Miracle de Pierre le changeur

Radicavi in populo honorificato et in partes Dei
mei hereditas illius et in plenitudine sanctorum
detencio mea. Ecclesiastici XXIIII^o. La glorieuse
vierge Marie, après sa predestinacion, qui fu dès avant les
siecles, par laquelle elle a surmonté toutes personnes
mortelles, et après aussi son assumpcion ou ciel, par laquelle
elle a surmonté touz les anges, maintenant encore
procedent a plus grant planté de loenge nous intime et
denonce une autre seue excellence, c' est assavoir qu' elle
est loée et amée ou peuple. Et si conme elle n' est surmontée
en predestinacion des siecles, en conversacion en ce
monde, en perfeccion de euvres et de vertuz et en son assumpcion
es cieulx, aussi n' est elle surmontée en reverence
et en devocion des peuples, si que elle surmonte touz les
sains. Et pour ce dit elle les paroles proposées: radicavi,
etc..; je m' ay enraciné ou peuple honnorifié, et es
parties de mon Dieu est mon heritage, et en la plenitude
des sains est ma detencion. Et en ces paroles la vierge
benoite mett troys choses, a denoter troys estaz des
loyaux crestiens qui par grant devocion cuerent a li et
la servent, c' est assavoir: l' estat des prelaz que je entens
par le peuple honorifié. Et pour ce que ceulx qui telx sont
sont dignes de double honneur, c' est assavoir de temporelle
et espirituelle puissance, car ilz sont prestres qui se
sont donnez a Dieu servir especiaument, et sont péres
du peuple esperituelment, et pour ce du premier est il dit
Ecclesiastici VII^o: Honora Deum, etc..: honneure Dieu
et porte honneur aux prestres. Conment honneure Dieu?
Voire en li administrant, car saint Jehan dit: Si quis
michi ministraverit, honorificabo eum, etc. : celui qui
m' amenistrera, c' est a dire qui de cuer me servira, dit
Diex, celui honnorifiera mon pére. Après en ce que la
vierge dit: Et in partes Dei mei: et es parties de mon
Dieu, est denoté l' estat des contemplatis, pour ce qu' il se
sont traiz et mis en l' espicial partie de Dieu et non pas
a li servir de cuer ou par dedans seulement, mais en habit
et estat par dehors singuliérement, et de ceulx ci est
il dit Deuteronomii XXXII^o: Pars autem Domini populus
ejus. Telz contemplatis sont la partie de nostre
seigneur et son peuple. Et après est denoté l' estat de
ceulx qui vivent en la vie active, qui sont entenduz par
ce qui est dit en nostre thyeume: Et in plenitudine sanctorum,
etc. : et en la plenitude des sains est ma detencion,
ce dit la vierge benoite. Par ceulx ci j' entens ceulx qui
vivent en vie active, pour leur multitude par laquelle ilz
surmontent les autres devant diz et pour leur plantureuseté
par laquelle en generacion faisant ilz emplent le
nombre des loyaulx par lesquiex les siéges de paradis
seront empliz; et selon la difference des estaz la vierge
benoite mett difference de devocions qui leur sont ottroiées;
car ou regart du peuple honorifié elle mett enracinement
et dit: Je m' ay enraciné ou peuple honorifié,
c' est es prelaz. Haa! beneuré peuple en qui s' est enracinée
la vierge a ce que touz jours elle croisse en leur pensée
par amour et dileccion, en leur bouche par predicacion
pour y avoir de louenge fruttificacion, et en euvre
par ensuite et imitacion, jouste ce qu' il est dit Ecclesiastici
XXIIII^o: Je sui, dit la vierge, comme la vigne,
qui ay fruttiffié en odeur de soueveté, voire par doulce et
vraie humilité et par parfaicte charité. Mais conment
cuides tu que la vierge s' enracine en personne orgueilleuse
et plaine de vanité, n' en personne plaine d' avarice
et de cupidité, n' en personne luxurieuse ne plaine de
charnalité? En touz ceulx ci ne peut la vierge ses racines
mettre ne fichier, et pour ce dit elle notablement: Je
m' ay enraciné ou peuple honorifié, c' est assavoir ou peuple
que ne deshoneure point luxure, ne charnalité, ne
avarice de biens temporieux, ne cupidité, ne que ne
deshonneure point orgueil ne vie plaine de vanité. Après
quant a l' estat des contemplatis, la vierge dit: In partes
Dei mei: es parties de mon Dieu est mon heritage. O
beneurées parties ou la vierge a assis et prins son heritage!
Et ce est dit ou pour ferme et longue habitacion, dont
il est escript Ecclesiastici XXIIII^o: in omnibus requiem
quesivi, etc..: j' ay quis en toutes choses repos et me demourray
en l' eritage de nostre seigneur; ou pour le
doulx goust de l' eritage virginal et la participacion, dont
il est dit ou livre et chapitre dessus dit: Spiritus meus
super mel dulcis et hereditas mea, etc. : mon esperit est
doulx conme miel et mon heritage plus doulx que la
raye de miel. Et de ceci exposer je me passe pour cause
de brieté, mais a ce que nostre thyeume dist: In pleninitudine
sanctorum, et cetera, la vierge benoite dit que
sa detencion est en la plenitude des sains; par ceste plenitude
je entens ceulx qui sont en la vie active, qui contendent
ci aval a detenir celle vierge, mais differenment:
les uns par abstinence de jeuner, les autres par aumosnes
donner, les autres par oroisons faire et li prier et saluer;
et toutes ces choses faire nous font avoir et detenir
la vierge, et pour elle jeuner et aumosnes donner et elle
prier et saluer. Dont Thobie dit: Bonne chose est oroison
avecques jeune et aumosne. Mais note bien que elle
dit: en la plenitude des sains, voire de ceulx en qui sont
sains desirs, saintes paroles et saintes euvres. Si li prions
qu' elle nous doint en ce monde avoir si saintes paroles
et si sains desirs et si saintes euvres que nous en puissons
venir conme sains avecques elle sanz fin. Amen.
Cy conmence un miracle de Nostre Dame d' un marchant
nommé Pierre le changeur, qui par lonc
temps avoit vesqui de mauvaise vie, qui fu si malade
que il cuidoit morir, et en sa maladie vit en
avision les dyables qui le vouloient emporter, et
Nostre Dame l' en garenti a la proiére d' un ange
qui le gardoit, et depuis vint a santé et fist tant de
bien qu' il converti un sarrazin.
PREMIER POVRE. Diex doint bonne encontre au jour d' ui!
Que sanz doubte si povre sui
Que je n' ay ne pain ny argent.
Donnez a Didier, bonne gent,
Que Dieu voz pechiez vous pardoint.
Elas! ne truis qui rien me doint;
Ne me sçay quelle part embatre.
Je m' en vois en la place esbatre
Et illeuc au soleil seoir.
Encore est de moy pourveoir
Et pourchacier assez bonne heure;
Un po vueil ci faire demeure.
Les compaignons attenderay
Avec qui je m' esbateray
Jusqu' a grant messe.
DEUXIESME POVRE. Doint bon jour, Didier! Egar! qu' est ce
Qui t' a si matin admené?
T' a ame depuis riens donné
Que ci venis?
PREMIER POVRE. Nanil, Menait, par saint Denis.
Ce qu' er soir n' oy, mon ami chier,
Que souper me fit descouchier
Si matinet.
DEUXIESME POVRE. Tu en as le ventre plus net
Et la fourcelle et l' estomac.
A il point de pain en ton sac
Pour aler boire?
PREMIER POVRE. Nanil, amis, par saint Magloire,
N' en ma bource denier ne maille.
Siez t' emprès moy, vaille que vaille:
Un po ci nous esbaterons
Et puis pourchacier nous yrons
Aval la ville.
DEUXIESME POVRE. Or soit. Ho! vezci venir Gille
L' enfondu qui nous vient veoir.
Sa, Gile, venrez vous seoir
Avecques nous?
TROISIESME POVRE. Oil, Menait, mon ami doulx:
Pour c' y vien je, sachiez de voir.
Que bon jour puissiez vous avoir
Touz deux ensemble.
PREMIER POVRE. Seigneurs, dites moy s' il vous semble
Que die bien: ne detrions,
Mais pour noz bienfaiteurs prions,
Tant pour femmes conme pour hommes,
Car je vous di tenuz y sommes,
C' est tout certain.
DEUXIESME POVRE. Didier, c' est voir, je t' acertain
Que des bienfaiz que d' eulz avons,
Loer Dieu pour eulz en devons
Et li prier.
TROISIESME POVRE. Or nous di ci sanz detrier,
Menait, par ta foy, qui ceulx sont
Qui plus voulentiers bien te font
Et plus souvent.
DEUXIESME POVRE. Je le te diray par convent
Qu' autel feras.
TROISIESME POVRE. Je te promet, tu les m' orras
Après nommer.
DEUXIESME POVRE. C' est bien. Or pensez d' assommer,
Vous deux, quans je vous en diray.
Premiérement vous nommeray
Une dame ja bien viellete
Qui veuve est, appellée Huguette:
A son hostel ne faux je goute
Que touz jours n' y aie, sanz doubte,
Char ou poisson, potage ou pain,
Puis qu' a son huis d' aler me pain;
Dieu ses biens li croisse et foisonne!
Après souvent aussi me donne
Une seue bonne voisine
Que Dieu face de gloire digne,
Qui surnommée est la Bossue;
Riche femme est, assez cossue:
D' elle, chascun jour de karesme,
Ay une escuelle que j' esme
Et prise a plus de six deniers.
Aussi me donne voulentiers
Un preudomme c' on nomme Hernault
De Bisquariel; Diex le consault!
De moy donner rest moult engrant
Un c' on nomme Jourdain le Grant,
Toutes foiz qu' a son hostel vois;
Si fait aussi un bon bourgeois
C' on appelle Pierre le Maistre.
Si tost qu' a son huis me voit mettre,
Je ne fail point, quel jour que soit,
Que de ses biens il ne m' envoit
Pain ou argent.
TROISIESME POVRE. Quant tu as tant de bonne gent
A chalans, tu doiz estre riche.
Ne cuides pas que je te triche,
Je n' en sui pas de tant acointe:
Je n' ay seulement qu' a la pointe
Saint Eutasse un tournois par jour.
D' ilec je m' en vois sanz sejour
Par les halles au Grant Godet,
Puis a Simon Triquefadet,
Qui demeure au port Nostre Dame.
D' ilec m' en revien a la dame
Du Chastel, la femme Raulin:
La ay je du pain et du vin
Et de la char et du potage;
C' est l' ostel ou plus d' avantage
Ay entre touz.
PREMIER POVRE. Seigneurs, et que me dites vous
De l' ostel Pierre le changeur,
Qui a surnom de peageur
Pour ce qu' il reçoit les truages?
Y avez vous nulz avantages
N' aumosnes, dites?
DEUXIESME POVRE. D' un biau nient dire t' aquittes.
Il est bien voir conme evangille
N' a si riche homme en ceste ville;
Mais va tost ta bouche laver,
Car du plus merde et plus aver
Homme que l' en puisse savoir
Parles, et si put tout d' avoir;
Et si het tant la povre gent
Qu' onques une piéce d' argent
Je ne li vi donner pour Dieu.
