Miracle de la fille du roi de Hongrie

Cy conmence un miracle de Nostre Dame, conment
la fille du roy de Hongrie se copa la main pour
ce que son pére la vouloit espouser, et un esturgon
la garda set ans en sa mulete.
LE CONTE. Sire roys, a nous entendez:
Que pensez vous? Trop attendez
A marier, si com me semble
Et a touz voz barons ensemble.
Regardez ou femme truissiez
A qui hoir masle avoir puissiez:
Il appartient.
PREMIER CHEVALIER DE HONGRIE. Il dit voir, sire, il esconvient.
Estre pieça le deussiez,
Afin q' un filz nous laississiez
Qui tenist après vous la terre,
Et qui nous deffendist de guerre,
S' estoit besoing.
LE ROY DE HONGRIE. Seigneurs, sachiez ne près ne loing
Femme nulle n' espouseray,
Se telle n' est com vous diray:
Que semblable soit a ma femme
Trespassée (dont Diex ait l' ame!),
De maniére, de sens, de vis;
Car je li juray et plevis
Que ja femme n' espouseroie
Ne ma compaigne n' en feroye,
S' elle n' estoit de sa semblance,
De son sens et de sa puissance;
Et s' une telle point savez,
Hardiement la me mandez:
Je la prendray.
LE CONTE. Sire, je vous y respondray:
Vous nous parlez cy d' un affaire
Tel qu' il ne se peut pas bien faire,
C' on vous puist trouver une femme
De biauté ressamblant ma dame,
De façon et de meurs aussy.
Deportez vous de ce point cy,
Car on n' en pourroit recouvrer;
Et ou la pourroit on trouver?
Je ne scé, voir.
LE ROY DE HONGRIE. Conte, je vous fas assavoir,
Puis que j' en ay fait serement,
Je le tenray certainement,
Conment qu' il aille.
LE CONTE. Puis qu' il vous plaist, vaille que vaille,
Je m' en tairay.
DEUXIESME CHEVALIER DE HONGRIE. Or nous traions ça; j' en diray
A vous deux ce que bon m' en semble.
Autre foiz, vous et moy, ensemble
L' avons nous de marier point,
Dont il nous dit tout en ce point
Con maintenant response avez;
Et dès lors nous deux, ce savez,
Envoyasmes par le pays
Telz qui ne sont folz n' esbahys,
Qui ont esté en mainte terre
Pour demander et pour enquerre
S' il peussent femme trouver
C' on peust ressamblant prouver
A la royne trespassée.
Longue saison a ja passée,
Et n' ont fait rien.
PREMIER CHEVALIER DE HONGRIE. Vous dites voir, je le sçay bien:
C' est chose aussi qui ne peut estre.
Brief, il nous y fault conseil mettre
Par quelque voye.
LE CONTE. Il esconvient c' on y pourvoie:
Ce seroit a nous grant meschief
S' il mouroit et fussions sanz chief
Et sanz hoir venu de son corps.
A mettre y conseil bien m' accors,
Ains que plus tarde.
DEUXIESME CHEVALIER DE HONGRIE. Seigneurs, vezci que je regarde:
Sa fille est assez sage et belle,
Et si est ja grant damoiselle;
De meurs ressamble et de faiture
A sa mére miex que painture.
Qui li conseilleroit a prendre,
En feroit il ore a reprendre
Trop malement?
PREMIER CHEVALIER DE HONGRIE. Je croy que non, certainement,
Mais que Diex ne s' en courrouçast
Et qu' aussi dire on li osast.
Qui li dira?
LE CONTE. Je sui celui qui le fera
Hardiement, par sainte Crois!
Ralons nous ent a li touz trois:
Si orrez conment parleray.
Sire, sire, je vous diray:
Nulle part trouver ne pouons
Femme pour vous; et si avons
Fait cerchier jusques oultre mer,
Qui que nous en doye blamer.
Et puis qu' avoir ne voulez femme
S' elle ne ressemble ma dame
Et qu' en touz cas soit sa pareille,
Je vous lo (mais que Dieu le vueille
Et sainte eglise s' i consente)
Que vostre fille, qui est gente
Damoiselle et assez d' aage,
Prenez, voire, par mariage;
Car plus n' en savons qui ressemble
La royne: si qu' il nous semble
Qu' ainsi le fault.
LE ROY DE HONGRIE. Seigneurs, ains que par mon deffault
Mon regne sanz hoir demourast
Ne qu' estrange roy s' i boutast,
Je feroye ce que vous dites.
Si croy je que pieça n' oistes
Parler de fille femme a pére;
Et nonpourquant, mais qu' il m' appére
Que du pape en aie l' ottroy,
A la prendre a femme m' ottroy
Sanz contredit.
PREMIER CHEVALIER DE HONGRIE. Or avant: puis qu' il a ce dit,
Il ne nous fault qu' un homme sage
Qui face au pape ce message
Tost et ysnel.
DEUXIESME CHEVALIER DE HONGRIE. J' en bailleray un bon et bel
Et sage assez, a un mot court;
Et si scet l' estat de la court
De par dela.
LE CONTE. Faites le nous venir, or ça:
Je vous em pri.
PREMIER CHEVALIER DE HONGRIE. Je le vois querre sanz detry.
Remond, je vous truis bien a point:
Venez vous en, sanz tarder point,
Avecques moy.
REMON. Voulentiers, mon seigneur, par foy.
Mais quelle part ne pour quoy faire?
Est nul qui me vueille meffaire?
Dites me voir.
DEUXIESME CHEVALIER DE HONGRIE. Remon, je vous fas assavoir
Pour vostre prouffit vous vien querre.
Venez ent avec moy bonne erre.
Vezci celui que dit vous ay,
Seigneurs; dites li sanz delay
Qu' avez a faire.
LE CONTE. Il fault, mon ami debonnaire,
Que pour le roy au pape alez;
Et faites tant qu' a li parlez:
Si li direz du roy conment
Il a voué que nullement
Femme n' ara par mariage,
Se ressamblant n' est de corsage
A celle qu' il ot espousée
Ja pieça, qui est trespassée;
Et conment, par mer et par terre,
Ses gens ont fait cerchier et querre,
Et si n' en treuve on point de telle
Fors une fille qu' il a bele;
Qu' il consente qu' il ait a femme
Ceste fille, puis qu' autre dame
Ne peut on nulle part trouver
C' on puist si ressamblant prouver
A la royne devant dite,
Ne de quoy soit de son veu quitte
Si bien con de sa fille avoir:
Or en faites vostre devoir.
Vezci la supplicacion
Qui contient nostre entencion.
Amis, alez.
REMON. Mes seigneurs, plus ne m' en parlez,
J' en feray quanque je pourray.
A Dieu touz vous conmanderay.
Dès maintenant me met a voie.
Diex et ma dame sainte Avoye
Me doint grace, quant je venray
Au pape et li supplieray,
Que ma supplicacion passe,
Et la besongne du roy face:
S' aray bien mon temps emploié.
Mon sens fault estre desploié.
Puis que la voy estre saint pére,
Il fault que devant li m' appére,
Sanz moy plus mettre en negligence.
A vostre sainte reverence
Soit honneur, tressaint pére, faite!
Oir vous plaise une requeste
Que faire entens.
LE PAPE. S' escripte l' as, si la me tens
Sanz plus riens dire.
REMON. Oil, je l' ay. Tenez, chier sire,
Et la veez.
LE PAPE. Biaux seigneurs, ne me deveez
Conseil; vezci: une grant chose
Ceste requeste cy propose:
Le roy de Hongrie une femme
Ot ja pieça (dont Diex ait l' ame!)
Qui morte est. Le roy veu fait a
Que jamais plus femme n' ara,
Se ressamblant n' est la premiére
De façon, de corps, de maniére.
Or ne la peut on trouver tele;
Mais quoy? une fille a de celle
Qui trespassée est, ce me semble,
Qui sa mére en touz cas ressemble,
Qu' il me requiert a femme prendre.
Ce peut il faire sanz mesprendre
Contre la foy?
PREMIER CARDINAL. Je vous respons, quant est de moy,
Il n' est pas personne conmune
En tant conme il est roy, c' est une;
Ains est un homme singulier,
Si que a tel pot tel cuillier.
Je tien qu' il duit bien c' on li face
Plus qu' a homme d' autre estat grace;
Et vous qu' en dites?
DEUXIESME CARDINAL. Pour estre miex de son veu quittes
Peut on ottrier sa demande;
Mais une autre chose demande:
Amis, a il, faites m' en sage,
Plus d' enfanz nez en mariage
Que la fillette?
REMON. Nanil, et c' est ce qui dehaite
Le peuple et met en grant soussi;
Car, sire, s' il mouroit ainsi
Sanz avoir masle hoir de son corps,
Meschiez, annuiz, guerrez, descors
Entre le peuple et les seigneurs
Se mouveroient, les greigneurs
Que vous sachiez.
DEUXIESME CARDINAL. Je lo donc que vous li faciez,
Saint pére, ce qu' il vous requiert,
Puis que vostre licence quiert
Du mariage.
PREMIER CARDINAL. Vous avez droit, sire, aussi fas ge;
C' est du miex, a bien regarder,
Tant pour le veu qu' a fait garder
Conme pour faire son devoir,
S' a Dieu plaist, de lignie avoir
Qui le peuple gart et deffende
Qu' estrange seigneur ne l' offende
Ne ne mefface.
LE PAPE. Or soit fait. Et, sanz plus d' espace,
Je vueil que vous le delivrez
Et de ce bulle li livrez,
Que je le vueil.
DEUXIESME CARDINAL. Sire, je feray vostre vueil.
Amis, le saint pére gracies,
Et prenant congié le mercies
Sanz detriance.
REMON. Saint pére, Dieu, par sa puissance,
Vous ottroit longue et bonne vie,
Et vous vueille de male envie
Aussi deffendre!
LE PAPE. La beneiçon Dieu descendre
Puist sur toy! la moie te doing.
Amis, or va, pren cure et soing
De ton retour.
DEUXIESME CARDINAL. Alons men la en ce destour,
Amis: je t' y deliverray,
Et ta bulle te liverray.
Or tien, va t' en.
REMON. Sire, Dieu vous mette en bon an!
Par vostre congié m' en iray.
Or sçay je bien ne fineray
Tant que je resoie en Hongrie.
Mais qu' essoinne ne me destrie,
G' y pense assez briément a estre;
Car a errer lié me fait mettre
Ce que bonnes nouvelles porte.
C' est fait. Je voi de cy la porte
Ouverte du manoir le roy:
Bouter me vueil ens sanz desroy,
Combien que soie traveilliez.
Mes seigneurs, touz vous face liez
Dieu de lassus!
DEUXIESME CHEVALIER DE HONGRIE. Remon, bien veignant! liéve sus.
Quelles nouvelles?
REMON. Quelles, sire? bonnes et belles.
Vezci de quoy.
LE CONTE. Traions nous ça plus a recoy,
Et veons que c' est. C' est latin.
Tenez; nient plus qu' un viel matin
N' y congnois rien.
PREMIER CHEVALIER DE HONGRIE. ça, ça! je le vous diray bien,
Mais q' un po l' aie pourveu.
Selon ce que j' ay ci leu,
Le roy sa fille espouser peut;
Car le pape le mande et veult
Par ceste bulle.
DEUXIESME CHEVALIER DE HONGRIE. Sanz cy faire arrestoison nulle,
Alons li dire.
LE CONTE. Alons sanz plus cy estre. Sire,
Le saint pére, de sa puissance,
Vous donne congié et liscence
De vostre fille a femme prendre
Si com bien le porrez entendre
Par ceste lettre.
LE ROY DE HONGRIE. Puis que c' est chose qui peut estre
Faicte par le gré de l' eglise,
De moy sera a femme prise,
Je vous promet. Venir la voy:
ça, pucelle, parlez a moy:
Des barons touz de ce pais
Sui d' espouser vous envays;
Si sera fait.
LA FILLE. Pére, ja, se Dieu plaist, tel fait
N' avenra qu' en baillons noz foiz.
Vous m' engendrastes une foiz;
Et, se vous n' estiés pas mon pére,
Si espousates vous ma mére:
Par ce point devez vous savoir
Que la fille et la mére avoir
Ne pouez mie.
LE ROY DE HONGRIE. Il fault qu' il soit fait, belle amie,
Je le vous dy brief sanz ruser;
Et fole estes de refuser
Chose que vueille.
LA FILLE. De faire chose dont se deulle,
Quant mort serez, l' ame de vous,
Pour Dieu vous gardez, pére doulx.
De moy arez povre solaz,
S' en la fin en dites: halaz!
Et je tien n' en serés pas quittes,
S' a effect mettez ce que dites;
Et oultre, si fault que j' assemble
Avec vous, quant serons ensemble,
Conment arez char si osée
Que de vous je soie adesée
Conme il est de conmun usage
Es assemblez en mariage?
Dites me voir.
