Miracle de saint Alexis

Cy commence un miracle de Nostre Dame de saint
Alexis qui laissa sa femme le jour qu' il l' ot espousée
pour aler estre povre par le pais pour l' amour
de Dieu et garder sa virginité, et depuis
revint chez son pére et la morut soubz un degré
et ne le cognut l' en devant qu' il fu mort.
EUFEMIAN. Entendez que vueil dire, Aglais;
Il est saison et temps huymais
Que nous façons mettre les tables
Et que soions entremettables
Des povres gens faire asseoir
Et eulx de diner pourveoir
Ainsi qu' acoustumé avons;
Car laissier mie ne devons
Nostre coustume.
AGLAIS. Voir, ce qui plus m' i acoustume,
C' est, sire, que souvent recors
Ce que Dieu si misericors
Nous a volu par sa grace estre
Qu' a nous a fait un biau filz naistre,
Dont si grant joie au cuer me vient,
Toutes les foiz qu' il m' en souvient,
Que taire ne la puis ne dire,
Et aussi ce que je voy, sire,
Qu' il est de si bonne doctrine
Qu' en touz bons meurs son cuer doctrine,
Qui moult me plaist.
EUFEMIAN. Dame, laissier nous fault ce plait;
J' ay fiance Dieu le fera
Tel qu' un bon preudomme sera.
Et puis que l' avons, c' est assez,
Dame: cy me sui appensez
Que plus n' en vueil faire jamais,
Mais vueil vivre dès ores mais
Pour l' amour de li chastement,
Mais qu' il vous plaise bonnement,
Ma chiére amie.
AGLAIS. Sire, ne vous mentiray mie:
Certes, a dire verité,
J' ay aussi bien la voulenté
De vivre chaste comme vous.
Or sommes d' accort, sire doulx,
Mais qu' il vous haitte.
EUFEMIAN. Dame, or soit ceste chose faitte
Sanz ce que nous plus en parlons,
Mais noz deux varlez appellons.
Roussellet, et toy, Connestable,
Or avant: de mettre la table
Soit chascun de vous diligens,
Si dineront ces bonnes gens
Que je voy la.
ROUSSELET. Tantost, sire. Avant: vaz de la,
Connestable, et si ne pensons
Fors que brief la table dressons,
Que temps en est.
CONNESTABLE. Voulentiers; ça, je suis tout prest:
J' ay mis mon trestiau, met le tien.
Avant: a la table! elle est bien.
Or vas viande et puis pain querre,
Et je m' en vois au vin bonne erre
Ains que je fine.
ROUSSELET. Trop bien de pain et de cuisine
Saray servir, n' en doubtes pas.
G' y vois, et ne demourray pas
Que n' en apporte.
CONNESTABLE. Ains que tu soies a la porte,
Je tien que si m' avanceray
Que du vin revenu seray.
Revenuz suis bien tost. Avoy!
Encore ici nappe ne voy
Ne pain sur table.
ROUSSELET. Es tu ja venu, Connestable?
Tu n' as pas musé trop grant piéce.
Ore avant: afin c' on s' assiesse
Plus tost, ceste nappe estendons
Et ce pain sur table mettons,
Hanaps et vin.
CONNESTABLE. Je le te feray de cuer fin:
Vas a ce bout; fais com je fas.
Bien est; ça! pains, vin et hanaps,
Met tout sur table.
ROUSSELET. Voulentiers, amis Connestable.
Egar! est ce fait sanz dangier?
Sa! mon seigneur, venez mengier
Quant vous plaira.
EUFEMIAN. Ces gens, dame, appeller faulra;
Temps est de les faire diner:
Nous les faisons trop jeuner,
Si com je pens.
AGLAIS. Tantost, sire. ça! bonnes gens,
Venez diner.
PREMIER POVRE ROMAIN. Alons men sanz plus sermonner:
On nous appelle.
DEUXIESME POVRE ROMAIN. Alons: chascun bonne escuelle
Ara ja devant li, ce tieng.
D' autre chose je ne me crieng
Que de mengier.
EUFEMIAN. Or tost, sanz riot ne dangier,
A la value que venez,
A table tost seoir alez:
Delivrez vous.
DEUXIESME POVRE ROMAIN. Puis qu' il vous plaist, mon seigneur doulx,
Fait iert en l' eure.
EUFEMIAN. Avant: a mangier sanz demeure
Cy m' apportez.
AGLAIS. Sire, un petit vous deportez:
Vous en arez tantost assez.
Jusqu' a moy, ça, vous deux passez.
ça, ça, courez au remanant.
Eufemian, ça, or avant:
Servez ces gens.
EUFEMIAN. Seigneurs, ne soiez negligens
De ce que vous sers en gré prendre,
Car Dieu le me peut trop bien rendre
S' en gré l' avez.
PREMIER POVRE ROMAIN. Jhesu Crist sire, qui savez
Conment ces deux gens sont songneux
De repaistre les besongneux
Qui povres et mendians sont
Et conment chascun jour le font
Benignement par charité,
Ha! sire, par vostre bonté
Considerez leur bon fait si
Que vostre grace aient dès cy
Et gloire en fin.
DEUXIESME POVRE ROMAIN. Amen! Je l' en pri de cuer fin,
Et pour ceste refeccion
Leur ottroit la fruicion
De sa grant gloire.
TROISIESME POVRE ROMAIN. Voire, et de touz pechiez victoire.
Il est temps de prendre congié,
Car beu avons et mengié
Souffisamment.
PREMIER POVRE ROMAIN. Vous dites voir, se Dieu m' ament.
Alons men: sus! A Dieu, chier sire,
Et vous, ma dame! Dieu vous mire
Et vous rende ce dyner cy
Et les autres que fait aussi
Nous avez, dame!
DEUXIESME POVRE ROMAIN. D' un chascun de vous vueille l' ame
Dieu en paradis recevoir,
Si que puissiez sa gloire avoir
Et des siens estre!
AGLAIS. Alez. Que le doulx roy celestre
Adresce noz faiz et noz diz
Si que l' un l' autre en paradis
Puissons veoir!
EUFEMIAN. Sa! dame, venez vous seoir.
Temps est et saison de disner;
Je ne vueil ore plus jeuner.
Rousselet, vaz, ne te deportes,
Du pain et de l' iaue m' apportes
Tant seulement, si dyneray:
Autre chose ne mengeray,
Assez sera.
AGLAIS. Vous arez ce qui vous plaira,
Mon seigneur, je vous en vois querre.
Souffrez: je revenray bonne erre;
Tenez, chier sire.
EUFEMIAN. Loé soit Diex! ça, je vueil dire:
Avant, dame: plus n' attendez
A mengier. Pour vous demandez
lsnellement.
AGLAIS. Mon seigneur, sachiez vraiement,
Ce n' est mie m' entencion
De prendre autre reffeccion
Que je voy que vous vous donnez:
Que pain et yaue ne prenez,
Non feray j', et si me souffist.
Que Dieu qui onques ne meffist
Nous doint sa grace!
EUFEMIAN. Amen! et nostre filz tel face,
Qu' avons, dame, a l' escole mis,
Qu' a Dieu puist estre si amis
Et si sa loy et sa foy tiengne
Qu' en gloire avecques Dieu parviengne
Sanz finement!
AGLAIS. Ha! sire, qui savez conment
C' est la chose que plus desir,
Vueilliez acomplir mon desir
Et vostre grace me donnez
Si que jusqu' a ce point menez
Mes oroisons.
EUFEMIAN. Ho! dame, de ce nous taisons
Pour maintenant.
AGLAIS. N' en vueil plus, sire, estre tenant
Parole, puis qu' il ne vous plaist
Et que de tenir ent plus plait
Me deffendez.
HONOIRES. Plaise vous que vous entendez,
Archadès, a ce que vueil dire
Et m' en dire vostre avis, sire,
Quant dit l' aray.
ARCHADèS. Sire, voulentiers le feray:
Dites moy quoy.
HONOIRES. Voulentiers. Or vous seez coy.
Eufemian a un filz
Qui est appellez Alexis
C' on tient a bon enfant et sage.
Dès ores mais est en aage
C' on le marie, et bien le vault,
A femme de bon lieu et hault
Et noble aussi.
ARCHADèS. Pour quoy me dites vous cecy,
Honoires sire?
HONOIRES. Archadès, je le vous vueil dire.
Eufemian tant servi
Nous a qu' il a bien desservi
Que façons pour li quelque chose.
Ores pour ce cecy propose
Que je voy que sire Lipage,
Qui est un vaillant homme et sage
Et qui est né de sanc royal
Et vit com preudomme loyal,
Ha une fille damoiselle
Qui est et gracieuse et belle.
Se de ceci premiers parlons
Et ce message li faisons,
Je tien ne mesprendrons de rien,
Car Eufemian vault bien
Que façons pour li tant et plus.
Or me respondez du surplus
Vostre vouloir.
ARCHADèS. Je tien que vous avez dit voir:
En nom de moy, c' est un preudons;
Je lo que nous ci le mandons,
Que tantost viengne a nous parler
Ains qu' il s' ordene ailleurs aler
Ne ça ne la.
HONOIRES. Je sui de vostre accort. Vezla
Qui tantost le nous yra querre.
Alez vous en dire bonne erre
A Eufemian, Rogier,
Que s' il est levé de mengier
Qu' a nous deux viengne sanz demour
Et que l' en prions par amour.
Or faites brief.
PREMIER SERGENT. Ce conmant ne tien point a grief,
Puis que de vostre bouche l' ay.
Chier sire, g' y vois sanz delay
Et ne pense a demourer point.
Dieu mercy, je vien bien a point;
Si bien a point ne veing ouan.
Dieu vous saint, Eufemian!
Et a vous, dame!
EUFEMIAN. Bien vegniez, Rogier, par vostre ame.
Dinez vous cy?
PREMIER SERGENT. J' ay fait certes, vostre mercy;
Mais pour quoy vien cy vous diray:
Long sermon pas ne vous feray.
Noz empereur m' ont envoié
Dire vous soiez avoié
Qu' a eulx vegniez isnel le pas,
Mais qu' aiez pris vostre repas,
Non autrement.
EUFEMIAN. Bien a point venez vraiement,
Que j' ay disné, mon ami doulx;
Alons men; suivez m' entre vous,
Mes escuiers.
ROUSSELET. Mon chier seigneur, tresvoulentiers,
Quant est de moy.
CONNESTABLE. Aussi sui je tout prest, par foy,
Mon seigneur, de vous compagnier.
Je ne me vueil mie espargnier
Qu' avec vous n' aille.
PREMIER SERGENT. Mes seigneurs, bien a point sanz faille
M' avez sire Eufemian
Envoié querre, mais oan
Ne le poy miex a point trouver,
Car de table vouloit lever.
Quant li ay dit, ne s' est tenuz
Qu' avec moy ne s' en soit venuz
Ysnellement.
HONOIRES. Touz jours a nostre mandement
Com preudomme est prest d' obeir,
Et il ne s' en fait pas hair,
Ains s' en a fait de nous amer.
Sanz li plus loer ne blasmer,
Alez touz en sus, ce vueil dire,
Fors vous, Eufemian sire,
Ne vous en vueilliez pas aler.
Nous deux voulons a vous parler
Et de secré.
EUFEMIAN. Mes seigneurs, il me vient a gré
Que me diez vostre plaisir;
Je vous orray de grant desir
Tresvoulentiers.
HONOIRES. Puis qu' avec nous deux fait le tiers,
Vous li direz nostre conseil,
Archadès sire, je le vueil,
Et c' est raison.
ARCHADèS. Je feroie grant mesprison
Que m' avançasse de li dire
Par devant vous, Honoires sire,
Si m' en tairay.
HONOIRES. Puis qu' il vous plaist, je li diray
Donc soubz vostre correccion,
Archadès, c' est m' entencion,
Autrement ja n' en parleroie.
Eufemian, je voulroye
Voulentiers, par Dieu qui me fist,
Vostre honneur et vostre prouffit,
Si feroit Archadès aussi.
Vezci pour quoy vous di ceci:
Vostre filz est assez d' aage
Pour femme avoir par mariage,
Et nous deux nous voulons pener
De l' aidier a bien assener.
Vous congnoissiez assez Lipage,
Qui est homme de hault parage,
Car de royal sanc est estrait,
Si con pour voir nous est retrait
Et il n' y fault ja varier:
Une fille a a marier;
Vous souffira il, dites voir,
Se nous li pouons faire avoir
Par mariage?
EUFEMIAN. Mes seigneurs, s' a sire Lipage
Plaist et agrée cilz accors,
Je sui celui qui m' i accors
Aussi du tout.
ARCHADèS. Or ça, vous n' estes folz n' estout:
Je vous diray que vous ferez.
