1. Cy conmence un miracle de Nostre Dame de saint
    Lorens que Dacien fist morir et Philippe l' empereur
    fist il morir pour estre emperiére.
    LE PAPE.       Entendez ce que je vueil dire,
  2. Mes fréres: puis que nostre sire
  3. Nous a des corps a sauveté
  4. Admenez en ceste cité,
  5. Qui est d' Espaigne une des grans,
  6. Estre vueil songneux et engrans
  7. De preschier aval ceste terre
  8. Pour ce pais a Dieu acquerre
  9. Ou il n' a fors que mescreans,
  10. Et je tien et si sui creans
  11. Que tellement y ouvrera
  12. Dieu que maint s' en convertira
  13. A croire en li.
  14. PREMIER CARDINAL.        Dieu vueille qu' il n' ait cy celi
  15. De touz ceulx qui sont mescreans
  16. Qui ne soit en Jhesu creans
  17. Et sa loy tiengne.
  18. DEUXIESME CARDINAL.   Amen! si qu' en la fin parviengne
  19. Des cieulx ou regne.
  20. LE PAPE.       Sanz plus tenir ci plait ne rene,
  21. Je vueil le sermon conmencier
  22. Pour ce peuple ci adrescier,
  23. Se je puis, a devocion.
  24. Donnez moy sanz dilacion
  25. Beneiçon.
  26. PREMIER CARDINAL.        Du quel vous semble il estre bon
  27. Avoir la, sire?
  28. LE PAPE.       Ne m' en chaut du quel: sanz plus dire,
  29. Delivrez moy.
  30. PREMIER CARDINAL.        Donnez li, donnez, maistre Auffroy:
  31. Il appartient.
  32. DEUXIESME CARDINAL.   Puis que faire le me convient,
  33. En l' eure le vous feray, ho!
  34. Dominus sit in corde tuo
    et in labiis tuis ad bene predicandum evangelium pacis
    populo Dei. In nomine patris et filii et spiritus sancti.

    Amen.
  35. LORENS <Icy parle saint Lorens a saint Vincent et dit:>
    Cousin, voulez vous oir voir?
