Miracle d'une femme que Notre-Dame garda d'être brûlée

Cy conmence un miracle de Nostre Dame, conment
elle garda une femme d' estre arse.
GUILLAUME. Guibour, dire vous vueil m' entente:
Je m' en vois, sanz plus faire attente,
Aux champs visiter mes gaignages,
Afin que d' ouvriers, conme sages,
Soie pourveuz sanz faillir,
Quant il les me fauldra cueillir.
Je scé bien faire les m' estuet
Soier, et demourer ne peut
Mie granment.
GUIBOUR. Sire, il me plaist bien, vraiement;
Je ne vous vueil desdire en rien.
Je tien que le dites pour bien,
Si m' i ottroy.
LA FILLE. E! mon chier pére, je vous proy
Qu' avec vous voise sanz debat,
Si prendray un petit d' esbat:
Piéce a que de ceens n' yssi,
Et compagnie avoir aussi
Meilleur ne puis.
GUILLAUME. Fille, il me plaist: venez ent, puis
Qu' ainsi vous haitte.
LA FILLE. Alons. Sire, vez me ci preste.
Ma mére, a Dieu!
GUIBOUR. Or, vous gardez d' aler en lieu
Ou il n' ait bien seure voie.
Certes, ta femme a moult grant joye
D' aler avec son pére, Aubin.
Biau filz, je te pri de cuer fin
Qu' avec moy jusqu' au moustier viengnes,
Et que compagnie me tiengnes
Tant que g' i soie.
AUBIN. Se de ce refus vous faisoie,
Ne me tenroie pas pour sage.
Ma dame, alons: de lié courage
Vueil vo gré faire.
GUIBOUR. Alons; mais que lieu, sanz meffaire,
Près du sermonneur puisse avoir,
Je seray bien aise, pour voir.
Avançons nous.
PREMIER VOISIN. Egardez, Gautier: veez vous
La mairesse aler et son gendre?
Pour certain l' en me fait entendre
Qu' il sont tout un.
DEUXIESME VOISIN. C' est un proverbe tout conmun
Qu' il en fait conme de sa femme;
Et c' est a touz deux grant diffame,
Ce m' est avis.
PREMIER VOISIN. C' est voir; mais pour nostre devis
Ne lairont riens de leur convine.
Alons querre celle chopine
De vin que devons boire ensemble,
Si ferons trop miex. Vous qu' en semble?
Ay je voir dit?
DEUXIESME VOISIN. Je n' y met point de contredit:
Robert, alons.
GUIBOUR. Cy me vueil mettre a genoullons.
Se demourer icy, biau fiex,
Ne voulez, et vous amez miex
En la ville aler vous esbatre,
Aler y poez sanz debatre
Hardiement.
AUBIN. Dame, aler y vueil voirement;
N' ay pas apris a demourer
Tant au moustier pour Dieu orer
N' oir sermon.
<Cy conmence le sermon.>
Ab inicio et ante secula creata sum, etc. . Ecclesiastici
XXIIII^o. Ces paroles proposées en latin veulent
ainsi dire en françois: Avant des sciécles le conmencement
sui creée pardurablement; c' est la sentence
des paroles. A ceulx qui les loenges de la vierge
benoite veulent pronuncier et mettre avant, la vierge
en eulz enseignant es paroles proposées les adevance et
leur propose quatre choses esquelles elle comprent toutes
loenges, et les divise par quatre degrez ou par quatre
procès, dont le premier degré est entendu selon ce que
dès le conmencement fu sa predestinacion: Ab inicio,
etc. ; le second selon ce qu' en ce monde fu sa conversacion:
Et in habitacione sancta; le tiers selon ce qu' elle
fu prise ou ciel et eslevée: Et in civitate sanctificata, etc. ;
le quart selon ce qu' elle est du peuple loée et honorée:
Et radicavi in populo honorificato. Quant au premier
qui est quant a sa predestinacion, je di qu' elle surmonte
toutes creatures, en ce qu' elle dit: Ab inicio; ycy mect
elle deux choses pour quoy elle mect au devant sa predestinacion,
c' est assavoir sa dignité par laquelle touz les
siécles preceda, et sa pardurableté par laquelle jour de
siécle ne deffaudra: Ab inicio, etc. , usque ad futurum
seculum non desinam, c' est a dire dès pardurablement,
qui est conmencement sanz conmencement, je suis creée,
c' est a dire je suis preveue estre creée par l' adevancement
de dignité, si conme il est dit Sapiencie p^o: Prior omni
creata est sapiencia dignitate: La premiére de toutes
choses fu sapience creée en dignité, par laquelle Marie
preceda, c' est a dire fu avant les siécles, voire avant les
siécles des anges, les siécles des anciens, les siécles de
ceulx qui maintenant sont et qui jamais seront. Pour
quoy li peut estre dit ce qui est escript Judith XV^o: Tu
gloria Jerusalem, etc. : Dame, tu es la gloire de Jerusalem,
c' est a dire des anges desquelx tu as la ruine et le
trebuchement reparé; tu es la leesce d' Israel, c' est des
crestiens desquelx tu as l' ire reconsiliée et appaisié; tu
es l' onorificence de ton temple, c' est des Juifs desquelx tu
as l' infame relevé. Et a ces trois poins peut elle dire ce
qui est escript Ecclesiastici XXIIII^o: Ego feci ut in celis,
etc. : J' ay fait que es cieulx leveroit une lumiére sanz
deffaillir, c' est quant a la reparacion des anges; et ay couvert
toute la terre conme une nue, quant a la reconsiliacion
des crestiens; et si ay habité es treshaulx lieux,
quant au tiers point. Et pour ces trois poins li peut on
dire ce qui est dit Hester VIII^o: Lux nova oriri visa est,
etc. . Dame, tu es la nouvelle lumiére qui est veue
luire; tu es la joie des anges, desquieulx tu es saluée et
annoncée; tu es l' onneur aux Juifs, desquelx tu es née et
prophetisée; tu es le rebaudissement des crestiens et de
toute sainte eglise, desquelx tu es advocate nommée.
Après je di que Marie par dignité precéde touz les siécles
en haultesce de puissance, en planté et en grandeur
de gloire et de grace. En haultesce de puissance, car en
son nom toute creature, tant du ciel conme de la terre et
d' enfer, se flechist et encline, dont elle peut dire: In
omni gente et in omni populo primatum habui, Ecclesiastici
XXIIII^o: En toute gent ou sur toute gent des siécles
terriens et en tout le peuple des siécles celestiens ai je
premiére eu seigneurie et puissance; les pechiez des
orgueilleux et des haultains, c' est des ennemis d' enfer,
par ma propre vertu ay je abaissié et soubzmis; si
devez savoir que la vierge est aourée des annemis, des
anges et des hommes, mais differenment: car les ennemis
l' aeurent par cremeur et paour, li anges par reverence et
honneur, les hommes par devocion et amour. Après je
di qu' elle precéde touz les ciécles en planté de grace,
tant pour ce qu' elle en ot en lui, tant pour ce qu' elle en
trouva en Dieu, et tant pour ce qu' elle nous en a donné
et abandonné. Aussi di je qu' elle a surmonté touz les
siécles en grandeur de gloire quant en trois choses, qui
a saint Jehan furent revellées Appocalypsis XII^o: Signum
magnum, mulier amicta sole, > etc. . Saint Jehan dit qu' il
vit une femme affublée du soleil et avoit la lune soubz
ses piez et une coronne de douze estoilles en son chief. Par
ceste femme j' entenz la vierge benoiste, qui du soleil de
justice fu affublée, quant elle ot conceu le benoit Jhesu
seconde personne de la divinité; par la lune qu' elle avoit
soubz ses piez j' entens les biens temporieux et le monde
dont elle avoit ses desirs et ses affeccions hors mis et jettez;
par la couronne de douze estoilles j' entens douze previléges
qui par excellence et singularité lui furent octroiez
et donnez, des quieulx pour cause de brieté je me passe.
Ainsi appert le premier point de nostre sermon, c' est que
la vierge par sa predestinacion en dignité preceda. Or s' ensuit
sa pardurableté, par laquelle jour de siécle ne deffauldra,
et c' est touchié: usque ad futurum non desinam. Or
je note trois choses qui ja ne li deffaudront, c' est assavoir
sa gloire ou elle a a regner, dont il est escript
Thobie XIII^o: Benedictus Dominus, etc. : Benoit soit
nostre seigneur qui l' a essaucie a ce qu' elle regne es siécles
des siécles: secondement sa memoire qui est a pardurablement
loer: Memoria mea in generacione seculorum;
tiercement sa misericorde preste a nous touz jours
subvenir; et pour ce est elle proprement dite mére, qui ses
benefices ne refuse a nullui, ne onques, selon ses misericordes,
ses loenges et ses beneurtés, a aucun ne deffailli.