A vostre hostel vous en irez,
Et nous Lipage manderons
Et sa fille li requerrons
Pour vostre filz.
HONOIRES. Je ne doubte pas, ains suis fis,
Combien qu' il soit grant et honneste,
Qu' il n' encline a nostre requeste
Benignement.
EUFEMIAN. Mes seigneurs, vous orrez comment
Il vous dira. De cy m' en vois.
Nient moins vous merci toutes foiz
De l' onneur que me faites cy
Et de la courtoisie aussy,
Quant vous plaist pour mon filz mesler
De son mariage et parler
Et vous en telle paine mettre
Sanz de nulle ame requis estre;
C' est amours grant.
ARCHADèS. Eufemian, plus engrant
Serons encore du parfaire,
Ce sachiez, mais qu' il se puist faire,
Je vous promet.
EUFEMIAN. En vostre voulenté m' en met
Du tout. A Dieu, mes chiers seigneurs!
Ja m' avez fait honneurs greigneurs
Et plusieurs que je ne sui digne,
Et ce vient de vostre benigne
Grace et amour.
HONOIRES. Je lo que mandons sanz demour
A Lipage qu' il ne se tiengne
Qu' a nous tantost ici ne viengne
Parler un poy.
ARCHADèS. C' est bien dit. Vien avant, Aufroy.
A sire Lipage briefment
T' en vas dire qu' isnellement
Viengne a nous deux ici parler.
Or soies appert d' y aler
Plus qu' autre fois.
DEUXIESME SERGENT. Sire, se m' aist sainte Fois,
G' i vois, et si ne fineray
Tant que ci fait venir l' aray.
C' est bien a point: la le voi estre.
Sire Lipage, il vous fault mettre
A voie de tantost aler
A noz deux empereurs parler,
Qui vous demandent.
LIPAGE. Amis Aufroy, puis qu' ilz me mandent,
Ci endroit plus ne demourray,
Mais avecques vous m' en iray
De ci a eulz.
DEUXIESME SERGENT. Alons donc ensemble nous deux:
Je n' y voi miex.
LIPAGE. Il me plaist bien, se m' aist Diex.
Alons men. S' on me vient point querre,
Un message a la court bonne erre
M' envoiez des deux emperiéres:
Avec eulz devant ou derriéres
Me trouvera.
SABINE. Mon chier pére, fait vous sera
Si com vous dites.
DEUXIESME SERGENT. Mes seigneurs, dites je sui quittes,
Si direz voir, de mon message.
Vezci: je vous amain Lipage
Avecques moy.
HONOIRES. C' est moult bien besongnié, Aufroy;
Mais en sus vous convient aler
De nous, car nous voulons parler
Cy de conseil.
DEUXIESME SERGENT. Mon treschier seigneur, faire vueil
Donc vostre gré.
ARCHADèS. Sire Lipage, soit secré
Quanque nous trois ici dirons.
Une requeste vous ferons
Qu' Honoires vous prononcera,
Qui plus sagement la sara
Dire que moy.
HONOIRES. Mais dites li, par vostre foy,
Sire Archadès.
ARCHADèS. Je ne li diroie jamais
Par devant vous.
HONOIRES. Je li diray donques pour nous
Delivrer, sire, plus affait,
Puis qu' ainsi convient que soit fait.
Or entendez, sire Lipage:
Une fille avez bien d' aage
Pour marier dès ore mais;
Ne vous feismes onques mais
Requeste nulle, j' en sui fis:
Nous vous prions qu' a un bon filz,
Nostre ami, la vueilliez donner,
Car nous le voulons assener;
Et quant on le vous nommera,
Sa personne assez vous plaira,
Ce croi je, sire.
LIPAGE. Vous plaira il, sire, a moy dire
De quelx gens il est et son nom
Et s' on li porte bon renom,
Tout avant euvre?
ARCHADèS. Il est bon que le vous descuevre:
C' est le fil d' Eufemian.
Certes n' orrez parler ouan
De meilleur filz ne de plus sage,
Et si est du plus grant lignage
De ceste ville.
LIPAGE. Mes chiers seigneurs, plus de cent mille
Merciz de l' onneur que m' offrez;
Un seul mot dire me souffrez.
Je vous promet je ne scé homme
En toute la cité de Romme
A qui si tost je m' acordasse
Que ma fille a femme donnasse
Conme a Alexis, par saint Pére,
Dont Eufemian est pére,
Car c' est un tresvaillant preudomme,
Et le filz est un bon joune homme,
Si qu' a brief, sanz plus de recors,
Ma fille pour li vous accors
Et la vous doing.
HONOIRES. Or ne fault fors que mettre soing
Et eure aussi, sire Lipage,
Conment soit brief ce mariage
Fait et parfait.
LIPAGE. Vezci conment il sera fait
Et si sera bien, ce me semble:
Le jeune homme et son pére ensemble
Et touz ses amis manderez,
Et mardi venir les ferez
Ceens, et j' aussi y venray,
Ma fille et mes gens amenray;
Et quant nous assemblez serons,
La derriére espouser irons,
Et ferons ceens nostre feste;
Il y a bon lieu et honneste
Et assez place.
ARCHADèS. Je sui d' accort qu' ainsi se face
Com dit avez.
HONOIRES. Et j' aussi, Lipage. Or alez:
Pensez de vous assemillier
Et de vostre fille abillier
Si com doit estre.
LIPAGE. Mes seigneurs, g' i vois peine mettre
Sanz riens plus dire.
ARCHADèS. Mander nous fault, Honoires sire,
Eufemian sanz attendre,
Pour li ceste response rendre
Qu' a fait Lipage.
HONOIRES. Rogier nous fera ce message:
Autre foiz l' a il fait venir.
Rogier, sanz vous plus cy tenir,
Alez pour nostre amour acquerre
Encore Eufemian querre
Et que cy viengne.
PREMIER SERGENT. Sire, s' en santé Dieu me tiengne,
Voulentiers sanz faire sejour.
Eufemian, Diex bon jour
Vous doint. Sanz vous plus ci tenir,
Encore a noz seigneurs venir
Vous fault en l' eure.
EUFEMIAN. Si iray, Rogier, sanz demeure.
Alons men tandis qu' ay loysir.
Mes seigneurs, Diex par son plaisir
Face chascun de vous si fin
Que sa gloire aiez en la fin,
S' arez assez.
ARCHADèS. Bien puissiez vous venir. Passez
Avant, Eufemian sire.
Mandé vous avons pour vous dire
Ce qu' avons fait.
HONOIRES. Brief, je vous diray nostre fait:
Il fault que soiez cy mardi
Et vostre filz, je le vous di,
Et voz gens telz qu' il vous plaira,
Et Lipage aussi y venra,
S' amenra sa fille Sabine
Qui est gente pucelle et digne
D' avoir a mari plus grant homme
Qu' Alexis n' est, c' est tout en somme;
Mais le vaillant homme Lipage
Accorde et veult ce mariage
Pour l' amour de ce qu' en parlons
Nous deux et que nous en meslons,
Si ques ci plus ne vous tenez,
Mais alez, si vous ordenez
Et ne soiez pas negligens
Que vostre filz, vous et voz gens
Ne soiez ceens sanz demeure
Avant qu' il soit de prime l' eure
Pour vostre honneur.
EUFEMIAN. Si feray je, mon chier seigneur.
Par vostre congié, sanz plus dire,
M' en vois ordener mon fait, sire,
Et ma besongne.
ARCHADèS. Alez: n' avez mestier d' eslongne
Ne de muser.
LIPAGE. Sabine fille, sanz ruser,
Se je vous vueil donner mari,
En arez vous le cuer marri?
Dites le moy.
SABINE. Sire, je ne vueil ne ne doy
Desdire vostre voulenté:
Ce qui vous plaist en verité
Me plaist aussi.
LIPAGE. Fille, pour ce vous di cecy
Que vous ailliez sanz demourée
Attourner vous comme espousée;
Car un bon fil vaillant et sage
Huy vous prenra par mariage:
Dame serez et li seigneur.
Certes ne vous peut bien greigneur
Venir, ce vous dy je pour voir,
Que d' un tel filz mari avoir,
Si qu' alez penser de vous mettre
Ainsi qu' espousée doit estre
De vostre affaire.
SABINE. Sire, pour moy garder de faire
Chose qui a annuy vous tourne,
Puisqu' il vous plaist qu' ainsi m' atourne,
Faire l' iray.
EUFEMIAN. Aglais dame, je vous diray
Pour quoy les empereurs mandé
M' ont. Sachiez qu' il ont demandé
Sabine, la fille Lipage,
Pour nostre filz en mariage
Sanz mon sceu.
AGLAIS. Et qui les a, sire, meu
A ceste chose?
EUFEMIAN. Par foy, dame, je n' y suppose
Riens que leur franche voulenté
Et que de leur benignité
L' ont volu faire.
AGLAIS. Ore, sire, a Dieu vueille plaire
Que les noces de mon filz voie
Si que leesce y prengne et joye,
Et a l' enfant mette en courage
Des povres, quant tenra mesnage,
Soufraitteux de bien enorter
Et eulz d' aumosnes conforter
Droituriéres.
EUFEMIAN. Ce sont euvres nobles et chiéres
Et plaisans a Dieu sans doubter.
Ore laissons ce ci ester
Et n' en soit ici plus parlé.
Savez vous ou il est alé?
Avoir le fault.
AGLAIS. Sire, il est alé chiez Ruffault.
L' ira l' en querre?
EUFEMIAN. Oil: avoir le vueil bonne erre.
Mandez le, dame.
AGLAIS. Voulentiers. Rousselet, par t' ame,
Vas: qu' il s' en viengne li conmande;
Dy li son pére le demande
A voir en haste.
ROUSSELET. Ne mengeray ne pain ne paste,
Ne ne buvray de vin aussi,
Tant que l' aray amené cy,
Ce sachiez, dame.
ALEXIS. Rousselet, ou vas tu, par t' ame?
Tu vas trop malement grant pas.
Dy me voir, et ne me mens pas,
Ou est ton erre.
ROUSSELET. Par foy, je vous aloye querre,
Sire, savez ou? chiez Ruffault.
A mon seigneur venir vous fault
Sanz plus ci estre.
ALEXIS. A voie donques me vueil mettre:
Alons, amis.
ROUSSELET. Sire, bien a point me suis mis
A voie: Alexis ay trouvé
Qui s' en venoit tout abrivé
Par de deça.
EUFEMIAN. C' est bien fait. Alexis, or ça,
A vous vueil parler de conseil
Et m' entente dire vous vueil:
N' y vueilliez mie varier.
Biau filz, je vous vueil marier,
Non mie moy tant seulement,
Mais les empereurs vraiement
Ont fait qu' arez par mariage
Qui? la fille sire Lipage,
Qui ne vous doit pas estre grief,
Si que, biaux filx Alexis, brief
Ens avec moy vous en venrez,
En la chappelle espouserez
Des empereurs la damoyselle,
Qui est fille plaisant et bele
Et bonne aussi.
ALEXIS. Mon chier pére, s' il est ainsi
Com vous me dites, je m' acors
A acomplir touz voz accors
De point en point.
EUFEMIAN. Bien. Sanz plus ici estre point,
La derriéres nous en alons.
Dame, suivez nous aux talons,
Et vous li faites compagnie,
Vous qui estes de ma mesnie,
Sanz le plus dire.
CONNESTABLE. Nous le ferons voulentiers, sire;
Alez devant.
EUFEMIAN. Alons donc nous deux. Or avant:
Tenons nous l' un de l' autre près;
Ma mesnie et ma femme après
Nous deux venront.
ALEXIS. Je tien que voirement feront.
Alons touzjours.
LIPAGE. Sabine, longs est li sejours
Que faisons de nous en aler.
Estes vous preste? A brief parler,
Dites le moy.
SABINE. Oil, chier sire, en bonne foy,
Il a ja piéce.
LIPAGE. Sa donc, que ja ne vous meschiéce,
Venez vous ent.
SABINE. Sire, a vostre commandement,
Mais de ma robe couverray
Ma teste, tant que je venray
En la chambre dont partiray
A l' eure qu' espouser iray,
C' est mon entente.
LIPAGE. Bien soit. Alons men sanz attente;
Je vous menray.
SABINE. Mon pére, faire vous lairay
Vostre vouloir.
CONNESTABLE. Seigneurs, s' entente avez d' avoir
Robes ny argent monnoié,
Faites que soiez avoié
De venir nostre espousé querre
Et de le ramener bonne erre
En sale, car espousé est,
Et de faire soit chascun prest
De vous mestier.
MENESTEREL. Alons: ne nous est plus mestier
De le nous dire.