LE ROY DE HONGRIE. C' est pour nient: je vous vueil avoir,
Et n' en parlez plus au contraire;
Car nulz ne me pourroit retraire
De ce courage.
LA FILLE. Pére, puis que ce mariage
Ne puis nullement destourner,
Il fault que me voise atourner
Dont autrement.
LE ROY DE HONGRIE. Vous dites voir; alez briément.
Vous avez robes et joiaux
Des plus riches et des plus biaux:
Faites que vous soiez parée,
Et revenez sanz demourée
Icy a moy.
LA FILLE. Voulentiers, sire, par ma foy.
E! Dieux, ou a pris ce courage
Mon pére, qui par mariage
Me veult avoir et prendre a femme?
Ce me semble si grant diffame
Qu' a touz jours reprouche en aray.
Conseilliez moy que je feray,
Vierge qui sanz pechié naquistes
Et sanz pechié aussi vesquistes
Tant conme fustes en ce monde.
Vierge sur toutes pure et monde,
Ne consentez ja qu' il appére
Que je soie femme mon pére;
Car miex voulroie mort souffrir
Que mon corps a ce faire offrir,
Tant me semble estre orrible chose!
Et avant qu' il soit, je propose
Que ceste main me copperay
Et en la mer la jetteray
Afin qu' il n' ait plus de moy cure.
Mais je vous depri, vierge pure,
Que de ce meshaing soie quitte,
Et vers Dieu me tourt a merite;
Car j' ay plus chier une main perdre
Qu' a tel mariage moy erdre,
Qui, pour un po de gloire vaine,
Me mette en pardurable paine:
Pour ce, sanz plus terme ne jour,
Delivrer m' en vois sanz sejour
Et sanz respit.
LE ROY DE HONGRIE. Seigneurs, je ne sçay s' en despit
Ma fille a ce que la vueil prendre;
Elle me fait yci attendre,
Si m' ennuie que tant demeure:
Je vous em pri que sanz demeure
La m' alez querre.
PREMIER CHEVALIER DE HONGRIE. Mon chier seigneur, je vois bonne erre,
Puis qu' il vous plaist.
LA FILLE. Or devera cesser le plait
A mon pére dès ores mais
Qu' il me prengne a femme jamais;
Car, voir, il n' ara riens gangnié,
S' il espouse un corps meshangnié
Conme je suy.
PREMIER CHEVALIER DE HONGRIE. Dame, ne prenez a annuy
Se de venir vous vien haster:
Le roy, ce sachiez, sanz doubter,
Si m' y envoie.
LA FILLE. Sire, a li aussi m' en venoye,
Toute pensant, n' en doutez pas.
Or y alons ysnel le pas.
Par ceste voie.
LE ROY DE HONGRIE. Fille, tart m' est que je vous voie
Mon espousée.
LA FILLE. D' une chose moult desguisée
Et qui trop est contre raison
Parlez, si faites mesprison.
Quelle l' arez vous gaangnée,
Se prenez une meshangnée?
Regardez: j' ay perdu un membre.
Or vous pri, pour Dieu, qu' il vous membre
Qu' une foiz engendré m' avez;
Et se Dieu congnoistre savez,
Doubte arez, ains que m' aiez pris,
Que de li n' en soiez repris;
Bien dire l' ose.
LE ROY DE HONGRIE. As tu pour ce fait ceste chose
Que tu ne soies pas ma femme?
Voir, tu en mourras a diffame,
Par mon chief, depiteuse garce!
Je vous conmans qu' elle soit arse,
Seneschal, tost, sanz plus attendre;
Ou, certes, je vous feray pendre,
S' il n' est ainsi.
DEUXIESME CHEVALIER DE HONGRIE. Sire, n' en soiez en soussi,
Je ne vous vueil en riens desdire;
Mais, pour Dieu, refraingniez vostre yre:
C' est vostre fille.
LE ROY DE HONGRIE. Brief, je n' y aconte une bille.
De devant moy, plus ne tardez,
L' ostez, alez, et si l' ardez
Isnellement.
DEUXIESME CHEVALIER DE HONGRIE. Sire, a vostre conmandement
Puis qu' il vous plaist, obeiray;
En riens ne vous contrediray.
Avant, Guyot, et toy, Jourdain
Mettez vous deux a li la main,
Menez la la.
LE PREMIER SERGENT. Sire, tantost fait vous sera.
Jourdain, il fault que la prenons
Nous deux et que nous l' en menons
En celle place.
DEUXIESME SERGENT. Or soit donques fait sanz espace.
N' y a plus, venez vous ent, dame.
Voir, c' est pitié quant telle fame
Com vous estes, fille de roy,
Convient mourir a tel desroy
Com vous venez.
DEUXIESME CHEVALIER DE HONGRIE. Ho! seigneurs, touz coyz vous tenez.
Guiot, Cochet querir iras,
Le bourrel, et si li diras
Ce qu' il a cy a besongnier,
Et qu' il face, sanz eslongnier,
Apporter cy ce qu' il li fault,
Et qu' il n' y ait point de deffault.
Or va bonne erre.
LE PREMIER SERGENT. Je ne fineray de le querre,
Sire, tant que trouvé l' aray.
En sa maison querre l' iray
Premiérement.
LA FILLE. Vray Diex, qui sanz conmencement
Et sanz fin es en trinité
Une essance, une deité;
Qui homme a ton semblant feis,
Et en paradis le meis
Terreste, ou pouoit a delivre,
Sanz mort, en santé touz jours vivre,
Mais de ce lieu, pour son meffait,
Fu chacié et mis hors de fait;
Et depuis, pour li pardonner
Son meffait, voulz ton filz donner,
Lequel de nostre humanité
Voult, par excellent charité,
Sa deité sa jus couvrir
Pour nous des cieulx l' entrée ouvrir,
Et pour faire a Dieu d' omme accorde;
Ha! pére de misericorde,
Confortez la triste et dolente
Qui se complaint et se lamente
Et est en grant confusion
Et en grant desolacion.
Tresdoulce mére Dieu, conment
Me pourroit il estre autrement
Que grant doleur en moy n' appére?
Je voy que de mon propre pére
Je sui condampnée a ardoir;
Celui qui plus deust avoir
Par nature de moy pitié
M' a en si grant ennemistié
Qu' il conmande que je soie arse,
Con fusse une murtriére garse.
Lasse! n' est ce pas cruauté?
Si est, et povre feaulté,
Mesmement que c' est sanz meffait,
Mais pour pechié fouir de fait
Me suis copée ceste main.
Tresdoulx Diex, encores miex l' aim
Avoir perdue et mort sentir
Que moy a tel fait consentir
Que mon pére me cogneust
Ne charnelment a moy jeust;
Et se pour ce mourir me fault,
Doulx Diex qui es lassus en hault,
Quoy que le corps soit mis en cendre,
Doulx Dieu, vueilles m' ame deffendre
Des ennemis.
LE BOURREL. Se j' ay a ci venir trop mis,
Sire, ne vous vueille desplaire.
De qui voulez justice faire?
Dites le moy.
DEUXIESME CHEVALIER DE HONGRIE. Ne te haste pas; tien te coy.
Seigneurs, sachiez, vouloir ne cuer
N' ay de consentir a nul fuer
Que ceste damoiselle muire,
Et me deust le roy destruire
Et mon corps ardoir ou noier.
De pitié m' ont fait larmoier
Ses complains et ses doulx regrez;
Si vueil que vous soiez engrez,
Sanz ce que cy plus la tenez,
Mais qu' en ma prison la menez.
Encore ennuit ordonneray
Conment, se puis, ly sauveray
La vie. Alez.
LE PREMIER SERGENT. Puis qu' il vous plaist, plus n' en parlez;
Je tien que bien dictes, par m' ame.
Levez sus de cy, levez, dame,
Venez vous ent.
LA FILLE. Sire, a vostre vueil bonnement
Obeiray.
DEUXIESME CHEVALIER DE HONGRIE. Tu feras ce que te diray,
Cochet, et riens n' y perderas:
Un grant feu cy m' alumeras,
Conme s' ardisses une famme;
Et se, d' aventure, aucune ame
Te dit: "De qui fait on justice?"
Ne soies de respondre nice;
Mais en appert et en recoy
Dy qu' arse est la fille le roy
Pour son meffait.
LE BOURREL. Sire, en l' eure vous sera fait,
Puis que vous le me conmandez,
Ainsi que vous le demandez.
Or ça! je me vueil entremettre
De la buche eslire et la mettre
Aussi conme entasser se doit,
Afin que le feu par tout voit
Et par tout arde.
DEUXIESME SERGENT. Sire, mise est en sauve garde
En vostre hostel la fille au roy,
Moult esbahie et sanz arroy
Fors de tristesse.
DEUXIESME CHEVALIER DE HONGRIE. Tandis que le bourrel adresce
Son feu, tenez vous ci touz deux;
Oster li vois, se puis, ses deulx,
Et par mer l' en envoieray,
Et a mon pouoir li donrray
Au cuer leesce.
LE ROY DE HONGRIE. Seigneurs, je voy la grant feu: qu' est ce?
Alez y savoir, je vous pri,
Et me rapportez sanz detry
Que c' est c' on art.
PREMIER CHEVALIER DE HONGRIE. Je vois, sire, se Diex me gart.
Sire, de savoir sui engrans
Pour quoy on a fait feu si grans
Ici endroit.
DEUXIESME CHEVALIER DE HONGRIE. Conmandé m' a, soit tort ou droit,
Le roy que sa fille ardoir face;
Et je l' ay fait. Jamais en face
Ne la verra.
PREMIER CHEVALIER DE HONGRIE. Certes, mal encore en venra.
Pour li m' en vois triste et dolent.
De le dire au roy n' ay talent.
Ha! Jouye doulce et courtoise,
De vostre mort, certes, me poise;
Se je le peusse amender!
Dieu ce meffait vueille amender:
Si fera il.
LE ROY DE HONGRIE. Vien avant; dy moy, qu' i a il,
Qu' i as esté?
PREMIER CHEVALIER DE HONGRIE. Je n' en puis savoir verité;
Mais vostre seneschal y est:
Mandez l', il vous dira que c' est
De point en point.
LE ROY DE HONGRIE. Tu qui as ce doublet pourpoint,
Vaz bien tost mon seneschal dire
Qu' a moy viengne sanz contredire
Parler un poy.
REMON. Je vois, treschier sire, par foy.
Cy endroit plus ne vous tenez,
Seneschal; mais au roy venez
Tost: il vous mande.
DEUXIESME CHEVALIER DE HONGRIE. Si yray de voulenté grande,
Puis que c' est, amis, son conmant.
Sire, je vien a vostre mant:
G' y sui tenuz.
LE ROY DE HONGRIE. Dy me voir, puis qu' es cy venuz:
Est ma fille arse?
DEUXIESME CHEVALIER DE HONGRIE. Sire, oil. Miex amasse en Tarse
Avoir esté prisonnier pris
Que ce qu' eust telle mort pris;
Mais je ne vous osay desdire.
En gloire avec Dieu, nostre sire,
Soit l' ame d' elle!
LE ROY DE HONGRIE. Ha! mére Dieu, vierge pucelle,
En ses laz m' a bien Sathan pris.
J' ay trop vilainement mespris
D' avoir fait sanz cause mourir
Celle que tenser et garir
De mort encontre touz deusse,
S' en moy raison ne sens eusse;
Dont se pour li me desconforte,
J' ay droit; car je doubt ne m' emporte
En enfer l' ennemi touz vis.
Hair doy bien, ce m' est avis,
Qui d' elle prendre m' enorta
Et nouvelles m' en apporta
Premiérement.
LE CONTE. Sire, sire, qu' est ce? conment
Vous pensez vous a demener?
Voulez touz jours tel dueil mener?
Autrement faire vous esteut,
Puis que ceste chose on ne peut
Amender. C' est tout dit en somme;
Laissiez se dueil, monstrez vous homme,
Et l' oubliez.
LE ROY DE HONGRIE. Conte, jamais ne seray liez,
Et j' ay bien cause en verité:
J' ay fait trop grant iniquité
Contre Dieu, si m' aviseray
Conment a Dieu m' apaiseray
De mon meffait.
LE CONTE. Sire, ce sera le miex fait
Que puissiez faire.
LE PREVOST. Treschier sire, mais que desplaire
Ne vous vueille, je vous diray
Nouvelles; pas n' en mentiray,
Mais est tout voir.
ROY D' ESCOSSE. Prevost, je le vueil bien savoir.
Dites, amis.
LE PREVOST. Hyer, chier sire, m' estoie mis,
Avec de mes gens trois ou quatre,
Jusques sur le port pour esbatre;
Ainsi que je fu la, avint
Q' une nasselle par mer vint
Sanz gouvernement par mer nul,
Sanz trait de cheval ne de mul,
Sanz mast, sanz aviron, sanz voille,
Quel qu' il fust, de soie ou de toille;
Et si s' arriva droit au port.