De ces trois est il escript Danielis III^o: Placuit michi
predicare, etc. : Il m' a pleu preschier ses signes qui
grans sont, c' est quant au premier; et ses merveilles, car
fortes sont, quant au second; et son regne, car c' est regne
qui durra pardurablement, quant au tiers. Auquel regne
par les merites de la vierge nous doint pervenir celui
qui est péres et filz et sains esperis, un Dieu sanz
fin et sanz conmencement.
GUIBOUR. Ha! dame du hault firmament,
Maleureuse est la personne
Qui a vous servir ne s' adonne,
Et de bonne heure est celle née
Qui mect en vous cuer et pensée;
Car nul ne fait en mal tant cours
Que vous ne li faciez secours
Tel que du tout se voit delivre
De ses maulx, puis qu' a vous se livre.
Dame, qui es par excellence
Es cieulx, lez la divine essance,
Sur touz les sains auctorisie,
Vierge, par ta grant courtoisie,
Soies, ce te pri de cuer fin,
Mon refuge, si qu' ains ma fin
Faces m' ame si affiner
Que, quant ce corps devra finer,
Eschiver puist d' enfer l' ombrage
Et des cieulx avoir l' eritage,
Que moult desir.
LE COMPéRE. Conmére, Dieu par son plaisir
Bon jour vous doint.
GUIBOUR. Biau compére, et il vous pardoint
Voz meffaiz et a moy les miens.
Que fait ma conmére? je tiens
Que bien le fait.
LE COMPéRE. La Dieu mercy, voirement fait.
Et vous, conmére?
GUIBOUR. Bien. Je me lo de Dieu, compére;
Car fait nous a grace moult grant
De ce qu' a un si bon enfant
Avons nostre fille donnée,
Qu' estre ne pouoit assenée
Miex, ce m' est vis.
LE COMPéRE. Conmére, je suis trop envis
En lieu ou j' oie diffamer
Personne que j' ains ne blasmer,
Qu' a mon pouoir ne l' en deffende
Et que pour son honneur ne tende
L' en faire sage.
GUIBOUR. Pour quoy dites vous ce langage?
Dites, compére.
LE COMPéRE. Je le vous diray, ma conmére.
L' en dit par toute ceste ville
Qu' aussi conme avec vostre fille
Vostre gendre avec vous s' esbat
Et gist, quant li plaist, sanz debat,
Et que c' est de vous deux tout un:
Ainsi le dit on en commun,
Et que pour nient n' est pas si cointe,
Car il est de la mére acointe
Et de la fille.
GUIBOUR. E! lasse, cuert aval la ville
Telle renommée de moy?
Par celle foy que je vous doy,
Compére, onques ne l' espousay.
Qui l' a mis avant je ne say,
Mais il a fait pechié mortel.
Ja Dieu ne vueille qu' en fait tel
Soie reprise!
LE COMPéRE. Conmére, je vous en avise
De bonne foy, si ait Dieu m' ame.
Ne m' en donnez ne los ne blasme,
Belle conmére.
GUIBOUR. Mais vous en sçay bon gré, compére,
Et vous pri, quant l' orrez retraire,
Que dites qu' il est du contraire
Hardiement.
LE COMPéRE. Je vous en croy bien, vraiement;
Ore vous vous en donrez garde.
A Dieu, qui vous ait en sa garde!
Jusqu' au revoir.
GUIBOUR. Le benoit jour puissez avoir,
Compére, et la vostre merci.
Doulce mére Dieu, qu' est ce ci?
Qu' ont ore les gens enpensé
D' avoir telle chose pensé
Sur moy sanz cause et sanz raison?
Et par foy c' est grant traison.
Je n' en puis mais, s' en suis dolente
Et se j' en pleure et me demente.
Doulce mére Dieu, que feray?
Certes, jamais ne cesseray
De penser tant que j' aie attaint
Conment ce renom soit estaint
C' on m' a sus mis.
PREMIER SOIEUR. Sevestre, compains et aimis,
Alons men en place savoir
Se nous pourrons un maistre avoir.
Nous n' avons touz deux croix ne pille;
Ne partons pas de ceste ville
Sanz gaignier ent.
DEUXIESME SOIEUR. Mondot, tu diz bien; alons ment.
Je sui prest, vezci ma faucille;
Pren la teue aussi. Avant: bille
Droit en la place.
PREMIER SOIEUR. Je m' en vois; or me suis a trace.
Sevestre, il est bien matinet.
Egar: encore ame n' y est
Qu' entre nous deux.
DEUXIESME SOIEUR. Mondot, ce n' est pas moult grant deulx;
Mieulx nous vault estre des premiers
Que ce que feussions derreniers.
Se Dieu plaist, assez tost venra
Aucune ame qui nous fera
Gaingner monnoie.
GUIBOUR. Jamais en mon cuer n' aray joie
Si aray estaint mon reprouche;
Mais je ne vois conment l' approuche,
Se n' est par la mort de mon gendre.
Certainement il me fault tendre
Conment je la puisse approuchier.
Je n' ai point mon argent si chier
Qu' assez et largement n' en donne
A aucune estrange personne
Qui si le tenra en ses poins
Qu' a fin le mettra de touz poins;
Et j' ay maintenant la saison
Miex qu' en autre temps par raison,
Car venuz sont de toutes pars
Estranges ouvriers qui espars
Se sont pour gaingner ci aval.
Je m' en vois savoir, mal que mal,
En la place se je verray
Ame a qui parler en pourray.
Egar: g' i voi deux grans ribaus
Qui semblent estre fors et baus
Pour faire tost un cop cornu.
Seigneurs, estes vous ci venu
Pour gaingner?
PREMIER SOIEUR. Oil, dame; avez vous mestier
De nul de nous?
GUIBOUR. Oil, espoir. Dont estes vous?
Dites le moy.
PREMIER SOIEUR. Nous sommes de vers le Crotoy,
Et savons bien soier et batre:
S' avez gangnages a abatre,
Voulentiers en merchanderons
Et si les vous abaterons
Bien et tost, dame.
GUIBOUR. Biaux seigneurs, je suis une femme
A qui vous pourrez bien gangnier,
Se voulez, a po barguignier,
Assez du mien.
DEUXIESME SOIEUR. Par foy, dame, il nous plaira bien.
Qu' avez a faire?
GUIBOUR. Ains que vous die mon affaire,
Je vueil que sur sains me jurez
Qu' a homme nul vous ne direz
N' a femme ce que vous diray;
Et puis je vous deviseray
Quelle est m' entente.
LE DEUXIESME SOIEUR. Quant est de moy, sanz plus d' attente,
Je vous jur que vostre secré,
Dame, se n' est de vostre gré,
Nul ne sara.
PREMIER SOIEUR. N' aussi par moi ja ne fera,
Dame, je vous en asseur.
Or nous dites en bon eur
Vostre plaisir.
GUIBOUR. Seigneurs, vezci tout mon desir:
C' un homme me soit a mort mis,
Combien que soit de mes amis,
Par vous deux; et prenez du mien
Largement, je le voulray bien.
Je suis sanz cause diffamée
De li, et en queurt renommée,
Dont triste et dolent ai le cuer,
Tant que ne le puis a nul fuer
Vous dire a droit.
DEUXIESME SOIEUR. Dame, dame, soit tort ou droit,
S' a nous deux ... o! livrés, livrez!
De touz poins sera delivrez,
Ja n' i fauldra.
PREMIER SOIEUR. Voire; mais il nous convendra
Temps avoir d' aviser conment
Pourrons faire celéement
Ceste besongne.
GUIBOUR. Je le vous diray sanz eslongne:
Je vous mettray en mon celier;
Puis penseray d' assemiller
Ci la besongne, et tant feray
Que jusques la l' envoieray
Aussi que pour querre du vin.
Quant le tenrez, mettez l' a fin
Sanz li faire plaie ne sanc,
N' en ventre n' en teste n' en flanc:
Estranglez lay.
DEUXIESME SOIEUR. Il vous sera fait sanz delay;
Or nous menez en ce celier,
Et puis pensez de besongnier
Au remanent.
GUIBOUR. Voulentiers, seigneurs; or avant!
Venez vous ent aveques moy;
Je vous paieray bien, par foy.