  36. Je ne voulroye pas avoir
  37. Un marc d' argent en verité
  38. Et je n' eusse ici esté
  39. A ce sermon.
  40. VINCENT.     Aussi ne feroie je mon,
  41. Se Dieu gart m' ame de pechié.
  42. Cousin, conment a il preschié
  43. Tresnoblement!
  44. LORENS.       Voire, et monstré appertement
  45. Conment par la Dieu courtoisie
  46. Est nostre loy auttorisie
  47. Plus que nulle autre et gracieuse,
  48. Plus excellent, plus vertueuse
  49. Et plus parfaitte.
  50. VINCENT.     C' est droiz, car elle a esté faite
  51. De celui qui en rien ne fault,
  52. De celi qui tout peut et vault,
  53. En qui le tresor de science
  54. Est repost et de sapience
  55. Tout plainement.
  56. LE PAPE.       Dites moy, se Diex vous ament,
  57. Biaux seigneurs, quelle loy tenez
  58. Ne s' estes de ce pais nez,
  59. Je vous em pri.
  60. LORENS.       Sire, voulentiers sanz detri.
  61. Deux crestiens sommes au mains,
  62. Et si sommes cousins germains,
  63. Ne scé pour quoy le demandez,
  64. Et sommes de ce pays nez,
  65. Ce sachiez, sire.
  66. LE PAPE.       Vezci pour quoy, le vous vueil dire.
  67. Il me semble que je vous voy
  68. D' assez bel maintien: s' avec moy
  69. Vouliez demourer, qui sui homme,
  70. Voire, qui sui pape de Romme,
  71. Je tien vostre prouffi seroit
  72. Et bien venir vous en pourroit
  73. D' ame et de corps.
  74. VINCENT.     Saint pére, trop bien je m' acors
  75. A estre vostre cler dès ci,
  76. Et de ceste offre vous mercy
  77. Que m' avez fait.
  78. LORENS.       Tressaint pére, et j' aussi de fait
  79. Me soubzmett a vostre vouloir,
  80. Car je n' en puis que miex valoir,
  81. Ce voy je bien.
  82. LE PAPE.       Se vous pensez de faire bien,
  83. Bien vous venra, n' en doubtez mie.
  84. Ore il convient qu' en Romenie
  85. Avecques moy vous en venez
  86. Et compagnie me tenez
  87. Avec les autres gens que j' ay,
  88. Car sanz plus faire de delay
  89. Aler m' en fault.
  90. VINCENT.     Nous sommes touz prestz sanz deffault
  91. D' aler, saint pére, avecques vous
  92. Ou vous plaira, sire: ne nous
  93. Espargniez point.
  94. LE PAPE.       Puis que nous sommes a ce point,
  95. Nanil: alons nous en de ci.
  96. Esgardez, mes fréres, vezci
  97. Deux cousins qui nous serviront
  98. Et avecques nous s' en venront
  99. Jusques a Romme.
  100. PREMIER CARDINAL.         Se chascun veult estre preudomme,
  101. Mal ne leur en peut avenir,
  102. Mais sont eureux d' y venir
  103. En verité.
  104. DEUXIESME CARDINAL.   Je croy qu' il n' ont pas voulenté
  105. Que de mener honneste vie:
  106. Au mains a leur philosomie
  107. Le m' est avis.
  108. LE PAPE.        Sanz plus faire cy de devis,
  109. Mettez vous tost, que je le voye,
  110. A chemin, qu' il y a grant voye
  111. Amis, a faire.
  112. PREMIER CARDINAL.         Alons: que Dieu de nous mal faire
  113. Nous vueille deffendre et garder.
  114. Ne pensons que de regarder
  115. Le chemin droit.
  116. PHILIPPE.      Sanz arrester plus cy endroit,
  117. Vaz moy tantost Dacien querre:
  118. Dy li qu' a moy viengne bonne erre,
  119. Que je li mans.
  120. PREMIER SERGENT.           Sire, acomplir vueil voz conmans:
  121. Dire li vois sanz plus ci estre.
  122. Mahom, sire, vous vueille mettre
  123. En puissance et en honneur grande!
  124. L' empereur par moy vous mande
  125. Qu' a li venez.
  126. DACIEN.        Grain d' or, un petit vous tenez:
  127. En l' eure m' en vois avec vous.
  128. C' est fait; alons men, ami doulx:
  129. Je sui tout prest.
  130. PREMIER SERGENT.           Soit. Vezci Dacien qui est
  131. A vostre mant venuz, chier sire,
  132. Si tost conme il m' a oy dire
  133. Que le mandiés.
  134. PHILIPPE L' EMPEREUR.    Grain d' or, un po de cy vuidiez:
  135. Nous voulons de conseil parler.
  136. Il vous en fault de cy aler
  137. Appertement.
  138. PREMIER SERGENT.           Sire, je feray bonnement
  139. Vostre plaisir.
  140. PHILIPPE.      Descouvrir vous vueil mon desir,
  141. Dacien, puis qu' ensemble sommes.
  142. François, qui sont mes subgiez hommes,
  143. Se rebellent par desverie
  144. Contre moy et ma seigneurie.
  145. Vous savez assez fait de guerre,
  146. Et pour ce je vous vueil requerre
  147. Que de mon ost vous soiez maistre
  148. Et des gens que je vueil conmettre
  149. Et sur les François envoier,
  150. Car faire les vueil ravoier
  151. Et retourner a ma mercy.
  152. Or me dites que de cecy
  153. Faire voulez.
  154. DACIEN.        Sire, de moi servi serez
  155. Bonnement, et de cuer feray
  156. Quanque pour vous faire pourray
  157. Jusqu' au morir.
  158. PHILIPPE.      Je ne vous puis plus requerir,
  159. Ne ne vueil, amis: c' est assez.
  160. Or vous pri je que vous pensez
  161. De ceste besoingne avancier:
  162. Ce n' est mie chose a laissier,
  163. Mon ami chier.
  164. DACIEN.        Sire, pour moy plus despeschier,
  165. Dès ci congié de vous prendray,
  166. Mon harnoys aprester yray
  167. Et feray assembler mes gens;
  168. Et vous d' autre part diligens
  169. Soiez des gens d' armes avoir
  170. Que vous faciez tantost mouvoir
  171. Et venir a moy droit en France,
  172. Et je les pense en ordenance
  173. Telle mettre dedans un mois
  174. Que vous orez dire Françoys
  175. Sont desconfit.
  176. PHILIPPE.      Ce que vous dites me souffit:
  177. Il vous sera fait, or alez,
  178. A vostre vueil, plus n' en parlez.
  179. Mais je vous pri, mon ami doulx,
  180. Tant com je puis, avancez vous
  181. De tost mouvoir.
  182. DACIEN.        Chier sire, tenez tout pour voir
  183. Qu' ains demain nonne partiray
  184. A tout ce que de gens aray.
  185. Ne puis plus brief que vous denonce;
  186. Mais gardez que vostre semonce
  187. Soit a toutes voz gens si faicte
  188. Que chascun s' apreste et s' affaicte
  189. De tost venir.
  190. PHILIPPE.      Il est bien en mon souvenir,
  191. Mon ami doulx.
  192. DACIEN.        Je pren a tant congié de vous
  193. Et m' en vois aprester mon erre.
  194. Mahon me doint de ceste guerre
  195. Venir a chief!
  196. PHILIPPE.      Vostre corps gart Diex de meschief!
  197. Or alez, Dacien amis,
  198. Pensez que François soient mis
  199. En ma mercy.
  200. DACIEN.        Seigneurs, sanz vous plus tenir cy,
  201. Jusqu' aux champs avec moy venez.
  202. Aux varlez d' estable ferez
  203. Savoir que d' esveillier se painent
  204. Noz chevaulx et les nous amainnent
  205. Aux champs ou tout a pié irons,
  206. Et la dessus nous monterons
  207. Trestouz ensemble.
  208. PREMIER ESCUIER.             Mon seigneur, puis que bon vous semble,
  209. Faire leur vois savoir, c' est drois.
  210. Alez vous en devant vous trois
  211. Et je tandis a eulx iray
  212. Et aussi tost aux champs seray,
  213. Com vous serez.
  214. DEUXIESME ESCUIER.       Il dit bien. Or ne demourez,
  215. Gençon, après nous tant ne quant;
  216. Et je me prendray garde quant
  217. A nous venrez.
  218. TROISIESME ESCUIER.      Pour li ci point ne demourez,
  219. Sire, mais alons men le pas.
  220. Je tien qu' il ne demourra pas
  221. Que tost ne viengne.
  222. DACIEN.        Alons, et aviengne qu' aviengne,
  223. Mais qu' il ait son message fait.
  224. S' il veut si viengne, s' il veult lait:
  225. Riens n' y aconte.
  226. LE PAPE.        Seigneurs, je fas ainsi mon compte:
  227. Puis que Diex tant misericors
  228. Nous a esté que sains des cors
  229. Nous a d' Espaigne ramené
  230. Et nous a empereur donné
  231. Catholique et bon crestien,
  232. C' est pour nous grant grace et grant bien,
  233. Quant a voir dire.
  234. DEUXIESME CARDINAL.   Je m' acors que dites voir, sire;
  235. Et puis qu' en si bon estat sommes,
  236. Ordener vous convient deux hommes,
  237. Dont l' un ferez vostre dyacre
  238. Et l' autre vostre soubsdiacre,
  239. Car ilz vous faillent.
  240. LE PAPE.        Or m' en nommez deux qui le vaillent,
  241. Qui ne soient pas soz ne nices,
  242. Mais qui soient a ce propices
  243. Et convenables.
  244. PREMIER CARDINAL.         Sire, si vous sont agreables,
  245. De deux vous en feray divis,
  246. Qui sont de bons muers, ce m' est vis;
  247. C' est Vincent et si est Lorens.
  248. S' a ses deux mettez vostre assens,
  249. Ne poez miex.
  250. DEUXIESME CARDINAL.   Sire, vous dites voir, se Diex
  251. Me doint sa grace.
  252. LE PAPE.        Puis qu' a gré vous vient que les face,
  253. Aussi me plaisent il, par foy.
  254. Sa, mes filz, ça, touz deux a moy,
  255. Vincent et vous Lorens aussi.
  256. Dès maintenant vueil et dès cy,
  257. Lorens, que soiez mon dyacre
  258. Et vous, Vincent, mon soubzdiacre:
  259. C' est quant messe dire voulray
  260. Sanz vous point ne celebreray,
  261. Si que soiez touz jours si faiz
  262. Qu' avecques moy puissiez le fais
  263. Porter et vous a Dieu monstrer
  264. Dignes de li amenistrer
  265. A son autel.
  266. LORENS.       Saint pére, Dieu vueille que tel
  267. Me face conme avez cy dit!
  268. Et combien que ne contredit
  269. Point mon vouloir a ce que dites
  270. Et que n' aie si grans merites
  271. Deservy, je, povre Lorens,
  272. De ceste honneur grace vous rens
  273. Que vous m' offrez.
  274. VINCENT.     Saint pére, de moy vous souffrez
  275. A present, par vostre benigne
  276. Grace, sanz m' avoir en haine,
  277. Ny en desdaing, ny en engaigne
  278. Tant que je reviengne d' Espaigne,
  279. Car c' est m' entente, a brief parler,
  280. Mais qu' il vous plaise, d' y aler
  281. Sanz demourée.
  282. LE PAPE.        Biau filz, par la vierge honnourée,
  283. Puis qu' avez d' aler y desir,
  284. Il me vient assez a plaisir
  285. Et congié de cuer vous en doing,
  286. Car j' espoire qu' aucun besoing
  287. Si vous y maine.
  288. VINCENT.     C' est voir, sire, et amour humaine
  289. Qu' ay selon Dieu a creature,
  290. Ou Dieu si veult par aventure
  291. Que doie ce voiage faire
  292. Conme cil qui scet quel affaire
  293. Il en venra.
  294. LE PAPE.        Or mouvez quant il vous plaira,
  295. Huy ou demain, biau filz Vincent;
  296. Mon vouloir trop bien s' i assent,
  297. Soiez ent fiz.
  298. VINCENT.     Or vueilliez, pére, a vostre filz
  299. Donner vostre beneiçon,
  300. Qui par humble devocion
  301. La vous demande.
  302. LE PAPE.        Encliner vueil a ta demande.
  303. De Dieu qui est en trinité
  304. Une essence, une deité,
  305. Et de saint Pol et de saint Pére
  306. Soiez tu beneiz, biau frére.
  307. Et je beneiçon te doing;
  308. Ou que tu voises, près ou loing,
  309. Dieu te sequeure.
  310. VINCENT.     Amen! Sanz ce que plus demeure,
  311. Saint pére, je m' en vois batant.
  312. Ne fineray mais d' errer tant
  313. Qu' Espaigne voie.
  314. LE MESSAGIER.       Mon chier seigneur, honneur et joie
  315. Aiez et longue et bonne vie,
  316. Ne sur vostre estat n' ait envie
  317. Quelque personne.
  318. PHILIPPE.      Ton salut emporte et si sonne
  319. Assez de bien, messagier, voir.
  320. Et tu bon jour puisses avoir.
  321. Quel vent te porte?
  322. LE MESSAGIER.       Nouvelles que je vous apporte
  323. Et lettres aussi de creance.
  324. Dacien, homme de vaillance
  325. Et chevalier plain de noblesce,
  326. Qui sage est et de grant prouesce,
  327. Premier a vous se reconmande
  328. Et conme bon subgiet vous mande
  329. Et le plus grant de voz amis
  330. Qu' il a tant peu qu' il a mis
  331. François en la subjeccion
  332. De vostre dominacion:
  333. Toute France est a vous, c' est nient,
  334. Et a tant fait qu' il s' en revient
