Miracle d'un chanoine qui se maria

Cy conmence un miracle de Nostre Dame d' un
chanoinne qui par l' ennortement de ses amis se
maria, puis laissa sa femme pour servir Nostre
Dame.
L' ESCUIER.
Mon seigneur, on m' est venu dire
Qu' au moustier a un maistre sire,
Je ne sçay conment il a nom,
Mais on li donne grant renom,
Qu' il doit au peuple un sermon faire.
S' il vous plaist, alons nous y traire
Pour l' escouter.
LE CHANOINE. Thibaut, il me plaist, sanz doubter.
Prenez ma cloque et mon chapel,
Et venez après moy isnel.
N' y vueil pas des derreniers estre,
Thibaut, cy endroit me vueil mettre,
Seez vous la.
LE PRESCHEUR. Sapienciam sanctorum narrant populi et laudes eorum pronunciat ecclesia. Ecclesiastici XLIIII^o.
Ces paroles
sont escriptes en un livre de la sainte escripture qui est
appellez Ecclesiastes, et veulent ainsi dire en françois:
Les peuples racontent la sagesce des sains et l' eglise pronunce
leur louenge. Doulce gent, pour deux causes sont
gardées les festes des sains, c' est assavoir pour les devoz
cuers edifier, pour les sains loer et magnifier. Pour les
devoz cuers edifier, car en oyant les merites des sains
et les faiz recorder et preschier, les devoz se seulent par
bonnes euvres a eulx conformer et ainsi en eulz edifier.
Après je dy que les festes des sains seult on garder pour
les sains magnifier. Car après ce que on nous a leurs
merites preschié et monstré, c' est raison qu' ilz soient de
nous et loez et magnifiez. Pour le premier dit la sainte
escripture: Les peuples racontent la sagesce des sains,
c' est assavoir a ce que le peuple l' ait en exemple. Pour
le second est adjoint: et l' eglise pronunce leur loenge,
c' est a dire que le peuple crée les sains en loenge. Et
vraiement sur touz les sains de paradis les festes de la
glorieuse vierge mére Marie, pour qui amour et reverence
nous sommes cy assemblez, devons nous garder
pour nous en bonnes euvres ediffier, pour elle magnifier.
Car c' est celle qui touz jours est preste de nous aidier, si
conme David le tesmoingne, qui dit: Astitit regina a
dextris tuis in vestitu deaurato: Sire, dist David a nostre
seigneur, la royne, c' est la vierge Marie, est a ta destre
en vesteure d' or. Elle est avecques Dieu pour regner;
elle est avec nous pour nous conseillier. Elle est avecques
Dieu conme empereris et deesse; elle est avecques nous
conme vraie conforteresse; elle est devant Dieu pour
nous conme moienneresse; elle est avecques Dieu pour
regner, et c' est a creature humaine grant noblesce et grant
dignité quant une femme humaine conme toy et moy,
que nous pouons dire qui est nostre suer, car touz sommes
venuz de Adan et Eve, est royne de paradis. Pour
ce est il dit: Astitit regina; c' est la royne qui a esté,
mais c' est la royne qui est avecques nous pour nous secourre
et aidier, et c' est a nous tresgrant prouffit et utilité.
Pour ce dit le sage Sapiencie septimo: Venerunt
michi omnia bona pariter cum illa: Quant ceste dame
est avecques moy, touz biens me sont venuz avecques
elle. Que dirons nous donques a ceste dame qui est si
preste de nous honorer et de nous seurement garder, ne
mais ce qui est dit a nostre seigneur Sapiencie ultimo:
In omnibus magnificasti populum tuum: Dame, tu as sur
toutes choses magniffié ton peuple? Donques elle est a la
destre de Dieu. Mais je dy que elle y est en vesteure d' or;
en quoy est noté aornement de biauté. Penses tu que la
royne des vierges soit nue a la destre de la majesté? Nanil,
ains est merveilleusement aornée de royaulx vestemens
et especialment de trois paires. Premiérement, car
elle a un vestement blanc; secondement elle est aornée
d' un vestement d' or; et tiercement d' un vestement plein
de lumiére. Le premier vestement elle desservy pour sa
tresgrant purté et neteté; le second vestement elle a desservy
par l' exellence de sa charité; le tiers par la sagesce
de sa verité. Du premier vestement dit saint Jehan en l' Apocalipse,
Apocalipsis decimo octavo: Venerunt nupcie
agni et uxor ejus preparavit se, etc. . Il dit que les noces
de l' aignel vindrent et sa femme se para de bougueran;
par quoy je n' entens mais que la pure virginité de Marie:
et ceste vesteure elle a departi aus vierges conme a
ses damoiselles. Je dy après qu' elle est aournée d' un vestement
d' or, si conme il est dit en l' auctorité dessus: Astitit
regina, etc. . Et aussi com par le bougueran est entendue
purté sanz corrupcion, aussi par le vestement
d' or est entendue charité et parfaite dileccion: cestui
vestement a elle departi aus martirs conme a ses chevaliers.
Mais par le vestement de lumiére est entendue la
sagesce de sa verité, et cestui a elle desparti aux apostres
et aux sains docteurs de sainte eglise qui ceste verité ont
viguereusement preschié et monstré par la lumiére de
science et par ardeur de charité, a ce que par l' ardeur
feussent eschaufez les froiz cuers a lui amer et par la lumiére
feussent enluminez les entendemens obscurs a cognoistre
Dieu cy aval en partie, si que après ilz le congnoissent
aussi conme ilz sont congneuz la sus en gloire,
laquelle gloire nous vueille donner ille Deus qui simplex
et unus per infinita secula seculorum in trinitate
regnat.
LE CHANOINE. E! vierge, qui le fruit portas
De pitié, de grace et d' amour,
Moult fait en terre bon labour
Qui vous aime, sert et honneure,
Et cil est nez de moult male heure
Qui n' a en vous servir s' entente.
Thibaut, alez en sanz attente
Pour nostre diner pourveoir,
Et quant temps sera d' asseoir,
Si me revenez querre aussy,
Et vous me trouverez icy.
Amis, alez.
L' ESCUIER. Ce vault fait; plus ne m' en parlez,
Sire: g' y vois.
LE CHANOINE. Vierge, mére au doulx roy des roys,
Par qui grace telle nous vint
Que Dieu nostre frére devint,
Quant en toy prist humanité,
Qui de tout en quoy endebté
Nous orent noz premiers parens
Nous acquitta et fist exens
Quant en croiz souffry passion,
La fu la dominacion
De nous a l' ennemy tolue
Dont monteplia ta value
Tant, royne et gloire des anges,
Qu' en gloire es sur touz les arcanges
Beneurée empereris,
Dame, qui peuz de touz periz
Garder et veulz ceulz qui te servent
De cuer, puis que grace desservent,
Garde moy, dame, de touz maulx,
De touz periz, de touz assaulx
Qu' avoir puis du Sathan, du monde,
Et de ma propre char inmonde.
