Moniot d'Arras et Moniot de Paris

Edition: Petersen Dyggve, Holger.  Moniot d'Arras et Moniot de Paris. Edition des chansons et étude historique.
MSNH XIII (1938).

Suivent les chansons R242, R490, R739, R987, R1216, R1318=1259


R242: fol. 116vo-117ro
Chanson anonyme, sans mélodie (espace ménagé pour portées)
Deux scribes: S1, S2

  1.     Ancor ait si grant pousance
          Amors com elle suet avoir,
          Mais n’an veul faire moustrance,
          Car mis l'ai an nonchaloir
          Si fat siecles, k’an cudance dm[?]
                    Ke peut valoir
    Sans amors ne san son dongier.
          Mais, ki a droit veult jugier,
    Nus ne puet a halte vaillance
                    San li adracier:
               Itois est ma creance.

  2.      Sil ki ait bonne esperance
          De grant joie recevoir
          Pues
    k'il an prant teil vaillance
          C'on de halte amor avoir
          Ne doit pais estre an doutance
                    Nen an desespoir
          Mais servir et humilier
          Por les medisans plaixier
               Ke toz jors ont beance
                    De ceaz a gaitier
               Ki servent sans faillance
              [C'an amors ont fe ence lor pance.]

  3.      Saveis keille est la provance
          D’amors et de son pooir:
          Cuers k'an li fait arestance
          De cortesie fait oïr,
          Jolit, de douce acointance,
                    De lairge voloir,
    Hardis de tous biens anbrasier,
          Fers an amour sans chaingier,
    Nes de mesdis et sans vantance;
                    Ansi seit afaitier
               Sias c'a li font lijance.
    /117ro/

  4.      Pues c’amors ait teil poisxance
          Bien doit an li remanoir
          Mes cuers c'an bonne esperance
          L'ait servit sans desespoir
          Et ferait sans repantance
                    Car ne pens veoir
    Ke sans li peüxe esploitier
          N'aconplir mon desirier
    Douce dame aieis remanbrance
                    De vostre amin chier
               C'an vous ait sa fiance.

Retour à l'index


R490: fol. 53ro-vo
Chanson anonyme, notée

  1. Li douz termines m’agreie
    Dou mois d’avril en Pascor,
    Que voi la bruille et la preie
    Chargier de fuelle et de flor
          Et estre en verdor
    Et j’oi chanter nuit et jor
    Oisels par bruille ramee;
    Mais joie eüsse greignor
    Se je fusse en la contree
    Ou cele maint cui j’aior.

  2. Pieça n’i fis demoree,
    Car j’avoie amor grant paor
    Ke por moi ne fust blasmeie;
    Por ç'ai fait aillors sejor
          Que li traïtor
    C’ont perceü nostre amor
    Eüssent aillors panseie.
    Et quant g’i ferai retor,
    S’en iert ma joie doublee,
    Et savrai graindre sonor.

  3. Je ne l’ai pas moins amee
    Por ceu s’o li ne sejor,
    Ainçois l’ai plus dessirree,
    Car en li a grant valor, /53vo/
          Biauté senz folor,
    Lo vis a plain de douçor,
    Blon chief, face coloree,
    Vairs euz, boiche de biau tor;
    Bele quant est ascemee,
    Et bien plaisanz senz ator.
    Tant desir sa compaignie

  4. Que siens sui toz ligement.
    Bien fust ma joie aconplie,
    S'un seul jor tant seulement,
          [...........................]
    Eüsse a li parlimant;
    Mais mis m’a en jaloisie
    Mes cuers qui me dit sovent
    K’ele por ceu m’entroblie
    Que trop demor longement.

Retour à l'index


R739: fol. 52ro-vo
Chanson anonyme, notée

  1. Ne me done pas talant
    De chanter li mois de mai,
    Mais amors de cui je sent
    Un novel confort que j’ai,
    Qant cele qui longemant
    M’a tenu en son esmai
    Reçoit mon servise et /52vo/ prent,
    Et je plus ne li quier mie.

  2. Cuer et cors entierement
    En son servise mettrai.
    Bel m’est, s’ele mi reprent,
    Qan je rien li maefferai.
    Et quant je a esciant
    Son comant trespasserai,
    Ja puis n’aie aligement
    Des mals dont je quier aïe.

  3. Ne sai por coi ne coment
    M’avint que si haut pansai
    Ne ou pris tel herdement,
    Car en moi valor ne sai
    Qui d’amer si haltement
    Me deüst mettre en essai,
    Fors q'amors tant seulement,
    Qui sor moi a seignorie.

  4. Ne fui pas de pooir grant
    A jor q'amors m’asailli,
    Ainz m’orent traï avant
    Mi oil dont premier la vi
    Si tres bele et si plaisant
    Lors demenois si rendi
    Mesi cuers dont fait son talant:
    Amors qui l'a en baillie.