Et je, qui estoie en desport,
M' en alay la sanz attendue,
Quant a rive la vy venue.
Dedans n' avoit q' une pucelle;
Mais je croy que c' est la plus bele
Creature, se Dieu me gart,
C' on peust trouver nulle part.
Et ne demandez pas conment
Elle est vestue richement,
Car nulle royne terrestre
Ne pourroit plus richement estre.
En mon hostel l' en amenay,
De son estat li demanday
Et qui l' avoit ça amenée
Et de quelles gens estoit née;
Mais riens ne m' en a volu dire.
Toutesvoies, je pense, sire,
Que s' il vous plaist, cy l' amenroye
Et si la vous presenteroye
Pour sa biauté.
ROY D' ESCOSSE. Prevost, se Dieu vous doint santé,
Puis que si belle est con vous dites,
Faites tost et ne me desdites:
Alez la querre.
LE PREVOST. Sire, pour vostre amour acquerre,
Vostre conmandement feray:
En l' eure la vous amenray.
Vezci ce que vous ay dit, sire;
A vostre avis, me vueilliez dire,
Est elle belle?
ROY D' ESCOSSE. Levez sus, levez, damoiselle.
Vous soiez la tresbien venue.
Grant joie ay de vostre venue,
Se Dieu me voie.
LA FILLE. Mon chier seigneur, honneur et joie,
Vie de bien en miex touz dis,
Vous otroit Diex de paradis
Par son plaisir.
ROY D' ESCOSSE. Sus, sus! j' ay de savoir desir,
M' amie, dont vous estes née
Et qui vous a cy amenée
En ceste terre.
LA FILLE. Pour Dieu, vous deportez d' enquerre,
Treschier sire, de mon ancestre
Ne de quelles gens je puis estre.
S' en estrange lieu m' a mis Diex,
Une autre foiz me fera miex,
Quant li plaira.
ROY D' ESCOSSE. M' amie, voirement fera.
Au moins me direz vostre nom:
Je tien que de gens de renom
Estes estraitte.
LA FILLE. Quoy qu' estrange soie ore faitte,
Chier sire, j' ay nom Berthequine.
Or vous suppli, par amour fine,
Que plus avant ne m' enquerez:
Car par moy rien plus n' en sarez,
N' omme vivant.
ROY D' ESCOSSE. Je m' en tenray d' ore en avant,
Ja pour ce ne vous esmaiez.
Mére, je vueil que vous l' aiez
En vostre garde.
LA MéRE. Filz, s' elle mesmes ne se garde,
Je ne la pourroie garder.
A ce point devra regarder,
Se fait que sage.
LA FILLE. Dame, se Dieu plait, mon courage
A mal faire ne tournera;
Mais sui celle qui vous sera
Com chamberiére.
ROY D' ESCOSSE. Non serez pas, m' amie chiére;
Mais vous serez sa damoiselle.
Tant quant, une bonne nouvelle
Vous puist venir.
LA FILLE. A Dieu en vueille souvenir,
Chier sire: il m' en fust bien besoing;
Mais ne peut estre, car trop loing
Sui de mon lieu.
ROY D' ESCOSSE. Se loing en estes, de par Dieu,
Par aventure vous avez
Des amis que pas ne savez
Bien près de vous.
LA FILLE. Ceulx que g' y ay, Dieu les gart touz
De mal, d' annuy et d' encombrier,
Et vous, chier sire, le premier,
Pour tant que moy vous a pleu,
Ce me semble, avoir receu
En vostre grace.
ROY D' ESCOSSE. Il n' est rien que pour vous ne face,
M' amie, c' est a brief propos.
Un po vois prendre de repos;
Avec ma mére demourez
Ceens: ce sachiez, vous n' arez
Pis qu' elle ara.
LA FILLE. Je feray ce qu' il lui plaira
Et a vous, sire.
LA MéRE. Damoiselle, je vous vueil dire
Que vous estes une musarde
Et une avolée coquarde.
Conment! cuidez vous estre amée
D' un roy de telle renommée
Qu' est mon filz et de tel puissance?
J' ay bien veu la contenance
Qu' entre vous deux vous avez fait
De regart, de parler, de fait.
Dame esmoingnonnée et sauvage,
On ne scet de vostre lignage
Ne de vous aussi qui vous estes,
Et pareille a mon filz vous faites!
Ostez, ostez!
LA FILLE. Certes, ma dame, ne doubtez:
Ma pensée onques ne m' entente
Ne fu a ce. Lasse, dolente!
Certes, je seroie bien fole
Se de ce tenoie parole.
Ne sui pas digne d' estre amée
De lui ne s' amie clamée,
N' onques, certes, je n' y pensay;
Je ne vail pas tant, bien le say;
Et vous avez dit verité,
Que ne savez mon parenté;
Et, se j' ay une main perdue,
Tant sui je plus povre esperdue
Sanz reconfort.
LA MéRE. Or plourez ileuc bien et fort;
Il ne m' en chaut.
ROY D' ESCOSSE. N' ay peu dormir, tant ay chaut.
Qu' est ce la? Qu' avez, Bethequine,
Qui si plourez? Par amour fine,
Dites le moy.
LA FILLE. Sire, j' ay cause, en bonne foy,
Se je pleure et fas mate chiére:
On ne m' a pas ceens moult chiére,
Ce m' est avis.
ROY D' ESCOSSE. Et qui? faites m' en tost devis;
Savoir le vueil.
LA FILLE. Sire, de nullui ne me dueil;
Mais ma chiére dame m' a dit,
Vostre mére, par grant despit,
Qui me fait estre si osée,
Qui sui une garce avolée,
Qu' amée cuide estre de vous.
Certainement, mon seigneur doulx,
Onques n' y pensay, Dieu le scet.
Je ne sçay pas s' elle me het;
Mais, conme dame a moy irée,
M' a appellée esmoingnonnée,
Et c' on ne scet de mon ancestre
Qui il est ne qui il peut estre.
Et telz paroles mal me font
Tant que tout ou ventre me font
Le cuer en lermes.
ROY D' ESCOSSE. Par mon chief, ainçois que li termes
D' uit jours, non pas de sis, se passe,
Se j' ay de vie tant d' espace,
Estat et non arez assez.
De ce qu' elle a dit vous passez
Par amour, doulce Bethequine;
D' Escosse vous feray royne,
Foy que doy Dieu.
LA FILLE. Sire, je suy de trop bas lieu:
Tel estat ne m' appartient mie.
Que dira vostre baronnie,
S' une meshaingnie prenez?
Il diront qu' estes forcenez
De cecy faire.
ROY D' ESCOSSE. Dame, a qui qu' il doie desplaire,
Je vous ains tant de bonne amour
Qu' il sera fait et sanz demour.
Venez avant, venez, Lambert;
Savoir vueil con serez appert.
Alez tost, sanz estre esbahys,
Dire au vesque de ce pays
Qu' a moy viengne a l' ostel de Chestre,
Et que la marié vueil estre
A ce jour d' uy.
LEMBERT. Sire, se Dieu me gart d' anuy,
G' y vois, et si ne fineray
Tant que mené je l' i aray
Et dedens mis.
ROY D' ESCOSSE. Seigneurs, qui estes mes amis,
En l' ostel de Chestre adresciez
Ceste dame, et la la laissiez,
Et revenez a moy icy.
Or vous delivrez, sanz nul sy,
Je vous em pri.
PREMIER CHEVALIER D' ESCOSSE. Il vous sera fait sanz detry,
Mon seigneur chier.
DEUXIESME CHEVALIER D' ESCOSSE. ça, dame, ça, sanz plus preschier,
Venez vous ent, puis qu' au roy haitte:
Onques mais si grant honneur faitte
Ne fu a femme conme arez,
Qu' au jour d' uy royne serez
De touz clamée.
PREMIER CHEVALIER D' ESCOSSE. Il pert bien que de cuer amée
L' a loyaument.
DEUXIESME CHEVALIER D' ESCOSSE. Nous avons ci fait; ralons ment
Devers le roy.
PREMIER CHEVALIER D' ESCOSSE. De ce nous fault mettre en arroy.
Or avant! n' y ait sejourné.
Sire, a vous sommes retourné
Tost, ce me semble.
ROY D' ESCOSSE. C' est voirs; or en alons ensemble,
Tant que de Chestre soions près
Je vois devant, venez après,
Et me suivez.
LA MéRE. Bien est mon filz du sens desvez,
Qui femme prent par mariage
C' on ne congnoist ne son lignage,
Mais est venue d' aventure,
S' est si deffaitte creature
Que d' un braz la main a perdue.
De dueil en sui trop esperdue,
Conment l' a peu tant amer.
Maloite soit l' eure qu' en mer
Ne noya quant elle y estoit!
Royne sera: or voit, voit.
Pour mon honneur aux noces vois;
Mais, certes, ains qu' il soit un mois,
De touz poins je les laisseray
Et loing d' eulx demourer iray,
Puis qu' ainsi est.
LEMBERT. Sa! menestrez, estes vous prest?
Faites mestier.
PREMIER CHEVALIER D' ESCOSSE. Sire, huimais ne vous est mestier
Fors que de faire liée chiére;
Ne vous aussi, ma dame chiére.
Je vous di voir.
ROY D' ESCOSSE. Pour ce que puisse miex avoir
Les nobles d' Escosse a ma feste,
Et que faite soit plus honneste,
D' uit jours la voulray retarder
Et les nobles par tout mander
Qu' il viengnent cy.
DEUXIESME CHEVALIER D' ESCOSSE. Chier sire, c' est bien dit ainsi
Et est grant sens.
LA MéRE. Biau filz, un petit mal me sens:
Je vous pri plus ne me tenez
Ici; mais congié me donnez
Que je voise au chastel de Gort
Reposer et prendre deport
Trois jours ou quatre.
ROY D' ESCOSSE. Dame, bien vueil qu' ailliez esbatre;
Mais n' y faites pas tant demour
Qu' a nostre feste, par amour,
Ne soiez cy.
LA MéRE. De ce ne soiez en soussi:
G' y pense estre, s' il plaist a Dieu.
Puis que je sui hors de son lieu,
Mais em piéce ne m' y verra;
Face tel feste qu' il voulra:
Riens n' y aconte.
LE HERAUT. Or oiez, seigneurs, roy et conte,
Chevaliers et ceulx a qui duit,
La cause qui ci m' a conduit.
Savoir vous fas, et n' est pas doubte,
Qu' a quinzaine de Penthecouste
Lez Senliz le tournay sera:
Un puissant roy si le fera,
Qui n' iert pas de chevaliers seulx;
Il ara les François et ceulx
Qui se dient de Picardie,
Et s' ara d' autres, quoy c' on die;
Si ques qui acquerre voulra
Honneur viengne, et il trouvera
A qui se pourra donoier,
S' il a desir de tournoier
Ne d' avoir pris.
LEMBERT. Mon seigneur, un tournoy est pris
A faire, après la Penthecouste,
D' un roy qui de gent a grant route,
Ainsi conme dit un heraut
Qui la hors l' a crié bien hault
Trestot en l' eure.
ROY D' ESCOSSE. Or me dy, se Dieu te sequeure:
Se fera il?
LEMBERT. Puis que herault le crie, oil;
Et dit qu' il sera lez Senliz,
En la terre des fleurs de liz;
Je vous dy voir.
ROY D' ESCOSSE. Ne lairoie pour grant avoir
Que n' y voise certainement;
Estre y vueil du conmencement
Jusqu' en la fin.
PREMIER CHEVALIER D' ESCOSSE. Sire, je vous pri de cuer fin
Que vous me faciez ceste grace
Que compagnie je vous face:
Si verray France.
ROY D' ESCOSSE. Il me plaist, amis, sanz doubtance;
Mais ce que je diray ferez:
Dès maintenant mes gens yrez
Ordener et moy pourveoir
Du harnoys qu' i me fault avoir
Pour ce voiage.
PREMIER CHEVALIER D' ESCOSSE. Se je devoie mettre en gage
Ma terre toute, treschier sire,
Si feray je sanz contredire
Ce que dites. Sire, g' y vois
Ordener et gens et harnoys
Et quanque il fault.
ROY D' ESCOSSE. Or gardez bien par vous deffault
De riens n' y ait.
LA FILLE. Mon chier seigneur, en mal dehait
Me mettez et en grant effroy,
Qui voulez aler au tournoy
Si loing qu' est le pais de France.
Je ne gart l' eure, sanz doubtance,
Se Dieu plaist, que doye enfanter.
Pour Dieu vous pri, mon seigneur chier,
Souffrez vous ent.
ROY D' ESCOSSE. Ce ne peut estre, vraiement,
Dame; puis que l' ay dit, g' yray.
Mon maistre d' ostel vous lairay
Et mon prevost; ces deux seront
Qui du tout vous gouverneront.
Il souffira.
PREMIER CHEVALIER D' ESCOSSE. Mon seigneur, quant il vous plaira,
Movoir pouez d' ore en avant.
Vostre harnoys s' en va devant
A bon conduit.
