MOINE. Frére, ce soit en bon eur.
En ce n' avez peu meffaire.
Car touzjours en a l' en a faire
En plus d' un cas.
SECOND MOINE. Biau frére, vous ne mentez pas,
Mais tout voir dites.
L' ABBé. Or pais, seigneurs; il en est quittes
De raler y jusqu' a grant piéce.
Je vous conment chascun se siesce
Et selon son affeccion
Monstre a Dieu sa devocion
Et son desir.
PREMIER MOINE. Dans abbes, a vostre plaisir
Cy me serray.
SECOND MOINE. Et je aussi com vous feray,
Se m' aist Diex.
THEODORE. Et je pour entendre un po miex
A ce que vueil dire et a Dieu
Vueil solitaire estre en ce lieu
Et devant cest autel veillier,
Et si me vueil agenoillier
Pour prier des cieulx la royne.
Ave, dame, en qui la divine
Poissance des cieulx si ouvra
Que parmy vous nous recouvra
Et nous ouvri ce que jadis
Femme nous clost, c' est paradis;
Glorieuse vierge pucelle,
Regarde en pitié moy t' encelle;
Car, dame, tu es m' esperance
Et en toy seule est ma fiance
Que j' aie pardon du pechié
Don Sathan m' a si entechié
Et mon ame si enlaidie.
E! mére Dieu, fai que je die
Aussi com saint Bernart recorde,
C' est que ta grant misericorde
Fait tant pour tout cuer qui te sert
Que l' amour de ton filz dessert;
Et pour ce qu' en pitié me voies,
En l' onneur de voz quinze joies,
Dame, diray ci quize [l. quinze] seaumes
Et des loenges saint Anseaumes
Ce que j' en sçay.
LA FILLE. Las! cuer dolent et plain d' esmay
Doy avoir: sanz cause n' est mie,
Quant je voy que par ma folie
J' ay fait honte a tout mon lignage;
Car j' ay donné mon pucellage
A tel qui n' a ne sens n' avoir,
Et sui preste d' enfant avoir.
Lasse! conment me cheviray?
Pour le miex de ci m' en iray,
Je croy, chiez ma belle ante Thiesce
Et li prieray qu' une piéce
Face avecques lui demourée
Tant que je soie relevée.
Se je sui de dire contrainte
De qui c' est que je suis enceinte,
Je ne pense a respondre encore
Fors que de frére Theodore.
G' y vois tout droit.
LA BELLE ANTE. Qu' est ce? dont viens tu ci endroit,
Di, belle niepce?
LA FILLE. Pour Dieu merci, belle ante Thiéce:
Aidiez moy, ou perdue sui.
J' ay meschief et assez annuy
A porter, voir.
LA BELLE ANTE. Et de quoy? je le vueil savoir
Ysnellement.
LA FILLE. Je suis malade vraiement
D' enfant; le celer riens n' y vault.
Diex! que feray? le cuer me fault.
Hau! Diex! les reins.
LA BELLE ANTE. Met sur mes espaules tes mains.
En nostre jardin te menray
Et la bien garder te feray.
Mais de cest enfent, dont es mére,
De moy dire qui est le pére
Ne soiez lente.
LA FILLE. Frére Theodore, belle ante,
En est le pére a brief parler.
Dieux! je ne puis avant aler,
Tant sanz d' angoisse.
LA BELLE ANTE. Avant que ton mal plus t' engoisse,
Fole, boutons nous ci dedens:
Si ne nous verront pas les gens.
Delivres toy.
L' OSTE. Guillot, ma fille ou est? dy moy.
Grant piéce m' a fait ci seoir
Et ceens ne la puis veoir.
Ou est elle allée?
LE VALLET. Sire, par la vierge honnourée,
Je ne scé, se n' est au moustier.
Se vous avez de li mestier,
Querre l' iray.
L' OSTE. Nanil, non, je l' attenderay.
Passion la fiére!
LA BELLE ANTE. Biau frére, faites bonne chiére.
