Miracle X

Cy conmence un miracle de Nostre Dame d' un evesque
a qui Nostre Dame s' apparut et lui donna un jouel d' or,
ouquel avoit du lait de ses mamelles .

PREMIER TABLEAU.
Scène première. Dans une église.
Le jour de la fête de Saint Eloi ( 1^er décembre )
( Des fidèles en dévotion sont assemblés devant une
statue de la Vierge dans une chapelle )
L' EVESQUE. ( Assis dans le chœur, au premier plan,
montrant cette scène à ses clercs )
Seigneurs, entendez que diray.
Par foy, grant joie en mon cuer ay.
Des bonnes gens que je voi ci
Assemblez, s' en lo et graci
Le tout puissant Dieu, mon doulx pére,
Quant pour l' amour sa doulce mére
Sont tant de bonnes gens ensemble.
Bele ordenance est, ce me semble :
C' un point n' y fault.
PREMIER CLERC. Mon seigneur, en quoy a deffault
Plaise vous leur faire savoir,
Car ce qu' il font il font pour voir
Droitement par devocion
Et par tresgrant affeccion
Qu' il ont a la vierge Marie.
S' il faillent, ne le celez mie,
Dites en quoy.
SECOND CLERC. Chier sire, il dit bien, par ma foy,
Il ne sont pas grans clers lettrés,
Si que se le deffault monstrés
C' est vostre honneur.
L' EVESQUE. Dont le vous diray je, seigneur :
S' a ceste feste ci eust
Un petit sermon qui meust
Les cuers plus a la vierge amer,
N' y a qui feist a blasmer ;
Mais n' y est pas.
( Entre à ce moment un prêcheur )
PREMIER CLERC. ( Le désignant ) Mon seigneur, par saint Nicolas,
Un preudomme de bon affaire
Voy sa venir, qui le doit faire,
Si conme on dit.
L' EVESQUE. Or vous seez donc un petit
Lez moy, car je le vueil oir
Pour mon ame plus esjoir
Et en Dieu mettre.
SECOND CLERC. Sire, par le doulx roy celestre,
Voz grez ferons.

Les deux clercs s’asseyent aux côtés de leur évêque

LE PRESCHEUR. ( S’avançant vers l’évêque et s’inclinant )
Reverent pére, a mes raisons
Entendez. Je doi ci preschier,
Si que de vous avoir requier
Beneiçon.
L' EVESQUE. ( Le bénissant ) Divinum auxilium maneat semper nobiscum.

Le prêcheur monte en chaire et commence son sermon

LE PRESCHEUR. Oleum effusum nomen tuum. Ideo adolescentule dilexerunt
te nimis ; trahe me post te ; curremus in odorem
unguentorum tuorum . Ces paroles sont escriptes ou livre
de Cantiques, et sont les paroles de la devote ame parlant
a son espoux, le benoit Jhesu. Et ces paroles nous pouons
appliquier a la loenge de la vierge benoite, et dire ainsi :
personne qui en li par vraie amour a son desir et affeccion
en li disant les paroles proposées l' araisonne en
trois maniéres, c' est assavoir en li loant, en li priant et
en li promettant. Premiérement elle loe son nom : Oleum
effusum ; elle deprie son attracion : Trahe me post te ;
elle li promet ensuite et imitacion : Curremus in odorem,
etc. . A la loenge du nom la vierge benoite telle
personne dit trois choses, car elle l' appelle vertueux, quia
oleum ; elle l' appelle large et plantureux, quia effusum,
et si l' appelle gracieux, ideo adolescentule, etc. ; pour ce
qu' il est nom de onccion, il est appellé huille, et pour ce
ceste onccion vault a trois choses : a medicinement de
plaie et a curacion, a assavourement de refeccion, et a
norrissement de feu, par quoy est entendue dileccion. Je
di que ceste onccion vault a medicinement de plaie. La
plus male plaie qui puist estre, c' est de pechié, et de ceste
est li homs curé et gari par ceste unccion. Pour ce est il
dit en Ecclesiastique : Medicina omnium in festinacione
nebule, la medicine de toutes choses est en l' isnelleté de
la nue, c' est a dire en l' isnelleté de Marie. Car c' est celle
qui ne scet tarder puis que on l' appelle. Et est aussi dit
en la personne de la vierge en ce meisme livre, ou XXXIIII^e
chapitre : Ego quasi fluvius Dorix, je sui, dit elle,
conme le fleuve de Dorix. Dorix vault autant a dire
conme medicinement de generacion. Après je di que
ceste unccion vault a assavoureusement de refeccion. Et
pour ce de elle peut estre dit ce qui est escript ou XXXIIII^e
chappitre dessus dit : Transite ad me, etc.., spiritus meus
super mel dulcis, venez a moy, vous qui me convoitiez
et vous serez rampliz de mes regeneracions ; pour quoy ?
car mon esperit est doulx plus que miel. Item, je dy que
ceste unccion vault a norrissement de feu, par quoy j' entens
amour et dileccion, dont il est escript ou livre et
chapitre dessus diz. Ego feci ut in celis oriretur lumen,
etc. , j' ay fait que ou ciel naistroit une lumiére, c' est a
dire de la vierge l' amour et la dileccion. Et a parler proprement
ces trois choses fait la vierge benoite. Premiérement
aus repentans elle donne de leurs pechiez remission
et curacion. Secondement aux prouffitans de vertuz
et de graces refeccion. Tiercement aux parfaiz elle donne
de la lumiére de gloire la largesce et l' amplificacion.
Après je di que ce nom est plantureux. Pour ce est il dit :
Oleum effusum, c' est a dire nom espandu, et vraiement
il est bien plantureux. Car il est espandu ou ciel, en la
terre et en enfer, mais differenment, car en enfer il est
espandu selon sa puissance, a ce que on le criengne. Et
devez savoir qu' il sont trois choses que les ennemis
craingnent, le signe de la croiz, le nom de Jhesus nostre
sauveur, et le nom de Marie, dont il est dit d' elle en Cantiques :
Terribilis ut castrorum acies, etc. , dame, tu es
espoventable come un ost bien ordené. D' elle dist Diex a
l' ennemi, Genesis tercio : Ipsa cunteret caput tuum,
ceste dame sera celle qui te froissera le chief. Donques
ce nom est espandu en enfer pour estre cremu. Aussi di
je qu' il est espandu ou monde selon sa misericorde a ce
que nous le sentions en toutes noz neccessitez. Dont saint
Bernart dit : Dame, dame, taise soy de tes loenges qui ne
scet ne n' a cogneu ta misericorde. Et puis dit après : Se
les vens de temptacions te sourdent, se les escoupes de
tribulacions te viennent, se les ondes d' orgueil te dejettent,
se ire, envie ou la char debatent la nef de ta pensée,
appelle le nom de Marie et tantost la trouveras preste et
plaine de misericorde. Aussi di je que ce nom est espandu
ou ciel a ce que il y soit glorifié. Dont il est dit en Cantiques :
Viderunt eam filie Sion, etc. , les filles de Sion
la virent et l' appellérent benoite et les roynes la loérent.
Par les filles de Syon et par les roynes j' entens les ames
beneurées de paradis. Et ainsi tu vois que ou nom de
Marie tout orgueil se flechist, et ceulx des cieulx qui la
loent et ceulx de terre qui l' appellent et ceulx d' enfer qui
la craingnent. Aussi est il espandu es cuers des meditans,
en la bouche des loans, en l' oreille des escoutans et des
oians. Dont saint Bernard dit en un sermon de son assumpcion :
Ainsi conme il ne fu ou monde plus digne
lieu de celui que Marie appareilla au fil de Dieu, aussi
ne fu il ou ciel lieu plus glorieux de celui ouquel le fil
Dieu a assis Marie, dont saint Jerosme dit : Je vous pri,
esjoissez vous, puisque Marie est eslevée si souverainement
qu' elle regne avec Jhesu Crist pardurablement. A
ce royaume nous maint par les priéres de Marie ille qui
est Deus benedictus
In seculorum secula.