ROY D' ESCOSSE. Ce point y affiert bien et duit.
Maistre d' ostel, venez avant,
Et vous, prevost. D' ore en avant
Ma compaigne vous baille en garde
Preste d' enfanter. Or regarde
Chascun a faire ent son devoir,
Si qu' il y puist honneur avoir
Quant Dieu m' ara cy retourné;
Et si vous pri, quant sera né
L' enfant et delivre en sera
La mére, ce que en ara
Dessoubz voz seaulx me rescripsiez.
C' est tout. ça, dame, et me baisiez:
Aler m' en vueil.
LA FILLE. Certes, s' il en fust a mon vueil,
Sire, ne vous en alissiez
Tant que mon enfant eussiez
Veu sur terre.
DEUXIESME CHEVALIER D' ESCOSSE. Sire, pour touz vous vueil requerre
Que ne soiez pas engaigniez
Se de nous estes compaigniez
Deux liues ou trois, sire, au mains,
Ou tant qu' aiez voz gens attains;
Pour bien le dy.
ROY D' ESCOSSE. Amis, pas ne vous en desdy.
Alons men tost. Ho! c' est assez.
Seigneurs, plus avant ne passez;
Ne le vueil point.
LE PREVOST. Puis que le voulez en ce point,
Sire, a Dieu vous conmanderons:
De ma dame penser yrons
Pour vostre honneur.
ROY D' ESCOSSE. Vous dites bien. Alez, seigneur;
A Dieu trestouz!
DEUXIESME CHEVALIER D' ESCOSSE. Dame, le roy nous a de vous
Garder prié songneusement:
Si vous prions fiablement
Que quanque vous voulrez avoir
Vous le nous faciez assavoir
Hardiement.
LA FILLE. Seigneurs, sachiez certainement
Selon mon estat me tenray
Le plus simplement que pourray,
Tant que mon seigneur du tournoy
Retourné sera cy a moy
Et que l' arons.
LE PREVOST. Conmandez, dame; nous ferons
Quanque direz.
LA FILLE. Seigneurs, s' il vous plaist, vous irez
Jusqu' a l' eglise saint Andry.
La requerrez que sanz detry
Soit pour mon seigneur celebrée
Une haulte messe ordenée,
Afin que Diex de mal le gart.
En meilleur garde, ce regart,
Ne le puis mettre.
DEUXIESME CHEVALIER D' ESCOSSE. Nous y alons sanz plus cy estre,
Ma chiére dame.
LA FILLE. Damoiselles, je croy, par m' ame,
Que je me muir tant sui malade:
J' ay le cuer si vain et si fade
Qu' avis m' est de touz poins me fault,
Tant m' a pris ce mal en sursault.
Que feray je? Diex, les rains! Diex!
Confortez moy, dame des cielx:
Trop sans d' angoisse.
LA PREMIéRE DAMOISELLE. Avant que ce mal plus vous croisse,
Ma dame, apuiez vous sur moy
Et vous en venez tost: je voy
Que traveilliez certainement.
En vostre chambre appertement
Or tost entrez.
LA FILLE. Diex, le ventre! Diex, les costez!
Trop sens d' angoisse et grant ahan.
Amy Dieu, sire saint Jehan,
Et vous, mére Dieu debonnaire,
Jettez me hors de ceste haire.
Certes, je muir, bien dire l' os.
Diex! or me prent l' engoisse au dos.
Que pourray faire?
DEUXIESME DAMOISELLE. E! doulce vierge debonnaire,
Port de salut aux desvoiez,
Vostre grace a nous envoiez,
Et si ma dame secourez
Que Dieu et vous, dame, honnourez
En puissiez estre.
LA FILLE. E! mére au tresdoulx roy celestre!
Or sui j' a ma fin, bien le voy.
Doulce vierge, confortez moy,
Je vous en prie.
LA PREMIéRE DAMOISELLE. Or paiz, de par le filz Marie!
Dame, cessez vous de crier.
Je vous dy, sanz plus detrier,
Je ne scé se vous le savez,
Demandez quel enfant avez;
Car il est né.
LA FILLE. Puis que Dieu m' a enfant donné,
Je vueil bien quel il est savoir,
Filz ou fille: dites m' en voir,
M' amie chiére.
DEUXIESME DAMOISELLE. Dame, faites nous bonne chiére,
Que vous avez un tresbiau filz,
Soit en voz cuers certains et fis:
Regardez cy.
LA FILLE. La vierge de cuer en gracy;
Certes, je l' ay bien acheté.
Couchez me tost, qu' en verité
Je tremble toute.
LA PREMIéRE DAMOISELLE. Vezci le lit prest (n' aiez doubte,
Ma dame), ou je vous coucheray.
Tandis que l' assemilleray,
Yolent, alez sanz detry
Dire a Lembert qu' a Saint Andry
Voit au maistre d' ostel batant
Dire qu' un filz, n' en soit doubtant,
Avons nouvel.
DEUXIESME DAMOISELLE. Je le feray de cuer ysnel.
Lembert, mon ami doulx, alez
Dire au maistre d' ostel que nez
Nous est un biau filz de ma dame:
Grant joie li ferez, par m' ame,
Je n' en doubt mie.
LEMBERT. Voulentiers, Yolent, m' amie.
E! Diex, qu' il en sera joieux!
Je vous truis bien a point touz deux:
J' aloie a vous.
DEUXIESME CHEVALIER D' ESCOSSE. Pour quoy, Lembert, mon ami doulx?
Ne le nous cèles.
LEMBERT. Je vous apport bonnes nouvelles,
Et si sont vraies, j' en sui fis:
La royne a eu un filz:
Tout maintenant.
DEUXIESME CHEVALIER D' ESCOSSE. Tu soiez le tresbien venant;
Grant joie ay de ce que t' oy dire.
Prevost, aler nous fault escripre
Et ces nouvelles envoier
Au roy pour son cuer avoier
En plus grant joie.
LE PREVOST. Vostre voulentez est la moye.
Alons, sire: icy m' asserray.
Je mesmes les lettres feray;
N' est mestier c' on les me divise.
C' est fait; seellez a vostre guyse:
Il souffira.
DEUXIESME CHEVALIER D' ESCOSSE. C' est seellé; qui la portera?
Or y veons.
LE PREVOST. Je lo que nous y envoions
Lembert; il est assez appert.
Venez avant, venez, Lembert,
A nous parler.
LEMBERT. Voulentiers, sanz ailleurs aler
Mais qu' a vous droit.
DEUXIESME CHEVALIER D' ESCOSSE. Mouvoir vous fault de cy endroit,
Lembert, et vous a voie mettre
Pour porter au roy ceste lettre,
Amis; et quant li baillerez,
De par ma dame li direz
Qu' elle gist d' un filz, ce li mande,
Et qu' a li moult se reconmande
Et nous aussi.
LEMBERT. Si tost que partiray de cy,
Sachiez d' errer ne fineray
Tant que bailliée li aray
Et mise ou poing.
LE PREVOST. Nous vous prions qu' en aiez soing
Et diligence.
LEMBERT. Je vous promet la negligence
N' en sera pas moie, que puisse;
Ne fineray tant que le truisse.
A Dieu trestouz!
DEUXIESME CHEVALIER D' ESCOSSE. Lembert, a Dieu, mon ami doulx!
Or s' en va il.
LEMBERT. Sera ce bon, je croy qu' oil,
Qu' a la mére au roy me transporte
Et que ces nouvelles li porte?
Je tien que j' en amenderay
D' aucun bon don; et pour c' yray,
Je ne me delaieray point.
Je la voy la: c' est bien a point;
Devant li me vois enclin mettre.
Ma dame, Dieu le roy celestre
De mal vous gart.
LA MéRE. Lembin, biau sire, quelle part
En alez et dont venez vous?
Je vous em pri, dites le nous.
Et qui vous maine.
LEMBERT. Chiére dame, soiez certaine,
Je m' en vois au roy mon seigneur
Dire li la joie greigneur
Dont s' ame fust pieça touchiée,
Que d' un filz ma dame acouchée
Est de nouvel.
LA MéRE. Diz tu voir, Lembin? ce m' est bel,
Foy que je doy sainte Bautheuch.
De la joie qu' en ay, t' esteut
Maishui avec moy demourer:
Je te vueil donner a souper.
Portes tu lettres?
LEMBERT. Oil, que baillié m' ont les maistres
D' ostel, ma dame.
LA MéRE. De ce que tu m' as dit, par m' ame,
Ay moult grant joie et le cuer lié.
Or tost! s' il est appareillié,
Je vueil qu' il souppe, Godefroy;
Et de ce bon vin dont je boy
Ly apportez.
GODEFFROY. Ma dame, un po vous deportez:
Ce vault fait. Veez, je mect la table.
ça! je vueil estre entremettable
De li servir.
LA MéRE. S' a mon gré le veulz bien servir,
Apporte li cy un bon mès.
Vien avant, s' acoute et li mès
De ce que t' ay baillié en garde,
Si qu' il ne s' en doingne de garde,
Dedans son vin.
GODEFFROY. Voulentiers, dame, et de cuer fin;
Vezcy de quoy.
LA MéRE. Verse cy pour l' amour de moy.
Je vueil que vous buvez, Lembin,
Et me direz se c' est bon vin;
Tout vous fault boire.
LEMBERT. Chiére dame, par saint Magloire,
Je ne bu si bon vin pieça;
Ce remanant buray or ça,
Puis qu' il vous haitte.
LA MéRE. Vezcy viande bonne et nette,
Dont mengier vous convient, Lembert.
Or monstrez con serez appert
De bien mengier.
LEMBERT. Je n' en feray mie dangier,
Chiére dame; et vous, que ferez? <Cy menjue>.
Amis, a boire me donrez,
S' il vous agrée.
LA MéRE. Verse ci bonne haneppée,
Car je le vueil.
GODEFFROY. Buvez: le hanap jusqu' a l' ueil,
Lembin, est plain.
LEMBERT. Vezci bon vin. ça vostre main!
Je vous jur et creant, ma dame,
De vous feray demain ma femme
Par mariage.
LA MéRE. Voire, mais qu' il n' y ait lignage.
Il est yvre, je te promet.
Maine le couchier et le met
En un bon lit.
GODEFFROY. Lembert, il vous fault par delit
Venir couchier.
LEMBERT. Si feray je, mon ami chier,
Moy et ma dame.
GODEFFROY. Voire, aussi est ce vostre femme.
Alons devant.
LEMBERT. Alons, mon ami, or avant.
Venez couchier aussi, ma belle;
Hurtez bellement, je chancelle.
Qui estes vous?
GODEFFROY. ça couchiez vous, mon ami doulx,
En ce lit; je vous couverray.
Ains que m' en parte je verray
Sa contenance et son effort.
Par m' ame! c' est bien dormi fort;
Je le vois a ma dame dire.
Ma dame, Lembin m' a fait rire;
Certes, il est a grant meschief.
Plus tost n' a pas eu le chief
Sur le lit qu' il s' est endormy.
Diex! conme il sera estourdy
Demain, ce croy!
LA MéRE. Or paiz, et te tais cy tout coy.
Je le vueil aler visiter.
Puis qu' il dort si bien, sanz doubter,
Je verray quelz lettres il porte,
Ains que jamais passe ma porte.
Je les tien; dormir le lairay;
Avec moy les emporteray.
Or tost, Godeffroy, sanz retraire
Vaz me querre mon secretaire
Ysnellement.
GODEFFROY. Dame, voulentiers vraiement.
Maistre Bon, plus ne vous tenez
Cy; mais a ma dame venez
Tantost bonne erre.
LE SECRETAIRE. Alons, puis que m' envoie querre.
Dame, vous m' avez fait mander:
Que vous plaist il a conmander?
Dites le moy.
LA MéRE. En secré vueil savoir de toy
Qu' il a escript en ceste lettre,
Sanz trespasser ne sanz y mettre
Mot ne demy.
LE SECRETAIRE. Il y a: "Mon treschier amy
Et seigneur, je me reconmans
A vous, et de saluz vous mans
Tant com je puis, et fas savoir
Que vous avez un nouvel hoir
Masle, que Dieu fist de moy naistre
Le jour c' on escript ceste lettre,
Qui vous ressamble de faitture
Miex que nulle autre creature.
D' autres choses fas cy restat.
Rescripsez moy de vostre estat
Par ce message."
LA MéRE. ça! que de ce nouviau lignage
Puist il estre courte durée!
Or tost fay m' en sanz demourée
Une autre telle con diray.
Ne doubtes, bien te paieray;
Fay mon plaisir.
LE SECRETAIRE. Chiére dame, de grant desir
Vostre vouloir acompliray.
Avant: devisez; j' escripray
Lettre assez grosse.
LA MéRE. Tu metteras: "Au roy d' Escosse,
Nostre chier seigneur, reverence,
Salut et toute obedience.