Vostre fille a eu un filz
En mon jardin, soiez en fiz,
Tout maintenant.
L' OSTE. Vous m' alez pour un fol tenant,
Je croy, suer Thiéce.
LA BELLE ANTE. Non fas, se ja ne me meschiéce.
En l' eure en son lit l' ay laissie.
Moult grant honte s' est pourchassie
Et a nous touz.
L' OSTE. Sainte Marie! et savez vous
Point de qui c' est?
LA BELLE ANTE. Biaux doulx frére, je vous promet
Qu' elle le donne tout a plain
Et dit qu' il est pour tout certain
A un moine de telle affaire,
Qui ceens bien souvent repaire
Et y fut devant ier encore:
Il a nom frére Theodore,
Si com j' entens.
L' OSTE. L' ay je pour ce ceens long temps
Si benignement receu
Qu' elle et moy a si deceu?
Et! par la foy que doi saint George,
Jamais de pain en ceste gorge
N' enterra ne ne mengeray
Tant que de li vengié seray.
Je vous pri l' enfant m' alez querre
Et le m' apportez ci bonne erre:
Veoir le vueil.
LA BELLE ANTE. Par saint Spire de Corbueil,
Frére, moult voulentiers je vois.
Tenez: ne veistes des mois
Plus bel enfant.
L' OSTE. Foy que doy Dieu, tout maintenant
Le presenteray a l' abbé.
Si verra conment m' a gabé.
Dans abbes, que ci voy present,
Tenez, recevez ce present
Que vous apport.
L' ABBé. A moy, mon ami? c' est a tort.
Portez l' ailleurs; vous estes nices.
Enne sommes nous pas norrices
D' enfans petiz.
L' OSTE. Vostre moine a mon pain fetiz
L' a fait: que le dyable y ait part!
Si demourra, se Dieu me gart,
A l' abbaie.
L' ABBé. Vous me faites toute esbaye
La pensée et estre en tristesce.
Pour Dieu, dites moy lequel est ce:
Nel celez ore.
L' OSTE. C' est vostre moine Theodore:
Or le gardez.
L' ABBé. Ha! Theodore, or regardez
Le hontage et le grant annui
Que par vous avons au jour d' ui.
Qui ceens onques mais ce vit?
Voirement dit on voir: l' abbit
Ne fait pas le religieux.
Conment avez si oultrageux
Esté, biau frére?
THEODORE. Merci! merci! doulz abbes pére,
Merci! merci!
L' ABBé. Vous l' arez: quelle? vez la ci.
De ceens vous bouteray hors,
Si me soit Diex misericors,
Et vostre enfant emporterez.
Autre merci de moy n' arez.
Tenez, de ceens tost yssiez.
Alez, et si le norrissiez
De nous bien loing.
THEODORE. Confortez moy a ce besoing,
Fontaine de misericorde.
Car je voi bien et me recorde
Que ceste fortune perverse
Qui ainsi me trebuche et verse
Me vient a cause du meffait
Que envers mon seigneur ay fait.
Voir et qu' a tort suis encoupée
De ce fait ci et hors boutée
De ma religion, hé! Dieux,
Bien doi la lerme avoir aux yeux
Et plorer continuelment
Pour deux raisons: premiérement
Que je n' ay mie fait le vice
Pour quoy me fault estre nourrice;
L' autre est conment me cheviray
Ne de quoy ce filz norriray:
Car je n' ay maille ne denier,
Et si ne sçay point de mestier,
Et si ai la subvencion
Perdu de ma religion,
Si que de touz poins j' ay meschief.
Tresdoulx Diex, mais a quelque chief
M' en venra ta benivolence,
Car je prenray en pacience
Touz les meschiefs qui me venront,
Ja si grans estre ne saront,
Pour plus faire a l' ennemi guerre.