En ta sainte garde me mez,
Doulce dame, et si te promez
Pour ce qu' a besoin me sequeures
Que je recorderay tes heures
Touz les jours mais que je vivray
Et en usage les avray,
Et ainçois que de cy m' en voyse
Les diray bas sanz faire noyse
Devant t' ymage.
L' ONCLE. Biaux niez, entendez mon langage.
Je vous dy bien moult me deplaist
De ce que mon nepveu qui est
Canoinne de Saint Cassien
Met si a non chaloir le sien
Que de ses fiez et heritages
Ne li chaut; si ert grans dommages
S' ainsi les lait.
LE COUSIN. Or le faisons bien, s' il vous plaist.
Alons li monstrer, vous et moy
Ce sera aumosne, par foy,
Se nous l' alons reconforter;
Et si le pourrons enorter
De femme prendre.
L' ONCLE. C' est voir. Or alons sanz attendre:
Nous sarons qu' il a en courage
Qui dort. Thibaut, faites nous sage
Ou est mon nepveu, savez vous?
Se le savez, dites le nous,
Amis, bonne erre.
L' ESCUIER. Sire, le vous iray je querre?
Il est au moustier; bien le sçay.
N' a gaires que je l' i laissay
Disant ses heures.
L' ONCLE. Thibaut, mais que point ne demeures,
Va, si li dy qu' ysnel le pas
Viengne cy, et ne le lait pas,
A moy parler.
L' ESCUIER. Sire, veez my la aler.
Gardez cy: je le vous vois querre.
Mon seigneur, venez ent bonne erre:
Vostre oncle a l' ostel vous atent.
Je ne scé a quel fin il tent,
Mais il vous mande.
LE CHANOINE. Si yray, puis qu' il me demande.
Biaux oncles, bien soiez venuz.
Or ne vous vit mais pieça nulz
Ceens venir.
L' ONCLE. Ce m' en a fait tant abstenir
Que j' ai eu a besoingnier.
Je vous diray sanz proloingnier
Qui cy m' amaine. Veez le cy.
Vostre pére, dont Dieux mercy
Vueille avoir, si est trespassez,
Il a ja plusieurs jours passez,
Et aussi morte est vostre mére,
Et si n' avez ne suer ne frére;
Et si avez, a parvenir,
Grans heritages a tenir,
Dont vous ne faites pas grant conte.
Ce m' est vis, et certes grant honte
Sera a vous se les laissez,
Et que vous ne les possessez.
Nous sommes cy amis ensemble.
Or considerez s' il vous semble
Que je dy voir.
LE CHANOINE. Biaux oncles, je vous fas savoir
Que n' en ay pas si grant envie
Que pour eulz en jour de ma vie
Clergie laisse ne l' eglise.
Je l' ay amorse et si aprise
Que la laissier n' est pas m' entente.
Avec ce g' y ay belle rente,
Vous le savez.
LE COUSIN. Mon chier cousin, voir dit avez,
Mais consideré tout en somme
N' est pas de vous com d' un autre homme.
Vous n' avez ne pére, ne mére,
Ne si n' avez ne suer, ne frére,
Et vous avez de moult biaux fiez;
Si avez vous d' arrérefiez,
Qui donnent en particulier
Que les tiengne homme seculier.
Vous estes joenne homme d' aage:
Consentez vous a mariage,
Biau sire, et l' en vous pourverra
De femme tele c' on verra
Qu' a vostre honneur y soiez mis
Et a l' onneur de voz amis,
Je vous dy bien.
LE CHANOINE. Biau cousin, je n' en feray rien
Ne pour grant don ne pour promesse.
Prestre vueil estre chantant messe
Et servir Dieu et nostre dame
Pour le sauvement de mon ame
Et prier pour les trespassez
Qui ont acquis et amassez
Les biens dont j' ay si largement:
Et ne m' en parlez autrement,
Je vous en pri.
L' ONCLE. Biau niez, quel los et quel escri
Cuidez vous des gens recouvrer,
Se vous voulez ainsi ouvrer?
L' en dira c' est un folz lunages,
Se delaissiez voz heritages
Ne qu' i voisent en autruy main.
N' aiez mie le cuer si vain:
Avisez vous pour l' amour Dieu.
Il n' a fille de si hault lieu
Cy entours, je n' en doubte point,
Que voulentiers on ne vous doint;
Si vous lo qu' une en regardez
Qui soit vostre femme, et gardez
Vostre heritage, il le vault miex,
Qu' a voz filles et a voz fieulz,
Quant Dieu les vous donra avoir,
Departirez com vostre avoir:
Si ferez sens.
LE CHANOINE. Biaux oncles, point ne m' y assens,
N' ay cure d' estre mariez.
A brief, plus ne m' en tariez:
Riens n' en feray.
LE COUSIN. Biau doulx cousin, je vous diray:
Nous en irons; vous demourrez,
Biau sire, et vous aviserez
Sur ce qu' avons cy proposé,
Et se ce qu' est dit et posé
Est vostre bien c' on vous denonce.
Vous nous en ferez la response
Quant vous plaira.
LE CHANOINE. De par Dieu et fait vous sera,
Puis qu' il vous plaist.
L' ONCLE. A Dieu, sanz plus faire de plait
N' autre sejour!
LE CHANOINE. A Dieu, biaux oncles, qui bon jour
Vous doint, et a vous, cousin chier!
En vain me sont venu preschier
Certes, car mon affeccion
N' est point ne mon entencion
D' avoir ja femme.
L' ONCLE. Biau niez, je m' en vois chiez ma damme,
Ou a faire ay, de Vaussemain.
Se voulez, rassemblons demain
Pour regarder a cest affaire
Conment le puissons si parfaire
Que veoir puissons et sentir
Qu' a soy marier consentir
Par nous se vueille.
LE COUSIN. Sire, il est bon que l' en y veille,
Car a nous grant honte seroit
Qui autre chose n' en feroit.
Si nous a dit ore un langage,
Espoir changera son courage
Et nous dira tout le contraire
Alez a Dieu: je me vois traire
Devers maison.
L' ONCLE. Niez, vous dites bonne raison.
Certainement g' y penseray,
Et demain a vous revenray
Bien matinet.
LE COUSIN. De par Dieu! je seray tout prest:
N' en doubtez point.
L' ESCUIER. Sire, tout est prest et a point,
Quant il vous plaira a disner.
Il est temps de vous desjuner;
Ce m' est avis.
LE CHANOINE. Thibaut, se je voir te devis,
Penser me tolt tout l' apetit,
Esbatre m' en vois un petit
Disne a par toy.
L' ESCUIER. Voulentiers, sire, par ma foy:
J' ay faim, mais j' aray fait bonne erre.
Dites, ou vous iray je querre,
Se mengié ay?
LE CHANOINE. Tu trouveras que je seray
A l' eglise ou sus les fossez.