Gilet, fuz tu onques en lieu
Ou il donnast denier ne maille?
Je pense que nanil sanz faille.
Et toy, qu' en scez?
TROISIESME POVRE. Je vi devant hier qu' amassez
Ne sçay quans a son huis estoient,
Qui l' aumosne avoir attendoient,
Mais a tout un baston sailli
Hors de l' ostel et s' en failli
Bien po qu' il ne les menhaigna;
En les chassant les rechigna
Trop laidement.
PREMIER POVRE. Je vous di bien certainement
C' onques a son huis je ne quis
Aumosne ne ne li requis.
Mais que me voulrez vous donner
S' au jour d' ui par mon sermonner
Puis de lui quelque chose avoir?
Je voulroie trop bien savoir
Que me donrez.
DEUXIESME POVRE. Didier, vezci que vous ferez:
Vous l' irez, biau sire, essaier,
Et ne vous vueilliez esmaier:
Que s' aumosne en la main vous mett,
Quelle que soit, je vous promett,
Si tost conme je la verray,
De vin franchement vous donrray
Plaine une quarte.
PREMIER POVRE. Feras dont? et, par sainte Marthe,
G' y vois, et si ne fineray
Jusqu' a tant qu' a son huis seray
Et que le voie.
TROISIESME POVRE. Or vas: mais que de sa monnoie
Ne d' autre riens donner te vueille,
Certes j' en aray grant merveille
En mon courage.
DEUXIESME POVRE. Perdre aussi bien va son langage
Conme s' il aloit batre Saine;
Mais tien que, se Pierre l' assaine,
D' un baston avant li donrra
Ou de ce que tenir pourra
Que bien li face.
PREMIER POVRE. Vezci son huis. S' on ne m' en chace,
Par foy, je ne m' en mouveray
Tant que venir hors le verray,
Ou s' il est hors tant qu' il reviengne.
Ci endroit, aviengne qu' aviengne,
L' attenderay.
LE TALEMELIER. Maishui plus ne sejourneray.
Porter m' en vois ce pain bonne erre,
Qui tout tendre est, chiez sire Pierre,
Car de tel pain voulentiers use.
Un povre que je voy qui muse
A sa porte, s' aumosne atent
Ne bienfait, a folie tent.
Sire Pierre voy la venir:
S' a sa porte le voit tenir,
Il le batra, je n' en doubt point,
Avant qu' une aumosne li doint.
Nientmoins d' aler m' avanceray
Tant qu' a la porte avant seray
Que li, se puis.
PIERRE. Que fais tu ci, dy, a cest huis?
N' y as que querre.
PREMIER POVRE. Sire, pour Dieu vous vueil requerre
Que vous me donnez une aumosne:
Que Dieu qui maint lassus ou trosne
S' amour vous doint!
PIERRE. Non, Dieu! mais se t' en donne point,
Pendre me puist on d' une hart.
Passe, passe, truant, paillart,
Vuide ma porte.
LE TALEMELIER. Vezci pain, sire, que j' aporte,
Cuit d' amatin.
PREMIER POVRE. Que Diex qui de l' iaue fist vin,
Sire, vous soit misericors!
A moy qui sui un povre corps
Aucun bien faites.
PIERRE. Se tost d' aler tu ne t' afaittes,
Par sainte croiz de Valenton,
Et je tien pierre ne baston,
Je t' en donrray par tel essart
Que diras que dyable y ait part,
Mett jus, amis.
LE TALEMELIER. Voulentiers, sire. C' est jus mis
Puis qu' il vous plaist.
PREMIER POVRE. E! pour Dieu, mon seigneur, s' ou plait,
Ma grant povreté repassez.
D' une petite aumosne assez
Riche seray.
PIERRE. Riche homme assez tost te feray,
Par la foy que je doy saint Pierre,
Si je truis ne baston ne pierre. <En regardant ça et la.>
Hé! puis que point ici n' en truis,
Se j' en devoie estre destruis,
A la teste te jetteray
Ce pain, si que je te feray
A terre la cervelle espendre. <Ici li jette le pain.>
Il a bien sceu les mains tendre
Contre le pain, et si l' emporte.
Or, reviens, reviens a ma porte,
Se fais que sage.
LE TALEMELIER. Sire, atrempez vostre courage.
Ennuieux a esté sanz doubte.
Voulez vous que ce pain je boute
La dedans, sire?
PIERRE. Oil. Haro! que j' ay grant ire
Que de li n' ay fait mon plaisir!
Certes c' estoit tout mon desir
Que du pain tel cop li donnasse
Qu' en la place mort le jettasse.
Mais j' ay failli, dont suis irez.
Alez ent: quant rapporterez
Du pain, et mon clerc y sera,
L' un et l' autre vous taillera:
Il a la taille.
LE TALEMELIER. Il me plaist, et le vueil sanz faille.
A Dieu, chier sire!
PIERRE. A Dieu, amis, qui vous gart d' ire
Et de pesance!
GALOT. Mon seigneur, sachiez sanz doubtance
De faire vien vostre message,
Et ay trouvé sire Lippage
Qui voz lettres envoiera
Au pais si tost qu' il pourra
Message avoir.
PIERRE. Il me souffist assez pour voir.
Sa, siez te cy.
PREMIER POVRE. Seigneurs, je revien, vez me ci,
Et vous afferme pour certain
Que sire Pierre de sa main
M' a donné ce pain qui est tendre.
Avant, Menait: sanz plus attendre,
Pour ta conscience apaier,
Vien la quarte de vin paier
Que gagié m' as.
DEUXIESME POVRE. Se Dieu t' aist, ne me mens pas,
Didier: l' as tu si pourmeu
Que ce pain que tiens receu
As de sa main?
PREMIER POVRE. Par la foy que doy saint Germain,
Oil, Menait.
TROISIESME POVRE. Je tien que de nouvel renait,
Quant aumosnier est devenu.
Marie! il t' est bien advenu,
Car onques mais n' oy parler
Qu' a nul, tant y sceust aler,
Il donnast rien.
PREMIER POVRE. Je ne scé, mais je vous dy bien
Qu' il meismes ce don m' a fait.
Si vous pri, Menait, que de fait
En la taverne nous menez
Et ce pot de vin nous donnez
Qu' avez promis.
DEUXIESME POVRE. Je le feray de cuer, amis,
Puis qu' ainsi est; or nous hastons,
Et si vous pri que nous chantons
En alant; suivez m' ou je vois.
Or sus, disons: Au bois, au bois!
PIERRE. Galot, la parole et la voiz
M' afebloient trop malement.
Je sui en accès vraiement:
Ne puis plus ci, mon ami chier.
Pour Dieu, maine moy tost couchier,
Et je t' en pri.
GALOT. Sire, je feray sanz detri,
C' est raison, vostre voulenté.
Sa, venez, que bonne santé
Vous soit de Dieu donnée en bréve!
Escoutez: s' a aler vous gréve,
Si vous appuiez dessus moy;
Je le vous dy de bonne foy,
N' en doubtez pas.
PIERRE. Jusqu' a mon lit n' a pas deux pas;
Ne me fault point d' apuiement,
Mais tien me bien tant seulement
Par ce braz destre.
GALOT. Voulentiers, mon seigneur et maistre,
A vostre gré vous sera fait.
Or ça, vezci vostre lit fait:
Je vous pri que vous depeschiez
Et qu' apertement vous couchiez
Sanz sejourner.
PIERRE. Sur ce costé me vueil tourner
Pour savoir s' il m' en sera miex.
Diex, que feray? Han! Diex, han! Diex!
Certes, je muir, ce croy, c' est nient.
Une beguine me convient
Avoir qui me sache garder.
Vas m' en querre une sanz tarder,
Galot amis.
GALOT. Vez me la, sire, a voie mis,
Et sachiez je ne fineray
Tant q' une vous en amenray
Bonne et certaine.
PIERRE. Han! Diex, que j' ay souffert de paine
Et que j' ay par le corps d' angoisse!
Et si n' est pas que ne me croisse
Ceste douleur de mal en pis,
Et me descent du chief ou pis
Et es costez.
GALOT. Mon chier seigneur, or vous ostez,
S' estre peut, d' ainsi lamenter.
Amené vous ay sanz doubter
La meilleur garde des beguines;
Au mains de toutes ses voisines
Y est tenue.
PIERRE. M' amie, bien soiez venue.
En moy n' a voir ne jeu n' esbat,
Tant me deult le chief et debat
Et me fait mal.
LA BEGUINE. C' est voir que les maux a cheval
Viennent, mais a pié, sire doulx,
S' en vont. Monstrez ça vostre poux.
Gardez, ne vous dejettez point:
Vous serez tantost en bon point,
Si plaist a Dieu de paradis.
Je vous vois ordener tandis
Un colis de quoy humerez
Quant hors de vostre accès serez.
Or mettez paine de suer
Sanz vous debatre ne muer:
Tost revenray.
GALOT. C' est bien dit: lez li me tenray
Tant que venrez.
DIEU. Anges, savez que vous ferez?
Alez m' un siége la jus mettre
Ou seoir conme juge et maistre
Puisse une piéce.
PREMIER ANGE. De faire chose qui vous siesse,
Sire, avons chascun grant desir.
Puis que c' est a vostre plaisir,
Michiel, alons.
DEUXIESME ANGE. Gabriel, de ci devalons
Et ne le tenons pas a grief.
Alons nous en delivrer brief,
Si ferons bien.
PREMIER ANGE. Je vois devant; après moy vien,
Michiel amis.
DEUXIESME ANGE. Ho! Gabriel, ici soit mis
Nostre siége sanz plus d' espace:
Je ne voy point de meilleur place;
Et si conseil encore ainsi
Que le second façons aussi,
Afin que se sa mére vient
Avec li, con souvent advient,
Qu' aions siége ou puist estre assise
Tout prest et delez son filz mise
Ici entour.
PREMIER ANGE. Or soit fait du plus noble atour
Que pourrons sanz arrestoison:
Quant c' est pour Dieu, c' est bien raison;
Puis l' irons dire.
DEUXIESME ANGE. Or bien, c' est fait: alons men. Sire,
Le siége qu' avez demandé,
Ainsi que l' avez conmandé,
Si est tout prest.
DIEU. Puis qu' ordené l' avez, bien est
Et je sui tout prest d' aler y.
Or entendez: n' y ait cely
Qui compagnye ne me tiengne
De vous touz et qu' avec moy viengne
A brief parler.
NOSTRE DAME. Chier fil, preste sui d' y aler.
Descendez touz.
PREMIER ANGE. Dame des cieulx, si faisons nous.
Or sus! a voie nous mettons
Et en alant d' accort chantons
Touz troys ensemble.
TROISIESME ANGE. C' est bien a faire, ce me semble.
Avant: prenez. <Ici viennent chantant, et quant Diex est assis et Nostre Dame, le tiers ange va au malade et dit:>
Creatures de Dieu maudites,
Que querez vous ci endroit? dites.
Vuidez bon pas.
