Miracle du roi Clovis

Cy comence un miracle de Nostre Dame conment le
roy Clovis se fist crestienner a la requeste de Clotilde,
sa femme, pour une bataille que il avoit
contre Alemans et Senes, dont il ot la victoire;
et en le crestiennent envoia Diex la sainte
ampole.
AURELIAN. Mon treschier seigneur redoubté,
Mahon, par laquelle bonté
Vous tenez le regne de France,
Vous maintiengne en ceste puissance,
Et aussi qu' il fait les biens croistre,
Vous vueille il en honneur accroistre
Et en bonne vie tenir
Et de voz emprises venir,
Sire, a bon chief!
CLOVIS. Et il vous vueille de meschief,
Amis Aurelian, deffendre!
Quoy qui soit me faictes entendre:
Coment se porte la besongne
De nouvel, amis, de Bourgongne?
Vous n' estes pas si mal senez
Que ne sachez, puis qu' en venez,
De l' estat du roy Gondebaut;
Quelque chose savoir m' en fault
Ysnel le pas.
AURELIAN. Sire, ne vous mentiray pas,
Et je croy bien que le savez.
Selon ce qu' escript li avez,
Vezci qu' il vous rescript, chier sire.
Toutes voies vous vueil je dire
Une chose que j' ay veu:
J' ay tant enquis que j' ay sceu
Que Gondebaut a une niéce,
Et si vous jur qu' il a grant piéce
Ne vi si sage damoiselle
Ne si gracieuse pucelle:
Biau maintien a en son aler,
S' est tant courtoise en son parler
Que le monde s' en esmerveille;
De lis et de rose vermeille
Porte couleur entremeslée,
Et monstre bien qu' elle fu née
De royal gent et de sanc hault.
Combien que le roy Gondebault
Occeist Chilperic son pére,
Non obstant que il fussent frére,
Vous affermé je tout pour voir
Qu' elle est digne d' un roy avoir
Par mariage.
CLOVIS. Seigneurs, je vous vueil mon courage
Descouvrir. Touz a moy tendez,
Et ce que diray entendez,
Je vous em pry.
PREMIER CHEVALIER. Chier sire, dites nous sanz detri
Vostre vouloir secretement.
Nous vous orrons touz bonnement,
N' en doubtez point.
DEUXIESME CHEVALIER. Voire, et si diray ci un point:
Se conseil y fault, vous l' arez
Tel comme a vostre honneur sarez
Demander, sire.
CLOVIS. Bien est; vezci que je vueil dire:
Je tieng que suis assez d' aage
Pour femme avoir par mariage
Dont lignie me puist venir
Royal qui ou temps a venir
Gouverne mon royaume et tiengne
Et le deffende et le soustiengne
Conme sien après mon obit.
Roy Gondebaut, si conme on dit,
A une niéce bele et gente;
De la demander est m' entente
A femme, se le conseilliez:
Si vous pri dire m' en vueilliez
Que vous en semble.
PREMIER CHEVALIER. Respondez pour nous touz ensemble,
Sire: nous nous y assentons;
Quanque direz nous consentons
A estre fait.
TROISIESME CHEVALIER. Seigneurs, vous me chargiez d' un fait
Qui ne m' est mie trop ligier;
Mais nient moins, pour vous abregier,
Je vous en diray mon avis.
Se vous me creez, roy Clovis,
Certes, vous vous marierez
Tout au plus tost que vous pourrez.
Se Gondebaut vous veult sa niéce
Donner a femme, et qu' il li siesse,
Prenez la, je le vous ennorte,
Pour le bon renom c' on li porte
Et pour le grant bien c' on en dit;
Et s' a ce faire contredit,
Il en fauldra une autre querre
Bonne pour vous, en autre terre,
De sanc royal.
DEUXIESME CHEVALIER. Ce conseil est bon et loyal
En verité.
PREMIER CHEVALIER. Par m' ame, il s' est bien acquitté.
Chier sire, sanz autre recort,
Nous sommes touz de son accort,
Je vous di bien.
CLOVIS. Or vien avant, Aurelian.
Il faut que voises en Bourgongne
Encore pour ceste besongne;
N' y scé, pour la bien avoier,
Meilleur legat y envoier.
Si te diray que tu feras:
Tu diligence metteras
De parler a la damoiselle
Dont m' as apporté la nouvelle,
En secré; garde que ne failles.
Ces vestemens pour espousailles,
Qui sont d' or, li presenteras;
Cest annel aussi li donras
De par moy, ce n' est nul diffame
Par si qu' elle sera ma femme:
Avoir la vueil.
AURELIAN. Sire, je feray vostre vueil
Au miex et au plus sagement
Que faire pourray, vraiement.
De vous congié ci prenderay;
Mon escuier appelleray.
Vien avant, Huchon Passe porte;
Tien, ce fardelet ci emporte
Dessoubz t' esselle.
L' ESCUIER. Voulentiers, mon seigneur; c' est telle,
Ce m' est avis.
AURELIAN. Que c' est n' en fault ja ci devis
Faire, que nous l' emporterons
Avec nous quant nous en irons.
Va touz jours. Chier sire, entendez:
A Mahon soiez conmandez.
Je m' en vois; mais je revenray
Tout le plus tost que je pourray,
Sanz nulle doubte.
CLOVIS. Or vas et me rapporte toute
Sa voulenté de ce fait ci,
Et s' il li plaira bien aussi
Ma compaigne estre.
AURELIAN. Mon redoubté seigneur et maistre,
Ne doubtez, en mon cuer sera
Escript quanqu' elle me dira,
Si que riens n' en oblieray,
Et si le vous recorderay
Au revenir.
CLOVIS. Or tost, sanz toy plus ci tenir,
Vaz besongnier.
PREMIER POVRE. Attens m', attens, Renier, Renier!
Arreste, que je parle a toy.
Ou vas tu si tost, par ta foy?
Ne me mens pas.
DEUXIESME POVRE. Quanque puis j' avance mon pas
Et me paine com diligens
D' estre avecques les autres gens
A la donnée.
PREMIER POVRE. Pour qui sera elle donnée
Ne quelle part?
DEUXIESME POVRE. Ne scez tu pas bien, di, coquart,
Que Clotilde, la niéce au roy,
Aus povres qui sont devant soy,
Qu' elle voit qui en ont mestier,
Si tost conme elle ist du moustier,
Donne s' aumosne de ses mains,
Aux uns plus et aus autres mains,
Selon ce que s' affeccion
Y est et sa devocion?
Si vois savoir, c' est ma parclose,
Se d' elle aray aucune chose
Par charité.
PREMIER POVRE. Renier, saches pour verité
Que nulle part huy ne verti
Ne de son hostel ne parti,
Je l' ay sceu certainement;
Si qu' alons men tout bellement
Devant le moustier pour l' attendre,
Et aux autres gens noz mains tendre
Pour demander.
DEUXIESME POVRE. C' est bien dit: n' y voy qu' amender.
Alons, amis.
CLOTILDE. De la ou mon livre avez mis,
Ysabel, tantost le prenez,
Et au moustier vous en venez
Avecques moy.
LA DAMOISELLE. Voulentiers, ma dame, par foy!
Prendre le vois, je vous di bien.
S' il vous plaist, mouvez; je le tien:
Vez le ci, dame.
CLOTILDE. Alons men. Que Diex soit a m' ame
Debonnaire et misericors!
Avant que je passe plus hors
De ci endroit me seigneray
Et a Dieu me conmanderay
Qui m' aist si com j' ay mestier.
Damoiselle, puis qu' au moustier
Sui, sa mon livre!
LA DAMOISELLE. Tenez, dame, je le vous livre;
La bource aray.
CLOTILDE. Gardez la tant que m' en voulray
Raler de cy.
LA DAMOISELLE. Si feray je, dame, et aussi
Derriére vous si m' asserray
Et mes patenostres diray
A basse vois.
TROISIESME POVRE. Je ne scé se trop tart je vois
Au moustier, que la belle née
Clotilde n' ait fait sa donnée;
Avancier me convient mes pas.
E! je croy qu' encore n' est pas
Departie, puis que la voy
En estant Renier et Gieffroy:
J' ay esperance qu' il l' attendent.
Puis que je voy que les mains tendent,
Ne font pas de prendre dangier.
Seigneurs, lez vous me vien rengier.
Dites me voir, s' il vous agrée:
A Clotilde fait sa donnée,
Se Dieu vous gart?
PREMIER POVRE. Nanil, nous l' attendons, Lienart;
Bien veigniez vous!
TROISIESME POVRE. Et Dieu vous soit piteux et doulx,
Qui vous doint bien!
DEUXIESME POVRE. En renc con nous te mez; ça vien,
Lienart amis.
TROISIESME POVRE. Voulentiers. ça! vez m' i ci mis.
Avez vous maille ne denier?
Encore en dites voir, Renier,
Se Dieu vous voie.
DEUXIESME POVRE. Par foy, huy fourme de monnoie
Ne teing, Lienart.
PREMIER POVRE. Non fis je moy, se Dieu me gart,
C' om m' ait donné.
TROISIESME POVRE. E! depuis que nous fusmes né,
Diex nous a si bien pourveu
Que noz vies avons eu,
Conment que soit, jusques a ore;
Et si nous pourverra encore:
Laissons en paix.
AURELIAN. Huchon, mettre me vueil huymais
Et vestir d' un habit tel conme
Il me fault pour sembler povre homme.
Sanz de ceste place partir,
Sa! aide moy a devestir,
Affin que j' aye plus tost fait;
Aviser me fault que mon fait
Caultement face et sagement. <Ici vest un povre habit.>
Or me dy voir, se Diex t' ament:
Semble je ore homme, sanz ruser,
A qui aumosne refuser
Point on ne doie?
L' ESCUIER. Sire, oil, se Mahon me voie,
Vous semblez bien un povre corps.
Conment! voulez vous aler hors
Donques ainsi?
AURELIAN. Oil; tu m' atenderas ci
Jusqu' a tant que je revenray.
Dessoubz m' essaille emporteray
Ce sachet, j' en aray a faire;
Mais garde bien qu' a mon repaire
Ici te treuve.
L' ESCUIER. Ne doubtés que de ci me meuve
Si revenrez.
CLOTILDE. Ysabel, vous que me direz?
Avis m' est temps est de raler;
Assez avons, a brief parler,
Yci esté.
LA DAMOISELLE. Dame, vous dites verité.
Avant qu' aiez vostre donnée
Faicte, midi sera sonnée,
Ja n' en doubtez.
CLOTILDE. Tenez, mon livre en sauf mettez;
Je vueil attaindre de l' argent
Que donrray celle povre gent
Quant passeray.
AURELIAN. De tost aler ne fineray
Tant que je soie la venuz
Entre ces gens povres et nuz.
Je voy Clotilde qu' il attendent
Venir a eulx; et ilz li tendent
Les mains touz pour l' aumosne avoir.
Je vois faire aussi pour savoir
S' achoison aray ne querelle
Que je puisse parler a elle
Secretement.
CLOTILDE. Tenez, priez Dieu bonnement
Qu' en gré, seigneurs, ce que fas prengne,
Et en s' amour touz jours me tiengne
Et en sa foy.
PREMIER POVRE. Amen! Dame, de cuer l' en proy
Treshumblement.
DEUXIESME POVRE. Dame, par ce conmencement
Vous soit Dieux amis si afin
Qu' en sa gloire, qui est sanz fin,
Mette vostre ame!
TROISIESME POVRE. Pour ceste aumosne, chiére dame,
Que me faites, vous octroit Diex
Qu' en la fin la gloire des cieulx
Puissiez avoir!
CLOTILDE. Tu qu' apris n' ay pas a veoir,
Plus qu' aux autres te feray bien:
Tu aras ce denier d' or; tien,
Fay toy bien aise.
AURELIAN. Il convient que ceste main baise,
Et trairay ce mantel arriére;
Ne vous desplaise, dame chiére,
De ce qu' ay fait.
CLOTILDE. J' ay mon vueil acompli de fait:
Alons men sanz arrestoison.
Ore puis que suis en maison,
Ysabel, savez que ferez?