Boutez vous touz deux la dedens;
Je ne mengeray mais des dens
Si le vous aray envoié.
Or est mon fait bien avoié,
Si venist: je n' ay ceens ame:
Mon mari est hors et sa femme:
Il ne peut estre qu' il ne viengne
Assez tost. Aviengne qu' aviengne:
Cy l' attendray.
AUBIN. Cy endroit plus ne me tendray;
Je voi bien que diner approuche.
De ce chapon qu' orains en broche
Vy mettre vois mengier ma part.
J' ay plus chier estre y tost que tart,
Et miex me vault.
GUIBOUR. La malade faire me fault,
Puis que mon gendre voi venir;
Le chief enclin me veil tenir
Et clos les yex.
AUBIN. Ma dame, qu' est ce la? que Diex
Vous doint santé de corps et d' ame!
Egar! avez vous que bien, dame?
Dites le moy.
GUIBOUR. Je friçonne toute, par foy,
Et sens bien que d' acès sui prise,
Et si sui de soif si esprise
Que ne puis plus, biau filz Aubin.
Je te pri, prens un pot a vin,
Et me va un po de vin querre
En nostre celier; fai bonne erre,
Si buveray.
AUBIN. Dame, voulentiers le feray,
Combien que c' est vostre contraire;
Nonpourquant je vous en vois traire,
Puis qu' il vous haite.
GUIBOUR. Or vas tost. Ma besongne est faite:
Assez tost delivre en seray.
Or fault penser conment feray
Quant au surplus.
PREMIER SOIEUR. Dame, ne vous dementez plus:
C' est delivré.
GUIBOUR. Seigneurs, l' avez a mort livré?
Par quelle guise?
DEUXIESME SOIEUR. N' i avons point fait de faintise,
Dame: par la gorge l' avons
Si estraint que de voir savons
Que tout mort gist.
GUIBOUR. Bien est, seigneurs, il me souffist;
Mais sanz vous plus ci deporter,
Il le vous convient apporter
Yci, si le despoullerons
Et en son lit le coucherons;
Et puis vostre argent vous donrray,
Et si vous en envoieray
Au Dieu plaisir.
DEUXIESME SOIEUR. Il vous sera de grant desir
Fait tout en l' eure.
PREMIER SOIEUR. Dame, moustrez nous sanz demeure
Ou vous voulez qu' il soit couchiez;
Par amour or vous despeschiez
Ains qu' ame viengne.
GUIBOUR. Pour ce que gaires ne vous tiengne,
Seigneurs, couchiez le sur ce lit,
Conme s' il dormist par delit.
C' est bien, il est a mon talent.
Tenez, d' aler ne soiez lent,
C' on ne vous truisse.
DEUXIESME SOIEUR. Non fera l' en tant com je puisse
Sur piez ester.
PREMIER SOIEUR. Non fera l' en moy, sanz doubter.
Puis qu' argent avons a despendre,
Alons men de cy sanz attendre,
Compains Sevestre.
DEUXIESME SOIEUR. Alons, ci ne fait plus bon estre.
A vous, Mondot!
GUILLAUME. Dame, nous revenons or tost;
Apportez pain et vin et nappe.
Ce mantel ci qui vault bien chape
Vueil despoullier, il est d' iver.
J' ay fin, si me vueil desjuner:
Delivrez vous, alez au vin;
Et vous, fille, tandis, Aubin
Alez querre, si dinerons.
Demain, ce pens, aousterons,
Si me vueil de gens pourveoir.
Ne vueil pas longuement seoir,
Au mains pour ore.
GUIBOUR. Marie! Aubin se gist encore
Dedans son lit.
GUILLAUME. Il a bien pris a son delit
Le cras de ceste matinée.
Va l' appeler, va, po senée,
Di qu' il se liéve.
LA FILLE. Aubin, Aubin, s' il ne vous griéve,
Vueillez me s' est jour ou non dire.
Dormirez vous hui mais, biau sire?
Egar! il ne me respont point;
Approuchier le vueil par tel point
Que je saray, vueille ou ne vueille
Cy le descuevre.
De certain s' il dort ou s' il veille,
Or sus, sire! sus, sans sejour!
Dormirez vous cy toute jour?
Qu' est cecy, Diex? Ha! mére, mére!
Vezci nouvelle trop amére.
Je doi bien plaindre et plourer fort,
Conme plaine de desconfort:
Je suis perdue.
GUIBOUR. Qu' as tu, qui ci es esperdue
Et qui ci pleures?
LA FILLE. Plourer doy bien: mes bonnes heures
Et touz mes bons jours sont passez,
Car je voi qu' Aubin trespassez
Est. Lasse! lasse! que feray?
Certes, pour lui de dueil morray.
Ha! doulx Aubin! la compagnie
D' entre nous deux si est faillie
Malement brief!
GUILLAUME. Vezci douleur et meschief grief;
Miex amasse tout mon avoir
Avoir perdu. Fille, est ce voir
Que je t' oy dire?
LA FILLE. Il est ja jaune conme cire.
Pére, ne me creés vous mie?
Lasse! sanz ami sui amie?
Povre et deserte.
GUIBOUR. Ha! belle fille, quelle perte!
Certes, bien doy mes poins destordre
Et a plourer mes yeulx amordre,
Quant j' ay perdu le doulz Aubin
Qui tant m' onoroit de cuer fin
Et tant m' amoit.
LA FILLE. Lasse! mére, il ne m' appelloit
Touz jours que s' amie ou sa suer;
Si ques se j' ay tristesce au cuer,
J' ay bien raison.
PREMIER VOISIN. Diex soit ceens! Quelle achoison
Vous fait ainsi crier et braire?
Avez vous de si grant dueil faire
Cause entre vous?
GUILLAUME. Oil, voir, Robert, voisin doulx
Aubin est mors.
PREMIER VOISIN. E! Diex li soit misericors!
Guillaume, voisin, il m' en poise.
Par la mére Dieu de Pontoise,
Se je le peusse amender!
Ore je vous vueil demander,
Si grant dueil faire que vous vault?
Certes nient. Je scé bien qu' il fault
Que nature en ce cas s' acquitte;
Mais aiez douleur plus petite,
Si ferez bien.
LA FILLE. Et conment seroit ce? Je tien,
Robert, que Dieu m' avoit donné
Le plus courtois, le miex sené,
Le plus amoureux, le plus doulx
Et le plus liberal de touz
Les hommes nez de ceste terre;
Si que se grant dueil mon cuer serre,
N' est pas merveille.
GUIBOUR. Certes, tu dis voir. Ta pareille
N' avoit en toute la contrée
D' avoir esté bien assenée
A bon et bel. Or est ainsi.
Mors est: Dieu li face mercy
Par sa bonté!
PREMIER VOISIN. Escoutez: s' avez voulenté
De moy rien conmander a faire,
Si le me dites sanz retraire:
Je le feray.
GUILLAUME. Robert, donques vous prieray
Que me faciez venir un coffre.
Une autre foiz a faire m' offre
Pour vous autant.
PREMIER VOISIN. Je le vous vois querre batant,
Conment qu' il prengne.
DEUXIESME VOISIN. Robert, s' en santé Dieu vous tiengne,
Ou alez vous?
PREMIER VOISIN. Gautier, je vois, mon ami doulx,
Querre un sarqueil.
DEUXIESME VOISIN. Sarqueil! pour qui? est ce conseil?
Dites, voisin.
PREMIER VOISIN. Nanil, Gautier; c' est pour Aubin,
Le gendre au maire.
DEUXIESME VOISIN. Aubin! Dieu li soit debonnaire
Et doulx a l' ame!
PREMIER SERGENT. Gautier, se Dieu vous gart de blasme,
Qui dit il qui est trespassez?
N' ay pas eu loisir assez
De lui entendre.
DEUXIESME SERGENT. Aubin, celui qui estoit gendre
Guillaume, maire de Chiefvi.
Hui au matin encor le vi
Sain et haitié.
PREMIER SERGENT. Diex ait de son ame pitié!
Certainement, c' est grans damages;
Car biaux estoit, jones et sages
Et biau parlier.
LE DEUXIESME VOISIN. A ce pas nous fault touz aler.
A Dieu, amis!
PREMIER SERGENT. A Dieu, Gautier, qui vous ait mis
Hui en bon jour et en bon mois!
Sanz plus ci estre, aux plaiz m' en vois;
Il en est heure.
LE BAILLIF. Dont viens tu, se Dieu te sequeure?