DEUXIESME DYABLE. Pour quoy? pour vous non ferons pas;
Ne voulons riens avoir du vostre,
Mais nous voulons ce qui est nostre
Avoir, c' est l' ame de ce corps.
N' attendons fors qu' elle soit hors
Du corps yssue.
TROISIESME ANGE. Faulx ennemis, il dort et sue.
Cuidez vous qu' il doie morir?
Nanil, c' est signe de guerir.
Et, s' il avoit passé le pas
De la mort, ne l' ariez vous pas:
Autre l' ara.
PREMIER DYABLE. Sy arons, qui droit nous fera;
Car tant est de mal entechiez
Et tant a fait de grans pechiez
Qu' il n' est riens qu' il ait desservi
Qu' estre du feu d' enfer servi
Sanz finement.
DIEU. Vaz, si m' amaine vistement
Ceulz la qui ainsi se combatent.
Savoir vueil de quoy se debatent
Entre eulz ainsi.
PREMIER ANGE. Faire les vous vois venir ci,
Sire, puis que le conmandez.
Vous touz estes de Dieu mandez.
Avant passez, venez a li,
Bons et mauvais, n' y ait celi
Qui ci demeure.
TROISIESME ANGE. Gabriel, g' i vois tout en l' eure,
Mon ami doulx.
DEUXIESME DYABLE. N' en doubtés, aussi ferons nous:
Aussi tost que vous y serons,
Et sachiez nous li requerrons
A avoir droit.
DIEU. De quoy avez vous la endroit
Tant debatu?
PREMIER DYABLE. Sire, vraiz juges, telz es tu,
Vezci de quoy. La gist un homme:
Quel? tel que dix chevaulx a somme
Ne pourroient pas, ce sachiez,
Porter le quart de ses pechiez,
Non le quint, ce sachiez de voir.
Et cestui ci le veult avoir
Et dit que n' y avons puissance!
Et il est voir que dès s' anfance
Il devint gloton et yvrongne,
Ne n' avoit honte ne vergongne
De tolir a la bonne gent
Ce qu' il pouoit de leur argent.
Après, sire, quant il advint
Qu' en l' aage de vint ans vint,
Conment usa il sa jonnesse?
Conment? quoy qu' il eust richesce,
Si fu le plus de ses deduiz
Aler de nuiz rompre les huiz
A mariées et pucelles
Et de les efforcer, et celles
Qui de riens li contredisoient
En l' eure batues estoient
Et navrées vilainement.
Or regardez, sire, conment
Le devons perdre.
DEUXIESME DYABLE. Pour moy confermer et aherdre
A ce qu' il a dit soustenir,
Sire, il est voir et se venir
Veist un povre homme a son huis,
Tant par estoit de pitié vuiz
Qu' avant d' un baston l' estonnast
Qu' aumosne nulle li donnast.
Vers eulx estoit trop depiteux,
Plain d' avarice et convoiteux;
D' eulz veoir avoit grant despit.
Demandez veoir sanz respit
Contre ce que mettons en fait
Quel bien il a ne dit ne fait
Et qu' il le monstre.
DIEU. Avant! Que diras tu encontre
Ce qu' il ont proposé? respons.
Le bien qu' a fait pas ne repons,
Mais met l' en place.
TROISIESME ANGE. <Ici vient à Nostre Dame.> E! mére Dieu, par vostre grace
Aidiez m' a ce pecheur secourre
Et de ces ennemis rescourre,
Tresdoulce dame.
NOSTRE DAME. N' est pas le corps encore et l' ame
En vie humaine?
TROISIESME ANGE. Si est, vierge de pitié plaine:
Du corps l' ame onques ne parti;
Mais je doubt bien que se par ti
Ne li est fait, dame, secours,
Qu' en enfer ne s' en voit le cours
Pour ses meffaiz.
NOSTRE DAME. Me peuz tu monstrer nulz biens faiz
C' onques en sa vie feist,
N' oroison nulle qu' il deist
Devotement?
TROISIESME ANGE. Nanil, ma dame, vraiement.
Je ne scé pas c' onques sa vie
Eust d' aucun bien faire envie,
Mais que de nuit et jour penser
A assembler et amasser,
Fors tant que puis deux jours en ça
Un povre a son huis s' adressa,
Qui pour avoir bienfait le quist
Et son aumosne li requist.
Si ne scé de quoy s' aquitta,
Au povre lors un pain jetta
Non pas de bonne voulenté,
Non, mais, a dire verité,
Par grant despit et par grant ire.
Toutes voies vous puis je dire
Le povre si se deporta
Et prist le pain et l' emporta.
C' est tout quanque je scé qu' ait fait
De bien, dame, n' en dit n' en fait,
Puis qu' il nasqui.
NOSTRE DAME. Si a trop meschamment vesqui,
Dont ne doit pas estre esjouy.
Ore je t' ay assez ouy:
Je vueil a ta peticion
Encliner par compascion. <Ici parle a Dieu.>
Sire Dieu, qui ta deité
Couvris en moy d' umanité
Pour les pecheurs justefier
Et les justes saintiffier
Et les saintiffiez en gloire
Mettre, j' ay trop bien en memoire
Conment ces ennemis accusent
Ce malade pour ce qu' il musent
Et tendent a son ame avoir.
Mais or prenons que ce soit voir
Quanque proposé ont ici,
Si vueil je dire, sire, ainsi
Que plus doiz a misericorde
Estre enclin, raison s' i accorde,
Qu' a justice ni equité
Pour ta parfaitte charité,
Qui te fist humanité prendre,
Qui te fist consentir a pendre
En croiz, et par piez et par mains
Estre clofichié pour humains
Acquitter de leur grief deu
Que n' avoies pas accreu.
Après, sire, prenons de fait
Qu' il ait les maulx qu' il dient fait,
Si diz je qu' il ne l' aront mie;
Car encore a humaine vie
Et peut a santé retourner
Et soy de vertuz aourner
Et repentir de ses pechiez
Dont ilz dient qu' est entechiez,
Si qu' il se travaillent en vain.
Oultre, sire, vezci un pain <Ici baille l' ange le pain.>
Qu' il a a un povre donné,
Pour ce qu' il l' ot araisonné
Et de dire s' esvertuoit
Que famine trop le grevoit;
Si li doit estre de prouffit
Plus que touz les maux c' onques fist
Ny en jonnesce n' en viel aage
Ne li doivent estre a damage;
C' est tout certain.
DIEU. Or ça: je vueil tenir ce pain;
Baillez le moy, ne dites mot. <Ici le regarde un po.>
Or entens a moy, Vehemot,
Et toy, Sathan, entens aussi.
Je dy qu' en ceste aumosne ci,
C' est en ce pain dont je parole,
A tant de bien qu' il equipole
Et vault contre touz les pechiez
Dont peut cest homme estre entechiez,
Si qu' ainsi pareil et egal
Sera le bien contre le mal.
N' arez pas l' omme: il garira,
Et, s' il veult, bien ou mal fera.
S' en pechié meurt, nel depportez
Qu' en enfer vous ne le portez
Con vostre chetif esperdu.
Mais vostre part avez perdu
Cy quant a ore.
PREMIER DYABLE. Haro! a po que ne m' acore
De dueil, quant a present m' eschappe.
Touz jours nous jeue Dieu soubz chappe,
Qui nous fait si d' un a un b
Que touz jours nous sommes gabé
Et perdons tout.
DEUXIESME DYABLE. Esté avons fol et estout
De nous en estre sur li mis,
Car touz jours nous est ennemis,
Quant sa mére vient a l' afaire;
Autrement ne l' oseroit faire,
Et s' il le faisoit, abatuz
Seroit de sa mére et batuz
Dessus ses fesses.
PREMIER DYABLE. Je t' en croy bien. Or, laisses, laisses.
Nous irons ailleurs si ouvrer
Qu' en pourrons pour un recouvrer
Deux, trois ou quatre.
DEUXIESME DYABLE. Je scé en la rue du Plastre
Un biau visage femenin
Que trop convoite un turlupin.
Alons y, et si faisons tant
Que l' un soit l' autre combatant,
Et puis qu' il s' en voisent ensemble:
Ainsi a un cop, se me semble,
Deux en arons.
PREMIER DYABLE. Alons: ceci trop bien sarons
Faire et briément.
TROISIESME ANGE. Or regarde, Pierre, conment
Et combien t' a valu ce pain
Qu' au povre as donné de ta main:
Certes onques ne donnas mais
Si bon. Pour ce dès ores mais
T' amonneste et pri que tu vives
Et au contraire pas n' estrives,
Mais pense de toy pourveoir
Selon ce que tu puez veoir
Quel prouffit ce pain t' a porté,
Et que tu en es enorté
Souffisanment.
DIEU. Mére, et vous touz, sus. Alons ment
Arriére es cieulx.
NOSTRE DAME. Mon pére et mon Dieu, c' est le miex
Que puissons faire a mon avis.
Sus, tretouz, sanz plus de devis
Devant alez.
DEUXIESME ANGE. Si ferons nous: plus n' en parlez,
Dame de la gloire haultaine.
En alant sus a haulte alaine
Chantons nous trois.
PIERRE. E! vray Dieu, roy dessus touz roys,
Je doy bien trembler et fremir,
Je doy bien plourer et gemir
Et avoir paour et cremeur
Quant je pense a la grant orreur
Que j' ay eu en vision,
Qui n' est pas, non, illusion,
Ne qui n' est pas aussi mençonge,
Quoyque l' aie veu en songe.
Las! quant je pense au roy celestre,
Qui me sembla si cruel estre,
Et que je vi les ennemis
Qui les maulx qu' avoie conmis
Et mes pechiez li presentérent
Et qu' en moy nul bien ne trouvérent,
Honteux du bien estre et taisible
Pour la grief sentence et orrible
Ou Dieu sanz fin jugié m' eust
Et de droit faire le peust,
N' eust esté misericorde
Qui la pour moy fut de ma corde.
Et s' un pain, vraix Diex et vraiz sire,
Que j' ay de felon cuer par ire,
Non pas de bonne voulenté,
Au povre par despit jetté,
M' a esté de si grant prouffit
Qu' il a contre mes maux souffit,
Combien acquiert cil de merite
Et de quelx maux aussi s' acquitte
Qui pour Dieu fait au povre aumosne,
Quant de bon cuer et lié l' aumosne?
Ha! com c' est euvre de grant pris!
Et puis que j' en ay tant apris,
Certes aumosnier devenray
Tel que tout mon avoir donray
Pour l' amour du doulx roy celestre,
Mais qu' en santé sur piez puisse estre:
Telle est m' entente.
LA BEGUINE. Sire, il vous convient sanz attente
Prendre un po de refeccion.
Or mettez vostre affeccion,
Sire, a humer ceste escuelle
De coulis, qui est bonne et belle,
Se Dieu me voie.
GALOT. Beguine, il a, dont j' ay grant joie,
Trop bien dormi.
LA BEGUINE. Le chief a vuit et estormi:
Il ne li fault fors qu' il menjusse
Ou qu' il hume, et ceste elle suce
Par appetit.
PIERRE. Je me vueil lever un petit
Et puis feray ce que voulrez.
Or ça, qu' est ce que me donrrez
A humer, dame?