Nous vous mandons que la royne
Vostre femme gist de jesine;
Dont point de feste ne faisons,
Car diviser ne vous savons
Quelle chose est sa porteure,
Tant est hideuse creature;
N' onques, voir, ne l' engendra homme.
Ars l' eussions, c' est tout en somme,
Ne fust pour vous; si nous mandez
Qu' en ferons: se le conmandez,
Nous l' arderons, il n' y a el.
De par les grans maistres d' ostel,
Les vostres touz."
LE SECRETAIRE. C' est fait. LA MéRE. Bien est, mon ami doulx;
Or la clos sanz dilacion,
Et fay la superscripcion;
Puis la me baille.
LE SECRETAIRE. Tost m' en delivreray sanz faille.
Dame, tenez.
LA MéRE. Vous estes clerc gent et senez;
Hardiement alez esbatre.
Seellée sera sanz debatre
Du seel qui est en ceste lettre.
Et si l' iray en l' estui mettre
Ou je pris ceste maintenant.
Ma besongne est trop bien venant.
Tant con Lembert encore dort
Et ronfle en son lit bien et fort
Me vueil de mon fait delivrer.
C' est fait: voit sa lettre livrer
A qui vouldra.
LEMBERT. Il est jour: lever me fauldra
Et aler men sanz plus attendre.
A ma dame vois congié prendre:
C' est raison. Chiére dame, a Dieu!
Grans merciz: j' ay en vostre lieu
Esté tout aise.
LA MéRE. Lembert, je vous pri qu' il vous plaise
Par cy venir au retourner;
Quoy que soit vous voulray donner,
Et gardez que ne sache nulz
Que vous soiez par cy venuz;
Je vous em pri.
LEMBERT. Ma dame, et je le vous ottry;
Ja par moy ne sera sceu.
A Dieu! Tant que j' aie veu
Le roy et qu' a Senliz seray,
De cheminer ne cesseray,
Ains y vueil mettre cure et paine;
Avis m' est qu' en my celle plaine
Le voy la; c' est mon: a ly vois.
Plus l' aprouche, et miex le congnois.
Mon seigneur, Dieu par sa bonté
Vous doint joie, honneur et santé
Et bonne fin.
ROY D' ESCOSSE. Bien puisses tu venir, Lembin.
Se Dieu te doint bonne sepmaine,
Dy moy verité: qui te maine
Par cy endroit?
LEMBERT. Sire, je vien d' Escosse droit.
Voz maistres d' ostel, voz amis,
M' ont de venir a vous conmis
Et vous envoient ceste lettre.
Ce qu' ilz ont volu dedanz mettre
Ne sçay je pas.
ROY D' ESCOSSE. Ouvrir la vueil ysnel le pas
Et verray qu' il y a escript.
Ha! tresdoulx pére Jhesu Crist,
Bien doy avoir cuer esperdu:
J' ay honneur a touz jours perdu.
Conment a si tresbelle femme
Est advenu si lait diffame,
Biaux sire Diex?
PREMIER CHEVALIER D' ESCOSSE. Mon seigneur, je vous voy des yex
Plourer et les lermes cheoir;
Sire, que pouez vous avoir?
Dites le nous.
ROY D' ESCOSSE. J' ay tant de dueil et de courrouz,
Certes, que je ne le sçay dire.
Je meismes vueil icy escripre:
Pourveez moy, mon ami chier,
D' enque, de penne et de papier;
Avoir m' en fault.
PREMIER CHEVALIER D' ESCOSSE. Assez en arez sanz deffault.
Vezcy enque et escriptouére
Et papier. Faites bonne chiére,
Pour l' amour Dieu.
ROY D' ESCOSSE. Onques mais je ne fu en lieu
Ou je fusse autant courrouciez.
Escripre tout seul me laissiez;
Traiez vous la.
PREMIER CHEVALIER D' ESCOSSE. Je feray ce qu' il vous plaira,
Mon seigneur chier. <Icy escript le roy>.
ROY D' ESCOSSE. Lembert, pour toy brief depeschier,
Ce mandement reporteras
A mes gens, et si leur diras
Qu' il ne facent en nulle guise
Fors ainsi con je le divise
Icy dedans.
LEMBERT. Se jamais n' aie mal es dens,
Mon chier seigneur, bien leur diray.
Ici plus ne sejourneray;
Je m' en vois, sire.
ROY D' ESCOSSE. Or vas, et leur saches bien dire
Ce que t' ay dit.
LEMBERT. Sy feray je sanz contredit.
Or me fault il d' errer penser
Ferme et fort, et ne vueil cesser
Tant qu' au chastel de Gort m' appére,
Que g' y voie du roy la mére,
Qui m' a fait de donner promesse,
Dont elle m' a mis en leesce.
Je vois savoir que me donrra
Ne quelle bonté me fera,
Ains que plus tarde ne demeure.
Hé! g' y seray d' assez bonne heure.
Devant moy voy le chastel estre:
Dedens me vois bouter et mettre;
G' y seray bien venuz, ce tien.
Ma dame, Diex y soit! je vien:
Aray je boire?
LA MéRE. Oil, Lembin, par saint Magloire!
Que fait le roy?
LEMBERT. Bien, ma dame, foy que vous doy,
Au moins pour lors que le laissay;
Mais de son estat riens ne say
Ne conment la feste se passe,
Car je n' oy d' estre a court espasse
Que tant conme ma lettre fist
Et qu' il la me bailla et dist
Que songneux fusse et diligens
De la rapporter a ses gens
De par deça.
LA MéRE. Ne peut chaloir. ça, le vin, ça,
Et des espices!
GODEFFROY. Ma dame, je seroie nices
Se je disoie: "Non feray."
En l' eure vous en porteray;
Querre le vois.
LEMBERT. Que peut c' estre? je n' oy des moys
Si grant sommeil conme il m' est pris
Puis que j' entray en ce pourpris,
Et si ne scé dont ce me vient.
Ma dame, dormir me convient
Avant toute heuvre.
LA MéRE. Il ne fault mie qui requeuvre.
Une foiz avant buverez
Et des espices mangerez,
Foy que doy m' ame.
GODEFFROY. Prenez les espices, ma dame,
Devant le vin.
LA MéRE. Sa! j' ay pris: or porte a Lembin,
S' en prendera.
LEMBERT. Je ne sçay se bien me fera,
Tant ay sommeil.
LA MéRE. Mais que nous arons beu, je vueil,
Godeffroy, que couchier le maines,
Et que de li couvrir te paines,
Si qu' il dorme aise. <Yci boivent sanz riens dire>.
LEMBERT. Chiére dame, ne vous desplaise
Se ci ne sui plus longuement:
Je m' en vois dormir; vraiement
Je n' en puis plus.
LA MéRE. Or alez, Lembert; que Jhesus
Vous doint, amis, bon somme prendre.
Alez avec li sanz attendre
Tost, Godeffroy.
GODEFFROY. Voulentiers, ma dame, par foy.
Lembert, alons.
LEMBERT. Je vous pri que des piez balons
Pour y aler.
GODEFFROY. Or reposez sanz plus parler,
Puis que couchié estes, Lembert,
Et que vous estes bien couvert,
Yci vous lais.
LA MéRE. Tu n' as pas fait trop grant relais
Avec Lembert.
GODEFFROY. Puis que couchié l' ay et couvert,
Ma dame, n' est ce pas assez?
Il n' a mestier, tant est lassez,
Que de repos.
LA MéRE. Bien est; or entens mon propos:
J' aray encore un po a faire
De maistre Bon, mon secretaire;
Va le querir.
GODEFFROY. Je vois sanz moy plus ci tenir,
Ma dame chiére.
LA MéRE. Et je vois savoir quelle chiére
Fait Lembert tout secréement,
Bien va, puis qu' il dort vraiement.
Sa boiste et ses lettres prenray,
Et ce que devisent saray
Bien tost, ce puis.
GODEFFROY. Maistre Bon, bien a point vous truis.
Encore a ma dame venir
Vous fault sanz vous plus ci tenir,
Puis que vous mande.
LE SECRETAIRE. Si iray de voulenté grande,
Godefroy, car g' y sui tenuz.
Chiére dame, je sui venuz
A vostre mant.
LA MéRE. Maistre Bon, a savoir demant
Que ceste lettre cy divise.
Lisez la moy, que la divise
En puise entendre.
LE SECRETAIRE. Voulentiers, dame, sanz attendre.
"A noz feaulx maistres d' ostel.
Un mandement vous faisons tel:
Pour ce que mandé nous avez
Que dire a droit ne nous savez
Quel hoir la royne a eu,
Dont elle gist ou a geu,
Tant est hideus a regarder,
Que vous le nous faciez garder
Et la mére en aucun destour,
Car veoir a nostre retour
Les desirons."
LA MéRE. Est ce cela? Nous en ferons
Une autre, moy et vous, en l' eure.
Avant: escripsez sanz demeure
Ce que je vous deviseray.
Voir, miex vous satisfieray
Que ne pensez.
LE SECRETAIRE. Chiére dame, j' aray assez
Tant con Dieu vie vous donra.
Divisez ce qui vous plaira:
Prest sui d' escripre.
LA MéRE. Mettez: "Le roy d' Escosse et sire.
Maistre d' ostel, point ne tardez,
Ces lettres veues, que n' ardez
La Bethequine et sa portée
Sanz attendre heure ne journée;
Car, se son fruit n' ardez et elle
Et oir en pouons nouvelle,
Sachiez si tost que nous serons
Retourné, pendre vous ferons;
N' en doubtez point."
LE SECRETAIRE. Marie! c' est le plus fort point
De la besongne.
LA MéRE. Avant: ploiez la sanz prolongne
Et la cloez.
LE SECRETAIRE. Voulentiers, quant le me loez.
Vez la ci close.
LA MéRE. Or ne m' y fault il qu' une chose:
C' est le seel; bien l' i mettray,
Et cy dedans la bouteray.
Vouc! et sanz moy plus deporter,
Vois tost a Lembert reporter.
La manequine male joye
Ara, se fas ce que queroie.
Fait ay par temps.
LEMBERT. S' autrement a errer n' entens,
Je pourray villenie avoir;
Il m' en fault faire mon devoir.
Ma dame, prendre vien congié;
De ce que j' ay beu et mengié
Je vous mercy.
LA MéRE. Lembert, puis que tu pars de cy,
Ne sçay quoy t' avoie promis,
Vezcy cent florins, tien, amis,
Ayde t' en.
LEMBERT. Grans merciz, ma dame: en bon an
Vous mette Diex!
LA MéRE. Va t' en, va; je te feray miex
Une autre foiz.
LEMBERT. A Dieu, ma dame! je m' en vois.
Ne sera mais riens qui me tiengne
Jusqu' a tant qu' a Beruic viengne.
La cité voy, tant en sui près;
De m' y bouter vueil estre engrès.
Mes seigneurs, Dieu, qui de Marie
Voult faire sa mére et s' amie,
Vous soit amis.
LE PREVOST. Lembert, amis, et il t' ait mis
Huy en bon jour.
DEUXIESME CHEVALIER D' ESCOSSE. Lembert, dites nous sanz sejour
Conment fait mon seigneur le roy,
Et conment il va du tournoy,
S' en savez rien.
LEMBERT. Du roy, mes seigneurs, vous dy bien
Que je le laissay en bon point;
Mais du tournay ne sçay je point,
S' il se fist ou non, c' est a court;
Car de mon seigneur a la court
Ne fu que tant qu' il fist ma lettre
Ly meismes, sanz autre conmettre.
Tenez, sire, je la vous baille;
Mais de tant me chargea sanz faille
Que vous die que ne laissiez
Pour riens que vous n' acomplissiez
Ce qu' est escript.
DEUXIESME CHEVALIER D' ESCOSSE. Ha! tresdoulx pére Jhesu Crist,
Vezci lettre ou a trop dur mot.
Venez avant, venez, prevost:
Tenez, lisez.
LE PREVOST. Voulentiers, se j' en sui aisiez.
Laz! vezci chose trop amére,
Que nous ardons et filz et mére.
Hé! biaux sire Diex, qui le meut?
Esbahiz suis qu' estre ce peut:
Trop m' en merveil.
DEUXIESME CHEVALIER D' ESCOSSE. Certes, se voir dire vous vueil,
Prevost, c' est nostre mort escripte;
Car, se d' ardoir on les respite,
Et ne faisons son mandement,
Mourir nous fera laidement;
Se nous les ardons, mal sera,
Car le peuple sur nous courra:
Ainsi n' y puis je regarder
Que de mort nous puissons garder,
Se Dieu n' en pense.
LE PREVOST. Elas! vezci dure sentence.
Voir, je plain le filz et la dame
Autant com je fas moy, par m' ame,
Et plus assez.
LA FILLE. Seigneurs, dites moy que pensez.
A il que bien en ce pais?
Faire vous voy conme esbahiz
Trop mate chiére.
DEUXIESME CHEVALIER D' ESCOSSE. Qu' en pouons nous, ma dame chiére?
Si devrez vous faire, pour voir.