A ce povre la dire irez
Qu' a moy parler viengne un petit:
J' ay de savoir grant appetit
Dont est né ne de quelle terre.
Delivrez vous, alez le querre,
Je vous en pri.
LA DAMOISELLE. Ma dame, je vois sanz detri.
Amis, ci plus ne vous tenez;
A ma dame parler venez:
Clotilde par moy le vous mande.
Bien devez, puis que vous demande,
Venir a elle.
AURELIAN. Et g' iray voulentiers, ma bele;
Devant alez.
LA DAMOISELLE. Je vois. Chiére dame, or parlez
A cest homme que vous amaine;
Venuz est en vostre demaine
Par vostre mant.
CLOTILDE. Sa, sire, traiez vous avant.
Ysabel, alez un po hors:
De conseil vueil a ce bon corps
Un po parler.
LA DAMOISELLE. Donques m' en vueil de ci aler,
Sanz plus estre y.
AURELIAN. Ce sac derrier cest huis ici
Vueil jus laissier.
CLOTILDE. Dites me voir, mon ami chier,
Quelle cause vous a fait mettre
En estat que semblez povre estre,
Ne pour quoy, voir m' en soit retrait,
Mon mantel arriére avez trait?
Dites le moy.
AURELIAN. Se vous voulez savoir pour quoy,
Chiére dame, en un lieu secré
Nous mettez, ou par vostre gré
Parlons ensemble.
CLOTILDE. Vous pouez bien ci, ce me semble,
Seurement a moy parler:
N' y verrez venir ny aler
Homs qui soit vis.
AURELIAN. Dame, mon chier seigneur Clovis,
Qui est homme de grant puissance
Et tele qu' il est roy de France,
M' envoie faire vous savoir
Qu' il lui plaist vous a femme avoir;
Et pour ce qu' avec li vous voie,
Vezci, dame, qu' il vous envoie,
Par amour, sanz plus preeschier,
Son annel d' or qu' avoit moult chier
Et vestemens dont atournée
Serez, quant serez s' espousée,
Que je vous bailleray aussi. <Ici va querre son sac.>
Egar! qui m' a osté de ci
Un sachet qu' i avoie mis?
Ceens n' ay pas trop bons amis,
Se l' ay perdu.
CLOTILDE. Esbahi et tout esperdu
Vous voy, ce me semble, ami doulx.
Qu' avez perdu? dites le nous
Appertement.
AURELIAN. Ici, ma dame, vraiement
Avoie laissié un sachet;
Et sachiez, pour voir, dedans est
Ce que presenter vous cuidoie
Et que mon seigneur vous envoie
Par grant amour.
CLOTILDE. Venez ça, venez sanz demour,
Ysabel: avez vous osté
De ci le sac, en verité,
De ce bon homme?
LA DAMOISELLE. Dame, oil; ore sachiez conme:
De vostre chambre me parti,
Car je doubtay, quant je le vi,
C' on n' en feist torchon a piez,
Pour ce qu' il est et sale et viez.
L' iray je querre?
AURELIAN. Oil, m' amie. Helas! quant j' erre,
Je boute ens, ce sachiez, pour voir,
Ce que puis pour ma vie avoir.
Que je le raie.
LA DAMOISELLE. Si aras tu, ne t' en esmaie,
Amis: querre le voie en l' eure.
Tenez, je n' ay pas fait demeure
De l' apporter.
AURELIAN. De courroux me vueil deporter,
Puis que j' ay mon sac. Grans merciz,
Dame: en paix est mon cuer rassis,
Par vous, m' amie.
CLOTILDE. Isabel, icy ne vueil mie
Que plus soiez: pensez d' aler.
Encore a cest homme parler
Un petit vueil.
LA DAMOISELLE. Dame, je feray vostre vueil;
De cy me part.
AURELIAN. Tenez et mettez d' une part,
Chiére dame, ces vestemens:
Ce seront voz aournemens
Le jour que serez mariée;
Au roi plaist ainsi et agrée
Que le faciez.
CLOTILDE. En ce sac, amis tout laissiez;
Je sçay bien conment j' en feray.
Mais, biau sire, je vous diray:
Au roy Clovis vous en irez
Et si le me saluerez.
Et après li dites ce point:
"Clotilde dit qu' il ne loist point
Crestienne estre a paien femme,
Pour quoy c' est une chose infame."
Nient moins gardez que ceste chose
A nul homme ne soit desclose,
Car ce qu' a mon seigneur plaira
Mon oncle faire fait sera,
A brief parler.
AURELIAN. De vous a tant pour m' en raler,
Chiére dame, congié prendray.
Mon seigneur vous salueray,
Et si li conteray de fait
Tout ce qu' avons ci dit et fait.
J' en vois huymais.
CLOTILDE. Vostre chemin aler en pais
Puissiez, amis!
AURELIAN. Grant piéce et longue a faire ay mis
La besongne a quoy je tentoye;
Or est faite, dont j' ay grant joye.
Huchon, de ci nous fault partir.
Cest habit ci vueil desvetir
Et moy remettre en mon estat;
De ma robe autre sanz restat
Vestir me fault.
L' ESCUIER. Vez la ci, sire, sanz deffault;
Tenez, vestez.
AURELIAN. Or ça! puis que suis aprestez,
Pren cest habit de pelerin,
Et si nous mettons a chemin
D' aler en France.
L' ESCUIER. Pour moy ne faites detriance;
Mouvez: tout cecy prenderay
Et soubz mon bras l' emporteray
Avecques nous.
AURELIAN. Mon chier seigneur, de noz diex touz
Aiez si l' amour et la grace
Que tout le monde honneur vous face,
Qu' a roy vous tiengne.
CLOVIS. Aurelian amis, aviengne
Ce qui en pourra avenir.
Je ne puis pas roy devenir
De tout le monde n' estre sire:
Laissons ester; vueillez me dire,
Puis que vous venez de Bourgongne,
Qu' avez vous fait de ma besongne?
Dites le moy.
AURELIAN. Voulentiers, chier sire, par foy.
A Clotilde m' en sui alé
Conme un povre, et si ay parlé
A elle assez de vostre fait,
Et si li ay le present fait
De l' annel et des draps de pris,
Et vous di, sire, elle a tout pris;
Mais elle m' a dit une chose
Qu' il convient que je vous expose,
Mais secré soit. Vezci le point:
Elle m' a dit qu' il ne loist point
(Combien que c' est chose possible,
Toute voie n' est pas loysible)
Que crestienne se varie
Tant qu' a un paien se marie;
Nient moins m' a dit ce que voulra
Son oncle faire elle fera,
Qui est homme de grant value.
Oultre, sire, elle vous salue
Moult de foiz, la bonne et la belle;
Et certainement je croy qu' elle
Vous a bien chier.
CLOVIS. Aurelian, sanz plus preschier,
Huymais de ceci me tairay.
Seons ci: je m' aviseray
Qu' en pourray faire.
CLOTILDE. Doulx Jhesu Crist, roy debonnaire,
Sire, qui congnoys les pensées,
Les presentes et les passées,
Quoy qu' a marier me consente
A Clovis, si est c' en l' entente
Que je le puisse a ce mener
Qu' il se face crestienner.
Ha! sire qui es touz parfaiz,
Je te pri, mon desir parfaiz.
S' il est ainsi qu' il esconviengne
Que le mariage s' aviengne,
Sire, par qui les choses bonnes
Se font, ceste grace me donnes
Que le puisse faire venir
A baptesme et ta loy tenir.
Ne te vueil ore plus prier.
Ces vestemens, sanz detrier,
Vueil mucier; mais cest annel d' or
Mettray de mon oncle ou tresor,
Ains que face mais autre chose.
Temps est maishuy que me repose:
J' ay fait mon fait.
CLOVIS. Aurelian, trop mal me fait
Ce que sui tant en cest estat.
Encore, sanz plus de restat,
Te convient en Bourgongne aler
A Gondebaut le roy parler
Et sa niepce pour moy requerre;
Si te pri qu' aprestes ton erre,
Sanz plus ci estre.
AURELIAN. Par les diex qui me firent naistre,
Sire, voulentiers le feray,
Et dès maintenant mouveray,
Puis qu' il vous haitte.
CLOVIS. Vas et pense conment soit faicte
La chose sanz point de delay;
Que je tien, s' espousée l' ay,
J' en seray miex.
AURELIAN. Je vous conmant a touz noz diex;
Ne vous quier cy plus tenir resne.
Huchon, nous fault raler ou regne,
Voir, de Bourgongne.
L' ESCUIER. Puis qu' a faire y avez besongne,
Qu' aler vous y fault, sire doulx,
Soit pour un autre ou soit pour vous,
De cuer iray.
AURELIAN. Alons men; je ne fineray
Si seray la.
CLOVIS. Seigneurs, Aurelian s' en va
En Bourgongne pour ma besongne:
Alez après li sanz eslongne
Et faites que vous l' attaingniez.
Je vueil que vous l' acompaigniez,
Car de li me suis appensez
Qu' il maine trop po gens d' assez;
Alez après.
DEUXIESME CHEVALIER. Appareilliez sommes et près
De faire ce que conmandez,
Chier sire; et se plus demandez,
Fait vous sera.
TROISIESME CHEVALIER. Sire, en la ville ou il jerra
Ennuit jerrons, s' il plaist a Dieu;
Et vous promet en quelque lieu
Qu' il voulra aler nous irons
Et compagnie li ferons
De vouloir fin.
DEUXIESME CHEVALIER. Alons men. Vezci le chemin
Qu' i nous fault tenir sans cesser.
Ne nous est mestier du laisser;
Marchons, or sus!
TROISIESME CHEVALIER. Avis m' est que le voy lassus
Devant nous, ou ne se faint pas
D' aler: avançons nostre pas
Pour estre a li.
DEUXIESME CHEVALIER. C' est bien dit, et je sui celui
Qui voulentiers m' avanceray. <Ici vont un po.>
Ho, sire! arrester le feray,
Puis que de li sommes si près.
Ne soiez d' aler si engrès,
Aurelian, arrestez vous,
Biau sire, et si parlez a nous,
Mais qu' il vous plaise.
AURELIAN. E! mes amis, je suis bien aise,
Voire, et bien liez quant je vous voy.
Ou alez vous? dites le moy,
Je vous en pri.
TROISIESME CHEVALIER. Je le vous diray sanz detri;
Alons men touz jours nostre voie.
Le roy avec vous nous envoie
Et veult que nous aillons ensemble;
Et la cause est car il li semble,
Quoy qu' il vous ait son fait commis,
Qu' a trop po gent vous estes mis
En ce voiage.
DEUXIESME CHEVALIER. Il a fait com vaillant et sage;
Laissons en pais.
AURELIAN. Voire, nous approuchon huymais
De la ou nous devons aler,
Seigneurs, et si me fault parler
A tel homme qu' est Gondebaut,
Le roy, qui est et sage et caut,
Je vous dy bien.
TROISIESME CHEVALIER. Aurelian sire, je tien
Que vous le sarez moult bien faire
Et sanz riens en parlant meffaire
Vostre raison.
DEUXIESME CHEVALIER. Paix maishui! vez la sa maison:
Alons nous y de fait bouter
Sans nous de li de riens doubter
D' avoir desroy.
AURELIAN. Soit! je voys devant. Sire roy,
Mahon qu' avez com Dieu servi
Vous ottroit qu' aiez deservi
S' amour avoir!
GONDEBAUT. Bien veignes tu. Fais me savoir:
Qui es tu ne de quelle terre,
Ne que viens tu ci endroit querre?
Ne me mens pas.
AURELIAN. Ce vous diray j' isnel le pas.
Sire, Clovis, le roy de France,
Qui est un roy de grant puissance,
Vous demande sanz point d' oultrage
Clotilde avoir par mariage,
Qu' est vostre niepce.
GONDEBAUT. Seigneurs, se ja ne vous meschiéce,
Considerez l' entencion
Et regardez l' occasion
Que Clovis encontre moy quiert,
Qui ma niéce a femme requiert,
C' onques ne cognut en sa vie.