LA BEGUINE. D' un bon coulis, sire, par m' ame.
Tenez, tastez.
PIERRE. N' en sui pas moult entalentez;
Nientmoins, ça! j' en essaieray
Et puis mon avis en diray.
Il me semble bon sanz deffault. <Ici rent l' escuelle vuide.>
Tenez. Or ça, boire me fault:
Je vueil du vin.
LA BEGUINE. Si en arez, par saint Lubin.
Vez le ci cler et nett et sain
Et bon, con fust de Saint Pourçain,
Ce qu' il n' est mie.
PIERRE. Tel le vueil je boire, m' amie.
Sa! je vueil ma soif estanchier.
C' est fait, je me vueil recouchier.
Je sanz bien, quant dormi aray
Un petit, que gari seray.
Or me laissiez.
LA BEGUINE. Sire, pas ne vous courrocez
Se je vois tantdis a maison.
Je n' y feray d' arrestoison
Mie granment.
PIERRE. M' amie, alez hardiement:
Il me plaist bien. Galot, et toy
Tu demourras ci delez moy,
Afin que je t' aye tout prest
Pour moy servir se mestier est
Et je vueil rien.
GALOT. De par Dieu soit; il me plaist bien.
Ainsi con vous le proposez
Feray, sire. Or vous reposez
Sanz plus debatre.
TROISIESME POVRE. Seigneurs, aler nous fault embatre
Par ces rues et ça et la
Pour savoir s' aucun ame y a
Qui bien nous face.
PREMIER POVRE. Suiverons nous l' un l' autre a trace,
Ou se nous nous despartirons
Et l' un ça, l' autre la, irons?
Que vous en semble?
DEUXIESME POVRE. Je lo que nous alons ensemble,
Et de tout ce c' on nous donra
Autant l' un con l' autre y ara
Au departir.
TROISIESME POVRE. Or pensons de nous appartir;
Il me plaist bien, se Dieu me voie.
Alons nous en par ceste voie,
C' est nostre miex.
PREMIER POVRE. Je m' i accors; alons. Que Diex
Nous doint touz trois si bien ouvrer
Que chascun y puist recouvrer
Chose qui vaille.
DEUXIESME POVRE. Je ne doubt mie que je faille
A avoir et pain et argent,
S' entendre me veulent la gent
Que prieray.
TROISIESME POVRE. Aussi tien je que j' en feray
Bien mon devoir.
PIERRE. Veulz tu que je te die voir,
Galot? je ne vueil plus jesir.
Je n' ay de rien si grant desir
Con d' aler esbatre en la ville.
Je merci de foiz plus de mille
Dieu qui m' a mis en si bon point
Que gari sui, n' en doubtez point,
Et je ne l' oblieray pas.
Alon men, alon tout le pas
Ensemble, amis.
GALOT. Alons, sire, puis qu' a ce mis
S' est vostre vueil.
PIERRE. A ces trois povres donner vueil
Qui ci viennent de mon argent.
Tendez les mains, ma bonne gent,
Ligiérement; ne detriez.
Tenez, je vous pri que priez
A Dieu pour moy.
PREMIER POVRE. Puis que vous me donnez de quoy,
Prier Dieu pour vous sui tenuz.
Celui qui voult povres et nuz
Pour humains en la croiz morir
Le vous vueille, sire, merir
Et rendre a l' ame.
DEUXIESME POVRE. Celle qui est royne et dame
De paradis, sire, vous face
Tel que veez Dieu en la face
Voire sanz fin.
TROISIESME POVRE. Amen! je l' em pri de cuer fin
Que de paradis le face hoir.
Voirement dit bien celi voir
Qui premier dit: "qui va si leche,"
Et aussi dit: "qui siet si seche."
S' au vin encore assis fussions,
A cest argent failli eussions
Que nous avons.
PREMIER POVRE. Pour combien le fait ne savons;
Mais puis que le preu en est nostre,
Disons en chascun patenostre,
Si ferons bien.
DEUXIESME POVRE. Certes a grant merveille tien
Qu' il est devenu aumosnier;
Car n' a gaires qu' un seul denier
Ne donnast pour rien qu' avenist,
Mais d' un baston, s' il le tenist,
Voulentiers batoit povre gent.
Esbahiz sui que son argent
Ainsi depart.
TROISIESME POVRE. Dieu le veult, espoir, a sa part
Avoir; pour ce li fait ce faire,
Car souvent sanz a nul meffaire
Diex euvre tellement de fait
Que d' un pecheur un juste fait
Digne de gloire.
PREMIER POVRE. Certes, tu diz parole voire:
Ainsi sa benignité moustre.
Laissons ester; alons men oultre,
Si ferons miex.
LE MARINIER. Que feray je, biau sire Diex?
Je sui en estrange pais.
Elas! bien doi estre esbahiz.
Je me voy nu et entrepris,
Ce que n' avoie pas apris;
Car je soloie assez avoir
Robe a vestir et de l' avoir,
Que j' ay tout en la mer perdu.
Las! je doy bien estre esperdu,
Et si sui je certainement.
Conment me cheviray? conment?
Certes il me fault truander
Et aux bonnes gens demander
ça et la tant que vestuz soie
D' aucun gros garnement sanz soie.
Helas! onques mais je ne fui
En la povreté ou je sui:
Ne me scé conment contenir.
Un riche bourgeois voy venir,
Ce me semble a son appareil;
L' aumosne demander li vueil.
Sire, pour la Dieu amistié, <Ci li chiet aux pieds.>
De ce nu vous prengne pitié.
Donnez me pour couvrir mon corps,
Que Dieu vous soit misericors.
Vostre aumosne ne me veez,
Car certes plus que ne veez
Sui aggrevez.
PIERRE. Mon ami, levez sus, levez.
Je croy bien que vous dites voir,
Que vous estes povre d' avoir;
Au moins vous voy j' en petit point,
Il me semble, quant n' avez point
Que vestir, que c' est grant besoing.
Tenez, ce garnement vous doing:
Pour l' amour Dieu soit, et vous pri
Que vous le vestez sanz detri
Et le portez.
LE MARINIER. Sire, puis que m' en enortez,
Si le vestiray devant vous.
Ore vestu sui, sire doulz.
S' il vous plaist, a tant m' en iray
Et a Dieu vous conmanderay
Pour ore, sire.
PIERRE. Vaz. Dieu te gart d' annui et d' ire,
Mon ami doulx.
LE MARINIER. Je seray trop folz et estouz,
Se plus dès ores mais m' atir
A ce garnement ci vestir,
Qui si riche est et si honneste.
Ne sui pas digne que le veste;
Il m' en vaulra miex l' argent prendre:
Despoullier le vueil et le vendre,
Car tout plain d' argent en aray,
Dont en plus d' un cas m' aideray.
Sur m' espaule le vueil porter
Et moy ça et la deporter,
Ne ne cesseray, que je puisse,
Jusques a tant que marchant truisse
A qui il siesse.
LE MARCHANT. Amis, se ja ne vous meschiéce,
Ce que sur vostre espaule voy,
Est ce a vendre? dites le moy.
Se m' en voulez faire raison,
En l' eure sanz arrestoison
L' acheteray.
LE MARINIER. Oil, je le vous venderay,
Se voulez, sire.
LE MARCHANT. Avant que pris y vueilliez dire,
Monstrez le moy.
LE MARINIER. Tenez: il me plaist bien, par foy;
Veez le bien.
LE MARCHANT. Je l' ay assez veu. Combien
Le faites vous?
LE MARINIER. Je le vous donray, sire doulx,
Pour trente livres.
LE MARCHANT. Marie! vous n' estes pas yvres
De le faire, amis, tant d' argent.
Le garnement est bon et gent,
Mais ne le vueil plus barguignier,
Car je n' y voy pas a gaaingnier
Sur si grant pris.
LE MARINIER. Et de combien ay je mespris
A parler, qu' il vous soit advis?
Par amour, faites m' en devis,
Que je le sache.
LE MARCHANT. Amis, en voulez vous en tache
Douze livres? C' est assez, voir.
Je n' en voulroie pas avoir
Un tel après pour tant d' argent.
Octroiez le moi de cuer gent,
Car c' est assez.
LE MARINIER. S' a plus grant pris vous ne passez,
Ne l' arez mie.
LE MARCHANT. Par la foy que je doy m' amie,
Qui a non bource, c' est assez.
Je vous lo que le m' y laissez,
Sire compains.
LE MARINIER. Certes, ne le donrray pour mains
De vint livres petiz tournois,
Ou vendu ne sera des moys,
Je vous dy bien.
LE MARCHANT. Sa! celle main: je le retien.
Sur ma perche le jetteray
Jusqu' a tant que je revenray.
Venez ent, ne vous esmaiez:
Vous serez en l' eure paiez
En bon or fin.
LE MARINIER. Alons: je paieray du vin
Trop voulentiers.
PIERRE. Galot amis, endementiers
Que Dieu me preste espace et temps,
Je vueil que tu voises, entens,
Aux petiz mesnagers honteux
De ceste ville souffretteux,
Et cest argent ci leur donrras;
Et selon ce que les verras
Plus povres, plus euvres tes mains,
Plus leur donne, et aux autres mains.
Or ne soies fol ny estout:
Ains que reviengnes donnes tout,
Et a ceulx a qui tu donras
Humblement tu leur requerras
Prier pour moy.
GALOT. Voulentiers, sire, en bonne foy:
Je vois estre vostre aumosnier.
Certes n' en retenray denier
Que tout ne doingne.
PIERRE. Et je m' en vois, ains qu' en besoingne
Nulle me mette, oir la messe
En nostre moustier. Egar! qu' est ce?
N' est ce pas ci le garnement
Que je donnay, n' a pas granment,
Au povre qui tout nu estoit,
Qui si a mes piez se jettoit
En suppliant que li feisse
Pour Dieu que je le revestisse?
Si est, bien voy qu' il l' a vendu,
Puis qu' a ceste perche est pendu;
Je ne le vueil plus regarder.
Au moustier m' en vois sanz tarder.
G' i sui venuz assez a point,
Qu' encore n' y chante l' en point.
Ici me vueil agenoillier.
Ne me scé conment conseillier
De la grant tristesce et de l' ire
Que j' ay qui si me trouble, sire,
Que ne vous puis a droit orer
Ne mon cuer tenir de plourer:
Le povre revestu avoie,
Voire, pour ce que j' esperoie
Qu' il le vestist si longuement
Qu' il pourroit durer bonnement;
Et il l' a vendu sanz demour.
Elas! qu' en puis je se je plour
Et me trouble, pére benigne,
Quant je me voi estre non digne
Que m' eust le povre en memoire?
Ha! tresdoulx Diex, pére de gloire,
Ce me fait au cueur grant annuy.
Egar! qu' ay je? Si pesant sui
Du courroux qu' en mon cuer ay pris
Et du plorer qui m' a surpris
Que je ne me puis esveillier.
C' est nient: il me fault sommeillier
En ceste place.
DIEU. Or suz, touz, sus! sanz plus d' espace
Descendez a terre bonne erre.
Parler vueil a mon ami Pierre
Qui la sommeille.