Quant diné aras ton assez,
A moy t' en vien.
L' ESCUIER. Si feray je, je vous dy bien,
Et bien briefment.
LE VOISIN. Qu' est ce? ou alez si aprement?
Dieu vous doint bon jour, sire Aubert.
Pieça ne vous vy si appert
Com vous voy ore.
L' ONCLE. Je doubt trop demourer encore;
Pour ç' avance je si mon pas.
Voulez vous, biau voisin Thomas,
Rien que je puisse?
LE VOISIN. Oil, mais qu' a loisir vous truisse.
J' ay trop bien a vous a parler
De secré. Pensez vous aler
Maintenant loing?
L' ONCLE. Nanil, et si n' ay pas besoing
Si grant qu' autre foiz bien n' atende.
Je vous pri que sache et entende
Que voulez dire.
LE VOISIN. Voulentiers le vous diray, sire.
Mais dites moy sanz varier,
Est ç' acertes que marier
Se veult vostre nepveu ou non?
Aval la ville en est renom
Et grant parler.
L' ONCLE. Voisin, sanz plus avant aler
Vous en vueil parler en secré,
Je voulroye bien qu' a mon gré
Le fust, se Dieux me soit amis.
Mais encore n' en a il mis
Nulle ame en paine, ce sachiez.
Qui vous meut que vous me touchiez
De tel langaige?
LE VOISIN. Vous me demandez conme sage,
Si le vous diray voulentiers.
J' estoie devant yer moy tiers
En un lieu que je nommer n' ose,
Ou l' en parloit de mainte chose:
Entre les autres il ot la
Un qui d' une fille parla,
Qui riche est et bien gentil femme
Et s' est belle et bonne, par m' ame,
Et s' a de bons amis aussi.
Toutes voies fu dit ainsi
Et conclus que qui en feroit
Mariage d' eulx, ce seroit
Chose moult belle.
L' ONCLE. Voisin, dites moy qui est elle:
Je vous en pri.
LE VOISIN. Je le vous diray sans detry,
C' est la fille au Barré de Saus,
Qui a esté en mains assaus,
Qui est un vaillant chevalier,
Et si est moult bon conseillier
Et bien noble homme.
L' ONCLE. C' est voir, par saint Pierre de Romme.
Et aussi vous dy, biau voisin,
Mon neveu est riche orfelin,
Et, n' en soiez ja esbahiz,
Il n' a si riche en ce pais.
Mais combien que cecy m' avez
Endité, mie ne savez,
Qui pour li la demanderoit,
Se refusée li seroit.
Ay je dit voir?
LE VOISIN. Sire Aubert, je vous fais savoir
Que se marier se vouloit
Et il autant m' apertenoit
Conme a vous, je la requerroye
Pour lui, ne ja ne le lairoye
Pour la doubtance de refus:
Tant en oy je ou je fus
Devant ier, sire.
L' ONCLE. Je ne scé qu' il me pense a dire,
Mais voulentiers l' en parleray,
Biau voisin, et si vous diray.
L' en ne scet qui peut avenir:
Je vous pri que vueillez tenir
Secré cecy.
LE VOISIN. Mais je vous en pri, sire, aussi,
C' on ne sache dont c' est venu,
Ne qui vous en ara meu,
Que vous m' ariez desconfit:
Je n' en parle mais qu' au proufit
De vostre ami.
L' ONCLE. Miex vouldroie perdre demy
Muy de mon blé que j' en parlasse
Par cy que je vous encusasse.
A Dieu, a Dieu!
LE VOISIN. Alez: Dieu vous maint en tel lieu
Que bien vous viengne.
L' ONCLE. N' est pas bon que plus cy me tiengne,
Je vois savoir se mon neveu
Trouveray, a qui j' ay fait veu
Et promesse d' aler a lui.
Biaux niés, ce m' a moult abeli
Que si a point ycy vous truys.
Conment va? Oistes vous puys
Riens de nouvel?
LE COUSIN. Foy que doy ma mére Ysabel,
Nanil; et vous?
L' ONCLE. Je ne scé. Dites, irons nous
Devers vostre cousin savoir
S' il a cure de femme avoir?
Car s' il est point puis ier changié
Je pense que j' aye songié
Bon lieu pour li.
LE COUSIN. Oil, biaux oncles, alons y.
Que ferons dont?
L' ONCLE. Alons nous ent par cy amont
Au moustier, puis que le querons.
Je croy que nous l' i trouverons
Mieux qu' autre part.
LE COUSIN. Je croy bien, car envis s' en part.
Alez devant et je vous sui.
Oncle, se Dieu me gart d' ennuy,
La le voy estre.
L' ONCLE. Aussi fais je. Qu' est ce la, maistre?
Conment vous va?
LE CHANOINE. Bien, la Dieu mercy. Qu' est ce la?
Ou en alez?
LE COUSIN. Cousin, par foy, bien tant valez
C' on vous doit bien verité dire.
Nous venons pour savoir, biau sire,
Se vous nostre conseil croirez
Et se point vous marierez.
Ou il fault que vous le faciez,
Ou il fault que vous delaissiez
De vostre estat trop malement.
Or regardez, pour Dieu, conment
Vous en ferez.
LE CHANOINE. Biaux seigneurs, vous vous cesserez
De moy parler que prengne femme,
Je vous en pri, pour nostre dame;
Car, a briéve colacion,
Je n' y ay point d' afeccion,
Se Dieu m' aist.
L' ONCLE. Niés, le cuer pour vous m' esbahist
De ce qu' estes si nonscient
Que miex amez a escient
Estre povre et le vostre perdre
Que vous a mariage aerdre
Ne prendre femme de valeur
Pour vous maintenir en honneur
Ce n' est mie bien, ce sachiez.
Biau niez, vostre rigueur lachiez
Et se mon conseil vous souffist,
Par Dieu, qui onques ne meffist,
Bien vous feray.
LE CHANOINE. Mon chier oncle, je vous diray:
Je voy bien qu' il fault que decline
Mon vouloir et qu' au vostre encline.
Mais aussi vueil qu' il soit sceu
Que se je suis ja pourmeu
A femme avoir, j' aray pucelle
Qui sera bonne et sera belle,
Et avecques ce sera riche,
Ou ja, ce vous jur et affiche,
Ne li mettray annel en doit;
Car mon estat assez le doit,
Vous le savez.
LE COUSIN. En nom de moy, voir dit avez,
Cousins amis.
L' ONCLE. Est il femme ou vous aiez mis
Vostre cuer ny assis, biau niés?
Gardez que ne le me niez.
Dites me voir.
LE CHANOINE. De quanque j' en puis percevoir,
Celle que je miex ameroye
Et que plus voulentiers prenroie,
Puis que dire fault ces consaulx,
C' est la damoiselle de Saux,
Car elle est grant et belle fille,
Si est assez sage et soutille,
Ce m' est avis.