De nous courir sus a envie,
Ce puis je pour voir affier;
Et tu es venuz espier
Quel pais j' av, je te dy voir,
Soubz l' ombre que demande avoir
Clovis femme c' onques ne vit.
Ne scé de quele vie il vit;
Mais va t' en, et si li denonces
Que quanque me diz et ennonces
Je repute et tiens a frivoles,
Et ne sont toutes que paroles
De tricherie.
AURELIAN. Sire, ne vous celeray mie,
Mon chier seigneur, Clovis le roy
Si vous mande ainsi de par moy,
S' ainsi est que vous li vueilliez
Donner, un lieu appareilliez
Ou Clotilde a espouse prengne;
Se vous ne voulez qu' il aviengne,
De par li vous dy que bien tost
L' arez ici, li et son ost,
Pour vous combatre.
GONDEBAUT. Et je le saray bien debatre,
S' il vient ici, et tant feray
Que le sanc de ceulx vengeray
Qui par li ont esté occis.
Malement est son cuer assis
En grant orgueil.
PREMIER CONSEILLIER. Chier sire, un mot dire ici vueil;
Mais, seigneurs, traiez vous arriére
Un petit jusques la derriére.
S' il vous plaist, vous m' escouterez:
A voz menistres enquerrez
Et a voz chamberlans aussy
S' il scévent riens qu' il soit ainsi
Que Clovis ait par dedeça
Envoié dons ore ou pieça
Par ses legaz et par engin,
Qu' il ait pensé qu' a ceste fin
Il ait sur vous occasion
De venir a s' entencion:
C' est que son subjet doiez estre
Et vostre regne a li soubzmettre;
Je vous di voir.
DEUXIESME CONSEILLIER. Voire, que vous devez savoir,
Sire, que quant Clovis s' aire
Il forcene, ce vous puis dire,
Conme un lion bien attené;
N' il n' est homme de mére né
Qui ne le doubte.
GONDEBAUT. Ytier, vien avant et m' escoute
Longuement as a moy esté:
Scez tu point, par ta verité,
Qu' envoié m' ait nul don Clovis?
Se tu me mens, il est touz viz:
Bien le saray.
CHAMBERLANC. Mon chier seigneur, voir vous diray
De ce que vous me demandez,
Puis que vous le me conmandez.
Je vous jur par Mahon, mon dieu,
C' onques en place ny en lieu
Ne fu ou riens vous envoyast
Clovis ne chose ne vous donnast
Qui vaulsist un povre harenc;
S' ay j' esté vostre chamberlenc,
Il a ja des ans plus de vint,
Que l' office premier me vint
De vostre grace.
GONDEBAUT. Biaux seigneurs, or tost sanz espace
Alez en mes tresors savoir
Se du sien y puet riens avoir
Qui par quelque voie y soit mis,
Et m' en rapportez, mes amis,
Ce qu' en sarez.
PREMIER CONSEILLIER. Chier sire, ja mains n' en arez.
Alons men faire son vouloir;
De riens n' en pouons pis valoir,
Mais de tant miex.
CHAMBERLANC. Vous dites voir, par touz noz diex!
Alons men ceste foiz premiére
Garder ou tresor la derriére
Nous touz ensemble.
DEUXIESME CONSEILLIER. Alons, c' est le miex, ce me semble,
Isnellement.
PREMIER SERGENT. Mon chier seigneur, trop malement
Vous voy, ce me semble, pensis
Depuis que vous fustes assis
Illeuc, chier sire.
GONDEBAUT. Je pense a ce qu' ay oy dire,
Que Clovis veult venir sur moy;
Mais, s' il vient, mal sera pour soy,
Je te dy bien.
DEUXIESME SERGENT. Certes, mon chier seigneur, je tien
Qu' il n' y venra, pas n' en doubtez;
Et s' il y venoit, escoutez,
Ne l' ara il pas d' avantage;
Car vous arez tant de barnage
Et de sodoiers compaignons
Et Alemans et Bourguignons,
Que je tien tout biau li sera
Quant retourner il s' en pourra
A sauveté.
GONDEBAUT. Par Mahon, tu dis verité.
Ester laissons.
PREMIER CONSEILLIER. Chier sire, a vous nous radressons.
Nous venons de vostre tresor
Cerchier: sachiez q' un anel d' or
Ou est escript le nom Clovis,
Et son corps pourtrait et son vis
Y est moult bien taillié aussi,
Y avons trouvé; vez le cy:
Regardez, sire.
GONDEBAUT. Or entendez que je vueil dire:
Je suppose qu' en verité
Ma niéce ne l' i ait bouté.
Si vous diray que nous ferons:
Cy devant nous la manderons
Et sarons s' elle nous dira
Que mis ou non elle l' ara
Ou pris l' avez.
CHAMBERLANC. Mon chier seigneur, bien dit avez:
Ainsi soit fait.
GONDEBAUT. Vaz la me querre, vaz de fait;
Dy que la mande.
PREMIER SERGENT. Je vois. Vostre oncle vous demande,
Dame, qui querre vous envoie;
Faites que devant li vous voie
Appertement.
CLOTILDE. Je sui toute preste: alons ment.
Chier oncle, qui me demandez,
Vez me cy preste: conmandez
Vostre plaisir.
GONDEBAUT. La verité savoir desir
Qui ç' a fait qui en mon tresor
A mis un annel qui est d' or
Ou est l' image de Clovis
Et son nom, si com m' est avis.
Scez tu qui ce peut avoir fait?
Touz esbahiz sui de ce fait
Et trespensez.
CLOTILDE. Mon chier seigneur, j' en scé assez
Que vous diray, mentir n' en quier.
Il a ja plus d' un an entier
Que roy Clovis, sanz guerredon,
Drapz d' or vous donna en pur don,
Qu' envoia par certains messages,
Qui me semblérent hommes sages;
Cel annel ou doy me boutérent
Et de par li le me donnérent.
Cel annel, pour ce qu' estoit d' or,
Je le mis en vostre tresor
Certainement.
GONDEBAUT. Ce fu fait assez nicement
Et sans conseil, que tu deusses
Avoir pris, se nul bien sceusses;
Mais, puis que, sanz moy appeller,
La chose fault ainsi aler,
Aviengne qu' en peut avenir.
Faites ces messages venir,
Que je la voy.
DEUXIESME CONSEILLIER. Voulentiers, sire, en bonne foy.
Seigneurs, or tost! venez bonne erre
Au roy, qui vous envoie querre;
Delivrez vous.
DEUXIESME CHEVALIER. Puis qu' il li plaist, si ferons nous
Sanz point attendre.
TROISIESME CHEVALIER. Sire, en desdain ne vueillez prendre
Nostre demeure.
GONDEBAUT. Nanil, assez venez a heure;
Mais ce que vueil dire entendez:
Ma niéce a avoir demandez
A femme pour Clovis le roy,
Qui secretement par desroy
Ly a envoié par ses gens
Son annel et vestemens gens
De drap d' or et sanz mon sceu,
Par quoy la fille a deceu:
Pour ce, seigneurs, je la vous livre
Et d' elle du tout me delivre.
Amenez l' en ysnel le pas,
Et si ne vous attendez pas
Que je li face compagnie
Ne gent nule de ma mesnie;
Nanil, sanz faille.
AURELIAN. Que nulz, sire, aussi s' en traveille
N' est ja mestier, s' il ne vous haite;
S' en soit vostre voulenté faite.
Et, s' il vous plaist, nous en irons
Et la damoiselle en menrons
Au roy de France.
GONDEBAUT. Faites ent a vostre ordenance:
D' elle ne me quier plus mesler.
Voit ou elle pourra aler,
Riens n' y aconte.
DEUXIESME CHEVALIER. Sire, sanz plus faire ici compte,
De vous prenons congié, c' est fin;
A Mahon et a Appolin
Vous conmandons.
TROISIESME CHEVALIER. Puis qu' avons ce que demandons,
Ne nous fault penser que d' aler.
Alons monter, sanz plus parler,
Nostre espousée.
AURELIAN. Vostre monture est ordenée,
Dame; ne vous soussiez mie,
Et s' arez bonne compagnie
De nous trestouz.
CLOTILDE. Vostre merci, mes amis doulx;
Et j' espoir que le temps venra
Que guerredonné vous sera,
Se j' onques puis.
AURELIAN. Seigneurs, escoutez moy: depuis
Deux jours pour certain j' ay sceu
Que le roy Clovis est meu
De Paris et va a Soissons:
Si fault que le chemin laissons
De Paris, quant serons monté,
Et qu' a Soissons droit la cité
Aillons a li.
DEUXIESME CHEVALIER. Bien est; n' y a de nous celi
Qui ne le face voulentiers.
Alons monter endementiers
Qu' avons espace.
TROISIESME CHEVALIER. Et n' est il pas bon c' on li face
Savoir, afin qu' il ne s' eslongne,
Ce qu' avons fait de sa besongne?
Qu' en dites vous?
AURELIAN. Si est, par foy. Mon ami doulx,
Je vous suppli, s' il vous agrée,
Sanz faire autre lettre secrée,
Que devant nous vous en ailliez
Et l' estat dire li vueilliez
De nostre fait.
TROISIESME CHEVALIER. Voulez vous? il vous sera fait,
Et me peneray d' avancier;
Pensez de vous y adressier
Plus que pourrez.
DEUXIESME CHEVALIER. Tant ferons que nouvelle ourrez
De nous, sire, et de nostre arroy,
Ains qu' avoir puissiez fait au roy
Vostre message.
TROISIESME CHEVALIER. Bien est. Sachiez, com fol ou sage,
Je vous dy, je ne fineray
D' aler tant qu' a li parleray.
Ici vous lais.
AURELIAN. Avant! alons penser huimais
De nous monter et de le suivre,
Si que le puissons aconsuivre
Brief et trouver.
TROISIESME CHEVALIER. Mahon, bien vous doy aourer
Quant venu sui par telle voie
Que le roy voy, dont j' ay grant joie,
Qui en sa majesté se siet.
A! que cel estat bien li siet!
D' aler parler a li me vent.
Sire, Mahon et Tervagant
Vous facent lié!
CLOVIS. Bien vegnant! Qui t' a conseillié,
Qu' ainsi seul viens?
TROISIESME CHEVALIER. Aurelian, sire, et les siens
Qui devant m' ont fait avancer
Pour vous compter et annoncer
Ce qu' avons fait.
CLOVIS. Vous ont rien Bourgongnons meffait
Ne bas ne hault?
TROISIESME CHEVALIER. Nanil, sire; mais Gondebaut
Vi courroucié et mal meu,
Et dist c' on avoit deceu
Sa niéce par son annel d' or,
Qu' elle avoit mis en son tresor.
D' autres choses voir vous dira
Assez, quant ci venu sera,
Aurelian; mais tant vous di
La fille amaine avecques li
Qu' avoir devez.
CLOVIS. Or me dites, se vous savez,
Quant ilz venront.
TROISIESME CHEVALIER. En ceste ville annuit seront,
Ou demain, sire, a la disnée;
Si que, s' il vous plaist et agrée,
En l' ostel ou doivent descendre
Iray veoir, sanz plus attendre,
Qu' il en peut estre.
CLOVIS. Oil, va t' en en paine mettre,
Sanz toy plus ci endroit tenir,
Et les fay touz a moy venir,
S' ilz sont venuz.
TROISIESME CHEVALIER. A voz grez faire suis tenuz,
Sire: je vois.
AURELIAN. Dame, je tien que puis deus mois
Et plus qu' avons ensemble esté,
Ne devez joie, en verité,
Tele conme huy avoir eu.
Et la raison qui m' a meu
De le vous dire, la vezci:
Je voy qu' en ceste ville ci
Nous alons, ou vous trouverez
Celui a qui femme serez,
Et qui tant vous honnourera
Que royne estre vous fera
De tel royaume conme est France,
Qui est, ce tien je sanz doubtance,
Plus renommée qu' autre terre:
Si qu' avançons, damme, nostre erre
D' aler ensemble.
CLOTILDE. Aurelian sire, il me semble
Que je voy la celui que vous
Aviez conmis d' aler pour nous
Devers le roy.