EUFEMIAN. Or faisons bien, Lipage sire:
Puis que pour faire feste sommes
Cy assemblez, femmes et hommes,
Vueillons la feste conmencer:
Conment? prenons nous a dancer,
Je le conseil.
LIPAGE. Voulez vous? Aussi je le vueil,
Eufemian, sire doulx.
Dame espousée, avecques nous
Danserez et vous, dame Aglais.
Seigneurs, et pour ce que li glais
Soit plus grant, sus, faites mestier;
En verité, bien est mestier,
Quant a present.
AGLAIS. A dancer de cuer me present:
Je ne m' en tenroie a nul fuer
De la grant joie qu' ai au cuer
Certainement.
EUFEMIAN. Or sus; a ce conmencement
Faites nous aler tout le pas,
Seigneurs, et ne nous hastez pas
Trop tost d' aler.
ROUSSELET. N' appartient pas a brief parler
Si tost d' assez.
LIPAGE. Je seray maishuy touz lassez
De dancer. Reposer me vueil;
De ceste jambe cy me dueil
Trop malement.
AGLAIS. Sabine, je vueil vraiement
Que plus ici ne vous tegniez,
Mais qu' en vostre chambre vegniez
Vous reposer.
SABINE. Dame, je ne vueil opposer
Riens qui soit contre vostre vueil,
Mais tout ce que voulez je vueil
Sanz contredit.
AGLAIS. Alons men, puis que je l' ay dit:
En vostre chambre vous menray.
Ore, fille, je vous diray:
Coiement ici vous tenrez.
Je vois hors; mais ci me rarez
Tantost, m' amie.
SABINE. Je vous pri, ne demourez mie,
Ma chiére dame.
AGLAIS. N' en doubtez: en l' eure, par m' ame,
Revenray ci.
EUFEMIAN. Biau filz, je te vueil dire ainsi:
De plus ci danser ne t' envoises;
Je vueil qu' en ta chambre t' en voises
Reposer avecques ta femme;
Ce te loit faire sanz diffame,
Mais est raison.
ALEXIS. Chier pére, puis qu' il est saison
D' aler couchier, com vous me dites,
Obeir vueil pour estre en quittes.
A Dieu! g' y vois.
EUFEMIAN. Ne te fault ore nuls convois
Avoir, n' aussi n' appartient pas.
A Dieu! de ça m' en vois le pas
En mon manoir.
ALEXIS. Et je, sanz plus ci remanoir,
Droit en ma chambre m' en iray
Savoir mon que g' y trouveray:
En ce ne cuit mesprenre point.
Esgar! estes vous en ce point
Qu' avecques vous n' avez nulle ame,
Mais estes toute seule, dame,
A ce que voy?
SABINE. Vostre mére estoit avec moy,
Sire, qui va hors tout en l' eure,
Mais ne fera point de demeure
Que ne reviengne.
ALEXIS. Suer, plaise vous qu' il vous souviengne
De ce que je vous vueil ci dire,
Et ne le prenez mie a ire,
Ma chiére amie.
SABINE. Sire, de ce ne doubtez mie,
Que ja ne m' en courrouceray,
Car j' espoir telle chose orray
Qui a mon grant prouffit sera;
Si dites ce qui vous plaira
Seurement.
ALEXIS. Je vous doing cest enseignement
Qu' en la paour Dieu vous teigniez
Et en touz voz faiz le craingniez.
Par ce point vous fuirez les vices,
Par ce point harrez les delices,
Ne ne priserez riens le monde,
Mais direz que quanque y habonde
N' est que decepte et que falace
Et qui l' ame en pechié enlace,
Si direz voir.
SABINE. Sire, j' espère que savoir
Me ferez par vostre bonté
Ce qui m' est de neccessité
A faire pour mon sauvement,
Et je vous promet loyaument
De bonne voulenté feray
Le bien que de vous apprenray
Toute ma vie.
ALEXIS. Ha! suer, s' il vous pouoit envie
Prendre de vouloir regarder
Conment virginité garder
Peussez tant qu' avez a vivre,
Ne pourriez, voir, en plus biau livre
Lire, ne de plus grant merite,
Pour quoy virginitez est dite
Suer des anges, tant est haultisme.
Virginitez a fruit centisme,
Les mariez n' ont que de trente,
Le veuves n' ont que de soixante;
Ceste passe ces deux estaz.
Virginitez de mettre en tas
Et tant plus d' assembler se paine
Vertuz, plus est noble sa paine,
Et com plus en assemble, voir,
Et plus en veult encore avoir
Pour tant qu' elle soit de la crainte
Et de la paour Dieu atainte,
Ce n' est pas doubte.
SABINE. En tant que parler vous escoute,
Sire, je m' esbahis forment
De ce que me dites: conment
Garderay je virginité?
Vous savez bien de verité
Qu' a vous sui subjecte et soubzmise:
S' il ne vous plaist, en nulle guise
Vierge garder ne me pourray,
Ou vers vous me parjureray.
Dy je voir, sire?
ALEXIS. Sur ce point je vous pense a dire
Et a respondre une autre foiz.
Puis que l' un l' autre avons noz foiz
Donnez, certes je vous accors
N' a q' une char en noz deux corps,
S' est voir ce que vous di et moustre;
Mais n' en diray ore plus oultre.
Vezci, m' amie, que ferez:
Cest annel cy vous garderez
Et seste sainture de soie,
Afin, s' il avient que je soie
Loing de vous par quelque escheance,
Que ces choses ci souvenance
Et memoire de moy vous doingnent,
Dont noz cuers en amours conjoingnent,
Et Dieux, quant ainsi nous verra
Entramer, avec nous sera.
Couchiez vous, tandis que g' iray
Un po la hors ou affaire ay.
Pensez de vous desatourner,
Car m' entente est de retourner
Tantost aussi.
SABINE. Mais qu' il me viengne ayde cy,
J' aray tost fait.
ALEXIS. Doulx Jhesus, pour t' amour un fait
Vueil emprendre, puis que suis hors
De m' espouse, c' est que mon corps
Vueil matir conme penancier
Et ce pais du tout laissier
Et aler en estrange terre
Conme pelerin, pour acquerre
T' amour, se je la puis avoir.
Amis, parens, femme et avoir
Dès maintenant tout laisseray.
Cy endroit plus ne demourray;
Aler m' en vueil par ce chemin.
Sire, qui es bontez sanz fin,
Qui des pecheurs les justes fais,
Qui des conmançans les bons fais
Faiz prouffitans et si fenir
Que parfaiz les faiz devenir,
Par ceste vie, sire, humaine
Telement et si mon corps maine
Que de nul cogneu ne soie,
Ja soit ce qu' assez on me voie
Et aussi c' on m' oie parler.
Certes de cy m' en vueil aler
Droit a la cité de Magine,
Veoir le sepulcre si digne
C' on tient et dit par toute Romme
Qu' onques ne fu fait de main d' omme,
Ainçois le donna Diex au roy
Gabaron pour son bon arroy.
La m' en vois, ne ne fineray
Jusques a tant que g' i seray,
Mais qu' a Dieu plaise.
AGLAIS. Or ça, je vien, ne vous deplaise.
Fille, avez touzjours ici sis?
N' est point ci venuz Alexis
Vous visiter?
SABINE. Si est, ma dame, sanz doubter,
Mais sachiez tantost se parti
Et d' avec moy se departi
Et s' en ala.
AGLAIS. Ne vous ne savez s' il parla
Point a son pére?
SABINE. Non, dame, foy que doy saint Pére,
Ce ne scé pas.
AGLAIS. Je vois savoir ysnel le pas
Se son pére l' a retenu,
Ne qu' il peut estre devenu.
Dites, sire, se Dieu vous doint
Bonne joie, savez vous point
Ou Alexis nostre filz est?
A couchier maishui trop se met
Avec sa femme.
EUFEMIAN. Conment! n' est il pas couchié, dame?
Pour certain vous puis affichier
Depuis que l' envoyay couchier
Et qu' il y aloit, ce me dit,
Je feusse alé sanz contredit
Tout a loisir et a mon erre,
Ce m' est vis, deux milles de terre,
Ou l' avenant.
AGLAIS. Sire, j' en vien toute venant:
N' y a ne vallet ne meschine
En la chambre avecques Sabine
Qu' elle sanz plus.
EUFEMIAN. N' aray pas les piez si emplus
Que je ne voise jusqu' a elle.
Belle fille, quelle nouvelle?
Pour Dieu, dites moy verité.
N' a point ci Alexis esté
Avecques vous?
SABINE. Si a certes, mon seigneur doulx,
Esté y a.
EUFEMIAN. Et vous dist il, quant s' en ala,
Ou il aloit?
SABINE. Non, mais me dist que revenroit
Tantost et que je me couchasse.
Ne parti puis de ceste place
Pour li attendre.
EUFEMIAN. Il pourra bien par temps mesprendre,
Puis que tant demeure a venir.
Sanz moy plus ci endroit tenir,
Mes gens vois par tout envoier
Et de le querir avoier,
Ains que je fine.
AGLAIS. Je ne vous lairay pas, Sabine:
Avecques vous cy demourray
Jusques a ce que dire orray
De li nouvelle.
EUFEMIAN. Or tost, seigneurs, a voie isnelle
Vous mettez et sanz delaiance
D' aler par tout ou congnoissance
Savez que mon filz peut avoir,
Et mettez paine de savoir
Quelle part il est a ceste heure,
Car je vous dy bien sa demeure
Si me deplaist.
CONNESTABLE. Je vois faire, sire, s' ou plait,
Ce qui vous plaist moy conmander
Et en tans lieux le demander
Que de li nouvelles orray,
Ou certainement je diray
Que perduz est.
ROUSSELET. Connestable, a chemin te met
Par cy; je de ça tourneray
Et demander aussi l' iray
A ses amis.
EUFEMIAN. Ou se peut il ore estre mis?
Sanz doubte j' en ay grant merveille:
N' ay pas apris que si tart veille.
Ne say se revenuz est ore
Vers sa femme. G' i vois encore
Savoir mon ou tant s' est tenuz.
Je revien. Est il point venuz?
Dites moy, femme.
AGLAIS. Lasse! lasse! nanil, par m' ame.
Onques mais n' o paour greigneur
De li qu' ay ore, mon seigneur.
Que ferons nous?
EUFEMIAN. Par amour, dame, souffrez vous;
N' iert pas longuement que n' aviengne
Qu' aucun de ma gent ci ne viengne,
Qui l' ara espoir en esbat
Trouvé, si sarons ou s' esbat,
Ou espoir le ramenra ci,
Par quoy serons hors de soussi,
Voire, et de doubte.
CONNESTABLE. Dieux gart la compagnie toute
Que je ci voy!
EUFEMIAN. Bien veignant! or ça, par ta foy,
Qu' as tu trouvé?
CONNESTABLE. Je me sui d' aler esprouvé
Tant qu' ay esté, si m' aist Diex,
En plus, je croy, de trente lieux,
Si ay je de quarante et huit;
Mais trouvé n' ay un qui annuit
M' ait dit que vers li soit alé,
Ne qu' il ait point a li parlé
Ne li veu.
EUFEMIAN. Par foy, bien sommes deceu,
Qui n' en pouons nouvelle oir.
Tel courrouz en ay qu' esjoir
Mon cuer ne puis.
ROUSSELET. Mon seigneur, dites, vint il puis?
A brief, il n' est personne, sire,
Qui de li me sache riens dire
Ne l' enseignier.
EUFEMIAN. E! Diex, je me doy bien seignier.
Esbahiz sui trop malement,
Quant de mon filz avenanment
Nouvelles n' oy.
SABINE. Savez qu' il est? a ce que voy,
Et par le parler qu' il m' a dit,
Tenez de vray, sanz contredit,
Que plus au monde ne veult estre,
Mais s' en va en penance mettre
En lieu estrange.
AGLAIS. Certes, ma joie en douleur change
Et en tristesce changera,
Et mon ris en pleurs muera,
S' il est ainsi que dites, fille.
Ma vie ne prise une quille;
Des yex pleureray sanz sejour;
Mes regrez seront nuit et jour
En amertume de penser,
Ne jamais ne voulray cesser
De plaindre Alexis mon enfant,
Qui le cuer me part et me fent
Et encor plus mal me fera
Con plus a venir demourra
Dès ores mais.
EUFEMIAN. Dame, deportez vous huimais,
Je vous pri, de tel marrement
Que sachiez ne puis nullement
Le dueil que faites endurer,
Ne je ne pourroie durer.
Je sui dolens et triste assez,
Si vous pri que vous vous cessez
Que plus faire dueil ne vous voie,
Car vostre dueil en dueil m' avoie
Trop grief et fort.
AGLAIS. Lasse! ma joie et mon confort
Sont perduz. Conment me tenray
De plourer? Voir, je ne pourray,
C' est fort a faire.
