Miracle d'un marchand qui avait emprunté de l'argent à un juif

Cy conmence un miracle de Nostre Dame conment
Nostre Seigneur tesmoingna que un marchant qui
avoit emprunté argent d' un juif a paier a jour
nommé l' avoit bien et deuement paié, combien que
le juif lui reniast, et pour ce se fist le juif
crestienner.
L' EVESQUE. Sus, biaux seigneurs, sus, alons men.
Il est vray que j' ay convenant
D' aler le moustier saint Venant
Reconseillier qu' est entredit,
Si conme les gens le m' ont dit
De la parroisse.
PREMIER CLERC. Mon chier seigneur, se Dieu me croisse
En bien, prest sui, ne vous doubtez,
D' obeir a voz volentez,
C' est de raison.
DEUXIESME CLERC. Et je sanz plus d' arrestoison
Aussi sui par l' Egipcienne.
Vezci l' yaue gregorienne,
Sire, que je vous porteray,
Et vostre livre aussi feray
Ou est escript ce qu' on doit dire.
Alez devant, s' il vous plaist, sire,
Et nous après.
L' EVESQUE. Vous deux que je voy cy touz près,
Devant moy tost sanz demourée
Alez. Que la vierge honnourée
Vous soit amie.
PREMIER ESCUIER. Sire, ne vous desdirons mie,
Mais ce que conmandez ferons.
Par cy devant nous en irons:
Or nous suivez.
L' EVESQUE. C' est voir qu' aler devant devez
Et j' après vous.
LE BOURGEOIS. Reverent pére, vueilliez nous
Donner vostre beneiçon.
Je tien et est m' entencion
Miex en vaulroye.
L' EVESQUE. Sire, voulentiers je l' ottroye.
Benedicionem perpetuam tribuat tibi pater eternus.
LE BOURGEOIS. De bonne heure sui ci venuz:
Maizhui ne me venra que bien.
Je vous suppli, sire, combien
Que soie de po de valeur,
Que vous me faciez ceste honneur
Qu' avecques moy demain dinez
Et voz gens aussi amenez,
Je vous em proy.
L' EVESQUE. Biau sire, je le vous ottroy,
Quant si doulcement m' en priez.
Plus ores ne me detriez:
D' estre ou je vois ay grant desir.
Demain pourrons plus a loisir
Parler ensemble.
LE BOURGEOIS. Soit, sire, puis que bon vous semble,
Je ne vous vueil plus ci tenir;
Mais n' obliez pas a venir
De bonne heure, mon seigneur doulx.
Seigneurs, venez avec moy touz
Sanz plus le dire.
PREMIER ESCUIER. A Dieu! puis que le voulez, sire,
Si ferons nous.
L' EVESQUE. Dites moy, est il nul de vous
Qui congnoisse cest homme cy
Qui m' a semons et vous aussi?
Ne le congnois.
DEUXIESME ESCUIER. Et je si fas: c' est un bourgeois
Larges, a touz habandonné,
Qui maint biau diner a donné.
Il est franc de cuer, il est gent,
Il est amez de toute gent,
Il donne au povre, il donne au riche,
Du sien n' est point aver ne chiche,
Je vous promet.
PREMIER CLERC. C' est uns homs qui grant poine met
D' avancier ses petiz amis.
De son avoir y a moult mis,
Sages et riches est sanz guille.
N' a tel bourgeois en ceste ville,
Non, de largesce.
L' EVESQUE. Et nous verrons bien demain qu' est ce.
Pensons d' aler.
LE BOURGEOIS. Encore aler me fault parler
A trois de mes amis ou quatre
Et prier que demain esbatre
Avecques moy diner se viengnent
Et que compagnie me tiengnent,
Puis qu' a diner l' evesque aray.
Mais tout avant euvre g' iray
Saluer la dame des cieulx
Puis qu' acoustumé l' ay, le miex
Que je pourray devostement.
Vous deux, allez appertement
Mon hostel faire assemillier
Et la viande apparillier
Telle que n' en soiez repris,
Mais que g' y aie honneur et pris,
Quoy qu' elle couste.
JOSCET. Sire, il vous sera fait sanz doubte
Ainsi que vous le conmandez.
A nous deux vous en attendez
Hardiement.
GOBIN. Alez vous en seurement
Au moustier voz oroisons dire,
Et sanz vous plus dementer, sire,
Laissez nous faire.
LE BOURGEOIS. Il est dit: de tout cest affaire
Je me demet et me descharge
Et vous en lais du tout la charge.
N' appareilliez, ce vous conmande,
Fors toute la meillieur viande
Que pourrez trouver, et grans mès
Nous faites. Je m' en vois huymais
Jusqu' a l' eglise.
JOSCET. Puis que nous savons vostre guise,
Alez: bien le ferons sanz faille.
Alons men tost a la poulaille,
Sanz plus cy estre.
LE BOURGEOIS. Je me vueil cy a genouz mettre
Davant l' image nostre dame
A qui je rens mon corps et m' ame.
Prier la vueil com j' ay pensé.
Dame, par qui fusmes tensé
De la mort d' enfer pardurable,
Quant Dieu le pére esperitable
Fist son filz des haulz cieulx descendre
En vous et humanité prendre
Pour nous mener en paradis;
Dame, qui en faiz et en dis
Fustes en Dieu contemplative
Plus qu' autre par prerogative
Et sainte en conversacion;
Dame, toute m' afeccion,
Ma plaisance et tuit mi desir
Sont en faire vostre plaisir
Pour vostre grace desservir.
Certes, je vous doy bien servir,
Si feray je d' or en avant
Touz les jours mais de mon vivant,
Et j' espére qu' il me vauldra,
Quant tout le monde me fauldra,
Ma dame, par vo doulx ottry.
Pour ce vous offre et vous ottry
Ame et corps, quel pecheur que soie.
Dame, qui es lassus en joie
Pardurable sanz finement,
A Dieu qui ne fault ne ne ment,
M' empestrez paiz et telle accorde,
Fonteine de misericorde,
Que de mes pechiez soie quittes
Par voz glorieuses merites.
Cy vous requier et requerray
Touz les jours mais que je vivray;
Ne vous sçay plus ne miex requerre.
Dame du ciel et de la terre,
Ce que de cuer dy et de voix
Recevez en gré. Je m' en vois
A tant de cy.
PREMIER POVRE. Et! sire, par vostre mercy,
Ne nous soiez aver ne chiches:
Faites entre nous quatre riches,
Donnez a chascun vostre aumosne.
Que Dieu, qui est lassus ou throsne,
S' amour vous doint.
DEUXIESME POVRE. Voire, et ses pechiez lui pardoint.
Mon seigneur, povre sui sanz doubte;
Vous veez bien que je n' y voy goute:
Faites me bien.
LE BOURGEOIS. Tien, pour Dieu soit; tien, tien et tien.
Allez: chascun un blanc avez.
Prier Dieu pour moy bien devez:
Souvent vous doing.
TROISIESME POVRE. Aussi conme a nostre besoing
Nous secourez Dieu vous sequeure
Au jour qu' en arez et a l' eure,
Sire, mestier.
QUATRIESME POVRE. J' en prie Dieu de cuer entier
Que ses biens li croisse et foisonne.
Souvent nous fait bien et nous donne
De son argent.
LE BOURGEOIS. Ains que l' evesque ne sa gent
Viengnent en maison pour diner,
Savoir vois se pourray finer
De cinq de mes amis ou six,
Qui pour li compagnier assis
A table près de li seront
Et reverence li feront
Et compagnie.
L' EVESQUE. Seigneurs, oblier ne doy mie
Le diner que m' a sire Audry
Promis. Alons y sanz detry:
Il en est temps.
PREMIER ESCUIER. Ce que vous dites bien entens,
Mon seigneur: temps en est et heure.
Alons men sanz plus de demeure:
Vezcy la voie.
L' EVESQUE. Alez devant que je vous voie;
Marchiez sanz nous plus cy tenir.
Je le voy contre nous venir:
Parler vueil a ly. Sire Audry,
Ou alez vous, je vous em pry,
De si grant erre?