  335. A grant honneur de touz prisiez.
  336. Tenez, mon chier seigneur, lisiez:
  337. Vezci sa lettre.
  338. PHILIPPE.      De l' ouvrir me vueil entremettre
  339. Et verray qu' il y a escript.
  340. Ore loé soit Jhesu Crist
  341. De ce qu' en ceste lettre voy.
  342. Biaux seigneurs, chascuns endroit soy
  343. S' apreste d' avec moy venir,
  344. Sanz plus ci endroit soi tenir,
  345. Ou aler vueil.
  346. PREMIER CHEVALIER.       Sire, nous ferons vostre vueil,
  347. C' est raison, et ce que voulrez,
  348. Et s' il vous plaist, vous nous direz
  349. Qu' avez a faire.
  350. PHILIPPE.      Je vous diray tout mon affaire.
  351. Vous savez assez conment France
  352. Par orgueil et oultrecuidance
  353. A esté contre moy rebelle
  354. Et contredisant, conme celle
  355. Qui tendoit a ce point venir
  356. Que de moy ne deust tenir.
  357. Après, seigneurs, vous savez bien
  358. Qu' envoié y ay Dacien
  359. Qui d' armes est preuz et subtis,
  360. Qui n' a mie conme faintis
  361. Les gens de France guerroyé,
  362. Ainçois les a si asproyé
  363. Et contre eulx s' est si deffenduz
  364. Qu' a li pour moy se sont renduz,
  365. Et les a mis en tel parti
  366. Qu' a son honneur s' est d' eulx parti
  367. Et s' en revient devers nous, voire;
  368. Et pour l' amour de la victoire
  369. Qu' il a eu, a brief parler,
  370. Je vueil encontre li aler
  371. Et li faire honneur, c' est raison.
  372. Si vueil que sanz arrestoison
  373. Touz ensemble avec moy veigniez
  374. Et compagnie me teigniez,
  375. Ce vous requier.
  376. DEUXIESME CHEVALIER. Nous sommes touz prestz, sire chier,
  377. De faire, sanz plus demander,
  378. Quanqu' il vous plaist a conmander:
  379. Ainsi le tien.
  380. DEUXIESME SERGENT.      C' est raison, et vous dites bien,
  381. Sire. Nous touz par diligence
  382. Li devons faire obedience:
  383. C' est de raison.
  384. PREMIER SERGENT.           Mon chier seigneur, s' il est saison
  385. De mouvoir, ne le fault que dire;
  386. N' en voy ci nul qui ne soit, sire,
  387. Prest de mouvoir.
  388. PHILIPPE.      Alons men; mais je vueil avoir
  389. Les menestrez ains que plus erre.
  390. L' un de vous deux, alez les querre,
  391. Cy endroit plus ne vous tenez,
  392. Et après nous les amenez:
  393. Faites briefment.
  394. DEUXIESME SERGENT.      G' y vois, sire, certainement.
  395. Alez touz jours; ne fineray
  396. Jusqu' a tant que les enmanray
  397. Avecques moy.
  398. PHILIPPE.      Tant avons erré que la voy
  399. Dacien, seigneurs, qui la vient.
  400. Avancer un po nous convient
  401. D' aler. Or sus!
  402. DACIEN.        Mon chier seigneur, celui Jhesus
  403. Qui regne sanz conmencement,
  404. Com vous creez, et sanz finement
  405. Vous soit amis.
  406. PHILIPPE.      Dacien, et il vous ait mis
  407. En santé et misericors
  408. Vous soit. Conment le fait ce corps,
  409. Dites me voir?
  410. DACIEN.        Chier sire, je vous fas savoir
  411. Je sui du corps sain et alégre,
  412. Combien que vous me veez maigre,
  413. Et ay esté depuis touz jours;
  414. Mais il a esté mains biaux jours
  415. Que ne me puis estre passez
  416. Que n' aye eu de paine assez
  417. Et de rioz a ces Françoys
  418. Et de batailles, sire, ainçois
  419. Qu' a ce je puisse estre venuz
  420. Que j' en soie au dessus venuz.
  421. Toutes voies en la parfin,
  422. La mercy mon Dieu Apolin
  423. Et Mahommet, ay je tant fait
  424. Que je les ay conquis de fait
  425. Et a ce mis et estenduz
  426. Qu' il se sont com subgiez renduz
  427. Tout plainement.
  428. PHILIPPE.      Vous l' avez fait si vaillenment
  429. Que sachiez je ne fineray
  430. Tant que le vous desserviray.
  431. Avant! sanz nous plus ci tenir,
  432. Faites ces menestrez venir,
  433. Qui devant nous mestier feront
  434. Et ainsi faisant nous menront
  435. En mon manoir.
  436. DEUXIESME SERGENT.      Avant, seigneurs, sanz remanoir:
  437. Cy endroit plus ne vous tenez,
  438. Mais faisans mestier nous menez
  439. Au grant palais de l' emperiére.
  440. Mouvez devant et nous derriére
  441. Vous suiverons.
  442. LES MENESTREZ.    Sanz refuser tout ce ferons
  443. Qu' il vous plaist dire.
  444. DACIEN.        Puis qu' en vostre palais, chier sire,
  445. Estes, je vous pri qu' il vous plaise,
  446. Sanz estre de moy a mal aise,
  447. Que jusques en mon hostel aille;
  448. Car je vous puis dire sanz faille
  449. On m' y attent et pour grant fait
  450. Qui ne peut sanz moy estre fait
  451. Ny a fin mis.
  452. PHILIPPE.      Puis qu' il est ainsi, chiers amis,
  453. Ce que voulez je vueil a plain;
  454. Mais nient mains je vueil que demain
  455. Dynons ensemble.
  456. DACIEN.        Soit, sire: puis que bon vous semble
  457. Et puis qu' il vous plaist, je venray;
  458. Mais par vostre gré m' en iray
  459. Pour maintenant.
  460. PHILIPPE.      Or alez, mais de convenant
  461. Ne me failliez.
  462. DACIEN.        Je seroie mal conseilliez
  463. Du faire. Biaux seigneurs, avant!
  464. Delivrez vous; alez devant
  465. Moy que vous voie.
  466. PREMIER ESCUIER.             Sire, nous nous mettons a voye
  467. D' aler y droit.
  468. DEUXIESME ESCUIER.       Alons nous ent par cy endroit,
  469. C' est nostre miex.
  470. TROISIESME ESCUIER.      Vous dites voir, par touz les diex
  471. De nostre loy.
  472. DACIEN.        Seigneurs, esté avez ou moy
  473. Grant temps, pour quoy je tien ainsi
  474. Que vous devez tout sanz nul si
  475. M' onneur vouloir.
  476. PREMIER ESCUIER.             Mon seigneur, vous avez dit voir,
  477. Et je tien qu' il n' est nul de nous
  478. Qui de l' acroistre ne fust touz
  479. Joyeux et liez.
  480. DACIEN.        Or fault donc que me conseilliez
  481. Sur ce que vous vueil descouvrir.
  482. Ma voulenté vous vueil ouvrir
  483. Et vous dire tout mon secré,
  484. Dont vous me devez savoir gré
  485. Tresgrandement.
  486. DEUXIESME ESCUIER.       C' est voir, sire, et certainement
  487. Je croy qu' il n' y a nul de nous
  488. Qui ne voulsist mettre pour vous
  489. Et vie et corps.
  490. DACIEN.        A vostre dit assez m' acors,
  491. Mais plus vraiement le verray
  492. Parmy ce que je vous diray.
  493. Il me semble en ceste maniére:
  494. Se nous n' avions point d' emperiére
  495. Et qu' il en fausist un eslire,
  496. Ne scé baron en tout l' empire
  497. Qui le deust estre avant moy,
  498. Et vous diray raison pour quoy:
  499. Je n' y scé baron en la terre
  500. Qui sache autant du fait de guerre
  501. Com je scé, ne qui l' ait apris,
  502. Ne qui ait nulz telz faiz empris
  503. Conme j' ay et com je feroye,
  504. S' il le failloit, ou je seroye.
  505. Pour tant le dy que se peusse,
  506. Voulentiers mon estat creusse,
  507. Et s' il croissoit, je vous dy bien
  508. L' estat de vous touz com le mien
  509. Croistroit aussi.
  510. TROISIESME ESCUIER.      Mon seigneur, la vostre mercy.
  511. Vous estes vous point appensé,
  512. Qui estes un homme assensé,
  513. Conment vous pourriez avenir
  514. A un plus grant estat venir
  515. Qu' orendroit n' estes?
  516. DACIEN.        Ceste demande pour nient faites:
  517. G' y ay bien pensé voirement,
  518. Mais je ne voy pas bien conment
  519. Mon estat en bonne maniére
  520. Tant conme vive l' emperiére
  521. Puisse avancier.
  522. PREMIER ESCUIER.             Seigneurs, pour la chose adressier,
  523. Nous troys d' accort nous conmettons
  524. Qu' a mort l' emperiére mettons
  525. Une nuit quant il dormira
  526. En son lit, si c' on ne sara
  527. Qui ç' ara fait.
  528. DEUXIESME ESCUIER.       Trop bien vueil estre de ce fait
  529. Compaignon, voir.
  530. TROISIESME ESCUIER.      Aussi nous vault il miex avoir
  531. Emperiére, je vous dy bien,
  532. D' un paien que d' un crestien,
  533. Ce n' est pas doubte.
  534. PREMIER ESCUIER.             Nous savons l' ordenance toute
  535. De sa chambre et par ou aler
  536. Nous y pourrons, a brief parler.
  537. Se je dy bien, ne vous ennuit:
  538. Alons y ja quant sera nuit
  539. Et en un destour nous muçons,
  540. Et nostre fait acomplissons
  541. Quant il iert point.
  542. DEUXIESME ESCUIER.       C' est sagement dit et a point.
  543. Se vous estes de cest accort,
  544. Par Mahommet je m' y accort
  545. Estre en aussi.
  546. TROISIESME ESCUIER.      Oil. Paiz. Or nous tenons cy
  547. Jusqu' a tant que nous en irons.
  548. Pour vous, chier sire, un fait ferons
  549. Ennuit bien grant.
  550. DACIEN.        Ce que pour moy serez engrant
  551. De faire et qui vous donra paine,
  552. Ne doubtez aussi que ne paine
  553. De le vous rendre.
  554. PHILIPPE.      Biaux seigneurs, il me convient prendre
  555. Un po de repos; dormir vueil.
  556. J' ay trop malement grant sommeil
  557. En verité.
  558. PREMIER CHEVALIER.       Mon chier seigneur, soit en santé.
  559. Je lo donc en ceste maniére
  560. Qu' en vostre chambre la derriére
  561. Venez reposer, sire doulx,
  562. Et nous irons avecques vous
  563. Nous deux, chier sire.
  564. DEUXIESME CHEVALIER. Aussi le vouloie je dire,
  565. Pour vous couvrir et mettre a point.
  566. Seul aler ne vous lairons point,
  567. N' est pas raison.
  568. PHILIPPE.      Or alons sanz arrestoison,
  569. Je vous en pri.
  570. PREMIER CHEVALIER.       Alez devant, et sanz detri
  571. Nous vous suivrons.
  572. PREMIER SERGENT.           Mauduit, nous deux d' acort ouvrons.
  573. Alons men chiez Colin Hallé,
  574. Puis que dormir s' en est alé
  575. L' empereur, sanz plus cy preschier.
  576. Il vent tel vin, mon ami chier,
  577. Que c' est merveille.
  578. DEUXIESME SERGENT.      Tu ne dis rien que bien ne vueille:
  579. Alons, je n' y met nul contens.
  580. Nous revenrons cy tout a temps:
  581. Marchons bon pas.
  582. PREMIER SERGENT.           Certainement tu ne mens pas
  583. Et tout a heure.
  584. PREMIER ESCUIER.             Seigneurs, se Mahon me sequeure,
  585. Temps est d' aler ailleurs maishuit.
  586. Il sera ja tantost bien nuit,
  587. A mon avis.
  588. DEUXIESME ESCUIER.       Sanz faire ci plus de devis,
  589. Je lo bien que nous en aillons
  590. A celle fin que ne faillons
  591. A nostre entente.
  592. TROISIESME ESCUIER.      C' est bien dit. Alons sanz attente.
  593. Mon seigneur, ici demourez:
  594. Pour cause mie ne venrez
  595. Avecques nous.
  596. DACIEN.        Il me plaist. Alez, seigneurs doulx,
  597. Puis qu' il vous haitte. <Icy viennent les deux chevaliers en sale et dit le second:>
  598. DEUXIESME CHEVALIER. Ottroiez moy ceste requeste,
  599. Sire, que nous deux par accort,
  600. Tandis que l' emperiére dort,
  601. Alons des espices mengier,
  602. Et boire en un joli vergier
  603. Ou vous menray.
  604. PREMIER CHEVALIER.       Puis que m' en requerez, g' iray
  605. Tresvoulentiers.
  606. DEUXIESME CHEVALIER. Or alons tost, endemantiers
  607. Que n' avons de destourbier point.
  608. Nous revenrons ci tout a point
  609. Ainçois qu' il liéve.
  610. PREMIER CHEVALIER.       Ne m' en chaut, mais qu' il ne li griéve
  611. S' avant que nous venons s' esveille
  612. Et aucune chose avoir vueille
  613. Par l' un de nous.
  614. DEUXIESME CHEVALIER. Conment que soit, mon ami doulx,
  615. En chevirons. <Ici viennent les escuiers Dacien en sale.>
  616. PREMIER ESCUIER.             Or, seigneurs, et quel le ferons?
  617. Ouvré avons si bien a point
  618. Que d' emperiére n' avons point:
  619. Par nous mors est.
  620. DEUXIESME ESCUIER.       A mettre en terre en est plus prest.