DEUXIESME CHEVALIER. Dame, voirement est, par foy:
Il a bien avancé son erre.
Je pense qu' il nous viengne querre.
Quel le ferons?
AURELIAN. Souffrez: venir ci le lairons;
Et quant avecques nous sera,
Ce qu' ara trouvé nous dira
De point en point.
TROISIESME CHEVALIER. Egar! je vous truis bien a point:
De devers le roy vien tout droit,
Qui m' a envoié ça endroit
Pour dire vous et annuncier
Que vous ne vueilliez pas laissier,
Puis qu' estes venuz en sa terre,
Que ne veigniez a li bonne erre
En son palais.
AURELIAN. D' aler a li a grant eslais,
Sire, nous estions ordenez:
Il fault qu' avec nous retournez
Sanz plus parler.
TROISIESME CHEVALIER. Ne pensez que de tost aller:
Je vous suivray.
AURELIAN. De Mahon qui nostre dieu vray
Est, mon seigneur, et qui valu
Vous a en mains lieux vous salu:
C' est de raison.
CLOVIS. Bien soiez en nostre maison
Venuz, et vous touz que cy voy
Assemblez. Or ça! dites moy,
Je vous em pri, mais qu' il vous siesse,
Est ce de Gondebaut la niéce
Que ci voy estre?
DEUXIESME CHEVALIER. Sire, sanz plus debat y mettre,
Oil, c' est elle.
CLOVIS. Bien puissez venir, damoiselle!
De vostre venue ay grant joie.
Puis que vous devez estre moie
Et que vostre mari seray,
De France vous ordonneray
Royne et dame.
CLOTILDE. Chier sire, au sauvement de l' ame
De vous, premier, et puis de moy
Soit fait ce que dire vous oy,
Non autrement!
CLOVIS. Or tost, seigneurs, appertement:
Faites qu' en sa chambre menée
Soit la derriére et ordenée
Conme une espousée doit estre,
Car de l' espouser entremettre
Me vueil en l' eure.
AURELIAN. Sire, nous ferons sanz demeure
Ce qui vous plaist a demander.
Dame, venez ent sanz tarder
En vostre chambre, ou vous menrons,
Et puis nous en retournerons
Arriére ici.
CLOTILDE. Mes chiers amis, soit fait ainsi
Plainement com vous divisez.
Ysabel, et vous me suivez,
M' amie chiére.
LA DAMOISELLE. Voulentiers, dame, a lie chiére.
Alez devant, après iray;
A atourner vous aideray:
C' est de raison.
CLOVIS. Seigneurs, j' ay de dire achoison
Que mon bien et mon honneur croist,
Dont en mon cuer joie s' acroist,
Puis que j' aray ceste pucelle,
Qui m' a semblé merveilles belle
En son visage.
DEUXIESME CHEVALIER. Depuis qu' emprismes le voyage,
Sire, de la vous amener,
Ne me puis pas garde donner
Qu' aie en li veu contenance,
Parole, fait ny ordenance
Ne maintien, ce vous jur par m' ame,
Fors que de bonne et sage dame
Et treshonneste.
AURELIAN. Mon chier seigneur, ma dame est preste,
Ce vous puis je bien annoncier;
D' espouser vous faut avancier,
Car temps en est.
CLOVIS. Puis qu' est preste, aussi suis je prest.
Alons sanz nous plus ci tenir.
Faites les menestrelz venir
Ci devant nous.
PREMIER SERGENT CLOVIS. Tantost sire. Delivrez vous,
Seigneurs, mettez vous en arroy
De mener espouser le roy;
N' atent que vous.
LES MENESTREZ. Nous y alons, mon ami doulx,
Quanque pouons.
TROISIESME CHEVALIER. Vez lez cy: sus! or en alons,
Sire, il est heure.
CLOVIS. Alons men sanz plus de demeure;
Je vois devant.
DEUXIESME CHEVALIER. Et nous touz vous irons suivant
Par compagnie. <Ici s' en va hors de sa place, et, une petite intervalle faite, s' en revient en la sale; et Aurelian li maine l' espousée et dit:>
AURELIAN. Sire, vez ci vostre partie
Que vous amaine et que vous lais.
Vostre femme est dès ore mais,
Nul autre n' y peut droit clamer:
Or pensez de vous entre amer,
Que c' est un fait tresnoble et sage
De vivre en paiz en mariage
Et en amour.
CLOVIS. Sanz faire cy plus de demour,
Je vueil qu' entre vous trois ailliez
Au Louvre, et la m' appareilliez
Ce qui fault pour faire ma feste:
Il y a bon lieu et honneste,
Et si est près.
TROISIESME CHEVALIER. Chier sire, nous sommes touz prestz
D' aler ordener la besongne.
Alons men touz trois sanz eslongne,
Partons de cy.
AURELIAN. Alons de ci; muser aussi
N' est temps huismais.
CLOTILDE. Mon chier seigneur, dès ore mais
Me tien pour vostre chamberiére.
Je vous pri ceste foiz premiére,
Chier sire, q' un don m' octroiez
Et ce que je demande oiez
Et me soit fait de vostre grace
Avant que service vous face
Tel conme est tenue de faire
Femme a son mari, sanz meffaire,
Quant il leur plaist.
CLOVIS. Demandez, Clotilde: a court plait,
Je le feray.
CLOTILDE. Ma requeste donc vous diray,
Sire. De vostre or point ne quier;
Mais premiérement vous requier
Qu' en Dieu le pére vueilliez croire,
Qui sanz fin regne ou ciel en gloire,
Qui vous crea et qui tout fist
Et qui onques rien ne meffist.
Après, sire, pas ne laissez
Jhesu Crist; mais le confessez
Vray Dieu, fil de Dieu le pére estre,
Qui ça jus voult de vierge naistre
Et y fu du pére envoiez
Pour nous estre a Dieu ravoiez,
Et qui nous a, c' est verité,
Par sa sainte mort racheté.
Oultre, je vous requier ainsi,
Saint Esperit creez aussi,
Qui touz les justes enlumine
Et conferme en grace divine;
Et que ces trois, péres et filz
Et saint esperit, soiez fiz,
Sont une seule majesté,
Une essance, une deité,
Une pardurable puissance:
Ce tenez par ferme creance,
Et vos ydoles delaissez
Et d' aourer les vous cessez,
Car vanitez sont et faintises;
Mais, sire, les saintes eglises
Qu' avez ars et fait destablir
Faites refaire et restablir,
Et soiez de Dieu filz et membre.
Après vous requier qu' il vous membre
De demander ma porcion
Qu' avoir de la succession
Doi par droit de pére et de mére,
Que fist morir de mort amére
Mon oncle, qui tant desvoya
Que mon pére occist, et noya
Ma mére pour le regne avoir
De Bourgongne, je vous dy voir;
Et Diex vueille que l' eure voie
Que de leur mort vengée soie,
Et briefment, sire.
CLOVIS. Clotilde, entendez que vueil dire:
D' une chose ci me touchiez
Trop fort a faire, ce sachiez,
Que j' aoure con crestien
Vostre Dieu. Je n' en feray rien;
Mais l' autre chose vous feray:
De Gondebaut vous vengeray
Briefment, et le vous menray si
Qu' il venra requerre mercy,
Vueille ou ne vueille.
CLOTILDE. Tout avant, ce que vous conseille,
Vous pri, chier sire, que faciez:
A voz ydoles renonciez
Et vueilliez Dieu croire et amer
Qui le ciel fit, air, terre et mer,
Femmes et hommes.
CLOVIS. Je n' y aconte pas deux pommes
En ce que dites.
DEUXIESME CHEVALIER. Tenir nous devez bien pour quittes,
Chier sire, de vostre appareil:
Tel l' avons fait c' onques pareil
Je ne vi faire.
CLOVIS. Laissons en pais, il m' en fault taire;
Tendre a autre chose me fault.
Entre vous trois a Gondebaut
Vueil qu' ailliez tost sanz contredire,
Et de par moy li direz: "Sire,
De par Clovis, de qui tenons,
Terres et fiez, ici venons,
Et vous dirons pour quoy bonne erre:
Demander venons et requerre
Le tresor Clotilde qu' avez,
Et qu' avoir doit, vous le savez,
De la succession son pére
Et de celle de par sa mére:
C' est de raison."
TROISIESME CHEVALIER. Sire, sanz plus d' arrestoison
Ferons vostre conmandement.
Or avant, seigneurs, alons ment
Touz trois ensemble.
DEUXIESME CHEVALIER. C' est bien a faire, ce me semble,
Mettre de nous paine greigneur
Au fait de nostre chier seigneur
Que d' un estrange.
AURELIAN. Son fait de tout autre s' estrange,
Et est trop plus noble et plus hault.
Cessez vous; la voy Gondebaut.
Alons men, parler vueil a li.
Mahon, sire, qui est celui
Qui les biens de terre fait croistre,
En honneur et en joie accroistre
Vous vueille et brief!
GONDEBAUT. Et aussi te gart de meschief!
Que viens tu querre?
AURELIAN. Sire, nous vous venons requerre
Que la porcion delivrez
Des tresors et la nous livrez
Qu' a Clotilde sont et partiennent,
Et de la succession viennent
Tant de son pére com de mére;
Voulenté ne devez amére
Du faire avoir.
GONDEBAUD. Conment! mon regne et mon avoir
Cuide avoir donc ainsi Clovis?
Nanil, tant com je soie vis.
Ne scez tu pas, Orelian,
Que deffendu t' ay dès ouan
A plus venir en ceste terre
Pour le mien demander ne querre?
Je te jur, se ne t' en retournes
Et d' aler t' en bien tost t' aournes
De devant moy, je t' occirray;
Ja autre n' y attenderay.
Vuide, va t' en.
AURELIAN. Roy, je vous dis bien dès anten
Que tant com mon chier seigneur vive,
Clovis le roy pour qui j' estrive,
De rien voz menaces ne crieng,
Car je fas mon devoir, ce tieng.
Par moy le tresor vous demande
De sa femme avoir, et vous mande
Quant voulrez dire qu' il l' ara.
Ordenez lieu, et il venra
Ou vous direz.
PREMIER CONSEILLIER. Sire, s' il vous plaist, vous ferez
Ce que diray.
GONDEBAUT. Or dites, et je vous orray
Qu' en voulez dire?
PREMIER CONSEILLIER. Aurelian, traiez vous, sire,
Un po en sus.
AURELIAN. Sire, moult voulentiers. Or sus,
Parlez ensemble.
PREMIER CONSEILLIER. Chier sire, vezci qui me semble:
Que Clovis raison vous requiert,
Se, pour sa femme, a avoir quiert
Ce qu' elle avoir peut de tresor;
De vostre argent et de vostre or
Li soit par son legat tramis
Tant que vous soiez bons amis
Et que Clovis en ceste terre
Ne viengne pour nous faire guerre,
Car François sont cruex forment
Et le font touz jours vaillamment,
Vous le savez.
DEUXIESME CONSEILLIER. Certes, sire, voir dit avez:
De guerre sont sages et fors,
Et ont gangnié par leurs effors
Mainte ville et maint bon chastel,
Si que c' est pour vous le plus bel
Que de ce qui li appartient
Ly envoiez, il esconvient,
Le satisfait.
GONDEBAUT. Or avant: il vous sera fait,
Puis que vous me le conseilliez.
Aurelian ici vueilliez
Faire venir.
DEUXIESME CONSEILLIER. En l' eure, sanz plus plait tenir,
Sera ci, de voir le tenez.
Aurelian amis, venez
A Gondebaut.
AURELIAN. Alons, je feray de cuer baut
Quanque direz.
DEUXIESME CONSEILLIER. Sire, d' Aurelian ferez
Vostre ami, que ci vous amaine,
Et lo que du vostre demaine
Li soit livré conme a message
De Clovis, vous ferez que sage,
Tant que content Clovis se tiengne,
Et que guerroier ne vous viengne:
Je le conseil.
GONDEBAUT. Puis que le dites, je le vueil.
En l' eure, amis, serez delivre.