LE BOURGEOIS. Sire, je vous aloie querre,
Que tout est prest.
L' EVESQUE. Alons men donc, puis qu' ainsi est.
A mes gens vueil congié donner.
Seigneurs, alez vous tost diner
A mon hostel.
LE BOURGEOIS. Ce seroit grant pechié mortel
De les en faire ainsi aler.
Avecques nous sanz plus parler
Vraiement, sire, dineront,
Je vous em pri; assez aront
En verité.
L' EVESQUE. Puis que c' est vostre voulenté,
Je ne vous vueil pas contredire.
Soit fait, puis qu' ainsi vous plaist, sire;
Alez devant.
LE BOURGEOIS. Voulentiers. Venez me suivant,
Et vous trestouz.
PREMIER CLERC. N' en doubtez, non: si ferons nous.
Pensez d' aler.
PREMIER POVRE. Seigneurs, escoutez me parler.
Yci maishuit estre pourrons,
Mais je tien que nous n' y ferons
De nostre prouffit qu' un petit;
Et j' ay trop bien bon appetit
De mengier et s' ay soif trop grant.
A nul de vous le cuer engrant
D' avec moy venir sanz attendre
Trois deniers ou quatre despendre?
Qu' en dictes vous?
DEUXIESME POVRE. S' aler y voeil, ou irons nous?
Or ne me truffes.
PREMIER POVRE. Nous yrons chiez Robert de Ruffes
Assez près du four Saint Martin.
A trois tournois y arons vin
Et bon et gent.
TROISIESME POVRE. Il y va et vient trop de gent;
Tu diz en la fourmajerie
Assez près de la guanterie?
Mais alon chiez le tavernier
Qui soloit estre cervoisier,
C' on nomme Pierre Filion.
J' ay trop bien en regipcion
Qu' i serons miex.
QUATRIESME POVRE. Tu as dit voir, se m' aist Diex:
Il y a pour nous meilleur place.
C' est a la pointe saint Uitasse,
Oultre un petit.
PREMIER POVRE. Or vien avant, puis qu' il est dit:
Je vois devant.
DEUXIESME POVRE. Et je t' iray de près sivant,
Mais que tu m' y vueilles mener;
Car autrement mie assigner
Je n' y saroie.
TROISIESME POVRE. Je t' i menray, Boute en Courroie,
Et m' iray avec vous esbatre.
Sa, la main. Alons men touz quatre;
Marchiez devant.
L' EVESQUE. E! vous ne venrez plus avant:
Demourez cy.
LE BOURGEOIS. Si feray voir, je vous afy,
Mais qu' il vous plaise.
L' EVESQUE. Non ferez, je suis a mon aise.
Granz merciz de foiz plus de mille
Conme a celui de ceste ville
Quy m' a donné plus richement
A diner et plus grandement.
A Dieu vous dy, mon ami doulx!
Biaux seigneurs, que me dittes vous
De ce bourgeois?
PREMIER CLERC. N' en Prouvence n' en Aubigeois,
N' en pais nul ou j' aie esté,
De si large homme en verité
N' oy parler.
DEUXIESME CLERC. Ne sariez en pais aler
Ou le renom de ly ne queure.
Chascun l' aime et chascun l' onneure,
Tant a vaillance.
PREMIER ESCUIER. Mon seigneur, sachiez dès s' enfance
Ceste condicion emprist
Qu' a donner largement se prist:
Encor la tient.
DEUXIESME ESCUIER. Par ma foy, de grant bien li vient.
Se conte ou duc sanz plus estoit,
Je croy par ces dons tant feroit
Que sur toute crestienté
Le peuple aroit bien voulenté
Qu' eust puissance.
L' EVESQUE. Il peut bien estre sanz doubtance.
Seoir me vueil. Laissons en pais.
Noz heures nous fault dire huimais
Pour estre en quittes.
PREMIER CLERC. C' est vrai, mon chier seigneur, bien dites,
Puis que sommes en vostre lieu.
Conmenciez, sire, de par Dieu,
Ysnel le pas.
L' EVESQUE. Je vueil que les dions tout bas
Pour maintenant.
LE COUSIN. Je voy sa sire Audri devant.
Ma neccessité descouvrir
Li vueil et tout mon cuer ouvrir.
Dieu vous doint bon jour, chier cousin,
Et longue vie et bonne fin
Par son plaisir!
LE BOURGEOIS. Et Dieu vueille vostre desir,
Cousin Goubert, parfaire en bien!
Puis que ne vous vy mais combien
Y a il ore?
LE COUSIN. Il a bien deux mois; mais encore
Voulentiers me fusse tenuz
D' estre maintenant cy venuz,
Se ne fust besoin qui m' amaine.
Il me convient ceste sepmaine
A un marchant dehors livrer
Vint mars d' or et m' en delivrer,
Ou je sui perdu et destruiz
S' en mes amis confort ne truis.
Si vous pri ne me failliez pas
Qu' a passer ne m' aidiez ce pas,
Et bien brief le vous renderay,
Et si le vous desserviray
Bien, se Dieu plaist.
LE BOURGEOIS. Cousin, sanz vous faire long plait,
Jusqu' en maison vous en venez,
Et je feray que les arez.
Venez ent avec moy, cousin.
Tenez le sac, c' est tout or fin
Que je vous baille.
LE COUSIN. Bien est; je vous promet sanz faille,
Cousin, que je ne fineray
Tant que rendu le vous aray
A mon pouoir.
LE BOURGEOIS. Faites en si vostre devoir
Que me puissiez ami trouver
Une autre foiz et recouvrer
S' il est mestier.
LE COUSIN. Si feray j', et de cuer entier
Tant com je puis vous en mercy:
Hors m' avez mis de grant soussy.
A Dieu, chier sire!
LE BOURGEOIS. A Dieu, cousin, qui vous gart d' ire
Et de pesance!
DEUXIESME COUSIN. E! Diex, conment aray finance
Dont marier puisse ma fille
Tellement que pas ne m' essille?
Je sçay bien que tel la demande
Qui de l' avoir a fain moult grande,
Et si est riche homme pour voir.
Ne scé a qui recours avoir.
Biaux sires Diex, vueillez m' aydier
Conment j' aie ce que je quier.
Hé! je m' avise cy endroit
Qu' a sire Audry iray tout droit:
Il est a tel homme tenuz
Qu' il donne a gros et a menuz;
C' est de largesce le regent.
Il fait bien a la povre gent
Et largement du sien leur donne;
Et puis qu' il est telle personne,
Sanz plus cy estre a lui m' en vois.
E! sire Audry, vaillant bourgeois,
Vueilliez m' entendre.
LE BOURGEOIS. Quoy, biaux amis? dy sanz attendre
Ta voulenté.
DEUXIESME COUSIN. Sire, il est bien la verité
Qu' on ne me fait que tarier
D' une fille qu' ay marier.
Entre les autres la requiert
Un homme qui avoir ne quiert
Seulement fors que je la veste
Et que li doingne un lit honneste;
Et je n' ay de quoy, par ceste ame!
Pour Dieu, sire, et pour nostre dame,
Vueilliez de povreté rescourre
La fille et du vostre secourre,
Si qu' elle puist estre assenée
Et a ce preudomme donnée
Qui la demande.
LE BOURGEOIS. Biaux amis, j' oy bien ta demande:
D' une grant chose me requiers,
Qui robe et lit demande et quiers
De moy: qu' i sui je tenuz? point.
Mais pour ce que pitié me point,
Je te diray que je feray.
Vint livres touz sez te donrray
Pour le bien et l' avancement
De ta fille en accroissement
De son mariage. Or entens.
Je les vois querre; icy m' atens;
En l' eure revenray a toy.
Tien: dy qu' elle prie pour moy,
Et toy aussi.
GOBIN. Ha! sire, Diex par sa mercy
Le vous vueille rendre a cent doubles!
De grans pensées et de troubles
Et de grant soing, c' est chose voire,
Jetté m' avez. En la Dieu gloire
Vous soit guerredonné ce fait
Et ce hault don que m' avez fait!