Le prêcheur descend de la tribune

L' EVESQUE. ( Aux clercs ) Seigneurs, entendez a moy sa.
Vezci un sermon gracieux.
Onques mais n' oy prescher miex
Jour de ma vie.
SECOND CLERC. Mon chier seigneur, il ne pert mie
Le temps qu' a estudier met.
Il est bon clerc, je vous promet :
N' i a que dire.
PREMIER CLERC. En son ordre n' a meillieur, sire,
Ne nul si bon.
L' EVESQUE. Dieu li face de s' amour don,
Car, par foy, il m' a moult pleu
Et, sachiez, le cuer m' a meu
En devocion grandement
Et mis en esjoissement,
Quant me souvient, n' en doubtez mie,
Conment l' umble vierge Marie
Looit et conmandoit ensemble ;
Et c' est veritez, qu' il me semble,
Qu' il n' est tel bien com d' elle amer.
Toute joie y est sans amer,
Toute douleur en doulceur passe
Qui de bon cuer s' amour embrasse ;
Et com plus par devocion
Est cuers en contemplacion
De pencer a la vierge dame,
Plus treuve eslevée son ame
En grans et merveilleux solaz,
Et plus est enlacié du laz
De charité qui le demaine
Par pensée tant qu' il le maine
En si hautaine congnoissance
Que plus sert et plus a plaisance
En servir la vierge Marie,
Et plus son cuer tourne et varie
Hors des affeccions du monde ;
Car il congnoist qu' il n' y habonde
Nul bien parfait.
SECOND CLERC. N' est merveilles se de tel fait,
Sire, parlez si proprement,
Car c' est de propre sentement
Ce que vous dites.
L' EVESQUE. J' ay bien veu de telz hermites
Qui me racontoient pour voir
Qu' il ne voulsissent pas avoir
Par sohait grans possessions
Pour les grans consolacions
Laissier qu' en leurs seles avoient,
Quant a mediter se mettoient
Sur les graces et sur le pris
Que Marie a en soy compris
Dès lors qu' elle ot Dieu conceu.
Et par ceulx ay je congneu
Et congnois qu' il n' est plus de vie
Que d' avoir entente et envie
Touzjours de la vierge servir ;
Et ce me fait, pour desservir
Grace qu' elle a son filz m' acorde,
Que partie ci vous recorde
De sa bonté.
PREMIER CLERC. Sire, je croy pour verité
Qu' elle vous aime, Dieu merci,
Car touzjours avez jusques ci
Mis grant paine en li honnorer
Et en grant ferveur aourer
Par maintes foiz.
L' EVESQUE. Seigneurs, c' est bien raison et droiz
C' on la serve en devocion,
Car de l' infernal mansion
Sommes par elle deffendu.
Hé ! par foy, il m' est souvenu
Qu' ennuit en mon dormant songoie
Qu' avec mon pére en Dieu estoie
L' ermite, qui a mes oreilles
Chantoit, ce me sembloit merveilles,
Dont j' estoie a moult grant deduit :
Si ques, seigneurs, ne vous ennuit,
Je vueil que nous l' alons veoir,
Et si le voulray pourveoir
S' il a deffault.
SECOND CLERC. Sire, de cuer joiant et baut,
S' il vous plaist, avec vous iray
Et compagnie vous tenray,
Se vous voulez.
PREMIER CLERC. Si feray je, se c' est voz grez,
Mon chier seigneur.
L' EVESQUE. Certes, onques n' oy fain greigneur
De riens con j' ay que je le voie.
Or tost donc, mettez vous a voie.
Je vois devant.
SECOND CLERC. Et je vous suivray, je m' en vent,
Sire, de près.
PREMIER CLERC. Aussi en voulray j' estre engrès
Con vous serez.
( L’évêque quitte l’église, suivi de ses deux clercs )

