UNIVERSITÉ D'OTTAWA Faculté des Arts

Laboratoire de français ancien

Rosarius, Miracle XL


MIRACLE XL (livre 2, chapitre 25)

191 r° a
De celui qui ne pot pechier a une fame quant ele dit qu'ele avoit non Marie.
192 v° b
A un docteur de grant affaire
Un tel example oï retraire
Que fu jadis un mauvés homme
Qui de pechiez avoit grant somme.
Entre les autres fu blecié 5
De la vilté de cest pechié
Duquel avons fait mencion.
Grant i est inclinacion,
Mes li temptés se doit refraindre

193 r° a

Et ceste ordure en soy estaindre. 10
Faites donc ce que dit saint Pol,
Que ne vous faile faire un vol
En enfer duques en parfont,
Ou vont cil qui tel vilté font:
Rom. viii. Si secundum carnem vixeritis,
moriemini. Si autem spiritu facta carnis
mortificaveritis, vivetis.

«Se vous vivez selonc l'acort 15
De la char, vous estes tuit mort;
Et se vostre char mortifie
L'esperit, vostre ame ara vie.»
Une fois avint que cilz homs,
Qui de son cors n'iert pas preudons, 20
Une fame avoit en son lit
Pour acomplir son brief delit,
Qui bien proprement brief est dit,
Quar ne dure c'un temps petit.
Et li saint dit que c'est folie 25
Que pour delit charnel si brief,
Qui longuement ne dure mie,
Soy obligier a tourment grief.
Tuit dui gisoient en un lit;
Li hons a la fame a dit 30
Et demandé quel non avoit.
Cele qui en peril estoit
Erraument respondu li a:
«Sire, j'ai a non Maria
Li homs, quant non oit de Marie, 35
Tantost a sa vertu sentie,
Qui son ardeur li mortifie.
La char li est si refroidie
Que le pechié de vil affaire
Acomplir ne pot ne parfaire. 40
Marie est non de grant valeur,
Qui refroide si grant chaleur.
Se ses nons a si grant pooir,
Ele plus grant le doit avoir.
Cilz sagez est donc qui la prie 45
Qu'ele le gart de vilennie
Et la grace Dieu li empestre,
Qu'avesques lui aprés puist estre.


Page d'accueil


Dernière mise à jour : 08.11.1999
Pour toute question au sujet de ce site, veuillez vous adresser à :
E-maillabo@francaisancien.net