A Dieu, chier sire!
LE BOURGEOIS. Vas a Dieu, vas, qui te gart d' ire,
Mon ami doulx.
UN VOISIN. Goubert voisin, d' ou venez vous?
Avis m' est, a vostre maniére,
Que vous faites trop meilleur chiére
Que je ne vous vy pieça faire.
Conment se porte vostre affaire,
Ne dont venez?
DEUXIESME COUSIN. Mais que secret vous le tenez,
Voisin, dont je vien vous diray,
Ja de mot ne vous mentiray.
Vous savez ma fille est ja grant,
Et je scé tel qui moult engrant
Est de l' avoir et s' est riche homme,
N' il ne demande point de somme
D' argent, mais sanz plus li souffist
Qu' elle ait une robe et un lit
Selon son estat souffisant,
Qui m' a esté le cuer cuisant
Trop, ce sachiez, car je n' avoie
De quoy l' avoir, ne ne savoie
Conment de ce finer peusse
Pour chose que faire sceusse,
Ne tant y sceusse viser,
Tant que Diex m' a fait aviser
De sire Audri ou j' ay esté
Et a qui j' ay mon fait compté;
Et le vaillant et bon preudomme
En deniers m' a baillié la somme
De vint livres dont m' a fait don
(Le vray Dieu l' en soit guerredon!),
Dont ma fille marieray.
Le marchié confermer yray
Sanz plus detrier maintenant;
Ne me vueil plus estre tenant
Icy endroit.
UN VOISIN. Alez a Dieu; vous avez droit;
Mais tant di je, voz noces faites,
Se vous come bon homme faittes,
Gardez bien que pas n' obliez
Qu' a vostre fille ne diez
Conmant souvent sanz detrier
Devra pour le bourgeois prier
Qui tant son mariage avance;
Aussi devrez vous sans doubtance:
Tenuz y estes.
DEUXIESME COUSIN. C' est voir. A Dieu, voisin! bien faites
De le moy si amantevoir,
Et j' en feray bien mon devoir,
Ja n' en doubtez.
LE MENAGIER. Sire Audry, deux moz: escoutez
Un petit homme que je sui,
Et pour Dyeu n' aiez a ennuy
Mon parler, sire.
LE BOURGEOIS. Biaux amis, ce que tu veulz dire,
Dy le me brief.
LE MENAGIER. Sire, je suis a tel meschief
C' om me quiert pour em prison mettre.
Je doy a un homme sur lettre
Environ vint livres tournoys.
Qu' il vous plaise jusqu' a un mois
A les me prester, sire doulx,
Et la lettre soit devers vous
Tant que les vous aie renduz,
Ou autrement je suis perduz
Certainement.
LE BOURGEOIS. Biaux amis, sachiez vraiement
J' ay tant donné et tant presté
Que je n' ay mais en verité
Riens qui soit, tant me sui destruiz;
Et saches que mais je ne truiz
Nul qui me vueille riens prester,
Si que vaz ailleurs emprunter:
N' ay mais de quoy.
LE MENAGIER. Par foy, sire, ce poise moy.
Mais s' estre peut que voulsissiez
Qu' a ce besoing cy m' aidissiez,
Je ne doubt point que n' en finasse
Si que briefment m' en acquittasse
Par quelque voie.
LE BOURGEOIS. Saches, amis, se Diex me voye,
Je suis a tel estat venuz
Que vray povre sui devenuz,
N' en doubtez point.
LE MENAGIER. Ore, sire, en aussi bon point
Et en aussi bon estat mettre
Vous vueille Diex com soliez estre!
Et puis qu' a vous ne puis riens faire,
A Dieu! ne vous vueille desplaire:
Je vois ailleurs.
DEUXIESME MENAGIER. Elas! je perdray les meilleurs
Gages que j' eusse au jour d' uy,
Dont j' ay a mon cuer grant annuy,
S' il n' est ainsi que les rachate;
Et je ne sçay ou je m' embate
A ce que ne les perde pas.
E! par foy, je m' en vois bon pas
Chiez sire Audry; j' ay esperance
Qu' il en fera pour moy finance
Si que je ne les perdray point.
Je le voy la, c' est bien a point.
Descouvrir li vois mon fait. Sire,
Plaise vous oir moy ce dire
Qui ou cuer m' est.
LE BOURGEOIS. Dites, amis, je vous promet
Voulentiers vous escouteray,
Et selon ce vous respondray
Que me direz.
DEUXIESME MENAGIER. Sire, com dolens et irez
Vous dy que j' ay gages es mains
Des Juifs, et se hui ne sont rains,
Ils sont miens perduz vraiement.
Si vous suppli tant humblement
Com je puis que les rachetez,
Et s' en voz mains sont, ne doubtez
Que dedanz huit jours tant feray
Que vostre argent vous renderay
Entiérement.
LE BOURGEOIS. Amis, je te dy vraiement,
Maintes foiz ay presté, c' est voir,
Pour Dieu; mais saches mon avoir
M' est si failli que n' ay denier,
Si que je te pri et requier
Ne me demandez riens, amis.
Je suis povres et au bas mis,
C' est a court plait.
DEUXIESME MENAGIER. Non estes, sire, se Dieu plaist.
Pour l' amour Dieu, ne vous desplaise
Se m' avez dit vostre mesaise:
A mon pouoir la celeray,
Et querre ailleurs chevance yray.
Chier sire, a Dieu!
LE BOURGEOIS. Et! sainte Marie, en quel lieu
Pourray finance recouvrer,
Ne conment pourray mais ouvrer?
Bien sui du hault au bas venuz.
Riches soloie estre tenuz;
Si estoie je veraiement,
Mais largesce trop largement
Et trop souvant m' a fait donner
Le mien et trop habandonner.
Mais je treuve bien qui m' arreste,
Je ne treuve homme qui me preste,
Ains me dit chascun: "Paie moy."
Las! dolent, et je n' ay de quoy,
Dont souvent sui tristes et mas.
Ha! Fortune, conme tu m' as
A ce cop du hault de ta roe
Jetté jus et mis en la boe!
Trop as pris vers moy grant rancune
Et trop m' es diverse et enfrune,
Quant tant me fais honte et annuy.
N' ay que donner a moy n' autruy,
Ne nulz n' a m' acointance chiére,
Ains me tourne chascun la chiére;
Et ceulx a qui j' ay plus fait bien,
Ceulx me tiennent plus vilz q' un chien,
Et de ceulx sui plus desprisié
Dont plus soloie estre prisié
Et en eulx ay je mains d' espoir,
Dont a po que ne desespoir
Du dueil que j' ay et de la honte;
Et puis qu' ainsi est, a brief conte,
Que ne me sçay ou esperer,
Jouer vueil au desesperer
Conme dolens et courroucié.
Je m' en vois parler a Moussé;
C' est le juif, pour verité,
Plus riche de ceste cité.
Ne puis de li qu' estre escondiz.
Moussé, je te pri qu' a mes diz
Un po entendes.
LE JUIF. Voulentiers, mais que tu ne tendes
Moy decevoir.
LE BOURGEOIS. Nanil. Moussé, saches de voir,
J' ay esté fol et deceuz.
De mon avoir sui decheuz
Par le donner trop largement,
Et trestouz ceulx onniement
A qui j' ay plus de grans biens fait,
A ceulx ay failli tout de fait.
Je sui marchant, a dire voir.
Se me prestes de ton avoir
Qu' en denrées puisse emploier,
Je le cuit si multiplier
Qu' autre jamais n' emprunteray,
Et si bien le te renderay,
Moussé, voire, et si largement
Que gré m' en saras, vraiement;
De ce n' en doubtes.
LE JUIF. Crestien, un petit m' escoutes.
Pour ce qu' as si larges esté
Com tu diz, sui tout apresté
De toy prester assez avoir,
Mais que j' en puisse plaige avoir
Ou gage, amis.
LE BOURGEOIS. Moussé, si m' ont arriére mis
Touz mes parens qu' en bonne foy
N' ont mais nulle cure de moy.