Scène II. Un ermitage.
( Ils arrivent devant la cabane de l’ermite )
L' EVESQUE. Mes amis, savez que ferez ?
Pour ce que sa celle est petite
Et que nul fors li n' y habite,
Si tost que l' arez salué,
Je vueil que soiez advisé
Que vous esloingniez un petit,
Tant que nous l' un a l' autre dit
Aions nos grez.
SECOND CLERC. Si ferons nous, ja n' en doubtez,
Mon seigneur, voir.

L’ermite paraît à une petite fenêtre de sa cabane

L' EVESQUE. Avis m' est que le voy seoir,
Le chief hors de sa fenestrelle ;
Je croy qu' a la vierge pucelle
Pense forment.
PREMIER CLERC. Sire, se Jhesu Crist m' ament,
Bien vous en croy.
L' EVESQUE. ( Saluant l’ermite ) Biau pére, le souverain roy
De paradis soit avec vous.
Conment vous est, biau pére doulx ?
Dites le moy.
L' ERMITE. Mon seigneur, bien veigniez, par foy,
Et vous et vostre compagnie.
La merci la vierge Marie,
Bien : n' en doubtez.
SECOND CLERC. Sire, bon jour vous soit donnez
Et bonne estraine.
PREMIER CLERC. Biau doulx pére, la souveraine
Vierge, qui des cieulx est royne,
Vous face de sa gloire digne
Par son plaisir.
L' ERMITE. Seigneurs, bien puissiez vous venir :
Que Dieu le vueille.
SECOND CLERC. Je lo pour bien et si conseille
Qu' ensemble parler les laissons
Et arriére d' eulx nous traions ;
C' est bien a faire.
PREMIER CLERC. Par la mére Dieu debonnaire,
Je m' i assens.

Les deux clercs s’éloignent

L' ERMITE. Sire, dites moy vostre assens,
Sanz riens celer ne retenir.
Qui vous a meu de venir
Cy orendroit ?
L' EVESQUE. Biau doulx pére, vous avez droit
Se vous m' en faites question.
Je vous diray l' entencion
Qui m' a meu de point en point,
Et si ne vous mentiray point.
Ennuit en mon dormant avis
Me fu qu' estoie touz raviz
En joie, car vous estiez
A m' oreille et me chantiez
Une chançon toute nouvelle,
Sire, qui me sembloit trop belle,
Mais je ne la poi retenir,
Sire, et en voit bien avenir
Partie de ce que l' en songe,
Combien que l' autre soit mençonge ;
Et si m' a tant esté au cuer
Que ja ne m' en fusse a nul fuer
Osté, se vous ne l' eussiez
Oy et que le sceussiez
De par moy, biau pére. Or vous pri
Que vous me dites sanz detry
De vostre estat.
L' ERMITE. Mon seigneur, je pren grant esbat
En ce que vous m' avez compté.
Loez Dieu, car en verité
J' ay en vision telle chose
Veu de vous, dont la parclose
Orendroit pas ne vous diray ;
Mais, sire, ne vous mentiray :
Ce qu' ay veu en grant leesce
M' a mis, car honneur et richesce
Vous croistra, ne demourra mie.
Car ami avez et amie
Telz qui moult vous peuent valoir ;
Mais ne vous peut ore chaloir
Que l' oultre plus m' en enquerez,
Car je say que briément sarez
Et verrez tout appertement
Ce que je di couvertement,
Et vous sera a grant prouffit,
Si que, sire, s' il vous souffist,
Atant me tais.
L' EVESQUE. Biau pére, je vous laisse en pais ;
De ce ne vous vueil point enquerre.
Mais ja Diex ne me laist acquerre
Richesce qui soit contre m' ame.
Quant me souvient de nostre dame
De qui li roy des roys nasqui,
Qui touzjours povrement vesqui
Et ore est royne des cieulx,
Souventesfoiz pleure des yex
Quant je sui en si hault degré,
Pour doubte que ne serve a gré
Son fil ny elle.
L' ERMITE. Ceste paour est bonne et belle,
Sire, et sachiez moult vous parfait.
Mais, pour Dieu, se bien avez fait,
Soiez diligens et soingneux
De vivre adès de bien en miex ;
Car de tant com plus servirez
La mére Dieu, plus acquerrez
De merites, je n' en doubt mie,
Et plus la trouverez amie
Quant tout autre bien vous fauldra.
Car lors son secours vous venra ;
Ce sçavez vous.
L' EVESQUE. Je le sçay bien, biau pére doulx,
Se digne en sui, mais je ne sçay
S' en toute ma vie fait ay
Un seul bien ou elle ait plaisance.
Mais pour ce que j' en ay doubtance,
Suis j' en paour et jour et nuit.
Ore, pour Dieu, ne vous ennuit :
Trop longuement vous tien, ce croy.
Biau pére, pardonnez le moy :
Je m' en revoys.
L' ERMITE. Dieu qui pour nous fu mis en crois,
Sire, voz meffaiz vous pardoint
Et sa sainte gloire vous doint
Et bonne fin.
L' EVESQUE. Amen ! je li pri de cuer fin,
Combien que soie plain de vice
Qu' il vous maintiengne en son service.
A Dieu, biau pére.