Le roy sur corps et sur avoir
Nous mande que point ne tardons
Que vous et vostre filz n' ardons
Sanz demourée.
LA FILLE. Ha! mére Dieu, vierge honnourée!
Me dites vous voir, mes amis?
A il en ceste lettre mis
Tel mandement?
LE PREVOST. Chiére dame, oil vraiement;
Et y a qu' i nous fera pendre,
Se n' acomplissons sanz attendre
Ce qu' i nous mande.
LA FILLE. Or me ressourt angoisse grande.
E! tresdoulce vierge Marie,
Je croy qu' il ne soit femme en vie
Plus mal fortunée de moy.
E! doulx roy d' Escosse, et pour quoy
M' avez jugée a telle mort
Com d' ardoir? Certes, c' est a tort;
Car je ne sçay en dit n' en fait
Que je vous aie tant meffait
Qu' ainsi par vous mourir deusse.
Encore se seulle morusse,
N' en fusse pas si adolée; <Cy baise son filz>.
Mais de ceste doulce rousée
Qui est un si pur inocent,
Vostre voulenté s' i consent
Qu' il soit ars et la mére ensemble?
Ha! bon roy, par foy, ce me semble
Trop dure chose et trop amére
Q' un tel inocent et sa mére
Soient ars. Diex! le cuer me fent
De douleur. Ha! mon doulx enfent! <Cy le baise>.
Doulx filz, est ce par vos dessertes
Ne par les moies? Nanil, certes:
Et pour ce je tien c' est envie.
E! biaux seigneurs, ma povre vie
Respitez, qu' ainsi pas ne fine
Ne cest enfant; par amour fine
Et pour Dieu le vous vueil requerre.
Le cuer pour li de dueil me serre,
Quant je voy qu' il deust tenir
Conme roy terre, au parvenir,
S' envie n' i meist discorde:
Si vous pri pour misericorde
Souffrez que loing de ceste terre
Je puisse aler noz vies querre
Com povre femme.
DEUXIESME CHEVALIER D' ESCOSSE. Que ferons nous de ceste dame?
Dites, prevost, en amistié.
Elle m' a fait si grant pitié
En faisant ses doulces clamours
Que le cuer me font tout en plours;
Et si fait l' enfant vraiement:
Si vous pri, regardons conment
Nous en ferons.
LE PREVOST. Sire, bien nous en chevirons
A nostre honneur, se me creez.
Se je dy bien, ne recreez
De mon conseil.
DEUXIESME CHEVALIER D' ESCOSSE. Nanil; mais assentir m' y vueil.
Prevost, or dites.
LE PREVOST. De sa mort serons trop bien quittes,
Se nous faisons en ceste guise:
Qu' en un batel soit en mer mise
Ou en une vielle nacelle,
Et n' y ait que l' enfant et elle,
Et n' ait gouvernail n' aviron
N' autres gens entour n' environ;
Ainsi par my la mer s' en voit
Au Dieu plaisir, qui la convoit
Ou li plaira.
DEUXIESME CHEVALIER D' ESCOSSE. Vous dites bien; ainsi sera.
Dame, pour voz piteux regrez
De vous dire sommes touz prez
Que d' ardoir vous espargnerons;
Mais une autre chose ferons:
Il vous faudra, soit lait ou bel,
Que vous entrez en ce batel,
Vous et l' enfant; et si n' arez,
Quant esquippée en mer serez,
Gouvernement se n' est de Dieu:
Ainsi relenquirez ce lieu;
Le voulez vous?
LA FILLE. Puis qu' il vous plaist, mes seigneurs doulx,
Je vous mercy plourant des yeulx.
Puis qu' a mourir vient, j' ayme mieux
Que noyons en la mer parfonde
Que prendre a la veue du monde
Par ardoir mort.
LE PREVOST. Dame, vous n' avez mie tort.
Or avant: vostre enfant prenez
Et faites tost, si en venez
Ysnel le pas.
LA FILLE. Sire, je ne refuse pas
Vostre gré faire.
LA PREMIéRE DAMOISELLE. Ha! chiére dame debonnaire,
Departir de vous tant me gréve
Qu' a po que le cuer ne me créve.
Certes, mie ne vous lairay;
Avec vous vivray et mourray.
Amée m' avez de cuer fin;
Et puis que de vous voy la fin,
Certainement je seray celle
Qui enterray en la nascelle
Aussi tost conme vous ferez,
Et si mourray se vous mourez,
Tant vous ayme de bonne amour.
Entrer cy dedens sanz demour
Vueil, puis qu' y estes.
DEUXIESME CHEVALIER D' ESCOSSE. M' amie, grant folie faites;
Ne scé conment vous abelist.
Se vent léve et mer s' orgueillist,
Vous noierez ysnel le pas.
Pour Dieu mercy n' y alez pas;
Creez conseil.
LA PREMIéRE DAMOISELLE. Sire, aler avecques li vueil
Et moy pour elle a mort offrir,
S' il fault que la doie souffrir,
Tant l' aime, voir.
LE PREVOST. M' amie, je vous fas savoir
De ce faire vous tien pour sote.
Boutons ce batel si qu' il flote.
Ho! la mer de nous le depart.
Sire, alons nous ent d' autre part
Vers noz hostiex.
DEUXIESME CHEVALIER D' ESCOSSE. Alons! a Dieu, dame gentiex,
Qui vous soit aide et confort,
Et, si li plaist, vous vueille a port
Saine mener!
LA FILLE. Mére Dieu, de dueil demener
Ay je cause? Certes, oil,
Quant cy me voy en tel peril
Que ne gars l' eure qu' en mer verse.
Ha! Fortune, tant m' es perverse!
A bon droit or de toy me plains
Et com dolente me complains,
Qui m' as mis ou hault de ta roe
Et m' as puis jetté en la boe,
Mais pis, car sanz gouvernement
Suy de haulte mer en tourment
Qui trop malement sur nous queurt.
Biau filz, se Dieu ne nous sequeurt,
Vous ne moy ne pouons durer
Ne ceste mer cy endurer;
Et s' il estoit que je sceusse
De certain qu' en seur lieu fusse,
Si ay je bien cause de pleur
Et assez angoisse et doleur,
Et tout pour vous, mon enfant chier:
Ne vous sçay lever ne couchier,
Ne si ne vous sçay de quoy paistre.
Ha! vierge de qui Dieu volt naistre,
De nous aidier ne soiés lente;
Reconfortés ceste dolente
Et menés a port de salut.
Fleur de qui le fruit tant valut
Qu' il fu souffisant pour le monde
Jetter de la prison parfonde,
Jettez nous de ce peril, dame,
Et faites com piteuse femme.
Vierge, perir ne me laissiez;
Mais a droit port nous adressiez
De sauveté.
NOSTRE DAME. Fil, pour l' infinie bonté
Qui en vous est, soiez d' accort
Que nous aillons donner confort
Celle dame la sanz attente,
Que paour de noier tourmente
En celle mer.
DIEU. Mére, vous la devez amer,
Car je voy qu' elle le dessert:
Vous et moy de cuer prie et sert,
Et porte en tresgrant pacience
Le mechief, l' inconvenience
Et la dure maleurté
Qui, sanz abatre, l' a hurté
Et encore la hurte fort.
Sus! alons li faire deport,
Sanz plus attendre.
NOSTRE DAME. Anges, pensez de jus descendre,
Et chantez, en nous convoiant,
Si hault c' on vous soit cler oyant.
Que chanterez?
PREMIER ANGE. Dame, quanque conmanderez
De cuer ferons.
DEUXIESME ANGE. Gabriel, or ça, que dirons
En la alant?
PREMIER ANGE. Mon ami, nous irons disant
Ce rondel ci sanz retraire.
RONDEL. Tresdoulce vierge debonnaire,
Sejour de vraie humilité,
En qui Dieu prist humanité;
Pour les humains d' enfer retraire
Souffri vo fil mort a vilté,
Tresdoulce vierge debonnaire,
Sejour de vraie humilité.
Pour ç' a chascune et chascun plaire
Doit qu' il vous serve, en verité,
Et qu' il die par charité:
Tresdoulce vierge debonnaire,
Sejour de vraie humilité,
En qui Dieu prist humanité.
DIEU. Pour ce qu' en ta neccessité,
Belle amie, m' ayde as quis
Et de cuer ma mére requis
Qu' elle te gardast de noier,
Ne te vueil je point denoier
Que n' acomplisse ta requeste.
Ne crain plus de mer la tempeste,
Confortes toy.
LA FILLE. Sire, sire, raison pour quoy?
N' est merveille se je la doubte.
Je voy puis ça, puis la me boute:
Une heure hausse, une autre abesse.
De paour ay telle tristesce
Ne sçay que faire ne que dire.
Qui estes vous qui parlez, sire,
Si seurement?
DIEU. Je sui qui fis le firmament,
Je sui qui toutes choses fis
De nient, je sui qui pére et filz
Sui de ma fille et de ma mére,
Je sui celui qui mort amére
En croiz souffri pour toy, retien;
La fontaine sui de tout bien,
Sanz conmencement et sanz fin,
Qui par amour et de cuer fin
Vien cy pour toy donner confort.
Aiez en Dieu bon cuer et fort:
Passé as ton plus grant meschief.
Ne t' en diray plus, mais qu' a chief
Venras de ce peril briefment.
Anges et vous, mére, alons ment
Es cieulx arriére.
NOSTRE DAME. Belle amie, fay bonne chiére;
Je te dy, ne te doubte pas,
Que briefment en estat seras
Aussi hault conme onques tu fus.
N' aies pas cuer vers Dieu confus.
M' amie, a Dieu!
PREMIER ANGE. Michiel, au partir de ce lieu,
Chanter nous fault.
DEUXIESME ANGE. Si chanterons donc sanz deffault.
Or avant! disons sanz nous taire.
RONDEL. Pour ç' a chascune et chascun plaire
Doit qu' il vous serve, en verité,
Et qu' il die par charité:
Tresdoulce vierge debonnaire,
Sejour de vraie humilité,
En qui Dieu prist humanité.
LA FILLE. Sire Dieu, de la grant bonté
Qui par vous m' a cy esté faitte
Mon cuer a vous loer s' affaitte:
C' est droiz, quant il vous a pleu,
Sire, que vous aie veu
Et celle qui vous a porté,
Qui si doulcement conforté
M' a, sire, et vous, qu' il m' est advis
Qu' en gloire soit mon corps raviz.
Ce que m' avez dit bien perçoy,
Car a seiche terre me voy
Estre arrivée.
LE SENATEUR. Vous soiez la tresbien trouvée,
Dame. Vous venez vous embatre
En ceste cité pour esbatre,
Ou pour quoy querre?
LA FILLE. Sire, pour Dieu vous vueil requerre
Et pour pitié, ne me rusez
N' a moy rigoler ne musez;
Car en moy n' a ris ne jeu, certes.
J' ay fait puis un po trop de pertes,
Et si grans que n' espére mais
Que je les recuevre jamais,
S' a Dieu ne plaist.
LE SENATEUR. Dame, je vous dy a court plait,
De vous rigoler n' ay courage;
Car je croy que de hault lignage,
A vostre semblant et maintien,
Estes estraitte; ainsi le tien:
Pour c' en mon hostel vous menray
Et si vous y hebergeray,
S' il vous agrée.
LA FILLE. Pour Dieu, sire, en quelle contrée
Sui je venue?
LE SENATEUR. Dame, vous estes descendue
A Rome droit.
LA FILLE. Or me vueille Diex orendroit
Conseillier et reconforter.
Biau filz, nous avons a porter
De haire assez.
LE SENATEUR. Je voy les corps avez lassez:
Venez vous ent avec moy, belle,
Et vous et vostre damoiselle;
N' y pouez avoir deshonneur:
De la ville sui senateur
Et si ay femme.
LA FILLE. Vous et li gart Diex de diffame!
Or alons donc.
LE SENATEUR. Ne ferez pas chemin trop long:
Dame, nous y serons en l' eure.
Vezcy l' ostel ou je demeure.
Dame, faites nous chiére lie:
Je vous amaine compagnie,
Regardez quelle.
LA FEMME. Elle me semble bonne et belle,
Mon seigneur, foy que je doy Dieu.
Bien veigniez, dame, en nostre lieu,
Et vous, m' amie.
LA FILLE. Dame, l' umble vierge Marie
Soit de vous et du seigneur garde.
Certes, quant je pense et regarde
Conment de mon estat je change
Et que suis en pais estrange,
Ne scé conment me dure vie
Car je soloie estre servie,
Et il me fault devenir serve,
Se je vueil vivre, et que je serve,
Ce qu' apris n' ay.
LE SENATEUR. M' amie, je vous retenray
Voulentiers, se, pour desservir
Argent, vous pensez a servir.
Qu' en dites vous?
LA FILLE. Grant merciz. De quoy, sire doulx,
Vous serviray je?