  621. Sueffre: de ci nous en irons,
  622. A Dacien dire l' irons
  623. Nostre seigneur.
  624. TROISIESME ESCUIER.      Il en ara joie greigneur
  625. Que de cinq cens livrées de terre
  626. Ly donner. Alons li bonne erre
  627. Nostre fait dire.
  628. PREMIER ESCUIER.             Alons touz ensemble. Chier sire,
  629. Pensez de faire bonne chiére:
  630. Pour certain mors est l' emperiére,
  631. Occis l' avons.
  632. DEUXIESME ESCUIER.       Fait en avons ce que devons
  633. Pour vostre amour.
  634. DACIEN.        Bien est. Or faites ci demour
  635. Et me vueilliez dire le voir
  636. Conment est mort: ce vueil savoir,
  637. Je vous em pri.
  638. TROISIESME ESCUIER.      Je le vous diray sanz detri.
  639. Si a point en sa chambre entrasmes
  640. Qu' omme ne femme n' y trouvasmes
  641. Que lui, qui nul mot ne disoit,
  642. Car en son lit dormant gisoit.
  643. Lors feismes tant touz de quoy
  644. Il est demouré mort tout coy,
  645. C' est a brief dire.
  646. DACIEN.        De sa mort n' ay je pas grant ire.
  647. Laissons ester; cy vous serrez
  648. Decoste moy, s' attenderez
  649. Que l' en dira.
  650. PREMIER ESCUIER.             Nous ferons ce qui vous plaira
  651. Sanz refuser.
  652. DEUXIESME SERGENT.      Grain d' or, sanz plus ici ruser
  653. Retourner nous fault a la court:
  654. Il en est maishui temps, a court
  655. Et a brief dire.
  656. PREMIER SERGENT.           Je ne vous vueil mie desdire,
  657. Mauduit, je voy bien qu' avez droit.
  658. Or y alons de ci endroit,
  659. Je le conseil.
  660. DEUXIESME SERGENT.      Puis que le voulez, je le vueil:
  661. Alons, amis.
  662. PREMIER CHEVALIER.       Sire, il m' est avis qu' avons mis
  663. Grant piéce a revenir ici.
  664. Alons nous ent, pour Dieu merci,
  665. Vers l' emperiére.
  666. DEUXIESME CHEVALIER. Alons, qu' il est d' une maniére,
  667. Se ses gens n' a touz jours a temps,
  668. Il est vers eulx trop mal contens
  669. Et si qu' a eulx ne veult parler,
  670. Si qu' avançons nous d' y aler
  671. Pour pais avoir.
  672. PREMIER CHEVALIER.       Alons; ce n' est a dire voir
  673. Que bien a faire.
  674. PREMIER SERGENT.           A ce que je voy, nostre affaire,
  675. Mauduit, encore biau se porte.
  676. Personne n' a a ceste porte
  677. Qu' entre nous deux.
  678. DEUXIESME SERGENT.      C' est pour nous joie, non pas deulx.
  679. Au mains quant l' empereur venra,
  680. Yci touz prestz nous trouvera,
  681. S' ert nostre honneur.
  682. DEUXIESME CHEVALIER. Helas! bien devons de douleur,
  683. Sire, en lermes fondre et remettre,
  684. Quant nostre vray seigneur et maistre,
  685. Qui tant estoit bon emperiére,
  686. Nous fault veoir jesir en biére.
  687. Faussement a esté assis,
  688. Quant en son lit on l' a ocis
  689. Et en dormant.
  690. PREMIER CHEVALIER.       Ce n' a fait Breton ne Normant,
  691. Sire, pour voir, a qui souviengne
  692. De Dieu, ne qui l' ayme ne criengne,
  693. Mais est, a dire verité,
  694. Qui ç' a fait sanz humanité,
  695. Plain de fausse et mauvaise envie,
  696. D' avoir ainsi tolu la vie
  697. A un si noble et vaillant corps.
  698. Ha! tresdoulx Dieu misericors,
  699. Que sera ce?
  700. DEUXIESME CHEVALIER. Je ne scé, mais sanz plus d' espace,
  701. Je lo que le façons de fait
  702. Savoir ainsi comme il est fait
  703. Pour y remedier bonne erre
  704. Et pour le mettre aussi en terre.
  705. Et vous que dites?
  706. PREMIER CHEVALIER.       Et j' aussi, que par ainsi quittes
  707. Serons tenuz, a dire voir,
  708. Qu' en arons fait nostre devoir.
  709. Alons nous deux de ci maishuit
  710. Dire a Grain d' or et a Mauduit
  711. Que par tout facent leur devoir
  712. De le faire aux seigneurs savoir
  713. De ceste terre.
  714. DEUXIESME CHEVALIER. Vous dites bien: alons bonne erre.
  715. Vez les la, c' est trop bien a point.
  716. Seigneurs, d' empereur n' avons point;
  717. Mors est, a dire verité.
  718. En son lit occis a esté,
  719. Et si ne scet on de quelx gens.
  720. Si vous fault estre diligens
  721. D' aler les nobles hommes querre
  722. De ce pais et leur requerre
  723. Que sanz mettre en dilacion
  724. Viengnent pour faire eleccion
  725. Qui regnera.
  726. PREMIER SERGENT.           Je sui celui qui le fera
  727. Benignement.
  728. DEUXIESME SERGENT.      Aussi feray je vraiement
  729. Et dès maintenant mouveray:
  730. Alez par la, Grain d' or, g' iray
  731. Par ceste voye.
  732. PREMIER SERGENT.           Je vois, amis, se Dieu me voie,
  733. Et si metteray cure et paine
  734. A assembler de gent romaine
  735. Briefment foison.
  736. PREMIER CHEVALIER.       Sire, il nous convient, c' est raison,
  737. Ici tenir sanz deffaillir
  738. Pour honnestement recueillir
  739. Ceulx qui venront.
  740. DEUXIESME CHEVALIER. Puis qu' il le fault, il le seront
  741. Au miex que faire le saray;
  742. D' avecques vous ne partiray
  743. De ceste place.
  744. DEUXIESME SERGENT.      Tantdis que j' ay temps et espace,
  745. Au seigneur m' en vois de Lisiére
  746. Et a celui de Fosse fiére
  747. Et au conte de l' Arbre sec
  748. Et au seigneur du Groing avec
  749. Et au conte d' Ermal Hermin
  750. Et a touz ceulx qu' en mon chemin
  751. Je trouveray.
  752. CONTE NAUTIER.   Seigneurs, dites moy se seray
  753. D' avoir trop demouré repris,
  754. Qu' a mon pouoir certes j' ay pris
  755. Le plus court chemin qu' ay peu
  756. Et de cuer apte et non recreu
  757. Sui venuz ci.
  758. PREMIER CHEVALIER.       Chier sire, la vostre mercy:
  759. Vous estes venuz bien a point.
  760. Pour Dieu ne vous desplaise point
  761. S' encore un petit attendez
  762. Que ceulx qu' avons tramis mandez
  763. Soient venuz.
  764. CONTE NAUTIER.   Nanil: viengnent gros et menuz
  765. Tout a loisir.
  766. LE SIRE DE LISIéRE.            Le benoit Dieu par son plaisir
  767. Soit avec ceste compagnie
  768. Que je voy ci acompagnie
  769. En ceste place.
  770. DEUXIESME CHEVALIER. Amen, chier sire, et il vous face
  771. Lié de cuer plus que nous ne sommes,
  772. Car pieça ne perdirent hommes
  773. Autant que nous deux avons fait.
  774. Dieu vueille punir ce meffait
  775. En brief tempoire.
  776. PREMIER CHEVALIER.       Si fera il, c' est chose voire,
  777. N' en fas pas doubte.
  778. LE CONTE DE L' ARBRE SEC.       Dieu gart de mal ceste gent toute
  779. Que je cy voy.
  780. DEUXIESME CHEVALIER. Sire, bien veigniez vous, par foy,
  781. Et vous qui avec li venez.
  782. Or avant: place ici prenez
  783. Pour reposer.
  784. LE SIRE DU GROING.          Il nous feroit bon proposer
  785. Maizhui (nous sommes assez d' ommes)
  786. La cause pour quoy mandez sommes
  787. A cy venir.
  788. PREMIER CHEVALIER.       Pour vous mains longuement tenir,
  789. Je la vous diray, c' est raison.
  790. Sanz cause, mais par traison,
  791. Trop vilain fait est advenu:
  792. A l' emperiére sont venu
  793. Gent par nuit, voire en larrecin,
  794. Qui l' ont occis et mis a fin
  795. En son lit ou il se gisoit.
  796. Elas! a nul mal ne faisoit.
  797. Si que brief, pour conclusion,
  798. Par vostre bonne eleccion
  799. Un nouvel en convient eslire
  800. Qui sache bien garder l' empire
  801. Et gouverner.
  802. LE SIRE DE LISIéRE.            C' est fort de bien y assener
  803. Ne savoir si sodainement.
  804. Il y convient bien autrement
  805. Avoir regart.
  806. LE CONTE DE L' ARBRE SEC.       Vous dites voir, se Dieu me gart;
  807. Nonpourquant a ce je m' assens
  808. Que tant de testes, tant de sens,
  809. Ce dit on souvent en conmun.
  810. Par aventure a cy aucun
  811. Qui nous en pourra de ligier
  812. Un nommer, pour nous abregier,
  813. Souffisant homme.
  814. CONTE NAUTIER.   Vous desplaira il, se j' en nomme
  815. Un qui bien souffisant me semble?
  816. Or arez avis touz ensemble
  817. Que m' en direz.
  818. LE SIRE DE LISIéRE.            S' il vous plaist, vous le nommerez
  819. Premier; vous estes homme sage,
  820. Si nous ferez grant avantage.
  821. Or dites, sire.
  822. CONTE NAUTIER.   Volentiers je le vous vueil dire:
  823. Mes sire Cassedacien;
  824. Il n' est ne joune, n' encien,
  825. Mais de bon aage.
  826. LE CONTE DE L' ARBRE SEC.       C' est un homme de grant parage
  827. Et a qui l' onneur bien serroit,
  828. Mais je croy que qui le feroit
  829. De Dacien il feroit miex.
  830. Il est preuz, hardiz et soubtiex.
  831. De meilleur homme ne scé point
  832. Pour l' estre, se ne fust un point,
  833. Qu' il est paien.
  834. LE SIRE DU GROING.          En ce n' aconte un pois baien,
  835. Mais qu' autre dyffame n' y ait:
  836. Il a esté en maint bon fait
  837. Ou il s' est vaillanment porté
  838. Et dont l' onneur a rapporté
  839. Par dessus touz.
  840. CONTE NAUTIER.   C' est voir, et si doubt, sire doulx,
  841. Qui empereur ne le fera
  842. Grant guerre venir en pourra,
  843. S' il bée a ce.
  844. PREMIER CHEVALIER.       Par m' ame, bien m' y accordasse
  845. Qu' il le fust, ne fust une chose,
  846. Que je me doubt et si suppose
  847. Que de ses gens, par ses accors,
  848. Nostre bon seigneur ne soit mors
  849. A grief martire.
  850. LE SIRE DE LISIéRE.            Ne le savez de certain dire,
  851. Mais que par supposicion;
  852. Si n' en faites plus mencion,
  853. Je le vous lo.
  854. DEUXIESME CHEVALIER. Puis qu' il s' en convient taire, ho!
  855. C' est grant meschief et grant douleur
  856. Quant sera mis en tele honneur,
  857. Non pas de raison, mais par crainte,
  858. Et si dira personne mainte
  859. Que c' est oultrage.
  860. CONTE NAUTIER.   Encor sera plus grant damage
  861. Que pour l' estre a nous se debate;
  862. Car s' il avient c' on s' en combate,
  863. Touz les plus preuz et plus hardiz
  864. Fera brief estre acouardiz
  865. Ains que de son vouloir decline.
  866. Si di qu' il vault miex c' on s' encline
  867. A le faire a fin c' on l' acoise
  868. Que ce qu' il nous esmeuve noise,
  869. Riot ne guerre.
  870. LE SIRE DE LISIéRE.            C' est voir. Je conseil que bonne erre
  871. Li alons faire mencion
  872. Conment par grant eleccion
  873. Emperiére est.
  874. LE CONTE DE L' ARBRE SEC.       Alons: chascun de nous est prest.
  875. Sire, nous touz vous enortons
  876. Que nouvelles vous apportons
  877. Dont faire devez bonne chiére.
  878. Esleus estes emperiére
  879. De Romenie.
  880. DACIEN.        A vous et a la compagnie
  881. Qui ces nouvelles m' apportez
  882. Dy ainsi: Ne vous deportez
  883. Qu' avec moy dès ci ne vegniez
  884. Et compagnie me tegniez,
  885. Puis qu' ainsi est que c' est m' entente
  886. Que dès maintenant sanz attente
  887. De Romme ou suis a Franquefort
  888. Et a Ays a tout mon afort
  889. M' en aille faire couronner
  890. Et nom d' emperiére donner
  891. Publiquement.
  892. LE SIRE DU GROING.          Touz prestz sommes, sire. Alons ment:
  893. Mouvez si tost qu' il vous plaira;
  894. Chascun de nous vous suivera
  895. A brief parler.
  896. DACIEN.        Par ce chemin cy vueil aler
  897. Tournez y touz.
  898. CONTE NAUTIER.   Puis qu' il vous plaist, sy ferons nous
  899. Voulentiers, sire.
  900. LE FILZ.         Seigneurs, s' a vous me vien plain d' ire
  901. Complaindre, las! je n' en puis mais.
  902. J' ay bien cause dès ore mais
  903. D' estre dolent et esperdu,
  904. Quant j' ay mon bon pére perdu
  905. Par la maniére que savez
  906. Et que tout mort veu l' avez.
  907. Ha! c' est un trop merveilleux fait,
  908. Quant dire on ne scet qui ç' a fait,
