Miracle de saint Valentin

Frater qui adjuvatur a fratre quasi civitas firma,
Proverbiorum XVIII^o. Ceste parole proposée en latin
veult ainsi dire en françois: Frére qui est aidié
de frére est conme une cité bien fermée, et peut estre
exposé a nostre edifficacion, et y peuent estre notées trois
choses: premiérement que nous sommes fréres; secondement
que nous devons l' un l' autre aidier, qui est noté
ici: Frater qui adjuvatur a fratre: conme vous soiez
fréres, vous devez l' un l' autre aidier; tiercement le
proufit que nous y avons, se nous nous entreaidons.
Car nous serons si fors c' om ne nous pourra vaincre.
Et c' est touchié en ce qui dit: quasi civitas firma. Or
veons du premier. Vous devez savoir que par grace
nous sommes fréres et germains. Pour quoy? Car nous
sommes touz creez d' un pére, c' est assavoir de Dieu, et
d' une mére, c' est assavoir de sainte eglise. Je ne di pas
que nous soions ci assemblés conme confréres ne par
maniére de confrarie, mais conme germains et fréres
par amour et dileccion espirituelle. Dont nous nous
devons plus amer que fréres charnelx, et je le te preuve,
car, si conme dit saint Ambroise, grace est plus contraignant
a amer que nature, car la mort separe et dessevre
les choses jointes par nature, mais elle ne peut
separer les jointes par grace et par amour, car ainsi fort
est amour conme mort; avec ce vous savez que l' un
frére charnel appetice et amenuise l' eritage de l' autre
frére, et de tant conme ilz sont plus de fréres charnelx
de tant a chascun mendre heritage: ce veons nous en
la succession des péres et des méres; mais le frére espirituel
n' amenuise pas l' eritage de son frére espirituel,
ainçois l' acroist, et cest heritage c' est vie pardurable.
Saint Augustin dit: Beneuré est l' eritage qui pour habondance
de hoirs n' apetice point, mais acroist, et cest
heritage c' est vie pardurable, et vie pardurable c' est
congnoistre Dieu et li amer. Vous veez que la mére qui
voit que son filz est congneu et amé de moult de gens,
pour ce ne l' aime elle pas mains, mais plus, et ainsi est
il et sera en gloire lassus; car de tant com nous verrons
plus de noz fréres amer Dieu, tant plus amerons nous
Dieu. Car aussi conme les fréres, tant conme ilz sont
en la mainburnie du pére, toutes choses leur sont communes
et s' entreaiment plus que quant ilz sont divisez
et separez, aussi nous estant espirituelment en la maimburnie
de Dieu, nous ne serons point divisez; et ainsi le
dit David, qui dit: Nostre seigneur me gouverne et je
n' ay deffaulte de rien; et ou Fait des appostres est il dit de
la multitude des creans: C' estoit un cuer et une ame.
Et pour ce doivent avoir grant honte et grant confusion
ceulx qui s' enorgueillissent de leur parentage et se
vantent de leur lignage de char et despitent les autres; et
puis que nous sommes fréres germains, l' un n' a loy de
despiter l' autre, ne vituperer. Pour ce dit saint Augustin
que touz hommes sont a amer egalment, car nous
sommes touz filz de Dieu, et ainsi le dit le sauveur Jhesu
Crist, Mathei XXIIII^o: Patrem nolite, etc. : Ne dites
que vous avez point de pére sur terre, non; car un est
qui est vostre pére, lequel est es cieulx. Et Malachie le
prophéte dit: Pour quoy despit un chascun de vous
son frére, et n' est il q' un pére de vous touz? Donques
il n' y a point de difference entre nous que nous ne
soions touz fréres au mains de la partie de l' ame. Car
elle n' est creée mais que de Dieu simplement. Et puis
que nous sommes fréres, nous nous devons entreaidier,
car l' en dit que deux ou trois fréres valent plus en une
bataille que cinc ou six estranges. Et pour Dieu avons
nous point de bataille a faire pour quoy nous doions
l' un l' autre aidier? Certes oil, et non pas pour une heure,
mais tant conme nous sommes en ceste mortel vie. Et
ainsi le tesmoingne Job qui dit: Vie d' omme sur terre
ce n' est mais que une chevalerie. A qui avons nous la
bataille? A qui? non pas au monde seulement, mais a
la char et a l' anemi. Pour quoy nous enorte saint Pol
et nous prie: Mes fréres, je vous prie, vestez vous de
l' armeure de Dieu, a ce que vous puissiez resister et
ester contre les agaiz de l' anemi; de l' armeure de Dieu,
c' est a dire que tu aies force en pacience et biauté de
continence a l' exemplaire de la glorieuse vierge mére
Marie, pour qui honneur et reverence nous sommes ci
assemblez, qui plus parfaictement entre les creatures
de ce monde ot ces deux vertuz en elle, c' est a dire
force en pacience et biauté de continence. En la passion
du benoit Jhesu elle ot la vesture de force, car la douleur
que Jhesu souffri de fait elle senti en soy par compassion,
et ainsi l' avoit prophetisié le juste Simeon,
quant il dist: Et tuam ipsius animam pertransibit gladius:
Marie, le glaive de la passion de cestui, c' est de
Jhesus, trespersera ton ame. Après elle ot biauté de
continence, qui est une biauté sainte desirée de Dieu,
si conme David dit: Cumcupiscet rex decorem tuum:
le roy desire veoir ta biauté. Le roy: quel roy? celui
qui donne le bougueran de continence, la pourpre de
pacience, le pers de penitence, le vert d' abstinence,
l' escarlate de martire, et le vair d' onnesté, c' est l' amoureux
Jhesus. Et pour ce se tu as ces deux choses, force
en pacience et biauté de continence, tu seras vestu
et vestue de double vesteure, car pour ta pacience, tu
aras vestement de pourpre, pour ta continence vesteure
de bougueran. Après tu aras pour ta pacience couronne
de roses, pour ta continence couronne de lis. Et ainsi
seras souffisanment acrue et aournée, pour entrer aux
noces de l' aignel Jhesu Crist, c' est a dire en la gloire
pardurable des cieulx, laquelle nous octroit ille qui est
benedictus in scecula sceculorum. Amen.
Cy conmence un miracle de saint Valentin, que
un empereur fist decoler devant sa table, et tantost
s' estrangla l' empereur d' un os qui lui traversa
la gorge, et dyables l' emportérent.
L' EMPEREUR.
Biaux seigneurs.
LES SERGENS.
Que vous plaist, chier sire?
L' EMPEREUR. Alez m' au sage Chaton dire
Sanz delay que je le demande,
Et que pour cause je li mande
Qu' il viengne ci.
PREMIER SERGENT. Il li sera dit tout ainsi,
Sire, com vous le conmandez,
Et qu' en haste le demandez.
Alons le querre.
DEUXIESME SERGENT. Alons, prenons par ci nostre erre:
C' est, ce m' est avis, le plus court.
Je le voy la en my sa court,
C' est bien a point.
PREMIER SERGENT. Sire, Mahon bon jour vous doint!
L' empereur vous envoie querre:
Si que venez a li bonne erre,
Puis qu' il vous mande.
CHATON. Et g' iray de voulenté grande,
Biaux seigneurs, a son mandement;
Je suis tout prest: ça, alons ment.
Sire, en honneur noz diex vous tiengnent
Et vostre vie en bien maintiengnent
Par leur plaisir.
L' EMPEREUR. Soit ainsi con je le desir.
