UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XIV
MIRACLE XIV (chap. 36)
64r° b
De la fame grosse par trente mois que N[ostre] Dame fist enfanter par le noublil.
65 r° a
Une fame estoit mariee,
Des Gos estoit quant a ligniee;
De semence d'omme conceu
Eut un enfant, en temps deü
Ele enfanter ne le povoit. 5
Toute jour grant douleur souffroit.
Seule a ses parens estoit;
Chascuns de lui pitié avoit,
Quar grosse est par trente mois.
Souvent apele a haute vois 10
Dieu et la douce Marie,
Que il li soient en aïe
Et qu'ele ne perisse mie.
Ele est en molt grant agonie.
Li frere de Rochematour, 15
Qui en lui voient grant doulour,
Prient pour lui devotement.
Aussi font si propre parent,
Quar bien scevent que oroison,
Quant i a larmes a foison, 20
Monte ou ciel duques a Dieu
Et le douz Jhesu Crist fait pieu,
Tant qu'il exauce la priere;
Se digne est, ne la met arriere.
65 v° a
Quant ont prié Dieu et Marie, 25
Si aperçoivent son aïe:
Le noublil de la fame wevre
Et dedens un enfant on trueve
Qui de lonc tans pourris estoit;
Plus que droit esté i avoit. 30
Piece aprés autre l'ont mis hors,
Quar de lonc tans estoit ja mors.
Ainsi la fame est delivree
Par la glorieuse Maree.
Qui est ce qui ne doie honnourer 35
La douce dame et aourer,
Qui de sa franche cortoisie
Ceste fame grosse a guarie?
Pour toute question au sujet de ce site, veuillez vous adresser à :
labo@francaisancien.net