  909. Homme ne femme.
  910. PREMIER CHEVALIER.       Ore, sire, Diex en ait l' ame!
  911. Ne le pouons ore amender,
  912. Mais vous avons a demander
  913. De l' enterrer quant vous plaira
  914. Et quant son service on fera,
  915. Car il le fault.
  916. LE FILZ.         Pour Dieu, seigneurs, n' y ait deffaut
  917. Que par vous et sanz detriance
  918. Ne soit faitte son ordenance
  919. De tout ce qu' il li appartient
  920. Et telle conme il li convient
  921. Et que ce soit fait sanz eslongne,
  922. Et qu' en l' eglise de Coulongne
  923. Soit mis son corps.
  924. DEUXIESME CHEVALIER. A ce que vous dites m' acors,
  925. Sire, c' est dit de bon avis.
  926. Si le ferons, sanz lonc devis,
  927. Si con le dittes.
  928. PREMIER CHEVALIER.       Alons faire qu' en soions quittes,
  929. Sanz plus ci estre.
  930. LE FILZ.         Or alez; pensez de tout mettre
  931. Bien et a point.
  932. DACIEN.        Puis que je me voy a ce point,
  933. Seigneurs, que Mahon m' a donné
  934. Grace qu' ay esté couronné
  935. De l' empire que desiroie
  936. Sur toute riens, or menons joye.
  937. Viengnent ces menestrez huimais,
  938. Qui nous menront en mon palais
  939. Faisant mestier.
  940. PREMIER ESCUIER.             Il le feront de cuer entier.
  941. Avant, seigneurs: convoiez nous
  942. Faisant mestier, delivrez vous,
  943. Jusqu' au palais.
  944. UN MENESTREL.     Voulentiers, si que clers et lais
  945. Joie en feront.
  946. DEUXIESME ESCUIER.       Or puis je dire que pourront
  947. Esperer voz gens, mon seigneur,
  948. Qu' en meilleur estat et greigneur
  949. Seront dès or mais voz amis
  950. Qu' esté n' ont puis que Mahom mis
  951. En estat si noble et si gent
  952. Vous a, que regnez sur la gent
  953. Conme emperiére.
  954. DACIEN.        Pour monstrer conment la loy chiére
  955. J' ay de Mahom et des paiens,
  956. Destruire vueil les crestiens;
  957. Car j' ordrene c' on voit crier
  958. Par ma terre sanz destrier
  959. Que touz crestiens tire a tire
  960. Soient pris et mis a martire.
  961. Vaz me faire ou marchié ce cri
  962. Et d' ilec si va sanz destri
  963. A touz les juges de ma terre
  964. Dire qu' il se penent d' enquerre
  965. Ou crestiens pourront savoir,
  966. Que leur ostent tout leur avoir
  967. Et puis mettent a mort les corps
  968. Sanz estre a nul misericors.
  969. Or va briefment.
  970. TROISIESME ESCUIER.      Sire, vostre conmandement
  971. Vois faire sanz point de delay.
  972. Or escoutez, et clerc et lay:
  973. De par mon seigneur l' emperiére
  974. Vous denonce en ceste maniére
  975. C' on mette a mort touz crestiens,
  976. Et aussi c' on prengne leurs biens
  977. Et a justice les bailliez;
  978. Et vous touz, juges, ne failliez
  979. Pas a ce faire.
  980. LORENS.       Saint pére, mal va nostre affaire.
  981. L' emperiére se veult aherdre
  982. A crestienté du tout perdre,
  983. Car a touz ses juges par cri
  984. A mandé que, sanz nul detry,
  985. Ou ilz saront nulz crestiens,
  986. Il prengnent leurs corps et leurs biens,
  987. De les mettre a fin point ne tardent,
  988. Les biens meubles devers eulx gardent;
  989. C' est dure chose.
  990. LE PAPE.        Lorens, biau filz, se dire t' ose,
  991. On dit souvent que les honneurs
  992. A quoy on vient muent les meurs.
  993. Puis qu' il est a ce point venu
  994. Qu' il est emperiére tenu,
  995. Les crestiens un pois baien
  996. Ne prise, li qui est paien.
  997. Si nous fault ainsi le temps prendre
  998. Et la mercy de Dieu attendre
  999. En bien faisant.
  1000. LORENS.       Pitié m' en fait le cuer cuisant
  1001. Et plain de lermes.
  1002. LE FILZ.         Or voy je qu' est venu li termes
  1003. Que laissier me convendra Romme.
  1004. Au pape, qui est un saint homme,
  1005. M' en vois parler sanz plus ci estre.
  1006. Saint pére, le doulx roy celestre
  1007. Vous gart de mal.
  1008. LE PAPE.        Bien viengne nostre filz loyal
  1009. Et nostre amé.
  1010. LE FILZ.         Pour ce que vous m' avez amé,
  1011. Pére saint, et amez encore,
  1012. Ma pensée vous vien desclore
  1013. Et mon fait par vous adresser:
  1014. Je voy que me convient laisser
  1015. De touz poins ce propre pais,
  1016. Qui est mon lieu, dont esbahis
  1017. Suis moult et dont le cuer me serre;
  1018. Car je ne pourroie la guerre
  1019. Contre Dacien soustenir
  1020. Ne de l' emprise a chief venir;
  1021. Si n' est mie m' entencion
  1022. Que face plus cy mansion,
  1023. Mais en autruy lieu m' en yray.
  1024. Toutes voies je vous diray:
  1025. Le tresor que mon pére avoit
  1026. A l' eure et au jour qu' il vivoit
  1027. Ne vueil pas que Dacien l' ait,
  1028. Mais, saint pére, ne vous soit lait,
  1029. Je le vous feray apporter,
  1030. Afin que, sanz vous deporter,
  1031. Le departez aux povres gens
  1032. Par vostre dyacre Lorens.
  1033. Je le vois querre.
  1034. LE PAPE.        Biau filz, et je feray enquerre
  1035. Tantdis, pour le bien emploier,
  1036. Ou le pourray miex desploier.
  1037. Or alez donques.
  1038. LE FILZ.         Godeffroy mon escuier, s' onques
  1039. Feis chose nulle pour moy,
  1040. Vaz t' en au pape sanz convoy
  1041. Et si li porte ce sac cy
  1042. De par moy et li di ainsy:
  1043. "Sire, ne vous esloingnés pas,
  1044. Je revenray isnel le pas."
  1045. Puis t' en reviens cest autre querre.
  1046. Or vas, amis, et fais bonne erre
  1047. Ce que devis.
  1048. GODEFFROY.           Je ne le feray mie envis,
  1049. Sire, mais voulentiers sanz noise.
  1050. Aidiez m', aidiez! Marie! il poise
  1051. Dessus mon col.
  1052. LE FILZ.         Vaz t' en par derriére saint Pol,
  1053. C' est a ton miex.
  1054. GODEFFROY.           G' iray bien. ça! ceens soit Diex!
  1055. Saint pére, longue et bonne vie
  1056. Vous doint Diex, qui vous gart d' envie.
  1057. J' apport ce sac de par mon maistre:
  1058. Faites le, saint pére, en sauf mettre;
  1059. J' en revois querre un autre autel,
  1060. Ne fineray tant qu' a l' ostel
  1061. Venuz seray.
  1062. LE PAPE.        Vaz: en sauf mettre le feray.
  1063. Venez avant, Lorens, venez:
  1064. Ce sac que veez cy prenez
  1065. Et le me portez en sauf lieu,
  1066. Que c' est tout a donner pour Dieu,
  1067. Mon ami chier.
  1068. LORENS.       De ci sanz plus, sire, preschier,
  1069. La derriére le porteray
  1070. Et bien en sauf le metteray,
  1071. N' en doubtez ja.
  1072. GODEFFROY.           Je revien, mon seigneur. Or ça,
  1073. Ou est ce sac que doy porter?
  1074. Troussez le moy sanz deporter,
  1075. Si m' en iray.
  1076. LE FILZ.         Voulentiers, amis, le feray.
  1077. Voiz le ci. Sus! devant t' en vas,
  1078. Et je te suiveray le pas
  1079. Tout bellement.
  1080. GODEFFROY.           Je le vous feray bonnement:
  1081. Ne suis pas encor recreu
  1082. D' aler. Vez me la esmeu:
  1083. Venez tout a vostre deport.
  1084. Saint pére, vezci que j' apport
  1085. Ce sac encore.
  1086. LE PAPE.        Bien puisses venir, amis. Ore,
  1087. Ou est ton maistre?
  1088. GODEFFROY.           En l' eure le verrez ci estre;
  1089. Après moy vient.
  1090. LE FILZ.         Saint pére, puis qu' il esconvient
  1091. Que de ce pais cy me parte
  1092. Se mon corps ne vueil mettre a perte,
  1093. Je vous pri soiez diligens
  1094. De tout donner aux povres gens
  1095. L' avoir que vous ay envoié,
  1096. Afin que plus tost avoié
  1097. Soit d' estre hors de purgatoire
  1098. Mon pére et translaté en gloire.
  1099. C' est tout quanque je vous demans,
  1100. Et a tant a Dieu vous conmans:
  1101. Priez pour moy.
  1102. LE PAPE.        Ou que tu voises, en sa foy
  1103. Te vueille Dieu, biau filz, tenir,
  1104. Si qu' en gloire puisses venir
  1105. En la parfin.
  1106. LORENS.       Amen! Je l' en pri de cuer fin,
  1107. Qui l' en doint grace.
  1108. DACIEN.        Seigneurs, il convient c' on me face
  1109. Par declarracion savoir
  1110. Qu' est devenu l' or et l' avoir
  1111. Et le tresor que pot laissier,
  1112. Après sa mort, mon devancier,
  1113. Car a moy duisent.
  1114. PREMIER ESCUIER.             Par aventure s' en deduisent
  1115. Et font riches ceulx qui les ont,
  1116. Mais je ne scé s' il leur nuiront
  1117. Au paraler.
  1118. DEUXIESME ESCUIER.       Sire, se m' escoutez parler,
  1119. Vous ourrez tout ce qu' en savray.
  1120. Le filz Philippe, c' est tout vray,
  1121. Dolent de cuer et esbahiz,
  1122. S' en va en estrange pais,
  1123. Dès lors que vostre cri fu fait.
  1124. Mais, sire, savez qu' il a fait?
  1125. Le tresor a pris tout a plain
  1126. De son pére, et mis en la main
  1127. Du pape Sixte.
  1128. DACIEN.        Il n' en sera pas ainsi quitte,
  1129. Par Mahom, se tu me diz voir;
  1130. Mais pour le voir miex en savoir
  1131. Conment il va de ce tresor,
  1132. Mauduit me vas querre et Grain d' or.
  1133. De les trouver touz deux te paines,
  1134. Et fay que tu cy les m' amaines:
  1135. Or vas bonne erre.
  1136. DEUXIESME ESCUIER.       Voulentiers: je les vous vois querre;
  1137. Je pense qu' il soient ensemble.
  1138. Egar! la les voy, ce me semble.
  1139. Grain d' or, Grain d' or, et vous, Mauduit,
  1140. Je vueil, mais qu' il ne vous ennuit,
  1141. Parler a vous.
  1142. PREMIER SERGENT.           Venez avant. ça, dites nous
  1143. De quoy, amis.
  1144. DEUXIESME ESCUIER.       A vous trouver ay paine mis.
  1145. Seigneurs, le nouvel emperiére
  1146. Si vous mande en ceste maniére
  1147. Qu' a li veigniez.
  1148. DEUXIESME SERGENT.      Ne sommes pas embesongniez
  1149. Si que tost n' y aillons sanz faille.
  1150. Alons oir, vaille que vaille,
  1151. Qu' il nous dira.
  1152. PREMIER SERGENT.           Pour moy mie ne demourra:
  1153. Alons, Mauduit.
  1154. DEUXIESME ESCUIER.       Mon chier seigneur, a mon conduit
  1155. Sont venuz ces deux hommes cy,
  1156. Si tost que je leur dis ainsy
  1157. Que les mandiés.
  1158. DEUXIESME SERGENT.      Ne fault fors que vous conmandiés:
  1159. Nous ferons, sire.
  1160. DACIEN.        Vezci ce que je vous vueil dire:
  1161. Mais que me soiez bonnes gens,
  1162. Je vueil que soiez mes sergens
  1163. Aussi conme a mon devancier;
  1164. Ailleurs ne vous vueil pas laissier
  1165. Aler servir.
  1166. PREMIER SERGENT.           Pour vostre grace desservir,
  1167. Sire, et nous paine metterons
  1168. De faire quanque nous pourrons
  1169. Vostre plaisir.
  1170. DACIEN.        Seigneurs, de savoir ay desir
  1171. Que le tresor est devenu
  1172. N' a qui il peut estre venu
  1173. Qu' avoit Philippe.
  1174. DEUXIESME SERGENT.      Chier sire, son filz en mancipe
  1175. Partie, qui de ce pais
  1176. S' en est alé touz esbahiz,
  1177. Je ne scé qui l' a conseillié;
  1178. Le residu il a baillié
  1179. Au saint pére, ç' ay je oy dire,
  1180. Mais on ne me dit pas, chier sire,
  1181. Cause pour quoy.
  1182. DACIEN.        Est il ainsi? Or paiz tout coy!
  1183. Vous deux, qui mes escuiers estes,
  1184. Et vous deux, sergens, or tost faites,
  1185. Alez me querre ce saint pére;
  1186. Il fault que son meffait compére:
  1187. Puis c' on le tient a detenteur
  1188. Des tresors, conme recepteur
  1189. Puny sera.
  1190. PREMIER ESCUIER.             Nous ferons ce qu' il vous plaira,
  1191. Treschier sire, c' est bien raison.
  1192. Alons men sanz arrestoison
  1193. Faire besoingne.
  1194. PREMIER SERGENT.           Alez devant et sanz eslongne;
  1195. Je vous suivray.
  1196. DEUXIESME ESCUIER.       Puis qu' ainsi est, devant iray.