Est de nouvel ame semons,
Ne que dit on, or me respons,
Aval la ville?
PREMIER SERGENT. Esmerveilliez sont plus de mille
Personnes qu' alés est a fin
Ce biau jonne homme et fort, Aubin,
Puis orains prime.
LE BAILLIF. Que diz tu, pour le roy haultisme?
Est mors Aubin?
PREMIER SERGENT. Ainsi le dient li voisin
Conmunement.
LE BAILLIF. Je suis touz esbahiz conment
Il peut estre mors. Siez te, siez
Je tieng qu' il a esté bleciez
D' aucune ame, certainement,
Dont il est si soudainement
Mort conme il est.
PREMIER VOISIN. Vezci un coffre bel et net,
Maire, que vous fas apporter
Pour ce corps en terre porter
Honnestement.
GUILLAUME. Met le jus, amis, bellement,
Que Dieu t' aist, qu' il ne depiece.
Voisin, que ja ne vous meschiece,
Vous deux mettez ce corps dedens.
Envers, envers, non pas adens,
Mes bons anmis.
LE PORTEUR. Souffrez, il vous sera bien mis
Sire, portez a ce bout la,
Et je porteray par deça.
Ho! mettez jus.
PREMIER VOISIN. C' est mis. Courtois li soit Jhesus
A l' ame et doulx!
LE PORTEUR. Qui me paiera d' entre vous
De mon portage?
GUIBOUR. Je, mon ami, de bon courage;
Il ne t' en fault ja barguignier.
Prie pour li, tien, va gaingner:
Vezci trois blans.
LE PORTEUR. Jhesu Crist, qui est roy puissans,
Li face a l' ame vray pardon!
Se jamais n' eusse mains don
De besongne que je feisse,
De robe neuve me veisse
Bien tost vestu.
LE BAILLIF. Tu penses, Gobin; dont viens tu
Si embrunchié?
LE DEUXIESME SERGENT. Voir, j' ay le cuer, sire, empeschié
A merveille, et sui envais
De penser et touz esbahiz
Qu' Aubin est mors.
LE BAILLIF. Touz nous fault passer par ce mors,
Vueillons ou non.
DEUXIESME SERGENT. Je scé bien que ce fera mon,
Sire; mais de ce me merveil
Que depuis orains hault soleil
Par la vile aloit et venoit,
Et entre les gens se tenoit
Sain et haictié.
PREMIER SERGENT. Par foy, c' est damage et pitié,
S' a Dieu pleust.
LE BAILLIF. Il n' est homme qui me peust
Faire entendant qu' il n' ait esté
Feru ou destraint ou bouté,
Dont il est mors soudainement.
Je cuide voir dire; alons ment.
Je vueil estre a son enterrage.
Par qui que soit seray je sage
Conment est mors.
LA FILLE. Ha, doulx Aubin, quant me recors
De l' onnesté qu' en toy avoies,
De la grant amour dont m' amoies,
Des bons muers dont estoies plains,
J' ay bien cause se je te plains
Et se pour toy suis esplourée;
Car de touz biens suis esgarée
Et en grant douleur convertie.
Ha! mort, com dure departie
As fait de nous deux en po d' eure!
Pren m' aussi et si me deveure
Et de ce siécle me delivre:
Je l' ay trop plus chier qu' ainsi vivre
En tel destresce.
LE BAILLIF. Dieu sa paix et sa grace adresse
Sur vous trestouz!
GUILLAUME. Mon seigneur, si face il sur vous
Par sa bonté!
LE BAILLIF. Il me poise, par verité,
Maire, de vostre empeschement
Et de ceste mort malement:
Se je le peusse amender!
Si vous vueil ainsi demander
Conment a esté si tost pris.
Estoit il de mal entrepris
Dedens le corps?
GUILLAUME. Sire baillif, sachiez puis lors
Que nostre fille li donnasmes,
Ne li ne autre ne trouvasmes
Qui deist qu' il eust nul mal
Ne hors ny ens, n' amont n' aval,
Ne sus ne jus.
LE BAILLIF. De tant m' en esbahis je plus
Qu' il est ainsi mors. Et vous, femme,
En savez vous riens, par vostre ame,
Ne qu' ait esté en compagnie
Ou l' en li ait fait villenie?
Dites le moy.
GUIBOUR. Nanil, sire baillif, par foy,
Mais suis esbahie forment
Conment ainsi soudainement
Est trespassez.
LE BAILLIF. Entre vous deux avant passez;
Descouvrez moi tost celle biére,
Et son suaire en tel maniére
Descousez que veoir le puisse
Dès la teste jusqu' a la cuisse,
Pour en estre miex hors de doute;
J' en feray ma testée toute,
Ains c' on l' enterre.
PREMIER SERGENT. Sire, il vous sera fait bonne erre.
Avant! ce couvercle levons,
Gobin; et puis le descousons,
Puis qu' ainsi est.
DEUXIESME SERGENT. Or sus de la, sanz faire plet!
Descoudre vueil ceste couture.
Sire, ay j' assez fait descouture.
A vostre avis?
LE BAILLIF. Descouvre moi bien tout son vis,
Que je voie gorge et poitrine.
Hola! Tenez vous en saisine
De mére, de fille et de pére.
Nier ne peuent qu' il n' appére
Qu' il est murdriz; c' est chose voire.
Veez come a la gorge noire:
Qui que soit, voir, l' a estranglé.
Faites tost, n' y ait plus janglé;
Les mains en croiz et par derriére
Leurs liez, et en tel maniére
Les enmenrez com chiens en laisse.
Le voir saray, ains que je cesse,
De ce fait cy.
LE FRéRE. Diex soit ceens! Las! qu' est cecy?
Frére, je doi bien dueil avoir
Quant mort vous voy; si ay je, voir,
Que que nulz die.
LE COUSIN. Mort qui l' as pris, Diex te maudie!
Tu as pris de nostre lignage
Le plus vaillant et le plus sage.
Las! de si bien moriginé
Estre a mort si tost destiné,
C' est grant damage.
LE BAILLIF. Seigneurs, de tant vous fas je sage
C' on l' a murdri, je n' en doubt point;
Mais vous ne m' eschapperés point,
Ne vous, ne vous, par les dens Dé,
Si en saray la verité,
Puis qu' est ainsi.
GUILLAUME. Sire baillif, pour Dieu, mercy!
Ne nous vueillés pas si mal estre;
Par tout nous voulons rendre et mettre
Ou vous direz.
LE BAILLIF. C' est pour nient. Seigneurs, vous ferez
Ce que j' ay dit.
PREMIER SERGENT. Sire, il vault fait sanz contredit.
Tandis que lier vueil le pére,
Robin, vas, si lies la mére.
Or fais bonne erre.
DEUXIESME SERGENT. Il ne m' en fault pas trop requerre:
Je m' en vois delivrer, par m' ame.
Avant! bailliez ça voz braz, dame,
Et faites brief.
GUIBOUR. Lasse! chetive! il m' est a grief,
Si ne m' i vault riens escondire.
Egardez: vostre vouloir, sire,
Faites de moy.
LA FILLE. Lasse! dolente! avoy! avoy!
Bien me ressourt douleur amére,
Quand je voy mon pére et ma mére
Que pour la mort de mon mari,
Dont en cuer sont triste et marri,
Justice veult si mal contraindre
Que lier leur fait et estraindre
Devant les mains.
LE BAILLIF. Si fera l' en vous plus ne mains,
Belle amie, et si en venrez
Avec eulx, pas ne demourrez.
Lie la, lie.
PREMIER SERGENT. Voulentiers. Or ça, belle amie,
Voz deux mains avoir me convient
Pour lier. Refus n' y vault nient:
Delivrez vous.
LA FILLE. Or suis j' angoissée de touz
Les coustez que femme peut estre:
Je voy mon compaignon mort estre;
Je voy pére et mére en peril
D' estre a honte mis a essil;
Je mesme sui prise et liée
Pour mener con fame jugée
A morir. Ha! dame des cieulx,
En pitié de voz tresdoulx yeulx
Me regardez.
LE BAILLIF. Avant, avant! plus ne tardez.
Seigneurs, menez les devant moy.
Par le serement qu' ay au roy,
Ou assez tost voir me diront,
Ou il questionnez seront
Vilainement.
DEUXIESME SERGENT. Or ça, passez ynellement,
Sanz plus ci estre.
LE BAILLIF. Faites ce corps en terre mettre,
Sanz deporter.