LE COUSIN. Pleust a Dieu qu' a mon devis
Feussiez ja assemblez ensemble.
Par foy, ce seroit, ce me semble,
Ce qui vous fault.
L' ONCLE. Seroit? or sachiez sanz deffaut
Que jamais je ne fineray
Tant que demandée l' aray
Pour vous, biau niés.
LE CHANOINE. Je doubt que pas n' y aveigniez,
Biaux oncles, car ce sont grant gent
Et puissans d' amis et d' argent,
Je n' en doubt pas.
L' ONCLE. Je le saray isnel le pas,
Se je puis le pére trouver.
Alons men, biaux niés, esprouver
Que pourrons faire.
LE COUSIN. Alons conmencier un affaire
Que Dieu parface a son plaisir,
Ainsi conme je le desir,
Hastivement.
L' ONCLE. Au mains a ce conmencement
Ne muserons pas biau quarré,
Car je voy la sire Barré:
Alons men a li sanz sejour.
Sire, Dieu vous mette en bon jour,
Et ma dame et sa compagnie
Deffende Dieux de villenie
Et doint honnour.
LE PéRE. Bien soiez vous venu, seigneur.
Sa, seez cy.
L' ONCLE. Mon seigneur, la vostre mercy,
Ne serrons pas, sauf vostre grace;
Mais se tant aviez d' espace
Qu' a vous puissons un po parler,
Nous vous dirons en brief parler
Qui nous amaine.
LE PéRE. Se Dieu me doint bonne sepmaine,
Et je suis tout prest, sire Aubert.
Or me soit de vous descouvert
Que voulez dire.
L' ONCLE. Direz vous, biau niez? LE COUSIN. Nennil, sire,
Mais vous direz.
L' ONCLE. Se je fail, vous m' amenderez
Es deffautes que je feray:
Ainsi par vostre gré diray
Dessoubz vostre correccion
Sire, vezcy l' entencion
Qui devers vous nous a atrait.
Souvent on raconte et retrait
Qu' a bon fait bon avoir a faire,
Car qui des bons est souef flaire;
Le mauvais ne prise une quille.
Sire, vous avez une fille
Dont Dieu vous face pére lié,
Laquelle, sur ce conseillié,
Pour un nostre ami requerons
Par mariage, et vous dirons
Bien qui il est.
LE PéRE. Biaux seigneurs, ceste chose c' est
Un fait a autre non pareil,
Qui ne se doit point sanz conseil
Faire, qui bien en veult user.
Pour ce sanz vous faire muser
A ses amis en parleray
Et brief vous en responderay.
Mais, s' il vous plaist, vous me direz
Celui pour qui la requerez;
Et nientmoins, seigneurs, vous mercy
De l' honneur que me faites cy
Vous deux ensemble.
LE COUSIN. Le celer n' est preuz, ce me semble:
C' est pour son nepveu, mon cousin,
Qui est si près vostre voisin,
Qui est certes un fin preudomme
S' il en a nul de cy a Romme,
Bien dire l' os.
LE PéRE. A dire voir, il a bon los
Et s' a du bien tout plain apris.
Je cuidoie qu' il eust pris
Ordre de prestre.
L' ONCLE. Par foy, sire, il le vouloit estre
Se ne li eusse contredit.
Mais tant li ay monstré et dit
Et d' un et d' el que toute voie
De marier l' ay mis en voie;
Autrement fussent ses gangnages
Et le plus de ses heritages
En autrui main.
LE PéRE. Ore vous venrez cy demain,
Et selon ce que je seray
Conseillié, je vous respondray
Sans rioter.
LE COUSIN. Et nous y venrons sanz doubter,
Mais a quelle heure?
LE PéRE. A telle, se Dieu me sequeure,
Com vous plaira.
L' ONCLE. Après prime, voir, ce sera
Assez a point, ce m' est avis.
Entre vous deux arez avis
Avec voz gens.
LE PéRE. De l' avoir seray diligens,
N' en doubtez point.
LE COUSIN. Sire, a Dieu qui honneur vous doint!
A Dieu, ma dame!
LA MéRE. A Dieu, seigneurs, qui corps et ame
Vous gart de mal!
L' ONCLE. Ma dame, la vierge royal
Vous doint joye de quanque amez.
Pour Dieu mercy, ne me blamez
Se j' ay tenu trop longuement
Mon seigneur. Biaux niés, alons ment.
Je ne vous vy huy desjuner.
Vous venrez avec moy diner
Sans plus parler.
LE COUSIN. Puis qu' il vous plaist qu' y doie aler,
Je ne le refuseray pas.
Alons y donc ysnel le pas:
Il en est temps.
L' ONCLE. C' est a quanque, biau niés, je tens.
Alons bonne erre.
LE PéRE. Dame, savez que viennent querre
Ces hommes qui de cy s' en vont?
Je vous dy bien que le cuer m' ont
Mis en pensée.
LA MéRE. Sire, ne suis pas appensée
A quoy il tendent.
LE PéRE. Je vous diray. Il me demandent
Nostre fille par mariage
Pour un homme de leur lignage,
Biau clerc et preudomme et honneste.
Il n' en fault point faire d' enqueste,
Je le congnois et vous assez:
C' est ce clerc de qui trespassez
Fu son pére n' a pas granment.
Si nous fault aviser conment
Nous en ferons.
LA MéRE. Me dites vous ce jeunes homs
Qui est a sire Aubert nepveu?
J' oy dire qu' il a fait veu
Que ja ne se mariera,
Et que briefment prestre sera.
Puet ce voir estre?
LE PéRE. Il tendoit bien a estre prestre,
C' est verité, mais sire Aubert,
Son oncle, ne lui a souffert,
Ainçois veult qu' il espouse femme.
Pour ce vueil que m' en diez, dame,
Vostre propos.
LA MéRE. Vezcy que je vous en desclos.
Je ne scé se vous l' agreez,
Mais il l' ara, se m' en creez.
Car a brief parole solue
Homme ne sçay de sa value
Ycy entour.
LE PéRE. Or me fault faire un autre tour.
Sa, belle fille, vien avant:
Est il nul a qui convenant
Aies ne de foy ne d' amour?
Ne mens pas; dy le sanz demour.
Car un jeune homme te demande,
Et ta honte y seroit moult grande
Se par cremeur te parjuroies,
Et grant deshonneur te feroies
Et a nous touz.
LA FILLE. Certes, nanil, mon seigneur doulx:
De ce n' aiez nulle doubtance
Que j' aie a nul homme aliance
N' acort nul fait.
LE PéRE. Ore tenras tu bien a fait
Ce que je voulray ordenner
De toy? Je te vueil assener
Espoir briefment.
LA FILLE. Mon seigneur, oil vraiement,
N' en doubtez goute.
LA MéRE. Elle seroit folle et estoute
S' elle ne le vouloit tenir.
Il l' en pourroit bien mal venir
Et a bon droit.