Tenez, premiérement vous livre
Ces draps d' or et ceste vaisselle
D' argent, qui est et bonne et belle;
Après, cest or sanz deporter
Ferez monnoié emporter,
Ces poz aussi, ces coulpes d' or;
N' y a mais riens en mon tresor.
A tant de moy vous deportez;
Car a vostre seigneur portez
Et joiaux et biens plus assez
Qu' il n' a ne gangniez n' amassez,
Ce vous puis dire.
AURELIAN. Clovis est com vostre filz, sire:
Pour ce voz biens communs seront,
Ainsi par pais le diront
Gens de raison.
TROISIESME CHEVALIER. Paiz! il est de raler saison:
Sire, de vous congié prendrons
Et d' aler en France tendrons;
Il en est temps.
PREMIER CONSEILLIER. Mon seigneur n' i met nul contens:
Alez vous ent quant vous plaira;
Il ne vous y contredira,
Sachiez, de rien.
DEUXIESME CHEVALIER. Certes, sire, je le croy bien.
Or ça, sanz nous plus deporter,
Ces joiaulx nous fault emporter,
Et quant en nostre hostel venrons,
Sur deux sommiers les trousserons
Jusques en France.
AURELIAN. Or le faisons sanz delaiance
Et n' y ait plus dit ne songié.
Chier sire, par vostre congié
Nous en alon.
GONDEBAUT. Alez. J' ay plus chier le talon
Que les visages.
AURELIAN. Biaux seigneurs, faisons conme sages:
Alons nous maishui reposer
Et ces joiaus en sauf poser,
Et demain matin les ferons
Trousser, tant qu' a Paris serons,
Au roy Clovis.
TROISIESME CHEVALIER. Alons; que, selon mon avis,
Vous dites bien.
CLOTILDE. Mon treschier seigneur, e! combien
Que vous aie requis souvent
Qu' eussiez talent et convent
A Dieu du ciel de devenir
Crestien et sa foy tenir,
Et de ce ne voulez rien faire,
Pour ce que vous doubtez meffaire,
Je vous di, se ne l' aprenez
Et que soiez crestiennez,
Venir ne pourrez en la gloire
Des cieulx, ceci est chose voire,
Mais vous mettez en aventure
D' estre sanz fin en paine dure:
Si vous pri, sire, aussi que moy
Prenez la crestienne loy,
Je le vous lo.
CLOVIS. Dame, ne m' en parlez plus ho!
Rien n' en feray.
CLOTILDE. Non, sire? Donques me tairay
Pour maintenant, vaille que vaille.
Han! certes, il fault que m' en aille
De ci en ma chambre, chier sire.
Par les reins sanz tant de martire
Que trop. Faites tost, Ysabel;
Or en alons ensemble isnel:
Ne puis plus ci.
LA DAMOISELLE. Alons, dame; ne vous desdy
De chose que faire vueilliez.
Certainement vous traveilliez
De mal d' enffant, si con je pens.
Vezci vostre chambre: entrez ens
En la bonne heure.
AURELIAN. Seigneurs, sanz plus faire demeure
Soit a Clovis l' avoir porté
Qu' avons de Bourgongne apporté,
Car raison est.
DEUXIESME CHEVALIER. C' est mon: d' aler y sui tout prest,
Si estes vous.
TROISIESME CHEVALIER. Vous dites voir, mon ami doulx;
Mais se, sanz porter li l' avoir,
Nous li alons faire savoir,
Je croy, certes, qu' il souffira;
Et puis querre l' envoiera,
Se bon li semble.
DEUXIESME CHEVALIER. C' est voir; alons men touz ensemble
Par devers li.
AURELIAN. Alons, seigneurs; je suis celi
Qui a vostre dit me consens.
Chier sire, honneur et grace et sens
Acroisse en vous par sa bonté
Mahon, qui est en deité
Regnant sanz fin!
CLOVIS. Bien veigniez touz, vous mi affin.
Or ça! conment va la besongne?
Que dit Gondebaut de Bourgongne?
Dites le moy.
AURELIAN. Sire, il ne dit que bien, par foy,
Et s' est a raison avoié,
Car il vous a, sire, envoié,
Ce tieng, le plus de son tresor
En vaisselle d' argent et d' or,
Et en grans sas plains de florins
Et en poilles riches et fins
D' or et de soie.
DEUXIESME CHEVALIER. Mais que de vous escoutez soie,
Sire, je vous diray tout voir:
De ce tresor et cel avoir
Ne nous sommes pas deporté
Que tout ne l' aions apporté
Avecques nous.
TROISIESME CHEVALIER. Chier sire, il dit voir, et a vous
Entiérement rendu sera
Toutes les foiz qu' il vous plaira
Le demander.
CLOVIS. Bien. Je le vueil sempres mander
Privéement.
AURELIAN. Baillié sera certainement
A ceulx que vous envoierez.
Gardez qui vous ordenerez
A venir y.
CLOVIS. N' en doubtez, si feray je, si.
Ore je vueil, sanz plus debatre,
Qu' alez souper et vous esbatre
Jusqu' a la nuit.
DEUXIESME CHEVALIER. Alons men, qu' il ne li annuit
Nous trop ci estre.
LA DAMOISELLE. Robert, il vous fault entremettre,
Je vous truis ici bien a point,
D' aler au roy, ne tardez point;
Dites li soit seur et fis
Que ma dame a eu un filz,
Qu' elle a volu si ordener
Qu' elle l' a fait crestienner,
Et est appellé Nigomire;
Et ne le prengne pas en ire,
Ce li prie elle.
L' ESCUIER. M' amie, de ceste nouvelle
Feray voulentiers le message.
G' y vois. Vous et vostre bernage
Tiengne Mahon en honneur, sire!
De par ma dame vous vieng dire,
Qui a vous moult se reconmande,
Q' un filz a eu, ce vous mande,
Qu' a son Dieu a voulu donner
Pour le faire crestienner;
Et est nommé, ce vous puis dire,
En son baptesme Nigomire,
Si conme on dit.
CLOVIS. Je n' y puis mettre contredit,
Puis que c' est fait. A li riras,
Et de par moy tu li diras
Qu' a l' enfant quiére telle garde
Qui le norisse et bien le garde
Songneusement.
ROBERT. Sire, vostre conmandement
Vois mettre a fin.
CLOVIS. Vous deux, je vous pri de cuer fin
Qu' a Aurelian a delivre
Alez dire que ce vous livre
Qu' il m' a apporté de Bourgongne,
Et revenez ci sanz eslongne;
Or faites brief.
PREMIER SERGENT CLOVIS. Treschier sire, qui qu' il soit grief,
Ce que vous conmandez ferons
En l' eure; plus n' attenderons
Pas ne demi.
DEUXIESME SERGENT CLOVIS . Vous dites voir, mon chier ami,
Mais qu' il le nous vueille livrer.
Alons savoir se delivrer
Le nous voulra.
PREMIER SERGENT CLOVIS. Je pense bien que si fera,
Puis que le roy nous y envoie.
Egar! je le voy la en voie
Et deux chevaliers; n' est pas seulx:
Avançons nous d' aler a eulx.
Sire, Mahon vous soit amis!
Le roy nous a a vous tramis
Et vous mande que vous bailliez
Pour li porter, et ne failliez,
Mais nous delivrez sanz eslongne
Ce qui est venu de Bourgongne
Par my voz mains.
AURELIAN. Mes amis, n' en arez ja mains.
Seigneurs, alons livrer bonne erre
A ces deux ce qu' ilz viennent querre,
Que Gondebaut baillié nous a.
Je vois devant. Mes amis, ça!
Tenez, troucez, portez au roy;
Nous nous metterons en arroy
D' aler après.
PREMIER SERGENT CLOVIS. Alons men, puis que sommes prestz;
Je n' y voy miex.
DEUXIESME SERGENT CLOVIS. Tenez, sire; par touz noz dieux,
Je ne fu onques mais portant
Chose qui me pesast autant
Com ceste a fait.
PREMIER SERGENT CLOVIS. Ce fais aussi: suer me fait
Et ens et hors.
DEUXIESME SERGENT CLOVIS. Chier sire, de touz les tresors
Gondebaut je vueil que sachiez
Touz les avez auques sachiez
Par devers vous.
TROISIESME CHEVALIER. Mahon scet la pene que nous
Y avons mis a l' apporter;
Vous vous avez biau deporter
Jusqu' a grant temps.
CLOVIS. Biaux seigneurs, escoutez: j' entens
Que la ville de Meleun
Et la duchié et le conmun
De tout le pais et des elles
Veulent a moy estre rebelles;
Si vous y vueil touz envoier:
Pensez de vous tost avoier
Pour les sousprendre.
CLOTILDE. Mon chier seigneur, je vous vien rendre
Graces de ce que vous m' avez
Mandé. Ne scé se le savez:
Nostre hoir qu' amoie de cuer fin,
Nigomire, est alé a fin
Et mis en terre.
CLOVIS. De ceste nouvelle me serre
Le cuer et ay douleur amére.
Vous avez trop hestive mére
Esté de le crestienner,
Et tien de vray, se dedier
L' eussiez fait, dame, quoy c' on die,
A mes diex, encor fust en vie;
Mais pour ce qu' a baptesme eu,
Je voy plus vivre n' a peu:
Dont mal me fait.
CLOTILDE. Chier sire, je rens de ce fait
Graces a Dieu quant m' a fait digne,
Qui sui sa petite meschine,
Qu' en sa gloire mon premier hoir
A deigné prendre et recevoir;
Et c' est la cause, ce sachiez,
Pour quoy de dueil mon cuer touchiez
N' en est en rien.
CLOVIS. Puis que le dites, or est bien;
A tant me tais.
AURELIAN. Sire, congié prenons huimais
De vous, et sanz nul contredit
Faire ce que nous avez dit,
Chier sire, alons.
CLOVIS. Alez: monstrez leur que valons
Et quelles gens sommes en guerre;
Et s' ilz veulent la paiz requerre
Et noz bons subjez devenir,
Si faites la guerre fenir
Par contrat et par ordenance
Qu' ilz seront touz soubz ma puissance
Dès ore mais.
DEUXIESME CHEVALIER. Bien, chier sire; alons men huymais
Sanz plus debatre.
CLOVIS. Ainçois que me voise combatre,
Dame, a Ville Juive iray,
Et la mes gens ordeneray
Et d' ilec m' en iray en l' ost;
Quant je revenray, tart ou tost,
Souffise vous.
CLOTILDE. Si fera il, mon seigneur doulx,
Quoy que vostre demour m' ennuye.
Je pri a Dieu qu' il vous conduye
Et vous ramaint par sa bonté,
Com je desir, a sauveté
D' ame et de corps.
CLOVIS. Mahon, mon Dieu, misericors
Me soit! Biaux seigneurs, or avant!
Pour voie faire alez devant
Moy, que le voie.
PREMIER SERGENT CLOVIS. Vuidiez de ci, faites nous voie,
Que ne vous fiére.
DEUXIESME SERGENT CLOVIS. Sus, devant! traiez vous arriére,
Donnez nous cy d' aler espace,
Ou je vous donray de ma mace
Certainement.
LA DAMOISELLE. Chiére dame, trop malement
Vous voy souvent muer couleur:
Aucun mal avez ou doleur,
Si com je pens.
CLOTILDE. Ysabel, m' amie, je sens
Par les rains, sachiez, tel angoisse
Qu' il m' est avis c' on les me froisse
Et que le dos par my me fent;
Ausi de mon premier enfent
M' avint, m' amie.
LA DAMOISELLE. Dame, ne vous decevez mie:
La ventriére mander vueilliez,
Que je tien que vous traveilliez
D' enfant, sanz doubte.
CLOTILDE. Je ne scé se ce seroit goute;
Mais, voir, je suis mal atournée.
Ha! mére Dieu, vierge honnourée,
Secourez moy!
LA DAMOISELLE. Pour certain, ma dame, bien voy
Que traveilliez: je vois bonne erre
Envoier la ventriére querre.
Puis que je vous truis ci, Robert,
D' aler querre soiez appert
Katherine, la sage femme;
Et que tantost viengne a ma dame,
Ceci li dites.
ROBERT. Ne cesseray s' en seray quittes,
Et la vous menray ains que fine.