  1197. Suivez, suivez sanz plus attendre.
  1198. Je le voy [le pape] la; alons le prendre
  1199. Trestouz ensemble.
  1200. PREMIER ESCUIER.             Compains, bien dites, ce me semble.
  1201. La main y mettray voulentiers.
  1202. Saisir le vois endemantiers
  1203. Que je le voy la tout a plain.
  1204. Sire, je mect a vous la main;
  1205. Cy endroit plus ne demourez,
  1206. Il l' esconvient.
  1207. LE PAPE.        Seigneurs, g' iray, puis qu' a ce vient,
  1208. Partout ou mener me voulrez.
  1209. Le pis que faire me pourrez
  1210. Pas ne me faictes.
  1211. LORENS.       Saint pére, qui d' aler t' affaictes
  1212. Avec ceste paienne gent,
  1213. Conment t' est il ne bel ne gent
  1214. Que tu voises pour Dieu souffrir,
  1215. N' en sacrefice toy offrir
  1216. Sanz menistre ne presenter?
  1217. Pére, vueilles moy raconter
  1218. Quelle chose en dit ou en fait
  1219. Ay je contre ton vouloir fait,
  1220. Qui sacrefice conmencier
  1221. Veulz tout seul et moy delaissier?
  1222. Maintenant est temps d' esprouver
  1223. Quel tu pourras celui trouver,
  1224. Qui t' a, ou temps qui est oultré,
  1225. Du saint autel admenistré
  1226. Le sacrement.
  1227. LE PAPE.        Reconfortes toy doulcement,
  1228. Biau filz; laissier ne te vueil pas,
  1229. Mais de cy vaz ysnel le pas
  1230. Donner aus Dieu povres, amis,
  1231. Le tresor qu' en sauf tu as mis,
  1232. Et ne doubtes pas que te laisse;
  1233. Car combien que soie en viellesce,
  1234. Je conmenceray la bataille
  1235. Contre Dacien, mais sanz faille.
  1236. Tu qui es cecy regardant,
  1237. Jeunes, en l' amour Dieu ardant,
  1238. Ceste bataille achieveras
  1239. Et du tirant victoire aras
  1240. Glorieuse, ce te puis dire,
  1241. Le tiers jour après mon martire,
  1242. Et adonques m' ensuiveras
  1243. Quant consumée tu l' aras.
  1244. Or vas, et tellement labeure
  1245. Que du tresor rien ne demeure
  1246. Qu' aus povres, biau filz, departi
  1247. Ne soit tretout, voire, et parti.
  1248. A tant me tais.
  1249. LORENS.       Saint pére, ne fineray mais
  1250. Tant que vostre conmandement
  1251. Aie acompli tout plainement.
  1252. Je le vois faire.
  1253. DEUXIESME ESCUIER.       Seigneurs, gardons nous de meffaire
  1254. Contre l' empereur nostre maistre.
  1255. Nous pourrons bien ici trop estre;
  1256. Pensons de nous en retourner.
  1257. Sa! sire, je vous vueil mener
  1258. De ce costé.
  1259. PREMIER ESCUIER.             Il ne nous sera pas osté,
  1260. Car je d' autre part le tenray
  1261. Et aussi que vous le menray
  1262. Tant que serons venuz a fin.
  1263. Alez devant par ce chemin,
  1264. Vous deux, sergens.
  1265. DEUXIESME SERGENT.      De faire serons diligens
  1266. Ce que vous dites.
  1267. LORENS.       Penser vois conment soie quittes
  1268. D' acomplir le vouloir mon maistre.
  1269. Cy voy plusieurs povres gens estre:
  1270. Bien a point sont de moy trouvez.
  1271. Bonne gent, or ne vous mouvez,
  1272. Mais attendez moy ci trestouz:
  1273. Je revenray en l' eure a vous.
  1274. Tenez, ne soiez engaignié
  1275. De prier pour qui l' a gaignié
  1276. Et par qui en voz mains est mis,
  1277. Et pour l' eglise et ses amis,
  1278. Et que Dieu la gart et soustiengne
  1279. Et en vraie foy la maintiengne
  1280. Jusqu' a la fin.
  1281. PREMIER POVRE.    Sire, je pri Dieu de cuer fin
  1282. Qu' il vous doint s' amour et sa grace,
  1283. Et l' estat acroisse et parface
  1284. De sainte eglise.
  1285. LORENS.       Sanz vous faire plus de devise,
  1286. Alez, priez ent souvent Dieu,
  1287. Et je m' en vois en autre lieu
  1288. Visiter povres menagiers
  1289. Qui leur vivre ont a grans dangiers,
  1290. Car trop petite gangne font
  1291. Et du demander honteux sont;
  1292. Et tien que bien emploieray
  1293. L' aumosne que je leur donrray
  1294. De cest avoir.
  1295. DEUXIESME ESCUIER.       Sixte, qu' avez desir d' avoir,
  1296. Mon chier seigneur, vous amenons:
  1297. Tant avons fait que nous l' avons
  1298. Cy admené.
  1299. DACIEN.        Or ça, maistre, l' en m' a donné
  1300. A entendre que detenteur
  1301. Estes et conme recepteur
  1302. Des tresors qui sont de l' empire;
  1303. Si fault que vous me sachiez dire
  1304. Que fait en avez et après
  1305. Qu' apareilliez soiez et prez
  1306. De sacrefier a noz diex,
  1307. Qui valent du vostre trop miex,
  1308. Ce n' est pas doubte.
  1309. LE PAPE.        M' entente n' est pas que me boute
  1310. Ne face a voz diex sacrefice:
  1311. Sire, je seroie trop nice
  1312. Que laissasse mon sauvement
  1313. Et que face mon dampnement.
  1314. Certainement rien n' en feray,
  1315. Ne des tresors ne vous diray
  1316. Ne bien ne mal.
  1317. DACIEN.        Dis que tu parles a cheval.
  1318. Ou les tresors m' enseigneras
  1319. Et aux diex sacrefieras,
  1320. Ou ton corps tourmenter feray,
  1321. Si que de toy vengiez seray,
  1322. N' en doubtes point.
  1323. LE PAPE.        Je sui affermez a ce point
  1324. Que pour paine ne pour tourment
  1325. Souffrir des tresors nullement
  1326. Qu' il sont devenuz ne diray,
  1327. N' aux diex ne sacrefieray
  1328. Par quelque voie.
  1329. DACIEN.        Afin que je plus ne le voie,
  1330. Seigneurs, de lui me despechiez.
  1331. Alez, la teste li trenchiez
  1332. La hors aux champs.
  1333. PREMIER ESCUIER.             Mon fauchon est il bien trenchans?
  1334. Tantost copée li ara.
  1335. Sergens, mener le vous faura
  1336. Et crier, c' est de vostre office,
  1337. C' on viengne veoir la justice;
  1338. Ainsi le fault.
  1339. PREMIER SERGENT.           Mouvez; après vous sanz deffaut
  1340. L' en enmenrons.
  1341. DEUXIESME SERGENT.      Alons men, et si crierons
  1342. Ce qui nous est enjoint de dire.
  1343. Venez veoir mettre a martire,
  1344. Touz et toutes, le detenteur
  1345. Des tresors conme un recepteur
  1346. Faux ypocrite.
  1347. LORENS.       Ha! com j' oy parole mal dite
  1348. Et com c' est de pechié grant somme
  1349. De mettre a mort un si preudomme
  1350. Conme il est, et n' a nul secours!
  1351. Parler a li vois tost le cours:
  1352. Je ne m' en pourroye tenir.
  1353. Saint pére, dont peut ce venir
  1354. Que vous me laissiez en la fin
  1355. Après vous conme un orfelin?
  1356. Et si ay en dit et en fait
  1357. Touz jours vostre voulenté fait,
  1358. Ne ne me suis point deffenduz
  1359. Que touz les tresors despenduz
  1360. N' aie et aux povres departi,
  1361. Puis que de vous me departi,
  1362. Et touz donnez.
  1363. PREMIER SERGENT.           Avez oy? prenez, prenez,
  1364. Et soit menez a Dacien,
  1365. Et je croy que nous ferons bien:
  1366. Puis que des tresors a parlé,
  1367. Aucune chose en est alé
  1368. Parmy ses mains.
  1369. DEUXIESME ESCUIER.       Par Mahom, n' en ara ja mains.
  1370. Sa! maistre, vous me demourrez,
  1371. Et vostre ami mourir verrez,
  1372. Se vous voulez.
  1373. DEUXIESME SERGENT.      Mais a l' empereur le menez
  1374. Entre vous deux et li livrez,
  1375. Et tantdis par nous delivrez
  1376. Cesti sera.
  1377. DEUXIESME ESCUIER.       Je m' y accors: fait vous sera.
  1378. Alons, cy plus ne nous tenons
  1379. Chier sire, nous vous amenons
  1380. Celui qui les tresors depos
  1381. A d' un lieu en autre repos,
  1382. Si conme il dit.
  1383. DACIEN.        Dy me voir, dy sanz contredit:
  1384. Ou as tu ces tresors muciez,
  1385. Ne qui est celi qui laissiez
  1386. Les t' a, di voir?
  1387. LORENS.       Qu' appellez vous tresors n' avoir?
  1388. Je ne scé que c' est que vous dites.
  1389. Tresor, vien dire ou tu habites
  1390. Cest emperiére.
  1391. DACIEN.        Respons tu en ceste maniére?
  1392. Il semble que de moy te moques.
  1393. Acertes di, ou adevoques
  1394. Saras, par Mahommet, tantost.
  1395. A Ypolite mon prevost,
  1396. Sanz plus ci estre, le menez,
  1397. Et li dites qu' emprisonnez
  1398. Soit a destroit.
  1399. DEUXIESME SERGENT.      Mon chier seigneur, soit tort soit droit,
  1400. Nous li menrons, puis que le dites.
  1401. Alons men. ça, sire Ypolites,
  1402. Estroitement emprisonnez
  1403. Cest homme, et si ne li donnez
  1404. Ne que boire ne que mangier.
  1405. L' emperiére de li vangier
  1406. Se veult a plain.
  1407. YPOLITE.       Laissiez le moy: puis qu' en ma main
  1408. Est alez, il y sera mis,
  1409. Ainsi com de vous m' est conmis,
  1410. Certainement.
  1411. DEUXIESME ESCUIER.       Il souffist. Mauduit, alons ment
  1412. Dont venuz sommes.
  1413. YPOLITE.       Sa, passez illec; vous deux hommes
  1414. Serez ensemble.
  1415. LUCIEN.        Helas! qui est ce c' on assemble
  1416. Avecques moy?
  1417. LORENS.       Je sui un homme conme toy,
  1418. Mais tant y a crestien sui,
  1419. Qui ay pitié de ton annuy,
  1420. Qui me semble que ne voiz point;
  1421. Mais se vouloies faire un point,
  1422. C' est que baptisier te feisses,
  1423. Ne doubte pas que ne veisses
  1424. Et que ta veue ne reusses
  1425. Pour tant qu' en Jhesu Crist creusses
  1426. Qui pour nous morut en la croiz.
  1427. Si te dy bien, se tu me croiz,
  1428. Je te promet la veue rendre,
  1429. Se par moy veulz baptesme prendre
  1430. Et Crist orer.
  1431. LUCIEN.        Dont ne vueil je plus demourer
  1432. Ainsi, mais vueil crestien estre
  1433. Et par baptesme en la foy estre
  1434. Des crestiens.
  1435. LORENS.       Dont ce que te diray retiens:
  1436. Il te fault de neccessité
  1437. Croire qu' en une deité
  1438. Sont trois personnes simplement
  1439. Sanz fin et sanz conmancement:
  1440. Il y a le pére et li filz
  1441. Et la tierce, soiez en fiz,
  1442. Sains esperiz; et par creance
  1443. Tenir qu' il ne sont qu' une essance,
  1444. Et qu' en celle divinité
  1445. Est une seule voulenté
  1446. Touz jours manant.
  1447. LUCIEN.        Ce croy je bien. Au remanant
  1448. Alez et pour Dieu, sanz detri,
  1449. Crestiennez moy, je vous pri,
  1450. Si que puisse par bien ouvrer
  1451. Gloire et le veoir recouvrer
  1452. Que j' ay perdu.
  1453. LORENS.       Or n' aiez pas cuer esperdu,
  1454. Mais dy que Diex t' ayme de fait.
  1455. Tantost seras crestien fait.
  1456. Or avant, sa! mon ami doulx,
  1457. Met toy icy a nuz genoulx
  1458. Et jointes mains.
  1459. LUCIEN.        Sire, vous n' en arez ja mains:
  1460. Vez m' y la mis.
  1461. LORENS.       Ore, Lucien, biaux amis,
  1462. Entens de baptisier la guise.
  1463. A tout ton nom je te baptise
  1464. De ceste yaue que truis cy preste,
  1465. Que je t' espanz dessus la teste:
  1466. In nomine patris et filii et spiritu sancti. Amen.
  1467. LUCIEN.        Or sui j' en bon predicamen,
  1468. Que, par ceste nouvelle foy
  1469. Que j' ay pris, aussi bien je voy
  1470. Que je fis onques.
  1471. LORENS.       Lucien, or mercie donques
  1472. Jhesu Crist qui ce bien t' a fait,
  1473. Et si l' ayme de cuer parfait
  1474. Tant conme en ce siecle seras;
  1475. Et tu sa gloire après aras
  1476. En la parfin.
  1477. YPOLITE.       Lorens, je vous pri de cuer fin:
  1478. Ou ces tresors et cel avoir
  1479. Avez mucié? dites me voir,
  1480. Par amour, sire.
  1481. LORENS.       Se vous me voulez ainsi dire
  1482. Qu' en Jhesu Crist, sire, croirez
  1483. Et que baptesme prenderez,
  1484. Je vous promet en loyauté
  1485. Dire vous en la verité;
  1486. Et, qui plus est, quant serez mors,
  1487. Vous promet du ciel les tresors
  1488. Et les richesses.
  1489. YPOLITE.       Et je, Lorens, pour voz promesses
  1490. Me consens estre crestien