Nonpourtant je les ay touz faiz
Par ma largesce et par mes faiz.
Nyent moins telx sont au jour d' uy
Que ne me plaigeroit nullui
Ne ne s' i voulroit obligier,
Ne je n' ay gage a engagier;
Mais je t' aray en convenant
Et te jureray maintenant
Sur ma foy et sur ma creance,
Sanz detri nul, sanz decepvance,
Qu' a celui jour que me donrras
Terme de paier tu ravras
Tout ton avoir.
LE JUIF. Ainsi ne peuz tu riens avoir;
Scez tu pour quoy? que j' ay doubtance
Que ne failles de convenance,
C' est le premier.
LE BOURGEOIS. Ore je te pri et requier,
Moussé, or entens a moy: puis
Que gage ne plaige ne puis
Trouver n' avoir, pren, je t' en proy,
Mon creatour en qui je croy,
C' est Jhesu Crist, le roy des cieulx,
Le roy des roys, le Dieu des dieux.
Sur li t' en tien, Moussé, biau frére,
Et sur sa doulce chiére mére,
Que se tout ton avoir ne ras
Au jour que tu me nommeras,
Que ton serf seray de ma teste
Et me pourras conme une beste
Vendre au marchié.
LE JUIF. D' une grant charge t' es chargié,
Ce semble, mais je ne croy mie
Que ce Jhesus, filz de Marie,
Que clofichié ont en un fust
Noz ancesseurs, onques Diex fust;
Mais pour ce que de li est faitte
Mencion que il fu prophète,
Se tu le mez en plaigerie
Que tu mon serf toute ta vie
Seras, se faulx de convenant,
Je t' i prendray tout maintenant,
Vaille que vaille.
LE BOURGEOIS. Moussé, tu as bien dit sanz faille,
Et je l' accort aussi, par m' ame.
Alons au moustier nostre dame;
La le ferons.
LE JUIF. Alons tost. Quant nous y serons,
Je verray que l' en me dira
Et conment l' on te plaigera.
Vaz devant, passes.
LE BOURGEOIS. E! doulce vierge, qui delasses
Et sequeurs touz ceulx qui te quiérent
Et qui d' umble cuer te requiérent
De l' anemi et de ses las,
Dame, sequeur ce povre las,
Et me jette, piteuse mére,
Hors de servage et de misére,
Car moult le doubte en mon courage.
Sa vien, Moussé. Par cest ymage
Te doing en pleige Jhesu Crist
Qui tout fist, ainsi est escript:
Il te plege tout ton avoir;
Ne peuz nulz si bon pleige avoir,
Si gart Diex mon corps de meschance.
Met en ta main sanz delaiance
La main de cest ymage cy.
C' est bien. Or n' aies plus soussy
De ton avoir.
LE JUIF. Il me souffist ores, pour voir,
Bon crestien.
LE BOURGEOIS. Puis qu' il te souffist, or est bien.
Moussé, ne te desplaise un poi.
Amoureux Jhesus, je vous proy
Et vostre doulce mére aussi,
D' umble cuer que s' il est ainsi
Que par aucun cas je m' oblie
Que ce juif ne paie mie,
Que vostre largesce estendez
Si que son avoir li rendez
Au jour nommé sanz detriance
Et acquittez vostre fiance
Et vostre plegerie, sire.
Car s' il n' est paiez, bien puis dire
Si tost qu' un jour trespasseray,
Son serf de ma teste seray
A touz les jours de mon aage:
Sur sains li jur et sur t' ymage,
Biau sire Diex.
LE JUIF. Ce que plourer te voy des yex
Me fait grant pitié vraiement.
Partons de cy. Sus, alons ment.
Baillier te vueil ce que te doy
Prester. Amis, tien: par ma loy,
Vezcy mil livres bien comptez,
Touz en or. Or fais qu' amontez
Puisses estre brief d' autre mille,
Si c' on te tiengne par la ville
Pour homme sage.
LE BOURGEOIS. C' est bien m' entente et mon courage,
Moussé, de tellement ouvrer
Que du tout puisse recouvrer
Et mon honneur et mon estat.
Sanz plus faire cy de restat,
Maintenant pren congié de vous.
A Dieu vous conmant, ami doulx,
Jusqu' au veoir.
LE JUIF. Vas: Dieu te vueille pourveoir,
Bon crestien.
LE BOURGEOIS. Or cognoiz je maintenant bien
Que povre homme est touz jours bas mis,
Et que nul ne li est amis
S' il n' est riches et plain d' avoir.
Des parens peut il bien avoir,
Mais si tost conme il a deffault
Et qu' est povre, chascun li fault.
Et si voy bien que j' ay gasté
Le mien par prodigalité
Et par trop folement despendre.
Si vueil dès ores mais entendre
Miex que n' ay fait a marchander
Et ce qu' ay acroistre et garder,
S' il plaist a Dieu, tant qu' il aviengne
Qu' en mon premier estat reviengne
Et que puisse de mon acquest
Rendre au juif ce qui sien est
Et faire bonté par dessus.
Si feray je, se Dieu plaist. Sus,
Biaux seigneurs, sanz plus prolongnier
Touz deux vous vueil embesongnier
Sanz plus cy estre.
JOSCET. Sire, tout prest sui de moy mettre
A faire ce que me direz.
Sa! en quoy m' embesongnerez?
Monstrez le moy.
LE BOURGEOIS. Or entens: je me fie en toy.
Hors du pais m' en vueil aler
Marchander, c' est a brief parler,
Puis que Dieu m' a presté de quoy.
Tu demourras ici tout coy;
Des denrées t' envoieray
Et qu' ilz cousteront t' escripray
Et combien vendre les devras,
Com mon facteur que tu seras
En ce fait cy.
JOSCET. Autre foiz l' ay j' esté; aussi,
Sire, encore quant le seray,
Tant feray qu' onneur y aray
En la parfin.
LE BOURGEOIS. Je le scé bien. Et toy, Gobin,
Je vueil qu' avecques moy t' en viengnes
Et que compagnie me tiengnes
En ce voyage.
GOBIN. Mon chier seigneur, de bon courage
Feray toutes voz voulentez.
Songneusement, ja n' en doubtez,
Vous garderay.
LE BOURGEOIS. Alons men; cy plus ne seray:
Mon ordenance ay mise a bout.
A Dieu, Joscet! gardes par tout
Tant que reviengne.
JOSCET. A Dieu, mon seigneur, qui vous tiengne
En santé de l' ame et du corps!
N' aray mais aise jusqu' a lors
Que vous revoye.
GOBIN. Sire, tournons par ceste voie
Et en alons privéement
Au moustier, car certainement
C' est droiz qu' a Dieu nous conmandons
Et sa grace li demandons
Tout avant euvre.
LE BOURGEOIS. Qui ainsi le fait moult bien euvre,
Gobin, telle estoit bien m' entente.
Alons y, alons sanz attente.
Hé! agenoillier me vueil cy.
Biau sire Dieu, je vous mercy
Et vous aour, c' est bien droiture,
Car je sui vostre creature,
Et vous estes mon createur,
Mon gouverneur et mon docteur,
Qui tout avez creé de nient
Et celui de qui tout bien vient,
Qui des pecheurs les justes fais.
Sire, de trestouz les biens faiz
Que vous m' avez faiz jusques cy
Vous et vostre mére gracy
De cuer et de voiz sanz faintise,
Et en voz mains ma marchandise,
Mon avoir, mon ame et mon corps
Reconmans, Dieu misericors.
Or le me donnés emploier
Si bien et tant multiplier,
En quelque pais que je truisse,
Qu' au juif acquitter me puisse,
Sire, et vous de vostre plevine.
Sus, alons men par amour fine,
Sanz plus ci estre.
GOBIN. Vezcy a destre et a senestre:
Lequel yrons?
LE BOURGEOIS. Gobin, ce chemin cy prenrons,
Je le conseil.
GOBIN. Puis qu' il vous plaist, et je le vueil
De cuer entier.
GONTIER. Qu' est ce? Dont venez vous, Ytier?
