UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XXIII
MIRACLE XXIII (livre 2, chapitre 5)
112 r° b
De Nostre Dame qui garda les biens de[s] sereurs de Prulien de tempeste.
114 v° b
En la Vie des Freres dit
Un tel conte cilz qui l'escrist.
En l'abaïe de Prulien
- Aucun de vous la scevent bien,
Assez pres est de Carcassonne; 5
C'est une abbaïe noble et bonne -
De l'ordre sont saint Dominique;
Selonc doctrine evangelique
En commun vivent en closture.
Fames sont; c'est chose seure, 10
Quar fame qui va par païs
A cause qu'el soit a Thaïs
Cousine; trop peril y a.
Pour ce Dominiques lia
Et vot enclorre aucunes dames 15
Pour miex sauver leur lasses ames,
115 r° a
Quar la li bougre decevoient
Et en maise foy les tenoient.
Encloses sont et la Dieu servent.
Le royaume du ciel deservent 20
Se le deffaut n'est devers eles.
Virges sont et bonnes puceles.
Et l'arbre, quant est plain de fruit,
Est plus a seur par jour et par nuit
Quant il i a bonne closture 25
Que quant ou palis a roupture.
Clo ta bouche, fille, clo tes iex;
Si sera aveques toy Diex.
Clo ton cuer et clo tes oreilles.
Ne va a karoles n'a veilles: 30
Closture i est souvent rompue;
Trop miex vaut estre enclose en mue.
Tien ta closture, bele suer,
Se tu vieus sain garder ton cuer.
Petit vaut que le cors soit clos 35
Se n'est clos aussi li propos.
De legier le cors tient closture
Quant l'ame a desir d'estre pure,
Et quant elle est et vilz et orde,
La closture li est grief ordre. 40
Grief chose est a frere et a suer
Quanque il fait contre son cuer.
Non placent Deo coacta servicia,
Item .Ps. Voluntarie sacrificabo tibi .
«Ne plait a Dieu contraint service.
De cuer te feray sacrifice.»
Fame, tu es en grant peril 45
Tant quant tu vis en cest exil.
Le vieus tu donques faire bien?
Va, si t'enclo a Prulien
Ou en religion semblable,
Quar ce t'est chose pourfitable; 50
Quar se tu frequentes la rue,
Aucuns fera de toy sa drue;
En peril iés d'estre perdue.
En haut vole comme la grue.
Environ cele abbaïe 55
Firent jadis grant envaïe
Tonnoirre, graile et tempeste
Devant, derriere et a senestre
115 r° b
Et a destre et de toutes pars.
Grant fu la graile et li espars 60
Qui degasterent la contree.
Chascune suer fu effraee,
Quar i n'est nul, tant soit preudomm[e],
Neïs l'apostoile de Romme,
Qui ne doie avoir du tonnoirre 65
Peur. Tost alee com voirre
Est vie humainne. Pren te garde
Et dusqu'a demain po[int ne] ta[rde]
Que n'aies conscience nete,
Que se vient foudre ne tempeste, 70
Liquel viennent soudainnement,
Qu'en estat soies de sauvement.
Il n'espargne ne roy ne prince,
Grans et petis tout a ffait pince
Ne je n'i voy si bon remede 75
Con de courir a la sainte ede
Et de prier Dieu et ses sains
Que ne soions de foudre estains.
Ainsi le firent les recluses
Ne n'entendirent pas a muses, 80
Quar quant la tempeste aperçurent
A l'esglise errant coururent
Et la bele dame prierent
Et son ymage aourerent
De cuer devot, sans fiction 85
Et par molt grant devocion.
Et tu, quant tu es a l'esglise,
En oroison aies tel guise,
Quar Dieu n'oit ne frere ne suer
S'il ne le prient de fin cuer. 90
Garde que ce qu'en t'oroison
Requiers soit aussi de raison.
Pour ceus qui sont lassus amon[t]
Ou qui en enfer le parfont
Grain ne prie: ne plait point a Die[u]. 95
Chascun est en son propre lieu.
Conbien qu'aient esté en cest monde
Maistre lisant en chape ronde,
Il sont dampné s'il n'ont bien fait,
Chascun selonc qu'il ont m[effait]. 100
Et li preudomme sont en gloire.
Li aucun sont en purgatoire
115 v° a
Et pour yceus doit on prier;
Quar oroison les puet aidier
Et cil du ciel mestier n'en ont, 105
En joie sans la perdre sont.
115 v° b
Se triboul vient en ta meson,
Si te met donc en oroison.
Les sereurs ou moustier chantoient
Et devotement Dieu prioient 110
Et la pucele virginal
Que leur lieu par especial
Et leur personnes et leur biens
Temporelz qui sont hors et ens,
Des quiex vivent corporelment, 115
Veile sauver benignement.
Or oés chose merveileuse
Qu'empestré a la glorieuse
Au grant roy et a l'empereur
Qui regne sur tout grant seigneur. 120
Rex regum, dominus dominantium,
Sur tous seigneurs a seignourie
Il, qui est roys, sur roys baillie.
Sur les vens a commandement
Et sur la mer il erraument
Obeïssent sans contredire; 125
De tout le monde tient l'empire:
Math.viii. Imperavit ventis et mari
Et facta est transquillitas magna .
Qui foudre convertit en pluie,
Qui as plurieurs souvent ennuie,
Ps. Fulgura in pluviam fecit,
Cest empereur, savez qu'il fait?
Seur les biens des sereurs meffait 130
116 r° a
N'a rien ne foudre ne tempeste.
Grant joie en ont eü et feste
Et Dieu mercié hautement,
Quar ce que la dame entreprent,
Il faut que vigne a bonne fin. 135
Loee aussi l'ont de cuer fin.
Li bien qui environ estoient
De ceus qui [l. que] les sereurs avoient,
Vignes et chans plains de blarie
Et de diverse ahennerie, 140
Horriblement sont tempesté
Et de la graile degasté.
As sereurs donques cest lorier,
Marie, a eü grant mestier.
Se du temporel est soigneuse 145
La bele dame glorieuse,
De l'espirituel trop plus.
Pour ce ne se doit faindre nus
De li loer et deprier
Qu'a nos besoings nous veile aidier. 150
Pour toute question au sujet de ce site, veuillez vous adresser à :
labo@francaisancien.net