LE COUSIN. Je lo que le facions porter,
Cousin, tout droit au cimetiére,
Sanz jesir plus sur terre en biére;
Et puis, quant enterré l' arons,
De son service ordenerons
Qu' il soit fait gent.
LA FILLE. Bien est. Plaise vous, bonne gent,
Cy les mains mettre.
GUILLAUME. Vierge, mére au doulx roy celestre,
Des desvoiez adresce et port,
Dame, donnes nous ton confort:
Mestier en est.
LE BAILLIF. Gobin, or tost, va, si me mect
Tout avant euvre en la gourdaine
La mére; et puis la fille maine
D' autre costé en paradis,
Et je Guillaume vueil tandis
Questionner.
DEUXIESME SERGENT. Sire, dont l' i vueil je mener,
Puis que le dites.
GUIBOUR. Sire, sire, touz frans et quittes
Delivrez ces deux inocens;
Moy justicez, je m' i assens:
Ne me peut le cuer assentir
Que plus leur voie mal sentir.
Sachiez, sire, qu' en cest affaire
N' ont coulpes; j' ay fait le fait faire
Moy seulement.
LE BAILLIF. Guibourt, dire vous fault conment
A esté fait ce murtre cy,
Et pour quelle achoison aussi
Convient savoir.
GUIBOUR. Je vous confesseré tout voir:
Dès lor qu' Aubin ma fille ot prise,
De lui amer fui si esprise
De bonne amour conme mon filz
Que soiez certain, sire, et fiz,
Pluseurs l' amour bien apperçurent,
Dont telx oppinions conçurent
Qu' il me mistrent sus tel diffame
Que tout aussi con de sa femme,
Ce disoient, de moy faisoit
Toutes les foiz qu' il lui plaisoit,
Et de nous deux c' estoit tout un.
Ce renom me donna conmun
Plus de cinq cens foiz, non pas vint;
Et tant ot couru qu' il avint
Qu' en secré me fu revelée
Ceste dolente renommée,
Dont j' oy tel courroux et tel ire
Que je ne savoie que dire.
La me troubla sens et avis
Li ennemis par tel devis
Que depuis touz jours ma pensée
A esté mise et adrescée
A ce, conment qu' il deust prendre,
Que feisse morir mon gendre,
Qu' il me sembloit, s' il estoit mors,
Que plus ne courroit li recors
De mon diffame.
LE BAILLIF. Et conment le tuas tu, femme?
Savoir le fault.
GUIBOUR. Je le vous diray sanz deffault.
Hier, en la place, m' adressay
A deux vallez, mais je ne sçay,
Sur l' ame de moy, qui ilz sont,
Qui laboureurs de braz se font.
En parlant a eulz, leur ouvri
Le vouloir et leur descouvri
Que j' avoie de ceste mort;
Et ilz furent de mon accort
Pour l' argent que je leur promis.
Adonc en mon celier les mis,
Et puis y envoiay mon gendre,
Par ce que je li fis entendre
Que trop malement soif avoie;
Et il se mist tantost a voie.
Quant il y vint, tantost fu pris
Par la gorge, et si entrepris
Que mort le gettérent par terre.
Lors le fis apporter bonne erre,
Et le couchames en son lit,
Con si dormesist par delit.
Les deus varlés moult bien paiay,
Et tantost les en envoiay;
C' en est la fin.
LE BAILLIF. C' est assez. Maine l' en, Gobin,
Ou je t' ay dit.
DEUXIESME SERGENT. Sire, je vois sanz contredit.
ça, dame, ça!
LE BAILLIF. Certes, je n' oy mais pieça
Parler de murtre si vilain.
Ores je vous delivre a plain,
Guillaume, et vostre fille aussi.
Passez, alez vous ent de cy
Ysnellement.
GUILLAUME. Sire, nous ferons bonnement
Vostre plaisir, c' est de raison.
Or sachiez, fille, qu' en maison
Qu' aie jamais je n' enterray,
Tant qu' au moustier esté aray
Nostre dame de Fineterre,
Pour li deprier et requerre
Qu' elle soit a ta mére amie;
Car je voy, certes, que sa vie
Est en balance.
LA FILLE. Ferés? et je, sanz detriance,
Droit a Limoges m' en iray,
Et a saint Lienart offerray
En cierges mon pesant de cire;
Afin qu' il deprist nostre sire
Qu' il vueille deffendre ma mére
Et la garder de mort amére
Et de vilaine.
GUILLAUME. Celle qui est de grace plaine,
Li soit amie a ce besoing!
Au departir, fille, te doing
Ma beneiçon; vaz a Dieu!
Ne sçay se jamais en ce lieu
Cy revenray.
LA FILLE. A Dieu, pére! ne fineray
Tant qu' a saint Lienart aie esté
Mettre me vois, en verité,
Com pelerine.
LE FRéRE. Chier sire, par vostre benigne
Grace, a vous venons ci endroit
Requerre que nous faciez droit
De nostre ami.
LE BAILLIF. Est il enterrés, ou en my
La sale ou vous et li laissay?
Du fait la verité bien sçay.
Que dites vous?
LE COUSIN. Oil: en terre, sire doulx,
Est il livrez.
LE BAILLIF. Assez tost serez delivrez.
Auberi, va le bourriau querre,
Et li dy qu' il s' en voit bonne erre
Une estache faire drescier
Pour une femme justicier.
Quant preste sera, ne se tiengne
Que tantost a moy ci ne viengne,
Or fai briefment.
PREMIER SERGENT. Voulentiers, sire; vraiement,
Je le voi, c' est bien ma besongne.
Cochet, alez tost, sanz eslongne,
De par le bailli, nostre maistre,
Une estache drescier et mettre
Ou viez bordel qui est maison
Gaste. Or tost, sanz arrestoison!
Et si tost conme fait arez,
Ou ses plaiz tient a lui venrez.
Delivrez vous.
LE BOURRIAU. Tantost sera fait, ami doulx.
Dès ci m' y vois embesongnier.
Dites li sanz gaires songier
A lui iray.
PREMIER SERGENT. Cochet amis, bien li diray.
Sire, j' ay parlé a Cochet.
Il a fourche, estache et crochet,
Cordes et tout quanqu' a li fault.
A vous venra cy, sanz deffault,
Trestout en l' eure.
LE BAILLIF. Or me vas, Gobin, sanz demeure
Amener Guibour cy presente.
J' ay de savoir encore entente
Que me dira.
DEUXIESME SERGENT. Sire, tantost fait vous sera;
G' y vois. ça! issez hors, Guibour;
Au bailli sanz faire demour
Vous fault venir.
GUIBOUR. Doulce mére Dieu, souvenir
Vous vueille de ceste chestive;
Car je ne croy pas que je vive
Longuement: pour ce, doulce dame,
Vous pri qu' aiez merci de m' ame,
Quoy qu' aie pecherresse esté.
Ha! dame, par vostre bonté
Confortez moi.
LE BAILLIF. Guibour, belle amie, je voy
Par mesmes ta confession
Qu' a mort et a perdicion
Par toy a esté mis ton gendre,
Ainsi le m' as tu fait entendre,
Et que ton mari en descoupes
Et ta fille, et qu' en ce fait coupes
N' a nulz que toy.
GUIBOUR. Sire, il est verité, par foy.
Dit vous ay pourquoy et conment;
Et voi bien qu' a mon jugement
Sui pour lui amenée icy.
Or ait Diex de m' ame mercy,
Et la vueille a sa part attraire
Et d' enfer garder et retraire,
Ou n' a que paine.
LE FRéRE. Chier sire, de ceste vilaine
Murtriére, qui si faucement
Mon frére a murdri, jugement
Vous requier dès ici endroit.
Or vous plaise a m' en faire droit,
Sanz dilatoire.
LE COUSIN. Sire, il vous requiert raison, voire.
Puis qu' elle a le fait congneu,
Par droit devez estre meu
A sa requeste.
LE BOURRIAU. Mon seigneur, la besongne est preste,
Ainsi que mandé le m' avez.
Or me dites que vous voulez
Que je plus face.
LE BAILLIF. Pren une hart et la me lasse
Entour le col de ceste fame:
Mourir li convient a diffame;
Et lui liez les mains aussi,
Et puis nous en irons de ci
A la justice.
LE BOURRIAU. Et je vueil ouvrer de m' office,
Puis que le dictes.
GUIBOUR. E! dame, qui par voz merites
Dignes a Dieu et precieuses,
Dessus toutes les glorieuses
Ames qui en paradis sont
Et qui jamais estre y pourront
Avez et arez seigneurie,
Je parle a vous, vierge Marie,
Confortez moy a ce besoing,
Et de m' ame aiez cure et soing;
Car je voy bien et sanz deffault
Le corps morir a honte fault
Et assez brief.