Dites le moy.
ITIER. Sire Gontier, je vien par foy
De vers maison moy deduisant.
Dites, me serez vous disant
Rien de nouvel?
GONTIER. Je n' y scé riens dont me soit bel.
L' en m' a dit huy pour verité
Que sire Audri par povreté
S' en est alez hors du pais;
Dont je sui forment esbahis,
S' il est ainsi.
ITIER. On le m' a dit pour voir aussi,
Et qu' il estoit tel devenuz
Par povreté qu' il n' estoit nulz
Qui denier lui voulsist prester,
Car n' avoit de quoy acquitter
Soy a nul homme.
GONTIER. On m' a redit qu' une grant somme
De deniers a pris de Moussé
Et que par mer s' en va troussé
De marchandise.
ITIER. S' il l' avoit fait en ceste guise,
Je diroie, et est mon assens,
Sire, qu' il aroit fait grant sens
D' ainsi ouvrer.
GONTIER. Ne se peut plus bel recouvrer;
Car se fortune bien li chiet
Et a port de salut eschiet,
Telz denrées pourra avoir
Qu' il fera, ce vous dy pour voir,
D' un denier quatre.
ITIER. Je vous pri, alons nous esbatre
Vers son hostel et l' esprouvons.
Se nulz de ses vallez trouvons,
J' en enquerray.
GONTIER. Voulentiers vous compagneray,
Sire Ytier; pensons d' y aler,
Car de son bien oir parler
Grant joie aray.
ITIER. Son vallet voy la; j' en saray
Maintenant aucune parclose.
Joscet, dy me voir d' une chose
Que te vueil demander, amis.
Ou se peut ton maistre estre mis?
Mais ne le voy.
JOSCET. Sire, il a plus d' un mois, par foy,
Que ceens ne but ne mengea,
Car en mer une nef chargea
De denrées bonnes et belles.
De jour en jour attens nouvelles
De li avoir.
ITIER. Or te pri je, fay me savoir
Quant nouvelles de li aras,
Joscet, et mon ami seras,
En quel estat et en quel point;
Car je l' aime, n' en doubtes point,
De bonne amour.
JOSCET. Je le vous feray sanz demour,
Soiez en seur, sire Ytier.
Aussi s' avez de moy mestier,
Si le me dites.
ITIER. Grans merciz, Joscet, bien t' acquittes.
S' aucune chose aussi te fault,
Vien a moy, tu n' aras deffault
De chose dont aies mestier.
Alons nous ent, sire Gontier.
A Dieu, amis!
JOSCET. A Dieu, sire, qui vous ait mis
Huy en bon jour!
LE MESSAGIER. Dites moy, sire, sanz sejour,
Par amours, ou est le recept
D' un homme c' on clayme Joscet,
Facteur d' un marchant dit Audri?
Enseigniez le moy, je vous pri,
Se le savez.
JOSCET. Pour voir, adrescié bien avez,
Que ce suis je, mon ami doulx.
Or me dittes: que voulez vous,
Ne que querez?
LE MESSAGIER. Que je quier assez tost sarez.
Mon ami, vezci une lettre
Que vous envoie vostre maistre,
Qui vous salue.
JOSCET. A vostre parole solue,
Amis, vous demande une chose:
Avecques ceste lettre close
Me mande il riens qui soit de bouche
Que faire doie qui lui touche?
Et de son estat, je vous pri,
Me dictes aussi sanz detri
Ce qu' en savez.
LE MESSAGIER. Par les lettres que vous avez
Trouverez que de mercerie,
De tresses et d' espicerie,
De draps d' or et d' avoir de pois
A chargié, passé a trois mois,
Une barge qu' il vous envoie;
Diex a port de salut l' avoie!
Et si vous fas pour voir entendre
Ne treuve denrées a vendre
Qu' il n' achate des marcheans,
Et par tout est si bien cheans
Qu' il ne fait nulle marchandise
Ou il ne gangne a sa divise,
N' en riens qu' il achète ne pert,
Mais partout gangne; et il appert,
Car j' ay bien tant de li enquis,
Que ceste année il a acquis
Quatre nefs sanz l' autre chatel,
Dont il a tant et d' un et d' el
Que sanz nombre est, ce vous recors;
S' estoit sain et haitié du corps
Quant le laissay.
JOSCET. Puis que telles nouvelles sçay
De li, j' en ay bien le cuer lié.
Je pense qu' estes traveillié.
Cy endroit plus ne vous tenez,
Mais avec moy vous en venez,
Car ensemble maishui serons
Et souperons et coucherons,
Mais qu' il vous plaise.
LE MESSAGIER. Je le vueil, mais, ne vous desplaise,
Il me convient avant aler
Par force a un homme parler;
Tost revenray.
JOSCET. Or soit: je vous attenderay,
Amis, au giste.
LE BOURGEOIS. Gobin, sachiez moult me delite
Que n' ay a qui ores debatre.
Alons nous en aux champs esbatre,
J' en ay desir.
GOBIN. Puis qu' il vous vient, sire, a plaisir,
Alons de fait.
LE BOURGEOIS. Elas! chetis, las! qu' ay je fait?
Las! je doy bien estre esperduz.
Je sui sanz reméde perduz
A touz jours mais.
GOBIN. E! Diex, qu' est ce ci? Onques mais
Ne vy a mon maistre avenir
Tel mal. Dont li peut il venir?
Onques n' oy doleur greigneur.
Conment vous est, mon chier seigneur
Et mon ami? Parlez a moy.
Elas! qu' en puis je se m' esmoy?
A li ne trait ne pié ne main.
Je tien qu' il est mort pour certain.
Que feray je, biau sire Diex?
Ensemble en tant d' estranges lieux
Avons entre nous deux esté
Et par iver et par esté;
Onques mais ne vi qu' avenist
Que si sodain mal le tenist
Conme il fait ore.
LE BOURGEOIS. Ha! tresdoulx Dieu, pére de gloire,
Tant sui dolans ne say que dire.
Des yeux pleure, du cuer souspire,
Car laidement m' est mescheu.
L' anemi m' a bien deceu,
Deceu voire et assoté,
Quant je n' ay miex le jour notté,
Notté? mais en mon cuer escript,
Qu' en pleige baillay Jhesu Crist
Et sa tresdoulce mére chiére!
Las! bien doy faire mate chiére,
Quant il m' est si mal advenu
Que du jour ne m' est souvenu
Que devoie au juif paier
Son avoir, qui moult esmaier
Me fait, las! et n' ay je pas droit?
S' un homme mouvoit orendroit
Et ne finast jusqu' a cinquante
Journées d' errer, non soixante,
Ne pourroit il pas a Buissance
Venir pour toute sa puissance,
Ou le juif tient son mesnage.
Las! bien sui cheuz en servage,
Car le jour si sera demain
Que le convenant de ma main
Li juray que son serf seroie
Ou cas que ne le paieroie.
Oultre plus fu a ce tendant
Que mon Dieu li fu respondant;
Si dira qu' il n' est pas vray Dieux
Et se vantera par touz lieux
Qu' en moy n' a point de loyauté,
Quant ne li porte feaulté
Et qu' au jour nommé ne li paie.
Las! las! C' est ce qui plus m' esmaie.
Certes mon avoir petit pris,
Puis que pour son serf me voi pris,
Si n' en puis mais se me tourmante
Et me complaing et me lamante.
Hé! pour quoy me vois lamentant?
Reconforter me doy en tant
Que de celi mon pleige fis
Qui tout peut faire, j' en sui fis.
Au juif, s' il lui plaist, m' apaie
Par sa doulceur et l' avoir paie.
Pleiges en est, si m' en acquit.
N' en puis ore faire autre acquit,
Fors tent qu' en l' eure sanz attendre
L' avoir qu' au juif doy vueil prendre
Et en la main Dieu le mettray;
Ja puis ne m' en entremettray.
Gobin amis, alez me querre
En ma chambre un escrin bonne erre
Qu' aux piez de mon lit trouverez:
Cy endroit le m' apporterez.
Faites tantost.