Les deux clercs se rapprochent sur un signe de l’évêque

SECOND CLERC. ( Prenant congé de l’ermite ) Sire, la doulce vierge mére
Vous soit amie.
L' ERMITE. Seigneurs, en la Dieu compagnie
Vous voie touz.

L’évêque et les deux clercs quittent l’ermite et prennent
le chemin du retour en échangeant les répliques suivantes :

PREMIER CLERC. Ce bon homme n' est fel n' estouz,
Ains a le cuer plain d' amistié.
Par foy, il m' a fait grant pitié,
Au dire voir.
L' EVESQUE. Il doit bien paradis avoir
Qui ne vit se n' est d' aigres pommes,
Non pas nous qui au siecle sommes
Es grans deliz.
SECOND CLERC. S' il acquiert de gloire le lis,
Il fait que sage.
L' EVESQUE. ( Faisant halte ) Seigneurs, entendez mon courage.
Je vueil ci demourer touz seulz
Et vueil que chascun de vous deux
Voit besongnier ou li plaira.
Mais que vous retournez ci ja,
Plus ne demans.
PREMIER CLERC. Mon chier seigneur, a voz conmans,
Puis qu' il vous plaist, obeirons.
Alons men ; ici bien sarons
Ja retourner.

Quand ils sont à distance de l’évêque :

SECOND CLERC. ( Au premier ) Et ou en pensez vous aler
De ci endroit ?
PREMIER CLERC. Chiez Baudet de l' image droit,
Pour boire de ce Saint Poursain,
Qui me fait souvent le cuer sain
Et en bon point.
SECOND CLERC. Dont ne vous laisseray je point,
Ains vous suivray.

Les deux clercs sortent

L' EVESQUE. ( Resté seul ) Or m' en veulx j' aler sanz delay,
Il est a point, en ma chappelle
Pour vous servir, vierge pucelle
(La demeure m' a trop grevé),
Ou souvent diray : vierge, ave,
De bon courage.
( L’évêque se rend dans la chapelle dédiée à Notre-Dame que l’on
a vue, sc. I, à l’intérieur de l’église. La nuit est venue )

Scène III. Le Paradis.
NOSTRE DAME. Michiel, entens a mon message
Faire, que je dire te vueil,
Et toy, mon ami Gabriel.
Vous deux en celle eglise alez
Et un siége m' appareilliez
Si honneste que je m' y siesse,
Car g' i voulray estre une piéce,
Et un autre plus bas un poy,
Ou ceulx qui venront avec moy
Pourront seoir.
MICHIEL. Dame, nous volons pourveoir
Et faire ce que demandez.
Vostre vouloir nous conmandez
Et ce vault fait.
GABRIEL. Nous nous serions trop meffait
Du refus faire.
( Michel et Gabriel descendent du Paradis
vers la chapelle où l’évêque se trouve déjà en prière )

Scène IV. La chapelle Notre-Dame dans l’église.
L' EVESQUE. ( Priant Notre-Dame ) Ave, royne debonnaire,
Qui virginalment conceuz
Homme et Dieu ; par quoy tu euz
Pouoir si grant que tu froissas
Le chief du mauvais Sathenas,
Qui deçut la premiére fame
Qui touz nous ot mis a mort, dame,
Dont ta valour nous rachata
Et d' ycelle mort nous geta,
Pour quoy te doyvent tuit humain
Servir et loer, soir et main ;
Dame de grace tresoriére,
Dame de pitié boutilliére,
En qui toutes graces habondent
Et en habondant si surondent
Qu' assez en a chascun pour soy
De ce qui suronde de toy ;
Dame, fay moy certain et fis
D' avoir l' amour de ton chier fils.
A moy pecheur vuid et espars
De touz biens ta grace depars,
Doulce vierge, par charité,
Et de ta sainte voulenté
Faire me mez, dame, en l' adresce.

Apparaissent à ce moment les archanges dans la chapelle

Egar ! doulce mére Dieu, qu' est ce
Que je voy ? Certes, anges sont
Qui viennent du ciel la amont.
En ce coingnet ça me trairay
Et qu' il feront regarderay.
( L’évêque va se cacher dans un coin de la chapelle d’où
il peut observer ce qui se passe. Il voit alors que les
archanges disposent deux sièges, comme le leur a
ordonné Notre–Dame : l’un, plus haut et richement
orné par eux, est un trône destiné à la Sainte Vierge ;
l’autre, plus bas, est une sorte de banc, où ils prendront place )
Dieu, con noblement atourné
Ont ce siége et bel aourné !
Or s' en revont ou ciel la sus.
Certainement ne sera nulz
Qui me face em piéce mouvoir
De ci endroit ; je vueil savoir
S' il revendront, ne que sera
Celle ou celui qui la serra
Si noblement.
( Les archanges quittent la chapelle et reprennent le chemin du Paradis )