Mon enfant, aler me fault querre
Ou que soit ta vie, pour Dieu;
Et vezla, ce me semble, un lieu
Ou nous prenrons nostre refuit
Et serons en couvert de nuit;
Et si fault que je paine mette
D' avoir lait, et une cornette
Dont je vous acornetteray,
Biau filz: ainsi vous norriray,
Et Dieu, s' il li plaist, parfera
Ce qui a parfaire y sera.
A ces gens m' en vois demander.
Puis qu' il me convient truander.
Donnez a ce povre pecheur,
Pour l' amour de nostre seigneur,
Et a ce petit orfelin.
Que Dieu, qui est couchiez en lin,
Le vous vueille rendre a cent doubles.
Mon enfant, nous avons trois doubles,
Et s' avons du lait et du pain,
C' est assez jusques a demain.
Hui mais vueil aler reposer
Et vous en blans drapiaux poser
Tout de nouvel.
L' ENNEMI. Je demenasse grant revel
S' avoir peusse Theodore,
Mais je voy ce n' est pas encore.
Avoir la cuiday sanz respit
Quant faire li fis ce despit
Que l' abbe hors de son abbaie
La bouta, mais je ne l' ay mie,
Tant a en li grant pacience.
Ouvrer me fault d' autre science.
Si ay pensé que je feray:
Com son serourge m' en iray
A li parler tout maintenant
Et la seray si court tenant
Qu' a ce cop l' aray se je puis.
E! bele suer, ou fust on puis
Que je ne te finay de querre?
Mon frére, ton mari, sur terre
Languist et muert, saches de voir,
Quant voit qu' il ne te peut avoir,
Et fait touz jours ceste clamour:
Ma dame, m' amie, m' amour,
Las! vous ay je perdue ainsi?
Suer, et pour ce te cri merci.
Vien t' en avec moy, ne t' esmaies
De chose que tu meffait aies.
Car bonement te pardonra
Tout si tost conme il te verra,
Saches de vray.
THEODORE. Certes, jamais ne demourray
Avec li, et vezci pour quoy:
Le fil d' un chevalier a moy
A geu, et pour cest oultrage
Que j' ay brisié mon mariage
Et que le delit m' embelli,
Du pechié que fis contre li
Vueil je faire la penitence.
E! doulx Jhesu, pour la souffrance
Que portastes pour noz pechiez,
Quant en croiz fustes clofichiez,
Pardonnés moy cestui mefait
Et touz les autres que j' ay fait.
Sire, en vostre garde me met.
Egar! sainte Marie, ou est
Celui qui parloit ci a moy?
Qu' est il devenuz? Hé! je voy
Que c' est l' ennemi qui me veult
Honnir et decevoir, s' il peut.
Mais ainsi ne m' ara il mie.
Glorieuse vierge Marie,
A vous me rens, a vous m' ottri.
Dame, de cuer devot vous pri:
J' ay des meschiefs assez et grans.
Soiez de moy secourre engrans
Et me gardez si que je n' isse
Point, dame, de vostre service
Par vostre grace.
NOSTRE DAME. Biau filz, plaise vous que je face
A Theodore aucun confort.
Vous vez qu' elle est en desconfort
Et en tribulacion gréve,
Et sanz cause, qui moult la gréve;
Et nient moins elle s' en deporte
Et si benignement le porte
Pour vostre amour con vous veez.
E! biau filz, que la pourveez
C' est droiz, sanz faille.
DIEU. Mére, a ce qu' en li ne deffaille
La grant pacience et la foy
Qu' elle a en vous, je vous ottroy
Le don d' aler la conforter.
Or y alez sanz deporter,
Car je le vueil.
NOSTRE DAME. De ce conmant point ne me dueil.
Anges, faites moy compagnie,
Et chantez de voulenté lie
Moy convoiant.
GABRIEL. Nous le ferons de cuer joiant
Puis qu' il vous plaist, dame des cieulx.
Avant, Michiel, disons le mieulx
Que nous sarons sanz faire oyseuse.