GOBIN. G' i vois, sire, et sachiez bien tost
A mon pouoir reseray cy.
Tenez, mon seigneur: est ce ycy
L' escrin que demandez avoir?
N' en y a point d' autre, pour voir,
Qu' aie veu.
LE BOURGEOIS. Tu en as bien fait ton deu,
Que c' est celi que je demande.
En ta sainte garde et conmande,
Biaux sire Diex, qui es sanz fin,
Met et reconmans cest escrin
Et l' argent qui est dedans mis.
Ha! sire, aussi que je te mis
Pour moy plege, par ta vertu,
Au juif m' en acquittes tu;
Car ne sçay trouver autre voie
Conment a li quitte me voie.
Pour c' en ceste mer cy le met
Et en ta garde le conmet.
Or le condui par ta puissance
Si qu' arriver puist a Bisçance
Et que si bien la chose aviengne
Qu' entre les mains du juif viengne;
Biau sire Diex, ce te requier.
Gobin, plus estre cy ne quier;
Amis, vien t' en.
GOBIN. Sire, alons; n' estions pas entan
Cy aval, il s' en fault assez.
Mains biaux marchiez sont puis passez
Parmy voz mains.
LE BOURGEOIS. Loé soit Dieu! n' y a pas mains.
Plusieurs pais ay puis marchié
Et fait aussi maint biau marchié
Ou j' ay gangné, loé soit Diex!
Tant qu' a touz jours m' en sera miex.
Laissons ester.
LE VALLET. Egar! egar! je voy floter
Un escrin dedans celle mer.
Par foy, je seray a blamer
Se je ne met paine a l' avoir.
Je croy qu' il ait dedans avoir,
Et si se pourforce et estrive,
Tant com peut, de venir a rive:
Ne voy ame qui tort m' en face;
Prendre le vueil sanz plus d' espace.
Egar! conme il est loin salli!
A le cuider prendre ay failli,
Mais j' attenderay qu' il reviengne
Et si peut estre que le tiengne,
Ne sera riens qui me deporte
Qu' en ma chambre tost ne l' emporte.
Revenir près de moy le voy;
Prendre le vueil: avoy! avoy!
Il semble qu' a moy ait contens,
Car si tost com je la main tens
Pour le prendre, il plunge et defuit
Et quanqu' il peut de moy s' enfuit,
Aussi con voulsist dire: "Tien,
Biaux amis, je ne sui pas tien."
Encore un petit attendray:
Se plus revient je le prendray;
Conment qu' il m' en doie avenir.
Or est bien: vez le cy venir,
Et si près de rive est pour voir
Que ne faudray pas a l' avoir.
Qu' est ce cy? Sui j' enfantosmé?
De dueil sui bien ore abosmé,
Quant a le prendre ay tant tendu
Et touz jours s' est si deffendu
Que sur lui ne puis ma main mettre.
Par foy, je vois querre mon maistre
Maistre, entendez me sanz debatre:
De dessus la mer vien d' esbatre,
Ou j' ay trouvé un escrinet
Qui a la rive de l' iaue est,
Mais n' i ay tant sceu les mains
Tendre que pour plus ne pour mains
Je le puisse avoir pris. Mon maistre,
Que veult ce dire? Que peut c' estre?
Trop m' en merveil.
LE JUIF. Or m' y maine; veoir le vueil,
Amis Sadoch.
LE VALLET. Foy que je doy mon pére Enoch,
Sire, voulentiers le feray.
Alons: je le vous monsterray,
Puis qu' avez du veoir tel soing.
Veez: de la rive n' est pas loing.
Qu' en dites vous?
LE JUIF. Il semble que s' en viengne a nous;
Regardons un po la maniére,
Puis qu' au bort est de la riviére,
En l' eure y vueil les deux mains tendre
Et le prendre sans plus attendre.
Sa! puis que le tien hors du port,
Emporter le vueil sanz deport
En mon repaire.
LE VALLET. Pour rien qui soit n' ay peu faire
Tant que l' aye avant de vous pris.
Vostre est, soit ou ne soit de pris,
Vaille que vaille.
LE JUIF. Tu diz voir. Je saray sanz faille
Ains que je menjusse des dens,
Sadoch, s' il y a riens dedans.
Or entens: se riens as a faire,
Congié te doing d' aler le faire
Sanz plus attendre.
LE VALLET. Puis qu' ainsi est, je vois entendre
A aprester nostre diner,
Et je ne pense mais finer
Tant qu' il soit prest.
LE JUIF. Par le grant Dieu, puis qu' ainsi est
Que ci n' a nul autre que moy,
Ouvrir le vueil. Egar! g' y voy
Des florins une grant murjoe,
Et sy voy dessus une escroe:
Lire la vois sanz contredit
Au jour pour savoir qu' elle dit.
"Cest escrin a tout cest avoir,
Va, ce fas j' a touz assavoir,
A Bissance a un bon juif
Qui y demeure, s' il est vif,
Nommé Moussé, ou a son hoir."
C' est a moy; n' en vueil plus savoir.
En l' eure me vois entremettre
De le bouter en sauf et mettre
Dedans mon lit.
LE BOURGEOIS. Gobin, je n' ay point de delit
De cy endroit plus sejourner.
Arriére m' en vueil retourner
A Bisçance, la ville noble,
Qui nommée est Constantinoble:
Ne puis encor tant ville amer.
Tu scez bien que j' ay mis en mer
Tout mon avoir, si n' est pas doubte,
Si le me fault suir a route.
A touz les marchans que je say
Prins hier congié: nul n' en laissay.
Suivre me fault d' or en avant
Mon avoir qui s' en va devant.
Alons men: sus!
GOBIN. Sire, je n' y vois point en sus
De chose que vous vueillez faire.
Puis qu' il vous plaist, il me doit plaire,
C' est de raison.
LE BOURGEOIS. Tandis qu' avons belle saison,
Pensons de cheminer, amis.
Se l' avoir que j' ay en mer mis
Dieu a port de salut m' amaine
Et n' aye riens de mon demaine,
Si sui je riche homme a touz jours,
Il ne nous fault mais que deux jours
Errer qu' a Bisçance serons,
Si te diray que nous ferons.
A mon hostel t' en yras droit,
Et je demourray cy endroit;
Et de l' estat tu enquerras,
Et selon ce que bon verras,
Dy que je vien hardiement;
Mais retournes ysnellement
Icy a moy.
GOBIN. Voulentiers, sire, par ma foy.
Demourez; je m' en vois batant.
A l' uis voy la Joscet batant;
Adrescier me vueil celle part.
Joscet, chier ami, Dieu vous gart,
Compains royal!
JOSCET. Gobin, mon chier ami loyal,
Par le corps Dieu bien veignes tu!
Baise moy. Conmant le fais tu?
Or me dy voir, par amitié,
Est mon seigneur sain et haitié?
Ne me mens pas.
GOBIN. Raler m' en fault a li bon pas.
En bon point est, sachiez de voir.
Envoié m' a devant savoir
L' estat et conment on se porte
Ceans, afin que li rapporte
Ce qu' an saray.
JOSCET. Gobin, ja ne t' en mentiray:
L' estat est bon, n' en doubtez point.
Di que sommes touz en bon point,
Si diras voir.
GOBIN. Je li vois dont faire assavoir:
Plus voulentiers en venra cy
Et plus joieusement aussy.
Je le vois querre.
JOSCET. Et je te suiveray bonne erre;
Mais avant le feray savoir
A ceulx que pourray percevoir
Qui l' ont bien chier.
GOBIN. Mon seigneur, pour moy depeschier,
Vos amis et vostre gent toute
Sont en bon point, n' en aiez doubte.
Entre les autres a tel joie
Joscet ne scet que faire doye;
Après moy vient encontre vous;
Mais avant le va dire a touz
Voz amis, sire.
LE BOURGEOIS. Or va bien, Gobin; sanz plus dire,
Saches d' errer ne fineray
Jusqu' a tant qu' en maison seray
En mon recoy.
JOSCET. Sire Ytier, nouvelles. ITIER. Et quoy,
Joscet amis?
