UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XIII
MIRACLE XIII (chap. 35)
57 r° a
De Nostre dame, qui visita frere Pierre a sa mort.
58 r° a
En Prouvence estoit un couvent.
Un frere y avoit qui souvent
Aouroit la bele Marie;
La servoit com dame et amie.
Le couvent non Podium avoit 5
Ou freres Pierres demouroit.
Ainsi avoit non ice frere;
De religieuse iert maniere.
Tiex doit estre religieus,
Non couragieus, non orgueilleus, 10
Obediens sans contredire,
Paciens, en cui n'aist point d'ire.
Chastes il soit sans vilennie
S'il vieut estre amis a Marie.
Quar de moigne qui vit en luxure 15
La pucele vierge n'a cure,
Conbien qu'honnourer tuit la doient
Et li net et cil qui s'ordoient.
Couvoitise et avarice,
S'ele est en moigne, fol est et nice. 20
En religieus n'ait grain peresse;
Soigneus soit de chanter sa messe.
De tout son povoir fuit envie,
En moigne habiter ne doit mie.
En moigne soit sobriité, 25
Quar glouton est plain de vilté,
Dieu serve tant com vit en terre
Et Marie, si comm frere Pierre.
Moigne notablement se note
Quant, pour boire vin, vent sa cote. 30
Il puet bien jurer par sa bote:
«Sot sui»; se fame est, c'est sote.
Sachies pour voir que moigne ivroigne
Ne fera ja bonne besoigne.
Moigne ivre resamble a l'arainne 35
Qui [...].
58 r° b
Li moignes qui a guersay boet
Fort est que en paradis voit.
Et quoy de prestre seculier?
S'acoustumés est de chuller, 40
Fort est que soit sans chamberiere;
Se je disoie concubine,
Tu me diroies que j'adevine.
59r° a
Or retournon a frere Pierre,
Qui par tens sera mis en terre. 45
Malade fu; de mort aproche.
La mort tous ravit et acroche;
Il n'i a nul si biau pignié
Que la mort n'ait tost despignié.
Adonc la bele Emmelot 50
Desdolera son dorenlot.
Et tu, qui portes si grant hure,
N'iras pas a la hure hure.
Et tu, a ces longues manchetes,
Qui par sa par la les degetes 55
Et acreü as les grans debtes,
Or vient la mort, que jus les metes.
Chevauchié as les grans chevaus
Et devouré les cras morsiaus,
Or est venu le temps d'iver, 60
Que ton cors rungeront li ver.
Et l'ame, que devendra? Quoy?
Chascun respondera pour soy.
Prisié n'i seront avocat
Ne plus que la queue d'un chat. 65
Adresce toy par fait, par dist,
Si comme frere Pierre fist.
Li frere devant lui estoient
Et devotement Dieu prioient
E[ ...]. 70
59 r° b
Frere Pierres le chief encline
Et joint les mains molt hunblement,
Bon signes est certainnement,
Et salue la bele dame
Qui venue est pour sauver s'ame. 75
Molt devotement la salue;
Pour lui veoir est descendue.
Li frere present, quant ce virent,
Au frere malade dirent:
«Qu'esse, biau frere, que tu fais? 80
Or nous di reson de tes fais.»
Il respont: «Ne weés vous mie
Que venue est dame Marie,
Qui de sa fine courtoisie
M'a visité en maladie?» 85
En ce disant en Dieu s'endort.
Je croy qu'arrivés est a bon port.
Bon port j'apele paradis,
Que Jhesus a premis jadis
A ceus qui et lui et Marie 90
Serviront sans ypocrisie.
Molt est courtoise et debonnaire
De ce qu'a visité ce frere.
Veés en Marie merveille,
Conment pour nostre salut veille. 95
Molt est de no salut soigneuse
La douce mere glorieuse.
Molt fait bon tel dame servir,
Quar trop bien le puet deservir.
Pour toute question au sujet de ce site, veuillez vous adresser à :
labo@francaisancien.net