  1491. Dès maintenant, et vous dy bien
  1492. Que me baptisez, c' est m' entente,
  1493. Tantost. Alons men sanz attente
  1494. Au lieu ou baptisé seray.
  1495. Toute ma gent aussi feray
  1496. Crestienner.
  1497. LORENS.       A ce me vueil je bien pener.
  1498. Alons: cy plus ne demourons.
  1499. Lucien avec nous menrons,
  1500. Je le conseil.
  1501. YPOLITE.       Puis que le voulez, je le vueil.
  1502. Or soions d' aler diligens;
  1503. Monstrer pense a toutes mes gens
  1504. Conment perdu la vue avoit
  1505. Lucien, qui maintenant voit,
  1506. Afin de les plus esmouvoir
  1507. A crestienté recevoir.
  1508. Alons bonne erre.
  1509. DACIEN.        Seigneurs, je vueil c' on me voit querre
  1510. Ce hault tondu maleureux.
  1511. Alez le querre entre vous deux:
  1512. Veoir le vueil.
  1513. PREMIER SERGENT.           Sire, nous ferons vostre vueil.
  1514. Alons, Mauduit.
  1515. DEUXIESME SERGENT.      Grain d' or, alons, mais par deduit
  1516. Alons, je te pri de cuer fin,
  1517. Avant une foiz de bon vin
  1518. Ou que soit boire.
  1519. PREMIER SERGENT.           Alons men a la teste noire;
  1520. Il y a vin de Saint Poursain
  1521. Tresbon, et qui est net et sain
  1522. A boire, amis.
  1523. DEUXIESME SERGENT.      Voiz me la donc a voie mis
  1524. Sanz cesser tant qu' en l' ostel entre.
  1525. Sui moy; je vueil emplir mon ventre
  1526. De ce bon vin.
  1527. LORENS.       Puis qu' a la loy de Sarrazin,
  1528. Biaux seigneurs, avez renoncé,
  1529. Or ait chascun cuer adrescé
  1530. A amer Jhesu Crist autant
  1531. Conme il fait vous et qu' il fist quant
  1532. Il se laissa en la croiz pendre
  1533. Et son precieux costé fendre
  1534. Pour nous s' amistié descouvrir
  1535. Et pour nous paradis ouvrir,
  1536. Car a ce fait, je vous dy bien,
  1537. Doit mettre tout bon crestien
  1538. Cuer et entente.
  1539. YPOLITE.       Je lo, sire, que sanz attente
  1540. En la prison nous en ralons
  1541. Et illeucques de ce parlons
  1542. Qui touche nostre sauvement.
  1543. C' est le meilleur. Sus, allons ment
  1544. Touz trois ensemble.
  1545. LUCIEN.        Vous dites moult bien, ce me semble:
  1546. La pourrons parler de la foy
  1547. Plus largement. Egar! je voy
  1548. Grain d' or et Mauduit ça grant erre
  1549. Venir. Ne scé s' ilz viennent querre
  1550. Nul d' entre nous.
  1551. PREMIER SERGENT.           Ypolite, delivrez vous:
  1552. En noz mains Lorens delivrez.
  1553. Il fault qu' a l' empereur livrez
  1554. Soit tout en l' eure.
  1555. LORENS.       Ypolite amis, sanz demeure
  1556. Faire icy ne plus de demour
  1557. Alons men, et soit nostre amour
  1558. Fermée en Dieu, joyeuse et liée,
  1559. Car au jour d' uy appareilliée
  1560. Nous est la gloire qui ne fine;
  1561. Mais je te pri par amour fine
  1562. Que de ton cuer ne parte point
  1563. Le nom de Dieu, mais si a point
  1564. Le garde et si seléement
  1565. C' on ne congnoisse nullement
  1566. Que crestiens es devenuz
  1567. Jusqu' a tant que le doulx Jhesus
  1568. T' appellera.
  1569. YPOLITE.       Je feray ce qui vous plaira,
  1570. Chier pére en Dieu.
  1571. LORENS.       Seigneurs, sus, partons de ce lieu;
  1572. Vez me cy tout appareillié
  1573. D' aler avec vous de cuer lié
  1574. A vostre maistre.
  1575. DEUXIESME SERGENT.      Or alons: sanz main a vous mettre
  1576. Vous lairons venir après nous.
  1577. Sire, vezci celui que vous
  1578. Avez mandé.
  1579. DACIEN.        Vien avant. Je t' ay demandé
  1580. Autre foiz amiablement,
  1581. Encors te demande conment
  1582. Il est, a dire verité,
  1583. Des tresors, ou sont il bouté,
  1584. Qu' a avoir quier.
  1585. LORENS.       Sire empereur, je vous requier
  1586. Que me donnez trois jours de terme,
  1587. Et pour certain je vous afferme,
  1588. Sanz vous decevoir n' engignier,
  1589. A les vous dire et enseignier
  1590. De bonne foy.
  1591. DACIEN.        Je n' estriveray pas a toy
  1592. Pour trois jours; va, je le t' acors;
  1593. Mais garde bien que cil accors
  1594. Ne mue goute.
  1595. LORENS.       Non fera il, sire, sanz doubte:
  1596. Ce que vous promet vous tenray.
  1597. S' il vous plaist, de cy m' en iray
  1598. Pour maintenant.
  1599. DACIEN.        Or vaz, mais tien moy convenant
  1600. Et ce que m' as promis acquitte.
  1601. Et vous vos prisons, Ypolite,
  1602. Alez garder.
  1603. YPOLITE.       Sire, je vois sanz plus tarder,
  1604. Puis que le dites.
  1605. LORENS.       Penser me convient d' estre quittes
  1606. A l' empereur du convenant
  1607. Que li ay fait. Dès maintenant
  1608. Vois, Ypolite, chiers amis,
  1609. Ordener que ce qu' ay promis
  1610. Puisse acomplir.
  1611. YPOLITE.       Dieu le vous doint si bien amplir
  1612. Que vous en soiez honnourez.
  1613. Au revenir me trouverez
  1614. Dessus ma garde.
  1615. LORENS.       A Dieu. G' y vois ains que plus tarde.
  1616. Je tien que j' aray bien a traire,
  1617. Ains que les povres puisse attraire
  1618. N' assembler, a qui j' ay donné
  1619. Le tresor qui habandonné
  1620. M' a esté pour eulz departir,
  1621. Ou l' empereur cuide partir,
  1622. Mais n' en ara ne ce ne quoy.
  1623. Bien me va; des povres la voy
  1624. Une grant congregacion.
  1625. Ne scé s' il font colacion,
  1626. Mais a eulx de cy m' en iray.
  1627. Seigneurs, ce que je vous diray
  1628. Le ferez vous?
  1629. PREMIER POVRE.    Je croy qu' il n' a cy nul de nous
  1630. Qui ne face benignement,
  1631. Sire, vostre conmandement
  1632. Sanz contredit.
  1633. DEUXIESME POVRE.          Guillaume, vous avez voir dit
  1634. Et nous y sommes bien tenuz.
  1635. Sire, bien soiez vous venuz:
  1636. Conmandez, et en verité
  1637. Nous ferons vostre voulenté
  1638. Tout plainement.
  1639. LORENS.       Je ne vous requier seulement
  1640. Que d' une chose assez legiére,
  1641. D' avec moy jusqu' a l' emperiére
  1642. Venir; c' est tout.
  1643. TROISIESME POVRE.          Nous serions tuit folz et estout,
  1644. Sire, de dire: "Non ferons."
  1645. Tenez que touz ensemble irons
  1646. Tresvoulentiers.
  1647. LORENS.       Or m' atendez endementiers
  1648. Que je vois jusques la derriére;
  1649. Cy revenray a vous arriére
  1650. Trestout en l' eure.
  1651. PREMIER POVRE.    Or alez sanz faire demeure.
  1652. De cy endroit ne partirons,
  1653. Sire, mais vous attenderons,
  1654. Je vous di bien.
  1655. LORENS.       Or ça, biaux seigneurs, je revien
  1656. Et s' amaine ses autres cy,
  1657. Qui venront avec vous aussi.
  1658. Avant: mouvons.
  1659. DEUXIESME POVRE.          Alez devant; nous vous suivons
  1660. Pié a pié, sire.
  1661. LORENS.       Emperiére, je te vien dire,
  1662. Pour ce que soie veritables:
  1663. Vezci les tresors pardurables
  1664. Qui touz jours sanz amenuiser
  1665. Croissent, ce te dy sanz ruser.
  1666. Par ceulx ci sont ja pour le miex
  1667. Les tresors presentez es cieulx
  1668. Que me requiers.
  1669. DACIEN.        Est il ainsi? Bien voy tu quiers
  1670. Grant meschance, que tu aras,
  1671. Ou aux diex sacrifieras
  1672. Presentement.
  1673. LORENS.       Empereur, saches nullement
  1674. L' euvre des homes n' apartient
  1675. A aourer, et qui ce tient
  1676. Il péche et en enfer se met;
  1677. Mais celui qui dessus touz est
  1678. Vray ouvrier doit on aourer,
  1679. Craindre, servir et honnourer
  1680. Tant seulement.
  1681. DACIEN.        Avant, seigneurs! appertement
  1682. Prenez moy ce gloton bonne erre,
  1683. Et si le jettez contre terre
  1684. Et d' escourgies le batez
  1685. Tant que le sanc de touz costez
  1686. Ysse de ly.
  1687. PREMIER SERGENT.           Mon chier seigneur, n' y a celui
  1688. De nous qui vostre vueil ne face.
  1689. Maistre, sanz vous de ceste place
  1690. Partir, cy vous despoulerez
  1691. Et puis après liez serez
  1692. Par piez et mains.
  1693. DEUXIESME SERGENT.      Tu diz voir, ce sera du mains;
  1694. Qu' après ce que lié sera
  1695. Que nous sarons faire sara,
  1696. Voire a ses coux.
  1697. LORENS.       Prest sui de souffrir plus que vous
  1698. Ne me pourrez faire endurer,
  1699. Et en paine endurant durer
  1700. Frès et nouvel.
  1701. PREMIER SERGENT.           ça, lions le de ce hardel,
  1702. Puis qu' il est despoullié tout nu.
  1703. C' est fait; or fault qu' il soit batu
  1704. Sanz plus attendre.
  1705. DEUXIESME SERGENT.      Je vueil mes escourgies prendre
  1706. Et ferir dessus ly a hye.
  1707. Avant, Grain d' or, ne te fains mie
  1708. De faire aussi.
  1709. PREMIER SERGENT.           Se j' en ay pitié ne mercy,
  1710. Mauduit, la passion me fiére!
  1711. Requier, meschant, a l' emperiére
  1712. Qu' il te pardonne tes meffaiz,
  1713. Et sacrefie a noz diex: faiz,
  1714. Euvre com sage.
  1715. LORENS.       Certes, je n' en ay nul courage;
  1716. N' ay pas encore tant souffert,
  1717. Mais a mon Dieu seul estre offert
  1718. Vueil par martire.
  1719. DACIEN.        Par Mahon te jur et vueil dire
  1720. Que de mes mains n' eschaperas
  1721. Tant que si tourmenté seras
  1722. Que n' en pourras porter le fais,
  1723. S' a mes diex, present moy, ne fais
  1724. Tost sacrefice.
  1725. LORENS.       O Dacien, con tu es nice!
  1726. C' est toute mon affeccion,
  1727. Le dyner, la refeccion
  1728. Que je convoite et plus desir,
  1729. Et qui plus me vient a plaisir,
  1730. Ce puis respondre.
  1731. DACIEN.        Meschant, a tel disner cemondre
  1732. Devroies tes meilleurs amis
  1733. Pour estre en si grant aise mis
  1734. Com tu es ore.
  1735. LORENS.       Je te respons et dy encore
  1736. Qu' au pardurable diner sont
  1737. Ja semons ou ciel la amont:
  1738. La sont en gloire qui ne fine.
  1739. De ce diner n' es tu point digne,
  1740. Tirant pervers.
  1741. DACIEN.        Seigneurs, par un tourment divers
  1742. Que vous diray le tourmentez.
  1743. De plateines vous dementez
  1744. Avoir de fer toutes ardans,
  1745. Qui au lonc des costez pendans
  1746. Par tel maniére li seront
  1747. Que la char il lui arderont,
  1748. Et de ce faire vous hastez;
  1749. Et avecques ce le batez
  1750. De vettez de beuf tellement
  1751. Qu' il puist mourir soudainement
  1752. Entre voz mains.
  1753. DEUXIESME SERGENT.      Chier sire, n' en ara ja mains.
  1754. Grain d' or, de le garder te paines,
  1755. Et je vois querre des plateines
  1756. Telles conme il nous fault avoir.
  1757. Je croy j' ay bien fait mon devoir
  1758. De revenir ysnellement.
  1759. ça! pendons ly premiérement
  1760. Au long du costé ceste cy
  1761. Et ceste autre deça aussi
  1762. Sanz plus d' attente.
  1763. PREMIER SERGENT.           Par foy, Mauduit, c' est bien m' entente:
  1764. Mett ci, j' en feray mon devoir.
  1765. Mes mains me fault garder d' ardoir.
  1766. Par cy endroit la prenderay,
  1767. Sur l' espaule li lieray
  1768. Si qu' au lonc du costé li pende,
  1769. Qui la char li arde et li fende
  1770. Jusques aux os.
  1771. LORENS.       Doulx Jhesu, pour honneur et los
  1772. A ton saint nom donner et gloire,
  1773. Du tourment que je pors victoire
  1774. Me donne, et regarde en pitié,
  1775. Car cruelment pour t' amistié
  1776. Sui par tout le corps tourmenté;
  1777. Et nient moins, sire, en verité
  1778. Je t' ay touz jours en cuer eu
  1779. Et confessé et cogneu
  1780. Seul vray Dieu estre.
  1781. DACIEN.        Seigneurs, je cuit qu' il nous fait paistre:
  1782. En touz ces tourmens rien n' aconte,
  1783. Par enchantement les surmonte