EUFEMIAN. Escoutez: il le vous fault faire,
Si fera il a moy aussi,
Vueille ou non, puis qu' il est ainsi
Que ne le pouons amender.
Je vous vueil ainsi demander:
Avant ceste douleur amére,
De vostre pére et vostre mére
Ne vous passiez vous mie, dame?
Plus de vous qui estes ma femme
Et vous de moy, ici pensez,
Ne nous sommes nous pas passez
De l' un avec l' autre jesir,
Sanz faire des corps le plaisir,
Depuis ce que de vous nasqui
Alexis nostre filz, pour qui
Maintenant ce courroux avons?
Aussi mettre paine devons
A nous l' un l' autre consoler,
Sanz nous si griefment doloser,
Et je, sachiez, regarderay
Conment miex faire le pourray,
Et a tant paix!
SABINE. Un mot vueil ici dire, mais
Que me vueilliez vous deux oir.
N' ay mais cause de m' esjoir
Ne que vous avez, ce me semble;
Ottroiez moy vous deux ensemble
Qu' avecques vous je demourray,
Ne que jamais n' en partiray,
Mais pére et mére me serez.
Certes grant charité ferez,
Que je vous jur je seray celle
Qui seray com la turterelle
Qui, quant a perdu son mari,
Elle en a le cuer si marri
Que depuis ne va ne ne ganche
Ne ne s' assiet sur verte branche.
Pour certain tout ainsi feray:
Solaz mondain du tout lairay;
Ne pense ailleurs mettre m' estude
Qu' en mener vie en solitude,
En pleurs, en veillier, et après
En entrer en parfons regrez
Pour celi qui ainsi me laisse.
Que Dieu, par sa grace, l' adresse
Et le conduie tellement
Que ce soit a son sauvement
Et que puissons par ses biens faiz
Pardon avoir de noz meffaiz!
C' est a quoy tens.
AGLAIS. Ce qu' avez dit tresbien entens,
Et je vueil de voulenté fine
Faire vostre voloir, Sabine.
D' avecques moy ne partirez
Jamais; com fille me serez,
Et je com mére vous seray
Et com fille vous garderay,
S' il vous plaist, sire.
EUFEMIAN. Je ne vous vueil mie desdire,
Mais m' i assens a brief et court.
Ore il me fault aler a court;
Entre vous deux tenez vous cy
Tant que je revienge, et aussy
De gens certains me pourverray
Qu' en plusieurs lieux envoieray
Savoir s' Alexis trouveront
Ne se nouvelles en orront.
Seez vous, je m' en vois a tant;
Or tost, devant moy pié battant,
Vous deux, alez.
CONNESTABLE. Sanz ce que plus, sire, en parlez,
Si ferons nous.
ALEXIS. Jhesu Criz, qui est roys sur touz,
Sire, de cuer te glorify
Et de bouche te magnifi,
Qui m' as tant de grace donné
Qu' en la cité m' as amené
Dite de Magines a Romme
Et ens ou pais on la nomme
Et est ditte en conmun Edesse;
Et puis que g' y sui, en l' adresse
Me vueil mettre et vueil pourveoir
D' aler le crucefiz veoir
Que Dieu fist de ses propres mains,
Qui est, si ay sceu de mains,
De celle abbaie ou tresor.
Au secretain un florin d' or
Donrray avant que je passe oultre
Et que le crucefiz me moustre.
Je vois savoir que pourray faire.
Sire, ne vous vueille desplaire.
Pourray j' a vous un mot parler
Icy, sanz plus avant aler?
Q' en dites vous?
SECRETAIN. Oil, voulentiers, amis doulx:
Que voulez dire?
ALEXIS. Je suis un homme estrange, sire,
Qui vien ci par devocion.
J' ay de veoir affeccion
Le saint crucefix que Diex fist
Et qu' il donna, si conme on dit,
A Gabaron pour verité;
Si vous suppli, par charité,
Que je le voie.
SECRETAIN. Amis, se Diex en bien m' avoie,
En l' eure vous le moustreray,
Pour ç' aussi que hors a faire ay:
Je ne vueil pas que vous tardez.
Sa! mon chier ami, regardez.
Vez le ci tel com Dieu le fist,
Qui onques en riens ne meffist,
Ce puis je dire.
ALEXIS. Vezci tresnoble chose, sire,
Et plaine d' amiracion
Et de tresgrant devocion.
Ne me puis tenir de plourer.
Sire Diex, bien vous doy ourer,
Qui pour moy jetter hors de peine,
Endurastes mort si grevaine
Com represente ce drap cy.
Ha! sire, aiez de moy mercy,
Que par vostre peine fenie
A la gloire qu' est infenie
Puisse venir.
SECRETAIN. Ne me puis plus ici tenir
Pour maintenant, soiez ent fis.
Amis, en sauf mon crucefiz
Vueil reporter.
ALEXIS. Sire, ne me vueil deporter
Que je ne face cy m' offrande;
Combien c' on ne la me demande,
Pour ç' a faire ne la lairay:
Ce fleurin ici offerray
Sur cest autel.
SECRETAIN. Pieç' a ne vint ceens don tel,
Ce vous jur, d' omme ne de femme.
Sire, Dieu le vous rende a l' ame!
Si fera il.
ALEXIS. Ore est temps que m' en voise, oil.
En voz biens faiz me reconmans,
Chier sire, et a Dieu vous conmans.
De ça m' en vois.
SECRETAIN. Ou que vous ailliez, Dieu convois,
Sire, vous soit.
ALEXIS. Vray Dieux, par vouloir que conçoit
Mon cuer, mais a ja conceu
Par ton ymage qu' ay veu,
N' ay voulenté n' autre desir
Mais que de faire ton plaisir;
Si est mon vouloir et m' entente
Que je le face sanz attente.
Conment aussi que fuz pour moy
Povre, vueil povre estre pour toy,
Et tout ce que j' ay departir
Aux povres, afin que partir
Puisse miex a t' amour avoir.
Donner vueil tout ce qu' ay d' avoir
A ces povres que voy ci estre.
Tenez: pour Dieu le roy celestre
Soit, mes amis!
PREMIER POVRE. Ceste aumosne que m' avez mis
En la main, sire, voie Diex
Et par ceste aumosne es sains cielx
Mette vostre ame!
DEUXIESME POVRE. Celle qui royne est et dame
Sur les anges de paradis
Le parface en faiz et en dis
Conme le sien!
TROISIESME POVRE. Se voz dons sont telz com li mien,
Nous devons bien pour li prier
Devotement sanz detrier,
Chascun par soy.
PREMIER POVRE. C' est voir: pour ce, quant est de moy,
Avant que nulle chose face,
Pour li me vueil en ceste place
Mettre a genouz.
DEUXIESME POVRE. Et j' aussi feray comme vous
Certainement.
TROISIESME POVRE. Je mesprendroie malement,
Puis que s' aumosne ay receu,
Se n' en faisoie mon deu;
Pour ç' a genouz me vueil ci mettre
Et pour li Dieu le roy celestre
De cuer prier.
ALEXIS. Encore vueil, sanz detrier,
Ce povre que voy la seul estre
De nouvelle aumosne repaistre,
Et vueil, pére de deité,
Estre povre de voulenté,
Sanz quelque chose possesser.
De riens avoir me vueil cesser
Ou il ait de chatel regart.
Biau frére et ami, Diex vous gart!
Vous voulez vous habandonner,
A moy vostre robe donner
Et la moye vous donneray,
Et si la vous despoulleray
Presentement?
LE POVRE SEUL. Vous perderez trop malement,
Sire, se vous ce change faictes:
Voz draps sont et bons et honnestes
Pour aler entre toute gent,
Les miens ne valent pas d' argent
Nulz trois solz. Que voulez vous faire?
Ne vous vueilliez pas si deffaire
Com dit avez.
ALEXIS. Ne vous chaut, amis. Ne savez
Qui me meut que ce change passe:
N' ay de quoy certes bien vous face,
Se ne le fas par ceste voie,
Et pour ç' avant qu' ame nous voie,
Despoulliez vostre robe ci;
Je me despoulleray aussi
Sanz demourée.
LE POVRE SEUL. Puis qu' il vous plaist, sire, et agrée,
Tantost me verrez despoullié.
Par ce change me faites lié,
Sire, de cuer.
ALEXIS. Amis, et je me jette puer
Par ce change de tout le monde,
Car je ne voy qu' il y habonde
Fors que vanité et malice,
Si que, pour eschiver tout vice,
De l' estat mondain me desmet
Et en l' estat povre me mett
Pour Dieu trouver.
LE POVRE SEUL. Sire, Diex vous y doint prouver
Tellement qu' en puissiez venir
Aux biens qui durront sanz fenir
Lassus en gloire!
ALEXIS. Amis, je vous pri qu' en memoire
M' aiez et vueilliez Dieu requerre
Que je peusse s' amour acquerre.
Avec vous ci plus ne seray;
Quant a ore vous laisseray:
A Dieu, amis!
LE POVRE SEUL. Le bon propos qu' en vous ha mis
L' amoureux Jhesu de sa grace
De bien en miex, sire, parface
Par son plesir.
ALEXIS. Aussi comme je le desir
Le m' acomplisse.
LE POVRE SEUL. De plus ci estre seray nice;
Maishui sanz doubte aler m' en vueil,
Et si ouverray par conseil
S' il est bon ou non que je vende
Ceste robe ou que m' en amende
De la vestir.
ALEXIS. Sire Diex, dès or mais mattir
Voulray par penance mon corps,
Que quant par memoire recors
Comment soustenis grant oultrage
En croiz, si comme en ton ymage
Qu' a Gabaron donnas appert,
Le cuer me fent, mon sens se pert,
Si que je ne scé que je face.
Ha! sire Dieu, se de ta grace
Ne me confortes et repais,
Ne puis de conscience en pais
Contempler ta benignité,
Ne penser a t' umilité;
Mais, sire, j' ay ceste esperance
Que, puis que j' ay en toy fiance,
Tu m' acompliras mon desir;
Et je, pour faire ton plaisir,
Dès ores mais ne me quier mettre
Ne herbergier ailleurs qu' en l' aittre
De l' eglise sainte Marie.
La vueil j' estre toute ma vie,
Plus près que pourray de l' eglise
Pour oir le divin servise.
Je vois veoir ou miex pourray
Place avoir. Ici me tenray
Dès ores mais, biau sire Diex,
Pour t' amour toy servant le miex
Que pourray, mais que ne m' encombre
Sathan, et me feray du nombre
Des povres pour ma vie avoir,
Ne quier amasser autre avoir;
Et après, quant ma vie aray,
Se j' ay plus, pour Dieu le donrray.
Sire, a terre me vueil plessier
Et a toy servir conmencier
Devotement.
EUFEMIAN. Biaux seigneurs, or tost, ralons ment:
Il en est temps.
ROUSSELET. Sire, nous ferons sanz contens
Vostre plaisir.
CONNESTABLE. Qu' a vostre hostel soions desir,
Sire, par m' ame.
EUFEMIAN. Je metteray que plourez, dame,
Pour ce que venir me veez.
Je vous pri que vous en tenez,
Que pour certain trop mal me faites.
Connestable, fay, si t' affaites:
Vas me querre Huchon le fort,
Et toy, Rousselet, sanz deport,
Vaz me tost, sanz toy plus tenir,
Musehault faire ci venir.
Or faites brief.
CONNESTABLE. Ce conmant ne tieng point a grief,
Sire: g' i vois.
ROUSSELET. Se demourer devoie un mois,
Cy endroit ne retourneray
Jusqu' a tant que je l' amenray
Avecques moy.
CONNESTABLE. Bien a point te truis et te voy,
Huchon: fais, si t' en vien bonne erre;
Mon seigneur si t' envoie querre,
Je te dy bien.
HUCHON. Pour certain, Connestable, tien
Que g' y vois, puis qu' il me demande,
Et si saray pour quoy me mande.
Amis, alons.
CONNESTABLE. Mon seigneur, j' ay tant des talons
Alé que j' ay Huchon trouvé
Et l' ay avec moy amené;
Vez le ci, sire.
HUCHON. Sire, vous plaira il moy dire
Que me voulez?
EUFEMIAN. Huchon, je sui si adolez
Que je ne sçay que je feray.
Oil, tantost le vous diray,
Mais que Musehault soit ici
Venuz, que j' ay mandé aussi
Pour ceste chose.
HUCHON. N' est pas m' entente que propose
Rien qui soit, sire, en verité
Encontre vostre voulenté.
Tant qu' il soit venuz vous passez;
Je l' attenderay, sire, assez,
N' en aiez doubte.
EUFEMIAN. Je tien qu' il ne demourra goute
Que ci ne viengne.