PREMIER ANGE. N' y a nul qui faire ne vueille
Vostre gré, sire.
NOSTRE DAME. En alant pensez d' un chant dire
Tel que touz nous puist esjoir
Et si hault c' on vous puist oir
De tous costez.
DEUXIESME ANGE. Dame, toutes voz voulentez
Ferons, c' est droiz.
TROISIESME ANGE. Avant, disons entre nous troys
Ce chant ici qui bel me samble.
RONDEL. Humble vierge, a qui ne resemble
Personne née,
Par droit devez estre honnorée
Plus que nulle autre, ce me semble,
Et miex amée,
Humble vierge, a qui ne ressamble
Personne née,
Quant mére d' omme et Dieu ensamble
Estes nommée
Et sur touz anges couronnée,
Humble vierge, a qui ne ressamble
Personne née,
Par droit devez estre honnourée.
DIEU. Pierre, qui as si la pensée
Troublée, pour quoy pleures tu?
Ce garnement que j' ay vestu,
Le congnois tu point? dy me voir.
Vestu l' ay, si te fas savoir,
Dès lors qu' au povre le donnas,
De quoy m' amour par ce don as:
Or ne la pers pas, ny effaces;
Et encore te scé grans graces
De ce que quant m' as veu nu
Et povre, tu m' as revestu
Si bonnement.
NOSTRE DAME. Il te denonce soutieument
Que bien ou mal qu' au povre on fait
A li meismes tient qu' il est fait.
Partons de ci.
PREMIER ANGE. Puis qu' il vous plaist, soit, dame, ainsi.
Pardisons nostre chant ensemble.
LA FIN DU RONDEL PRECEDENT. Quant mére d' omme et Dieu ensemble
Estes nommée
Et sur touz anges couronnée,
Humble vierge, a qui ne ressamble
Personne née,
Par droit devez estre honnourée.
PIERRE. Ha! sire Diex, estre loée
Doit bien vostre benignité
De moy, qui sui en verité
Plus grant pecheur que ne puis dire.
Benoiz soient les povres, sire!
Si sont il, quant tant les amez
Qu' amis et fréres les clamez,
Et quant aucun bien on leur fait.
A vous le tenez estre fait.
Et puis que les avez si chier,
Certes mon avoir depeschier
Vueil si que je ne fineray
Tant que povre conme eulz seray.
D' aler m' en me vueil appartir,
Et tout mon meuble departir
Et donner, sanz rien possesser;
D' estre riche me vueil cescer. <Ici fait un po de pose et vient a sa maison.>
Aussi que d' un costé depart
Mon clerc, je m' en vois d' autre part
Ceci pour Dieu distribuer.
Mon estat vueil du tout muer
Et povre homme estre.
GALOT. Mon sac puis bien jus aler mettre:
N' y est demouré d' argent goute
Que tout ne soit donné sanz doubte.
Je vois savoir qui est leens.
Egar! il n' a ame ceens.
Puis qu' ainsi est, ci me tenray
Et mon seigneur attenderay
Tant qu' il reviengne.
PIERRE. Plaise a Dieu que si bien me viengne
Du mien que vien de departir
Qu' a sa gloire puisse partir:
Si aray lors vraie richesce.
Egar! es tu ci, Galot? qu' est ce?
Est tout donné?
GALOT. Oil, certes, c' est tout finé.
J' ay trouvé de povreté tant
Que, se l' estoie racontant,
Ne seroit nul qui vous tenist
Que plourer ne vous convenist
De pitié pour la povreté
Que j' ay veu en verité;
Car en tel mesnage esté ay
Ou pain ne paste ne trouvay,
Mais que cinq enfans et le pére
Tous gisans et la povre mére.
Et savez conment il gisoient?
Q' un po de viez paillier n' avoient
Qu' il ne fussent a terre plate,
Et couvers d' une vielle nate.
Ne scé conment peuent durer,
Ne la povreté endurer
Qu' il endurent, ne la souffraite.
Certes, noble aumosne avez faicte,
Sire, au jour d' ui.
PIERRE. Mais qu' en gré le prengne celui
Pour qui je l' ay fait, bien me plaist.
Galot, laisson ester ce plait:
Je t' ay bien a dire autre chose;
Mais avant que la te propose,
Tu me jureras par ta foy
Que personne nulle par toy
Ne le sara.
GALOT. Mon seigneur, ce qu' il vous plaira
Feray de cuer, g' i sui tenuz;
Je vous jur par ma foy que nulz,
Tant com vive, ne sara, sire,
Ce qu' en secré me voulez dire,
Quant le saray.
PIERRE. Galot, et je le te diray
Tout premiérement: tu scez bien
Que come mon serf je te tien,
Et pour ce, se ne m' obeis
Aussi bien conme onques feis
Et ne fais ce que te diray,
Saches que je te venderay,
En servitute greve et pesme,
Aux barbarans: telle est mon esme;
Et, se tu fais ma voulenté,
Du mien te donray a planté
Et te lairay, a brief parler,
Dès ores mais con frans aler
Sanz plus cerf estre.
GALOT. Or vous plaise a moy dire, maistre,
Yci endroit sanz plus d' espace
Que c' est que voulez que je face;
Je vous em pri.
PIERRE. Je le te diray sanz detri.
En ce sac ci a vint mars d' or
Que je te doin, c' est biau tresor;
Si vueil que tu les monteploies
Et qu' en denrées les emploies;
Quant bien emploiez les aras,
En Jherusalem les menras
Et moy aussi sanz point d' atente,
Car ne pourra estre, a m' entente,
Que n' y prouffites et amendes;
Et la vueil je que tu me vendes,
Et l' argent que tu en prenras
Aux povres pour Dieu le donras
Sanz le plus dire.
GALOT. Diex! qu' est ce que me dites, sire?
Vous voulez que je mal vous rende
Pour bien, qui voulez que vous vende.
Je seroye bien plain de rage
Se vous faisoie tel oultrage.
Autre vendeur que moy querez,
Que de ce que me requerez
Ne feray rien.
PIERRE. Ne feras? et je te dy bien,
Tu y aras si grant pechié
Qu' il t' iert devant Dieu reprouchié.
Oultre, quant ne me venderas,
Je te promet vendu seras.
Or regarde se plus envie
As d' estre serf toute ta vie,
Povre, et vivre en maleurté
Que d' estre a richesce ahurté
Et franc aussi.
GALOT. Sire, puis qu' il vous plaist ainsi,
Je feray tout vostre devis,
Mais sachiez je le fas envis.
ça, s' il vous plaist, ainsi ferons;
En Jherusalem en irons.
De vous vendre me peneray
Et puis quant vendu vous aray
Quanque pour vous aray d' argent
Je vous jur qu' a la povre gent
Sera donné.
PIERRE. La vueil je qu' il soit assené
Sanz ailleurs estre departi,
Mon ami Galot, et parti
Tant seulement; il me souffist.
Alons men; celi qui nous fist
Nous soit conduit de sauveté;
Et puis que fais ma voulenté,
Par ceste clef ci en pur lais
Tout mon avoir te doing et lais:
Quant ici retourné seras,
Conme le tien le prenderas,
Je m' y accors.
GALOT. Piteux, doulx et misericors
Vous soit Diex, sire, de ce don,
Et de ce bienfait guerredon...
Ore de tout ce parle l' en.
Nous entrons en Jherusalem.
Quel le ferons?
PIERRE. En plain marchié nous en irons
Et la nous tenrons une piéce
Jusqu' a tant que marchant eschiéce
Qui me requiére.
GALOT. Alons, et soit en la maniére
Fait, sire, que vous devisez.
Nonpourquant me sui advisez
D' un paien qui en ceste ville
Demeure, c' on nomme Zoile,
Qui est homme de grant richesce
Et courtois et plain de noblesce
Et si est homme de puissance.
J' ay bien a li de congnoissance
Tant que, se passer le veoie,
De nostre fait li parleroye
Qu' avons a faire.
PIERRE. S' il est homme de bon affaire,
Je voulroie bien qu' en parlasses
Afin que tu me delivrasses
D' estre vendu.
GALOT. N' avons q' un po ci attendu;
Soions y encore un po d' eure,
Et j' enquerray ou il demeure
Au premier venant cy par foy.
E! sanz doubte venir le voy.
Je ne scé ou il tent aler,
Mais je m' en vois a li parler.
Mon seigneur, ici m' attendez.
Sire, quel part aler tendez?
Dites le moy.
ZOILE. E! Galot, es tu ci? par foy,
Bien veignant! Tu es en bon point,
Ce me semble; ne me mens point:
Qui t' a fait ton pais laissier
Et en ceste ville adressier
Et venir ci?
GALOT. La cause, sire, vez la ci.
Pour voir vous puis donner entendre
J' ay un mien serf que je vueil vendre:
Je vous lo que vous l' achetez,
Et se l' avez, ne vous doubtez,
Qu' il vous sera bien prouffitable,
Car loiaux est et veritable.
Il aime Dieu sur toute rien
Et le sert conme crestien:
Si vous di bien que qui l' ara
Tel qu' il est vivre le laira,
Sanz li tant soit po oppresser
Qu' a sa loy vueille renoncer
N' a sa creance.
ZOILE. Se ton Dieu te gart de meschance,
Est il tel com tu le m' enortes?
De m' en dire ne te deportes
La verité.
GALOT. Je vous jur, par ma loyauté,
Que se l' avez dedanz brief terme,
Diex pour lui, je le vous afferme,
Voz besongnes si bien fera
Et voz biens montepliera
Tant qu' en serez touz merveilliez.
Si vous conseil que le vueilliez
Par achat prendre.
ZOILE. Et combien le voulras tu vendre?
Di: je t' orray.
GALOT. Pour cent besans le vous donray,
Sire, se l' i voulez avoir.
Prenez l' i, que, sachiez de voir,
Il les vault bien.
ZOILE. Galot, et je vueil qu' il soit mien
Pour le grant bien que tu m' en dis.
Or ça, paier te vueil tandis
Que j' ay espasce.
GALOT. Et j' ouverray tantdis ma tasse
Pour les mettre que compterez.
Certes de li vous louerez
En la parfin.
ZOILE. Vezci cent besans touz d' or fin,
Galot amis, que je te baille.
Or les comptes, que riens n' y faille
Que tout n' i soit.
GALOT. Voulentiers: qui argent reçoit,
Il le doit une foiz compter
Pour savoir qu' ait tout sanz doubter.
Sire, aussi que sui bien paiez
Vueil je qu' a moy vous apaiez,
Et vous pri que par vostre gré
Deux moz parle a li en secré
Ici sanz vous.
ZOILE. Il me plaist bien, mon ami doulx:
Parlez ensemble.
GALOT. Ore, mon seigneur, il me semble
Que pechier m' avez fait griément,
Quant par vostre conmandement
Et a ce vous avez tendu,
Qu' ici vous ai con serf vendu.
S' estre escondit voir m' en peusse,
Dieu scet voulentiers fait l' eusse;
Mais par menaces si destraint
M' avez que j' ay esté constraint
D' obeir vous conme a mon maistre;
Et puis qu' ainsi fault la chose estre
Que povre et serf voulez pour Dieu
Vivre ci en estrange lieu
Et qu' a ce vous vous adonnez,
Je vous pri que me pardonnez
Ce qu' ay mespris.
