UNIVERSITÉ D'OTTAWA Faculté des Arts
Laboratoire de français ancien
Rosarius, Miracle XLVIII
MIRACLE XLVIII (livre 2, chapitre 40)
Du pecheur a cui la teste coupee joi[nst] au cors, se confessa par les merites Nostre
Dame.
233 v° a
Il fu jadis en Normandie
Un homme de mauvese vie;
[O]rgueileus fu, flagicieus.
[L]a voie qui mainne es ciex
[A]voit par ses pechiez perdue. 5
Mes maint pecheur en bien se mue.
[O]n n'est pas tous tepms [l. temps] en un point:
[D]ouceur a souvent cilz qui point.
[A]ucune fois moigne renart
[D]evient et regnart aussi moingne. 10
[T]e sambl'il desguisee besoigne?
[D]e renars face Diex essart
[E]t les bons moignes multiplie
[P]our servir la bele Marie!
[H]ommes de li ont maint biau dit 15
[F]ait et trouvé, mis en escrit.
[E]le vieut bien que regnart moingne
[D]evigne, non pas moigne renart,
[E]t que a lui tout son cuer doigne,
[E]xceptee la Damedieu part. 20
[E]t bien se mue la personne
[Q]uant de ce dieu grace li donne.
[L]e pecheur maise avoit ame,
[N]equedent devos a la dame
233 v° b
Estoit qui pour sauver pecheur 25
Enfanta Jhesum, le sauveur.
Une fois avint qu'atrappé
Fu de ses anemis et hapé.
En un mont la teste coupee
Li ont, et chiet en la valee. 30
Li cors est demourez ou mont,
Le chief cheï ou val parfont.
Le chief a haute vois crioit
- Chascun oïr cler le povoit - :
«Confession, confession, 35
Marie, dame, confession!»
Souvente fois ainsi disoit
Et confession requeroit.
Adonc li un des anemis
Li est devenus bons amis. 40
Alez est querre le prouvoire;
Du fait li a conté la voire
Et comment confession crie
Et apele sainte Marie.
Il ont le chief au cors rejoint, 45
Qui loing estoit et tout desjoint.
Li prestres vint et l'a oÿ;
Du confesser s'est esjoÿ.
Faite a lui a confession
Et receüe absolucion. 50
Molt s'en est esjoï le prestre;
Chascun de nous aussi doit estre,
Quar tout preudomme est lié
Quant set que pecheur deslié
Est de pechié, et a Dieu plaist 55
Quant se repent de son meffait.
Ezech. xviii. Nolo mortem morientis
Sed ut convertatur et vivat ,
«De pecheur la mort ne weil mie,
Dist Diex, mes qu'amende sa vie».
Demandé li a le prouvoire
Que de ce miracle la voire 60
Die, comment vie donnee
Li est, qui a teste coupee.
Respondu li a et briement
Qu'il avoit en enseignement
Que qui sert la vierge Marie 65
Ne depart point de ceste vie
234 r° a
Que n'ait avant confession
Et receue absolucion.
«Je l'ay servie un petit,
De vilz et de ors appetit. 70
A l'onneur de luy je jeunoie
Les samedis, combien que voie
Torte alasse et perilleuse.
Pour ce la dame glorieuse
M'a empestré envers son fil 75
Que ne parte de cest exil
Que ne feisse confession
Et receusse absolucion.»
Ciz, l'absolucion receue
Et ce dit, a l'ame rendue. 80
Et creons que la bele dame
Li empestra salut de s'ame.
En la dite narracion
Exemple de confession
Puet et doit chascun pecheur prendre, 85
Aprés diligemment entendre
A servir la dame des cielx
- Qui bien la sert, il en est miex -
Et li saluer de cuer fin,
Qu'ele nous mainne a bonne fin 90.
Pour toute question au sujet de ce site, veuillez vous adresser à :
labo@francaisancien.net