UNIVERSITÉ D'OTTAWA Faculté des Arts

Laboratoire de français ancien

Rosarius, Miracle XXXIV


MIRACLE XXXIV (livre 2, chapitre 18)

167 v° b
Du religieus que Nostre Dame et saint Johans l'Evangeliste delivrerent de purgatoire.
169 v° b
Ou Livre des Aés a un conte
Que freres Arnous ainsi raconte:
«Je vi a Cambrai un chainoigne
Qui se prist a meilleur besoigne.
Chainoignes estoit seculer, 5
Si se mua en reguler
A Quantimpré, pour sauver s'ame.
Saint Johan et la bele dame
Servi et porta grant honneur.
L'evangeliste, par ferveur 10
Especial qu'avoit a lui,
L'ama plus qu'il ne fist nului.»
Singuliere affection,
Reverence et devocion
Devons avoir a aucun saint. 15
Ainsi le font maintes et maint:
L'un a saint Jaque de Galice,
L'autre a saint Pol, l'autre a saint Brice
Et l'autre a saint Gibrien,
L'autre a saint Cosme et Damien, 20
Li autre a la Sainte Larme.
Li saint nous sont escu et arme
De grant valeur et profitable
Pour bataillier contre le dyable.
Des sains avons souvent mestier 25
Et il sont pres de nous aidier
S'avons a eulz devocion,
Mes qu'ele soit sans fiction.
Au baptiste aucun l'ont grant
Et li autre a saint Amant 30
Ou a saint Leu ou a saint Gile
Ou a celui qui l'esvangile
Fist; li autre a la pucele
Qui est tant gracieuse et bele
Que ses graces ne puet conter 35
Nul hons mortel ne raconter.
Chascun a son plaisir le fait.
Qui les deshonneure, il meffait.
Bon fait honnourer tous les sains.
Li uns l'est plus, li autre mains; 40

170 r° a

Par dessus tous estre honnouree
Doit la blanche buletee,
Quar ele est de plus grant povoir,
Auctorité, vouloir, savoir.
En cest chaignoine le monstra 45
Diex, qui a un d'eus demonstra,
Quant passez fu de ceste vie,
Comment li fu la dame amie.
A un en vision sambloit
Que l'evangeliste venoit 50
A ma dame sainte Marie
Et li requeroit son aïe:
«Dame, dist il, dame de gloire,
Nostre ami est en purgatoire,
En grant tourment et en douleur, 55
En froidure, puis en chaleur;
Quar hui ont chaut et demain froit.
Par reson estre ainsi leur doit:
Froit ont esté a bien ouvrer,
Chaut a fames deshonnourer; 60
Siques il ont puis froit, puis chaut.
Maintes gent sont a cui n'en chaut;
Ains a tout preudomme doit plaire
Que sueffrent selonc leur affaire:
Ps. Letabitur justus cum viderit vindictam
«Preudons adont fait feste et joie 65
Quant punis est cilz qui foloie.»
Cesti sueffre pour ses pechiez
Et, combien qu'en fust entechiez
Ne ne fust de parfaite vie,
Il est ja purgiez en partie. 70
En purgatoire ne doit mie
Estre lonc temps sans nostre aïe.
Il nous a amé et servi
Et pour ce il a bien deservi
Qu'au besoing ne li faillons mie. 75
De li vous pri, dame Marie.»
Tantost la dame a ce s'acorde,
Quar mere est de misericorde.
Tout dui en purgatoire vont
Et leur ami issir en font. 80
Donc cil ne perdent pas leur painne
Ne n'est pas leur loenge vainne
Qui servent saint Johan et la dame
Qui a tel cure de nostre ame.


Page d'accueil


Dernière mise à jour : 08.11.1999

Pour toute question au sujet de ce site, veuillez vous adresser à :
E-maillabo@francaisancien.net