RONDEL. Servir, vierge glorieuse,
Vous doit on en loyauté,
De pensée humble et joyeuse
Servir, vierge glorieuse;
Pour ce qu' en vo precieuse
Char prist Diex humanité
Servir, vierge glorieuse,
Vous doit on en loiauté.
NOSTRE DAME. Theodore, a Dieu gracieuse,
Pour ce que m' amie te tieng,
Pour ce veoir ici te vieng
Que j' ay de toy compassion
Et de ta tribulacion.
Ma doulce amie, je t' ennorte
Que ton cuer paciemment porte
Encore un petit ce meschief,
Et briefment en venras a chief
Et si grant bien y acquerras
Qu' en paradis sanz fin seras
Conme royne.
THEODORE. Dame, pour la vertu divine,
Qui estes vous? dites le moy.
De la grant biauté qu' en vous voy
Ay grant merveilles.
NOSTRE DAME. M' amie, ne t' en esmerveilles:
Marie sui, la Jhesu mére,
Qui pour amenuiser t' amére
Douleur et ton cuer apaisier,
Te vueil de ma presence aisier.
J' ay de toy soing et diligence.
Tien te touz jours en pacience;
Plus ne te diray: ore a Dieu!
Ralons nous ent en nostre lieu.
Passez, Michiel.
MICHIEL. Glorieuse dame du ciel,
Voulentiers. Avant, Gabriel.
En alant finons ce rondel
A voiz bien melodieuse.
RONDEL. Pour ce qu' en vo precieuse
Char Dieu prist humanité,
Servir, vierge glorieuse,
Vous doit on en loyauté.
THEODORE. E! mére Dieu, ceste bonté
Conment te pourray desservir?
Dame, je te doy bien servir,
Quant tu, qui es des cieulx deesse,
D' une si grande pecherresse
Conme je sui t' a souvenu,
Et conforter m' as si venu.
Je t' en merci a jointes mains,
Vierge, qui mére lassus mains
De Dieu et d' homme.
LE FILZ. Egardez, mon pére, une pomme!
Est elle belle?
THEODORE. Oil, mon enfant. Dont vient elle?
Monstre la ça.
LE FILZ. Egardez: celle femme la,
En nom Dieu, si la me donnit
Et encore en aray, se dit,
Une après hier.
THEODORE. Or te siez cy, mon enfant chier,
Et fai en ton giron les noces.
Vezci de pain deux piéces grosses.
Tien: or menjue.
LE FILZ. Ay je bien ma nape estendue?
Di, mon pére, en moquin moquas.
Enne me baterez vous pas:
Je sui bon filz.
THEODORE. Je n' ay talent, soyez en fis.
Siez te donc coy.
L' ABBé. Seigneurs, je vous diray de quoy
Je me vueil a vous conseillier.
Sachiez que moult esmerveillier
M' a fait pieça et fait encore
La povreté qu' a Theodore.
Set anz a que nous le boutasmes
Hors de ceens et le chassames.
Onques puis ne jut en l' ostel,
Et s' a eu a faire un tel
Fait qu' il a cel enfant norri,
Qui li deust avoir pourri
Le cuer de courrouz et de honte.
Mais je voy qu' il n' en a fait compte,
Ains son meschief si humblement
Touz jours et si pacienment
A porté que, se Dieu me gart,
Je tieng qu' en li Dieu ait grant part;
Et combien que Dieu l' ait touchié
Et l' ait batu pour son pechié,
Si croy je, par ma conscience,
Que pour sa tresgrant pacience
Quant envers Dieu qu' il soit bien quittes
De son meffait. Et vous qu' en dites?
Or respondez.
PREMIER MOINE. Sire, se vous m' en demandez,
Je n' en sçay mie bien jugier.
Mais je scé bien que du mengier
Et du boire, je ne doubt pas,
A il eu povre repas
En ces set ans.
SECOND MOINE. Mais li a plus grevé cent tans
Le veillier et le mauvais giste.
Car ou il gist et ou habite
Le vent y cuert de toutes pars,
Pluie, gresil, tonnerre, espars;
Et s' a tant de froit enduré
Je ne scé conment a duré,
Se Dieu m' ament.