PIERRE. Galot amis, mais moult t' en pris
Et t' en scé bon gré vraiement.
D' une chose tant seulement
Te pri: que le temps pas n' eslongnes
Que tout l' argent pour Dieu ne dongnes
Et de toy partir tost ne cesses.
Baise moy, et a tant me laisses
Sanz riens plus dire.
GALOT. Puis qu' il vous plaist, voulentiers. Sire,
Vezci Pierre que je vous livre
Com vostre serf, et m' en delivre.
Pierre, plus a moy ne serez:
A ce seigneur ci demourrez,
Il esconvient.
PIERRE. Il me plaist bien, puis qu' a ce vient;
Mais de ce que convent m' avez
Faites en si ce que devez
Qu' en soiez quittes.
GALOT. Pierre, mon chier ami, bien dites:
Si feray je, se Dieu me voie.
D' aler m' en me vueil mettre en voie,
Sire: il est temps.
ZOILE. Galot, je n' y met nulz contens
Que tu ne t' en puisses aler,
Soit ore ou ja, a brief parler,
Puis que le veulz.
GALOT. Je vous di a Dieu a touz deux;
Et si m' en vois.
ZOILE. Or vas: que le Dieu ou tu croiz
Te soit amis.
PIERRE. Puis qu' a vous servir sui conmis,
Sire, s' il vous plaist, regardez
De quoy serviray; ne tardez
Que ne le sache.
ZOILE. En la cuisine a une hache,
Pierre, ou coingnie; alez la prendre,
S' en alez de la buche fendre,
Et si escurez les vaissiaux.
Quant arez fait, prenez deux seaulx
Qui y sont, et s' alez bonne erre
De l' iaue a la fontaine querre;
Quant laissives faire fauldra,
Faire aussi les vous convenra,
Car je le vueil.
PIERRE. De faire du tout vostre vueil
Vois penser, mon seigneur et maistre.
En la cuisine me vois mettre
Que m' avez dit.
ZOILE. Tant com ferez sanz contredit
Mon vouloir, tant arez vous paiz.
Or alez besongnier huymais
Bien et forment.
PIERRE. Hé! biau sire Diex, et conment
Pourray servir a gré cest homme
Qui m' a chargié de si grant somme
Porter et faire chascun jour
Continuelment sanz sejour,
Ou lourdement seray repris?
Sire Diex, ne l' ay pas appris.
Or me donne par ta puissance
En cest estat avoir plaisance;
Car pour toy me sui asservi
Et devenu serf, qui servi
Soloie estre moult grandement;
Et puis qu' il me fault telement
Servir en la cuisine et estre,
Je m' y vois ordener et mettre
Pour besongnier.
PREMIER COMPéRE. Qu' est ce la, compére Maugier?
Je vous truis ici bien a point.
Ou alez vous? n' en mentez point,
Dites le moy.
DEUXIESME COMPéRE. Compére Guillaume, par foy,
M' entente estoit d' aler aux champs
Oir des oisillons les chants.
Vous, ou alez?
PREMIER COMPéRE. Maugier, vous savez et valez
Bien tant que je le vous diray,
Ne plus ne le vous celeray,
Et ce que vous di c' est acertes.
J' ay trop grant desir d' aler, certes,
Com paumier en Jerusalem,
En Nazareth, en Bethleem,
Et en touz les autres sains lieux
Ou fut et ou mort souffri Dieux;
Et si sachiez qu' il m' est advis,
Se ne fas ce que je devis,
N' aray ja bien.
DEUXIESME COMPéRE. Ore, biau compére, combien
A il, se Dieu vous doint santé,
Que vous vint ceste voulenté?
Dites le moy.
PREMIER COMPéRE. Compére, foy que je vous doy,
Il a bien demi an passé.
Voir, tant qu' aie la mer passé
Ne seray aise.
DEUXIESME COMPéRE. Ore je vous pri qu' il vous plaise,
Compére, qu' avecques vous voise.
Nous irons plus en paiz sanz noise
Nous deux, puis que compéres sommes,
Que s' estions estranges hommes,
A dire voir.
RAINFROY. Biaux seigneurs, parlez vous d' avoir
L' imposicion par enchiére?
Il me semble que faites chiére
Je ne scé quelle.
PREMIER COMPéRE. Voisin, nostre parole est telle
Que nous nous voulons pourveoir
D' aler le sepulcre veoir
Ou Dieu fu mis.
RAINFROY. Et je vous pri, mes chiers amis,
Que je face avec vous le tiers;
Car n' est lieu ou si voulentiers
Que la alasse.
DEUXIESME COMPéRE. Qui plus pour Dieu se paine et lasse,
Et plus acquiert merite grant.
Je lo que nous soions engrant
D' aler nous ordener touz trois
Et que chascun prengne la crois,
Housse, chappel, bourdon aussi.
Puis attendons l' un l' autre ci
Pour aler ent.
PREMIER COMPéRE. Je m' y accors certainement
Pour ici bien tost retourner
Vestir me vois et atourner
En autre estat.
DEUXIESME COMPéRE. Et je, sanz plus faire restat,
M' en voys aussi.
RAINFROY. Si feray j', et si pense ici
Aussi tost con nul de vous estre.
N' ay pas moult a faire a moy mettre
En estat d' omme pelerin:
Ne me fault porter par chemin
Qu' un po de robe.
PREMIER ESCUIER. Sire, vostre fermier Macrobe
Vous envoie cest argent ci,
Et si vous fait savoir ainsi
Que Mahon bien loer devez,
Car plus de bien cest an avez
Que n' avez en six ans eu;
Conment sont tant ouan creu
A grant merveille.
DEUXIESME ESCUIER. S' il est preudomme, ne s' en dueille,
Car noz diex font venir sur terre
Deffaulte de biens et grant guerre
Quant leur plaist, et aussi saison
De paiz et de biens grant foison
Font, quant veulent, par le pais,
Si que n' en soit ja esbahis:
Ne le fault mie.
PIERRE. <en alant a l' yaue.> Jhesus, Jhesus, filz de Marie
En qui j' ay mis m' afeccion,
Mon desir, ma dileccion
Si que pour toy me sui fait vendre,
Ha! sire, vueillez en gré prendre
La paine que j' ay et la haire
Qu' endurer me convient et traire
En escurer et en froter,
En souvent de l' iauue apporter
A mon col, conme ore en vois querre.
Pour ce, doulx Dieu, vous veuil requerre
Que regardez piteusement
Ce que je fas benignement
Pour vostre amour.
ZOILE. Dites moy, seigneurs, sanz demour,
N' est ce pas Pierre, mon serf, la,
A ces deux seaulx? je crois qu' il va
De l' yaue querre.
PREMIER ESCUIER. Se fait mon, sire. Oil, c' est Pierre,
Le vallet de vostre cuisine.
Certes, il y est trop bien digne:
Touz jours torche ou escure ou frote,
Et si n' a riens que celle cote
Qu' il a vestu.
DEUXIESME ESCUIER. Je le tien a un fol testu,
Et vous diray raison pour quoy.
Souvent de nuiz le truis et voy
Qu' en jesir prent plus grant delit
A terre pure qu' en son lit.
Après en barbetant il pleure,
Et puis de sa main une autre heure
Faist ainsi de foiz plus de vint. <En faisant la croiz.>
Ne sçay de quel pais il vint,
Ne quel gent le norrirent, sire;
Mais tant y a, ce vous puis dire,
Pour chose c' on li die ou face,
Nullui ne fiert ne ne menace,
Ne ne fait annuy ne contraire,
Mais conme un droit fol debonnaire
Qui n' est pas hors du sens, mais sot,
Ou conme un enfant ydiot,
Tout en gré prent.
ZOILE. Tant plus celle ou celui mesprent
Qui de faire chose se paine
De quoy le courrouce n' ataine;
Ne le vueil mie.
PIERRE. Ha! tresdoulce vierge Marie,
Au sauvement de m' ame vaille
Ce que mon corps peine et travaille,
Si que de ce siecle muable
Au repos viengne pardurable
De paradis.
ZOILE. Or entendez, seigneurs, tantdis
Qu' oyseux vous voy et de loisir.
Alez vous en, c' est mon plaisir,
Garder au port qu' ame ne passe
Par dedeça qui ne me face
Ce qu' il doit faire.
PREMIER ESCUIER. Sire, sire, de cest affaire,
Ne doubtez, bien nous chevirons.
Quanqu' il venra vous admenrons,
Femmes et hommes.
DEUXIESME ESCUIER. Ce ferons mon: trop ici sommes.
Alons ça et la regarder
Partout et sur le port garder
Qu' ame ne passe.
PIERRE. Puis que j' ay maintenant espace,
Combien qu' entre Sarrazins soie
Vestuz de draps d' or et de soie,
Sanz plus ci endroit demourer
M' en vois la mon Dieu aourer
Et a li seul mon cuer ouvrir
Et ma pensée decouvrir.
Sire Diex, pére omnipotent,
A qui mon cuer par desir tent,
Je vous aour, je vous salu,
Et vous aussi, tresdoulx Jhesu,
Fil seul eternel Dieu le pére,
Et vous, Marie, vierge mére,
Touz ensemble et chascun par soy,
De ce que maintenant je voy
Que je sui a l' estaz venuz
Que conme povre sui tenuz,
Qui n' ay mais nulz biens terriens;
Mais de ce ne m' est il a riens,
Tresdoulx Dieux, mais que t' amour aie.
T' amour? Las! le cuer trop m' esmaie
Conment je la pourray avoir,
Car trop mondain ay esté, voir.
Mais, sire, quant je me recorde
De ta doulce misericorde
Qui est sanz fin, lors ma fiance
S' aferme en toy et m' esperance.
Pour ce ne me vueil plus complaindre,
Mais mon livre vueil ci ataindre
Et le dire, soit gaing ou perte,
Avant que de ci me departe:
Telle est m' entente.
DIEU. Mére, et vous touz, sus: sanz attente
Encore vueil la jus aler
A Pierre mon ami parler.
Or jus, bonne erre.
NOSTRE DAME. Sire, qui creas ciel et terre,
Touz ferons ce que conmandez.
Anges, a chanter entendez
Bien en alant.
PREMIER ANGE. Dame, n' en soiez plus parlant:
Chascun de nous a grant desir
De faire tout vostre plaisir.
Avant: chantons.
DEUXIESME ANGE. C' est raison: nous qui frequantons
Avec Dieu continuelment,
Or sus, chantons joyeusement
Et par leesse.
ZOILE. Egar! par Mahon mon Dieu, qu' est ce?
Quelle part demeurent ne hantent
Ceulx qu' ay oy qui si bien chantent?
Savoir me convient qui il sont:
Il me semble que par la vont.
Onques mais si doulz chant n' oy.
Il m' ont si le cuer esjouy
Que je les vueil aler veoir.
Egar! Pierre voy la seoir,
Mon serf. De quoy me sert il la?
Homme ne femme entour li n' a.
Un po plus près m' aproucheray
Et ce qu' il y fera verray
Sanz mot nul dire.
