UNIVERSITÉ D'OTTAWA Faculté des Arts

Laboratoire de français ancien

Rosarius, Miracle XXIV


MIRACLE XXIV (livre 2, chapitre 7)

 
121 r° a
De la nonnain tresoriere qui rend[i]ses cles a l'ymage Nostre Dame et ala jouer au monde, et pu[is] revint.
123 r° a
Nous trouvons es Anciens Peres,
La ou sont les bonnes materes,
Une miracle bele et bonne
Qui avint d'une sainte nonne
Qui estoit en une abbaïe. 5
Moult doucement sainte Marie
Reclamoit a tous ses besoings
Et la dame, qui n'est pas loings
Ne lente de ceus bien aidier
Qui de cuer la weulent prier, 10
Ama moult icele nonnain
Si com orrez au derreain.
Leens n'avoit si bele dame
Et si estoit moult gentis fame;
Moult estoit de bele maniere. 15
De l'abbaïe iert tresoriere;
Ele faisoit moult a proisier.
En la vile ot un chevalier
Manant qui riche home estoit;
123 r° b
Un moult biau filz a clerc avoit
Qui moult iert preus et debonnaire
Et bien celant de son affaire.
Tant ala entour la nonnai[n],
Et nuit et jour, et soir et main,
Et tant la requist et proia 25
De s'amour et lors tant souff[la]
L'anemi en feu alumer
Que la dame fist enflamber
Et octroier au clerc s'amour,
Et cil n'i quist onques sejour 30
Ne respit, ainz dist: "Damoisele,
De toutes autres la plus bel[e]
Et cele ou mon cuer est tous [pris],
Je vous pri com loiaus amis
Que vous en venés anquenuit 35
Avecques moy a mie nuit,
Quar ceans, se povez savoir,
Ne puis je, sans apercevoir,
Souvent ne aler ne venir.
- Sire, fetes a vo plaisir 40
Et si empriés Nostre Dame,
Qui qu'ait mon cors, qu'ele ait m'ame!"
Atant li clerc d'ilec s'en tourne
Et la damoisele sejourne
En grant pensee et en grant luite 45
Juques a tant que il anuite,
Que le couvent couchier ala
Et la tresoriere veilla.
Ses clez prist, si ferma les hui[s];
Mes ainçois qu'i fust mie nui[t] , 50
Toutes ensamble se leverent
Les dames, matines sonner[ent],
Si alerent chanter matines
Comme bonnes dames et fines.
Quant le service orent finé, 55
La mere Dieu ont encliné
Et l'ymage Nostre Seigneur,
Puis s'en va chascune en dortoe[r]
Pour dormir et pour reposer.
Et la tresoriere fremer 60
Ala lors les huis par esample
Et a mis de l'uile en la lampe
[...]
123 v°a
Et pour ce qu'on ne s'aperçoive,
A clos les huis devers la vile. 65
Tost treuve ent bar[at] et guille
De male euvre, qui la vieut faire.
Et la damoisele repaire
Erraument en l'esglise arriere
Et voit, seant en la chaiere, 70
La vraie estoile de la mer
Qu'ele seut tant de cuer amer.
Ele dist Ave Maria
Cinq fois et si s'agenoilla
Et puis son voile et ses clez 75
A Nostre Dame dist: "Tenez,
Quar je m'en vois et si vous pri,
Dame, que vous soiez pour mi
En mon lieu en tele maniere,
Sainte glorieuse lumiere, 80
Que je n'i soie aperçeüe
Et ma mauvesté conneüe".
La damoisele atant s'en va.
Or oëz comme Nostre Dame a
Fait pour lui et pour son servise 85
Qu'elle li ot fait en l'esglise.
Si tost comme s'en fu alee
D'ileques en moult grief pensee,
Nostre Dame pas ne l'oublie:
Elle l'avoit moult bien oÿe 90
Pour ce que bien l'avoit servie.
Ne prist pas garde a sa folie,
Mist en son lieu une pucele
Toute ainsi franche et ainsi bele,
Semblabe de fais et de dis, 95
De son grant et de son avis,
Et en parler et en tesir
Et en Nostre Dame servir,
Pour ci [l. si] que onques le couvent
Ne s'aperçut ne autre gent 100