LE SENATEUR. A ce point vous responderay je:
Vous arez office ligiére;
Vous serez, sanz plus, claceliére
De ceens: c' est ligier office
Et a femme trop bien propice.
Vostre enfant nourrirez emprès.
De vostre damoiselle après
Je vous diray qu' il en sera:
En un mien autre hostel venra,
Ou elle sera conme dame,
S' elle veult estre preude femme.
Est ç' assez dit?
LA PREMIéRE DAMOISELLE. Sire, n' y met nul contredit,
S' il plaist ma dame.
LA FILLE. Il me plaist, et de corps et d' ame,
Mon chier seigneur, vous serviray,
Par m' ame, au miex que je pourray:
N' en doubtez point.
LA FEMME. Puis que nous sommes a ce point,
Mon seigneur, or en amenez
La damoiselle ou dit avez
Isnellement.
LE SENATEUR. Or sa, damoiselle, alons ment
Ysnel le pas.
LA DAMOISELLE. Sire, ne refuseray pas
A y aler.
ROY D' ESCOSSE. Godemen, entens me parler:
En Ecosse a mes gens iras,
Mon retour savoir leur feras
Et que les truisse.
GODEMAN, escuier. Sire, ne fineray, que puisse,
De faire tant que seray quittes
De leur dire ce que me dittes.
A Dieu! je m' en vois pié batant.
Dieu mercy! or ay j' erré tant
Qu' en Escosse sui arrivé.
Mes seigneurs, bien a point trouvé
Vous ay ci. Le roy vous salue
Et vous fait savoir sa venue;
De cy est près.
DEUXIESME CHEVALIER D' ESCOSSE. Godeman, et nous sommes prestz
D' aler a lui.
LE PREVOST. Ce sommes mon, n' y a celui.
Or avant: mettons nous a voie.
Ne fineray tant que le voie.
Est il tout sain?
GODEMAN. Oil, sire, par saint Germain,
La Dieu mercy.
DEUXIESME CHEVALIER D' ESCOSSE. Prevost, par foy, je le voy ci;
De venir tost ne vous faingniez.
Mon treschier seigneur, bien vegniez
Et voz gens touz.
ROY D' ESCOSSE. Maistre d' ostel, avançons nous
Tant que soions en mon manoir.
Or ça, vous deux, dites me voir:
Conment va il de la royne
Et de son fruit? tout le convine
En vueil savoir.
DEUXIESME CHEVALIER D' ESCOSSE. Sire, ardoir la feismes, voir,
Ainsi con le nous escripsistes.
Et, certes, grant pechié feistes
De la faire ardoir, j' en sui fis;
Mais plus grant pechié fu du filz,
Tant estoit belle creature.
Miex vous ressembloit que painture
C' on sceust faire.
ROY D' ESCOSSE. Ne vous mandé pas ainsi faire,
Mais qu' ilz fussent en une tour
Touz deux jusques a mon retour
Tresbien gardez.
LE PREVOST. Vezcy la lettre: regardez
Se voir disons.
ROY D' ESCOSSE. E! Diex, si est grant traisons!
Qui s' en est osé entremettre?
Ne me mandastes vous par lettre
Que dire a droit vous ne saviez
Quel enfant d' elle eu aviez,
Et, ne fust pour moy mesaisier,
Ars les eussiez en un brasier?
Je vous rescrips c' on retardast
Mére et filz, et c' on les gardast
Tant que venisse.
DEUXIESME CHEVALIER D' ESCOSSE. Sire, ce n' est pas nostre vice,
Si m' aist li pére haultismes.
Voir est que nous vous escripsimes
Que ma dame un hoir masle avoit
Qui de fourme vous ressembloit:
C' est le contraire.
ROY D' ESCOSSE. Lembert, dy me voir sanz retraire,
Ou tu mourras, certes, a rage.
Quant a moy venis en message,
Ou fu ta voie?
LEMBERT. Mon chier seigneur, se Dieu me voie,
Du droit chemin ne destournay
Onques, fors tant que je tournay
A vostre mére pour li dire
Que ma dame avoit un filz, sire:
De quoy ma venue ot tant chiére
Qu' elle me fist moult bonne chiére;
Celle nuit jus en son hostel.
Au retour de vous autretel,
Mon seigneur, fis.
ROY D' ESCOSSE. Certes, par elle et femme et fis
Ay perdu, si conme je croy.
Alez la querre, je vous proy,
Maistre d' ostel, et vous, prevost,
Et la m' amenez cy bien tost,
Sanz li riens dire.
DEUXIESME CHEVALIER D' ESCOSSE. Nous le ferons voulentiers, sire.
Prevost, alons.
LE PREVOST. Soit, sire! Avant; des piez balons
Touz deux ensemble.
DEUXIESME CHEVALIER D' ESCOSSE. Seoir la voy la, se me semble:
Nous sommes venuz bien a point.
Dame, ne vous mentirons point,
Mon seigneur est venu de France,
S' a de vous veoir desirance:
Si vous prie ne vous tenez
Qu' avec nous a li ne venez
Conme s' amie.
LA MéRE. Ce ne vous refuse je mie,
Acomplir vueil vostre requeste.
Alons; de li veoir me haitte.
Filz, bien vegniez.
ROY D' ESCOSSE. Dame, près de moy vous joingniez.
Je vous jur, ou voir me direz,
Ou maintenant arse serez.
Conment fu ceste lettre faitte
Et une autre, que n' ay pas traitte
Ne avant mise?
LA MéRE. Me tenez vous pour ce si prise?
Certes, mentir n' en deigneray:
La verité vous en diray.
J' avoie grant dueil qu' aviés pris
Une femme de si bas pris
Que ce n' estoit qu' une avolée
C' on ne savoit dont estoit née,
Que la mer cy jettée avoit.
Encore si meschant estoit
Qu' elle avoit perdu une main;
Et pour le dueil que soir et main
Avoie d' elle ay je bracié
Ce dont sa mort ay pourchacié.
Il n' appartient point, non, a roy
Avoir femme de tel arroy.
Marier, biau filz, vous pourrez
Plus haultement quant vous voulrez
Puis qu' elle est morte.
ROY D' ESCOSSE. Est ce quanque de vous em porte?
Par mon chief, j' en seray vengiez,
Ains que mès buvez ne mengiez;
Jamais ne ferez traison.
Alez la me mettre en prison;
Alez; faittes tost sanz attente.
N' en partira mais, c' est m' entente,
Jour que je vive.
PREMIER CHEVALIER D' ESCOSSE. Mon treschier seigneur, pas n' estrive
De faire ce que conmandez.
Dame, pardon li demandez
De ce meffait.
ROY D' ESCOSSE. Ja pardon ne l' en sera fait,
Se Dieu m' aist.
PREMIER CHEVALIER D' ESCOSSE. Alons men donc, puis qu' en son dit
Se tient si ferme.
ROY D' ESCOSSE. S' elle t' eschappe, je t' afferme
Pour li mourras.
LA MéRE. Filz, s' il te plaist, parler m' ourras
Une autre foiz.
ROY D' ESCOSSE. Et vous, foy que doy sainte Foiz,
Puis qu' avez ars ma femme en cendre
Et mon filz, je vous feray pendre
Touz deux aussi.
DEUXIESME CHEVALIER D' ESCOSSE. Ha! chier sire, pour Dieu, mercy!
Se nous en mourons, c' est mal fait.
Entendez conment l' avons fait:
Quant on nous bailla celle lettre
De ma dame et de son filz mettre
A mort, nous fusmes touz pensis;
Mais le prevost, qui fu sensis,
Dist qu' ainsi pas ne le ferions,
Mais qu' en la mer nous les mettrions
Et ainsi les lairions aler
Sanz ostilz pour les gouverner,
Conme avirons, voille ne mat.
Au departir fu chascun mat,
Dolens et tristes.
ROY D' ESCOSSE. Puis qu' il est ainsi con vous dites,
J' espoir que Diex sauvée l' a;
Et puis que j' en sçay jusques la,
De mourir vous respiteray,
Mais avecques moy vous menray
Pour la querir.
LE PREVOST. Et nous irons de grant desir,
Sire; mais ou pourrons aler
Que puissons d' elle oir parler?
Ci est le fort.
ROY D' ESCOSSE. Seigneurs, je pren en Dieu confort,
Et li fas veu et a saint Pierre
Qu' a Rome je l' iray requerre
Et deprier tout avant euvre
Que d' elle avoiement recuevre,
S' elle est en vie ne son filz.
Alons men, alons; je suy fiz
Dieu m' aydera.
DEUXIESME CHEVALIER D' ESCOSSE. S' il lui plaist, voirement fera;
Je n' en doubt goute.
LE ROY DE HONGRIE. Seigneurs, je vueil aler sanz doubte
Moy confesser a Romme, au pape,
Ains que mort me prengne ne hape.
Je senz mon cuer trop empeschié
Pour ma fille de grant pechié,
Que j' ay fait sanz cause mourir;
Si en vueil aler requerir
Remission.
DEUXIESME CHEVALIER DE HONGRIE. Sire, c' est vostre entencion,
Je le voy bien, qu' elle soit morte;
Mais, pour verité vous ennorte,
De la faire ardoir n' oy talent:
Ainçois en un petit chalent
Toute seule en mer l' envoyay,
Et ainsi envoie l' ay
Au Dieu vouloir.
LE ROY DE HONGRIE. Est il voir, amis? DEUXIESME CHEVALIER DE HONGRIE. Oil, voir;
Mais sachiez, sire, que puis d' elle
Ne fu qui me deist nouvelle;
Je vous dy bien.
LE ROY DE HONGRIE. Or va miex. Mon amy, je tien
Que Diex ou que soit l' ait sauvée,
Et qu' encore sera trouvée.
Vous et vous, qui estes my homme,
Avecques moy venrez a Romme:
C' est mes assens.
PREMIER CHEVALIER DE HONGRIE. Sire, de bon cuer me consens
A y aler.
LE ROY DE HONGRIE. Avant: mouvons sanz plus parler;
Tart m' est qu' i soye.
LE SENATEUR. Sire, se Jhesus vous doint joie,
Qui est ce seigneur qui ci vient?
Il se porte et si se maintient
En grant arroy.
PREMIER CHEVALIER D' ESCOSSE. Amis, c' est d' Escosse le roy,
Je vous promet.
LE SENATEUR. Sire, touz mes biens vous soubzmet.
Puis qu' en ceste ville venez,
Je vous pri, mon hostel prenez:
Je sui celui qui diligens
Seray d' aisier vous et voz gens
Bien, n' en doubtez.
ROY D' ESCOSSE. Doulx sires, qui telles bontez
M' offrez, je vous tien a courtoys.
Estes vous marchant ou bourgoys
Ou du conmun?
LE SENATEUR. Sire, des senateurs sui l' un,
C' est de la ville conseillier.
Devant vous vois appareillier
Chambre et estables.
ROY D' ESCOSSE. Puis que m' estes si amiables,
Or alez; nous vous suiverons,
Ne moy ne mes gens ne prendrons
Point d' autre hostel.
LE SENATEUR. Dame, or tost: ne pensez a el
Fors conment nous receverons
A honneur un hoste qu' arons
Tout maintenant.
LA FEMME. Mon seigneur, bien soit il venant.
Qui est il, sire?
LE SENATEUR. Dame, je le vous puis bien dire:
C' est le roy d' Escosse sanz doubte;
Nous arons li et sa gent toute
A noz despens.
LA FEMME. De par Dieu, mon seigneur, je pens
Que nous porterons bien le fais;
Et si seront touz aises fais,
S' en sui creue.
LE SENATEUR. Je sçay bien qu' estes pourveue
Assez de linge et de vaisselle
Et d' autres choses. Conme celle
Qui scet bien qu' a tel seigneur fault,
Gardez que de riens n' ait deffault
Qu' il vueille avoir.
LA FEMME. Mon seigneur, non ara il voir;
N' en doubtez mie.
LA FILLE. E! tresdoulce vierge Marie,
Dame, conment me cheviray?
Se le roy me treuve, j' aray
Honte du corps, j' en ay grant doubte.
Miex vault qu' en ma chambre me boute
Et la me tiengne toute coye
Que ce qu' il me treuve ne voye.
Voir, j' ay de ly paour trop grant:
Pour ce de moy mucier engrant
Vueil en l' eure estre.
ROY D' ESCOSSE. Sa! biaux hostes, je me vien mettre
En vostre hostel, mais qu' il vous siesse.
Icy vueil seoir une piéce:
D' errer sui las.
LE SENATEUR. Mon seigneur, par saint Nycolas,
Vous soiez li tresbien venuz,
Et ne vous soussiez: se nulz
A rien de bon, vous en arez;
De quanque vous demanderez
Je fineray.
LA FEMME. De vous servir me peneray,
Chier sire, aussi.
ROY D' ESCOSSE. M' amie, la vostre mercy.
Or me dites voir, par vostre ame,
Estes vous de ceens la dame?
Je croy qu' oil.