LE FRéRE. Certes on ne vous peut trop grief
Ne trop honte faire, murtriére,
Qui avez en telle maniére
Mon frére mort.
LE BAILLIF. Acheter li feray son tort.
Auberi, vaz tantost crier
En la place sanz detrier
Que nul chief d' ostel ne remangne
Qu' a la justice tost ne viengne;
E puis revien.
PREMIER SERGENT. Sire, je le vous feray bien.
Or escoutez vous en conmun:
A touz ensemble et a chascun,
Par foy, fas ce conmandement
Qu' a la justice ysnellement
Venez que le baillif veult faire,
Sur quanque vous pouez meffaire
Envers le roy.
PREMIER VOISIN. G' y ay plus chier aler, par foy,
Que je l' amende.
DEUXIESME VOISIN. Et j' aussi, qu' il ne me demande
Amende, y vois.
LE BAILLIF. Sus! assez grans est noz convois,
Et touz jours venront gens assez.
Devant moy, toi et li, passez.
Cochet, delivrer s' en convient:
Le delaiement n' y vault nient.
Mouvez, mouvez.
LE BOURRIAU. Avant! de venir vous prouvez,
Dame; ne fault point dire: Qu' est ce?
Je vous menray com chien en laisse
A ceste hart.
GUIBOUR. E! Diex, mon cuer pourquoy ne part
Et créve afin que je morusse,
Si que plus honte ne beusse
Du grant meschief ou je me voi?
Sire baillif, octroiez moy
Un don par vostre doulx plaisir:
Que ci aie un po de loisir
De prier la dame de grace,
Puis que devant l' eglise passe:
Ce vous requier.
PREMIER VOISIN. E! ottroiez li, sire chier,
Ce que requiert pour l' amour Dieu,
Sanz entrer dedanz le saint lieu:
Vous ferez bien.
DEUXIESME VOISIN. Certainement, sire, je tien,
S' un petit li donnez d' espace,
Ne pourra que miex n' en trespasse;
Et nous devons, c' est l' escripture,
Vouloir de toute creature
Le sauvement.
LE BAILLIF. Femme, or te delivres briefment;
Je te l' ottroy, puis c' on m' en prie;
Met t' a genoulz.
GUIBOUR. Voulentiers, mon chier seigneur doulx.
Ha! dame de misericorde,
A Dieu, ton chier filz, m' ame acorde;
Tu qui les pecheurs justifies,
Et les tiens es cieulx glorifies,
Aies pitié de ma misére;
Dame qui es la doulce mére
Au createur de tout le monde,
De ceste lasse en qui habonde
Tant de tristesse et de doulour
Aies pitié par ta doulçour;
Car grant mestier ay de t' aide.
M' ame sequeur et m' ame aide,
Car li corps iert tost excilliez,
En feu bruiz et greilliez:
Et pour ç' a toy me rens confesse,
Conme trespovre pecheresse,
De touz les pechiez qu' onques fis,
Dont meffaite suis vers ton filz,
Soit en parler, en diz, en faiz.
Dame, pardon donner m' en faiz
De Dieu, qui seul en a puissance,
Qui voit des cuers la repentence
Tout clérement.
LE BAILLIF. Avant, avant! sus! alons ment:
Yci endroit trop me delay.
N' ay que faire de tel delay:
Le plus du jour est trespassez.
Or tost, Guibour, passez, passez.
Cochet, de li mener te haste.
De son corps fauldra faire un haste
Ardent en flame.
GUIBOUR. E! vierge, precieuse gemme,
Ce baillif redoubt come fouldre
Qui si s' aire et si s' esfoudre
Contre moy. Vierge pure et monde,
Souveraine de tout le monde,
Empereris du ciel et dame,
Par le tourment de ceste flame,
Par ceste mort pesme et honteuse,
Royne du ciel glorieuse,
Du feu d' enfer m' eschive et garde
Et m' ame come toie garde:
Je la te livre.
LE BOURRIAU. Puis qu' il fault que je vous delivre,
Dame, a genoulz ci vous mettez,
Or ça, lier par les costez
A ceste estache ci vous vueil;
Et puis referay un acueil
Par le col et par la poitrine,
Ains que je cesse mais ne fine
Ne que plus face.
GUIBOUR. Vous qui me regardez en face,
Priez pour moy a nostre dame
Que par le feu et par la flame
Ou doit mon las de corps bruir,
Le feu d' enfer puisse fuir
M' ame, que n' en soit approuchée;
Et si vous pri que reprouchée
Ne soit ceste honteuse mort
Mon compagnon, qui n' y a tort,
Doulce gent, n' a sa fille aussi;
Car je tieng fermement cecy
Que moult les adole et les blesce
Ma mort, et met en grant tristesce,
Et fait a mon tourment partir.
Autrement n' en peuent partir
Ny eschaper.
LE BAILLIF. Cochet, pense de toy haster.
Puis que liée est de fors hars,
Couche sur lui de toutes pars
Largement et busche et estrain,
Et puis le feu y boute a plain,
Sanz tant songier.
LE BOURRIAU. Je ne quier boire ne mengier
Tant que soit fait. Regardez, maistre.
Je ne scé c' on la puist miex mettre:
De toutes pars enclose en buche
Est con se fust en une huche
Pour tost esprandre.
LE BAILLIF. Au feu, au feu, sanz plus attendre!
Au feu, bonne erre!
LE BOURRIAU. Tantost, sire, je le vois querre.
Or est tout prest.
DIEU. Mére, mére, et heure et temps est
Que de ci vous convient descendre
Pour aler sauver et deffendre
Guibour, qui tant piteusement
Vous appelle, et tant doulcement
Requiert a moy avoir accorde
Parmi vostre misericorde
Que je li pardoing son meffait.
Alez la deffendre de fait,
Que pour feu qu' entour li on face
Son corps n' empire ne n' efface
Ne ne malmette.
NOSTRE DAME. Filz, d' aler y sui toute preste.
Or sus, Gabriel, descendez,
Et vous, Michiel, et si chantez
En alant la.
GABRIEL. Dame, vostre gré fait sera.
Avant, Michiel! Chantons, amis,
Puis qu' a voie nous sommes mis,
Par doulx accors.
RONDEL. Dieu puissans, misericors.
Vostre grant misericorde
Fait pecheurs avoir accorde
A vous: c' est un doulx accors,
Dieu puissant, misericors;
Et voir est que li recors
De vo grace c' on recorde
Maint cuer du Sathan descorde.
Dieu puissant, misericors,
Vostre grant misericorde
Fait pecheurs avoir accorde.
LE BOURRIAU. Alumer vueil par telx effors
Ce feu, puis que j' ay la matiére,
Qu' il fauldra c' on se traie arriére
De touz costez.
NOSTRE DAME. Mes amis, ce feu deboutez
Si loing de m' amie loyal
Que ne li puisse faire mal.
Guibour, ton courage asseure:
Tu n' aras, soies en seure,
Par ce feu peine ne tourment,
Pour ce que si devotement
M' as appellée.
GUIBOUR. Ha! dame, qui d' estre loée
De bouche, de voiz et de diz
Sur touz les sains de paradis
Avez grace et prerogative,
Quant vous plaist moy lasse, chetive,
De si cruelle mort deffendre,
Conment le vous pourray je rendre,
Vierge Marie?
LE BAILLIF. Certainement je ne croy mie
Que ne soit arse ceste femme:
Trop a geté ce feu grant flame
Et trop ruvesche.
LE FRéRE. Sire, la fouaille estoit seche;
S' elle y a gangnié, si le prengne.
De sa mort n' ay je point d' engaigne
Ne de courroux.
LE BOURRIAU. Seigneurs, je voi ses liens rouz,
Ses cordes et toutes ses hars;
Riens n' y a que tout ne soit ars;
Mais elle encore est toute saine,
N' elle n' a plaie ne ne saine,
Ains est tresbelle.
LE FRéRE. Par le sanc et par la boiielle!
Murdriére, ainsi n' en irez pas;
Arse serez ysnel le pas,
Vous n' eschapperez pas a tant.
Cousin, tost alons querre tant
Palis, buissons, chaume, pesas,
Qu' elle de mort n' eschappe pas
A ceste empainte.
LE COUSIN. Je n' en ay pas voulenté fainte;
Cousin, alons.
LE FRéRE. Baillif, pour ce que nous voulons
Que soit tost celle murdriére arse,
Et en pouldre sa char esparse,
Vezci qui dit.