DIEU. Oste toy de tristesce et d' ire,
Pierre amis, et fay bonne chiére.
Entre moy et ma mére chiére
Te venons veoir en secré.
Saches que je te scé bon gré
Du garnement que devestis
Et qu' au povre tu departis;
Et si fas j' aussi, chiers amis,
De ce qu' en vente tu t' es mis,
Quant donner tu as fait l' argent,
Pour m' amour, a la povre gent;
Si ne te courrouce ne troubles:
Rendu te sera a cent doubles
En brief termine.
NOSTRE DAME. Or persevére, Pierre, et fine
En la grace qu' as conmencié.
Ne soit pas ton estat laissié:
Il t' a fait ami et affin
De Dieu. Pour ce jusqu' en la fin
Y persevére, et tu seras
Sauvez et sanz fin gloire aras.
C' est noble don que te present.
Partons de ci quant a present,
Il en est temps.
PREMIER ANGE. Dame, nous ferons sanz contemps
Vostre plaisir, il est raisons.
Ce chant en ralant pardisons
Qu' avons empris.
ZOILE. Qu' est ce ci? Je n' ay point apris
A oir telle melodie.
Que peut c' estre? ne scé qu' en die.
Je croy qu' esperiz des cieulx sont
Qui par cy deduisant s' en vont.
Voulentiers ay oy leurs vois,
Mais nul n' en ay veu ne voiz,
Combien que moult y ay tendu;
Et si ay je bien entendu
Que jusqu' a mon serf sont alé,
Voire, et si ont a li parlé.
Je ne say se son Dieu seroit
Qui d' aucune chose l' aroit
Enorté ou admonnesté;
Car je tien bien pour verité
Qu' il est un saint homme en sa loy,
Et si voy que pour la grant foy
En quoy son Dieu pour moy deprie
Mes biens accroist et monteplie,
Et je li pense a restorer.
Ores encor le lais orer
Et m' en revois.
PIERRE. Sire Dieu, qui scez et qui vois
Les pensées des humains corps
Aussi bien ou cuer com dehors,
De ta grant consolacion
Et de ta visitacion,
Sire, je te lo et mercy.
Pour ore m' en revois de cy
En ma cuisine.
RAINFROY. Ains que je cesse mais ne fine,
Au lieu m' en vueil aler et mettre
Ou assembler devons et estre
Nous troys qui au sepulcre irons
Et dont ensemble partirons.
E! Diex, il m' est bien advenu,
Quant me voy le premier venu.
Ci endroit tout coy me tenray
Et les autres attenderay
Sanz moy mouvoir.
PIERRE. Mon chier seigneur, je vieng savoir
Se vous voulez que riens vous face,
Tantdis qu' ay loisir et espace.
Car j' ay tout fait, sachiez de voir,
Ce qu' a faire pouoie avoir
En la cuisine.
ZOILE. Pierre, pour vostre bon convine
Et pour vostre vie parfaitte,
Je vueil que grace vous soit faitte
Telle que je vous vueil oster
De paine et du tout hors bouter
De servitude a touz jours mais,
Et que vivés dès ores mais
Avec moi conme ami et frére;
Car je voy, et est chose clére,
Que pour la vostre grant bonté
En richesse sui amonté
Plus que ne sueil.
PIERRE. Sire, desdire ne vous vueil;
Mais, las! que pourrez miex valoir
De moy, qui n' ay riens que voloir?
Nient voir, ne dites plus ainsi,
Chier sire, mais je vous mercy
De la grant honneur que m' offrez,
Et vous suppli que me souffrez
En cest estat user ma vie,
Car d' autre avoir n' ay point d' envie:
Ainsi vueil vivre.
ZOILE. Pierre, tu es ou fol ou yvre,
Qui aimes miex a soulart estre
Povre qu' en bon estat toy mettre
Et honnorable.
PIERRE. Ce que ce monde voy muable,
Cheant d' eur en meseur,
Et c' on n' y vit point asseur,
Ainçois n' y a que vanité,
Le me fait faire, en verité;
Et pour ç' aussi que je scé bien
Que l' estat ou je sui, combien
Que il soit vil, a mon Dieu plaist,
Ne vueil je point d' autre: a court plait,
Il me souffist.
ZOILE. Je ne scé quel homme te fist,
Mais de ce que dis me merveil.
Puis qu' ainsi est, fay a ton vueil
Dès ores mais.
PIERRE. Je m' en vois avancier huymais
Vostre diner.
PREMIER COMPéRE. Compére, qui de cheminer
Vous hastez, ci attendez moy:
En la place alez, bien le voy,
Si fas j' aussi.
DEUXIESME COMPéRE. Egar! compére, estes vous ci?
J' avoie, par saint Honnouré,
Doubte d' avoir trop demouré;
Mais a ce que voy non ay pas.
Alon savoir nous deux bon pas
S' i est Rainfroy.
PREMIER COMPéRE. Alons. Marie! je l' i voy
Ou nous attent.
DEUXIESME COMPéRE. Je tien que de grant vouloir tent
Au voiage, a ce que je voy.
N' avez pas oblié, Rainfroy,
A tost venir.
RAINFROY. Non voir: ci m' avez fait tenir
Une grant piéce.
PREMIER COMPéRE. Or avant, mais que chascun siesse.
N' attendons qu' ame nous convoie,
Mais mettons nous d' aler en voie:
C' est nostre miex.
DEUXIESME COMPéRE. C' est bien dit. Alons men. Que Diex
Nous conduie par sa bonté
Et ramener a sauveté
Nous vueille a joye.
RAINFROY. Amen! Alons par ceste voie;
Puis que partons de ci endroit,
C' est nostre chemin le plus droit
Qu' aler puissons.
PREMIER COMPéRE. Soit, et d' aler nous avançons;
Et si vous pri courtoisement
Nous maintenons et sagement
Sanz trop parler.
PREMIER ESCUIER. Seigneurs, je vous deffens l' aler,
Et si met la main en vous touz.
Sa! dites moy, ou alez vous
Entre vous troys?
DEUXIESME COMPéRE. Sire, nous avons pris la crois
Conme devoz et enterins
Crestiens, et com pelerins
Alons, ce sachiez, visiter
Le saint sepulcre sanz doubter,
S' il plaist a Dieu.
DEUXIESME ESCUIER. Vous ne passerez point ce lieu
Jusqu' a tant, ne vous esmaiez,
Qu' a mon seigneur parlé arez
Et que paié vostre treuage
Li aiez. Sanz vous faire oultrage,
Sanz crier ne faire haro,
Venez a li, je le vous lo;
Il l' esconvient.
RAINFROY. Alons y donc, puis qu' a ce vient,
Et ne soions point esbahiz,
Puis que tel est de ce pais,
Seigneurs, l' usage.
PREMIER COMPéRE. Puis que ce n' est que pour treuage
Paier, ne m' en chaut pas granment:
A vostre seigneur vistement
Dont nous menez.
PREMIER ESCUIER. Voulentiers: après moy venez.
Je ne vous pense point tenir,
Puis que je vous y voy venir
De bon courage.
DEUXIESME ESCUIER. Sire, pris avons au passage
Ces troys hommes ci qui se font
Pelerins et dient qu' il vont
Au sepulcre leur Dieu prier.
Conmandez leur sanz detrier
Paier leur deu.
ZOILE. Seigneurs, il me fault mon treu
Ainçois que plus avant ailliez;
Et se de paier me failliez,
N' irez point oultre.
DEUXIESME COMPéRE. Mais c' on nous die ou c' on nous moustre,
Sire, que nous pouons devoir,
Nous en ferons vostre vouloir
Chascun de nous.
ZOILE. Or me dites: dont estes vous?
Ce vueil savoir.
RAINFROY. De Chippre, sire, a dire voir,
Nez d' une noble ville et grosse,
Qui appellée est Famagosse
Et est cité.
ZOILE. C' est voir, seigneurs; g' y ay esté
Plusieurs foiz quand je marchandoie.
Mains riches draps d' or et de soie
Y ay eu.
PIERRE. Mon seigneur, ne me soit teu,
Dites, voulez vous desjuner?
Tout est prest pour vostre diner
En la cuisine.
ZOILE. Je t' oy bien ta parole fine.
Vaz nous querre du vin bonne erre;
Et toy, vas les espices querre
Dont ces pelerins mengeront,
Voire, et si se reposeront
Endementiers.
PREMIER ESCUIER. Sire, par Mahon, voulentiers
Sanz tarder point.
PREMIER COMPéRE. Compére, avez regardé point
Celi qui est alé au vin?
Par le corps de moy, je devin
Que ce soit Pierre le changeur,
Que nous appellions paageur;
Trop bien li semble.
DEUXIESME COMPéRE. Par foi, compére, il le me semble
De tant con je l' ay regardé.
Se c' est il, ne s' est pas fardé,
Car de visage est megre et sec
Trop malement, et pale avec
Et empiré.
RAINFROY. ç' a esté bien homme adiré,
C' on ne scet qu' il pot devenir.
Or paiz: vez le ça revenir.
Ne disons mot, mais regardons
Conment cognoistre le pourrons
A sa façon.
PIERRE. J' aporte de vostre boiçon,
Ne vous desplaise, mon seigneur,
Pour vostre honneur faire greigneur
Devers ces gens.
ZOILE. Ce vueil j'. Or tost, com diligens,
Escuier, un hanap prenez
Et a chascun boire donnez:
Il versera.
DEUXIESME ESCUIER. Je feray ce qui vous plaira,
Sire, il appartient et est droiz.
Seigneurs, auquel d' entre vous trois
Donray premier?
PREMIER COMPéRE. A vostre seigneur, ami chier:
Il appartient.
ZOILE. Sa! puis que boire me convient,
Je buvray pour l' amour de vous.
J' ay fait. Or buvez aussi touz.
Avant: ce pot que tu tiens baille
A l' escuier, vaille que vaille,
Et me vas querre, avoir en vueil,
De l' autre qui est plus vermeil.
Or vas bonne erre.
PIERRE. Voulentiers vous en iray querre,
Puis qu' en voulez.
DEUXIESME COMPéRE. Seigneurs, ou je sui affolez,
Ou c' est Pierre certainement.
Je sui bien esbahi conment
Est en ce point.
ZOILE. Biaux seigneurs, ne me mentez point:
Aussi que touz pensis vous voy;
Dites moy, par amour, de quoy
Vous merveilliez.
RAINFROY. Chier sire, appaisier vous vueilliez,
Que certes, s' en erreur ne sommes,
Il vous sert un des riches hommes
Et des gens de nostre pais.
C' est de quoy sommes esbahiz,
Qu' il sert ainsi.
PREMIER COMPéRE. Souffrez vous, mais que viengne ci.
Certainement je le tenray,
Et de l' empereur li diray
Conment le desire a avoir;
Car moult l' amoit, a dire voir,
Et avoit chier.
PIERRE. Conment me pourray depeschier?
Vray Diex, j' ay bien apperceu
Que ces gens ci m' ont cogneu.
Ne m' en merveil en verité,
Car ilz ont mes voisins esté.