L' ABBé. J' ay de li pitié vraiement,
Si vous dy a touz deux ensemble;
Et vous dy oultre qu' il me semble,
S' il nous a fait honte et viltance
Et je l' en charjay penitence,
Puis qu' il en a fait son devoir,
Que nous le devons recevoir
A merci conme nostre frére;
Et je vous pri, pour Dieu le pére,
Qu' il soit ainsi.
PREMIER MOINE. A vous appartient de cecy:
S' en ordenez.
L' ABBé. Frére, alez, si le m' amenez:
Je vous em proy.
SECOND MOINE. Sire, a voz grez faire m' ottroy.
Dieu gart et ce pére et ce filz.
Theodore, certains et fiz
Soiez que dans abbes vous mande
Et com son ami vous demande,
Je le vous jur.
THEODORE. Frére, ce soit en bon eur.
A li de cuer yray aussi.
Se Dieu plaist, il ara mercy
De moy son moine.
SECOND MOINE. Mon chier seigneur, je vous amaine
Ci Theodore.
THEODORE. Pére, cilz Dieu qui maint en gloire
Vous soit amis.
L' ABBé. Theodore, pitié m' a mis
En un vouloir tel que de grace
Moine de ceens te reface.
Tu scez combien tu oz mespris
Quant te mis hors de ce pourpris:
Mais pour ce que tu as souffert
Pacienment et toy offert
A plaine ma voulenté toute,
Grace te feray: quelle? escoute
Je te reconsilieray
Et de ceens moinne feray
Ton filz aussi.
THEODORE. Mon chier seigneur, vostre merci.
Se Dieu plaist, rien ne mefferay,
Mais dès ores mais prieray
Dieu pour vous, et a ce m' oblige
Con celui qui vostre sui lige:
C' est de raison.
L' ABBé. Mes fréres, sanz arrestoison
Cest enfant con moinne vestez,
Puis vueil qu' a lettre le mettez,
Et je vous ordene son maistre.
Or vueillez en li peine mettre
Par amour, frére.
PREMIER MOINE. J' en feray mon pouoir, biau pére;
Je vous promet.
L' ABBé. Pour c' en vostre chasti le met.
Biau frére, or alez de par Dieu.
Alons tandis veoir quel lieu
Theodore pour celle ara.
Ce lieu ci bien bon li sera,
Ce m' est avis.
SECOND MOINE. Ce sera mon et bien faitiz,
Sire, pour voir.
L' ABBé. Or alons de ça pour savoir
Se point de meilleur en avons.
Nulle si bonne ne trouvons
Com celle la.
SECOND MOINE. Vous dites voir, sire: s' il l' a,
Elle est bien bonne.
L' ABBé. Et je li ordene et li donne.
ça, alons ment.
DIEU. Gabriel, va secretement
A Theodore et li denonce
Qu' elle s' apreste com semonce
De venir sa sus en ma gloire,
Et que le monde transitoire
Enuit laira.
GABRIEL. Je feray ce qu' il vous plaira.
Vrai Dieux, g' i vois sanz compagnie.
Theodore, de ceste vie
Mondaine ennuit trespasseras
Et en gloire sanz fin venras.
Apreste toy.
THEODORE. Mon createur, mon Dieu, mon roy,
Je vous glorifi et graci,
Et vostre doulce mére aussi,
De ce que de moy vous souvient;
Et puis que finer me convient,
Sire, faites m' ame si fine
Que de vo gloire qui ne fine
Soit parsonniére.
PREMIER MOINE. Mon seigneur, selon la maniére
De cest enfant et sa coustume,
Si maintient ce qu' il acoustume,
Je vous di qu' en religion
Homs de si grand parfeccion
Com li n' ara.
L' ABBé. S' il fait bien, et bien li venra.
Autre chose vueil proposer:
Il nous fault aler reposer,
Si que levons ja de bonne heure
Theodore, vostre demeure
Si sera la en celle cele.