Maistre Chaton, vezci pour quoy
Mandé vous ay parler a moy:
C' est m' entente que je vous baille
Mon filz, pour apprendre sanz faille.
Dès ores mais, a dire voir,
Est assez grant pour concevoir
Ce de quoy l' endoctrinerés:
Pour ce dès ci l' en enmenrez,
Car je vueil que sache de lettre:
Si vous pri qu' en li vueillez mettre
Cure et entente.
CHATON. Chier sire, mais qu' il s' i consente
Et qu' il y vueille peine mettre,
Je le feray tantost clerc estre.
Or me dites, mon enfant douls,
A estre clerc metterez vous
Bien diligence?
LE FIL A L' EMPEREUR. Oil, maistre, sanz negligence,
A mon pouoir.
CHEVALIER. Il respont sagement, pour voir,
Com tel enfant.
CHATON. Par vostre licence et conmant
Me donnez congié, treschier sire;
Car je doubt que trop d' aler lire
Face demeure.
L' EMPEREUR. Alez, maistre, donc en bonne heure;
Or soiez de mon filz songneux.
Aler le convoier vous deux
Appertement.
DEUXIESME SERGENT. Sire, nous ferons bonnement
Vostre plaisir.
LE FIL CHATON. Las! que je me dueil de jesir!
Las! de quelle heure fu je nez?
Las! trop longuement destinez
Suis a porter ceste langueur,
Ce meschief et ceste douleur
Qui si me menjue et desront!
Las! il m' est avis c' on me ront
Et c' om me destranche les nerfs.
Onques mais homme si divers
Mal ne porta conme je port.
En moy n' a joie ne deport.
A! pére, ne scé que je die:
Trop sueffre et port grief maladie
Par tout le corps.
CHATON. Biau filz, doulx et misericors
Te soient noz diex et propices,
Si que de cest grief mal garisses
Par leur bonté et leur puissance,
Et briefment, car au cuer grevance
Me fait plus que je ne puis dire;
Et ce que trouver ne puis mire
Qui y sache mettre conseil,
C' est ce dont je plus me merveil
Et de quoy suis plus esbahiz;
S' ai je fait querre en maint pais
Conseil pour toy.
PREMIER ESCOLIER. Maistre, plaise vous oir moy.
Pour vostre filz, qui est mon maistre,
En qui nul ne scet conseil mettre,
Dont, par noz diex, c' est grant damage,
Vous vueil descouvrir mon courage.
En Nervie, dont je sui nez,
A un homme, ceci tenez
Pour verité et pour certain,
Qui est de si grant sainté plain
Et si juste sanz touz pechiez
Qu' il n' est grief mal dont entechiez
Soit homme ou femme, si le voit,
Que tout gari ne l' en renvoit;
Et ç' a il fait a trop de gent,
Sanz prendre salaire n' argent.
Si faites, sire, vostre filz
A lui mener, et je sui fis,
Quant le saint homme le verra,
Tout gari l' en renvoiera
Et assez brief.
CHATON. Josias, son mal est si grief
Qu' il ne le pourroit endurer.
Penses tu qu' il doie durer
Encore en vie?
PREMIER ESCOLIER. Maistre, de ce ne doubtez mie;
Je scé bien qu' il vit voirement,
Se puis deux jours tant seulement
N' est trespassez.
DEUXIESME ESCOLIER. Maistre, riches estes assez;
Je vous diray que je feroie:
Un joiau li envoieroie
Riche et bel en li suppliant,
Qu' il daignast tant, vous suppliant,
Qu' il lui pleust a ci venir.
S' il tent au joyau retenir,
Il venra ci, je n' en doubt point,
Ou escripra de point en point
Conment pour santé recouvrer
Fauldra sur vostre filz ouvrer;
N' en doubtez, maistre.
TIERS ESCOLIER. Dorech a dit ce qui peut estre
Et doit par raison avenir:
Ou vous le verrez ci venir,
Ou le don ne recevra pas.
Envoiez y isnel le pas:
Ce sera sens.
CHATON. Seigneurs, a vostre dit m' assens.
Querir me fault un homme sage
Qui sache faire ce message
Et biau parler.
BUZI, quart escolier. Maistre, je m' i offre a aler
Voulentiers et améement,
Se ne pouez miex vraiement;
Je vous dy voir.
QUINT ESCOLIER. Maistre, je vous fas assavoir
Que, s' il vous plaist, de bon courage
Je feray pour vous ce voiage
Tresvoulentiers.
CHATON. Vostre merci, mes escoliers,
Quant a ce pour moy vous offrez;
Ore un petit ci vous souffrez,
Et je revien a vous en l' eure,
Sanz goute faire de demeure.
Mes bons amis, ça, vez me cy!
Tenez ce sac de florins cy
Et ce joiau, qu' est bel et gent,
Et si vous pri que diligent
Soiez vous deux d' aler le querre
Et de li doulcement requerre
Qu' il lui plaise a ce labourer
Que mon filz viengne ci curer;
Et que, s' il veult en ce pais
Venir, ne soit point esbahis:
Il ara robes et avoir
Assez; et pour li esmouvoir,
Tout ceci li presenterez
Si tost conme a lui parlerez,
Et de par moy.
QUART ESCOLIER. Maistre, je vous jur par la loy
Que je tien, et par touz noz diex,
J' en feray mon pouoir au miex
Que je pourray.
QUINT ESCOLIER. Et je vraiement si feray;
Mais puis que ferons ce message,
Josias, or nous faites sage
Conment a ce preudomme nom
A qui portés si grant renom
Et si grant los.
PREMIER ESCOLIER. Valentin, seigneurs. Je vous os
Bien dire que, quant vous venrez
Au pais, plus y trouverrez
Que je n' en di.
QUART ESCOLIER. Alons men. Ains qu' il soit jeudi
Pensé je si a exploictier
Que de lui saray, sanz doubter,
Qu' il voulra faire.
QUINT ESCOLIER. Buzi, chier compains debonnaire,
Ce chemin fas de bon voloir;
Mahon doint qu' il puisse valoir
A celui pour qui est empris!
C' est pitié quant il est espris
De tel malage.
QUART ESCOLIER. Voire, a ce qu' il est jonne et sage,
Et parfont clerc; ainsi l' entens.
Ore, ore! nous venrons par temps
En Nervie, si enquerrons
Ou Valentin trouver pourrons
Que venons querre.
QUINT ESCOLIER. Nous sommes entré en la terre:
De savoir nous fault esprouver
Quelle part le pourrons trouver.
C' est tout en somme.
QUART ESCOLIER. Paix! vezci venir un preudomme,
Ne scé s' il est de ceste terre;
Demander l' en vueil et enquerre.
Sire, quel part demeure un homme
En ceste terre ci, c' on nomme
Valentin? en savez vous rien?
Dites le nous, si ferez bien,
Se le savez.
LE NERVIEN. Ne scé qu' a li a faire avez,
Biaux seigneurs; mais c' est un saint homme:
Ne se prise pas une pomme,
Ains est humble, doulz et piteux,
Maint cuer pervers et despiteux
Fait et a fait doulx devenir;
Ne peut malade a li venir
Qu' il ne garisse tout a net,
Quelque maladie qu' il ait,
Sanz herbes mettre ne racines;
Tant fait de belles medicines
Qu' il est le saint homme clamez,
Et de toutes gens est amez
Pour les biens qu' il enseigne et moustre.
Veez vous celle loge la oultre?