La la voy aler. Katherine,
Parlez a moy.
KATHERINE. Voulentiers, biau sire, par foy:
Que me voulez?
ROBERT. Il fault qu' a la royne alez:
Je vous vien querre a grant besoing.
Venez vous en: ce n' est pas loing,
Ma suer, jusques la vous menray.
Entrez leens; cy vous lairay,
M' amie chiére.
KATHERINE. Diex y soit! Qu' est ce? quelle chiére,
Ma chiére dame?
CLOTILDE. Je sens de paine assez, par m' ame!
M' amie, en moy n' a ris ne jeu.
Aidiez moy, doulce mére Dieu,
Par vostre grace!
KATHERINE. Ma chiére dame, en po d' espace
Serez de vos griefs maux delivre.
Ne dites pas que je soie yvre;
Souffrir encore un po vous fault:
Je voy que serez sanz deffault
Delivre en l' eure.
CLOTILDE. Diex! quant sera ce? trop demeure
Ceste alejance a moy venir.
Vueille vous de moy souvenir,
Vierge Marie!
KATHERINE. Maishui ne vous debatez mie,
Dame: voz grans maux sont passez.
Demandez quel enfant avez,
Si ferez miex.
CLOTILDE. Puis qu' enfant ay, loué soit Diex,
Quoy que j' aye eu grant destresce.
M' amie, dites me voir, est ce
Ou fille ou filz?
KATHERINE. Seur soit vostre cuer et fiz
Que c' est un fiz, ma chiére dame.
Diex li octroit de corps et d' ame
Amendement!
CLOTILDE. Faites, couchiez m' appertement;
Et puis ce filz emporterez
Et crestienner le ferez,
Que je le vueil.
LA DAMOISELLE. Nous ferons du tout vostre vueil
En l' eure et de voulenté fine.
Prenez contre moy, Katherine,
Et dedans son lit la mettons.
D' elle maishuy ne nous doubtons,
Puis que couchiée est et couverte.
Pensons chascune d' estre apperte
De faire a cest enfant donner
Baptesme et li crestienner:
Il est raison.
KATHERINE. Si soit fait sanz arrestoison:
Nous deux alons men au moustier.
Porter le vueil: c' est mon mestier
Et mon office.
LA DAMOISELLE. De ce ne vous tieng pas a nice.
Tantdis que ma dame repose,
Delivrons nous de ceste chose
Faire briefment.
KATHERINE. Dame, je l' accors: alons ment
Au moustier droit. <Yci vont derriére, et puis viennent en sale.>
LA DAMOISELLE. Ralons nous en de cy endroit,
Katherine, j' en sui d' accort.
C' est bien a point: ma dame dort,
Et sue aussi.
KATHERINE. C' est bien. Or la laissons ainsi,
Tant que s' esveille.
LA DAMOISELLE. Je ne dy pas que ne le vueille
De vouloir fin.
CLOTILDE. E! sire Diex qui es sanz fin,
Quant d' enfant m' avez delivré,
Quelle paine qu' il m' ait livré,
De cuer humblement vous mercy
De l' enfant et du mal aussy
Que j' ay souffert.
KATHERINE. Chiére dame, lez vous couvert
Dort vostre filz le crestien;
Et est nommez, je vous di bien,
Clodomire.
CLOTILDE. Ore loez soit nostre sire
De ce qu' il a crestienté;
Mais que Dieu le tiengne en santé,
Il me souffist.
LA DAMOISELLE. Ma dame, celi qui le fist
Le laist bien vivre!
KATHERINE. Ma dame, puis qu' estes delivre
Et que je n' ay cy plus que faire,
Mais qu' il ne vous veuille desplaire,
Je m' en iray.
CLOTILDE. Bien soit! Alez; je penseray
D' envoier vous, m' amie chiére,
Une de mes robes entiére
Pour vostre paine.
KATHERINE. Chiére dame, en bonne sepmaine
Vous mette la vierge Marie!
Plus me ferez de courtoisie,
Et plus pour vous Dieu prieray.
Chiére dame, a Dieu vous diray
Pour maintenant.
CLOVIS. Sanz moy plus estre cy tenant,
Raler vueil, ains que mès je fine,
Savoir conment fait la royne.
Par ceste voie aler nous fault:
Gardez que n' aie pas deffault
De large voie.
PREMIER SERGENT CLOVIS. Non, non, que, se Mahon me voie,
Ou vous ferez devant nous place,
Ou vous sentirez se ma mace
Sera ligiére.
DEUXIESME SERGENT CLOVIS. Ne desservez pas c' on vous fiére:
Alez en sus.
CLOVIS. Puis qu' en mon palais suis, or sus!
Que je sache, par amour fine,
En quel estat est la royne
Par l' un de vous.
PREMIER SERGENT CLOVIS. Je vueil estre appert plus que touz:
Sire, g' i vois.
CLOVIS. Or va tost, foy que tu me dois,
Sanz arrestage.
PREMIER SERGENT CLOVIS. Chier sire, je n' en ay courage:
Tost seray venu et alé,
Mais que j' aie a elle parlé;
Et ce sera, sachiez, bien brief.
Ma dame, Diex vous gart de grief!
Le roy si m' envoie savoir
Se de parler pourra avoir
Accès a vous.
CLOTILDE. Oil, assez, mon ami doulx;
Di li viengne quant li plaira:
Toute preste me trouvera
Sanz contredire.
PREMIER SERGENT CLOVIS. Bien est: je li vois donques dire.
Sire, s' a ma dame parler
Voulez, bien y pouez aler
Sanz nulle empesche.
CLOVIS. Alons: il fault que m' en depesche.
Alez devant.
DEUXIESME SERGENT CLOVIS. Vostre vueil après et avant,
Sire, ferons.
PREMIER SERGENT CLOVIS. Et ce qui vous plaira dirons,
Chier sire, aussi.
CLOVIS. Dame, je vous vien veoir cy
Pour savoir de vostre portée
Conment vous estes deportée
Et quel enfant avez eu,
Et s' il est taillié ne meu
De vivre, dame.
CLOTILDE. Chier sire, je ne say, par m' ame.
Je say bien j' ay eu un filz,
De ce, sire, vous fas je fis,
Qui a esté crestienné,
Et li a on le non donné
De Clodomire.
CLOVIS. Que je le voie, sanz plus dire,
Par amour, dame.
CLOTILDE. Voulentiers, chier sire, par m' ame:
Ysabel, tost alez le querre,
Et l' apportez ici bonne erre
Enmailloté.
LA DAMOISELLE. Je vois, ma dame, en verité.
Vez le ci, mon seigneur, gardez:
Par foy, se bien le regardez,
Il vous ressemble.
CLOVIS. Je vous diray ce qui m' en semble:
Je le voy malade forment;
De li ne peut estre autrement,
Puis qu' il a receu baptesme
Ou nom vostre Dieu, c' est mon esme,
Qu' il ne s' en voit a mort le cours,
Com son frére fist, sanz secours;
Je vous dy voir.
CLOTILDE. Il peut bien maladie avoir;
Mais, se Dieu plaist, pas ne mourra.
Je tien, sire, qu' il garira,
G' y ay fiance.
CLOVIS. Puis qu' il est mis en la puissance
De vostre Dieu premiérement
Par vostre crestiennement,
Il ne peut qu' il ne le compére
Par mort, aussi que fist son frére.
Gardez le bien, je le vous lais.
Avant, seigneurs! a grant eslais
Partons de cy.
DEUXIESME SERGENT CLOVIS. Soit, chier sire, puis qu' est ainsi
Que vous le dites.
CLOTILDE. Hé! mére Dieu, par voz merites
Qui le fruit de vie portastes
Et home et Dieu vierge enfantastes,
A cest enfant donnez santé
Par la vostre benignité,
Si que le pére en vouloir truisse
Tel que briefment faire li puisse
La foy catholique tenir
Et vray crestien devenir.
Ysabel, tost, sanz plus preschier,
Reportez cest enfant couchier
Ysnellement.
LA DAMOISELLE. Dame, vostre conmandement
Du tout feray.
CLOTILDE. Or alez, et tantdis g' iray
A tout mon livre Dieu prier.
Venez a moy sanz detrier,
Quant arez fait.
LA DAMOISELLE. Dame, vostre voloir de fait
Vueil acomplir.
CLOTILDE. Sire Diex, qui, pour raemplir
Les siéges de ton paradis,
Desquelx trebuchiérent jadis
Les mauvais anges par orgueil,
Puis fu d' omme fourmer ton vueil
Tel que les siéges possessast
Et sanz fin de ta gloire usast;
Tu qui es sire, vie et voie,
A mon enfant santé renvoie
Tele qu' il soit sanz maladie
Par quoy le pére plus ne die
Que pour ce s' il est crestien,
Que ne li puissiez aussi bien
Donner la vie com la mort,
Et qu' en ce cas faille son sort.
Ha! dame des cieulx, en ce cas
Vueilliez estre mon advocas
Et ma petticion entendre;
Et je sui celle qui vueil tendre
A dire, ains que de ci me parte,
Voz heures, soit ou gaing ou perte,
Devotement.
DIEU. Mére, et vous, Jehans, alons ment;
Descendez jus, sanz plus ci estre.
Je voy la Clotilde soy mettre
En tele lamentacion
Et en telle contriccion
Que de lermes mouille sa face.
Il convient que grace li face:
Or sus, trestouz!
NOSTRE DAME. Mon Dieu, mon pére, mon filz doulz,
Nous ferons vostre voulenté;
Sus, anges! soiez apresté
De tost descendre.
GABRIEL. Dame, qui peustes comprendre
Ce que ne peuent pas les cieulx,
Chascun de nous est ententiex
De voz grez faire.
MICHIEL. En ce ne pouons nous meffaire.
Jehan, aussi qu' en esbatant,
Alons devant nous trois chantant:
Je le conseil.
SAINT JEHAN. Il me plaist trés bien et le vueil.
Sus! conmençons, mes amis doulx.
RONDEL. Royne des cieulx, qui en vous
Servir met son entencion,
Moult fait bonne opperacion:
Il acquiert vertus et de touz
Ses vices a remission,
Royne des cieulx, qui en vous
Servir met son entencion;
Et Dieu treuve en la fin si doulx
Que de gloire a reffeccion,
Ou est toute perfeccion.
DIEU. N' est pas d' aler m' entencion,
Mére, a Clotilde la endroit,
Mais ou son filz gist irons droit.
Tenez vous ci en ceste voie;
Il souffist assez que le voie
Et vous, Marie.
NOSTRE DAME. Je ne contredi ne varie,
Chier filz, a vostre voulenté;
Ouvrez de vostre poosté
Com vous plaira.
DIEU. De ma presence te sera
Si bien, filz, que tu es gueriz
Et que ton mal est touz tariz
Par humble et devote priére
De Clotilde, ta mére chiére,
Qui en a fait si son devoir
Qu' elle doit bien ce don avoir:
Pour ce l' en est fait li ottrois.
Or tost, mére, faites ces trois
Aler devant.
NOSTRE DAME. Mon Dieu, voulentiers. Or avant,
Anges, alez si com venistes;
Et, en alant, le chant pardistes
Qu' avez empris.
GABRIEL. Excellente vierge de pris,
Puis qu' il vous plaist, si ferons nous.
RONDEL. Et Dieu treuve en la fin si doulx
Que de gloire a refeccion,
Ou est toute perfeccion.
Royne des cieulx, qui en vous
Servir met son entencion
Moult fait bonne opperacion.
LA DAMOISELLE. Sanz plus ci faire mension,
Aler a ma dame me fault;
Mais avant verray que deffault
N' ait de riens son filz Clodomire.
Egar! conme il se prent a rire!
Dieu mercy, il est en bon point.
Dire li vois, sanz tarder point,
Ains que mais siesse.
CLOTILDE. Ysabel, vous avez grant piéce
Mis a venir.
LA DAMOISELLE. Dame, ce qui m' a fait tenir
En la chambre un poy longuement,
ç' a fait vostre filz vraiement,
Qui m' a tant ris, c' est chose voire,
Que vous ne le pourriés croire,
Et d' un ris sade.