Scène V. Le Paradis. Il est minuit.
( Ils se présentent devant Notre-Dame assise sur un trône )
GABRIEL. Dame, vostre conmandement
Avons complet.
NOSTRE DAME. ( Se levant ) Puisque mis l' avez a effect,
( S’adressant également à saint Jean et à saint Eloi )
Mes amis, avec moy venez
Et compagnie me tenez
Jusqu' au moustier.
SAINT JEHAN. Doulce mére au roy droiturier,
Voulentiers avec vous irons
Et compaignie vous ferons.
Or sus, Eloy.
SAINT ELOY. De cuer yray ; faire le doy.
Seigneurs anges, devant mouvez
Et chantez si com vous savez
En alant la.
MICHIEL. Bien chanterons, n' en doubtez ja.
Sus, Gabriel.
GABRIEL. Avant conmençons ce rondel.
C' est chançon trop melodieuse.
RONDEL. Servir, vierge glorieuse,
Vous doit on en loyauté,
Tresor de benignité,
C' est oeuvre tresprecieuse
Si qu' en vraie charité
Servir, vierge glorieuse,
Vous doit on en loyauté,
Car a ceulx estes piteuse
Qui en sont entalenté.
Si en di pour verité,
Servir vierge glorieuse
Vous doit on en loyauté,
Tresor de benignité.
( Michel et Gabriel en tête, puis saint Jean et saint Eloi
accompagnent Notre-Dame en chantant ce rondeau )

Scène VI. La chapelle de Notre-Dame.
( Ils entrent. Notre-Dame va prendre place sur le trône qui lui a
été préparé. Les archanges et les saints restent debout à ses côtés )
NOSTRE DAME. Mes amis, j' ay en voulenté
De matines ici oir,
Pour m' ame en Dieu plus esjoir
Et pour la vostre amour, Eloy :
Car sainte eglise, bien le voy,
Fait feste de vous au jour d' ui.
Si que ne vous tourt a annuy,
Se je vueil oir les matines
Cy et les loenges divines
C' on y recorde.
SAINT ELOY. Ha ! dame de misericorde,
Quant moy vous plaist tant honnorer,
Bien vous doy de cuer aourer
Et mercier.
SAINT JEHAN. Ma dame, par qui conmencier
Lez ferez vous ?
NOSTRE DAME. Par qui, Jehan, mon ami doulx ?
( Désignant du doigt l’endroit où l’évêque s’est caché )
Par cel evesque que vezla.
Seigneurs anges, alez le sa
Faire venir.
MICHIEL. Chiére dame, de grant desir
L' irons nous querre.

Les archanges vont chercher l’évêque à l’endroit où il s’est caché

GABRIEL. ( Le faisant sortir de sa cachette )
Or sus, sire preudons, bonne erre.
Cy endroit plus ne vous tenez,
Mais a nostre dame venez,
Qui vous demande.
L' EVESQUE. Mes amis, de voulenté grande
Yray partout ou vous voulrez.
Mais, s' il vous plaist, vous me direz,
Ains que je me parte de cy,
Qui est elle et qui vous aussi.
Vous estes tuit tant bel et gent
C' onques ne vi si belle gent
Com vous et elle.
MICHIEL. Preudons, c' est la vierge pucelle,
Mére Dieu, et nous anges sommes.
Saint Jehan est l' un de ces hommes
Et l' autre Eloy.
L' EVESQUE. Beneurez sui quant la voy,
Elas ! tant a cuer humble et preu.
Seigneurs, alons men de cuer pieu,
Puis qu' ainsi est.
GABRIEL. ( Présentant l’évêque à Notre-Dame ) Chiére dame, vezci tout prest
L' evesque que vous demandez,
Si que tout ce li conmandez
Qui vous plaira.
L' EVESQUE. Doulce vierge, ave Maria.
Ne vous say plus biau salut dire,
Ne mon pouoir ne peut souffire,
Ne n' a value.
NOSTRE DAME. Mon ami, cy sui descendue
Pour toy deduire et solacier.
Matines te fault conmencier,
Telles qu' en ton eveschié sont.
Mes amis les parfineront,
Que tu voiz seoir ci entour.
Je te conmans et par amour
Que t' en delivres.
L' EVESQUE. Qui me donroit cent mille livres,
Dame, ne seroie si liez.
Je suis prest et appareilliez.
Or soiez de respondre prestz.
( Dans les quatre répliques suivantes, l’évêque et ses
célestes confrères, assis à leur banc, commencent à
chanter l’office des Matines, en faisant alterner le verset et le répons )
Domine, labia mea apperies.
LES ANGES. Et os meum annunciabit Laudem tuam.
L' EVESQUE. Deus, in adjutorium meum intende.
LES ANGES ET LES SAINS. Domine, ad adjuvandum me festina <Cy chantent un motet.>

Puis, pour l’hymne, ils chantent un motet - qui peut être celui que l’on a déjà entendu
lorsqu’ils sont venus dans la chapelle