LE PéRE. Or pais. Seons nous cy endroit.
Puis que j' ay vostre opinion
Oy et son entencion,
Response rendre me fauldra
A sire Aubert quant il vendra
Tranchéement.
L' ONCLE. Nous demourons bien longuement,
Biau niez, et je le vous denonce,
D' aler savoir quelle response
De messire Barré arons.
Alons y, car plus demorrons,
Plus ert grant honte.
LE COUSIN. Vous savez miex a quoy ce monte
Que je ne fas, biaux oncle. Alons.
Dieu vueille que ce dont parlons
Puist avenir.
L' ONCLE. Avancez vous, nyez, de venir.
La voy seoir tout le mesnage;
Et gardons qu' en nostre langage
N' ait que raison.
LE PéRE. Bien veignent en ceste maison
Ces preudes hommes.
LE COUSIN. Dieu vous croisse honneur, sire; sommes
Venuz trop tart?
LE PéRE. Nenil, sire, que Dieux vous gart.
ça, que direz?
L' ONCLE. Sire, response nous ferez,
S' il vous plaist, sur nostre requeste;
Et s' elle vous semble estre honneste,
Si l' ottroyez.
LA MéRE. De quoy est ce que le proiez
Si doulcement? Savoir le vueil.
Je vueil estre de ce conseil,
S' il vous agrée.
LE PéRE. Ce n' est pas chose si secrée,
Dame, que vous n' y doiez estre.
Sire Aubert me requiert de mettre,
Ne fault pas que je le vous nie,
Nostre fille en la compaignie
De son nepveu par mariage
Et la m' a requis conme sage,
Si ques je vous en respondray,
Sire Aubert, et si vous diray,
Sanz vous mettre en nul autre soing,
Dès maintenant je la vous doing
Pour vostre ami.
LA MéRE. Sire Aubert, par l' ame de my,
Grant joie ay de ceste besongne.
Or disons dès cy sanz prolongne
Quant les fiançailles ferons
Et en quel lieu espouserons
Par vostre assens.
L' ONCLE. A quanque voulez je m' assens
Tresvoulentiers.
LE PéRE. Or en parlons endementiers
Que nous sommes ycy ensemble,
Et j' en diray ce qui m' en semble.
Je say plusieurs bonnes maisons
Qu' a ma requeste bien arons.
Mais celle ou j' ay mieux mon assens.
C' est chiez l' arcevesque de Sens
Vers les Barrez.
LE COUSIN. Sire, ja autre ne querez
Par mon gré, qu' elle est bonne et belle.
Il y a chambres et chapelle
A droit souhait, cuisine et sale
Et si n' est pas vielle ne sale,
Et s' est hors main.
L' ONCLE. Or nous accordons que demain
Nous y serons, se bon vous semble,
Et presens noz amis ensemble,
Nous y ferons les fiançailles
Premier, et puis les espousailles
Tout en celle heure.
LE PéRE. Je l' accors: preuz n' est la demeure.
Soions l' un par l' autre avisé.
Amenez donc nostre espousé
Bien matinet.
L' ONCLE. A Dieu, sire! il sera tout prest
Assez matin; ja n' en doubtez.
Mon neveu, ça, or m escoutez,
A vostre cousin en alons
Et ceste chose lui disons
Et l' accordance.
LE COUSIN. Sire, il convient c' on s' en avance
Alons bonne erre.
L' ESCUIER. Mon seigneur, je vous viens de querre
De dessus les fossez plain d' ire.
Car nulz ne me savoit a dire
Ou vous feussiez.
LE CHANOINE. Thibaut, envis m' y trouvissiez
Quant n' y estoye.
L' ESCUIER. Sire, que faire ne savoie
De m' en raler.
LE CHANOINE. Est ame venu pour parler
A moy de rien?
L' ESCUIER. Nanil, sire, je vous dy bien,
Qu' aye veu.
LE CHANOINE. Alons men. J' ay assez eu
Esbatement.
LE PéRE. Dame, sanz nul delaiement
A l' ostel de Sens en alez.
Nostre fille avec vous menez:
Faites l' ostel assemillier,
Netoier et appareillier
Et gardez qu' il n' y ait deffault,
Car demain noz noces nous fault
Faire leens.
LA MéRE. Plus ne me tenray donc ceens,
Mon seigneur, foy que je vous doy.
Alons men, fille, vous et moy
Sanz plus cy estre.
LA FILLE. Alons, de par le roy celestre,
Quant vous plaist, mére.
LE PéRE. Or alez: g' iray, par saint Pére,
Bien tost après.
L' ONCLE. Biau niez, s' estiez aussi engrès
De mon preu com je suis du vostre,
Foy que doy saint Perre l' apostre,
Je seroie bien eureux.
Biau sire, nous avons nous deux
Tant brassé, tant quis et erré
Que gendre a messire Barré
Serez, biau sire.
LE COUSIN. Cousin, vous en pouez bien rire;
Il vous dit voir.
LE CHANOINE. Dites vous que la doy avoir
Pour tout certain?
L' ONCLE. Oil, je le vous acertain.
Avec nous, soit folie ou sens,
A l' ostel mon seigneur de Sens
Maintenant venir vous en fault.
La l' espouserez sanz deffault:
Tout y est prest.
LE CHANOINE. Puis que le fait est si aprest
Qu' aler nous y fault sanz demeure,
Alons men donc: en la bonne heure
Se puist il faire.
LE COUSIN. Biau cousin, hastons nostre afaire,
Car estre y deussions pieça.
Avant touz nous, de par Dieu, ça,
Mouvez devant.
LE CHANOINE. Voulentiers, seigneurs, or avant
Donc me suivez.
POLET. Tu soies le bien arrivez,
Volant. Qu' est ce la qui te maine?
Dy me voir, s' en bonne sepmaine
Te mette Dieux.
VOLANT. L' entente que j' ay d' estre miex
Diné ceens qu' en ma maison,
Je te promet, c' est l' achoison
Pour quoy vieng cy.
POLET. Et conment t' est, pour Dieu mercy?
Dy moy, as tu bien proufité
Ou pais ou tu as esté
A recors faire?
VOLANT. Polet, pour voir te puis retraire,
Ma gaaingne n' y a riens valu,
Car les Anglois m' ont tout tolu,
Et une meschine qu' avoye
Si belle, que trop decevoie,
Que j' avoie prise en Bourgoingne.
A brief, alée est ma besoingne
Trop meschanment.
POLET. Je n' ay pas donc perdu granment
Se de Paris ne m' ay meu.
Touz dis ay je le brout eu
Pour moy et pour Santelinete,
Qui est assez belle garcete
A mon devis.
VOLANT. Polet, or me dy ton avis:
Je voy ceens a planté gent,
Y pourrons nous gaigner argent
A recorder?
POLET. S' a mon dit te veulz accorder,
Cy endroit point ne demourrons,
Mais a unes noces yrons
Que mes sire Barré huy fait:
La ferons nous miex nostre fait,
Je n' en doubt pas.