Retour à l'index


R987: fol. 157vo-158ro
Chanson anonyme, sans mélodie

  1. A novias tans ke nest la violete
    Parmei les bos et mainte atre florete,
         Sospris de novele amor
               Veil faire chansonete,
         Si la fera sans sejor
               Cortoise et mignotete.
         Avant ier, a point dou jor,
         Un pot davant la chalor,
               Errai ma santelete.
         Pastorete sanz pastor, /
    158ro/
         Blanchete, de bel ator,
               Vis sour sus une correte:
         Elle miroit sa colour
               Et sa blanche gorgete.
         Tote sole en .i. destour
               Chantoit sa chansonete,
               Ci ne demorra je plus:
         Deus, tant mal mi fait la gaite
         Ki dist: «Sus, or sus, or sus!
               Li jors n'est pais venus.»

  2. La pastorete droite et bien faite et jante,
    Bias cors, biaz vis ait et belle jovante.
          Je li dis: «Ma belle suer,
               Vostre amor m’atalante.
          En vous servir met mon cuer
               Et trestoute m’antante.
          Je seus vostres sans mantir,
          Ja ne m’an kier departir
               Por vant ne por tormante.
          Mon cuer vos las tot entir,
          Ne ne m’an veil departir
               En chamin nen en sante.
          — Sire, amors est mes recors,
               Si est ma muedre rante:
          Se vos m’ameis par amors,
               Drois est ke je m’an sante,
               Et plus joliete en suix.
          Sans amors ne seus je pais,
    Non ier je jai, n’onkes ne fu.»

  3. Inellemant descendi de ma selle,
    Tot en riant li dis: »Ma damozelle,
          [...] cil Deus vos donst boin jor,
               Ki toz biens renovelle,
          Et si vos gairt de dolour,
               Belle, gentis pucelle.
          — Sire, Deus vos donst honor
          Et si vos gart de tristor.
               Ceste priere est belle.
          — Pastorete, en grant error
          M’ait mis por [...........]
               Vostre color novelle.
          — Sire, molt ait pot valor
               Dedus de pastorelle;
          Jonete seus sans signor,
               S’ai molt povre gonelle.»
          Vadreu, vadreu, vadreu, va,
               Vadreu, vadreu, dreu delle.

Retour à l'index


R1216: fol. 102ro-vo
Attribution du manuscrit: Moniaus d'Arras (main moderne)
Sans mélodie

  1. Bone amor sans tricherie
    Servirai sans lozangier,
    Car aillours panser ne quier
    Ne d’atre amor n’ai anvie,
    Dou tout iere an sa bailie.
    Sor mi voloit faire aïe
    Ma dame d’un dous baisier,
    Lours seroit l’amors merie.

  2. Molt ai pou troveit d’aïe /102vo/
    An li cui n’os mais prier,
    Ceu m’en ait fait esloingnier
    Qu'elle croit lozangerie.
    Mais trop ferat vilonie
    S’elle croit par felonie
    Riens c’on li puist anoncier
    D’eschiver ma conpaingnie.

  3. Douce dame debonaire,
    N’aiés cure d’acointier
    Ceu qui me ferat irier.
    Ci ne vos doit pas desplaire:
    Dame qui s’onor welt faire
    Ne doit antor li atraire
    Riens dont elle ait reprochier
    Por son amin anui faire.

  4. Dame, an cui croist et esclaire
    Tout biens sans apetixier,
    Molt me fait releesciier
    Li biens c’oi de vos retraire,
    Et Deus, qui tant vos welt faire
    D’anor c’a tous vos fait plaire,
    Vos doinst voloir d’alegier
    Les mas que mi faites traire.

  5. En ma chanson wel retraire
    A ma dame sans boixier
    Mon cuer ait son cors laissiet;
    De ceu ne li chaut il gaires.
    Mais molt li devroit desplaire,
    Se je muer por teil mal traire
    Dont nus ne me puet aidier
    Fors li qui bien lou puet faire.

  6. Jantis dame debonaire,
    Por Deu, ne me faites maltraire
    Celui que plus vos ait chier
    Ne de vos ne welt retraire.

Retour à l'index


R1318=1259: fol. 82vo-83ro
Chanson anonyme, notée

  1. Quant voi ces prez florir et verdoier,
    Que se peinent cil oisel d’envoisier,
    Adon me fait mon chant recomencier
    Amors, don n’ai talent que m'en retraie,
    Ke senz amors n’a nus joie /83ro/ veraie.

  2. Qui bien aime ne se doit esmaier
    Por grevance k’amors sache envoier,
    Car a celui rendra double luier
    Qui por li trait les douz mals et essaie,
    Ke senz amor [...............................]

  3. .b. Douce dame, de moi merci aiez,
    En tel guise vos en pregne pitiez:
    Se j’avoie de vos un douz baisier,
    De toz mes mals me rasouageroie,
    Ke senz amors n’a nus veraie joie.

  4. Quant  .a. doi estre plus joianz et plus liez,
    Adons sui je plus tristes et iriez,
    K'amors me font un si grant destorbier
    Que de moi n’ont ne pitié ne menaie;
    Ke senz amors n’a nus joie veraie.

  5. Ainçois covient l'or au feu espurgier
    C'on en puisse bone ovrayne getier:
    Si fait amors sa gent grant encombrier
    Ainçois que bien ne guerredon en traie,
    Ke senz amor n’a nus joie veraie.

    Retour à l'index


    haut de page