Elle est pour vous et bonne et bele
Et doit souffire.
THEODORE. Mon chier seigneur, Dieu le vous mire.
Tantost iray.
L' ABBé. Ci endroit plus ne demourray.
Alons couchier.
SECOND MOINE. Je vous suivray, mon seigneur chier:
Il appartient.
PREMIER MOINE. Ains que je couche, il me convient
Aler en un po de besongne.
De ci endroit pas ne t' esloingne,
Ainçois m' atens.
LE FILZ. Maistre, je feray sanz contens
Vostre plaisir.
THEODORE. Filz, liéve sus; j' ay grant desir
De parler a toy a mon gré.
Alons en ma selle a secré.
Sa la main, sa, je t' i menrray.
Ore, biau filz, je te diray:
Il n' a icy que moy et toy:
Je t' acole, et tu, baise moy,
Doulx filz, n' y met nulle deffences.
Je te pri dès ores mais pences
De servir Dieu devotement
Et de faire ton sauvement
Par oroisons et par jeunes.
En toy bonnes vertuz aunes:
Soiez touz jours humbles et sers:
Devotement tes fréres sers
Et aies le cuer pur et fin.
Je sui de ma vie a la fin,
Pour ce te fai je cest conmant:
Mon enfant, a Dieu te conmant,
Qui te vueille aide et pére estre.
Sire, en voz mains vueil rendre et mettre
Mon esperit.
DIEU. Sus, mi anges, sus sanz respit,
Et vous, mére, alons l' ame querre
De Theodore. Alons bonne erre,
Ains qu' elle fine.
NOSTRE DAME. Filz, alons; elle en est bien digne,
Car souvent a esté lassez
Son corps par penance et assez
Meschief eu.
GABRIEL. Or nous convient estre esmeu,
Michiel, de chanter en alant.
Pour joie estre renouvelant
Dison ce rondel: bon me semble.
RONDEL. Par amer et servir ensemble
L' umble vierge mére et son filz
Ne peut on estre desconfiz,
Mais en soy si grans biens assemble
Par amer et servir ensemble
Que esperit ange ressemble
De grace et de gloire confiz.
Pour ce, humains, soiez touz fiz:
Par amer et servir ensemble
L' umble vierge mére et son filz
Ne peut on estre desconfiz.
DIEU. Michiel, celle ame tost saisis,
Si l' en emporterons en gloire.
Elle a du monde eu victoire,
De la char et de l' ennemi.
Pour ce vueil qu' elle ait avec mi
Gloire sanz fin.
MICHIEL. Vray Dieu, je feray de cuer fin
Vostre vouloir. Vezla ci, sire.
Or me pouez vous oultre dire
Que nous ferons.
NOSTRE DAME. En paradis nous en irons.
Va devant, toi et Gabriel,
Et pardites vostre rondel.
Filz, dis je bien?
DIEU. Oil, mére, et a bien le tien.
Passez devant.
GABRIEL. Voulentiers, vray Diex. Or avant,
Michiel, si reprenons ensemble.
RONDEL. Que esperit ange ressamble
De grace et de gloire confiz.
Pour ce, humains, soiez en fiz:
Par amer et servir ensemble
L' umble vierge mére et son filz
Ne peut on estre desconfiz.
LE FILZ. Las! las? seray je orphelin filz?
Mon pére, estes vous trespassez?
Las! las! il est oultre passez.
Emprès li vueil ci demourer
...
Mon dueil faisant.
L' ABBé. Je ne pourroie estre taisant
La vision que j' ay veue.
Sus, mes fréres, sanz attendue
Si m' escoutez.
PREMIER MOINE. Mon seigneur, de quoy vous doubtez
Ne qu' avez vous?
L' ABBé. Je le vous diray, seigneurs doulz.