NOSTRE DAME. Seigneurs, assez avons ci sis.
Je vous dy a touz grans merciz.
Il est temps de nous en raler.
Mon ami, gardez ne parler
A nul de ce que tu ci vois.
A Dieu te dy ; je m' en revoys
Es cieulx ; mais scés tu que feras ?
Cy endroit demain revenras
Et je reveoir te venray
En ce point et si te diray
Aucune chose.
L' EVESQUE. Ha ! fleur des fleurs, des roses rose
Odorant et suppellative,
Quant a personne si chetive
Com je sui vous demonstrez, dame,
Je doy bien mettre corps et ame
En vous amer.
NOSTRE DAME. En m' amour n' a goute d' amer.
Mon ami, fay ce que t' ay dit.
Or tost, seigneurs, sanz contredit
Mouvez bonne erre.
SAINT JEHAN. Dame du ciel et de la terre,
Il appartient qu' en touz endroiz
Faisons vostre voloir, c' est droiz,
Et fait sera.
SAINT ELOY. Avant, seigneurs, or y parra
Conment ce rondel finerez,
Ne conment bons chantres serez
A ceste foiz.
GABRIEL. Michiel, de faire oir noz voiz
Arons nous pensée soingneuse.
RONDEL. Car a ceulx estes piteuse,
Qui en sont entalenté.
Si en dy pour verité :
Servir, vierge glorieuse,
Vous doit on en loyauté,
Tresor de benignité.
( Les deux archanges et les deux saints raccompagnent Notre-Dame
au Paradis en reprenant le rondeau qu’ils ont chanté en arrivant )
L' EVESQUE. ( Resté seul, en prière ) Ha ! vierge, de ta grant bonté
Qui en peut dire la hautesce,
Ne la valeur de ta largesce ?
Il n' est pas en terre vivans.
Se servi t' avoie cent ans,
N' ay je pas desservi a voir
La grant grace que m' as fait voir
Et que m' as encores promis.
Et pour ç' aussi, com vraix amis
S' amie en certain lieu atent,
Quant elle li a en convent,
Ycy, vierge, t' atenderay,
Ne jamais ne m' en partiray
Tant que je te verray encore.
Car ce m' a esté si grant glore
Le biau chanter que j' ay oy,
La bonne odeur que je senti,
La grant biauté qu' en toy veoie,
Qu' il me sembloit qu' en gloire estoie,
Ne je ne sçay jugier se lors
L' ame me departi du corps
Ou non de joie.

DEUXIEME TABLEAU.
Scène I. Devant l’église et la demeure attenante de l’évêque.
( Le jour s’est levé. Entrent les deux clercs, revenant d’une taverne )
PREMIER CLERC. Nous avons ja fait longue voie,
Biau compains. Je lo pour le miex
Que nous soions d' aler songneux
Vers mon seigneur.
SECOND CLERC. Alons, j' en ay desir greigneur
Que vous n' avez, si com je croy,

Ils entrent dans la demeure de l’évêque

Egar ! ceens point ne le voy.
Ou peut il estre ?
PREMIER CLERC. J' espoir qu' il se soit alez mettre
En sa chappelle, au dire voir.
Or m' atendez ; g' i vois savoir
Tout privéement :
( Ils sortent et se dirigent vers l’église. Le second clerc reste à
l’extérieur, tandis que le premier, ayant trouvé l’évêque en prière
dans la chapelle, revient sur le seuil )
PREMIER CLERC. ( Au second, lui montrant l’évêque ) vez le la,
Compains, nostre affaire bien va.
Encore est il en oroisons.
Seons nous cy ; sy l' attendons
Tant qu' il ait fait.
SECOND CLERC. Je m' i acors bien et me plait :
Soit si con dites.

Les deux clercs attendent l’évêque à l’extérieur de l’église

L' EVESQUE. ( Dans la chapelle ) Ha ! vierge qui es cieulx habites
Conme souveraine royne,
Dame, par ta doulceur benigne,
Voy en pitié moy, ton sergent,
Qui ta presence cy attent.
Oevre des cieulx l' entrée et porte.
Fay que me solace et deporte
En ta grant biauté regarder.
Ha ! dame, ne vueilles tarder
De venir ; tu le m' as promis,
Car ailleurs n' ay mon desir mis
Qu' en toy attendre.

Scène II. Le Paradis.
NOSTRE DAME. Eloy, vueilliez a moy entendre.
Devant moy portez ce vaissel.

Elle remet à saint Eloi un reliquaire en or

Et vous, Michiel et Gabriel,
En allant chanterez vous deux.
Jehan, ne demourez pas seulx.
Vous en venrez avecques nous
Jusqu' en ce moustier. Or sus, touz,
Mouvez, mouvez.
SAINT JEHAN. Voulentiers, puisque c' est voz grez,
Dame, g' iray.
SAINT ELOY. Aussi feray j' et porteray
Ce vaissel honnorablement.
Il appartient bien vraiement,
C' est chose digne.
GABRIEL. Et nous deux de voulenté fine
Au devant de vous touz irons
Et en alant la chanterons
Chant plain de joie.
MICHIEL. Or chantons si hault c' on nous oie,
Gabriel ; g' y ay grant saveur.
RONDEL. <Et ne s' en dit que la moitié> Glorieuse vierge d' onneur,
Mére au glorieux fruit de vie,
Partout s' estent vostre valeur,
Glorieuse vierge d' onneur ;
Tant a en vous grace et doulceur
Que nul ne fault a vostre aye,
Glorieuse vierge d' onneur,
Mére au glorieux fruit de vie.
( Saint Eloi portant le reliquaire ouvre la marche devant Notre-Dame ;
suivent saint Jean et les deux archanges chantant ce rondeau )

Scène III. La chapelle Notre-Dame dans l’église.
( Entre le cortège )
L' EVESQUE. ( S’inclinant devant la Vierge ) Ha ! mére a mon doulx createur,
Quant a moy deigniez venir ci,
De tout mon cuer vous en graci,
C' est bien droiture.
NOSTRE DAME. Mon ami, pour ce que ta cure
As mis et mez en moy servir,
Je le te voulray desservir,
Ains que de toy soie partie,
Non pas du tout, mais en partie.
Eloy, prez de moy vous traiez,
Ce vaissiau d' or me rebailliez
Que vous baillay.
SAINT ELOY. Je ne vous en feray delay :
Vez le cy, dame.