VOLANT. Et je t' em pri qu' ysnel le pas
Y alons. Ou est ce, Polet?
Nous departirons nostre acquest
A ton plaisir.
POLET. Nous y venrons tout a loysir,
Volant, mais dès cy devisons
De quoy au diner servirons
Devant les gens.
VOLANT. Vecy: tu seras diligens
De biaus diz recorder assez,
Et je ne suis pas si lassez
Que ne face d' esparteté
Et des faiz de ligiereté
Plus que ne fist onques Safret;
Et si diray, se mestier est,
De grans falourdes.
POLET. C' est bien dit. Or alons de bourdes
Servir tant la feste et de lobes
Qu' avoir puissons l' une des robes
A l' espousé.
VOLANT. Nous en serons, se puis, housé
Ains qu' il soit nuit.
LE CHANOINE. A qui qu' il siée ou qu' il ennuit,
Puis que me voy hors de la feste,
Je n' y mettray mais pié ne teste
Tant que les heures aie dit
De la mére au doulx Jhesu Crist.
Bouter me vois en sa chappelle.
E! tresdoulce vierge pucelle,
Source de grace et vray conduit,
Mercy, dame, et ne vous ennuit
S' il ne m' est si bien avenu
Que de dire m' est souvenu
Voz heures, si conme je sueil.
Dame, acquitter ycy m' en vueil
Afin qu' en grace m' avoiez
Et que vous joie m' envoiez
De celle que vieng d' espouser:
Et sanz moy plus cy dolouser
Vueil conmencier bas, plus n' y a: Domine, labia mea, et cetera.
NOSTRE DAME. Jehan, mon amy, je voy la
Un mien sergent a qui parler
Me convient; si y vueil aler.
Venez me faire compaignie,
Et ces anges que ne hé mie
Faites descendre.
SAINT JEHAN. Dame, voulentiers, sanz attendre.
Seigneurs anges, or m' entendez:
Vous deux de cy jus descendez
Appertement.
GABRIEL. Jehan, nous ferons liement
Vostre vouloir.
LE CHANOINE. Egar! qu' est ce? que puis j' avoir?
De sommeil sui si entrepris
Que ne puis plus. Ou l' ay je pris?
Un petit cy clignier me fault,
Puis acompliray le deffault
Que j' ay a dire.
MICHEL. Jehan, or vous plaise, biau sire,
Faire nous savoir ou irons,
Ne lequel chemin nous tenrons
Ou la ou ça.
SAINT JEHAN. Nostre dame le vous dira,
Qu' est cy presente.
NOSTRE DAME. Mes amis, d' aler m' atalente
Jusques la en celle chappelle
En y alant a voiz ysnelle
D' accort chantez.
GABRIEL. Dame, chascun entalentez
En est. Michiel, avant disons.
Son conmant bien faire devons,
Car mére est de nostre seigneur.
RONDEL. Precieuse vierge d' onneur,
Mére au glorieux fruit de vie
Par tout s' estent vostre valeur,
Precieuse vierge d' onneur;
Et n' en dit on que la moitie:
Tant a en vous grace et doulceur
Que nul ne fault a vostre aye,
Precieuse vierge d' onneur,
Mére au glorieux fruit de vie.
NOSTRE DAME. Dy moy, dy moy, tu qui de cuer
Par samblant amer me soloies
Et qui maintenant me tenoies
En disant nonne pour si belle,
Conment est ce, se je suis telle,
Que pour autre femme me laisses?
Malement, ce semble, m' abaisses
Et ma valeur et ma biauté.
Ce n' est pas bonne loyauté,
Quant cy me laisses. Es tu yvres,
Qui tout ton cuer et t' amour livres
A une terrienne femme,
Et tu me laisses, qui sui dame
Du ciel? Dy me voir, ou est celle
Qui plus est de moy bonne et belle?
Je te dy bien que tant t' amoye
Que ja en paradis t' avoye
Ordené un lieu ou feusses,
Ouquel gloire sanz fin eusses.
Mais de la te sera defaiz
Et en enfer te sera faiz,
Ce saches, et appareilliez,
S' autrement n' es tost conseilliez.
Plus ne t' en dy. Seigneurs, avant,
Partons de cy. Mouvez devant
Entre vous troys.
SAINT JEHAN. Vostre conmant ferons, c' est drois
Dame des cieulx.
GABRIEL. Avant pardisons, c' est le mieux,
Nostre rondel.
MICHEL. C' est mon, car il est bon et bel.
Or sus, je vous en pri de cuer.
RONDEL. Tant a en en vous [l. a en vous] grace et doulceur
Que nul ne fault a vostre aye,
Precieuse vierge d' onneur.
Mére au glorieux fruit de vie.
LE CHANOINE. Ha! tresdoulce vierge Marie,
Com tu as bon droit se tu grouces
De ce qu' ay fait et te courroces!
Las! de quelle heure fu je nez?
Las! je suis perduz et dampnez
Se je ne met en moy deffense.
Ha! doulce dame, quant je pense
A ta grant biauté non pareille,
Mon cuer du penser se merveille,
Car je voy trop sui variez
En moy quant me sui mariez.
Las! de quelle heure ay je pris femme?
Je voy que je pers corps et ame,
Et es mains de mes ennemis
Me suis mis, et par mes amis,
Se reméde briefment n' y met.
Mais, mére Dieu, je vous promet
Qu' ainsi je ne vous perdray mie,
Mais feray que serez m' amie,
Se je puis, ains demain ceste heure.
Cy ne feray plus de demeure,
Ains m' en revoys a l' assemblée.
Ma voulentez a touz emblée
Par biau semblant faire sera,
Si que ja nulz ne le sara
Tant que d' eulx me seray emblez.
Se les cuers ont pour moy troublez,
Riens n' y aconte.
L' ONCLE. Biaux niez, vous nous faites grant honte.
Dont venez vous toute ajournée?
Departie et desassemblée
Est ja la gent de vostre feste.
C' est a vous chose deshonneste,
Quant ne les avez mercyé
De l' onneur et regracié
Qu' il vous ont fait.
LE CHANOINE. Je n' en puis mais, oncle, c' est fait,
Et fust la contesse de Fois.
Pardonnez le moy ceste foiz,
Oncle, pour Dieu.
L' ONCLE. Il nous fault savoir en quel lieu
Est miex de jesir vostre assens,
Ou chiez l' arcevesque de Sens,
Puis que voz noces y sont faites,
Ou en vostre ostel. Or m' en faites
Response brief.
LE CHANOINE. Biaux oncles, a qui qu' il soit grief,
Je n' ay ne talent ne desir
D' ailleurs qu' en ma maison gesir,
N' en doubtez pas.
L' ONCLE. Or y alez isnel le pas,
Et je par dela m' en yray
Et amener vous y feray
Vostre espousée.