Sachiez que maintenant sonjoie
Qu' a une grans noces estoie
Ou toutes les ordres des anges
Estoient, voire, et des archanges
Et des sains sanz nombre y avoit
Et ou melieu d' entre eulz estoit
Une femme si glorieuse
Que c' estoit chose merveilleuse.
Des noces estoit l' espousée:
En une chambre estoit menée,
Se me sembloit, et sus un lit
Fu assise par grant delit,
Que mieulx valoit, tant estoit noble
Que tout l' or de Contentinoble.
Ceulx qui compaignie li tindrent,
Quant assise fu, a li vindrent
L' un après l' autre et l' aourérent.
...
En ce regardant une vois
Me dist: " Dans abbes, ce que voiz
Ce sont les noces vraiement
Theodore qui faucement
Fu accusée d' avoir fait
L' enfant, et coulpe n' ot ou fait."
Si que je vueil qu' a li alons
En sa sele et li requerons
Qu' il nous die et qu' il nous expose
La verité de ceste chose.
Suivez moy, car je vous promet
En grant doubte et paour me met
Ma vision.
DIEU. Michiel, oi ma division.
Droit quant de ci departiras,
Au mari Theodore yras
Dire li que sa femme est morte,
Pour qui souvent se desconforte,
Et s' il a fain de la veoir
Voit en l' abbaie, et pour voir
La la verra.
MICHIEL. Ce message bien fait sera,
Vray Diex, ains que je cesse mais.
Entens moi. Dieu te doint sa paix,
Amis; je te di de ta femme:
Pour verité rendue a l' amme,
Trespassée est en l' abbaie;
Se de li veoir as envie
Que tu y voises sanz deffaut.
D' aler y avancer te fault:
Or vaz bonne erre.
LE MARI. Elas! ne la finé de querre
Puis que de moy fu departie;
Et quant de ce siécle est partie,
Dont primes la puis je trouver!
Voir, je doy bien pour li plourer,
Mais neant moins sanz plus pourveoir
De ci m' en vois pour la veoir
En l' abbaie.
L' ABBé. Tu faiz chiére moult esbahie.
Biau filz, qu' as tu?
LE FILZ. Sire, que j' ay assez perdu.
Mon pére a moy ore parloit
Et m' acoloit et me baisoit
Et prioit si tresdoulcement
De penser a mon sauvement,
Et il est mors.
L' ABBé. Tais toy, biau filz: ton dueil remors.
Seigneurs, veoir le vueil tout nu
Pour savoir qu' il est devenu:
Monstrez le moy.
PREMIER MOINE. Voulentiers, mon seigneur, par foy:
Jusqu' au chief le rebracerons
Et puis nu le vous monstrerons.
Dieux! qu' est ce ci?
SECOND MOINE. Ha! sainte Marie, merci!
Vezci un trop merveilleux fait;
C' est une femme, et si s' est fait
Touz jours un homme.
L' ABBé. Seigneurs, or appert tout en somme
Clérement la grant traison
Que l' en li mist sus sanz raison.
C' est ma vision toute entiére.
Nous avons bien cause et matiére
De plourer pour le grief meffait
Que nous li avons a tort fait.
Certes le pére manderay
De la fille et li monsterray.
Alez le querre.
PREMIER MOINE. Mon chier seigneur, je vois bonne erre.
Si l' ameneray se je puis.
Biaux hostes, bien a point vous truis.
Mon seigneur l' abbé vous demande
Pour une besongne bien grande
Qui li est source.
L' OSTE. Je vois sanz pensée rebource.
Je vieng a vous ci, mon seigneur.
Or me dites pour quel labeur
M' avez mandé.
L' ABBé. Amis, tu as bien demandé.
Nuef ans a passé qu' un enfant
M' apportas ci, et entendant
Me fis qu' engendré par sa guille
L' avoit Theodore en ta fille.
T' en souvient il?
L' OSTE. Par m' ame, mon seigneur, oil;
Bien m' en souvient.
L' ABBé. Theodore est mort. Si convient
Que tu aies l' enfant en garde.
Vezci Theodore. Or regarde
Conme engendrer peust enfant.