  1784. Et mes paroles tient a foles.
  1785. Mès, par touz mes dieux, s' aux ydoles
  1786. Ne sacrifie, il peut bien dire
  1787. Qu' il morra de vilain martire.
  1788. Puis qu' il ne les prise un festu,
  1789. De plommées soit tant batu
  1790. Que le corps tellement li dueille
  1791. Qu' il muire, ou sacrefier vueille
  1792. Sanz plus preschier.
  1793. DEUXIESME SERGENT.      Il vous sera fait, sire chier,
  1794. Sanz plus debatre.
  1795. PREMIER SERGENT.           Conment te laisses tu tant batre,
  1796. Meschant, que tu ne sacrefies
  1797. A Mahom, ne conment te fies
  1798. Tant en ton Dieu que despecier
  1799. Tu sueffres miex que li laissier
  1800. Ne sa creance?
  1801. LORENS.       Sire Diex, par vostre puissance
  1802. Vueillez de moy mercy avoir
  1803. Et mon esperit recepvoir
  1804. Avec vous, Dieu misericors,
  1805. Quant venra l' eure que du corps
  1806. Devra partir.
  1807. DIEU. Michiel, il te fault appartir.
  1808. Va t' en tantost par my ces rens
  1809. Conforter mon ami Lorens,
  1810. Et li dy pas ne le lairay,
  1811. Mais a porter li ayderay
  1812. Quanque on li fera endurer
  1813. Et oultre les peines durer
  1814. Qu' avoir pourra.
  1815. MICHIEL.       Je sui celui qui bien fera,
  1816. Glorieux Dieu, vostre message.
  1817. Sanz faire plus cy d' arrestage,
  1818. Ly vois nuncier vostre voloir.
  1819. Ami Dieu, je te fas savoir
  1820. Que doulcement te reconfortes
  1821. Et liement les paines portes
  1822. C' on te fait et c' on te fera,
  1823. Que saches Dieu t' aydera
  1824. A les porter, de ce ne doubtes,
  1825. Et si les surmonteras toutes.
  1826. Or garde que cuer ne te faille,
  1827. Car encor en ceste bataille
  1828. Aras pour Dieu moult a souffrir.
  1829. Si pense de toy lié offrir,
  1830. Et endurer pour le Dieu nom,
  1831. Et saches ne te lais pas, non,
  1832. Ne ne m' en vois. <Icy l' essuie d' un drap linge.>
  1833. DACIEN.        Seigneurs, avez oy la voiz
  1834. De l' ennemi qui si enorte
  1835. Cest enchanteur et reconforte
  1836. Qu' a noz menaces il depute
  1837. Et noz parolles il repute
  1838. Sotes et vaines?
  1839. ROMAIN.       Or te plaise que tu te paines,
  1840. Ami de Dieu, noble martir,
  1841. A ce que je puisse partir
  1842. A tes biens fais non pas humains,
  1843. Que me baptises de tes mains;
  1844. Car un ange de Dieu voy bel
  1845. En la fourme d' un jouvencel
  1846. Qui doulcement te reconforte
  1847. Et d' un blanc drap linge qu' il porte
  1848. Les plaies de ton corps tarist
  1849. Et la douleur toute en garist
  1850. Par essuer.
  1851. DACIEN.        Seigneurs, trop me peut annuier
  1852. Que je voy et me doubte aussi
  1853. Que par cest anchanteur icy
  1854. Nous ne soions touz surmontez
  1855. Et conme vaincuz ahontez.
  1856. Gardez que sanz arrestoison
  1857. Soit mis en une orde prison,
  1858. Et tantdis je m' aviseray
  1859. Conment morir je le feray
  1860. Plus cruelment.
  1861. PREMIER SERGENT.           Sire, vostre conmandement
  1862. Ferons en l' eure.
  1863. DEUXIESME SERGENT.      Or l' en enmenons, sanz demeure
  1864. Faire, mettre en une sobite.
  1865. De par l' empereur, Ypolite,
  1866. Vous baillons cest homme prison,
  1867. Et dit qu' en la pire prison
  1868. Qu' arez soit enserrez et mis.
  1869. Ainsi je le vous laisse, amis,
  1870. Et m' en descharge.
  1871. PREMIER SERGENT.           Ainsi fas j', et si vous en charge,
  1872. Sire Ypolite.
  1873. YPOLITE.       Laissiez le, je vous en acquitte,
  1874. Seigneurs: alez.
  1875. ROMAIN.       Sire, qui tant vers Dieu valez,
  1876. Humblement vous requier et pri
  1877. Avoir baptesme sanz detri
  1878. De vostre main.
  1879. LORENS.       En l' eure, mon ami Romain,
  1880. Se tu croiz qu' en la trinité
  1881. N' a qu' une seule deité
  1882. Et si sont en personnes troys:
  1883. Je te demans s' ainsi le croys
  1884. Estre une essance.
  1885. ROMAIN.       Je croy qu' il est et sanz doubtance
  1886. En telle guyse.
  1887. LORENS.       Et en ceste foy te baptise
  1888. En nom du pére et Jhesu Crist
  1889. Son fil et du saint esperit.
  1890. Or vas, soies fort chevalier,
  1891. Quant ce venra au bataillier
  1892. Pour ceste foy.
  1893. ROMAIN.       Ce n' est pas l' entente de moy,
  1894. Sire, que je ne la soustiengne
  1895. Pour paine nulle qui m' en viengne
  1896. Com bon crestien.
  1897. YPOLITE.       E! ami Dieu, or voy je bien
  1898. Que grant peine avez enduré.
  1899. Helas! conment avez duré
  1900. Encontre ce cruel tirant?
  1901. Voir, j' ay esté moult desirant
  1902. D' aler moy crestien offrir
  1903. A aussi conme vous souffrir.
  1904. Tant ay esté troublé en cuer
  1905. Que ne vous puis dire a nul feur
  1906. Conment j' ay esté esmeu
  1907. De la paine qu' avez eu;
  1908. Et ne fust pour vous faire offense,
  1909. J' eusse rompu la deffence
  1910. Que m' avez fait que ne passe oultre,
  1911. Que crestien estre ne moustre,
  1912. Mais qu' en mon cuer le nom Dieu garde
  1913. Celéement tant qu' il regarde
  1914. L' eure et le jour qui li plaira
  1915. Qu' avecques li m' appellera
  1916. Par vostre dit.
  1917. LORENS.       Chier ami, vous avez voir dit.
  1918. Puis qu' ainsi estes enortez,
  1919. Je vueil qu' en Dieu vous confortez,
  1920. Et de la paine qu' ay eu
  1921. Ne soiez en riens mal meu,
  1922. Que c' est, ce vous fas mencion,
  1923. A ma glorificacion
  1924. Plus souveraine.
  1925. DACIEN.        Avant! il fault que l' en m' amaine
  1926. Ce Laurens devant moy bonne erre.
  1927. Entre vous deux alez le querre:
  1928. Avoir le vueil.
  1929. DEUXIESME SERGENT.      Sire, nous ferons vostre vueil.
  1930. Grain d' or, alons.
  1931. PREMIER SERGENT.           Bien. Ypolite, a vous parlons.
  1932. Lorens tantost nous delivrez:
  1933. En l' eure a l' empereur livrez
  1934. Par nous sera.
  1935. YPOLITE.       Puis qu' il le demande, il l' ara:
  1936. Ne ly vueil mie contredire.
  1937. Ha! pére en Dieu, je vous vien dire
  1938. L' empereur vous envoie querre;
  1939. Bien a pris encontre vous guerre
  1940. Et grant atayne.
  1941. LORENS.       Ja pour sa puissance haultaine
  1942. Ne pour quanque faire pourra,
  1943. Sacrifier ne me fera
  1944. Mais qu' en mon bon Dieu seulement.
  1945. Vez me ci, seigneurs: alons ment
  1946. A vostre maistre.
  1947. DEUXIESME SERGENT.      Alons, sire, sanz plus cy estre,
  1948. Car il vous mande.
  1949. DACIEN.        Vien avant, vien. Je te conmande
  1950. Que tu a noz diex sacrefies
  1951. E ton Dieu laisse ou tant te fies,
  1952. Ou en toy toute ceste nuit
  1953. Tourmenter, combien qu' il t' ennuit,
  1954. Emploieray.
  1955. LORENS.       Emperiére, je te diray:
  1956. Fay selon ce que te plaira.
  1957. Ma nuit point d' obscurté n' ara,
  1958. Ainçois sera pour verité
  1959. L' obscurté muée en clarté;
  1960. Et pour ç' acomplis ton voloir:
  1961. Je n' en pourray que miex valoir,
  1962. Non, et toy pis.
  1963. DACIEN.        Puis qu' ainsi est que me despis,
  1964. Je te menray par autre dance.
  1965. Vaz me querre sanz detriance
  1966. Or tost, Grain d' or, le greil de fer:
  1967. Aussi que s' il fust en enfer
  1968. Yci le feray tourmenter;
  1969. Et tu voises faire apporter,
  1970. Mauduit, du feu et du charbon
  1971. Largement et a grant foison.
  1972. Alez bonne erre.
  1973. PREMIER SERGENT.           Sire, je vois le greil querre
  1974. Que m' avez dit.
  1975. DEUXIESME SERGENT.      Et j' aussi vois sanz contredit
  1976. Charbon et feu, chier sire, querre
  1977. Qu' aporter feray cy bonne erre
  1978. Pour vostre amour.
  1979. PREMIER SERGENT.           Je n' ay pas fait trop long demour:
  1980. Vezci le greil que demandez,
  1981. Mon chier seigneur: or conmandez
  1982. C' on en fera.
  1983. DACIEN.        Quant Mauduit revenu sera
  1984. A tout du feu et du charbon,
  1985. Ainsi qu' il me semblera bon
  1986. En sera fait.
  1987. DEUXIESME SERGENT.      Vezci charbon et feu de fait,
  1988. Sire, que je fas apporter.
  1989. Or en dites sanz deporter
  1990. Vostre plaisir.
  1991. DACIEN.        C' est mon vouloir et mon desir
  1992. Que ce gloton ci m' estendez
  1993. Sur ce greyl, point n' atendez:
  1994. Conment? c' est m' entente, tout nu;
  1995. Et quant vous l' arez estendu,
  1996. Liez le par piez et par mains
  1997. Au greil, puis ne plus ne mains
  1998. C' on rostist char, c' est mes accors,
  1999. Vueil je que roustissiez son corps
  2000. Tant qu' ainsi fine.
  2001. PREMIER SERGENT.           Chier sire, de voulenté fine
  2002. A vostre vueil obeirons.
  2003. En l' eure l' assemillerons
  2004. Com devisez.
  2005. DEUXIESME SERGENT.      Or nous dy: es tu advisez
  2006. Qu' a noz diex sacrefieras
  2007. Ou sur ce gril rosti seras?
  2008. Respons, amis.
  2009. LORENS.       Sur ce gril vueil miex estre mis
  2010. Pour rostir que sacrefier
  2011. A vos diex: n' y puis affier
  2012. Nul bien avoir.
  2013. DEUXIESME SERGENT.      Sa donc! faisons nostre devoir.
  2014. Despoullons le, Grain d' or amis,
  2015. Et sur ce gril par nous soit mis
  2016. Et lié ferme.
  2017. PREMIER SERGENT.           Il n' ara plus heure ne terme.
  2018. Sa, nous vous despoullerons, maistre;
  2019. Or sus: sur ce gril vous fault mettre
  2020. Envers gisant.
  2021. LORENS.       Ce ne vous suy point refusant:
  2022. Vez m' y la mis.
  2023. DEUXIESME SERGENT.      Grain d' or, or le lyons, amis,
  2024. Si qu' il ne puist n' avant n' arriére
  2025. Soy mouvoir en nulle maniére
  2026. Au feu sentir.
  2027. PREMIER SERGENT.           Soit: a ce me vueil apartir.
  2028. C' est fait, lié ne peut miex estre.
  2029. Il le nous fault dessoubz li mettre
  2030. De touz costez.
  2031. DACIEN.        Or tost a voz forches boutez
  2032. Charbon et feu soubz ce rostier,
  2033. Si qu' ainsi soit cuit tout entier
  2034. Son corps et ars.
  2035. DEUXIESME SERGENT.      Sire, assez tost de toutes pars
  2036. Verrez le feu si fort espris
  2037. Que jusqu' a son corps sera pris
  2038. Et embrasé.
  2039. DACIEN.        De li soit si près arrasé
  2040. Que le dos tout au lonc li arde.
  2041. Ne me dit rien que par rafarde
  2042. Et moquerie.
  2043. PREMIER SERGENT.           Qui de mengier par lecherie
  2044. De li talent ne fain aroit,
  2045. Assez tost mengier en pourroit,
  2046. Tant sera cuit.
  2047. DEUXIESME SERGENT.      Ce ne sera, si com je cuit,
  2048. Nul de nous deux.
  2049. LORENS.       Tirant cruel et dolereux
  2050. Qui si me martires sanz cause,
  2051. Voiz qu' en moy ce feu cy ne cause
  2052. Chaleur nulle desordenée,
  2053. Mais est en moy conme rousée
  2054. Causant doulceur et tout delit;
  2055. Mais il t' appareille ton lit
  2056. En enfer, ou aras tourment,
  2057. Tirant cruel, sanz finement;
  2058. La seras des maufez es laz,
  2059. La sera ta chançon: helaz!
  2060. La n' aras point de belle chiére,
  2061. La sanz fin acheteras chiére
  2062. La paine que me fais porter.
  2063. Ore pour toy plus deporter
  2064. Voiz que de moy une partie
  2065. Est ja toute cuite et rostie,
  2066. Si que tu bien mengier en peuz.
  2067. Retourne l' autre, se tu veulz,
  2068. Ou fais retourner sanz restat,
  2069. Et la fais mettre en tel estat.
  2070. Or avant: soies en songnieux.
  2071. Je te rens graces, sire Diex,
  2072. Qui en touz mes maux me confortes;
  2073. Sire, plaise toy que les portes
  2074. De ton saint paradis a moy,
  2075. Qui cy sui pour l' amour de toy
  2076. ...