LE CHANOINE. Il me plaist bien, oncle, et agrée
Devant m' en voys.
LE PéRE. Sire Aubert, je ne vy des moys
Tel homme que vostre neveu.
Ou peut il estre, n' en quel lieu,
Que cy ne vient?
L' ONCLE. Je vieng de lui. Sire, il convient
Que nous li menons s' espousée,
Car c' est s' entente et sa pensée
D' ennuit gesir en sa maison.
Menons li sanz arrestoison;
Il en est heure.
LE PéRE. Le veut il? Alons sanz demeure:
Je le vueil bien.
L' ONCLE. Aussi fas je, sire, et si tien
Que c' est le miex.
LE PéRE. Veczy vostre femme, biau fiex.
Or la prenez; je la vous livre.
Quant est de moy je m' en delivre
Dès ore mais.
LA MéRE. Dieu vous doint s' amour et sa paix
Et joie ensemble.
LE COUSIN. Dame, et vous, seigneurs, il me semble
Que nous en pouons bien aler
Et les laissier eulx deux parler
De leur secré.
LE PéRE. Vous avez bien dit a mon gré.
Alons men ça, sanz plus debatre.
Je vueil que nous alons esbatre
En ma maison.
LA MéRE. Je demourray cy, c' est raison.
Alez vous ent.
LE CHANOINE. De cy demourer n' ay talent.
Certes avecques vous yray,
Et tandis conme g' y seray
Se couchera.
LA MéRE. Il dit bien; il ne la verra
Mie couchier.
L' ONCLE. Alons men, sanz plus cy preschier.
Je vous en proy.
LE PéRE. Alons. Or ça, biau filz, je croy
Qu' amissiez miex a demourer.
Gardez vous de trop labourer:
Ce sera sens.
LE COUSIN. Seigneurs, or oiez mon assenz:
Je lo qu' en l' ostel en alons
Ou noz noces faites avons,
Et ne soions mie si nices
Que ne visitons les offices
Et la vaisselle aussi d' argent,
Et mettons hors toute la gent;
Et quant ainsi ouvré arons,
Après esbatre aler pourrons
Plus seurement.
L' ONCLE. C' est voir. Je lo bien vraiement
Qu' il soit ainsi.
LE PéRE. En nom de moy si fas j' aussi.
Alons y; n' y ait plus songié.
Biaux filz, nous vous donnons congié
D' aler couchier.
LE CHANOINE. Mais qu' il vous plaise, sire chier,
Sanz vous pas ne retourneray,
Mais la ou vous irez g' iray
Par compagnie.
LE COUSIN. A un mot, il ne nous plaist mie
Qu' avec nous doiez plus ore estre.
Pensez de vous au retour mettre:
Il en est temps.
LE CHANOINE. Puis que riens n' y vault mon contens,
A l' ostel m' en retourneray
Et a Dieu vous conmanderay.
Qu' est ce la? Diex y soit, ma dame!
Dites, est couchée ma femme
A vostre vueil?
LA MéRE. Oil, biau filz, sachez je vueil
Aussi prendre un po de repos.
Si ferez vous, se mon propos
Croire voulez.
LE CHANOINE. J' ay le lit tout prest. ça venez,
Dame, couchier.
LA MéRE. Biau filz, sanz vous point empeschier,
Maishuy ceens ne demourray.
Sachez qu' en mon hostel yray
Avec mes gens.
LE CHANOINE. Je n' ay qu' un de touz mes sergens,
Si me faut avec vous aler.
Or ne m' en faites plus parler,
Par amour, dame.
LA MéRE. Vous n' y venrez mie, par m' ame.
Il me souffist bien se je l' ay.
Thibaut, alons men sanz delay
Appertement.
L' ESCUIER. Dame, il me plaist. Alons briefment
Ou vous voulrez.
LE CHANOINE. Mére Dieu, que me secourez!
En moy sens un trop dur assault.
La char me bout, tressue et sault
De ce que ja dedans ce lit
N' a pris et eu son delit
Et son vouloir de la pucelle
Qui y gist, qui par est tant belle,
Et me dit j' ay pensée lasse
Quant entre mes bras ne l' embrasse,
Et a moy par suis trop eschars,
Et que s' on me deust en chars
Ardoir ou noyer en viez puiz
Puis qu' avoir ma voulenté puiz,
D' elle, tenir ne m' en deusse,
Posé que de certain sceusse
Que j' en deusse estre periz.
Contre ce dit mes esperiz
Que se je de ce ne me garde,
Je ne donray l' eure de garde
Que me verray si desceu
Et me sera cy mescheu
Que j' aray perdu, doulce dame,
Vostre amour et mon corps et m' ame.
Nient moins la charoingne chestive
Encontre l' esperit estrive
Et art par desir et remue
Pour la belle que la voy nue.
Et pour ce dy qu' il avient peu
Qu' estoupes n' ardent près de feu:
Estoupes est homs et feu femme;
Qui tost est espris de tel flame.
Car de ce feu, bien m' en recors,
Sens en partie espris mon corps.
Mais, vierge, pour la vostre amour,
Cy ne feray plus de demour,
Mais pour moy garder de bruir
Tout maintenant m' en vueil fuir
Et laissier quanque j' ay ou monde,
Pour vous, mére Dieu pure et monde,
Devotement de cuer servir
Et la vostre amour desservir.
Ceste lettre cy laisseray
Qui dira qu' alez m' en seray
Estre hermite, et que l' en entende
Que jamais jour on ne m' atende.
Meubles et femme, je vous lais,
Et mes amis touz, clers et lais,
Conmand a Dieu et a sa garde.
Doulce mére Dieu, je regarde
Quel chemin tenir je pourray.
Ce bois la par my m' en yray.
Il est hault, estrange et sauvage.
E! Diex, vezcy un hermitage
Tout vuit. Je tieng nul n' y habite.
Certes demourer conme hermite
Y voulray, c' est m' entencion,
Et ycy par devocion
Mon temps user.
LE PéRE. Seigneurs, sanz plus ycy muser,
Alons veoir nostre espousé
Et sachons s' il a point rusé
Encor sa femme.
L' ONCLE. Je le lo bien, sire, par m' ame.
Alons, se Dieu joie vous doint.
Nous y venrons trop bien a point,
Si com moy semble.
LE COUSIN. C' est voir, et, par foy, s' il ne s' emble,
Nostre desjuner paiera,
Ou chausse ne soler n' ara
Huy a chaussier.
LA FILLE. Mére Dieu, le jour voy haussier
Et seule sui sanz compagnie
Et ay esté toute nuittie.
Ou peut mon seigneur estre alé,
Quant ennuit a moy n' a parlé?
Je ne scé se vin desceu
L' a, par quoy ailleurs ait geu,
Mais tout maintenant le s ray [l. le saray],
Car de ce lit me leveray
Pour le querir.