Saint Eloi s’approche et remet le reliquaire à Notre-Dame

NOSTRE DAME. Mon ami, pour ce que ton ame
En tes grans contemplacions
Ait plus de consolacions,
T' ay je apporté ce vaissiau d' or
Des cieulx ; or en fay un tresor,
Car ce sont reliques moult beles :
Plain est du lait de mes mamelles
Dont le fil Dieu vierge alaittay ;
Et pour tant apporté le t' ay
Que je vueil que tu me parserves,
Si qu' en la fin avoir desserves
Paradis, et n' aies pas doubte :
Car tu seras de m' amour toute
En saisine, se loyaument
Me sers.
( Notre-Dame dépose le reliquaire entre les mains de l’évêque )
Mes amis, alons ment
Es cieulx arriére.
SAINT JEHAN. Vostre voloir, ma dame chiére,
Ferons ; c' est droiz.
SAINT ELOY. Avant, seigneurs, a haulte voiz,
Par amour ce rondel pardites,
Qu' aviez conmencé, quant venistes
Cy en ceste estre.
GABRIEL. Nous le sarons bien a fin mettre.
Avant, Michiel, je vous em pri,
Prenons ensemble sanz detri :
C' est, ce m' est avis, le meilleur.
RONDEL. Tant a en vous grace et doulceur
Que nul ne fault a vostre aie,
Glorieuse vierge d' onneur,
Mére au glorieux fruit de vie.
( Les deux archanges et les deux saints achèvent leur rondeau
en raccompagnant Notre-Dame au Paradis )
L' EVESQUE. ( Plaçant le reliquaire devant lui sur un autel ) Ha ! mére Dieu, vierge Marie,
Vous soiez de ces biens loée !
A moi vous estes demonstrée
Et m' avez donné ce vaissel,
Qui est un sy noble jouel.
Et qui le pourroit desservir ?
Dame, je vous doy bien servir
Et si puis bien apercevoir
Que l' ermite me dit tout voir
Quant il me dist qu' assez briefment
Honneur et richesse ensement
Me venroient. Je croy pour voir
Que Dieu li avoit fait savoir.
A mon hostel vois mes clers querre,
Et puis iray a li bonne erre
La richesce et l' onneur monstrer,
Laquelle il me sceut bien compter.

L’évêque vient sur le seuil de l’église et aborde les deux clercs

Diex gart mes clers.
PREMIER CLERC. Mon seigneur, des tourmens despers
Et divers qui en enfer sont
Vous gart celui qui tout le mont
De nient crea.
SECOND CLERC. Mon chier seigneur, conment vous va ?
Il me semble, se je l' os dire,
Que vous avez talent de rire :
Que pensez vous ?
L' EVESQUE. Que je pense, mes amis doulx ?
Je ne pense nul mal, par foy.
Mais se liez sui, j' ay bien pour quoy,
Car on m' a donné un jouel,
Je croy qu' ou monde n' a si bel,
Ce puis je dire.
PREMIER CLERC. Qui le vous a donné, chier sire ?
S' il vous plait, que nous le voyons,
Si qu' avec vous joians soyons
De vostre bien.
L' EVESQUE. Je ne vous mentiray de rien :
Vous estes mes amis privez ;
Mais gardez que mot n' en sonnez.
S' a fait la doulce mére Dieu
Qu' aourer doy bien de cuer pieu.

L’évêque conduit les clercs vers la chapelle et leur montre le reliquaire sur l’autel

Egardez, vez le ci, seigneur.
Veistes vous onques meilleur ?
Et si est plain, seigneurs, par m' ame,
Du lait precieux nostre dame.
Est ce biau don ?
SECOND CLERC. Par m' ame, oil. Diex ! qu' il sent bon !
Onques mais je ne senti chose
Si bon flairant, ne lis ne rose,
Ny autre espice.
PREMIER CLERC. Ha ! vierge, bien a le cuer nice
Qui ne se mett a vous servir,
Quant si bel savez desservir
A ceulx qui, par devocion,
Ont en vous leur entencion.
Mon seigneur, pour Dieu, qu' il vous plaise
Qu' a genoulz, mains jointes, le baise
Devotement.
L' EVESQUE. Je le vous accors bonnement.
Or tost a genoulx vous mettez.
( L’évêque prend le reliquaire et l’approche de ses clercs qui,
agenouillés, mains jointes, y déposent un baiser )
Baisiez, et en baisant santez
Quelle est l' odeur.
PREMIER CLERC. Onques mais ne senti meilleur
Ne si bon, voir.
SECOND CLERC. C' est bien chose a croire et savoir
Que des choses qui sont ça jus
Envers celles qui sont la sus
C' est un biau nient.
L' EVESQUE. Biaux seigneurs, certes il convient
Que nous aillons veoir biau pére
L' ermite, et qu' aussi li appére.
Bien sçay qu' il en ara grant feste,
Et, pour voir, il m' en fu prophète.
Puis ne parlay je mais a li.
Alons y, seigneurs, je vous pri
Appertement.
PREMIER CLERC. Sire, vostre conmandement
Soit si com dites.
SECOND CLERC. Je croy que des moys ne veistes
Homme qui en eust plus grant joie.
Sa, mettons nous nous deux a voie
D' aler devant.
L' EVESQUE. C' est bien dit, et j' en vous suivant
Après yray.
( Ils se rendent auprès de l’ermite, les deux clercs en tête, puis
l’évêque portant le reliquaire qu’il a auparavant couvert d’un voile )

