UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XXXIII
MIRACLE XXXIII (livre 2, chapitre 17)
164 v° b
Des religieus afflis ef tourmentés pour ce qu'il laissierent a dire l'office de Nostre
Dame.
166 r° a
Il estoit jadis une abbaïe
Qui de Saint Vincent estoit dite.
Li moigne a la virge Marie
Devocion grant, non petite,
Avoient. Ses heures disoient 5
Quant les canoiniaus avoient
166 r° b
Dites. Et par trois ans ja ce fa[it]
Avoient quant ce a tout deff[ait]
Gaze, un moigne de mal estre,
Qui le sage fesoit et le mestre. 10
Vile avoit la conscience;
Mes de excellent eloquence
Tant fist par allegacions,
Fallaces et decepcions,
Qu'a dire lessierent l'office 15
De Marie, vierge et nourrice.
Il firent que fol et que nice
En laissant le devot service.
Il fait mal lessier ceste dame:
Damages est de cors et ame. 20
Se la lesses, el te laira;
Se bien la sers, miex t'en sera.
Leur vindrent tribulacions,
De leur sergans occisions,
De leur biens temporez arsure 25
[...]
Rapine et mal aventure.
Bien monstra Diex qu'i n'avoit [cure]
D'eus. Deguerpi avoient la pure;
Receü en ont painne dure. 30
La douce pucele Marie
Soustrait leur avoit son aïe.
A l'empereur alé s'en sont,
Mes pour nient, quar rien n'i [font].
Aprés a moy sont retourné; 35
Dient que sont mal atourné
Et je leur respondi briement:
«Vous avez ouvré nicement!
La dame du monde honnouree
De vous avez arrier boutee. 40
Dame est de pais et de concorde,
Qui les pecheurs a Dieu acorde.
La dame avez arriere mise.
Ce ne puet estre en nule guise
Que n'aiez tribulacions, 45
Damages, persecucions,
Tant qu'aiez la dame honnouree
Que vous avez deshonnouree.
De li ne lisez ne chantez;
Li dyable vous a enchantez. 50
166 v° a
Heures ne dites de la dame
Qui puet sauver et cors et ame.
Roÿne est en ciel et en terre;
Chascun doit s'aïde requerre.
Requerés la donc de rechief; 55
[J]e croy que vous fuira meschief.»
[L]i moigne molt esbahi furent
[Q]uant ceste raison aperçurent
Et a la dame promis ont
Que il son service feront 60
Si com acoustumé avoient.
Religieus molt se desvoient
Qui heures ne dient de Marie,
Qui mere est au seigneur de vie.
Ainsi com li moigne promirent, 65
En grant devocion le firent
Et les afflictions cesserent
Quant l'office recommencerent.
Bon fait ceste dame servir,
A lui loer soy asservir; 70
Tel servitute est franchise,
Servitute de bonne guise.
Pour toute question au sujet de ce site, veuillez vous adresser à :
labo@francaisancien.net