LA FEMME. Se je respondoie nanil,
Je fauldroie a verité dire;
Car une foiz m' espousa, sire,
D' annel benoit.
LE SENATEUR. Sire, puis qu' elle le congnoit,
Je confesse qu' elle dit voir;
Car elle me vouloit avoir
A toutes fins.
LA FEMME. Diex! que vous, hommes, estes fins!
Certes, je n' y pensoie mie,
Sire; mais une seue amie
Se trait vers ceulx de mon lignage
Et fist tant que le mariage
Se consonma.
L' ENFANT. Egar coment ma chose va!
Ho! je la voy. <Ici jette l' annel et s' en jeue>.
ROY D' ESCOSSE. Qui est ce valleton? Par foy,
Il a un gracieux visage,
Et si est appert de son aage.
Qui est il filz?
LE SENATEUR. On me met sus que je le fis.
Di je voir, femme?
ROY D' ESCOSSE. Vien avant, mon enfant. Par m' ame,
Tu es bel et doulx, dire l' ose.
Or sus, donnes moy celle chose
Que tiens; ça vien.
LA FEMME. Donnez li, biau filz, donnez. L' ENFANT. Tien;
Est-elle belle?
ROY D' ESCOSSE. Oil, par la vierge pucelle.
E! Diex, c' est l' annel qu' une foiz
Donnay, moult bien le recongnoiz,
A m' amie que j' ay perdue.
Ha! dame, qu' es tu devenue?
Pour toy sui triste et en douleur
...
Par ceste enseigne.
LE SENATEUR. Sire, qu' avez vous qu' il conveigne
Que les lermes des yeux vous chéent?
Ne voz honneurs point ne dechéent,
Ne mal n' avez.
ROY D' ESCOSSE. Ha! biaux hostes, vous ne savez
A quoy je pense maintenant.
Engendrastes vous cest enfant
Par vostre foy?
LE SENATEUR. Oil, mon chier seigneur. Pour quoy
Le demandez?
ROY D' ESCOSSE. Par celle foy qu' a Dieu devez,
Et par vostre crestienté,
Dites m' en pure verité
Sanz alentir.
LE SENATEUR. Voulentiers, sire, et senz mentir.
Il a bien trois ans, voire quatre,
Que sur la mer m' aloie esbatre;
La vy venir une nasselle
Atout une dame tresbelle,
Mais elle n' avoit qu' une main;
Et estoit entre soir et main.
Je ne scé dont elle venoit;
Mais aviron ne mat n' avoit:
Merveille oy qu' en mer ne noya.
Et quant je vy ce, j' alay la,
Si la trouvay conme esgarée,
Moult doulente et moult esplourée;
En ses braz cel enfant tenoit,
Dont nouviaument jeu avoit.
Je ne scé qu' en mer li avint;
Mais pitié d' elle au cuer me vint
Si grant que je l' en amenay.
Seens depuis gardée l' ay
Moult chiére dame; et a voir dire,
Elle est femme de grant bien, sire,
Et po parliére.
ROY D' ESCOSSE. Pour Dieu, se riens y vault priére,
M' ostesse, je vous vueil requerre
Que vous l' ailliez ou elle est querre
Et amener.
LA FEMME. Pour vostre amour m' en vueil pener,
Chier sire, et si ne demourray
Point que cy la vous amainray.
Vez la ci, sire. <Ici ira le roy acoler sa femme sanz riens dire, et se pasmeront>.
LE SENATEUR. L' un ne l' autre ne peut mot dire,
Tant ont les cuers de pitié plains!
Après orrez vous uns complains
Doulx, sanz demour.
ROY D' ESCOSSE. Ma doulce compaigne, m' amour,
Mon bien, ma joie, mon solaz,
Pour Dieu, conment t' est il? Helaz!
Assez m' as fait souffrir meschief;
Mais ne m' en chaut: j' en suis a chief,
Quant je te tien.
LA FILLE. Mais moy, mon chier seigneur, combien
Cuidez vous que j' en aye eu?
Quant je vy, dès que j' oy jeu,
C' on me voult ardoir sanz desserte,
Et mon filz aussi mettre a perte;
Et puis, quant j' en fu respitée
Et que je fu en mer boutée
Sanz avoir qui me gouvernast,
Cuidiez vous que point me grevast?
Car souvent la mer par mainte onde
Jouoit de moy conme a la bonde
Et me jettoit puis ça, puis la,
Jusqu' a tant que Diex m' amena
Au port ou me prist ce seigneur,
Qui m' a fait voir bonté greigneur
Que desservir ne li pourroye.
Mais tournez sont mes pleurs en joie,
Quant je vous voy.
ROY D' ESCOSSE. M' amie, ainsi est il de moy:
Et pour ce vueil, sanz plus attendre,
Aler ent a Dieu graces rendre
Et a saint Pierre.
LA FILLE. Aussi vueil j': alons y bonne erre,
Mon seigneur, tantost y serons.
Sachiez le pape y trouverons;
Car faire y doit le Dieu servise
Et le saint cresme: c' est la guise,
Pour ce qu' il est le jeudy saint,
Que Diex après la cène saint
Le drap dont les piez qu' il lava
A ses apostres essuia;
Et pour l' absolte aussi qu' il donne
Des pechiez a toute personne
Vray repentant.
ROY D' ESCOSSE. Or sus, sanz plus ci estre estant,
Seigneurs, mouvez.
PREMIER CHEVALIER DE HONGRIE. Sire, grant joie avoir devez
Qu' au jour d' ui nous sommes a Romme;
Car le pape, qui est preudomme,
En l' eglise saint Pierre ira,
Ou l' absolte au peuple fera,
Si conme on dit.
DEUXIESME CHEVALIER DE HONGRIE. C' est pour ce qu' a la sène sist
A ce jour Jhesus li grans maistres,
Ou il fist ses apostres prestres;
Et pour celle solempnité
Fait hui le pape, en verité,
Tout le servise.
LE ROY DE HONGRIE. Je vous dy voulenté m' est prise
Que ne buvray ne mengeray
Tant qu' au servise esté aray:
Pensons d' aler.
LE PAPE. Vien avant, entens me parler,
Colin: vaz me de l' iaue querre
Tant que m' emples les fons saint Pierre.
Or le fay brief.
LE CLERC. Ce n' est pas conmandement grief:
G' y vois, saint pére.
LA FILLE. Mon seigneur, je voy la mon pére;
Suivez moy: certes a ly vois.
Treschier sire, bien vous congnoys:
Regardez moy.
LE ROY DE HONGRIE. Ma doulce fille! et Diex! pour toy
Ay souffert en set ans passez
Pène et doulour et mal assez,
Annuy, courroux et grant mesaise.
Acole moy, fille, et me baise.
Conment t' est il?
LA FILLE. Bien; mais j' ay puis en maint peril
Esté que vous ne me veistes,
Et depuis que vous me perdistes
Ay j' eu grant estat aussy:
Le roy d' Escosse, que vezcy,
Seue mercy, m' a espousée;
Pour lui sui royne clamée
D' Escosse et dame.
LE ROY DE HONGRIE. Sire, puis qu' elle est vostre femme,
Je vous puis bien tenir pour filz.
Estes vous ne certain ne filz
Dont elle est née?
ROY D' ESCOSSE. Nanil, par la royne honnourée,
De son lignage rien ne sçay;
Mais, s' il vous plaist, je le saray
A ceste foiz.
LE ROY DE HONGRIE. Biau filz, de Hongrie sui roys;
Sa mére aussi en fu royne,
Qui fu dame de franche orine,
Courtoise et sage.
ROY D' ESCOSSE. Sire, puis que sçay son lignage,
Plus grant joie en ay que devant;
Onques mais jour de mon vivant
Ne le seu mais.
PREMIER CHEVALIER D' ESCOSSE. D' aler nous avançons huy mais,
Mes seigneurs, se voulez venir
A temps pour le servise oir:
Il est haulte heure.
LA FILLE. Il dit voir: alons sanz demeure.
De ceci bien recouvrerons
A parler: pas ne partirons
Si tost d' ensemble.
PREMIER CHEVALIER DE HONGRIE. Le pape voy la, se me semble,
Ou se siet: c' est trop bien a point.
Son service encore n' a point
Enconmencié.
LE CLERC. Saint pére, sachiez j' ay laissié
Les fonz touz vuiz. Dire vous vien
Une chose dont moult me crien:
A la riviére n' ay peu
Puiser, pour pouoir qu' aie eu,
Goute d' yaue; ains la me toloit
Une main, qui touz jours venoit
En flotant jusques a ma seille:
Dont j' ay eu trop grant merveille;
Et quant j' ay veu qu' autrement
N' en cheviroye nullement,
En mon siau l' ay laissié entrer
Pour la vous, saint pére, apporter:
Vez la ci, je la vous apport;
Dites, s' il vous plaist, sanz deport,
C' on en fera.
LE PAPE. Je tien que Dieu nous monsterra
(Met cy) par elle aucun miracle
De fait, qui m' est encore ostacle
Et non sceu.
LA FILLE. Celle main que vous ay veu
Bailler et que tenir vous voy
Fu, saint pére, jadis de moy;
De ce braz ci la me copay
Pour mon pére, que je n' osay
Contredire de son vouloir,
Qui me vouloit a femme avoir;
Ce n' est pas doubte.
LE PAPE. Trai te ça, ma fille, s' acoute:
Ou fuz tu née? dy le moy,
Et de quelx gens es, ny a quoy
Tu la cognois.
LA FILLE. Saint pére, a la façon des dois.
Le roy de Hongrie est mon pére,
Et royne aussi fu ma mére.
Vez le la, faites le venir.
Se je mens, faites moy punir:
Je le vueil bien.
LE PAPE. Belle fille, or entens: ça vien.
Tu te meis en grant peril.
Je te demans, combien a il
Que la copas?
LA FILLE. Saint pére, n' en mentiray pas:
Il a set ans, voire passez;
Et sachiez j' ay plus chier d' assez
Qu' en mon corps ce meshaing appére
Qu' eusse esté femme a mon pére
Ne qu' il faulsist que le congnusse
Ne li moy, ne qu' enfans eusse
De sa semence.
LE PAPE. Or paiz, touz, et faites scillence,
Et priez Dieu devotement
Qu' il nous face demonstrement
Se c' est la main que se copa
Ceste dame, si con dit a.
ça ce braz, sa, ma fille belle!
Je vueil esprouver se c' est elle:
Tost le verray.
LA FILLE. Sire, mon braz deslieray,
Si verrez dont elle parti
Quant de la coper m' aparti.
Veez, saint pére. <Cy touche le pappe la main au braz>.
LE PAPE. Royne des cieulx, de Dieu mére,
Vezci miracle trop appert:
La main s' est rejointe, et n' y pert
Goute c' onques partist du braz.
Fille, ton cuer en grant solaz
Doit bien ore estre.
LA FILLE. Loez soit Diex, le roy celestre!
Contre les meschiez granz et troubles
Qu' ay porté me rent a cent doubles
Au jour d' uy noble guerredon:
Trouver m' a fait mon compaignon
Qui de son bien me golousa
Tant que par amour m' espousa;
Si ne savoit il qui j' estoie,
Quant me prist, ne quel non j' avoie;
De ceste treuve cy endroit
Se j' ay joie, j' ay trop bien droit:
Je servoie conme meschine,
On me servira con royne.
Après, mon pére voi cy près
De moy festoier si engrès
Qu' il ne scet que faire me doye:
Ce m' est une seconde joie,
Car ne le vy mais puis set ans.
Mais celle que plus sui sentans
Et que plus a mon cuer amain,
C' est que recouvré ay ma main
Et que du tout m' en puis aidier
Aussi que faisoie au premier:
Dont je graci le roy de gloire
Et sa tresdoulce mére encore
Et touz les sains.
PREMIER CARDINAL. Saint pére, on en doit bien les sains
Sonner de joye.
DEUXIESME CARDINAL. Vous dites voir, se Dieu me voie,
Et hault chanter.
LE PAPE. Seigneurs, pensons de nous haster
D' aler endroit en ma chappelle,
Tandis que la chose est nouvelle,
Et avant que nous aions presse:
La pourrons chanter par leesse
A nostre aise et devotement.
Vaz dire, vaz appertement,
A mes chappellaims que cy viengnent
Et que compaignie nous tiengnent;
Si chanteront a haulte alaine
En alant une belle antaine.
Vas les me querre.
LE CLERC. Saint pére, voulentiers, bonne erre.
Seigneurs, cy plus ne vous tenez;
Devant le saint pére venez
Touz: il vous mande.
L' UN POUR TOUZ. Si yrons, puis qu' il nous demande:
C' est de raison.
LE PAPE. Tost seigneurs: sanz arrestoison,
En alant jusqu' a ma chappelle,
Chantez m' une louenge belle
De la mére Jhesu le roy.
Avant: mettez vous en arroy.
Qui l' emprendra?
LE CHAPPELLAIN. Je sui qui la conmencera,
Quant vous plaist, sire.
Explicit.