UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XLVII
MIRACLE XLVII (livre 2, chapitre 34)
226 v° b
Du dyable qui en fourme d'omme tentoit une fame, qui s'enfui a l'invocacion Nostre
Dame.
228 v° b
Un essample trueve en escrit,
Mes pas bien ne scey qui le dist,
Que jadis estoit une fame
Qui desirroit a sauver s'ame.
Un dyable qui d'omme eut figure, 5
Combien qu'autre soit de nature,
De pechié charnel la temptoit;
Aveques li couchier vouloit.
Sathans vouloit estre incubus
Et la fame fust sucubus . 10
Chascun ne set pas exposer
Que c'est a dire ne gloser:
Sucubus , c'est femele jus
Et incubus le male sus.
Du jus et du sus bien te garde 15
Se tu ne vieus que t'ame arde.
Ele point ne s'i acordoit,
Mes forment le contredisoit,
Quar bien set, s'ele s'i acorde,
Pendue sera a la corde 20
Qui en enfer la descendra
Quant li jugement Dieu vendra.
Fera donques Dieus jugement?
Oïl, pour voir, se cilz ne ment
229 r° a
Qui dist en une sieue espistre 25
As Romains, si en est le titre. Rom xiiii.
Omnes stabimus ante tribunal Christi et cetera .
La Damediex tous jugera.
Devant Nostre Seigneur et maistre
De tout le monde nous faut estre 30
Pour rendre reson de nos fais
Et de nos dis, bons et mauvés.
Se il sont bon, en joie iron;
Se mauvés sont, pas ne riron.
Rire ne doit qui a douleur 35
Ne plourer qui va a honneur.
- Biau freres, tu merveilles dis:
Comment reson rendrons des dis?
Tant en i a qu'i n'en est nombre!
- Mais fait, mais dit, tout ce t'encombre, 40
Que nous n'aions du ciel la joie.
Cil qui trop parle s'en desvoie;
A petit parler te ravoie,
Quar qui trop parle est hors de voie.
Molt est temptee ceste fame; 45
En peril est de cors et d'ame.
Conseilliee s'est que doit faire
Quant vient a lui son adversaire.
Uns li a dit en bonne foy:
«Se Sathenas vient plus a toy, 50
Tu diras:"Pucele Marie,
Aidiez moy que vilenie
Ne me face cest encombrier
Qui ainsi me vieut conchier".»
Bon conseil a eü la fame 55
A li sauver et cors et ame.
Qui par conseil fait ce qu'il fait,
Ne se repent pas de son fait.
Se le conseil est bon et fin,
La chose vient a bonne fin. 60
Se le conseil est nice et fol,
Trop miex vaurroit rompre le col
Au conseillant et conseillié
Qu'avoir folement conseillié.
Sathenas revint autre fois. 65
En lui fier pas ne te dois!
Il cesse a temps pour miex ferir.
Molt est beste de grant desir,
229 r° b
Que il nous puist grever et nuire
Et que preudons en ame muire. 70
Du cors n'i fait pas si grant force,
Mes que l'ame peche s'efforce,
Conbien que l'un et l'autre bien
Weille despouiller de tout bien.
Revenus est; le conseil fait. 75
Et savez qu'a dit le maufait
Quant oÿ le non de Marie
Qu'ele apeloit en son aïe?
«Qui ce t'a conseillié, maudis
Soit il!» Sathan fu esbaubis, 80
Tourne en fuie, puis ne revint.
Et la fame point ne mesprit [l. mesprint].
Ainsi garde ma dame bonne,
Par sa vertus, toute personne
Qui a lui quiert avoir refuge 85
Si com le pain garde la huge.
S'en peril iés de cors ou d'ame
Refui tantost a ceste dame.
La vierge ne faut a nului,
Mes que seulement a celui 90
Qui n'a a lui devocion.
Plainne est de compassion.
C'est la fortunee planete
Qui orde persone fait nete.
Tiex et teles elle nous face, 95
Que puissons Dieu veoir en la face!
Pour toute question au sujet de ce site, veuillez vous adresser à :
labo@francaisancien.net