UNIVERSITÉ D'OTTAWA Faculté des Arts
Laboratoire de français ancien
Rosarius, Miracle II
MIRACLE II (livre1,chapitre 24)
2 v° b
Du moigne dangereus que Nostre Dame remit a point par le electuaire qu'elle li mit en
la bouche.
3 r° b
Ou plus grant Marial je trueve
Une bele et merveilleuse uevre
Qu'avint en l'ordre de Cytiaus,
En l'abbaïe de Clervaus.
Un moigne i avoit dangereus 5
De viandez et delicieus.
Moigne deust estre bon et digne,
Mez vivre vieut par medecine.
Se me semble une abusion:
Quant qui est de religion 10
Vieut vivre singulierement,
Au commun est grant troublement.
De lui murmuroient li frere.
Sa vie li estoit amere,
Pou souvent faisoit bonne chiere; 15
N'estoit pas bonne sa maniere.
Un jour li frere s'en aloient
A l'eglise et gracez rendoient;
Par cloistre hautement chantoient
Et de l'esglise aprochoient. 20
Cis qui a le cuer enroé
Point n'a chanté ne Dieu loé,
Mez plain a le cuer de murmure,
Quar l'ordre li samble trop dure.
Diex les iex li uevre du cuer. 25
A l'uis du monstier, ainz qu'en cuer
Entrast, voit une bele dame,
Bien sembloit estre vaillant fame;
De grant biauté estoit remplie:
C'estoit la bele Marie. 30
Une boite en sa main tenoit;
D'elestuaire plainne estoit.
A chascun frere qui entroit
Ou moutier sa part l'en donnoit,
Qui chantoit a grant alenee 35
Et qui mengiee la poree
Avoit, de petit savoureus.
Ciz qui estoit tous famileus,
Quant vint a l'uis la bouche bee,
Cuida penre sa cuilleree 40
Si com li autre avoient eu,
3 v° a
Mez riens ne prent, rien n'a receu;
Mez li a dit la bele dame
Et tout pour le salut de s'ame:
«De ceste viande biau frere, 45
Du precieus electuaire
Tu ne dois avoir nulement,
Quar tu vis dongereusement.
C'est viande medecinal,
As povre gens especial. 50
C'est viande a religieus
Et tu iez un pharisien.
D'en mengier te garderai bien,
Quar tu par iez trop dongereus.
Cist delicez ne quierent de roy, 55
I n'en y a nul tel com toy.
Entre les frerez vis com princez,
Plus que li autrez tu iez nicez.
Vieuz tu que on te voise querre
Par riviere, par mer, par terre 60
Delicieusez vïandez
Confites a çucre et as amandez?
Se dis: «Les viandez me nuisent,
Enflent le ventre, les iex cuisent,
Poree ne dois tu refuser. 65
Li malade en doivent user
Selont le conseil de saint Pol,
Mez tu n'en pues passer le col.
Par ton dongier montres trop bien
Que deciplez iez Galien. 70
Se de Jhesu de Galilee
Mengasses volentiers poree!
Home soutil bien te puis dire;
Cure toy mesmes, cure toy, mire!
Et que tu sachez que je sui, 75
Qui parle a toy ne tu a cui,
De misericorde et pité
Mere sui et ay visité
Et conforter vien ma fameile
Si comme mere fait sa fille. 80
Leur volenté propre ne font;
[C]'est ce qui religieus confont.
[Ci]st sont lié de ma venue.»
[A]u moygne volenté se mue,
3 v° b
Et jure que plus ne sera 85
Dongereus, mez que mengera
Ce que devant lui trouvera;
Poree ou pois, tout broutera.
Li moignez pou mengié avoit;
A cele bouite s'atendoit, 90
La bouche bee grandement,
Et la dame piteusement
Li a donné tel cuileree
Que sa complexion muee
A si que puis a grant goulee 95
Mengoit feves, pois et poree
Duques a la fin de sa vie.
Ce pour lui fist dame Marie.
Pour toute question au sujet de ce site, veuillez vous adresser à :
labo@francaisancien.net