Que ce ne fust la tresoriere.
Et la vraie clarté entiere
Par qui sommes enluminez
Li bailla le voile et les cles
Et la grace et seignourie 105
Que damoisele Marguerie
[...]
123 v° b
Et cele est demouree la,
Bien servi et moult fu amee.
Et l'autre qui s'en fu alee 110
Fu longuement par le païs,
Cinq ans si com dist li escris,
Tant c'un jor avint que la dame
Ot pitié et paour de s'ame.
Du cuer gemi, des iex plora 115
Pour ses pechiez dont li menbra.
Lors reclama sainte Marie
Que vers Dieu li soit en aïe.
Dolente fu, si s'esbahi
Et bien sot que par l'anemi 120
Est avenu qu'ele a pechié
Et son ordre ainsi brisié.
A Dieu pensa la damoisele.
Ou voit son ami, si l'apele
Piteusement et si li prie 125
Pour Dieu et pour sainte Marie
Qu'il ait volenté et talent
D'ouvrer vers lui courtoisement.
Et il li respont qu'il fera
Tout ce qu'ele demandera, 130
Que chose ne soit contraire
Qu'il ne puisse otrier et faire.
Et li a dit: «Diex le vous mire!
Or vous pri je, biau tres dous sire,
Que je m'en voise en mon païs 135
Veoir ma mere et mes amis
Et le lieu ou je me rendi,
Et si prieray la merci
A l'abbaesse et au couvent;
Quar qui de bon cuer se repent 140
Et quiert merci, j'ai oï dire,
Tout li pardonne Nostre Sire,
Sire, et nous avons de pechié
Longuement esté entechié,
S'en doit chascun le cuer doloir. 145
- Douce amie, vostre voloir
Feray volentiers, par saint Gile!
O vous iré jucqu'a la vile.
- Sire, fait ele, non ferez,
Que nous ne soions ravisez. 150
Je weil aler si doucement 124 r° a
Que ne me connoissent la gent.»
Lors li dist donc: «A Dieu alez,
Qui vous conduie a sauvetez
Et vous conseut par son dous non 155
Que puissiez ravoir vo meson!»
La damoisele s'en ala,
Le clerc a Dieu la commanda,
Qui la conduie a sauveté.
Un enfant a o lui mené, 160
Par compaignie, pour la gent,
Quar vous savez bien vraiement
Que c'est laide chose et diffame
D'aler toute seule, une fame,
Quar on cuide quant ele est seule 165
Que ce soit une fame weule.
Tant ala que venue estoit
En la vile la ou seoit
L'abbaïe dont elle issi.
Dolente fu, si s'esbahi, 170
Quar el n'avoit pain ne ostel
Et si pensoit encore a el.
Tant a alé parmi la rue
Que chiez une fame est venue
A cui elle avoit fait maint bien; 175
De lui ne se doutoit de rien.
Moult volentiers l'a herbergiee
Et de ce qu'el puet aesiee.
Ensamble furent cele nuit,
Mes petit ourent de deduit. 180
La damoisele onc ne dormi,
Toute nuit plora et gemi;
De ses larmes ot plain ses iex
Et si a dit: «Biau sire Diex,
Ne souffrez que soie perie! 185
Douce dame sainte Marie,
Conseilliez moy que pourray faire
Comment venisse en mon repaire.»
S'otesse demande qu'ele a
Et suer Marguerite dit a: 190
«Se Diex me puist aidier a l'ame,
Se oïr me voulez, bonne fame,
Encor a cinq ans et demi
Que je m'en passoie par ci;
S'oÿ dire que l'abbaïe 195
124 r° b
Iert de bonnes dames rem[lie].
Si vous voudroie demander
Se leur oseroie rouver
Aucune riens qui me soigne,
Dont j'ai grant honte et grant ver[goigne]. 200
Et, dame, pour Dieu, dites ore
Se l'abbaesse vit encore.
Et damoisele Marguerie,
Pour Dieu, est ele encor en vie,
Qui soloit estre tresoriere? 205
- Par foy, c'est la mieudre asm[oniere]
Qui soit leens, ma damoisele.
Encore ennuit son escuele
M'a elle envoïe ceens.
On tesmoigne bien que leenz 210