La de lui nouvelles orrez;
La nuit yla le trouverrez,
N' en doubtez pas.
QUINT ESCOLIER. Nous irons donc. Vezci le pas.
Biau sire, et la vostre merci:
De bonne heure vous avons ci
Trouvé si prest.
QUART ESCOLIER. Alons men. Egar! avis m' est
Qu' a son huis le voi la estant,
Ou c' est un autre qui atant
A li parler.
QUINT ESCOLIER. Il nous fault esploitier d' aler
Jusques a tant que la soions.
Sire, a vous droit nous avoions;
Enseigniez nous, s' il vous agrée,
Un homme de ceste contrée
Que par nom Valentin on nomme.
De la cité sommes de Romme,
Qui venons a li en message.
Faites nous ent, s' il vous plaist, sage
Par fine amour.
VALENTIN. Biaux seigneurs, Dieu vous croisse honnour!
Ne scé que li voulez requerre;
Mais tant vous di qu' en ceste terre
Ne sçai j' omme nul qui le nom
De Valentin ait se moy non,
En bonne foy.
QUINT ESCOLIER. Sire, nous vous dirons pour quoy
Nous sommes a vous envoiez,
Puis qu' a vous sommes avoiez:
Le sage que Chaton on nomme,
La fleur de science de Romme,
De ce joiau que vous present
Et de cest or vous fait present,
Et vous supplie en amistié
Qu' aiez d' un fil qu' il a pitié,
Qui languist, dont c' est grans damages,
Car il est a merveilles sages:
Par maladie est touz contraiz,
Les nerfs a come touz retraiz;
Et il a de vous oy dire
Les grans cures qu' avez fait, sire,
Et que faites de jour en jour,
Si que plaise vous sanz sejour
Venir li son enfant garir;
Et il le vous voulra merir
Et guerredonner tellement
Que serés esbahiz conment,
Tant vous donrra.
VALENTIN. Seigneurs, avis me convendra
Avoir dessus ceste besongne,
Avant que je plus vous respongne;
Mais je vous diray que ferez:
Par celle ville esbatre irez,
Puis que ci m' estes venu querre;
Si verrez l' estat de la terre.
De vostre present n' ay je cure:
Ce n' est a moy que paine dure
Du regarder.
QUINT ESCOLIER. Mais il le vous plaira garder,
Sire, pour l' amour du preudome
Qui le vous envoie de Romme
Pour vostre esbat.
VALENTIN. Or ne m' en faites plus desbat;
Certes, ja ne me demourra,
Li preudomme si le rara;
Mais vous irez, si com j' ay dit,
Esbatre en la ville un petit;
Endemantiers m' aviseray
S' avecques vous ou non iray.
Seigneurs, alez.
QUART ESCOLIER. Bien, sire, puis que le voulez,
Sa, alons ment.
VALENTIN. Pére des cieulx omnipotent,
Qui de nient le monde creas,
Et homme de fait recreas
Par la mort du benoit Jhesu,
J' ay par ta bonté, sire, eu
Grace de divers maux garir,
Et pour ce m' envoie querir
De Romme le sage Chaton;
Si depri, sire, ton saint nom
De tant de sens com puis avoir,
Que tu me faces assavoir
Si m' est bon d' aler y, vraiz Diex,
Et se le peuple en vaulra miex,
Et se point en croistra la foy
Crestienne. Sire, entens moi;
Tu voiz bien ma devocion,
Or respons a m' entencion:
Que veulx que face?
DIEU. Sus, mére, sus! sanz plus d' espace,
A terre jus vous devalez
Et a Valentin en alez;
De par moy li dites en somme
Que sanz delay s' en voit a Romme.
La par sa predicacion
A voie de salvacion
Plusieurs du pais attraira,
Et de servir les retraira
Aux faulx ydoles.
NOSTRE DAME. Filz, j' ay bien toutes vos paroles
Retenues de point en point;
Bien ly diray, n' en doubtez point
Seigneurs, ci plus ne vous tenez:
Avecques moy vous en venez
Chantant touz deux.
PREMIER ANGE. Doulce mére au roy glorieux,
Vostre conmandement ferons,
Et devant vous chantant irons
Joieusement.
DEUXIESME ANGE. Disons ce rondé liement,
Gabriel, au partir de ci.
RONDEL. Dame, par qui grace et merci
Acquiérent li cuer repentant,
Qui vraiement sont lamentant
Des deffaultes qu' il ont fait ci,
Puis qu' a vous en sont dementant,
Dame, par qui grace et merci
Acquiérent li cuer repentant,
Nous savons bien qu' il est ainsi,
Ne nulz n' en doit estre doubtant;
Car vous pouez troplus que tant,
Dame, par qui grace et merci
Acquiérent li cuer repentant
Qui vraiement sont lamentant.
NOSTRE DAME. Valentin, sanz estre doubtant,
Va t' en a Romme la cité;
Car je te di pour verité
Que maint lairont la loy paienne
Et prendront la foy crestienne
Par ce que tu leur prescheras,
Et maint convertir en verras
A Dieu qui ci endroit m' envoie,
Si que sanz delay mect t' a voie;
Diex le te mande. Je m' en vois.
Chantez, seigneurs, a haulte voiz
De ci partans.
GABRIEL. Dame, nous ferons sanz contens
Ce qui vous plaira, sanz nul si.
RONDEL. Nous sçavons bien qu' il est ainsi,
Ne nulz n' en doibt estre doubtant;
Car vous poez trop plus que tant,
Dame, par qui grace et merci,
Acquiérent li cuer repentant.
QUINT ESCOLIER. Je ne scé se pour mal content
Se tenra de nous Valentin.
Compains, je vous pri de cuer fin,
Alons savoir sa voulenté;
Je doubt que n' avons demouré
Trop longuement.
QUART ESCOLIER. Ralons vers li donques briefment,
Sanz plus de plait.
VALENTIN. Pére des cieulx, puis qu' il vous plait
Que j' emprengne cestui voiage,
Je le feray de lié courage,
Et m' i repute estre tenuz.
Les messagiers a moi venuz
Je vois attendre.
QUINT ESCOLIER. Sire, plaise vous a nous rendre
Response lequel vous ferez:
Ou s' a Romme avec nous venrez,
Ou se sanz vous nous en irons,
Et a nostre ami porterons
Chose qui vaille.
VALENTIN. Seigneurs, j' iray, conment qu' il aille;
N' en doubtez point.
QUART ESCOLIER. Or seroit donc de mouvoir point,
S' il vous aggrée.
VALENTIN. Oil, sanz plus de demourée
Alons nous ent touz trois ensemble.
C' est bien a faire, ce me semble
Selon mon sens.
QUINT ESCOLIER. C' est le miex, et je m' i assens
De ma partie.
QUART ESCOLIER. Puis qu' ainsi la chose est bastie,
Je vous diray que je feray:
D' aler devant m' avanceray
Pour savoir l' estat de noz gens,
Et pour moustrer com diligens
En ce fait sommes.
VALENTIN. Je l' acors. Entre nous deux hommes
Vous suiverons tout bellement
Et irons a nostre aisement.
Alez, amis.
QUART ESCOLIER. J' en voys, puis qu' a ce suis conmis;
Et si vueil mon pas avancier.
Pour vostre cuer, maistre, esleescier
Vien je devant.
CHATON. Bien puisses tu venir. Avant!
Quelles nouvelles?
QUART ESCOLIER. Quelles, maistre? bonnes et belles:
Le preudomme Valentin vient,
A qui honneur faire convient,
Qu' il le vault bien.