Proposé ont qu' il me tendront
Au retourner, mais il fauldront
Certainement a leur entente,
Car de ci m' en vois sanz attente
La ou Diex me voulra mener
Sanz y plus jamais retourner.
La fille mon seigneur voy la,
Qui encore onques ne parla:
Mercier la vois des biens faiz
Qui m' ont par son pére esté faiz.
Ma chiére dame, a vous vien ci
Congié prendre, et si vous merci
De voz biens, sanz plus dire, mais
Je tien ne me verrez jamais;
Car, pour plus grace desservir,
Ailleurs m' en vois mon Dieu servir,
A qui seul tout mon cuer ottroy,
Et li pri, si con je le croy,
Estre vray Dieu sur touz les Diex,
Qu' il vous regart de ses doulx yex
Et sur vous si sa grace estende
Qu' en brief la parole vous rende,
Si qu' aiez cause de venir
A baptesme et sa foy tenir.
A Dieu, dame! Portier amis,
Ou nom de Jhesu qui fu mis
Pour nous en croiz, ne te deporte
Qu' en l' eure ne m' euvres la porte,
Car issir vueil.
LE PORTIER. Sire, je feray vostre vueil
De voulenté grant et apperte.
Regardez, sire, elle est ouverte:
Ysterez vous?
PIERRE. Oil. A Dieu, mon ami doulx,
Qui t' ait en garde!
LE PORTIER. Avant que jamais plus je tarde,
A mon seigneur vois sanz doubter
Dire de Pierre, et li compter
Conment le pert.
LA FILLE. Mon seigneur mon pére, or appert
De vostre serf et cuisinier
La bonté, ce puis tesmoingnier.
Regardez que vous en ferez:
Il dit que plus ne le verrez
Et qu' ailleurs va son Dieu servir
Pour miex sa grace desservir
Et son amour.
ZOILE. Fille, dites moy sanz demour
De quoy ne par qui tant valez
Qu' ainsi bien con je fas parlez.
Ne parlastes puis que nasquistes
Que maintenant: dont vient ce? dites
Tost sanz songier.
LE PORTIER. Sire, celi sanz mençongier
Qui ceens d' escurer servoit
Les vaissiaux et les draps lavoit
S' en va du tout.
ZOILE. Sueffre tant que ma fille au bout
Soit de ce que veult raconter.
Avant: vueillez me voir compter,
Ma belle fille.
LA FILLE. Ne cuidez point que vous babille
Mençonge, pére. Voir diray
Certes le miex que je pourray.
Quant Pierre par devers moy vint
Et qu' a moy parla, il advint
Que de sa bouche vi issir
Une grant flame, qui ferir
Se vint en ma bouche dedans
Sanz meffaire a bouche n' a dens,
Mais a si bel en moy ouvré
Que la parole ay recouvré
De sa puissance.
LE PORTIER. Mon seigneur, sachiez sanz doubtance
Qu' ainsi m' est il, ce vous afferme;
Car si tost qu' il me dist: "Deferme
Ou nom Jhesu, si istray hors;"
De sa bouche en m' oreille lors
Vint celle flambe et s' i feri
Si doulcement et si sery
Que je vous di, c' est brief et court,
J' oy tresbien, ne ne sui mais sourt
En verité.
ZOILE. Seigneurs, avez vous escouté?
Pour Mahon, alons touz après.
De li suivre soiez si près
Que nous le puissons ramener.
Voir, en grant estat ordener
Le pense et mettre.
DEUXIESME COMPéRE. Chier sire, il ne peut pas loing estre.
Alons tantost, quoy qu' il aviengne,
Et un chascun son chemin prengne,
Et n' alons mie touz ensemble.
C' est le meilleur, si con moy semble,
A mon advis.
ZOILE. Je m' acors a vostre devis.
Fille, vous demourrez ici,
Et toy avecques elle aussi.
Sus, alons ment.
PIERRE. Sire Diex, graces humblement
Vous rens, et je le doy bien faire;
Car n' empreng nul si grief afaire
Pour vostre amour, non, ne si fort
Que je n' aie de vous confort
Qui d' annuy me jette et de soing:
Pour quoy je voi qu' a mon besoing
En ce desert ci toute faitte
Par vous truis, sire, une logette,
Dont je vous doy bien adourer.
Entrer y vueil pour demourer
Au mains maishuy.
ZOILE. Syquar, par foy, j' ay grant anuy
Que ne faisons que gaster pas.
Cet homme ne trouverons pas,
Il est perdu.
PREMIER ESCUIER. Sire, j' en sui tout esperdu:
Qu' est devenu en si po d' eure?
Car n' avons goute de demeure
Fait après lui.
ZOILE. Je ne scé s' il y a celui
Des autres qui se soit prouvé
Si bien qu' avoir le puist trouvé
Aucunement.
PREMIER ESCUIER. Je vous conseil, sire, alons ment:
La verité d' eulz en sarons,
Quant a l' ostel venuz serons.
Egar! vez lez la, ce me semble,
Ou atroupelez sont ensemble.
ça, seigneurs, ça!
RAINFROY. Seigneurs, je voy Zoile la
Qui nous appelle. Alons a li.
Ne cé s' il a trouvé celi
Que quis avons.
PREMIER COMPéRE. Quelle part aler ne savons.
Sire, avez vous point trouvé Pierre?
Ne le finasmes puis de querre.
De nous a eu grant marchié.
De terre avons pour li marchié
Bien cent arpens.
ZOILE. Certes, nanil. Je me repens
De ce qu' onques je l' asservy
A faire ce dont m' a servi,
Mais je ne le puis amender;
Si vous vueil ainsi demander
Qu' est bon a faire.
DEUXIESME COMPéRE. Sire, puis qu' ainsi va l' affaire,
Je conseil en ceste maniére
Que nous en retournons arriére:
Ne scé miex dire.
PREMIER ESCUIER. Certainement il dit bien, sire,
A mon avis.
ZOILE. Alons donc sanz plus de devis,
Mais savoir vueil sanz remanoir
S' alé est point en mon manoir
Appellé les Belles Fontaines.
Siquar, fay tost; si nous y maines
Et vaz devant.
PREMIER ESCUIER. Sire, voulentiers. Je me vent,
Seigneurs, puis que la mer passastes,
En hostel nul si bel n' entrastes
Conme est celi ou nous alons.
Suivez moy de près aux talons
Touz trois bonne erre.
DIEU. Gabriel, vaz me dire a Pierre,
Qui la s' est logiez en ce brueil,
Que plus n' y soit, et que je vueil
Qu' a Zoile retourne arriére
Et qu' il li die en quel maniére,
S' en gloire veult sanz fin venir,
Le fault crestien devenir
Et croire de neccessité
Qu' il est un Dieu en trinité,
Non pas trois diex, mais une essance,
Trois personnes, une substance;
Et par ce qu' il a ja veu
Et oy sera tost meu
D' estre crestien.
PREMIER ANGE. G' y vois et si li diray bien,
Vrays Diex, tout ce que vous me dites.
Diex te mande que plus n' abites
Ici, Pierre, mais tost t' aournes
Et a Zoile t' en retournes
Et li moustre et presche conment
Il n' est qu' un Dieu tant seulement,
Qui a creé ciel, mer et terre;
Et te paine de li requerre
Que crestienner il se face,
Par quoy sanz fin Dieu voie en face;
Et tu venras a ton entente,
Car tu verras que sanz attente
Le voulra estre.
PIERRE. Puis qu' il plaist au doulx roy celestre,
Ceste loge dont et ce bois
Laisse du tout, et m' en revois
Dont sui venuz.
RAINFROY. Grant piéce nous sommes tenuz,
Sire, en vostre lieu delitable
Qui bel est et tresagreable
Se Dieu me voie.
ZOILE. Or ça! nous prendrons ceste voie
Et tout droit devant nous irons
Tant qu' en mon autre hostel venrons,
Ou est ma fille.
PREMIER ESCUIER. N' acontasse pas une quille
En quanque avons erré de terre,
Se nous eussons trouvé Pierre
Que quis avons.
PREMIER COMPéRE. Alons men, alons; ne savons
S' a l' ostel retourné sera
Ne conment besongnié ara
Puis qu' en ala.
DEUXIESME COMPéRE. C' est voir. Egar! je le voy la
Ou a l' encontre de nous vient.
De lui taire a tant nous convient,
Puis qu' il vient ci.
ZOILE. Pierre, dont venez vous ainsi?
Pour vous ay esté courroucié,
C' on disoit que m' aviez laissié.
Par vostre foy, dites me voir,
Dont vous est venu ce pouoir
Qu' a ma fille avez la parole
Rendu? car aussi bien parole
Conme je fas.
PIERRE. Sire, ainsi ne le dites pas,
Mais dites que ç' a fait celi
Qui crea vous et moy et li,
Et non pas nous tant seulement,
Mais tout le monde onniement,
Qu' il gouverne par noble arroy
Conme seul Dieu, conme vray roy
Qui n' ot onques ne n' ara fin,
Qui nous a amé de cuer fin
Tant qu' a deignié sa deité
Couvrir de nostre humanité,
En laquelle la mort gousta,
Par quoy de mort nous acquitta,
Ce fu quant il fu mis en croiz.
Ha! Zoile, se tu me croiz,
Tes ydoles delaisseras
Et cestui seul aoureras
Conme celi qui t' a creé.
Car, or te viengne ou non a gré,
Je te di que le jour venra
Que tout le monde il jugera
Par raison vraie et autentique,
Et ce tient la foi catholique
Des crestiens.
ZOILE. Pierre, ceste foy que tu tiens
Je vueil dès ores mais tenir,
Et bon crestien devenir;
Car je puis bien apercevoir
Et si tieng que tu me diz voir.
Or considére qui sera
Celi qui me baptizera,
Et le fay brief.
LA FILLE. Pére, ce me sera trop grief
Que je vous voie crestien
Et je ne le soie aussi bien.
Je vous pri que par vostre ottri
Crestienne sanz nul detri
Soie avec vous.
DEUXIESME ESCUIER. Sire, aussi vous en prions nous,
Cestuy et moy.
ZOILE. Fille, et vous deux, je m' i ottroy
Et si le vueil.
PREMIER COMPéRE. Or affiert bien avoir conseil
Au remanant.
PIERRE. Vezci, sire, dès maintenant.
C' est voir qu' en Jherusalem sommes:
Entre nous touz, et fille et hommes,
Droit au patriarche en irons
Et ceste chose li dirons;
Certain sui quant il nous orra
De ce parler grant joie ara,
Et de cuer vous donrra baptesme
Et vous enoindra du saint cresme,
Et les articles de la loy
Que nous tenons en nostre foy
Voulentiers vous dira aussi.
Alons y sanz plus estre cy,
Se me creez.
DEUXIESME COMPéRE. Sire, il dit bien, se l' agreez
Et bon vous semble.
ZOILE. Or sus! alons y tous ensemble
Sanz plus d' espace.
RAINFROY. Alons, seigneurs, et pour la grace
Que Diex a huy sa fille fait
Et qu' ainsi euvre en li de fait
Qu' a loy paienne renoncer
L' a fait pour sa foy exaucer,
Chantons, nous y sommes tenuz:
Te Deum laudamus.