CLOTILDE. Donques n' est il mie malade.
Ysabel, sanz plus ci seoir,
Alons men; je le vueil veoir
Tout avant euvre.
LA DAMOISELLE. Soit! Or veez conment il euvre
Doulcement, ma dame, la bouche
En riant. N' a mal qui li touche,
Ce tiens je, dame.
CLOTILDE. Aourée soi nostre dame!
Au mains, quant le roy ci venra
Et en santé le trouvera,
N' ara il de dire raison
Que pour baptesme ait achoison
Que mourir doie.
AURELIAN. Mon chier seigneur, honneur et joye
Vous vueillent noz diex envoier,
Et vous en puissance avoier
Noble et haultaine!
CLOVIS. Voir, j' ay oppinion certaine
Que vous me voulriez bien assez.
Bien veigniez touz; avant: passez
Cy delez moy.
DEUXIESME CHEVALIER. Mon chier seigneur, quant je vous voy,
Certainement j' ay le cuer lié
De ce que gay et esveillié
Je vous voy si.
CLOVIS. Que me direz de nouvel cy?
Qu' avez fait? ou esté avez?
Aucune chose m' en devez
Vous rapporter.
DEUXIESME CHEVALIER. Vous vous avez biau depporter
Con se vous fussiez le roy Daire;
Car jusqu' a la riviére d' Aire,
Sire, vostre regne s' estent,
Et tout le plat pais si tent
A soubz vous estre.
AURELIAN. Sire, j' ai fait gens d' armes mettre
Aux fors garder et du conmun;
S' avez le chastel de Meleun
Sur Saine, que moult lo et pris,
Que de nouvel je vous ay pris
Et conquesté.
CLOVIS. Aurelian, en verité,
Je tien que partout ou pouriez
Mon bien et mon honneur voulriez;
Et aussi j' ay plus de fiance
En vous, ce sachiez sanz doubtance,
Qu' en homme qui hante ma court
Et plus d' amitié: c' est a court
Que je dit l' ay.
PREVOST. Chier sire, entendez sanz delay
Les nouvelles que vous vueil dire:
Senes et Alemans, chier sire,
Sont venuz en vostre pais.
Pour eulz sommes touz esbahis;
Car ilz sont trop grant multitude,
Et il ne mettent leur estude
Chascun jour qu' a nous faire guerre,
Prandre les gens, piller la terre;
Et, se brief ne nous secourez,
Vous verrez que vous perderez
Pais et gens.
CLOVIS. Seigneurs, il nous fault diligens
Estre de secourre ma terre;
De ci nous fault partir bonne erre.
Mon ami, devant t' en iras,
Et partout tu conmenderas
Qu' avant qu' il soient embatuz
Es villes soient combatuz
Bien et forment.
PREVOST. Sire vostre conmandement
Vois faire en l' eure.
CLOVIS. Alons men sanz plus de demeure,
N' estre plus cy.
DEUXIESME CHEVALIER. Sire, se bon vous semble ainsi,
Par ma dame nous en irons;
Ne savons se la reverrons
Ja mès journée.
CLOVIS. Soit y vostre voie tournée:
Il me plaist bien.
AURELIAN. Alons donc par ci, que je tien
C' est nostre miex.
CLOVIS. Or ça, dame, que fait ce fiex?
Dites le nous.
CLOTILDE. Mon chier seigneur, bien veigniez vous!
Il est en bon point, Dieu mercy.
Dites, ou alez vous ainsi
Et ces gens touz?
CLOVIS. Nous alons pour combatre nous
A Alemens et pour eulz nuire,
Qui mon pais viennent destruire
Et essillier.
CLOTILDE. Ore ne vous puis conseillier;
Mais, certes, se me creussiez,
Conme moy crestien fussiez
Et eussiez receu baptesme
Et pieça d' uille et du saint cresme
Fussiez enoint.
CLOVIS. Souffrez: je ne vous en vueil point;
En vain gastez vostre langage.
Vous estes en ce cas trop sage;
Depportez vous a ceste foiz.
A Mahon vous dy! je m' en vois,
Sanz plus ci estre.
CLOTILDE. Chier sire, Dieu vous vueille mettre
En vouloir de tenir sa foy,
Par quoy nous soions, vous et moy,
D' une creance!
DEUXIESME CHEVALIER. Le dieu en qui avez fiance,
Chiére dame, par son plaisir
Acomplisse vostre desir
En bon affaire!
CLOTILDE. Telle besongne puissiez faire
La ou vous alez, mes amis,
Qu' en honneur en soit chascun mis
De corps et d' ame!
DEUXIESME CHEVALIER. A Mahon vous conmans, ma dame,
Qui si vous vueille regarder
Que touz jours vous vueille garder
En son conduit!
CLOTILDE. De toute rien qui vous ennuit,
Biaux seigneurs, vous deffende Diex,
Et vostre fait de bien en miex
Touz jours adresce!
LE ROY DES ALEMANS. Seigneurs, trop sommes oiseux; qu' est ce?
Entre nous qui tant de gens sommes,
Courir nous convient sur aux hommes
De ce pais et les pillier,
Femmes et enfans essillier;
Et se nul contre nous rebelle,
D' une espée ait, soit il, soit elle,
Par mi le corps.
PREMIER CHEVALIER ALEMANT. Chier sire, a ce trop bien m' acors;
Mais or avisons tout a trait
Ou nous ferons nostre retrait:
C' est neccessaire.
DEUXIESME CHEVALIER ALEMANT. En celle place l' alons faire,
Et considerons par quel tour
Nous pourrons touz jours, sans retour,
Avant aler.
LE ROY DES ALEMANS. Bien est. Alons sanz plus parler:
Je m' y assens.
CLOVIS. Seigneurs, a ce que voy et sens,
Combatre nous convient sanz faille.
Autre foiz avons en bataille
Esté sanz estre mors ne pris:
Or nous fault pour acquerre pris,
Contre noz ennemis rengier
Et d' eulx nostre pais vengier
Qu' a tort assaillent.
AURELIAN. Sire, je tien, pour ce que faillent,
Qu' il decherront de leur affaire.
Donner nous pourront bien affaire;
Mais vous verrez que tant feront
Qu' en la fin desconfiz seront.
Envoiez savoir, bien ferez,
Quelle part vous les trouverez,
Afin que ne puissons faillir
De les en sursault assaillir,
Non pas eulz nous.
CLOVIS. C' est bien dit. Huchon, ami doulx,
Or sachiez, se Mahon vous gart,
De ces Alemans quelle part
Nouvelle ourrez.
L' ESCUIER. Chier sire, ja mains n' en arez:
Obeir vueil a voz conmans.
G' y vois; a Mahon vous conmans.
Seigneurs, n' y a plus, je revien.
Trouvé les ay, je vous dy bien,
Ou viennent droit ça sanz faillir
Pour vous combatre et assaillir:
C' est leur entente.
CLOVIS. Or tost, rengeons nous sanz attente,
Et puis irons sur eulx après.
Je les pense a tenir si près
Et si court que n' eschaperont
De mort, ou ilz se renderont
En ma mercy.
DEUXIESME CHEVALIER. Chier sire, venir les voy ci:
Rengeons nous serrez tellement
Que ne se puissent nullement
En nous embatre.
TROISIESME CHEVALIER ALEMANT. Rendez vous, rendez sanz combatre:
C' est vostre miex, a verité;
Car de gens si grant quantité
Sommes c' on ne nous peut nombrer,
Ne de nous jamais descombrer
Ne vous pourrez.
TROISIESME CHEVALIER. Non, non: au jour d' ui touz mourrez.
Ferons sur eulx sanz espargnier:
Il sont ci venuz barguignier
Ce que mie n' emporteront;
Nient moins si chier l' acheteront
Com de la vie.
LE ROY DES ALEMANS. De toy occire ay grant envie,
Et si feray j' ains que je cesse.
Tien, va, ta veue felonnesse
Changier feray.
AURELIAN. Mon chier seigneur, je vous diray:
S' en noz forces nous aerdons,
Je ne voy pas que ne perdons.
Ces gens ne sont en riens lassez,
Et sont trop plus que nous d' assez.
Je ne voy qu' en ceste bataille
Soit force humaine qui nous vaille,
Que n' aions le pis de la guerre.
Je vous conseil, vueilliez requerre
D' umble cuer la vertu divine,
Je dy le Dieu que la royne
Ma dame si souvent vous presche
Que de ceste gent vous depesche;
Et li promettez a delivre
Que, s' a honneur vous en delivre,
En li croirez.
CLOVIS. Aurelian, et que ferez?
Dites le moy.
AURELIAN. Et je feray com vous, par foy,
Se je tant vif.
CLOVIS. Jhesu Crist, filz de Dieu le vif,
Qui mez de tribulacion
Les cuers en consolacion,
Et a ceulx qui leur esperance
Mettent en toy et ont fiance
Sequeurs et leur donnes t' ayde,
Ce me dit ma femme Clotilde,
Sire, humblement te requier, voire,
Que me vueilles donner victoire
De mes ennemis qui sont cy;
Et se je voy qu' il soit ainsi,
Je te promet que me feray
Babtizer et en toy croiray.
J' ay trop bien appellé mes diex;
Mais ne voy qu' il n' en soit riens miex,
Ains se sont eslongié de moy;
Et pour ce dy, quant ceci voy,
Ce sont diex de nulle puissance,
Ou nul ne doit avoir creance,
Puis qu' ilz n' aident ne sequeurent
Au besoing ceulx qui les aeurent.
Pour ce de toy croire ay desir,
Mais qu' il te soit, sire, a plaisir
Que mes adversaires tu livres,
Si qu' a mon honneur m' en delivres
Pour touz jours mais.
DEUXIESME CHEVALIER. Avant, seigneurs, avant! huymais
Pensons de fort combatre: or sus!
Je voy d' eulx sommes au dessus:
Le plus bel avons de la guerre,
Car je voy la leur roy par terre
Tout mort gisant.
QUATRIESME CHEVALIER ALEMANT. Ne scé que voise plus disant:
De ceste guerre avons le pis.
Elas! que nous serons despis!
Voir, je m' en fui.
CLOVIS. Avant, biaux seigneurs! au jour d' uy
Pensez tous de si bien ouvrer
Que puissons honneur recouvrer,
Et moy et vous.
PREMIER CHEVALIER ALEMANT. Sanz plus combatre escoutez nous,
Sire roys, com doulx et propice:
Nous vous supplions ne perisse
Par guerre plus nulz de noz hommes;
A vous nous rendons, vostres sommes,
Chier sire, a plain.
CLOVIS. Ho! seigneurs, je met en ma main
Ces gens cy: ne vous debatez
Plus a eulx ne ne combatez;
Puis qu' a ma voulenté se rendent
Et pais et mercy me demandent,
Je vueil qu' ilz l' aient.
DEUXIESME CHEVALIER. Si aront il, ne s' en esmaient,
Quant le voulez.
CLOVIS. Seigneurs, maishuy vous en alez;
Par mon conseil ordeneray
Quel treu sur vous prenderay
Com mes subgiez.
DEUXIESME CHEVALIER ALEMANT. Tel, sire, qu' il sera jugiez,
Dès ore mais vous paierons
Chascun an; n' i contredirons
En rien, pour voir.
AURELIAN. Alez: il vous fera savoir
Ce qu' il voulra que li faciez.
Sire, il est bon que vous lessiez
Ce pais et que retournons
En France: trop miex i serons
Assez que cy.
DEUXIESME CHEVALIER. C' est voir, c' est nostre avis aussi:
Avecques noz parens serons,
Pour quoy souvent nous viverons
Des cuers plus liez.
CLOVIS. Ore, puis que le conseilliez,
Je vueil qu' il soit a vostre dit:
Alons men tost sans contredit
Par ceste voie.
TROISIESME CHEVALIER. Alons. Certes, mais que vous voie,
La royne grant joie ara,
Quant la victoire dire orra
Qu' avez eu.
CLOVIS. N' en doubtez, bien ramenteu
Li sera, mais qu' a elle viengne.
Dame royne, Dieu vous tiengne
En s' amitié!