HUCHON. Bien est, sire; aviengne qu' aviengne,
Je l' attendray.
ROUSSELET. Musehault, je ne vous perdray
Maishuy, puis que vous ay trouvé;
En tant de lieux vous ay rouvé
Que je ne savoie ou aler.
Venez a mon seigneur parler
Isnellement.
MUSEHAULT. Voulentiers, amis, bonnement:
Me demande il?
ROUSSELET. S' il vous demande? voir, oil;
Alons bonne erre.
MUSEHAULT. Pour vostre amour et grace acquerre,
Chier sire, qui me demandez,
Suis je cy venu. Conmandez
Ce qui vous plaist.
EUFEMIAN. Je le vous diray a court plait,
Huchon amis: entendez ci.
Seigneurs, sachiez il m' est ainsi:
J' ay mon filz Alexis perdu,
Dont le cuer ay si esperdu
Que je ne scé que faire doie.
De li grant joie avoir cuidoie;
Pour ce l' avoie marié,
Las! mais il s' est si varié
Que parti s' est de ce pais,
Dont je sui forment esbahis,
Sanz ce qu' ait a ame parlé,
Ne nulz ne scet ou est alé.
Je tien qu' il va pour Dieu povre estre.
Si vous pri touz deux de vous mettre
A chemin et d' aler le querre
Et demander de terre en terre;
Et enquerez touz jours des sages
Ou les plus biaux pelerinages
Seront et de plus grant renom,
Et des lieux retenez le nom,
Et puis, seigneurs, la le querez,
Et j' espoir que le trouverez
Plus tost ainsi certainement
Que de le querir autrement.
Si vous pri que chascun s' en paine;
N' en detenray pas vostre paine,
Ja n' en doubtez.
HUCHON. Quant est de moy, sire, escoutez:
Je vous jur je me peneray
De le trouver quanque pourray;
Ne puis plus dire.
MUSEHAULT. Vraiement si feray je, sire:
N' en doubtez point.
EUFEMIAN. Seigneurs, sanz plus cy estre point,
Je vous pri, mettez vous en voie
Que tart m' est qu' aler vous en voye
Et chemin prendre.
HUCHON. Alons men par ci sanz attendre;
Chier sire, a Dieu!
EUFEMIAN. Aler puissiez vous en tel lieu
Et tenir tel chemin et voie
Qu' encore par vous mon filz voie
Cy revenu!
PREMIER POVRE. Grant piéce nous sommes tenu,
Seigneurs, d' estre en pourchaz alé.
Nous avons assez ci parlé:
Alons nous arengier et mettre
Pour demander l' aumosne en l' aittre
De nostre dame.
DEUXIESME POVRE. Alons, qu' il en est temps, par m' ame,
Mais est passé.
TROISIESME POVRE. Egar! ce bon homme cassé
A pris place ici delez nous.
Ses oroisons dit a genouz
Et le corps a couchié a terre.
Je croy que ci l' aumosne querre
Vient conme nous.
PREMIER POVRE. Il peut estre, mon ami doulx,
Et le peut faire.
DEUXIESME POVRE. Aussi vezci venir Hilaire
Qui de demander sa pratique
Scet miex c' onques ne fist logique
Aristote.
TROISIESME POVRE. Ly? Diex! il est ci tout encoste
Ou de travers si tost a point
Qu' a aumosne avoir ne fault point,
Quiconque y faille.
PREMIER POVRE. Laissons l' ester, vaille que vaille;
Place preng cy.
DEUXIESME POVRE. Et je delez vous vueil aussi,
Mon ami, estre.
TROISIESME POVRE. Doulx Jhesu Crist, en grace mettre
Vueilliez qui nous estrenera
Et qui s' aumosne nous donra
A touz ensemble.
HUCHON. Musehault, certes, il me semble
Que noz pas gastons et perdons.
Nous avons en tant de pardons
Esté et passé tantes illes
Et braz de mer et bonnes villes
Que ne les sarions raconter,
Et si n' est homme qui compter
Nous ait sceu ne ce ne quoy
D' Alexis que querons; dy moy
Que nous ferons.
MUSEHAULT. Huchon amis, nous en irons,
Se me creez, de ci endroit
Au moustier nostre dame droit:
Il y a, ce raconte l' en,
Grant pardon plusieurs jours en l' an.
Alons y noz offrandes faire:
En ce ne pourrons nous meffaire,
Et peut estre, quant la venrons,
Que ce que querons trouverons
Ou en my voye.
HUCHON. E! Diex, que j' aroye grant joie!
Amis, Dieu vous en vueille oir!
Ceste parole resjoir
Le cuer m' a fait.
MUSEHAULT. Alons men au moustier de fait,
Huchon, et soions diligens
De regarder qu' entre les gens
Que verrons estans ou assis
Ou alans ne soit Alexis,
Je le conseil.
HUCHON. Je le pense ainsi et le vueil,
Musehault, faire.
MUSEHAULT. Il ne se sara si deffaire
Que se son visage veons,
Qu' en l' eure ne le congnoissons
Et vous et moy.
HUCHON. Vous dites verité, par foy.
Alons men, alons au moustier.
Que Dieu de ce dont plus mestier
Avons nous vueille pourveoir
Et nous doint Alexis veoir,
S' il vit encore!
MUSEHAULT. Puis que sommes au moustier, ore
A genoulz cy de cuer disons
Devotement noz oroisons.
J' ay fait. Pour le pardon gangnier
Met a l' euvre cest gros denier
Sur cest autel.
HUCHON. Musehault, je vueil faire autel
Com fait avez.
MUSEHAULT. Si ferez ce que vous devez,
Et si le vous rendera Dieux
A double, ce sachiez, mais miex
Que sohaidier ne le sarez,
Et quant plus mestier en arez;
Ainsi le tien.
HUCHON. Ceste parole croy je bien:
Il ne m' en fault ja plus parler.
A ces povres gens vueil aler
Et leur donray de mon argent.
Tenez pour Dieu, ma bonne gent.
A toy premier commenceray,
Et puis de renc a vous yray;
Ne vous mouvez.
PREMIER POVRE. Celi pour qui vous me donnez
Et faittes, sire, ceste aumosne
La vous vueille rendre en son throsne
Lassus es cieulx.
DEUXIESME POVRE. Jhesus, qui de la vierge est fiex,
Qui d' espines fu coronné,
Pour ce don que m' avez donné
Vous doint de tout pechié victoire
Et es cieulx couronne de gloire
En la parfin.
TROISIESME POVRE. Amen! Je l' en pri de cuer fin
Qu' il l' en souviengne.
LE POVRE SEUL. Diex en sa grace vous maintiengne
Sire, touz jours et en touz lieux,
Si que puissiez de bien en miex
Touz jours monter.
HUCHON. Seigneurs, vueilliez me voir conter:
Cest homme qui leuc adent gist,
Qui est il, se Dieu vous aist?
Est il comme vous mandiant,
Ou est il homme peneant?
Dites le moy.
PREMIER POVRE. Nous ne savons, sire, par foy:
Nous l' avons en ce point trouvé,
Quant sommes ici arrivé.
S' il est povres, n' en savons rien,
Car de nouvel, je vous dy bien,
Icy s' est mis.
HUCHON. Parlez a moy, parlez, amis,
Je vous en pri.
ALEXIS. Sire, voulentiers, sanz detri:
Que voulez vous?
HUCHON. Dites me voir, mon ami doulx,
Se pour Dieu je vous vueil du mien
Donner, le prenderez vous bien
Com mendiant?
ALEXIS. Sire, quoy que m' alez diant,
Povre sui et povre vueil estre
Et pour l' amour du roy celestre
Vueil je si povre devenir
Qu' avoir ne vueil riens ne tenir
Oultre ma vie, et quant j' aray
Riens oultre, pour Dieu le donray,
Je vous promet.
HUCHON. Puis que vostre vouloir tel est,
Amis, c' est noble povreté;
Je vous doing, c' est ma voulenté,
Tout cest argent. Amis, tenez:
Pour Dieu soit, et vous le prenez
Pour Dieu aussi.
ALEXIS. Celi pour qui me faites cy
Ceste aumosne la vous merisse,
Qui de tout pechié vous garisse
Et vous mette en sa compagnie
Quoy que je ne l' aie gangnie,
Ne n' en sui digne.
MUSEHAULT. Estre me semblés un benigne
Homme et de grant devocion,
Amis, et d' umble affeccion.
Autre chose je n' en diray,
Et pour ç' aumosne vous feray.
Tenez pour Dieu ce que vous doing,
Et vous en aidiez au besoing,
Quant vous venra.
ALEXIS. Sire, Diex qui nous jugera
Quant venra la fin de ce monde
Vous face si pur et si monde
De tout vice et si nett et quitte
Que vostre ame en sa gloire habite
Sanz finement.
HUCHON. Or sus, Musehault, alons ment;
Il en est temps par verité:
Nous avons ci grant piéce esté.
Amis, a Dieu!
ALEXIS. Alez. Dieu vous conduie au lieu
Sains des corps ou vous voulriez estre.
Biaux sire Diex, pére celestre,
Debonnaire et misericors,
A toy loer est mes accors,
Et je doy bien a ce fait tendre:
Tu m' as souffert l' aumosne prendre
De mes propres gens, qui veu
M' ont bien et ne m' ont cogneu,
Teue mercy.
MUSEHAULT. Huchon, ou irons nous de cy?
En tant de lieux avons esté
Que je ne scé, par verité,
Ou mais aillons.
HUCHON. Musehault, nous nous traveillons
Et si grevons en vain noz corps.
Sanz plus avant aler m' acors
Qu' erriére a Romme retournons
Et par ce chemin ci tournons
Qui est la voie.
MUSEHAULT. Il me plaist bien, se Dieu me voie.
Puis que nous ne le trouvons pas,
Alons men a Romme bon pas:
C' est nostre miex.
HUCHON. Vous dites voir, si m' aist Diex.
Or avant donc, sanz plus parler,
Ne pensons que de tost aler
Tant qu' i soions.
MUSEHAULT. D' errer, tant que les murs voions,
Ne fineray.
HUCHON. Compains, et j' aussi ne feray
Certainement.
ALEXIS. De ce qu' ay plus habondanment
D' aumosnes que je n' ay besoing,
Seigneurs, pour l' amour Dieu vous doing.
N' ayez point contre moy d' envie,
Car se j' ay plus que pour ma vie,
Certes pas ne le retenray:
A vous ou autre le donray
Sanz point d' atente.
DEUXIESME POVRE. Dieu vous parface en ceste entente,
Sire, qui s' amour si vous doint
Que touz voz meffaiz vous pardoint
Conme il peut faire.
ALEXIS. J' ay grant doubtance de meffaire,
Si m' en revois, seigneurs, arriére
En ma place illeuques derriére
Prier mon Dieu ains qu' ailleurs aille.
Dame des cieulx, quoy que po vaille
Mon povre et las chetif de corps,
Recevez en gré les recors
Que mon cuer de voiz et de bouche
Vous presente ci, car reprouche
De honte ne de vitupére
Ne peut venir a qui se pére
De vous amer, craindre et servir.
Dame, donnés moy desservir
L' amour vostre filz vous servant
Si qu' il me vueille pour servant
Recongnoistre en faiz et en diz
Et recevoir en paradis
Ou si haultement estes mise,
Temple de foy, ou sainte eglise
Prent pour repaistre humanité
Nourreture et solempnité
D' amour qui onc ne varia,
Fleur de foy, ave Maria,
Plaine de grace.
MUSEHAULT. Huchon, tant avons, la Dieu grace,
Erré que nous entrons en Romme.
Ains qu' a femme parlons n' a home,
Alons nous ent de ci endroit
A Eufemian tout droit
Premier parler.
HUCHON. Musehault, soit. Pensons d' aler
Sanz tarder point.
MUSEHAULT. Je le voy la, c' est bien a point.
Devant li presenter me vois.
Sire Eufemian, li roys
Des cieulx, de terre et de nature,
Qui crea toute creature,
Vous esleesse.
EUFEMIAN. Bien vegniez touz deux. Or ça, qu' est ce?
Me ferez vous de voir entendre
De mon filz chose ou puisse prendre
Leesce aucune?
HUCHON. A brief, chier sire, il n' est nesune
Nouvelle qu' en puissons avoir.
Si avons nous, sachiez de voir,
Esté, ce n' est pas moquerie,
Jusqu' en la terre de Cirie,
N' en doubtez pas.
MUSEHAULT. Certes, gasté avons de pas
Moult grant quantité, ce scet Diex,
Et l' avons a jounes et viex
Demandé, mais c' est pour nient, sire;
N' est nul qui nous ait sceu dire
De li nouvelle.
EUFEMIAN. E! Diex, tant va pis ma querelle.
