UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XLIII
MIRACLE XLIII (livre 2, chapitre 29)
207 v° b
Du couart prescheur a cui Nostre Dame fist sugcier sa mamele et puis prescha
hardiement.
210 r° b
J'oï conter mestre Nichol[e],
Qui longuement fu a l'escole,
De Flavigni avoit surnon,
Arcevesque de Besençon,
Que uns religieus estoit 5
Qui un sermon faire devoit;
A coustume pas ne l'avoit;
210 v° a
Que ne faillist molt se doutoit.
Forte chose est que de coustume.
Par coustume une beste tume; 10
Veés un singe, un chat, un chien:
Acoustumance le duit bien.
Qui se vieut meller de preschier,
D'estre advocat ou emparlier,
Acoustumance molt i vaut. 15
Tiex cuide bien dire qui faut.
A son sermon pense le moigne
Et li samble estrange besoingne.
En oroison, la nuit devant,
Se met, Dieu prie de cuer fervant 20
Que sa parole si puist dire
Sagement, n'i ait que redire,
Que loé en soit Nostre Sire,
Qui souvent fait meilleur de pire.
Preschier est chose merveilleuse: 25
Hons si propose et Diex dispose.
Preschier est merveilleus office;
Point n'apartient a homme nice
Ne qui est entechié de vice,
Especiaument d'avarice. 30
Comment dira: «Ne soies mie
En rapine n'en usurie»,
Qui du monde desirre avoir
Or et argent et autre avoir?
Prescheur doit faire et aprés dire, 35
Si com fist Jhesus, Nostre Sire,
Du quel nous dist Sainte Escripture
Que le dit passa la faiture
- J'entens: la faiture le dist;
Bien dist, mes ainçois le bien fist. 40
Act. 1. Cepit Jhesus facere et docere .
Preudons seré quant ce feré.
Cil qui dient et ne font mie
Ne valent plain pot de boulie;
Il dient: «Ne mengiez pas lait», 45
Et chascun le contraire fait.
Nostre religieus Dieu prie
Et la glorieuse Marie.
La dame point ne l'oublia,
Mes sa douceur monstré li a, 50
Quar une dame gracieuse,
210 v° b
Que qu'il ouroit, a lui monstree
S'est: c'est la virge glorieuse.
Il volentiers l'a resgardee.
Aprés Dieu chose plus bele 55
Ne croi que soit de la pucele
Qui Dieu nourri de sa mamele.
Faite li a chose nouvele:
Sa mamele li a bailliee;
Li religieus l'a sugciee. 60
Onques puis ne fu qu'eloquence
Merveilleuse n'eust et affluence
De la parole Dieu preschier.
Hardi l'a fait no franc mourier,
Fervant en predicacion. 65
Avoir devons devocion
A la pucele glorieuse
Qui as prescheurs est si piteuse.
Prescheurs la doivent honnourer,
Son fil et lui molt aourer. 70
Par eus devotement servir
Puet on paradis deservir.
Pour toute question au sujet de ce site, veuillez vous adresser à :
labo@francaisancien.net