JOSCET. Pour ce que je vous ay promis
Que de mon seigneur vous diroie
L' estat si tost com le saroie,
Je vous dy qu' il est près de cy
Et s' en vient et est, Dieu mercy,
Tout sain du corps.
GONTIER. Biaux seigneurs, est point voz accors
Que je soie a vostre conseil?
Sachés que riens savoir n' en vueil,
S' il ne vous plaist.
ITIER. Vous y pouez bien: a court plait,
Sire, Joscet me dit ainsi
Que son seigneur est près de cy
Et que contre li veult aler;
Si vueil je faire, a brief parler,
Tout maintenant.
GONTIER. Il dit voir; la le voy venant.
Cy endroit plus ne nous tenons:
A l' encontre de li alons;
Avançons nous.
JOSCET. Mon chier seigneur, bien veigniez vous.
Conmant vous est?
LE BOURGEOIS. Il m' est bien, mon ami Joscet.
Que tu soies le bien trouvé!
Conment t' es tu depuis prouvé
Que ne te vy?
JOSCET. Je me sui bien et bel chevi,
Vous le sarez.
ITIER. Sire Audry, quant loisir arez,
Parlez a nous, s' il vous agrée.
Vostre venue est bien secrée.
Conment vous est nous vueilliez dire:
Que de meschief vous gart et d' ire
Le roy des cyeulx.
LE BOURGEOIS. Seigneurs, onques ne me fu miex.
Que bien vegniez touz deux ensemble!
Or me regardez. Que vous semble?
Sui j' en bon point?
GONTIER. En si bon qu' il ne semble point
Qu' aiez hors du pais esté;
S' a il deux ans, en cest esté,
Que vous partistes.
LE BOURGEOIS. Sire Gontier, verité dites.
Ne vueil que cy plus demourez,
Mais jusqu' an mon hostel venrez
Touz ensemble, et la buverons
Et des pais diviserons
Qu' ay puis marchié.
LE JUIF. J' ay oy dire en plain marchié
Qu' est revenuz en son hostel
Celui a qui de mon chatel
Prestay, il a deux ans, grant somme.
Par droit conme serf est mon homme,
Car faly m' a de paiement.
Sadoch, alons men vraiement.
Je vois savoir qu' il me dira,
Ou s' il le me reniera,
Ou s' il me dira: "Je le doy."
C' est trop bien a point, je le voy;
A li vois parler sur son lieu.
Bon crestien, par le grant Dieu,
Vous soiez le tresbien venuz!
Longuement vous estes tenuz
Hors du pais.
LE BOURGEOIS. Moussé, n' en soiez esbahis.
Ainsi le fault a marcheans
Selon que temps leur est cheans.
Conmant vous est?
LE JUIF. Il m' est bien. Savoir vien du prest
Que de mes deniers vous ai fait,
S' il m' en sera riens satisfait;
Car quant vous prestay mon avoir
A certain jour le duy ravoir,
Lequel jour est pieça passé.
Ainsi le m' eustes fiancé,
Plus, se un seul jour trespassiez
Que mon serf a touz jours seriez.
Se me dedites de ce point,
Sachiez que je ne donrray point
Un festu en vostre creance,
Ne nulz n' y doit avoir fiance,
Je vous dy bien.
LE BOURGEOIS. Certes, Moussé, ne te doy rien,
Se Deu t' ayt: bien t' ay paié.
N' en fais ores si l' esmaié,
Non, je t' en pri.
LE JUIF. Je prouveray bien sanz detry
Que je vous prestay mon avoir,
Qu' a certain jour devoie avoir.
Mes tesmoins saray bien trouver,
Mès certes ne pourrez prouver
Le paiement.
LE BOURGEOIS. Moussé, sanz plus de detriment
Jusqu' a demain attenderas;
Je te diray que tu feras,
Sanz faire cy plus long devis;
Et entre deux j' aray avis
De te dire et monstrer conment
Tu es paié tout plainement.
Te souffist il?
LE JUIF. S' il me souffist? certes oil.
A cest accort me vueil bien mettre,
Mais que vous deux y vueilliez estre,
Si sarez se j' ay tort ou droit.
Sus: je m' en vois de cy endroit
Jusqu' a demain.
GONTIER. Et nous y serons pour certain,
Moussé, et s' il y a descort,
Nous vous metterons a accort,
Moy et Itier.
LE JUIF. Sire, il en sera tout mestier,
A ce que voy.
LE BOURGEOIS. Seigneurs, demourez avec moy,
Afin que ne soie escharny
Du juif, mais de vous garni
Soie, sanz vous point eslongnier.
Oultre un po ay a besongnier
La hors, mentir ne vous en quier,
A un marchant. Si vous requier
Qu' a vous esbatre icy tendez
Et une heure ou deux m' atendez
Que je reviengne.
ITIER. Audri, sire, aviengne qu' aviengne:
Alez, et nous le vous ferons.
Cy endroit vous attenderons,
Ja n' en doubtez.
GONTIER. Ce ferons mon; mais escoutez:
Nous vous prions, c' est sanz ruser
Que ne nous faciez pas muser
Trop longuement.
LE BOURGEOIS. Non feray je certainement;
De ce ne vous soussiez point.
Ha! sire Diex, qui ne fault point
A ceulx qui ont en toy fiance,
Ferme foy et vraie esperance,
Qui des cuers les pensées voiz
Et qui clérement les congnoiz,
Tu scez, sire, par la grant foy
Et ferme qu' ay eu en toy
Mon avoir en l' escrin boutay
Et puis en la mer le jettay
Afin que par toy fust conduit,
Biaux sires Diex, en celle nuit,
Et que l' endemain l' adressasses
Si qu' au juif m' en acquitasses,
Et toy, qui plege es de l' avoir.
Que le juif demande avoir,
Ha! sire, qui tout puissant es,
En paiz mon cuer de cecy mès;
Demonstre moy par ton saint nom,
Sire, se je suis quitte ou non,
Car jusqu' a tant que j' en saray
Le voir de cy ne partiray
Toy depriant.
DIEU. Sanz plus estre cy detriant,
Mére, aler vueil a ce bourgeois
Qui de cuer, de bouche et de vois,
Me prie si devotement.
Avec moy, sus, appertement
Venez, et vous, anges, aussi.
Or sus! descendez jus de cy
Ysnellement.
GABRIEL. Vray Dieu, vostre conmandement
Acomplirons.
MICHIEL. Gabriel, voirement ferons.
Loys avecques nous venra,
Qui a chanter nous aidera.
Loys, ferez?
LOYS. Je vous tenray ce que direz,
Soiez certain.
GABRIEL. Or sus, disons a chant hautain:
RONDEL. Reconfortes toy, cuer humain,
A qui Jhesu sa mére amaine
Du hault trosne de son demaine,
Car par amour tout prist en main.
Reconfortes toy, cuer humain
En eulz loant et soir et main
Et non pas de loenge humaine,
Mais de celle qui es cieulx maine.
Reconfortes toy, cuer humain,
A qui Jhesu sa mére amaine
Du hault trosne de son demaine.
NOSTRE DAME. Le desir qui ton cuer demaine
A savoir ce que nous requiers,
Pour ce qu' en vraie foy l' enquiers,
Amis, mon filz t' acomplira
En partie, et si te dira
Conment te convendra ouvrer,
Si tu veulz honneur recouvrer.
Pour ce l' oreille du cuer tens
Et ce que te dira entens.
Filz, or li dites.
DIEU. Tu veulz savoir se tu es quittes
Au juif ou non, c' est t' entente.
Fay le cy venir sanz attente
Et m' en demandes tesmoingnage;
Et combien qu' il soit caus et sage,
Telle parolle li diray
De quoy vous deux accorderay,
N' en doubte pas.
NOSTRE DAME. Puis qu' avons ici fait le pas,
Ralons nous ent, fil, yl est temps.
Anges, chantez sons accordens
Sanz plus cy estre.
GABRIEL. Dame de la gloire celestre,
Nous ferons vostre voulenté.