Or voy je bien que c' est acertes.
Toutes douleurs me sont appertes;
Leesce me laisse et s' en fuit
Et a mon cuer tristeur affuit
Et pleurs et plains.
AGLAIS. Sire, pour Dieu, se je me plains,
Ne vous en alez merveillant,
Car en dormant et en veillant
Ne sera pour chose qu' aviengne
Que touz jours ne le pleure et plaingne;
Pour quoy? c' estoit toute ma joie:
Aussi tost com je le veoie,
Mon cuer si joieux devenoit
Que riens entour lui ne sentoit
Fors que leesce.
EUFEMIAN. Or vous deportez, dame: qu' est ce?
Souffrir vous en convient huimais.
Seigneurs, ralons men au palais;
Estre m' y fault.
CONNESTABLE. Sire, si irons sanz deffault
Avecques vous.
SABINE. Sire, alez de par Dieu, et nous
Deux femmes ici demourrons
Ensemble et vous attenderons
Jusqu' au retour.
SECRETAIN. J' ay fait un peu trop de demour,
Que n' ay pas mes matines dites;
Mais afin que j' en soie quittes,
Pour les dire vueil ci mon livre
Attaindre, afin que m' en delivre,
Et moy seoir.
DIEU. A faire vous doit bien seoir,
Non pas de voulenté amére,
Ce que je vous vueil dire, mére.
En cel angle la voy assis
Un nostre servant, Alexis,
Qui la s' est tenuz si long temps
Qu' esté y a dis et set ans,
Pour nous servir plus humblement
Et de cuer plus devotement;
Et combien que la soit venuz,
Si s' est il encore tenuz,
Et tient, tant est doulx et benigne,
Qu' il n' est pas souffisant ne digne
Qu' en l' eglise doie entrer n' estre.
Si vueil que pour li dedans mettre
Ailliez dire a ce secretain
Qu' il l' i amaine par la main,
Que je le vueil.
NOSTRE DAME. Filz, je vueil faire vostre vueil.
Anges, faites moy compagnie
Et chantez de voulenté lie
Moy convoiant.
GABRIEL. Nous le ferons de cuer joiant,
Puis qu' il vous plaist, dame des cieulx.
Avant, Michiel: disons le miex
Que nous sarons sanz faire oiseuse.
RONDEL. Servir, vierge glorieuse,
Vous doit on en loyauté
De benigne voulenté
Et de pensée joieuse
Esdrecée en verité;
Servir, vierge glorieuse,
Vous doit on en loyauté,
Car, dame, en vo precieuse
Char Dieu prist humanité
Qu' il conjoint a deité.
NOSTRE DAME. Secretain, il est verité
Qu' il a la dehors un saint homme
Qui est bien digne, c' est en somme,
Du royaume des cieulx avoir.
S' oroison est, sachiez de voir,
Oye es cieulx, ce te propose,
Et li sains esperiz repose
En son cuer souvent et repaire.
Plus, la biauté de son viaire
En paradis aussi reluit
Com soleil qui sur terre luit.
Va, si le quier et si te paines
Qu' en ceste eglise ci l' amaines;
Dieu le te mande.
SECRETAIN. Ne vous soit grief se je demande,
Dame, conment le trouveray,
Car congnoistre ne le saray
Se n' ay de li aucune enseigne
Ou que qui que soit le m' enseigne;
Si vous pri, dame debonnaire,
Vueilliez me ceste grace faire
Que me vueilliez dire conment
Le trouveray, car autrement
Ne saroie a qui assener
N' en ce moustier qui amener
Avecques moy.
NOSTRE DAME. Secretain, pour ce que je voy
Que vouloir as d' obeissance,
Je t' en vueil donner congnoissance:
Le plus prouchain que trouveras
De l' eglise, quant ysteras,
C' est celi, ce te dy pour voir,
Que tu demandes a savoir.
Quant nous serons de ci partiz,
D' aler le querre t' appartiz;
Plus ne t' en diray. Ore a Dieu!
Ralons nous en en nostre lieu:
Passez, Michiel.
MICHIEL. Glorieuse dame du ciel,
Voulentiers. Avant, Gabriel:
En alant soit nostre rondel
Dit a voiz melodieuse.
RONDEL. Car, dame, en vo precieuse
Char prist Diex humanité
Qu' il conjoint a deité.
Servir, vierge glorieuse,
Vous doit on en loyauté
De benigne voulenté.
SECRETAIN. Estre me fault entalenté
D' aler ce saint preudomme querre.
Je croy que le voy luec a terre
Ou il s' est en oroisons mis.
Vostre main me bailliez, amis:
En l' eglise avec moy venrez.
Vous plaira il que me direz
Sire, puis que nous sommes ci,
Ou vous fustes nez et aussi
De quelle gent?
ALEXIS. De mon estre si diligent
Enquerir, sire, ne vous chaille.
Un povre pecheur sui sanz faille,
A brief compter.
SECRETAIN. Non estes, amis, sanz doubter:
N' omme pecheur ne povre n' estes,
Mais un saint corps digne et honnestes
Que Diex a chier.
PREMIER BOURGOIS. Qu' est ce? Vous vient il empeschier
Ne destourber vostre service?
Je le tenroie a fol et nice,
S' il le faisoit.
DEUXIESME BOURGOIS. Je ne scé se rien vous disoit
Qui vous despleust, secretain;
Dites le nous et pour certain
Devant vous tant le baterons
Que de li bien vous vengerons;
Mentir n' en quier.
SECRETAIN. Seigneurs, pas ne vous en requier,
N' il ne l' a mie desservi.
C' est un saint corps qui ha servi
Dieu tant et si devotement
Que la mére Dieu proprement
Le m' a commandé aler querre
La hors et amener bonne erre
En ceste eglise, comme cilz
Qui de la vierge et de son filz
Est ami vray.
PREMIER BOURGOIS. Puis qu' il est tel, je bien devray
Le loer glorieusement,
Et si feray je vraiement
Quel part que j' aille.
DEUXIESME BOURGEOIS. Si feray je, voisin, sanz faille:
C' est bien raison.
ALEXIS. Puis que suis en la Dieu maison,
Aray je bien espace, sire,
Que je puisse une oroison dire
Lez cest autel?
SECRETAIN. Oil, mon ami, et j' autel
M' en vois faire leuques derriére;
Mais tantost me verrez arriére
Cy delez vous.
ALEXIS. Alez de par Dieu, sire doulx.
Pére des cieulx, puis que me voy
Estre seul ici sanz convoy
Et que j' oy dire c' on me nomme
Un saint homme et un saint preudomme,
Ce nom ne vueil point acepter,
Mais m' en vueil aler sanz doubter
Si loin, que se je sui veuz,
N' y seray je point cogneuz.
Je ne vueil pas par moy aherdre
A vanité ma bonté perdre;
Pour ce m' en vueil en Tarce aler.
A ce marinier vois parler,
Savoir que du mien li donray
Et par li menez y seray.
Sire, Dieu vous gart de mal! Dites,
Dites moy, pour les Dieu merites,
Me voulrez vous en bonne foy,
Satisfier vous en voulroy,
Mener en Tarce la cité?
Je sui celui, par verité,
Qui vous en voulray bien paier,
De ce ne vous fault esmaier,
Se m' y menez.
LE MARINIER. Amis, en ce batel venez;
Je vous meneray voulentiers;
Entrez ens, et endementiers
Mon harnois a point metteray
Et mon voille aussi tenderay.
C' est fait: ne nous fault que mouvoir;
Nous avons assez bon vent, voir,
Ce vous puis dire.
ALEXIS. Mouvons donc, de par nostre sire,
Qui nous conduie.
LE MARINIER. Egar! ce temps se met en pluie
Et le vent s' est tout au contraire
Tourné, si que ne pouons traire
Fors la ou mener nous vouldra.
Se Dieu plaist, il ne durera
Mie grantment.
ALEXIS. La voulenté premiérement
De Dieu soit faitte.
LE MARINIER. Qu' est ce cy? Ce temps ne s' affaitte,
Ne cest orage point ne moustre
Qu' il doie encore passer oultre,
Ne qu' il doie em piéce cesser,
Ne nous ne pouons adresser
A ce que nous puissons venir
Au chemin de Tarce tenir,
Mais alons ce devant derriére.
Vezci du Toivre la riviére;
Tenez pour certain, biau preudomme,
Descendre vous convient a Romme:
Cest orage est trop malement
Divers et dure longuement,
Vous le veés.
ALEXIS. Puis que le chemin deveez
M' est, qu' en Tarse aler ne pourray,
A Romme donc descenderay
Quant vous plaira.
LE MARINIER. Mon ami, maintenant sera,
Car le vent si nous y arive.
Descendez; nous sommes a rive
Venuz tout droit.
ALEXIS. Puis qu' il me fault ici endroit
Descendre, je descenderay
Et a Dieu vous conmanderay.
Je voy bien que cy demourrez
Et vostre bastel garderez,
Mais je par ici tourneray,
Et sache Diex je n' enterray
En maison nulle qui m' appére
Fors qu' en la maison de mon pére
Tant seulement.
CONNESTABLE. Maishuy ferons trop longuement,
Mon seigneur, noz dames jeuner:
D' aler ent nous convient pener
Un po plus tost.
EUFEMIAN. Nous serons a l' ostel tantost;
N' y a de voie que deux pas.
Or sus, ne vous arrestez pas:
Alez touz jours.
ALEXIS. Serf de Dieu, qui par mains biaux jours
Avez, si conme l' en recorde,
Fait a povres misericorde,
Sire, pour la Dieu amistié,
Aiez de moy povre pitié.
Povre sui je: ne m' estrangiez;
En vostre hostel me hebergiez,
Et me soiez si secourable
Que du relief de vostre table
Je puisse ma vie repaistre;
Que Dieu, qui de vierge volt naistre,
Vueille ta vie beneir
Et te doint encore veir
Un filz que tu as par pais
Pelerin, dont es esbahis,
Et combien qu' il soit ore hors,
Doulx li soit et misericors
Le roy des cieulx!
EUFEMIAN. Amis, pour l' amour de mon fieulx
Que m' as ici ramenteu
M' as de pitié le cuer meu.
Pour s' amour te hebergeray
Et en mon hostel t' enmenray.
Vien t' en, vien après moy le pas:
A heberge ne fauldras pas.
Aglais, je vien.
AGLAIS. Je pense que vous faites bien,
Sire, et est temps.
EUFEMIAN. Dites moy, dites sanz contens
Lequel de vous se ventera
Que cest estrange homme voulra
Garder en son lit et servir?
Et je le voulray desservir
Qu' il sera franc toute sa vie,
Qui qu' en ait engaigne n' envie,
Et avec ce li donray rente
Assise en maison, c' est m' entente,
Pour son salaire.
SERVITEUR. Sire, je n' ay pas moult a faire:
S' il vous plaist, je le garderay
Voulentiers et le serviray
A son delit.
EUFEMIAN. Bien est. Or li vas faire un lit,
Qui sera appellé grabat,
Dessoubz ce degré, sanz debat,
Si que quant en ma chambre iray
Ou quant dehors m' en ysteray,
Que le voie touz jours a l' ueil,
Et si gardes bien, je le vueil,
Que ne le courrouces en rien;
Et encore te dy je bien
Je vueil qu' il menjue a ma table
Et que soies entremetable
De li servir.
SERVITEUR. Pour la vostre amour desservir
Quanque me conmandez feray.
Son lit en l' eure faire iray.
C' est fait; cy plus ne vous tenez,
Amis, mais couchier vous venez
Ou vous menray.
ALEXIS. Sire, voulentiers le feray,
Car certes j' en ay grant mestier:
Ne ju plus a d' un an entier,
Sachiez, en lit.
SERVITEUR. Or vous couchiez cy par delit,
Amis, com voulrez, bas ou hault,
Et demandez se riens vous fault,
Et vous l' arez.
ALEXIS. Sire, le bien que me ferez,
Les suffrages et le service
Et les humains faiz vous merisse
Le roy de gloire.
SERVITEUR. Se vous voulez mengier ne boire,
Dites le moy.
ALEXIS. Je ne vueil, amis, fors qu' un poy
Prendre de somme.
SERVITEUR. Dormez, et tantdis a un homme
Vois parler a qui a faire ay.
En l' eure a vous retourneray
En ceste place.
ALEXIS. Allez, amis, que Diex nous face
Tieulx que pour lui.
GUIOT. Joscet, je te pri qu' a celui
Qu' a fait mon seigneur herbergier,
Alons dès ici sanz songier
Et regardons sa contenance;
Car je te dy j' ay ma creance,
Ce n' est q' un paillart affaittié,
Qui deçoit de sa mauvaistié
Ainsi les gens par son parler.
