UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XXXVII
MlRACLE XXXVII (livre 2, chapitre 21)
181 r° b
De Nostre dame qui les moignes de J[herusalem], qui estoient en grant povreté,
pour[vit] et leur donna des biens temporés h[a]hundaument.
183 r° b
Gregoires de Tours nous ra[conte],
Qui en escrit mit maint bi[au conte]:
En Jherusalem une abbaïe
Jadis eut de dame Marie;
De moignes i eut compaigni[e] 5
Grant, devos et de sainte vie.
Entre les autres il avint
Une fois que famine vint
Et furent en grant agonie
Li moigne dont aront leu[r vie]. 10
Par deus jours sans refectio[n]
Furent; grant fu l'affliction.
A dant abbé vont faire plain[te],
Qu'i leur donnast par quoy estai[nte]
Fust la mesaize de la faim 15
[...] avoit en vain,
183 v° a
[O]u congié leur doinst de leur vie
Querir, que ne perissent mie,
[O]u sans congié se partiront
[E]t pourchassier leur vie iront. 20
[L]'abbé respont benignement:
«[C]hiers freres, prions humblement
Dame Dieu et sainte Marie.
[J]e cuit qu'el ne nous faurra mie:
Ne puet estre qu'en son grenier 25
Ne truisse preudons a mengier.
En soy porta la vierge monde
[C]elui qui repait tout le monde:
Joh. vi. Ego sum panis vivus qui
[d]e celo descendi: si quis manducaverit
[e]x hoc pane vivet in eternum et pa-
nis quem ego dabo caro mea est pro
mundi vita.
[L]i moigne sont en oroison
[E]t getent larmes a foison, 30
Que leur necessité leur doint
[D]amedieu, quar fain grief les point.
[P]ar une nuit entierement
[P]rierent Dieu devotement.
[Qu]ant leur oroisons faites ont, 35
[A]u matin au grenier s'en vont;
[D]e bonne heure la sont tourné
[E]t l'ont trouvé tel atourné
Que plein dusques [...] estoit
183 v° b
De froument; Dieu mis l'i avoit. 40
Loent Dieu et dame Marie,
Qui leur ont fait grant courtoisie.
Ses devos sergans point n'oublie,
Sans raison n'a pas nom Marie.
Luce. i. Et nomen virginis Maria . 45
Gardez quantes lettres y a.
Il avint par une autre fois
Que li temps fu griés et destrois
Et eurent grant neccessité
Li moigne de la dicte cité. 50
En oroison gisent a terre
Pour l'aïde de Dieu requerre.
Aussi la glorieuse dame,
Qui ne deffaut point a nul'ame,
Quant elle voit qu'il est besoing, 55
Molt a de ses amis grant soing.
Endormi sont aprés matines
Quant eurent dit laudes devines
Et prié Dieu devotement
Que les veïst piteusement. 60
Euz esveilliez, tantost trouverent
Or sur l'autel. Dieu en loerent.
A grant planté en i avoit;
D'un angre Dieu mis i estoit.
Quant dans abbes a ce veü, 65
Il a pris l'or et receü,
Acheté a ce qui leur faut.
Dieus eut regardé leur deffaut.
Il ont loé Dieu et sa mere,
Qui de affliction amere 70
Les a delivrés par sa grace.
Rien n'est que Marie ne face
Se on la requiert de fin cuer.
Je te pri donques, frere et suer,
Ne cesses de servir Marie 75
Tant com tu vis en ceste vie.
Di souvent l'Ave Maria ;
En la oïr sa grace y a
Et tant li plaist, quant dire l'oist,
Li samble de nouvel conçoit 80
Le filz Dieu et molt a grant joie.
Salue donc dame Maroie!
Pour toute question au sujet de ce site, veuillez vous adresser à :
labo@francaisancien.net