LA MéRE. Belle fille, pour vous guerir
Yray je querre mire? Dites:
Vostre mari sera il quites
De ses flamiches?
LA FILLE. De voz levains ne de voz miches
Ne scé que vous dites, ma dame,
Ne mon mari ne vy, par m' ame,
Puis que couchay.
LA MéRE. Ersoir, au partir, le laissay
Cy. Que dis tu?
LE PéRE. Avant! est rompu le festu?
Egar! qu' est ce, dame espousée?
Estes vous ja si tost levée?
Diex y ait part.
L' ONCLE. Encore a esté plus espart
Son mari, quant il est ja hors.
Ou est il alez, le bon corps?
Savez vous, dame?
LA MéRE. Elle ne scet, se dit par s' ame,
N' avecques lui ennuit ne jut.
Espoir que hier un pou trop but:
Si gist ailleurs.
LE COUSIN. Ce ne sont mie les meilleurs
Nouvelles que puissons avoir.
Avant, avant! il fault savoir
Ou il peut estre.
LA FILLE. A mon chevet ay ceste lettre
Trouvé. Gardez, oncle, que c' est.
Ne m' y cognois fors tant qu' elle est
Nouvelle escripte.
L' ONCLE. C' est de sa main: mais que pourlite
L' aie, vous sarez sa divise.
Ceste lettre dit et divise,
Ne vous merveilliez se j' en pleure,
Que mon nepveu yer, a celle heure
Que de nous il se destourna,
Pour dire ses heures tourna:
En celle eglise ala tout droit,
Et quant il fu en cel endroit
Que nonne devoit conmencier,
Le dire li convint laissier
Pour sommeillier en la chappelle.
En dormant la vierge pucelle
Vy tresnoblement atirée,
Mais moult estoit vers lui yrée;
Si lui demanda qu' il pensoit
Qui pour une autre la laissoit,
Et si lui sembloit qu' aussi belle
Et aussi bonne fust com celle
Dont il avoit faite s' espouse,
Et qu' elle estoit ja si jalouse
De lui qu' en paradis son lit
Lui avoit fait par grant delit,
Qui lui sera du tout defait
Et en enfer lui sera fait,
S' il ne prent garde a sa besongne.
Pour ce de nous, ce dit, s' eslongne,
Pour ce de nous s' en fuit et emble.
A Dieu touz vous conmande ensemble,
Et dit que tel chemin prenra
Que cy jamais ne revenra,
Mais en desert ou en boscage
Voulra servir en hermitage
Dieu et sa mére.
LA FILLE. Vezcy pour moy nouvelle amére.
Lasse! chestive! j' esperoye
Qu' honnorée par lui seroie
Plus que femme de ce pais.
Voir, mes cuers est bien esbahis.
Et puis qu' il a pris tele voie
Que je pers ma premiére joye,
Jamais autre mari n' aray,
Mais pour s' amour nonne seray:
A Dieu le veu.
LA MéRE. Ha! belle fille, de ce veu
Vous refrenez.
LE PéRE. Taisiez, fille, et ma foy tenez
Que je vous donray tel mari,
N' aiez ja le cuer si marry,
Dont en puissance monterez,
Et dont bien venue serez
Par tout pour li.
LA FILLE. Sire, je promet a celui
Qui pour moy le grant venredi
En la croiz benoite pendi
Que de mari n' aray je point.
Nonne vueil estre, et en tel point
User ma vie.
LA MéRE. Puis qu' elle en a si grant envie,
Je vous diray que nous ferons.
A l' abeesse parler yrons
De Poycy. Ce sont bonnes femmes.
La la faison l' une des dames:
Je n' y voy miex.
LE COUSIN. Vous dites moult bien, dame, et Diex
De ce moult bon gré vous sara,
Quant par vous telle fille ara
A son servise.
LE PéRE. Puis qu' a ce ta voulenté prise
S' est, je n' y contrediray pas.
Sa, alons men ysnel le pas.
Je te promet ne fineray
Jusqu' a tant que je te verray
Nonne voilée.
L' ONCLE. Sire, s' il vous plaist et agrée,
Avec vous jusques la iray,
Et compagnie vous tenray,
Moy et mes niez.
LE PéRE. Puis qu' il vous plaist que me teigniez
Compagnie, vostre mercy.
Sa donc, touz cinq partons de cy
Sanz y plus estre.
LE CHANOINE. Doulce vierge, de qui volt naistre
Des vrais amans li tresparfaiz,
Dame, de ta grace refaiz
Ton sergent et le reconforte
Si qu' ouverte li soit la porte
De ton saint estre.
NOSTRE DAME. Jehan, encores vous fault mettre,
Je ne vous vueil pas espargnier,
A voie pour moy compaignier
Avec ces anges.
SAINT JEHAN. Dame, qui dessus les archanges
Et de touz sains estes royne,
Je feray de voulenté fine
Vostre conmant.
NOSTRE DAME. Et vous, anges, suz, or avant:
Encore aler vueil une foiz
A mon amy qui en ce bois
La me regrette.
GABRIEL. Vostre voulenté sera faite,
Dame, et en alant chanterons.
Michel amis, avant disons
Ce chant que n' a guères feistes.
RONDEL. Cuers humains, com plus te delites
En la dame des cieulx amer,
Plus fais euvres de grans merites.
Cuers humains, com plus te delites
Et plus par grace en Dieu habites,
Et plus as joye sanz amer,
Cuers humains, com plus te delites
En la dame des cieulx amer.
NOSTRE DAME. Mon chier amy, qui cy habites
En ce lieu divers et sauvage,
Qui as laissié ton heritage
Et tes nobles possessions,
Ta femme et tes grans mansions
Pour moy venir ycy servir,
Je le te voulray desservir
Briefment, n' en doubtes.
LE CHANOINE. Ave, dame, qui dessus toutes
Les vierges en paradis regnes:
Quant si doulcement cy m' aregnes,
Je te doy bien glorifier
Et loer et manifier
De ta bonté.
NOSTRE DAME. Pour ce que ton corps as donté
Par penance en cest hermitage,
Je te promet que l' eritage
De paradis sanz fin aras
Et ycy plus ne demourras.
En un autre lieu t' enmenray,
Et souvent te visiteray
Jusqu' en la fin de ton trespas.
Anges, alez devant le pas,
Et pardites a mon convoy
Vostre rondel: amis, suis moy.
Or sus, chantez.
MICHEL. Chascuns en est entalentez,
Vierge sanz per, s' est bien raisons.
Avant, Gabriel: pardisons
Devant la meilleur des elittes.
RONDEL. Et plus par grace en Dieu habites
Et plus as joye sanz amer,
Cuers humains, com plus te delites
En la dame des cieulx amer.

Explicit un miracle de Nostre Dame qui s' aparut au
chanoine en disant l' eure de nonne, et le reprist dont il
avoit espousé femme par dessus ce que il lui avoit promis
a la servir et amer tout le temps de sa vie, etc. .