CHATON. Se Mahon t' aist, a combien
Peut il près estre?
QUART ESCOLIER. A mains d' une liue, chier maistre;
N' en doubtez pas.
CHATON. Encontre lui m' en vois le pas,
Je ne m' en vueil plus espargnier.
Seigneurs, venez me compaignier,
Je vous em pri.
PREMIER ESCOLIER. Maistre, je feray sanz detri
Vostre requeste.
DEUXIESME ESCOLIER. Je me tenroie bien pour beste,
Se n' i aloie.
TIERS ESCOLIER. Par Mahon, et je si feroie.
Avant, avant!
QUART ESCOLIER. S' il vous plaist, j' irai tout devant,
Maistre; et si tost que le verray,
Sachiez je le vous mousterray
A veue d' oeil.
CHATON. Bien diz: va devant, je le vueil,
Et le me moustre.
QUART ESCOLIER. Voulentiers. Veez vous la oultre
Mon compaignon qui ça s' en vient?
Cel homme qu' il par la main tient,
C' est il, sanz doubte.
CHATON. Ma pensée ennuit sara toute.
Chier sire, honneur et longue vie
Et bonne aussi sanz male envie
Vous soit donnée.
VALENTIN. Et a vous bonne destinée,
Sire; et, s' il vous plaist, m' enortez
Qui estes vous, qui me portez
Tel reverence.
CHATON. Ja ne vous en feray scilence,
Puis que le m' avez demandé:
Chaton sui qui vous ay mandé;
Et puis qu' estes pour moy venuz,
A vous honnorer sui tenuz,
Et si est droiture et raison.
Alons men, alons en maison:
La bonne chiére vous feray,
La ma voulenté vous diray
Toute enterine.
VALENTIN. Et g' iray de voulenté fine
Pour entendre vostre propos
Et pour prendre un po de repos,
Car de loing vien.
CHATON. Sire, puis que ceens vous tien
Et qu' estes hors de vostre terre,
Vezci que je vous vueil requerre:
Qu' il vous plaise prendre et avoir
La moitié de tout mon avoir,
Tant en argent come en joiaux,
En rentes, en draps, en chevaux;
Je les vous offre bonnement,
Et qu' il vous plaise seulement
Mon enfant guerir a delivre
Du mal qui tant douleur li livre
Ja a long temps.
VALENTIN. Chaton, s' il te plaît, or entens:
Tes biens temporieux que tu m' offres,
Qu' en tes huches as et en coffres,
Ne quier je point, c' est chose voire,
Pour ce qu' il sont bien transitoire,
Qui ne durent terme n' espace
Ne que la fleur du champ qui passe;
Mais combien qu' aiez nom de sage,
Je verray se de bon courage
Veulz et de vraie entencion
De ton filz la salvacion.
Par mi ce que je te diray,
Une chose te requerray,
Qui est assez ligiére et bréve,
Et qui a faire point ne gréve:
C' est mon entente.
CHATON. Sire, demandez sanz attente,
Je vous en pri.
VALENTIN. Je te requier que sanz detri
Ton filz et toy premiérement,
Et toute ta gent ensement,
Ou benoit fil de Dieu creez
Lequel nous a faiz et creez,
Qui appellez est Jhesu Crist;
Celui de qui il est escript
Qu' il nasqui d' une vierge pure,
Homme et Dieu en nostre nature,
Qui pour nostre redempcion
En croiz souffri grief passion
(Grief, di je, quar il y fu mors),
Et qui souffri mettre son corps
Ou sepulcre ou il habita
Trois jours; puis se resuscita,
N' en doubte nulz.
CHATON. Sire, qui est cestui Jhesus
De qui me preschiez telement?
Je vous pri, moustrez moi conment
Ce que dites soit chose voire,
Et raison par quoy doie croire
Qu' il soit ainsi.
VALENTIN. La raison, Chaton, vez la ci,
Combien que tu savoir la doies
Conme clerc qui tant sage soies.
Ne liz tu en la prophecie
Qu' a touz a escript Ysaie:
Ecce virgo, et cetera?
"Vezci qu' une vierge sera
Qui enfantera sanz deffault,
Vierge, le filz Dieu le treshault,
Lequel Jhesus nommez sera;
Car il son peuple sauvera
De leurs pechiez."
CHATON. Sire, ce que vous me preschiez
Ay j' assez bien veu ou livre
D' Isaie tout a delivre;
Mais conment pourra c' estre voir
C' une vierge puist concepvoir
Et vierge pucelle enfanter?
C' est un point qui fait a doubter
Trop malement.
VALENTIN. Non fait, et te diray conment:
Tu doiz savoir qu' il est un Diex
En trois personnes es haulx cielx,
Qui n' est qu' une divinité,
Une essence, une majesté;
Et toutesvoies trois personnes
Sont en ce Dieu, ainsi le sonnes,
Par qui tout le monde fu fait.
Or revenons a nostre fait.
Quant le premier homme pecha,
En tel deu nous trebucha
Que pur homme de le paier
Ne de Dieu le pére appaier
Ne fu souffisant, si avint
Que Dieu le filz homme devint;
Mais je dis qu' amours seulement
Fu de ce fait conmencement,
Et sains esperiz consumma
Qui du plus pur sang assomma
Une partie ou corps de celle
Vierge qui mére est et pucelle,
Ou fu de nostre humanité
Couverte la divinité.
Si que Dieu fu homs et homs Dieux,
Afin que tu entendes miex
Ce qu' en Ysaie as leu,
Lequel acquitta le deu
Et amenda tout le torfait
Que li premier homme ot forfait;
Et toutesvoies par ce filz
Fu fait, de ce doiz estre fiz,
Le monde et tout quanqu' il contient;
Et que noz corps venront a nient,
Et par ce filz resucitez
Seront, et puis touz excitez
De venir a son jugement,
Qu' a touz fera generalment
Au derrain jour.
CHATON. Vous dites en vostre majour,
Afin que je l' entende miex,
Sire, que ce Jhesus est Diex,
Si com me semble?
VALENTIN. Voir est, Diex est et homme ensemble;
Et si est espoux, filz et pére.
A qui? a sa fille et sa mére:
C' est a la vierge dont nasqui.
Conme filz, tant conme il vesqui
Cy aval, li obeissoit;
Conme pére, la norrissoit;
Conme espoux, de foy la vesti,
Quant elle a croire s' assenti
Ce qui ne pouoit par nature
Avenir: c' est que creature
Se daigna le createur faire;
Mais ce fist il pour nous attraire
Plus a s' amour.
CHATON. Sire, plaise vous sanz demour
Qu' a vostre requeste et priére
Ce Jhesu Crist santé entiére
Par sa vertu doint a mon filz;
Et vraiement, soiez en fis,
Nous deus serons crestiennez
Si tost conme il sera sanez;
Et le croiray mon sauveur estre,
Lequel voult d' une mére naistre
Et souffrir en croiz passion
Pour la nostre redempcion,
Et qu' au tiers jour resuscita,
Et après es sains cieulx monta,
Et qu' il jugera vis et mors:
A touz ces poins croire m' acors,
S' il a santé.
VALENTIN. Ha! sire Dieu plain de bonté,
De cuer humblement te graci
Quant prendre te plaist ces gens ci
Au roiz de ta misericorde;
Car je voy que leur cuer s' accorde
A toy croire, amer et servir
Pour ta gloire en fin desservir,
Que leur vueilles, sire, ottroier.