Tu voiz a son sexe devant
Qu' il estoit femme.
L' OSTE. Mercy, chier sire: ce diffame,
Si com direz, l' amenderay,
Et ma fille vous amenray
Pour la punir.
LE MARI. Dieu vueille ce convent tenir
En s' amour, qui touz biens enorte!
Est ce voir que ceens est morte
Une femme qui est encore
A enterrer, qui Theodore
Avoit a nom?
L' ABBé. Se je vous disoie que non,
Je mentiroie.
LE MARI. Pour Dieu, sire, que je la voie
En son visage.
SECOND MOINE. Est elle de vostre lignage
En verité?
LE MARI. C' estoit ma femme en loyauté,
Ce vous puis dire.
SECOND MOINE. Regardez. Est ce ceste, sire?
Avisez vous.
LE MARI. Ma suer, m' amie, mon cuer doulz,
Mon confort et tout mon solaz,
Ma joie, mon deduit, las! las!
Chiére Theodore, conment
T' es tu vers moy si longuement
Celée quant ceens estoies?
La grant amour dont tu m' amoies,
Que peut elle estre devenue?
Dieu, se semble, la m' a tolue
Et l' a prise a soy de touz poins.
Las! je doy bien tortre mes poins
Et clamer sur toy derrechief.
Suer, tu m' as mis a grant meschief
Long temps et tolu ma leesce
Mais or double ci ma tristesce
Quant te voy morte.
PREMIER MOINE. Sire, entendez. Ce vous enorte
Nature pour soy acquitter
Faire dueil pour lui sanz doubter;
Raison si vous dit du contraire
Et que grant joie devez faire,
Car tant a fait la bonne dame
Que je tieng qu' en gloire est son ame
Certainement.
LE MARI. E! pour Dieu, dites moy conment
Elle a vescu.
L' ABBé. Conment? Certes elle a vaincu
Tout orgueil par humilité.
Et si sachiez pour verité
Qu' en ce siécle selon m' antente
N' avoit femme si paciente
Ne de si grant benivolence.
Ne fu ce pas grant pacience
Que quant cest enfant ci fu nez
Conme a pére li fu donnez
Et dist on qu' engendré l' avoit,
Et du contraire elle savoit,
Mais plus se souffri diffamer
Que ce qu' autrui voulsist blamer?
Dont enduré a et porté
Par set ans moult de povreté.
Car je cuiday que voir feust
Que ce filz engendré eust.
Si la mis hors de l' abbaie,
Dont li a convenu sa vie
Pourchacier set ans, ce me semble,
Pour li et pour l' enfant ensemble;
Mais touz jours si pacienment
S' est portée que vraiement
Pitié si me fist esmouvoir
A elle a grace recevoir,
Dont je la reconsiliay
Et avec nous la raliay,
Il a deux ans, je vous affy,
Et l' enfant pour amour de li.
Or est finée.
LE MARI. Sire, s' il vous plaist et agrée,
Je vous diray m' entencion.
Certes j' ay en affeccion
Que jamais pour gaain ne pour perte
De ceste abbaie ne parte,
Puis que ma compaigne y est morte:
Ma devocion si m' enorte
Qu' en lieu d' elle moinne seray
Et des ores mais serviray
Dieu et vous le cours de ma vie,
Car je n' ay d' autre riens envie:
Si que je vous suppli, doulz abbes,
Sanz plus faire longues sillabes
Recevez moy.
L' ABBé. Ou nom de Dieu et je l' ottroy.
Seigneurs, avant, ce corps prenez
Ensemble et si vous en venez
Après moy en l' enfermerie.
La sera elle ensevelie
Et puis enterrée sera.
Mais pour ce que son lieu tenra
Son mari, qui est un preudoms,
A Dieu loenge en chanterons
Tant pour ce que moinne devient
Conme pour son dueil mettre au nient.
Alons chantant ensemble. Or sus.
Te Deum laudamus.
Explicit.