Diligens de bien escouter
Estre alons tout ce qu' il dira
Et de regarder qu' il fera
Nous deux presens.
JOSCET. Tu ne diz mie quelz presens
Ly porterons.
GUIOT. Raffardes que nous li dirons
Et moqueries.
JOSCET. Alons men, mais que tu ne ries:
Tu le verras ja tempester.
Amis, nous vous venons taster
Le pous pour donner medicine.
Se vous aviés une mechine,
Vous sariez vous bien entremettre
De deux ventres sur un dos mettre?
Oil, ce tien.
GUIOT. Que cuides tu qu' il sceust bien
Deux dez asseoir et jetter
Et a un flavis mesconter
Si que sa chance perderoit?
Et cuides tu point qu' il saroit,
S' il estoit entre gens la hors,
Contrefaire le povre corps
Et le cayment affaittié?
Oil, si que de la pitié
Qu' il feroit a la povre gent,
Voulsissent ou non, leur argent
Ly donroient, ce n' est pas truffe;
Et si te promet qu' une buffe
A une femme tost donroit
Que seule ou que soit trouveroit,
S' elle li estoit si rebelle
Qu' il ne feist son vouloir d' elle:
Je n' en doubt point.
JOSCET. Et ne scet il faire ce point,
Que quant en la taverne va,
S' il avient que point d' argent n' a
De quoy l' escot qu' il fera paie,
Que pour ce d' estre aise s' esmaie?
Nanil, mais boit et est tout aise,
Et puis, pour ce qu' a nul ne plaise,
Prent a rioter et debatre
Et se veult a chascuns combatre
Et crie la dedans a hors
A la fin qu' il soit bouté hors
De la taverne.
GUIOT. Ne doubtez qu' il ne se gouverne
Bien a son eus.
JOSCET. De meilleur pitence que d' eufs
Vous norricez, truant paillart.
S' en moy en fust, par saint Lienart,
Ou ce lit ici vuidissiez
Ou par les costez eussiez
D' un gros baston.
GUIOT. Ici plus ne nous debaton.
Alons men, car en verité
Nous avons ci assez esté
Pour une foiz.
JOSCET. Ha! s' il osast, de grant bouffois
Nous eust dit.
ALEXIS. Sire Diex, de fait et de dit
Vous glorifi en vostre throsne,
Qui m' avez donné la ramposne,
Le mal parler, la villenie
Que m' ont dit ma propre mesnie,
Sire, en pacience porter
Et m' en en joie deporter;
Car je congnois pour veritable
ç' a esté euvre de dyable:
Pour ce ligiérement m' en passe.
Sire, donnez moi vostre grace
Et vostre amour.
DIEU. Gabriel, va t' en sanz demour
A Alexis faire savoir
Qu' avecques moy le vueil avoir
Et oster de ceste mondaine
Vie ou il n' a eu que paine
Et si le vueil, c' est mon propos,
Mettre en pardurable repos
Et qu' il s' ordaine tellement
C' on sache après sa mort conment
Il a pour Dieu povre vesqui
Et qui il est et ou nasqui
Et son affaire.
GABRIEL. Pére de gloire, je vois faire
Vostre vueil sanz arrestoison.
Alexis, enten ma raison:
Dieu te mande que tu t' ordaines,
Car en ces mesaises mondaines
Ne te veult plus laissier y estre,
Ains te veult en sa gloire mettre;
Si soit ta vie par escript
Mise, conment pour Jhesu Crist
Tu t' es volu povre estre fait,
Qui tu es et que tu as fait,
Afin que ton renom en croisse
Et que le monde te congnoisse,
Qui pour toy loe Dieu aussi.
Es cieulx m' en vois et te lais cy
Sanz plus riens dire.
SERVITEUR. Pour Dieu, s' ay trop demouré, sire,
Qu' il me soit de vous pardonné.
Acoustumé mie ne l' é,
Vous le savez.
ALEXIS. Biau frére, ce que fait avez
Je vous pardoing quant a present,
Mais que me faciez un present
D' une piéce de parchemin
Et d' une penne et d' enque fin:
Je vueil escripre.
SERVITEUR. Et je vous en vois querre, sire:
Souffrez vous, je revien en l' eure.
Tenez, je n' ay pas fait demeure:
Vezci penne, enque et parchemin
Aussi blanc com ce fust vellin
Et bon et nett.
ALEXIS. Mestier ay bien de tel varlet;
Encore vous vueil dire, frére,
Traiez vous un petit arriére.
Quant ceste lettre escript aray,
Tout a temps vous appelleray
A ci venir.
SERVITEUR. Sanz moy plus ci endroit tenir
Donques m' en vois.
ALEXIS. Conmencier vueil, si com la vois
M' a dit, a faire mon escript;
Et quant je l' aray tout escript,
Comme lettre le plieray
Et en ma main le retenray
Tant que Diex si ordenera
Personne a qui baillié sera. <Icy escript.>
Certes je l' ay fait a grant paine,
Car maladie trop me paine.
Ore c' est fait: loué soit Diex!
Mais pour le garder net et miex
Le vueil plier; miex l' en tenray.
Mon serviteur appelleray.
Venez a moy, venez, Lorens:
Vostre enque et la penne vous rens,
Mais ceste lettre garderay
Et ici me recoucheray
Que plus n' en puis.
SERVITEUR. Je vous ayderay, sire, puis
Que vous vous sentez si grevé.
Sanz raison vous estes levé:
ç' avez mal fait.
ALEXIS. Faire le me failloit de fait,
Mon ami chier.
HONOIRES. Sanz nous d' autre chose empeschier,
Je lo que nous deux sanz sejour,
Archadès sire, il est bon jour,
Alons le Dieu service oir,
Pour noz ames faire esjoir,
Qui a saint Pierre se fera;
L' appostole aussi y sera,
ç' ay je oy dire.
ARCHADèS. Il me plaist bien, s' il vous plaist, sire;
Alons bonne erre.
HONOIRES. Mais alons l' appostole querre
Et compagnie li tenons:
Nous ferons, se nous l' i menons,
Nostre honneur grant.
ARCHADèS. Soit donc, seigneur. Or tost, engrant
Soiez entre vous deux d' aler
Devant nous, a po de parler,
Jusques a l' ostel du saint pére,
Et que le chemin nous appére
Vuide de gens.
PREMIER SERGENT. De ce ferons con diligens
Quanque pourrons.
DEUXIESME SERGENT. Il dit voir; voirement ferons.
Alez arriére!
PREMIER SERGENT. Se ne voulez que je vous fiére,
Par amour traiez vous en sus.
Vuidiez de ci, vuidiez: sus, sus!
Faites nous voie.
HONOIRES. Saint pére, je vous desiroie
Trouver ici de cuer entier.
Dites, venrez vous au moustier?
On dit qu' avez entencion
D' y estre hui par devocion,
Et nous, en l' umbre de bien faire,
Vous venons compagnie faire,
Mais que vueilliez.
LE PAPE. Je seroie mal conseilliez
Se je de vous cure n' avoie:
Vous me faites honneur et joie.
Oil, avec vous m' en iray
Maintenant, plus n' attenderay.
Avant: soions d' aler ysniaux.
Suivez moy, suivez, cardinaux;
ça, alons ment.
ARCHADèS. Alez, sire, premiérement;
Nous vous suivrons.
HONOIRES. L' onneur que faire vous devrons,
Puis que nous sommes au moustier,
Vous ferons de vouloir entier,
C' est de raison.
LE PAPE. Seigneurs, puis qu' en la Dieu maison
Sommes, je pren ma place cy.
Vous, empereurs, faites aussi:
Seez vous delez moy. Or ça,
Et vous, cardinaulx, par deça
Venez seoir.
PREMIER CARDINAL. Saint pére, de nous pourveoir
De place bien nous chevirons.
Plus bas que vous cy nous serrons,
N' en doubtez pas.
DEUXIESME CARDINAL. Voire, et si los que disons bas
Noz heures tant que le dyacre,
Les cueriers et le soubzdiacre
Voions cy devant l' autel estre
Venuz revestuz et le prestre;
Car par eulz se fera l' office
Solempnel et le Dieu service
Ici endroit.
LE PAPE. C' est bien dit, et si avez droit
De ce faire, ne vous desdy.
ça, disons bas tierce et midy,
C' est bon a faire.
L' ANGE <qui dit a haulte voiz>. Venez a moy pour vous reffaire,
Vous qui en oroisons veilliez,
Qui estes griefment traveilliez
Et faites dure penitence,
Et je vous donray alejance,
Et si vous assouageray
De vos peines et vous feray
Avoir repos.
LE PAPE. Biau sire Diex, qu' est ce que j' os?
Sire, pour ta misericorde,
A nous t' apaise et te racorde.
Biaux seigneurs, avez vous oy
Une voiz qui m' a esbahy
Trop malement?
ARCHADèS. Oil, saint pére, vraiement;
Si tost conme je l' entendi
De paour a Dieu me rendi,
Criant mercy.
HONOIRES. Certes, je m' esbahis aussi,
Si qu' a po que ne me laissay
Cheoir a terre, et conmençay
Ma letanie lors a dire,
Mercy priant a nostre sire
D' umble courage.
PREMIER CARDINAL. Je croy qu' il n' est homme si sage
Qui ne s' en doie esbahir, voir,
Et grant paour au cuer avoir
S' il l' a oye.
DEUXIESME CARDINAL. Vraiement vous ne mentez mie.
Je lo qu' a terre nous mettons
Et par devocion jettons
Noz cuers a Dieu.
LE PAPE. Disons chascun ci en son lieu
Devotement la kyrielle,
Que c' est une oroison moult belle
Et haulte a dire.
L' ANGE. Encore de par nostre sire
Vous dy que l' omme Dieu querez
Et humblement li requerez
Qu' il prist pour Romme.
ARCHADèS. Saint pére, ou querrons nous cest homme?
Aidiez nous ent a conseillier,
Car ce ci fait a merveillier
Trop malement.
HONOIRES. Vous dites voir, se Diex m' ament.
Saint pére, dites que ferons,
Conment, n' en quel lieu le querrons
Dès ores mais.
LE PAPE. Alons men de cy touz huymais,
Et demain nous rassemblerons
Pour regarder que nous ferons
De ce fait cy.
PREMIER SERGENT. C' est bien dit: alon men de cy.
Nous irons le chemin faisant
Devant vous touz en apaisant
Les bonnes gens.
DEUXIESME SERGENT. Estre nous en fault diligens.
Sus devant, sus, se Dieu vous voie!
Bonnes gens, faites nous cy voie:
Alez en sus.
ALEXIS. Je vous rens graces, doulx Jhesus,
Et loenges, c' est de raison,
Qui ci m' avez en la maison
De mon pére dis et set ans
Souffert estre, c' est un long temps,
Et de moy telle cure eu
Que nulz ne m' i a cogneu,
Ne n' a riens sceu de mon estre.
Ha! tresdoulx Dieu, pére celestre,
Je sens bien que suis a ma fin.
Sire, je te pri de cuer fin
Que tu mes pechiez me pardonnes
Et a m' ame ta gloire donnes,
Si que par tes anges es cieulx
Soit translatée, sire Diex
Misericors.
ARCHADèS. Pour savoir coment de ce corps
Pourrons faire que nous appére,
Vous venons demander, saint pére,
Qu' est bon a faire.
LE PAPE. Seigneurs, nous ne pouons meffaire
Ni en riens ne nous detrions
Se premiérement Dieu prions
Que nous avoit.
HONOIRES. J' en suis bien d' accort, sire. Or voit:
Soit fait en l' eure.
DIEU. Entre vous, anges, sanz demeure
Descendez, il en est mestier.
A celui qui de cuer entier
Et parfait vous et moy, mére, ayme
Et qui doulcement vous reclayme
Vueil donner confort sanz espace.
Chascun de vous devant moy passe
Ou vous menray.
NOSTRE DAME. Mon fil et mon Dieu, je feray
De cuer quanque conmanderez.
Or sus, anges: vous chanterez
Devant nous deux.
GABRIEL. Si le fera de cuer joyeux
Chascun de nous.
DIEU. Or entendez: attournez vous
A aler la en ce mesnage,
Et en alant selon l' usage
De voiz angelique chantez
Chant qui de vous soit frequentez
Et bien sceu.
MICHIEL. Vraiz Diex, puis qu' il vous a pleu
Le conmander, il sera fait.
Gabriel, sus: disons de fait
Si que n' en façons a blasmer.
RONDEL. Vray Dieu, en qui n' a point d' amer,
Qui vous et vostre mére sert
Pardurable gloire dessert.
Pour ce vous doit chascun amer
Voire en secré et en appert,
Vray Diex ou il n' a point d' amer,
Et dire et en terre et en mer
Que nul son service ne pert
Qui le met en vous, mais appert.