Or tost, Chaton, sanz detrier
Alez vous la mettre a genoulz,
Et vous aussi, biaux seigneurs touz,
Et prier Jhesus qu' il nous face
Liez de cest enfant par sa grace;
Et j' avec li ci demourray,
Et aussi le deprieray
Devotement.
CHATON. Sire, vostre conmandement
Vois acomplir.
DEUXIESME ESCOLIER. Sy ferons nous de grant desir.
Seigneurs, a genoulz nous mettons
Cy et noz pensées jettons
A Jhesu filz du roy celestre,
Qu' il vueille le filz nostre maistre
Santé donner.
VALENTIN. Doulx Jhesus, qui touz jours user
Seulz a nous en toute accion
D' amour et de dileccion,
Si com tu le paralitique
Par vertu poissant, autentique,
De ton seul vouloir garisis,
Et de flun de sanc retrainsis,
Ce dit saint Marc, aussi la veuve,
Par ta grace, ainz que de ci meuve,
Vueillez cest anfant ci garir
Et de touz poins son mal tarir
Dont il est si pris et attains.
Biau filz, tes mains un po m' atains:
Tenir les vueil.
LE FIL CHATON. Certes, tant sui feible et me dueil
Que je ne puis, se ne m' aidiez.
Mourir voulroie, ne cuidiez
Point du contraire.
VALENTIN. Belement les vueil donc hors traire.
Sa! Diex les saint et beneie,
Et la doulce vierge Marie
Sa grace y mette.
LE FIL CHATON. Pére, vezci un homme honneste,
Juste, saint, du vrai Dieu sergent.
Venez veoir, ma bonne gent,
Conment le devons avoir chier:
Ne m' a fait, sanz plus, que touchier
De sa destre main, et vezci
Que sain sui, la seue mercy,
Conme une pomme.
CHATON. Disciple du vray Dieu, saint homme,
Conment vous pourray je merir
Ce qu' il vous a pleu garir
Mon fil, que ci voi sain estant?
Je ne sçay; car s' avoie autant
Dis foiz com pourroie finer,
Que tout vous voulsisse donner,
N' aroie je pas satisfait
Assez a ce qu' avez ci fait;
Ce n' est pas doubte.
VALENTIN. Chaton, s' il te plaist, or escoute:
Ce que j' ay a ton filz valu,
Ce n' est mie de ma vertu,
Ains est de la Jhesu poissance.
Aiez en lui ferme creance:
Miex t' en sera.
CHATON. Je ne sçay q' un autre fera;
Mais tant conme je viveray,
Conme mon Dieu le serviray,
Et reni touz autres pour li;
Car je tieng et croi c' est celi
Qui a a humaine nature
Conjoint sa divinité pure,
Et souffert mort et passion
Pour l' umaine redempcion,
Qui nous venra en fin jugier
Et par feu touz les maux purgier
Et les quatre ellemens aussi;
Je le tien et le croy ainsi
Et le croiray.
LE FIL CHATON. De vostre oppinion seray
Et sui, pére, n' en doubtez, certes:
Moustré m' a par vertuz appertes
Qu' il est vraiz Dieux.
PREMIER ESCOLIER. Nous touz aussi; et pour le mieux
Renonçons a la loy paienne
Pour tenir la foy crestienne
Des ores mais.
VALENTIN. Or vous fault donc pour touz jours mais
Avoir ou cuer un propos: quel?
Qui soit en perseverent tel
Que pour dons, ne blandissemens,
Pour menaces, ne batemens,
Ne pour peine que l' en vous face,
Ceste foy de voz cuers n' efface,
Que Jhesus fil de Dieu le pére
Ne soit Diex, né de vierge mére,
Qui n' ot onques conmencement
Ne ja n' avra deffinement
En deité.
TIERS ESCOLIER. A croire ceste verité
Nous accordons nous touz ensemble;
Car soubz le ciel n' est, ce me semble,
Chose plus voire.
VALENTIN. Or ait chascun en son memoire
Qu' il le serve et aint d' amour fine,
Si que sa gloire qui ne fine
Puist desservir.
LE FIL CHATON. Touz autres dieux pour lui servir
Reni; car je voy sanz doubtance
Que ce sont de nulle puissance
Touz faulx ydoles.
CHATON. Seigneurs, aussi qu' en mes escoles
Je vous ay leu de logique,
D' elences, de dialetique
Et d' autre mondaine science,
En quoy j' ay mis grant diligence,
Sachiez de touz poinz la lairay:
Dès ores mais ne vous liray
Ne ne vous apprendré clergie
Se ce n' est de theologie
Et de ceste nouvelle loy;
Car je scé clerement et voy
Que toute autre science est vaine;
Mais ceste a congnoissance maine
Du premerain conmencement,
C' est Dieu de lassus, et conment
Il est tout bon sanz qualité,
Il a grandeur sanz quantité,
Conment sanz estre meu meut
Toutes choses ainsi qu' il veult
A son plaisir.
L' EMPEREUR. Seigneurs, j' ay de veoir desir
Mon filz, et m' annuie forment
Que je ne le voi plus souvent.
Puis que Chaton l' en enmena,
Par devers moy ne retourna.
Que veult ce dire?
CHEVALIER. Il n' en a pas le congié, sire,
Par aventure.
L' EMPEREUR. Alez vous deux, bonne aleure,
De son maistre congié prenez,
Et ci present le m' amenez:
Veoir le vueil.
DEUXIESME SERGENT. Sire, nous ferons vostre vueil
Incontinent.
PREMIER SERGENT. Alons le querre appertement:
En delay plus ne le metton.
Mahon vous gart, sire Chaton,
Et voz genz touz.
CHATON. Or ça, seigneurs, bien veignez vous.
De nouvel me direz vous rien?
Conment le fait mon seigneur? Bien
Fait, Dieu mercy?
DEUXIESME SERGENT. Oil; envoié nous a ci
Dire vous que li envoiez
Son filz et le nous otroiez:
Si le demande.
CHATON. Mais seroit vilenie grande
A moy se je li refusoie
Ne se je contraire disoie.
Tantost ira. Josias, sus,
Et vous, Dorech et Josephus:
Pensez de vous tost avoier
A cest enfant ci convoier,
Qui de son pére est demandez;
Et a lui me reconmandez
Treshumblement.
DEUXIESME ESCOLIER. Maistre, nous ferons bonnement
Vostre vouloir.
PREMIER SERGENT. Alons men sanz plus ci manoir;
Trop demourons.
TIERS ESCOLIER. Alons; tantost a li serons:
N' y a que deux pas a aler;
Mais garder nous fault de parler
Ja devant li.
PREMIER ESCOLIER. Si ferons nous n' i a celi,
Au mien cuidier.
DEUXIESME SERGENT. De tout ce dont avez mestier,
Sire, c' est de conseil loial,
Donner et de joie royal
Vous vueillent par leur courtoisie,
Et avec ce de longue vie,
Noz diex pourveoir.
L' EMPEREUR. Filz, j' avoie de vous veoir
Grant desir: bien soiez venuz.
Conment vous estes vous tenuz
De moy veoir si longuement?
Je m' en merveil moult. Et conment
Le faites vous?
LE FIL A L' EMPEREUR. Bien, treschier sire et pére doulx;
Vostre merci du demander.
Vien avant: je vueil amender
Le salut qu' a mon pére as fait;
Car il y a vice et meffait
En ce qu' as dit.
L' EMPEREUR. Biau filz, en quoy a il mesdit?
