R 1243
(L 192-21, MW 1079,52)
Manuscrits : unicum de N (fol. 56a)
Perrin d'Angicourt
Édition Steffens [1]

I
  1.         Quant li biaus estez revient
            d'erbe et de fueille et de flor
            que li rosignols maintient
  2.         joie, et chante nuit et jour,
            las! et je souspir et plor
                sans confort d'alejance,
    pour la plus bele et la meillor de France,
  3.         qui, tant me fet doloser
            que j'en pert joie et chanter!
II
          Se je peüsse oublier,
          ce qu'en son gent cors avient,
  1.       ja n'i deüsse penser,
          quant de moi ne li souvient;
          mes Amours me lace et tient
                de sa bele acointance
  2. et du regart, si douce a ma grevance
          qu'Amours ne veut que j'oubli
          la douçor, ou ma mort vi ?
III
          Dame! je vous proi merci
  1.       que vous daigniez regarder
          la face de vostre ami
          qu'Amors fet descolorer.
          pour vous loiaument amer,
  2.           sans autre remenbrance ;
    c'onques n'oubli vostre douce senblance,
          ne la bouche qui palir
          me fet d'amoreus desir !
IV
  1.           Et s'il vous vient a plesir
              dame, pour cui j'ai langui
              que vous daigniessiez sentir
              la bouche dont je vous pri,
  2.               plus m'avriez enrichi
              d'amoreuse esperance
    que d'estre rois sans vostre bienvoillance;
              qu'en vous est touz mes tresors,
  3.           mes cuers, ma vie et ma mors !
V
              Noble, plesans de gent cors,
              joene et croisans de belir,
              blanche et blonde com fins ors!
  1.           Face, ou Deus fet espanir
              rose et lis, et resplendir
                 fine color d'enfance !
    Bone e bele, sage de bienvaillance,
  2.           souvient lo et merci Dé
              qui vos fist de tel biauté!

[1]  Georg Steffens, Die Lieder des Troveors Perrin von Angicourt (Halle, Niemeyer Verlag, 1905), p. 269-270. Avec l'aimable accord de la maison d'édition, tous droits réservés.

Retour à la notice