LE BAILLIF. Gettez sur li sanz contredit,
Afin que le feu tost esprengne,
Si que de lui riens ne remaingne
Ni char ny os.
NOSTRE DAME. Feu, je te deffens et forclos
Que sur ceste femme ne passes
Ne que de riens tu li meffaces.
Belle amie, confortes toy.
Alons men, seigneurs, vous et moy
Es cieulx lassus.
MICHIEL. Vostre gré ferons, dame. Or sus,
Gabriel, disons sans descors.
RONDEL. Et voirs est que li recors
De vo grace c' on recorde
Du Sathan maint cuer descorde.
Dieu poissans, misericors,
Vostre grant misericorde
Fait pecheurs avoir accorde.
GUIBOUR. Biaux seigneurs, pour misericorde,
Je vous pri a touz humblement
Et requier, faites belement,
Espargniez moy, si ferez bien:
Sachiez pour voir que nulle rien
Ne sens de chose c' on me face:
Gardée sui par la Dieu grace.
N' aiez honte d' estre vaincu;
Car nostre dame ay a escu,
Qui royne et dame est des cieulx,
Et m' a avec elle esté Diex
Garant aussi.
LE BAILLIF. Seigneurs, seigneurs, certes vezci
Miracles et tresgrant merveille,
C' onques mais ne vi sa pareille.
Nous avons malement pechié
Contre Dieu d' avoir empeschié
Ainsi laidement ce saint corps.
Guibour, chiére amie, yssiez hors
De ce feu. Je vous jur par m' ame,
Je voi bien qu' estes sainte fame.
Garde n' arez.
GUIBOUR. Sire, ce que conmanderez
Feray de cuer sanz attendue.
ça, vez me ci du feu yssue;
Que vous plaist, sire?
LE BAILLIF. Dame, du courroux et de l' ire
Que j' ay eu vers vous de fait,
Et de ce que vous ay meffait,
A genoulz et a jointes mains
Vous requier pardon; ou au moins
Que de vous ne soie maudis,
N' entre gent blamé ne laidis:
Ce vous requier.
GUIBOUR. Pour Dieu, levez sus. Je ne quier
Point, sire, telle humilité
Con ci faites, qu' en verité
Vers moy de riens n' estes meffaiz;
Car si grans par est mes meffaiz
Qu' ardoir cent foiz me deussiez.
Se tant ardoir me peussiez;
Mais par la doulceur nostre dame,
Que j' ay requis de cuer et d' ame,
Sauvée sui et garentie.
Se faite m' avez villenie,
La mére Dieu le vous pardoint,
Et bonne fin a touz nous doint;
Et je si fas.
PREMIER VOISIN. Or ne nous arrestons ci pas:
Avec li touz nous avoions
Et au moustier la convoions.
La graces a Dieu rendera
Et a sa mére aussi, qui l' a
Si bien gardée.
LE DEUXIESME VOISIN. C' est chose moult bien regardée
Et c' on doit faire.
LE BAILLIF. Ma chiére amie debonnaire,
Il dient voir. Alez devant;
Nous vous irons de près suivant
Trestouz ensemble.
GUIBOUR. Soit, sire, puis que bon vous semble;
Aussi l' avoie je pensé.
Amoureux Jhesus, qui tensé
Avez mon corps de mort vilaine
Et vous, dame, qui chastellaine
Estes du ciel emperial,
Septre de la gloire royal,
Et de grace fontaine et puis,
Tant con je scé, tant con je puis,
Vous et vostre doulz filz merci,
Et de tout mon cuer vous graci
Con celle qui d' or en avant
Tant conme je seray vivant
A mon pouoir vous serviray,
N' en riens je ne m' ocupperay,
Qu' a vous servir; c' est bien raison.
Sire baillif, en ma maison
Par vostre gré m' en puis j' aler?
Veuillez m' en response donner,
Se c' est voz grez.
LE BAILLIF. Oil, Guibour; mais vous n' irez
Pas seule, ains vous convoieray
Et compagnie vous tenray,
Moi et mes gens.
PREMIER SERGENT. Soions de mouvoir diligens:
Je vois devant.
DEUXIESME SERGENT. Et j' avecques vous. Or avant:
Voie ci, voie!
GUIBOUR. Seigneurs, pour ce convoy la joie
Vous doint Dieu a touz qui ne fine.
Or me laissiez par amour fine
Hui mais seule estre.
LE BAILLIF. Pensons de nous au retour mettre.
A Dieu, Guibour!
GUIBOUR. Sire, a Dieu, qui vous doint s' amour!
Et grans merciz!
PREMIER POVRE. Vierge, qu' a Dieu lez li assiz,
Gardés touz ceulx qui bien me font.
De povreté le corps me font.
Povre suis je, ce n' est pas doubte;
Car je ne say, quant l' en me boute,
Se ce sont ou bestes ou gent,
Ne ne congnois le plonc d' argent,
Ne coivre ne monnoie d' or.
Las! conme il pert noble tresor,
Bonne gent, qui pert la clarté!
Donnez moy, car en verité
Hui ne vi qui me donnast rien.
Au povre qui ne voit pas bien,
Pour l' amour Dieu!
GUIBOUR. Bon homme, ne meuz de ce lieu;
Attens, attens, je vois a toi.
Tien, biau frére, prie pour moy
Le roy celestre.
LE PREMIER POVRE. Ha! dame, Diex vous vueille mettre
Et tenir en santé de corps,
Et a la fin misericors
Vous soit a l' ame!
DEUXIESME POVRE. E! Dieux, est il homme ne fame
Qui me reconfort d' une aumosne?
Que Dieu, qui siet des cieulx ou throsne,
Li vueille aider qui m' aidera
Et qui s' aumosne me donrra!
Donnez moy pour la Dieu amour
Vostre aumosne, dame Guibour.
Je sui un povre mesnagier,
Qui n' ay que donner a mengier
A trois petiz enfans que j' ay,
Par ceste ame, ne je ne sçay
Conment en aie.
GUIBOUR. Ne fais, amis? or ne t' esmaie:
Tu n' en iras pas escondit,
Puis qu' il est ainsi com m' as dit:
Tien, ce sac plain de blef emporte,
Trousse bien tost, vuide ma porte;
Va, pour Dieu soit!
DEUXIESME POVRE. Dame, Dieux qui voit et perçoit
Des cuers le vouloir plainement,
Le vous rende au grant jugement
Qu' il doit tenir!
GUIBOUR. A Dieu en vueille souvenir,
Amis, si com je le desir,
Qui me doint faire son plaisir
De bien en miex.
TROISIESME POVRE. Regardez m' en pitié; que Diex,
Bonne gent, sa grace vous doint,
Et touz voz pechiez vous pardoint,
Si conme il fist la Magdalaine!
Vous veez bien a quelle paine
Je vif; n' y a point de faintise.
E! dame, par vostre franchise,
Faites me bien.
GUIBOUR. Et que te donrray je du mien,
Frére, de quoy ton corps miex vaille?
Par foi! je n' ay denier ne maille,
Si ay je de toy grant pitié.
Ore, pour la Dieu amistié,
Savoir vois se te puis rien faire.
Tien, tien, mon ami debonnaire,
De ce mantel te fas chasuble;
N' en ay plus. C' est de quoy m' afuble
Quant je vois hors.
TROISIESME POVRE. Jhesus, li doulx misericors,
Et sa doulce mére Marie
Ce hault don, ceste courtoisie
A cent doubles vous vueille rendre,
Et a sa part vous vueille prendre,
Dame, a la fin!
GUIBOUR. Amen. Je l' en pri de cuer fin
Qu' il le me face.
PREMIER VOISIN. Gautier, par le corps sainte Agace!
J' aloie savoir s' estiez prest:
D' aler a l' eglise temps est
Pour le bon jour.
DEUXIESME VOISIN. Oil, alons men sanz sejour.
N' est pas preudons qui en l' eglise
N' ot au jour d' ui le saint servise,
Conment au temple porté fu
De sa mére le doux Jhesu
Qui pour nous en croiz mort souffri,
Et conment pour li elle offri
Deux coulombiaux.
PREMIER VOISIN. C' est un des services plus biaux,
A mon gré, de toute l' année.
Alons nous ent sanz demourée:
L' eglise est loing.
DEUXIESME VOISIN. Prenons d' estre y a temps le soing.
Par mon hostel, sanz plus, alons;
Mon cierge y est, nous le prendrons,
Si l' offerray.