Trop bien l' a fait, ce m' est avis.
Je vueil savoir par ton devis
Sa mesprison.
LE FIL A L' EMPEREUR. Sire, il a dit en sa raison
"Noz diex"; et c' est une falourde,
Une mençonge et une bourde:
N' est qu' un Dieu, non.
L' EMPEREUR. Non dya! Et conment a il nom
Biau filz, ce Dieu dont me parlez?
Dites le moy, se vous voulez,
Ysnel le pas.
LE FIL A L' EMPEREUR. Mon chier seigneur, n' avez vous pas
Oy parler du saint juste homme
Qui en ceste cité de Rome
Est venu puis un po de temps,
Homme paisible et sanz contens,
Disciple du vray Dieu sanz fin,
Qui est appellez Valentin?
Conment le filz Chaton le sage
A gari de son grief malage
En la puissance, en la vertu
De nostre sire Crist Jhesu,
Qui es cieulx a pére sanz mére,
Et sanz pére ot en terre mére?
Par lui tenons nous ceste foy,
Ceste creance et ceste loy,
Qu' il n' est, a parler proprement,
Dieu que Jhesus tant seulement,
Filz Dieu le pére.
CHEVALIER. Ce n' est pas verité bien clére;
Car le pére au mains miex devroit
Estre Dieu que le filz, par droit,
S' il estoit ainsi qu' il eust
Cause en lui pour quoy il deust
Dieu estre dit.
LE FIL A L' EMPEREUR. Biaux seigneurs, a ce contredit
Respondez li tost sanz delay:
Vous estes clers, il n' est que lay
En ce cas ci.
PREMIER ESCOLIER. Sire, vous avez dit ainsi
Que li péres devroit trop miex
Que le filz estre appellez Diex,
Supposé qu' il deust Diex estre.
Pour cest argu confondre et mettre,
Se je puis, de touz poins a nient
Je respons, sire, qu' il convient
Qu' il ait esté premiérement
Un principe ou conmencement,
Par qui toutes choses creées
Sont et en leur estre ordenées;
Et aucuns sages anciens,
Arciens et logiciens,
Philosophes ça en avant
L' appellérent premier moment,
Acteur de toutes creatures;
Si font meismes voz escriptures,
Ainsi le dient.
LE FIL A L' EMPEREUR. Souffrez. C' est voirs, pas ne le nient;
Le philosophe ainsi le moustre;
Mais ycy vueil dire cause oultre
Pour quoy principe le nommérent,
Et premier moment l' appellérent:
Car le temps n' estoit pas venu
Qu' il se fust encore apparu
Ne conversé ça jus en terre;
Pour ce ne sceurent tant enquerre
Qu' il le congneussent a droit,
Conme nous faisons orendroit,
Qui l' appellons en deité
Une essance, une majesté.
En ceste unité que disons
Une trinité divisons:
Pére, sains esperiz et filz,
Et n' est q' un Dieu, soiez en fis,
Non, quant a la divine essence;
Mais es personnes difference
Mettons nous, c' est chose certaine;
Car le filz, sanz plus, char humaine
Prist pour nous donner gloire es cielx:
Pour quoy nous disons homme est Diex
Et Diex est homme.
L' EMPEREUR. Mon pouoir ne prise une pomme,
Seigneurs, par les diex que je croy,
Se ceulx qui tiennent ceste loy
Et la sement par la cité
Ne fois morir a grant vilté.
Emprisonnez ces trois icy,
Et après m' alez querre aussi
Ce Valentin.
PREMIER SERGENT. Sire, nous ferons de cuer fin
Tout ce que nous conmanderez.
Passez. Emprisonnez serez
Touz trois ensemble.
DEUXIESME SERGENT. Livrer les nous fault, ce me semble
A Vuidebource le jolier;
Si en serons hors de dangier.
Menons les y.
PREMIER SERGENT. C' est bien dit. Jolier, ça, vezci
Trois prisonniers que vous livrons:
Tenez, nous nous en delivrons;
Gardez les bien.
LE JOLIER. Avant! entrez ci. Se du mien
Menguent, ilz le paieront.
N' en doubtez, ne m' eschaperont
Mais de sepmaine.
DEUXIESME SERGENT. Or nous fault aler mettre en paine,
Biaux compains, et si bien prouver
Que Valentin puissons trouver
Ou que ce soit.
PREMIER SERGENT. Sueffre toi; s' il ne me deçoit,
Je le te mettray en tes mains:
C' est a quoi je pense le mains.
Alons men. Un po le cognois.
Egar! cel homme que tu voiz
ça venir le visage en terre,
C' est il: ne le nous faut plus querre;
Alons le prendre.
DEUXIESME SERGENT. Sa, maistre! il vous fault sanz attendre
Devant l' emperiére venir.
Or tost! sanz nous plus ci tenir,
Passez bonne erre.
VALENTIN. Dya! je ne sui murdrier ne lierre,
Seigneurs: menez me doulcement,
Sanz moy tenir si lourdement,
Je vous en pri.
PREMIER SERGENT. Or tost passez dont, sanz detri.
Chier sire, Valentin avons
Tant quis que le vous amenons.
Parlez a li.
L' EMPEREUR. Conment, maistre? estes vous celui
Qui le peuple avez enorté
De croire en un Dieu qu' a porté
Une vierge, si com vous dites?
Par mes diex! n' en serez pas quittes.
Ou ce qu' avez fait defferez,
Ou a mort vilaine serez
Livrez briefment.
VALENTIN. Emperiére, premiérement,
Tu qui loy dampnable soustiens,
S' a droit pensasses de qui tiens
La dignité ou tu es mis,
Tu te penasses d' estre amis
Plus diligenment que ne fais
A mon Dieu par qui tu fuz fais,
Qui est de toute creature
Createur et Dieu de nature,
Ce n' est pas doubte.
CHEVALIER. A po que mes doiz ne deboute
Si que les deus iex te crevasse,
Par Mahommet, en ceste place.
Doit ainsi parler un tel homme
Com toy a l' empereur de Romme?
En male estraine!
L' EMPEREUR. Souffrez. Va tantost, si m' amaine
Ces trois compaignons qu' en prison
As hui mis pour leur mesprison
Cy devant moy.
LE DEUXIESME SERGENT. Sire, par la foy que vous doy,
Voulentiers, sanz chiére rebource.
Or ça! je revien, Vuidebource.
Ces trois prisonniers attaingniez;
Il faudra qu' avec moy veigniez
Pour les mener jusqu' a la court,
Et que nous les tenions de court
Et près de nous.
LE JOLIER. Ne vous en doubtez, ami doulx.
Sa! entre vous trois issiez hors.
Ho! il les nous fault par les corps
Lier ensemble.
LE DEUXIESME SERGENT. C' est bien dit: aussi, ce me semble,
Plus asseur les enmenrons
Quant ainsi liez les tenrons
Conme tu diz.
LE JOLIER. Ainsi maine je court touz diz
Ceulx que je sçay qui ont meffait.
Avant! alons men. Tien, c' est fait:
Acouplez sont.
DEUXIESME SERGENT. C' est voir: d' eschaper pouoir n' ont.
Avant, merdaille; avant trotez,
Se de ce baston ci frotez
Ne voulez estre.
LE JOLIER. Vezci, mon chier seigneur et maistre,
Les prisonniers que demandez.
S' il vous plaist, or nous conmandez
C' on en fera.
L' EMPEREUR. Assez tost on le te dira.
