UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XLIV
MIRACLE XLIV (livre 2, chapitre 30)
212 r° a
De Nostre Dame, qui vint a la mort d'un moygne qui devotement l'avoit servie.
214 r° b
En Espaigne une abbaïe avoi[t],
De l'ordre de Citiaus estoit;
Un moigne i eut et jouvencel
Qui devant Dieu fu bon et bel.
Par especial Nostre Dame 5
Servoit de cuer, de toute s'ame.
Ses heures si devotement
Disoit et ententivement
Qu'a chascun ver de la pucele
Pensoit comment est bonne et bele, 10
Et a chascun mot qu'il disoit
De la dame li souvenoit.
214 v° a
En ce faisant grant painne avoit;
Grant amour faire li fesoit.
Ainssi les heures parfinoit 15
De la dame que tant amoit.
Bien acomplissoit celui dist
Que David en son psautier dist:
Psallite sapienter .
Ciz chante bien et sagement
Qui ce qu'il chante bien entent. 20
C'est fort bonne soit l'action
Ou il n'a nule attencion.
Atten donc a dire tes heures:
Pausez deües et demeures
I fai et non pas genglerie; 25
Ce ne plait a Dieu n'a Marie.
Mes li plait que dies a trait;
Attencion soit o le fait.
Veneur qui chace et rien ne prent,
C'est clerc qui lit et point n'entent. 30
Ne sincope ne ne retranche
[L]es mos; ne fai des girons manche.
Ta langue soit delivre et franche.
Ou chief n'aies chapel de vanche,
De roses ne d'autres floureites: 35
Signes est que sont jolietes
Les personnes qui ainsi font
Quant le servise de Dieu font.
Devotement donc di tes heures.
S'en eus disant un pou labeures, 40
Molt bon louier en dois attendre,
Si grant que nulz nel puet comprendre.
Dieu servir est roiaume avoir;
Les richesses et tout l'avoir
De cest monde ne valent mie 45
Un seul delit de l'autre vie: Ps.
Melior est dies una in atriis tuis super milia.
Plus de bien en un seul jour ont
Cil qui en joie avec Dieu sont
Qu'avoir les mondainnes delices
Par mil ans. Donc cilz est folz et nices 50
Qui prent la terre et le ciel lait;
Il ne scet quel douceur a lait.
Nos jouvenciaus ceste douceur
Bien savoit; pour ce en grant ferveur
214 v° b
Dieu servoit et dame Marie. 55
Et la dame pas ne l'oublie.
Ceste vie par .vii. ans mena,
Molt saintement se demena.
Li termes vint et aprocha
Que la mort le moigne acrocha. 60
Rois, princes, dus et conte acroche;
Plus fort les point que nule broche.
Tout faut mourir, et clerc et prestre.
Ne moru Jhesu, nostre maistre?
Grant et petit mourir estuet, 65
La mort nul eschaper ne puet.
Se visiter te vient la mort,
Droit te fait et nulement tort.
Malades en l'enfermerie
No moignes gist; grief maladie 70
A. Gardez est diligemment,
Quar c'est de Dieu commandement:
S'aucuns est en affliction,
Avoir devons compassion
De li et de s'enfermeté 75
Tant que Diex l'en ait hors geté.
Misericorde plait a Dieu:
A siecle et en religion
Envers malades soions pieu
Et aions d'eus compassion. 80
Uns pors a pitié d'un pourcel.
Un ours d'un malade oursel;
Un chien a pitié de son maistre
Quant le voit enfouir en l'aitre
Et hons est de si dur affaire 85
Qu'a gens malades ne vieut faire
Ne pitié ne misericorde?
Durs hons mete en son col la corde
Et pendre se voit! ll est droit,
Quant le mal son voisin ne voit. 90
J'apele veoir par effait,
Quant aïde et secours li fait.
L'amour est monstree par oevre;
Misericorde le ciel oevre,
Misericorde a Dieu plait 95
Et trop grant durté li desplait.
Diex l'aime miex que sacrefice
Et pour ce cilz sont folz et nice
215 r ° a
Qui misericorde ne font
A tous ceus qui mestier en ont 100
Selonc leur possibilité.
N'a si riche homme en la cité
Ne de Romme ne de Paris
Qui ne feüst tous esbaris
De donner aus povres qui sont. 105
Dieu aront cil qui bien leur font,
Et qui pour Dieu malade sert
La joie sans fin en dessert.
Cilz qui le malade gardoit
Et diligemment le servoit, 110
L'une des fois li a requis
De son estat, s'i li est pis
Ou miex. Cil respondu li a
Que visité l'a Maria
«Et m'a dit qu'au septime jour 115
Mourray et iray au seignour
Du ciel et me dourra la joie
Que cilz a qui point ne desvoie.
Une autre chose a dit la dame:
"Je te feray ce qu'a nule ame 120
Ne fis onques en toute ma vie,
Pour ce que si bien m'as servie."
De ses bras a mon col estraint
Et un baisier en moy enpraint,
Et puis ou ciel est remontee.» 125
Au septime jour retournee
Ciz trespassa de ceste vie;
Devotement avec Marie
Ala l'ame en la compaignie
Des angres, des sains esperis. 130
Qui est en pardurable vie,
Il est sauvez et non peris.
Pour toute question au sujet de ce site, veuillez vous adresser à :
labo@francaisancien.net