PREMIER VOISIN. Vezci le mien que je donrray
Aussi au prestre.
GUIBOUR. E! dame de qui Dieu voult naistre,
Pieça ne fu que je n' oysse
De vous la messe et tout l' office
Mais qu' ui; et si est la journée
Conment alastes aournée
Faire par grant devocion
Vostre purificacion
Et porter vostre enfant au temple:
C' est la cause qui les yex m' emple
De lermes, certes, a bon droit.
Je souloie avoir ci endroit
Prestre qui me disoit la messe
En mon oratoire sanz presse:
Or ne le puis je mais avoir,
Car donné ay tout mon avoir;
Neis un mantel que je mettoie
Quant vouloie aler par la voie,
Dame, ai donné pour vostre amour,
Si que, se je fas ci demour,
Je n' en soie de Dieu reprise;
Car, dame, se vois a l' eglise,
Les gens si me regarderont
Et puis de moy se moqueront
Pour ce que je suis ainsi nue,
Et je souloie estre vestue
Richement et de grans atours;
Mès m' esperance et mes retours
Est que par ce de moy mercy
Arez et vostre filz aussi:
Pour c' enclose cy me tenray,
Et de cuer vous deprieray
Devotement.
DIEU. Or sus, trestouz, sus: alons ment.
A ce jour de m' oblacion
Vueil de messe reffeccion
Donner Guibourt, qui la me sert
Si que bien avoir la dessert.
Vous deux anges, alez devant.
Mére, et vous les irez suivant;
Et entre nous irons après.
Anges, soiez en alant près
D' un biau chant dire.
MICHIEL. Nous le ferons voulentiers, sire,
Et de cuer, pour plusieurs raisons.
Gabriel, chier compains, disons
D' accort joyeux et sanz ire.
RONDEL. Humains, bien vous doit souffire
Qu' estes tant de Dieu amez
Qu' est mort pour vous a martire;
Humains, bien vous doit souffire
Et quant par nous vous fait dire
Qu' aussi de vray cuer l' amés,
Humains, bien vous doit souffire
Qu' estes tant de Dieu amez.
SAINT JEHAN. Empereris du Dieu empire,
S' il vous plaist, ce cierge offerrez.
Et vous ces deux aussi ferez.
Dame, je m' en vois par deça.
Tenez, Vincent amis, or ça.
Lorens, ce cierge ci arez,
Lequel offrir ja vous irez
Quant on ara chanté l' ofrande.
Tien, fame, et de voulenté grande
Et sainte, non pas come nice,
Loes Dieu de ce benefice
Que tu ci vois.
GABRIEL. Sus! conmençons a haulte vois
L' introite sanz contredit.
Le confiteor si est dit.
Michiel, or sus!
<Cy chantent touz ensemble; et puis va Nostre Dame a
l' offrande, et les autres après; et après dit Nostre Dame:>
NOSTRE DAME. Michiel, vas dire a celle femme
Qu' elle se fait donner grant blasme
Du prestre que tant fait muser,
Et que viengne sanz plus ruser
Offrir son cierge.
MICHIEL. Voulentiers, glorieuse vierge.
Dame, venez appertement
A l' offrande; trop longuement
Muse le prestre: si offrez.
C' est mal fait quant vous le souffrez
Attendre ainsi.
GUIBOUR. Amis, sachiez ce cierge ci
A li n' a autre n' offerray;
Mais chiérement le garderay.
Procéde le prestre et s' adresce
A oultre pardire sa messe,
Sanz moy attendre.
MICHIEL. Je vois ceste response rendre.
Glorieuse vierge Marie,
Dit m' a qu' elle ne venra mie,
Et que le prestre en sa preface
Procéde et sa messe parface
Hardiement.
NOSTRE DAME. Gabriel, or y vas briefment,
Et di que de venir s' avance,
Et que c' est d' offrir l' ordenance
Cierge a ce jour.
GABRIEL. Dame, g' y vois sanz plus sejour
Faire cy. Delivrez vous, fame,
Tost; ce vous mande nostre dame.
Apportez ce cierge a l' offrande.
Vous faites vilenie grande
De tant faire attendre le prestre.
Vueillez vous tost a voie mettre;
Venez offrir.
GUIBOUR. Il se peut bien de moy souffrir.
Die sa messe: a brief parler,
Je n' y pense point a aler,
Ne point n' iray.
GABRIEL. A ma dame ainsi le diray,
Puis que vous n' y voulez venir.
Dame, elle pense a retenir
Son cierge, et m' a dit en ce point
Pour certain ne l' offerra point:
C' est tout a brief.
NOSTRE DAME. Vas encore a li derrechief,
Et lui di que plus ne se tiengne
Que le cierge offrir tost ne viengne;
Et se du contraire s' efforce,
Oste li le cierge par force
Hors de ses mains.
GABRIEL. Dame, elle n' en ara ja mains.
Je revien a vous, belle amie.
Venez offrir, ne laissiez mie,
Ou ce c' on m' a chargié feray,
C' est que des poins vous osteray
Ce cierge, voir.
GUIBOUR. Vous n' arez ja tant de pouoir,
Amis, que le m' ostez du poing;
Et si vous deffens et enjoing
De touchier y.
GABRIEL. Puis que je le tieng ja par my,
J' en seray maistre.
GUIBOUR. Et g' i vueil si ma force mettre
Que certes il me demourra;
Ja de mes mains ne partira:
Pour nient tirés.
GABRIEL. Assez tost autrement direz.
Au mains ceci emporteray.
Dame des cieulx, je vous diray:
Vezci quanque j' en puis avoir;
Si ay j' assez fait mon devoir
De li oster.
DIEU. Avant! il ne fault point doubter
Que ce qu' elle en a vraiement
Gardera precieusement
Et par tresgrant devocion.
Or sus, nostre procession
Parfaisons en allant ès cieulx;
Et chantez, anges: c' est le miex
Que je cy voie.
MICHIEL. Vraiz Dieux, nous le ferons de joye,
Sanz vous de riens contredire.
RONDEL. Et quant par nous vous fait dire
Qu' aussi de vray cuer l' amez,
Humains, bien vous doit souffire
Qu' estes tant de Dieu amez.
GUIBOUR. A! dame, de voz granz bontez
Vous merci. Dieux! ou ai j' esté?
Il m' a semblé pour verité
Qu' en une grant eglise estoie
Ou com royne vous veoie
Et de sains avec vous grant presse;
La chantoit vostre filz la messe,
Dont saint Vincent estoit diacre
Et saint Lorens le soudiacre.
Un saint y ot, ce me sembla,
Qui un cierge a chascun livra
Et a vous conmença premier
Et a moy vint le derrenier,
Ains c' on conmençast l' introite;
Et puis, quant la messe fu dite
Jusqu' a l' offrende a voiz haultaine,
Alastes offrir premeraine,
Et puis touz les autres après.
Puis vint vostre ange moult engrès
Qu' offrisse le cierge qu' avoie,
Que tout entier garder cuidoie;
Mais pour ce que ne l' ay volu,
L' une moitié m' en a tolu
Et emporté par son effort;
Mais, dame, en ce me reconfort
Qu' il l' a si rompu et parti
Que le plus m' en a departi;
Et si congnois, vierge Marie,
Qu' ai esté en ame ravie:
Dont humblement je vous merci,
Et l' amoureux Jhesu graci
De quoy oublié ne m' a mie;
Ains m' a fait de sa courtoisie
Hui messe oir.
LA PREMIéRE NONNE. Guibour, vostre cuer esjoir
Devez bien en Dieu pour certain;
Car de cecy vous acertain
Qu' a vous toutes deux nous envoie
Dire que vous mettez a voie
De venir sanz dilacion
Prendre nostre religion
Et nostre habit.
DEUXIESME NONNE. Il veult que laissiez le labit
De ce monde pour li servir
Et aussi pour plus desservir
Es cieulx grant gloire.
GUIBOUR. Je vous diray parole voire:
Certes, c' estoit tout mon desir.
Or en alons au Dieu plaisir,
Puis que vous m' en devez mener;
Je suis toute preste d' aler
Avecques vous.
LA PREMIéRE NONNE. Or alons; mais je lo que nous
Chantons en alant toutes trois,
En louant le doulx roy des roys
Et sa mére, ou n' a point d' amer.
On vous doit bien, vierge, loer,
Quant pour nous d' enfer desnoer
Diex se fist en vous homme,
Qui de la mort nous acquitta,
Ou Adam touz nous endebta
Par le mors de la pomme.
Explicit.