Truant, pour ce qu' as convertiz
Ceulz ci et a toy pervertiz,
Devant toy decolez seront:
C' est le prouffit qu' il en aront.
Avant! copez leur tost les testes,
Puis lessiez aux sauvages bestes
Les corps mengier.
VALENTIN. Mes fréres et mi ami chier,
De la mort des corps ne vous chaille;
Soiez fors en ceste bataille,
Contre ce serpent combatez;
Car je vous di vous acquestez
Gloire qui touz jours durera
Et vie qui ja fin n' ara,
Et par ce brief et court martire
Verrez sanz fin Dieu nostre sire,
Si conme il est.
TIERS ESCOLIER. Homme de Dieu, nous sommes prest
De faire quanque tu nous diz;
Or prie Dieu qu' en paradiz
Noz ames mette.
VALENTIN. Vostre voulenté sera faite
De bon cuer: j' en vueil Dieu prier
Ci endroit, sanz plus detrier,
Mes chiers amis.
LE JOLIER. Tu seras premier a fin mis.
Passe avant, agenoille toy.
C' est fait; il n' i a mais de quoy
Jamais mot die.
VALENTIN. Doulx Jhesus, en la conpagnie
De tes sains anges ces personnes
Reçoy, et ta gloire leur donnes;
Si que ta mére et toy, filz, voient
Ainsi conme par foy le croient
ça jus en terre.
DIEU. Mére, je vueil qu' aliez bonne erre
A mes amis que voi la estre,
Qu' on veult a mort pour mon nom mettre.
Anges, vous deus la conduisiez,
Et en alant la deduisiez
D' un biau chant faire.
PREMIER ANGE. Vostre vouloir si nous doit plaire,
Sire, par droit.
DEUXIESME ANGE. Nous en irons par la endroit
Quand jus serons.
LE JOLIER. Sa, seigneurs, sa! de chapperons
N' arez jamais, certes, mestier,
Mais qu' aie ouvré de mon mestier
Sur vous icy.
PREMIER ANGE. Dites avec moy ce chant ci,
Michiel; ja repris n' en serez.
RONDEL. Venez vous en, beneurez,
Lassus ou royaume de Dieu;
En gloire sanz fin mis serez;
Venez vous en, beneurez,
Et touz jours sanz mort viverez:
Trop y a delictable lieu.
Venez vous en, beneurez,
Lassus ou royaume de Dieu.
LE JOLIER. Or sçay je bien ne prescherez
Ja mais nul lieu nouvelle loy.
Chascuns est endormiz tout coy,
Ce m' est avis.
NOSTRE DAME. Or tost, sanz plus faire devis,
Mes amis, ces ames prenez
Et ici plus ne vous tenez;
Mais conmans que chacun s' avoie
A nous en raler par la voie
Que venuz sommes.
DEUXIESME ANGE. Dame des cieulx, dame des hommes,
Fontaine de misericorde,
A vo vouloir faire s' accorde
Chascun de nous.
PREMIER ANGE. C' est voir. Pardisons, ami doulx,
Nostre chant tant qu' il soit finez.
RONDEL. Et touz jours sanz mort viverez:
Trop y a delictable lieu.
Venez vous ent, beneurez,
Lassus ou royaume de Dieu.
L' EMPEREUR. Seigneurs, escoutez: en quel lieu
Oy je de chant tel melodie?
Onques mais en jour de ma vie
Telle n' oy.
CHEVALIER. Le cuer m' a forment esjoy;
Mais dont ce vient moult me merveil,
Car gens ne puis veoir a l' ueil
Qui si doulcement chanter doient.
Il semble que près de nous soient,
A leur chanter.
VALENTIN. Empereur, saches sanz doubter,
Ce chant que tu a tes oreilles
As oy, c' est (ne t' en merveilles)
La doulce mére au roy Jhesu
Et ces anges qui sont venu
Querre les ames de ces corps
Qui par toy gisent ileuc mors,
Qu' avec Jhesu Crist en emportent;
Et en les portant les deportent,
Conme oy as.
L' EMPEREUR. Conment? ne te tairas tu pas
De ton Jhesu Crist devant moy?
Vezci que j' ordene de toy:
Ou tu noz diex aoureras,
Ou par divers tourmens mourras,
Je te promet.
VALENTIN. En Jhesu Crist du tout me met,
Si que ne me peuz tourmenter,
De ceci te vueil j' enorter;
Car pour paine que me saroies
Faire, surmonter ne pourroies
La grant joie que j' en aray;
Mais une chose te diray:
Se tes faulx ydoles et vains,
Qui touz sont de dyables plains,
Relenquisseiez et lessassez,
Et Dieu le vray seul aourassez,
Tu, qui es triste et en destresce,
Trouvasses joie sanz tristesce,
Repos sanz labour permanable,
Et regne sanz fin perdurable.
Je te di voir.
L' EMPEREUR. A ton dit peut on bien savoir
Que tu es plain de l' anemi.
Or tost, seigneurs; tost, la en my
Celle place le despoulliez.
Quant tout nu sera, le vueilliez
Lier estant a celle estache;
Et puis le batez tant que tache
N' ait sur son corps blanche ne vert,
Mais que tout soit de sanc couvert
Pour son chasti.
PREMIER SERGENT. Si com de dit l' avez basti,
Mon chier seigneur, vous sera fait.
Sa, maistre! despoullier de fait
Yci vous fault. <Cy met on la table devant l' emperiére pour mengier>.
VALENTIN. Voulentiers, seigneurs; sanz deffault
Sui j' a vostre vueil? que vous semble?
Ne doubtez pas que de vous m' emble:
N' est pas m' entente.
LE JOLIER. Lier le vous vueil, sanz attente,
En la maniére qu' ay apprise.
Est il lié de bonne guise?
Dites le moy.
LE DEUXIESME SERGENT. Oil. Or ça, vezci de quoy
Il sera batuz, conme fol,
Dès les rains aval jusqu' au col.
Avant! chascun la seue prengne,
Et de bien ferir ne s' espargne
Sur ce dur dos.
PREMIER SERGENT. Se sa char estoit toute d' os,
S' en feray je saillir le sanc.
Je le vueil batre sur le flanc
Premiérement.
DEUXIESME SERGENT. Et je sur cestui, tellement
Qu' il y parra.
LE JOLIER. Je seray le tiers, qui ferra
Au long du corps.
VALENTIN. Vueillez entendre a mes recors,
Entre vous qui me regardez:
Pour Dieu vous pri, ne vous tardez
De croire en celui qui me garde,
Qui tout voit et partout regarde;
Qui le monde de nient crea,
Et par sa mort nous recrea;
Qui daigna d' une vierge naistre
Et a nostre semblant se mettre
Pour rachater l' umain lignage
Que Sathan tenoit en servage;
Qui de nous ot tant cure et soing
Combien qu' il n' ait de nous besoing,
Que pour nous en croiz mort pendi,
Dont vie par ce nous rendi.
Congnoissiez le donc, congnoissiez,
Voz fauz ydoles delaissiez
Qui ne sont pas diex, mais sont dyables;
Ne les aiés pas agreables,
Servez le vray Dieu seulement
Pour qui je sueffre ce tourment,
Qui ne m' est pas tourment, mais baing;
Car avis m' est que de doulz saing
M' oingnent ceulx qui ainsi m' atirent;
Et vous cuidiez qu' il me martirent,
Et ce n' est que purgacion
Et ma glorificacion
De corps et d' ame.