Seigneurs, de nous trois parchanté
Soit nostre rondel tout a plain.
RONDEL. En eulx loant et soir et main
Et non pas de loenge humaine,
Mais de celle qui es cieulx maine,
Reconfortes toy, cuer humain,
A qui Jhesu sa mére amaine
Du hault throsne de son demaine.
LE BOURGEOIS. Vrais Diex, c' est bien chose certaine
Que cil maine bien sa querelle
Qui de cuer humblement t' appelle.
Sire, je vois sanz contredit
Faire ainsi conme tu m' as dit;
C' est pour le miex; ainsi le tien.
Ore, biaux seigneurs, je revien
A vous ici.
ITIER. C' est bien a point: la voi aussi
Moussé venir.
LE JUIF. Seigneurs, pour verité tenir
Revien cy. Sire, se mon prest
Me voulez rendre, je sui prest
Du recevoir.
LE BOURGEOIS. Veulz tu que je te die voir?
Pour ta parole estre mal ditte,
Te monstreray que j' en sui quitte;
Car je tien tout pour verité
Mon plaige m' en a acquitté.
Se tu veulx venir a l' eglise
Ou la plegerie fu prise,
Je te prouveray et de fait
Par tesmoins mon paiement fait.
Que diras oultre?
LE JUIF. C' est fort chose c' on le me moustre;
Nonpourquant voulentiers iray,
Biau sire, et voz tesmoings verray.
Seigneurs, je vous pri, vous et vous
Trestouz, venez avecquez nous
Veoir quelz tesmoinz il ara
Et conment il me prouvera
Ce qu' il a dit.
ITIER. Moussé, ja n' en seras desdit.
Or nous delivrons sanz detry.
Sus, alez devant, sire Audri,
Et nous après.
LE BOURGEOIS. Je vois. Or me sivez de près,
Car j' ay creance et ferme foy
Qu' il est paié: riens ne li doy.
Vous le verrez, s' il plaist a Dieu.
Ho! biaux seigneurs, vezci le lieu
Ou cilz vers Moussé me plaigea
Que Pilates a tort jugea.
Or regardez que je feray
Et entendez que je diray.
Ha! mére de misericorde,
A ton doulx filz prie et recorde
Et requier qu' il me vueille oir
Pour ceste assemblée esjoir.
Roys Jhesu Crist, vrais filz de Dieu,
Qui es vrai Dieu, vers cest esbrieu,
Pour ton saint nom plus essaucier,
Me tesmoingnes cy sanz cessier:
De ce prest te plaise il a dire
Se j' en sui quittes ou non, sire,
Car tu scés, sire, j' en sui fis,
Conment tout mon pouoir je fis
De li paier.
DIEU. Ne te chaille, amis, d' esmoier.
Au juif as paié moult bien
Quanques tu avoies du sien
Et a jour nommé, c' est la fin,
A ces enseignes que l' escrin
Est en son lit a tout l' avoir
Que je pour toy li fis avoir,
Tout tel conme en mer mis l' avoies
La nuit que paier le devoies,
Dont l' endemain il le trouva
Ou a ses piez li arriva,
Si le prist quant le vit a port.
De ce tesmoingnage te port,
Ceci te fis pour la grant foy
Que je vy qu' avoies en moy
Et la creance.
GONTIER. Moussé, or appert sanz doubtance
Qu' a vous est bien sire Audry quittes
De ce que li demandez. Dictes,
Est il ainsi?
LE JUIF. Ha! seigneurs, je vous cri mercy.
Le cuer m' esbahist a merveille
De ceste non pareil merveille.
Je voi bien et suis cognoissans
Que vostre Dieu est tout puissans
Et vostre loy en bonté passe
La nostre; dont sanz plus d' espace,
Je vueil crestien devenir.
Je vous pri, faites moy venir
Qui crestienté me donrra
Et en la foy m' entroduira
Que vous tenez.
LE BOURGEOIS. Moussé, s' avecques nous venez:
A nostre evesque vous menrons
Et par devers lui tant ferons
Qu' il meismes vous baptisera
Et la foy vous enseignera
Et la loy que devrez tenir.
Oultre, s' il vous y plaist venir,
Deux de nous serons voz parrains.
Or y venez, mon ami, ains
Qu' ailleurs ailliez.
LE JUIF. Seigneurs, pour Dieu, ne m' en failliez.
J' ay tresgrant desir d' y aler,
Afin que puisse a li parler.
Or m' y menez.
ITIER. Moussé, voulentiers; sa venez
Avecques nous.
GONTIER. Mon seigneur, nous venons a vous
Conme a nostre droit pére en Dieu
Non pas pour ruse ne pour jeu,
Ce sachiez, sire, en verité,
Mais pour donner crestienté
Ce juif cy.
L' EVESQUE. Dy me voir, dy, est il ainsi
Qu' a baptesme tu veulx venir
Et la foy et la loy tenir
De crestien?
LE JUIF. Sire, je ne desir tant rien,
Si estre peut.
L' EVESQUE. Ore, par ta loy, qui te meut?
Que je le sache.
LE JUIF. Se rudement, sire, et en tache
Le vous compte, prenez en gré,
Et ne le tenez pas secré,
Car c' est bien chose a mon avis
Dont l' en doit faire lors devis
Que gens seront plus amassez.
Sire, il a ja deux ans passez
Qu' a ce bourgois prestai pour voir
Bien mil livres de mon avoir
Qu' a jour nommé me devoit rendre,
Ou se non, le pourroie prendre
Conme mon cerf toute sa vie.
Tantost s' en ala par navie,
Ce dit il, en mainte contrée.
Ne sé qu' il fist, mais la journée
Propre que paier me devoit,
Si conme promis le m' avoit,
Une telle merveille avint
Qu' un escrin par mer flotant vint
Jusques au bort de l' iaue a nage;
Et je qui fui sur le rivage,
Quant le vi, ne me deportay,
Mais le pris et l' en emportay
Et dedans ay trouvé d' avoir
Autant qu' il me pouoit devoir
Et une escroe qui disoit
Qu' a moy tout cest avoir venoit.
A tant ne me suis pas tenuz,
Mais si tost conme il est venuz
Je li ay demandé le mien.
Il m' a dit: "Je ne te doy rien,
Mon plaige m' en a acquitté."
Or m' avoit il pour verité
En plege baillé Jhesu Crist:
Je n' en pris onques autre escript.
Nié li ay son paiement;
Il me respondi lors briément:
"De le te prouver sui tout prest.
Vien a celui qui mon plege est."
A l' eglise, sire, alez sommes,
Li et moy et ces autres hommes.
Si tost que nous venismes la,
L' ymage de Jhesu parla
Et dist: "Je te port tesmoingnage
Que l' escrin fis venir a nage
A jour nommé, a tout l' avoir
Que ce juif demande avoir,
Et cil le prist et par delit
Aus piez l' a mucié de son lit."
Quant j' ay ceste chose sceu
Et ce miracle aperceu,
J' aprouvé et dis plainement
Que Jhesus est Diex vraiement
Et que regne en gloire celestre.
Pour ce requier crestien estre
Et qu' il vous plaise.
L' EVESQUE. Or ne t' en mez plus en malaise,
Que voulentiers le te feray;
Mais avant mes clers manderay
Qui devant nous chantant iront,
Car doulce voiz et souvraine ont.
Venir les voi, c' est bien a point:
Mander ne les me convient point.
Mes clers, ne me vueilliez desdire;
Maintenant vous fault un chant dire
Qui soit delictable a oir,
Et qui touz nous face esjoir.
Droit au moustier vous avoiez
Et en chantant nous convoiez.
Or sus, chantez.
LES CLERS. Mon chier seigneurs, voz volentez
Ferons de cuer, c' est bien raison,
Afin que n' aiez achoison
De nous blamer.
UN MOTET. On vous doit bien, vierge, loer,
Quant pour nous d' enfer desnoer
Dieu se fist en vous homme,
Qui de la mort nous acquitta
Ou Adam touz nous endebta
Par le mors de la pomme.
Explicit.