DIEU. Dès ore mais ce qu' a souffert
Cest homme cy mesconneu
Et les paines qu' il a eu
Et enduré pour m' amistié,
Au monde venront a clarté.
Anges, mettez vous en saisine
De son ame, car le corps fine,
Qui tellement a en ce monde
Vesqu que l' ame est pure et monde
Et qu' il a, tant m' a il servi,
La gloire des cieulx desservi,
Voire et vous, dame.
NOSTRE DAME. Pour ce, chier filz, en avra l' ame
Repos es cieulx sanz finement
Et gloire pardurablement
En hault degré.
GABRIEL. Vray Dieu, fait avons vostre gré:
Vezcy l' ame que nous tenons,
Que de ce corps querre venons;
Que ferons plus?
DIEU. Es cieulx nous en irons, or sus,
Et avec vous l' emporterez
Et en alant parchanterez
Vostre rondel.
MICHIEL. Nous le pardirons bien et bel.
Compains, au retour nous mettons
Et en alant d' accort chantons,
Ce ne nous doit pas estre amer.
RONDEL. Et dire et en terre et en mer
Que nulz son service ne pert
Qui le mett en vous, mais appert,
Vray Dieu en qui n' a point d' amer
Qui vous et vostre mére sert
Pardurable gloire en dessert.
L' ANGE. Je vous dy a touz en appert
Que cy voy estre en oroyson:
Alez vous ent en la maison
D' Eufemian; la querez
Le saint corps, la le trouverez
Certainement.
LE PAPE. Seigneurs, alons appertement
Chiez Eufemian savoir,
Qu' il ne nous cèle pas le voir
De ce saint corps.
ARCHADèS. Saint pére, alons: je m' y accors
Tresvoulentiers.
HONOIRES. Si fas j': alons endementiers
Qu' avons espace.
LE PAPE. Eufemian, Dieu vous face
Lié de cuer! un po nous grevez:
Le saint homme ceens avez
Que la voys nous a revelé,
Et si le nous avez celé
Sanz le nous dire.
EUFEMIAN. Je vous jur et ce scet Diex, sire,
Que je ne scé ceens personne
Qui la grace ait d' estre si bonne.
Dites moy, Lorens, le savez,
Par la foy que vous me devez,
S' il y a nul de ma mesnie
Qui ait, ne le me celez mie,
Tele grace, que Dieus tant aime,
Que la voiz ami Dieu le claime
Par toute Romme?
SERVITEUR. Certes, sire, je ne scé homme
De voz gens, ne n' ay point sceu
Estre si saint. J' ay bien veu
L' omme que vous me conmandastes
A garder, puis que m' en chargeastes
Faire ce que je vous diray,
Ja de mot ne vous mentiray:
Aux dimenches esconminchier,
Après ne mengoit, sire chier,
Le jour que deux onces de pain,
Ne buvoit qu' yaue pour certain
Et po la sepmaine en buvoit,
Après jour ne nuit ne dormoit,
Mais avoit coustume et maniére
Que touz jours estoit en priére:
De c' estoit il moult diligens.
Voir est que de voz jounes gens
Plusieurs souvent si le gaboient
Et de parolles l' assailloient,
Mais onques ne s' en courrouçoit,
N' en yre ne s' en esmouvoit,
Ne n' avoit sur eulz pour c' envie.
Trespassez est de ceste vie,
Et n' a q' un poy.
EUFEMIAN. Ne vous deplaise, attendez moy,
Mes seigneurs: en l' eure revien.
Icy va et puis revient.
ça! j' ay trouvé, je vous dy bien,
Ce que nous querons, mes seigneurs.
Je vien de veoir les greigneurs
Merveilles que vous pourrez croire.
J' ay hebergié, c' est chose voire,
En cest hostel un estrange homme;
Je croy n' avoit si povre a Romme
Comme il estoit pour celui temps.
Il a ja bien dis et set ans,
Et touz jours malade a esté;
Mors est, mais a la verité
Le visage a resplandissant
Conme un ange et aussi luisant,
Et si vous dy pour tout certain
Qu' une lettre tient en sa main
Que je ne puis avoir eu
Pour rien que faire aie peu.
De vie a esté si petite
Qu' il est homme de grant merite,
Je n' en doubt pas.
ARCHADèS. Faites le mettre isnel le pas
En un lit qui soit attourné
Richement et bien aourné;
Et quant vous l' arez ainsi fait,
Nous touz ensemble irons de fait
Pour le veoir.
EUFEMIAN. D' un hault lit m' alez pourveoir,
Rousselet, et toy, Connestable,
Et si soiez entremettable
De le parer miex c' on pourra;
Et puis quant ainsi fait sera,
Vous coucherez ce corps dedens.
Alez, si leur aidiez, Lorens,
Isnellement.
CONNESTABLE. Mon seigneur, faire alons briefment
Vostre plaisir.
ROUSSELET. Quant de moy, j' en ay grant desir
Et voulenté.
SERVITEUR. En ce fait ci, par verité,
Devons bien chascun de cuer estre
Et a le faire la main mettre
Miex que pourrons.
ROUSSELET. Alons, alons: bien le ferons,
Si com je pens.
CONNESTABLE. Sur son lit n' a nulz paremens:
Couvrons le de ces draps d' or cy.
Bien est; en my la sale ainsy
L' en emportons.
SERVITEUR. Dit est: sus, et nous deportons
En li porter.
LE PAPE. Seigneurs, sanz nous plus deporter,
Vez la le corps c' on a jus mis.
Alons le veoir, mes amis,
Trestouz ensemble.
HONOIRES. Alons: n' est que bien, ce me semble.
Sains homs, qui ci gis a honneur,
A nous deux, combien que pecheur
Soions aussi comme autres hommes,
Toutes voies empereurs sommes
Et l' appostole, vez le cy,
Y est present, qui est aussi
Pére de touz les crestiens,
Celle chartre qu' en ta main tiens,
De par Dieu nous laisses venir,
Sanz la plus si forment tenir,
Afin que nous puissons savoir
S' il y peut rien de toy avoir
Ne dont tu es, ne de quel estre.
Paix, biaux seigneurs; vezci la lettre
Qu' il tenoit si ferme en sa main,
Qu' il m' a laissié venir a plain.
Ceci n' est pas sanz grant mistére.
Dites: qui voulez vous, saint pére,
Qui la vous lise?
LE PAPE. Ce cardinal, qui scet la guise
De lire latin et romans.
Prenez la, je le vous commans,
Si la lisiez.
PREMIER CARDINAL. Bonnes gens, je vous pri, taisiez,
Et entendez, pour Jhesu Crist,
Ce qu' en ceste lettre a escript.
Ou nom de Dieu premiérement,
Qui n' a fin ne commencement,
A ceux qui ces lettres verront
Fas savoir, ou qui les orront
Lire, soit ci ou autre lieu,
Que j' Alexis, povre pour Dieu,
Ou moustier de saint Boniface,
Il a trente et quatre ans d' espace,
Pris a femme par mariage
Sabine, la fille Lipage,
Et la propre nuit la laissay;
N' onques d' errer je ne cessay,
Ains pris mon chemin et m' adresse
Jusqu' a la cité de Edesse.
La conversay près du moustier
Nostre dame, il m' en fu mestier;
La des gens l' aumosne prenoye
Pour ce que mestier en avoie,
Et la leur aumosne me firent
Les gens mon pére qui me virent,
Et si croy bien qu' ilz me queroient,
Mais pour lors ne me congnoissoient,
Car Dieu sy ne le vouloit pas.
Je les cogneu isnel le pas,
Quoy que n' en feisse semblant,
Et pour ce m' alay d' eulx emblant.
Après, quant en celle cité
J' o par dis et set ans esté,
Je m' en parti, c' est chose voire,
Pour la doubte de vaine gloire,
Si m' en cuiday en Tarce aler;
Mais quant je me fu mis en mer,
Le vent tellement se tourna
Que de Tarse me destourna
Et m' apporta par la riviére
Du Toivre cy a Romme arriére.
Ainsi que par la ville aloye,
Mon pére encontray en ma voye,
Si li requis, pour l' amistié
De Dieu, qu' eust de moy pitié
Et qu' il me voulsist herbergier
Et de son relief a mengier
Me donnast, pour la Dieu amour,
Et il le me fist sanz demour.
Assez de foiz m' a puis veu,
Sanz ce qu' il m' ait point cogneu.
Herbergié m' a dis et set ans.
Quant j' ay cogneu que le temps
Si est aprouchié de ma fin,
J' ay enque pris et parchemin
Et ay tout ce fait escript, voire,
Pour ce que l' en en ait memoire.
Si pri qui lira ceste lettre,
En quoy ma vie ay sceu mettre,
Qu' il prit Dieu qu' ait de moy mercy
Et ceulx qui l' orront dire aussi
Prient pour moy.
EUFEMIAN. E! mon tresdoulx enfant, pour quoy
Avez m' ame ainsi courroucié,
Ne pour quoy mon cuer adressié
Avez en si grant dueil et mis?
Car je vueil que sachiez, amis,
C' est a touz les jours de ma vie.
Elas! je ne cuidoie mie
Que de ce siecle trespassasses,
Ne que tellement t' en alasses
Qu' avant ne parlasses a moy!
Mais non feras; car je te voy
Sanz ame en ce lit jesir mort.
Filz, qui estoies le confort
Et le solaz de ma viellesce.
Quelle doleur, quelle tristesce
Mainray pour toy dès ore mais!
Ne me puis sur piez tenir, mais
Pasmer me fault.
AGLAIS. E! bonne gent, s' en moy deffault
Joie, ne vous en merveilliez.
Pour Dieu, consentez et vueilliez
Que je voise mon filz veoir;
Car je vous puis dire pour voir
De ma vie estoit l' esperance:
C' estoit m' amour et ma fiance.
Pour ce, entre vous qui ci estes,
Plorez avec moy et dueil faites;
Car de plorer ay bien raison.
Dis et set ans en ma maison
A esté et l' i ay veu,
Et si ne l' ay point cogneu,
Ne personne de mon hostel;
Ne savoient a dire quel
Nom il avoit, ne dont venoit,
Ne de quelle contrée estoit,
Ne de quelx gens ne de quel estre.
Ha! mon chier filz, comment peut c' estre
Qu' en la maison ton propre pére,
Que veoies et moy, ta mére,
Chascun jour mener dueil pour toy,
Tu t' es tant celé? ne pour quoy
Ne nous as tu fait assavoir
Qu' Alexis estoies nostre hoir?
ç' a esté petite amistié
Qu' avoies a nous et pitié,
Ce m' est avis.
LE PAPE. Dame, sanz faire long devis,
Je voy baisié l' avez assez.
Plus le baisiez, plus vous lassez:
Depportez vous.
AGLAIS. Souffrez vous, souffrez, pére doulx;
Laissiez moy de plorer reffaire,
Car j' ay bien cause de ce faire
Certainement.
SABINE. E! lasse, or puis je vraiement
Dire que je sui povre veuve,
Ne n' est mestier que je le preuve.
N' ay mais mari que doye attendre,
N' a riens s' a plorer non entendre.
Je voy que ci trespassé gist
Celui qui tant de bien me dist
De l' estat de virginité.
Ne cuiday pas en verité
Que partir de moy se voulsist
A celle heure, si conme il fist,
Mais doulcement m' araisonna
A celle heure et si me donna
Cest annel et ceste sainture,
Et me pria par tresgrant cure
Que pour s' amistié les gardasse,
Afin que quant les regardasse
J' eusse de li remembrance,
S' il n' y estoit, et souvenance.
Or est fait. La gist trespassé,
Dont mon dueil n' ay mie passé,
Mais touz les jours le ploreray,
Et pour s' amour me garderay
Vierge touz les jours de ma vie.
Jamais ne quier avoir envie
D' omme nul a mari avoir,
Mais touz les jours pleureray, voir,
Le sien trespas.
ARCHADèS. Seigneurs, je ne conseille pas
Que maishuy plus ici soions,
Mais lo que ce saint corps levons
Et le portons de plaine face
En l' eglise saint Boniface
Trestouz ensemble.
LE PAPE. Vous dites le miex, ce me samble.
Or vous diray que vous ferez:
Vous deux devers les piez irez
Et si le porterez devant;
Ces autres hommes en suivant
A le porter vous aideront;
Je tien que de cuer le feront,
Et si en avront tresgrant joie.
Or avant, mettez vous a voie:
Mes fréres et moy vous suivrons
Et de cuer a Dieu chanterons.
Vous, clers, vostre chant adrescez
Et de floreter ne cessez
En alant, tant que soyons la:
Regina celi, lettare, alleluia, etc. .
Explicit. Deo gracias.