QUART ESCOLIER. Pére, benoite soit la dame
Qui a nourreture t' a trait!
Tu as tout ce peuple retrait
D' enfer et l' as a Dieu acquis
Par les paroles que tu dis,
Qui voires sont.
QUINT ESCOLIER. Pére, escoute: ces gens ne font
Mais que baptesme demander,
Pour eulx envers Dieu amender
De leurs meffaiz.
VALENTIN. Soient en ce vouloir parfaiz,
Il souffira a Dieu assez,
Tant q' un pou de temps soit passez,
C' on leur donrra.
PREMIER SERGENT. Par Mahon, mon seigneur sara
Maintenant ces nouvelles ci.
Sire, je vous vieng dire ainsi:
De nostre loy sont perverti
Bien .VIJm. qu' a converti
Valentin tant dis conme on l' a
Batu a celle estache la.
A brief, tout le peuple est creant
En son Dieu, je le vous creant
En bonne foy.
L' EMPEREUR. Va, fay l' amener devant moy
Yci en l' eure.
PREMIER SERGENT. Sire, se Mahon me sequeure,
Je vois. Ho, seigneurs! sanz plus batre,
Mener le nous fault sanz debatre
A l' emperiére.
DEUXIESME SERGENT. Si li menrons en la maniére
Qu' il est, mais que deslié soit:
Aussi plus est ci, plus deçoit
De gens sanz nombre.
LE JOLIER. Voire, et si nous tolt et encombre
De faire ailleurs nostre prouffit,
Et li mesmes se desconfit.
Deliez est, alons nous ent
Et l' en menons. Trop longuement
Sommes icy.
PREMIER SERGENT. Alons. Mon cher seigneur, vezci
Que demandez.
L' EMPEREUR. Ore, t' es tu point amendez?
Di me voir de bon cuer ouvert.
Au mains te voi je tout couvert
De sanc. Que ne t' a regardé
Ton Dieu, et qu' il t' eust gardé
De ce tourment, de ceste paine?
Je te di (n' est pas chose vaine),
Se je ne voy que tu laboures
A ce que tu mes diex aoures,
Je feray ci tes jours finer;
Car le chief te feray couper,
Je te di bien.
VALENTIN. Tes jours sont plus briez que li mien.
Je ne scé de quoy me menaces;
Je te di que tout au pis faces
Que tu pourras.
L' EMPEREUR. Par mes diex, en l' eure mourras.
Vuidebource, sanz plus ci estre,
Vaz le moy la hors a mort mettre;
Et se tu voiz qu' il y surviengne
Nul qui pour crestien se tiengne,
Met tout a fin.
LE JOLIER. Sire, par mon dieu Appolin,
Voulentiers; n' en ara ja mains.
Sa, maistre, sa! puis qu' en mes mains
Estes, guères ne durerez.
Passez: assez tost finerez
Honteusement.
QUART ESCOLIER. Pére, avant! viguereusement
Labourez a ce derrenier.
Conme bon, loyal chevalier,
Par la mort que tu souffreras
Couronne de vie acquerras
Sanz finement.
QUINT ESCOLIER. Pére, qui cause et mouvement
Es que nous sommes crestiens
Et tenons la loy que tu tiens,
Moustre cy ta perfeccion.
Sachiez c' est nostre entencion
Qu' en quelque lieu que tu iras
Nous deux a compagnons aras
Et a amis.
L' EMPEREUR. Un os s' est avalé et mis
En ma gorge, ci en cest angle.
Seigneurs, certainement j' estrangle
Et suis a mort.
PREMIER DYABLE. Avant tost, nous deux par accort,
Sathan, prenons cest emperiére.
Il a tant fait ça en arriére
Qu' il est nostre par droit acquis.
J' ay assez de ses faiz enquis;
Il fault qu' en enfer le livrons,
Si que tost nous en delivrons:
Emportons l' en.
DEUXIESME DYABLE. Il ne revendra de cest an
Ne jamais, tant a il empris,
Puis que saisi l' avons et pris,
Et que l' emport.
LE FIL A L' EMPEREUR. Seigneurs, plain sui de desconfort;
Car je voi yci que mon pére
A pris fin honteuse et amére;
Car en mengant s' est estranglez,
Et si sommes si avuglez
Que nul de nous, ce me recors,
Ne scet qu' est devenu son corps;
C' est grant merveille.
CHEVALIER. Mahon pitié avoir en vueille!
Car de lui sui moult esbahis.
Je croy que sommes envaiz
D' enchanterie.
LE FIL A L'EMPEREUR. Souffrez vous, a ce ne tient mie.
Ci endroit plus ne demourray:
Ailleurs querre manoir iray
Ou il ara plus seur estre.
Pensez de vous a voie mettre
Touz trois. Or tost, convoiez moy:
Au chastel c' on dit Bellevoy
Vueil droit aler.
DEUXIESME SERGENT. Alons, sire, sanz plus parler,
Puis qu' il vous haite.
LE JOLIER. Valentin, il fault que la teste
Te cope sanz plus de respit,
Se ton Dieu du tout en despit
N' as pour noz diex.
VALENTIN. Je te di que j' aime trop miex
Que la me copes sanz demeure;
Mais donnes moy un petit d' eure
(Je ne te vueil plus demander),
Que je puisse reconmander
M' ame a mon Dieu.
LE JOLIER. Delivre t' en ci en ce lieu
Tost et ysnel.
DIEU. Sus, Michiel, et toy, Gabriel
Alez vous ent la jus en terre
L' ame de mon bon ami querre,
C' on veult decoler pour m' amour.
Je vueil qu' en gloire son demour
Ait sanz fenir.
GABRIEL. Sire, sanz nous plus ci tenir,
Nous y alons.
LE JOLIER. D' ainsi conme es a genoillons
Ne quier que te liéves jamais,
Ne plus n' attenderay hui mais.
Tu as assez ton Dieu prié,
Et si m' as assez detrié.
Estens le col, besse la teste,
Et pleures, se veulx, ou faiz feste,
Tu ne m' en feras ja engaigne.
Tien: chevalier soies en gaigne;
De moy as eu la colée.
Je vueil en sauf mettre m' espée.
Mahon, las! ou me suis je mis?
Entour moy ne voy qu' enemis
Hideux qui, sanz moy deporter,
M' ont ja saisi pour emporter
En grief tourment.
DEUXIESME DYABLE. Nous te donrons assez briefment
Pour touz jours un novel hostel.
Sathan, compains, il n' y a el,
Ne m' en chaut s' il est clerc ou lay:
Emportons le tost sanz delay,
Avec son maistre.
PREMIER DYABLE. Ensemble les fera bon mettre;
Aussi sont il d' une convine.
Avant! avec moy t' achemine
Ysnellement.
QUINT ESCOLIER. Buzi, or veons nous conment
Dieu veult ce saint homme vengier.
Je lo, sanz plus yci songier,
Que nous deux l' emportons bonne erre,
Et si le ferons mettre en terre
Comme crestien.
QUART ESCOLIER. Certainement, il me plaist bien.
Or sus! ne m' en chaut qui nous voie,
Alons nous ent par ceste voie
Droit en maison.
DEUXIESME ANGE. Gabriel, sanz arrestoison,
Ceste sainte ame es cieulx portons,
Et en portant nous deportons
A chanter ce doulx chant cy:
Ordines angelici,
Cives apostolici
Et martires, lettate
Ab isto qui felici
Sorte nomen amici
Dei cepit; cantate.
Explicit.