Scène IV. L’ermitage.
( Entrent l’évêque et les clercs )
L' ERMITE. Je voy venir, dont grant joie ay,
L' evesque mon seigneur a moy,
Car je sçay de certain et croy
Qu' avenu li est de nouvel
Aucune rien dont li est bel,
Et je l' orray moult voulentiers.
( Accueillant l’évêque et les clercs ) Bien soiez venuz, sire chiers,
Et vostre compagnie aussi.
Qu' est ce qui vous amaine ci,
Mon seigneur doulx ?
L' EVESQUE. Ce que je vueil parler a vous,
Biau pére, et dire vous nouvelles,
Dieu mercy, et bonnes et belles
A escouter.
L' ERMITE. Voulentiers orray sanz doubter
Ce que direz.
L' EVESQUE. Biau doulx pére, vous le sarez.
La richesce m' est bien venue
Et l' onneur m' est bien acreue
Que vous me distes, pére doulx
(Puis ne parlay je mais a vous),
Qu' avoir devoie.
L' ERMITE. Conment, sire, ne par quel voie ?
S' il vous plait, dites m' en le voir,
Car grant desir ay du savoir
Conment c' est, sire.
L' EVESQUE. Biau pére, et je le vous vueil dire
De mot a mot, sanz fixion.
J' estoie par devocion
Alez en ma chappelle ennuit :
Quant ce vint vers la mienuit,
Je vi, biau pére, de mes yex
Deux anges descendre des cieulx,
Qui assistrent en la chappelle
Une chaiére haulte et belle
Et moult noblement la parérent,
Et puis es cieulx s' en remontérent.
Adonc en un anglet me tray
De la chappelle et si pensay
Que c' estoit, et a merveillier
Me pris forment, et de veillier
Fu j' en celle heure moult engrès.
Lors vy revenir tost après
Les anges qui si biau chantoient
Que mon cuer en eulz ravissoient :
En joie estoie, sanz ahan.
Après les anges saint Jehan
Et saint Eloy vindrent ensemble.
Après eulx vint et voir me semble
La doulce mére Jhesu Crist :
Celle en la chaiére s' assist,
Li autre s' assistrent plus bas.
Lors conmanda isnel le pas
C' on me venist querre ou j' estoie.
Et li ange tantost a voie
Se mistrent et m' en enmenérent,
Devant elle me presentérent.
Je la saluay humblement
Et elle me dist doulcement :
" Conmenciez matines, amis."
Si tost conme a dire me mis
Domine, labia, sanz plus
Il parfinérent l' oultre plus.
Mais ne demandez pas conment,
Car si melodieusement
Chantoient qu' il m' estoit avis
Qu' en gloire estoie touz raviz,
N' en doubtez mie.
L' ERMITE. Et la doulce vierge Marie,
Quant on ot matines chanté
Si bel com vous m' avez compté,
Ne parla elle point a vous
Ne ne fist semblant, sire doulx ?
Dites me voir.
L' EVESQUE. Biau pére, vous devez savoir
Que si fist : elle descendi
De son siége et me deffendi
Ceste chose ne fust sceue
Tant qu' a moy seroit revenue.
Atant es cieulx s' en remonta
Et je demouray tout seul la,
Pensant se je l' attenderoye
Ou se je m' en retourneroye.
Toutesvoies je l' atendi,
Et elle arriéres descendi
Avec sa belle compagnie
En chantant par grant melodie,
Qui moult le cuer me confortoit.
La vi qu' un vaissail apportoit
Trestout de fin or saint Eloy,
( Montrant le reliquaire qu’il tient voilé ) Lequel vaissel j' ay avec moy ;
Car quant la vierge s' en rala
Es cieulx, elle le me donna
Tout plain du lait de sa memelle.
Dites moy, de ceste nouvelle
Estes point liez ?
L' ERMITE. Certes si sui, sire ; or vueilliez
Que je le voie et que le baise,
S' arez mon cuer mis en grant aise
Et en solaz.
L' EVESQUE. Ce ne vous refuse je pas.
( L’évêque découvre le reliquaire et le met entre les mains de l’ermite )
Vez le ci, biau pére, esgardez,
Baisiez l' et puis le me rendez
Tantost, biau pére.
( L’ermite embrasse le reliquaire et le remet à l’évêque qui le couvre de nouveau )
L' ERMITE. Ha ! glorieuse vierge mére,
Conme noble loier dessert
Qui de vray cuer, dame, vous sert !
Vezci choses tresprecieuses
Et reliques tresglorieuses.
Certes en avision vi,
Mon chier seigneur, ce vaissiau ci
Et trestout ce qu' avez veu,
Ainçois que vous soit advenu.
Pour ce vous dis je, mon seigneur,
Que richesce ariez et honneur
En brief tempoire.
PREMIER CLERC. Vous li distes parole voire,
Sire, dont miex vous doit amer ;
Et celui devroit on blasmer
Qui el diroit.
SECOND CLERC. Par ma foy, voirement seroit.
Et se la vierge ou temps passé
A servi, pour ce cuer lassé
N' en doit pas avoir maintenant,
Quant honneur li a fait si grant,
Conme il appert.
L' EVESQUE. Seigneurs, je vous di en appert
Que se j' ay la dame de glore
Bien servi, m' entente est encore
De servir miex.
L' ERMITE. Vous avez droit, si m' aist Diex,
Sire, car c' est noble besongne ;
Et, si vous plaist, pour ç' a Boulongne
Irons ensemble.
L' EVESQUE. Biau pére, puis que bon vous semble,
Moult bien me plait.
L' ERMITE. Alons men donques a court plait,
Sire, par my vostre chappelle
Saluer la vierge pucelle,
En chantant par humilité :
Regina celi, lettare, etc. .
Explicit.
( L’évêque portant le reliquaire, l’ermite et les clercs
se retirent en chantant le « Regina caeli » )