N'a plus preudefame de lui.
- Hé, Diex! Son pere me norri
Et fist tant de bien en sa vie,
Par ma foy, ce dit Marguerie,
Et sa mere m'amoit autant 215
En jonesse com son enfant!»
S'otesse li a dit: «Sachiez,
Bien croy que li appartieniez:
A merveilles li ressamblez!
Or me dites, ce [l. se] c'est vo grez, 220
Se li apartenez de rien.
- Oïl, dame, ce sachiez bien;
Mes, je vous pri, n'en parlez point,
Quar je sui en trop povre point.
Moult volentiers je la verroie, 225
Savoir se je la connistroie.
- Bele suer, et vous la verrez:
En mie nuit, avec moy venez
As matines. - Volentiers, dame,
Se Diex me doint salut a m'ame, 230
Quar moult la desir a veoir.
- Si la verrez, sachiez de voir.»
Atant chascune s'aquoisa.
Et quant l'en matines sonna,
Lors se leverent, si s'en vont. 235
A l'esglise venues sont,
En une aceinte se sont mise[s]
Et puis donc si se sont assise[s].
Si voient les dames venir
124 v° a
Et chascune s'ala seïr 240
En son lieu et la tresoriere
S'apoia a une mesiere.
Et quant s'ostesse l'a visee,
A Marguerite l'a monstree.
El li a dit: «Amie bele, 245
Or povez vous, ma damoisele,
Voir la tresoriere sans faille.
Ceens n'a nule qui la vaille.
C'est elle, sachiez vraiement.»
Et quant Marguerite l'entent, 250
Moult se merveille que puet estre.
Ele regarda a senestre
Et voit l'ymage glorieuse
De la roÿne precieuse.
Lors se tint si courtoisement 255
Que s'otesse n'en sot nient.
Devant l'ymage ala ourer
Et ses pechiés prist a plourer.
«Aiez, dist ele, douce dame,
Merci de ma chetive d'ame! 260
Pardonnez moy les grans meffais
Qu'ai contre Dieu et vers vous fais;
Quar je sai bien, se ne m'aidiez
Vers vostre filz de mes pechiés,
Que je ne puis avoir confort. 265
Douce dame, mene moy au port,
Que je ne soie perilliee [l. perillie]!»
Lors vint a lui sainte Marie,
Si li a dit moult doucement:
«Tien, Marguerite, je te rent 270
Cles et voile et ta vesture,
Et si soies toute seüre
Que tes meffais sont tous plané
Et que mon fil t'a pardonné
Ton meffait dont tu te repens. 275
Et pour ce ai je mis ceens
Une virge de ta maniere,
Tout autressi et tresoriere.
Alee s'en est de par Dieu;
Or te va seoir en ton lieu.» 280
Atant la mere Dieu s'empart.
A la damoisele fu tart
Qu'el fust aveques le couvent.
124 v° b
Alee i est tout coiement,
Si est en son estage assize. 285
Mes onc n'ot nonnain en l'esglise
Qui de chose s'aperceüst,
Que pour lui autre esté eüst.
Et celle qui la herberga
Par le moustier querant la va, 290
Moult dolente et moult esperdue,
Qu'el ne sot qu'el fu devenue.
En son ostel s'en va tout droit,
Moult s'esmerveille ce qu'el voit;
De s'otesse ne sot que dire, 295
Moult corouciee et plainne d'ire.
Mes puis li fist mains biens la nonne,
Qui fu sainte dame et bonne,
Et fu lonc temps en la meson,
De bon estre et de bon renon, 300
Et mena moult saintisme vie.
Ainsi rent la virge Marie
A ceus qui la servent de cuer
Et qui weulent tout jeter puer
Les ordures et les pechiez 305
Quant s'en sentent trop entechiez.
Or li prions de cuer entier
Qu'ele weille son fil prier
Qu'il nous pardoinst tous nos meffés
Dont vers lui nous sommes meffés. 310
Amen!


Page d'accueil


Dernière mise à jour : 08.11.1999
Pour toute question au sujet de ce site, veuillez vous adresser à :
E-maillabo@francaisancien.net