UNIVERSITÉ D'OTTAWA Faculté des Arts

Laboratoire de français ancien

 

Rosarius, Miracle XII


MIRACLE XII (chap. 33)

 
47 r° b
D'un jone homme que Nostre Dame resuscita, qui la s[alu]oit par cent et cinquante Ave Maria.
48 r° a
En Breben fu un jouvenciaus
Qui estoit et gentis et biaus,
Abandonné a vanité
Du monde plain d'iniquité.
Estroitement estoit chaucié, 5
Cointe, mignot, apigacié,
Rempli d'ordure et de pechié;
[M]olt l'avoit le siecle enlacié.
[Nequ]edent molt devot estoit
48 r° b
A Nostre Dame et si disoit 10
Cent cinquante Ave Maria
Tous les jours; molt son cuer y a.
Et pour ce que on ne vit mie
Tous tans, une grief maladie
L'a pris et l'a geté en biere. 15
Mors a a tous ceste maniere,
Voirs est: aucun sont escorchié
Li autre sont en mer noié;
Li autre sont en l'air pendu;
Li autre, le sanc espandu, 20
Deffaut ont de sepulture;
Tiex mors est plainne de laidure.
Mez quant on muert communement,
J'enten aussi devotement
O lez sacremens de l'Esglise, 25
Et c'on a fait bien sa devise,
Tiex personne petit plouree
Doit estre; el est beneüree.
Li temps est tiex: qui ainssi muert,
Assez gaaigne et rien ne pert. 30
Qui pert le monde, il ne pert rien,
Quar il ne vaut la queue d'un chien.
Ciz est trop folz qui le monde aime;
Li mondes n'est mez c'une saime
Qui les pecheurs en pechié lace 35
Et en enfer en fait grant masse.
Mez quant on muert de mort soudainn[e]
Ou par tourment ou par grief painne,
Tiex mors doit estre piteuse;
Espantable est et doulereuse 40
Et de tiex gent on doit plourer
Et pour leur ames Dieu ourer,
Faire aumosnes pour leur ames.
Ainsi le font les vaillans fames
Pour leur maris, pour leur amis, 45
Que ne les griet li ennemis.
48 v° b

En biere gist ciz jones homs;
Mestier li fust qu'eust esté bons.
Devant Dieu va en jugement,
Accusés est horriblement. 50
Par mout d'eures ilec demeure.
Sa suer, nonnain, delez lui pleure.
Par aventure dist son sautier.
De ce li mort ont grant mestier,
Et pour ce il ont bonne guise, 55
Qui autre part ou en l'eglise
Font delez le cors psiaumoier,
Que Diex l'ame weile avoier,
Que arriver puist a bon port.
Mes nostre jouvenciaus si dort 60
Et si dort. Il sauvé sera,
Marie le suscitera.
Donc tantost est resuscité
Et prist a dire la vrité
Que en l'autre siecle a veüe. 65
Quant vit sa suer et l'a queneue,
49 r° a
Li dist: «Le prestre faites venir
Pour ma confession oïr.»
Tretuit s'en sont esmerveillié.
Li prestres molt en est lié. 70
Quant venus fu, dist erraument:
«Rap ai esté au jugement.
M'ont accusé li anemi,
Qui a nului ne sont ami,
De trois choses. Mes Nostre Dame, 75
Quant il ravir vouloient m'ame,
Empetra devers son fil douz
Que soie revenus a vous
Pour avoir vraie repentance
Et de mes meffais alejance.» 80
Penitance purge pechié,
Ou quel plurieurs sont enlacié.
Tant com tu iés en ceste vie,
Repen toy de cuer et Dieu prie
Qu'il te pardoingne ta folie 85
Et qu'ele ne soit point punie
Par la painne qui est si grieve
D'enfer; qui i chiet n'en relieve.
Diex nous commande lui prier;
C'est pour nous a lui ralier, 90
Quar pechié de li nous deslie,
Mes penance nous i ralie.
Sachiez qu'oroison vaut petit
S'ele n'est faite d'apetit.
Quant est faite en deue maniere, 95
Adonc est bonne la priere.
50 r° a
Cis homs a dist les trois pechiez
Pour quoi devoit estre jugiez.
«L'un est quar retenu avoie
Les dismes qu'au prestre devoie. 100
Le secont qu'avoie emblé poisson
A hommes de religion.
Li tiers quant je chacier aloie
Les biens as povres gens gastoie.
Sentence contre moy getee 105
Devoit estre quant dame Maree
Pria que revenisse a vie.
Benoite soit dame Marie!»
Le premier sacrilege est dist
Contre Dieu et Jhesu Crist. 110
Combien que disme soit au prestre,
Diex est le principal mestre;
Le maistre principal est Dieu,
Li prouvoire tiennent son lieu.
Donc ce que au prestre ravis, 115
A Dieu ostes, ce m'est avis.
Se dis: «ll vivent ordement.
Leur biens despendent folement,
As povres donnent povrement
Ne sont digne d'avoir nient.» 120
D'eulz jugier a toy n'apartient.
De tous ne fai mais jugement:
S'aucun ne mainnent sainte vie,
S'avancié sont par symonie,
Se c'est voir, mais sont li donneur 125
Et autressi li receveur.
Aucun sont larron et robeur
Et des biens Dieu dislapideur.
Je t'acort bien que c'est damage
De tiex promovoir et outrage. 130
50 v° b
De larrecin dire vous weil.
Plurieurs, pour mener leur orgueil
Et pour acomplir lecherie,
S'entremettent de roberie.
Garde ta main de rien embler, 135
Qu'el ne face le pié baler.
Se larron pensoit qu'il doit pendre,
Il s'atendroit d'autrui bien prendre;
Mez pour ce qu'il n'i pense mie,
S'abandonne a roberie. 140
Ne fay a autrui ne qu'a toy,
Tu acomplis de Dieu la loy.
Tu ne wielz que on t'emble rien
Et tu aussi d'embler t'atien.
Dison de l'autre vanité 145
Qui tourne a joliveté
De chacier par chans, par garennes.
Il fust mestier qu'il eussent pennes
Pour voler par dessus les blés,
Que il ne fussent point troublés. 150
Pour acomplir leur fol corage
Es biens terriens font grant damage
Desquiex doit vivre povre gent,
51 r° a
Qui souvent ont petit d'argent.
Se damage as fait a autrui, 155
Restablir dois a icelui,
Quar le damage tu dois rendre
S'au gibet d'enfer ne vielz pendre.
Ainsi le fist cest suscité:
Quant devant tous eut dit vrité 160
Et faite sa confession,
Receue l'asolucion,
Les damages commande a rendre,
Assigne ou les pourroit prendre.
Sa besoingne bien ordenee, 165
L'ame de lui s'en rest alee
En bonne esperance et liee.
N'a pas fait longue demouree
En ceste chetive contree.
Benoite soit, dame, que nee 170
Fus l'eure! Molt as grant povoir,
Molt iés dame de grant valoir.
Qui te sert par devocion,
Tu li empetres mansion
Ou ciel la sus, ou iés roÿne. 175
Je te pri, dame, que benigne
Me veuiles estre en ceste vie,
A la fin me soies amie.


Page d'accueil


Dernière mise à jour : 08.11.1999
Pour toute question au sujet de ce site, veuillez vous adresser à :
E-maillabo@francaisancien.net