CLOTILDE. Chier sire, pour la Dieu pitié,
Qui vous a ce salut apris,
Ne ou avez vous vouloir pris
De le me dire?
CLOVIS. ç' a fait Jhesu Crist, nostre sire,
M' amie, qu' a vray Dieu je tieng.
Savez pour quoy? D' un pais vieng
Ou guerres ay fait si grevaines
Contre Alemans et contre Senes
Que c' est merveille a raconter.
Telle heure ay veu, sanz doubter,
Que rangiez fumes pour combatre;
Mais ilz estoient plus de quatre
Hommes contre un que j' en avoie.
Alors que faire ne savoie,
Toutes voies ne detriay:
Mes diex devotement priay
Que par eulx fusse secoruz;
Mais, quoy qu' a eulx fusse coruz,
Ne me firent ne chaut ne froit.
Quant je me vy a ce destroit
Et qu' il m' ocioient mes gens,
Aurelian, li preuz et gens,
S' en vint a moy, qui me vint dire:
"Requerez l' aide, chier sire,
De Jhesu Crist qui vous sequeure."
Dame, je le fis, et en l' eure
De mes ennemis s' en fouirent
Les uns, les autres se rendirent.
Ainsi les conquis a ce pas;
Et, puis qu' oblié ne m' a pas
Jhesus, pas ne l' oblieray:
Pour s' amour baptizé seray,
Et bien brief, dame.
CLOTILDE. Par ce point sauverez vostre ame,
Chier sire, et arez Dieu ami.
Souffrez, je manderai Remi,
Qui de Reins est dit arcevesque,
Qui vous enseignera, mais que
Il le vous plaise a escouter,
Conment ne devez point doubter,
Mais seur devez estre et fis,
Que Dieu le pére et Dieu le filz
Et Dieu sains esperiz aussi
Sont trois personnes, mais icy,
En ceste haulte trinité,
N' a qu' une seule deité:
Or m' entendez?
CLOVIS. Dame, pour Dieu, tost le mandez,
Que je le voie.
CLOTILDE. Qui voulez vous que g' y envoie,
Mon seigneur chier?
CLOVIS. Envoiez y ce chevalier,
Sanz nul detri.
CLOTILDE. Voulentiers. Sire, je vous pri
Que m' ailliez l' arcevesque querre
De Reins, et qu' il viengne bonne erre
Yci a moy.
PREMIER CHEVALIER. Voulentiers, dame, par ma foy.
G' y vois: sachiez ne fineray
Jusqu' a ce que ci l' amenray.
Je le voy la, c' est bien a point.
Sire, ne vous demourez point:
Je vien cy de par la royne,
Qui vous mande par amour fine
Qu' a li veigniez.
L' ARCEVESQUE. Sire, d' aler ne vous faingniez,
Et je toutes choses lairay
Pour vous suivre, la ou g' iray.
Vous deux, venez.
PREMIER CLERC. Sire, pour verité tenez
Si ferons nous.
DEUXIESME CLERC. Mais nous alons avecques vous
Dès maintenant.
PREMIER CHEVALIER. Vezci l' arcevesque venant,
Chiére dame, que vous amain;
N' a pas de venir a demain
Mis n' atendu.
CLOTILDE. Ore il soit le tresbien venu.
Sa! sa! arcevesque Remi,
Seez vous et decoste mi
Sanz plus debatre.
L' ARCEVESQUE. De moy en si hault siége embatre,
Dame, ne me requerez pas;
De me seoir ici em bas
Me doit souffire.
CLOTILDE. Marie! vous serrez ci, sire:
Dignité avez conme j' ay.
Vezci pour quoy mandé vous ay:
Mon seigneur a fain de venir
A baptesme et veult devenir
Crestien; mais il ne scet pas
Des articles quelx sont les pas
Qu' il convient c' on croie et c' on tiengne;
Pour ce vous pri qu' il vous souviengne,
Quant devers li serez entrez,
Que de son salut li monstrez
La droite voie.
L' ARCEVESQUE. Certes, dame, j' aray grant joie,
S' il li plaist a moy escouter;
Et si vous dy bien, sanz doubter,
A tele ne le lairay pas;
Mais m' en vois devers li le pas
Dire li ce qu' ay empensé,
Puis que dit m' avez son pensé
Et son courage.
CLOTILDE. Sire, vous estes homme sage:
Monstrez li par tele maniére
Qu' il ne retourne pas arriére
A ces faux diex.
L' ARCEVESQUE. Dame, a Dieu! j' en feray le miex
Que pourray, foy que doy saint Pére.
Jhesu Crist, filz de Dieu le pére,
Qui pour nous voult de mort l' angoisse
Souffrir en croiz, honneur vous croisse,
Roy de puissance!
CLOVIS. En ce salut preng grant plaisance
Que vous m' avez fait de Jhesu,
Sire, car il m' a moult valu,
Dont jam [l. jamais] ne l' oblieray;
Autre foiz pour quoy vous diray
Plus à loisir.
L' ARCEVESQUE. Vous venroit il, sire, a plaisir
Qu' a vous un petit cy parlasse.
Et avant que je m' en alasse
Moy escouter?
CLOVIS. Sire, oil; dites sanz doubter:
Voulentiers vous escouteray,
Et après je vous parleray
D' une autre chose.
L' ARCEVESQUE. Sire, vezci que vous propose:
Il est un Dieu sanz finement,
Qui onques n' ot conmencement;
De cesti est venuz un filz,
De ces deux un sains esperiz;
Et ces trois, je vous di pour voir,
Ne sont c' un Dieu et c' un vouloir.
Par ces trois fu creé le monde
Et tout ce qui es cieulx habonde.
Voir est que de terre fu fait
Homme, qui par son grief meffait
En si grief servage se mist
Que de paradis se desmist;
De telle debte s' endebta
C' onques puis ne s' en acquitta,
Ne depuis aussi ne fu homme
Souffisant d' acquitter la somme,
Jusqu' a tant qu' en la vierge vint
Le filz Dieu, qui homme y devint,
Qui par sa sainte passion
Fist d' omme la redempcion,
Quant a mourir offrit son corps.
Ha! c' est li doulx misericors,
Qui nul temps ne fault au besoing,
Mais qui sequeurt et près et loing
Ceulx qui l' aiment et qui ne l' aiment,
Puis que de bon cuer le reclaiment,
Ce n' est pas doubte.
CLOVIS. Pére saint, voulentiers t' escoute
Et croy pour vray ce que tu dis.
Seigneurs, assentez vous aus diz
Que ce saint homme ci nous fait;
Prenons touz baptesme de fait,
Et soit chascun bon crestien:
Plus noble fait, je vous dy bien,
Ne pouons prendre.
PREMIER CHEVALIER. Chier sire, vueilliez moy entendre:
Pour nous touz vous fas ce recort,
Que touz sommes de cest accort
De touz les mortelx diex laissier
Et nous au vray Dieu adressier
Que Remi presche, Dieu celestre,
Et ainsi nous le creons estre
Dès ore mais.
CLOVIS. Remi, sanz plus attendre, huymais
De moy baptiser vous penez
Et crestienté me donnez
Appertement.
L' ARCEVESQUE. Sire, je feray bonnement
Vostre plaisir et loing et près.
Or ça! vezci les sains fons près:
Depoulliez vous.
CLOVIS. Tout en l' eure, mon ami doulx,
Me devestiray de cuer lié.
Or ça! vez me ci despoullié:
Qu' ay plus a faire?
L' ARCEVESQUE. Pour vous nouvel homme refaire,
Faut que vous mettez ci dedans
A genoulz, et non pas adens,
A jointes mains.
CLOVIS. Sire, vous n' en arez ja mains:
Vez m' y la mis.
Ici vient un coulon atout une fiole.
L' ARCEVESQUE. Ha! doulx Jhesu Crist, vraiz amis,
Conme de bien en miex avoies
Tes euvres! Sire, bien savoies
Et as veu du ciel la hault
Ce de quoy j' avoie deffault:
C' est de cresme, teue mercy,
Sire, que tu m' envoies cy
Par ce coulon.
CLOVIS. Qu' est ce que je flaire si bon,
Sire, qu' entre voz mains tenez?
Onques mais puis que je fu nez
Je ne senti si noble odeur;
Le cuer m' a mis en grant baudeur.
Certes, je tien c' est sainte chose:
N' est violete, lis ne rose,
Basme, ciprès, terebentine,
Fleur de canelle, tant soit fine,
N' autre espice que je nommasse,
Que ceste odeur toute ne passe
Et ne surmonte.
L' ARCEVESQUE. Dites que Dieu, sire, a brief conte,
Vous aime, ne mentirez point,
Quant il veult que soiez enoint
De si precieuse liqueur
Et de qui vient si noble odeur
Com vous sentez.
CLOVIS. De moy baptiser vous hastez,
Je vous em pri.
L' ARCEVESQUE. Delivre en l' eure sanz detri
Serez, chier sire; or vous cessez.
Dites moy se vous renoncez
Au Sathenas.
CLOVIS. G' y renonce, n' en doubtez pas,
Sire, pour voir.
L' ARCEVESQUE. Il me convient aussi savoir
S' a ses pompes et a ses faiz,
Conme bon crestien parfaiz,
Vous renoncez.
CLOVIS. Oil: mes accors est assez
Que g' y renonce.
L' ARCEVESQUE. Seigneurs, il fault, ce vous denonce,
Changier li son nom de Clovis:
Conment ara il non? DEUXIESME CHEVALIER. Loys:
C' est biau nom, sire.
L' ARCEVESQUE. Loys, crois tu en nostre sire,
Dieu le pére, di le bonne erre,
Qui crea le ciel et la terre
Et toy et moy?
CLOVIS. Oil, voir, sire: je le croy
Certainement.
L' ARCEVESQUE. Et que Jhesu Crist seulement
Si est son fils naturel, qui
De la vierge homme et Dieu nasqui,
Et pour nostre redempcion
Souffry de mort la passion
En croiz avoir?
CLOVIS. Sire, je tien que c' est tout voir,
Et si le croy.
L' ARCEVESQUE. Et que saint esperit, di moy,
Est Diex? le croiz tu en tel guise?
Et en la catholique eglise,
Et des sains la communion,
Des pechiez la remission,
Et que touz resusciteront,
Et adonques les bons seront
Mis en corps et en ame en gloire,
Et les mauvais en tourment, voire,
Touz jours durable?
CLOVIS. Tout ce croy j' estre veritable,
Et n' en doubt point.
L' ARCEVESQUE. Que me requiers tu sur ce point?
Di m' en ton esme.
CLOVIS. Je requier avoir le baptesme
De sainte eglise.
L' ARCEVESQUE. Sy l' aras. ça, je te baptize
Con crestien, soies en fis,
Ou non Dieu, le pére et le filz
Et le saint esperit aussi.
Un po d' intervale.
Dieu le tout puissant, qui t' a cy
Par ceste yaue regeneré,
Et par saint esperit donné
De tes pechiez remission
Par mi ceste sainte unccion
Que me sens faire et ton chief oindre,
Te vueille en gloire avec lui joindre
Sanz finement!
CLOVIS. Amen! Je l' em pri bonnement
De cuer entier.
L' ARCEVESQUE. Seigneurs, d' un drap linge a mestier
Pour sa teste, ce vous recors,
Enveloper et tout son corps
Jusques a terre.
DEUXIESME CHEVALIER. Je l' ay, n' en fault point aler querre,
Sire, tout prest.
L' ARCEVESQUE. Bailliez le moy, bailliez: bien est.
Sire, de ce drap ci vous fault
Estre envelopé dès le hault
De la teste jusques a terre.
Seigneurs, entre vous touz bonne erre
Le levez hault entre voz braz.
L' un de mes clers prengne ses draps,
Dont autre foiz vestu sera,
Quant le jour d' ui passé sera.
Or avant: ne vous deportez
Qu' en son palais ne l' emportez.
Mes clers et moy vous suiverons
Et en louant Dieu chanterons,
Qui de sa grace a si ouvré
Que sainte eglise a recouvré
Si noble champion. Or sus!
Chantons Te Deum laudamus.
Explicit.