UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XXXII
MIRACLE XXXII (livre 2, chapitre 16)
162 r° b
De l'enfant que Nostre Dame sauva en la mer pour ce qu'il disoit Ave Maria.
163 v° b
Une bonne fame estoit
Qui un jone fillon avoit
A cui aprit s'Ave Marie.
Li enfes souvent la disoit,
Ainsi sa mere le vouloit; 5
164 r° a
Especiaument quant estoit
En peril, plus s'en efforçoit.
Cy doivent prendre examplaire
Peres, meres de bon affaire,
Que si leur enfant entroduire 10
Doivent jones et a bien duire,
Que quant seront en grant aage
Ne soient pas fou ne volage,
Mes devot et discret et sage,
Ci [l. Si] que dit la divine page: 15
Tren. iii. Bonum erit viro cum por-
taverit jugum ab adolescencia sua
«Bonne chose est que de s'enfance
Hons se duise a faire penance».
Et le fais Dieu port sus son col.
Dur n'est pas, mes legier et mol:
Mt. xi. Jugum enim meum suave est
Et onus meum leve.
Aprens jones a Dieu servir 20
Et sa mere, que deservir
Puissez le louier que deservent
Cilz qui tous deus de fin cuer servent.
Qui non de cuer, mes de la bouche
Seulement sert, c'est fiction; 25
S'autrement au cuer ne li touche
N'aura ja ou ciel mansion.
O [l. Or] repairon a nostre enfant.
Pres de mer s'en va esbatant,
Si compaignon vont avec lui; 30
La mer si leur fera ennui.
Li flos de mer sus eus aqueurt;
Arresté sont, nul ne s'en queurt.
Si compaignon, de mal affaire,
Maugreoient Dieu et sa mere; 35
Noié furent, c'est a bon droit.
Ciz s'Ave Maria disoit;
Pour ce le garda la dame
Et li sauva et cors et ame.
En son sain l'a mis et couvert. 40
N'est pas perdus qui bien la sert!
Puis que la mer se fu retraite,
De ce il a mencion faite
Et a raconté s'aventure,
Comment de li a eü cure 45
Une dame de noble facture;
Bele estoit, nule laidure
N'avoit. Marie loerent
Et Dame Dieu regracierent.
Saluons donc dame Marie; 50
A besoing est de bonne aïe.
Pour toute question au sujet de ce site, veuillez vous adresser à :
labo@francaisancien.net