Miracle XII

Cy conmence un miracle de Nostre Dame de la
marquise de la Gaudine, qui par l' accusement
de l' oncle de son mari, auquel son mari l' avoit
conmise a garder, fu condampnée a ardoir, dont
Anthenor par le conmandement de Nostre Dame
s' en combati a l' oncle et le desconfit en champ.

Acte premier.
Scène I. Le château du marquis de la Gaudine.
LE MARQUIS. Dame, vueilliez a moy entendre.
Il m' esconvient, sanz plus attendre,
Aler en Pruce ; car, pour voir,
Autrement en mon cuer avoir
Ne peut aayse ne repos,
Tant ay ce voyage en propos
Et en memoire.
LA MARQUISE. Hé ! sire, pour le roy de gloire,
Pruce est un pais moult lointain.
Qui aura la cure et le soing
De vo gent et de vostre terre ?
Sire, pour Dieu, amez vous guerre
Tant a avoir ?
LE MARQUIS. M' amie, je vous diray voir:
S' estre y devoie mors ou pris,
Si yray je pour los et pris
Acquerre et honneur vraiement ;
Et lairay le gouvernement
De ma terre et de vous aussi
A mon oncle ; ainsi sanz soussi
Vous lairay, dame.
LA MARQUISE. Sire, de cuer pri nostre dame
Qu' amie vous soit et garant.
Mais je vous pri pour Dieu qu' avant,
Sire, que faciez ceste emprise,
Au mains que nous deux a l' eglise
Aillons vous a Dieu conmander
Et li sa grace demander ;
Ce sera sens.
LE MARQUIS. Dame, a ce conseil bien m' assens.
Voulentiers a l' eglise iray.
Ernault, or m' alez sanz delay
Tantdis a mon oncle noncier
Que cy viengne sanz atargier ;
Je le lui pry.
ERNAUT. Sire, voulentiers sanz detry.
J' y vois sanz faille.
( Il sort )
LE MARQUIS. Messire Almaurry de la Paille,
Sa compaignie me tenez.
Dame, après nous vous en venez ;
Je vois devant.
( Le marquis, son épouse, le premier chevalier
et une demoiselle se rendent à l’église )

Scène II. L’église.
PREMIER CHEVALIER. ( Montrant un prêcheur )
Mon seigneur, je voy la estant
Un frére qui pas ne verseille,
Ains m' est advis qu' il s' appareille
Pour preeschier.
LA MARQUISE. Or vous pri je, mon seigneur chier,
Qu' il vous plaise que nous l' oions,
Car aussi bonne euvre ferons
Com d' oir messe.
LE MARQUIS. Donc, dame, ains qu' il y ait plus presse,
Cy m' asserray.
LA MARQUISE. Et j' autel ci endroit feray.
( Au chevalier ) Seez vous cy hault.
PREMIER CHEVALIER. ( A la demoiselle ) Or ça, damoiselle, il vous fault
Aussi seoir.
LA DAMOISELLE. Ça me serray pour le veoir
En my le vis.

Tous se sont assis pour écouter le prêcheur )

LE PRESCHEUR. <Entre deux est fait un sermon qui se fenist in secula seculorum.>

Entre les deux répliques de la demoiselle et du marquis le prêcheur fait un sermon
qui se termine par « in saecula saeculorum »

Bon et bien fait.
LA MARQUISE. Sire, on ne peut miex par souhait.
La vierge par son doulx plaisir
Le nous doint si bien retenir
Qu' a no preu soit.
LE MARQUIS. Alons nous ent de ci endroit,
Messire Almaurry, je vous pri.
Je n' y vueil plus faire detry,
Car temps en est.
PREMIER CHEVALIER. Mon chier seigneur, je sui tout prest
De voz grez faire.
( Le marquis sort, suivi du premier chevalier )
LA MARQUISE. Pensons de nous a l' ostel traire,
Damoiselle, après mon seigneur ;
Ce ne seroit pas nostre honneur
Ce n' y estions.
LA DAMOISELLE. Dame, c' est voir ; or en alons
Donques bonne erre.
( La marquise sort, suivie de la demoiselle )

Scène III. Le château de l’oncle du marquis.
( Entre Ernaut )
ERNAUT. Le dieu du ciel et de la terre,
Mon seigneur, vous doint paix et joie.
Vostre nepveu a vous m' envoye
Qui marquis est de la Gaudine,
Et vous prie par amour fine
Qu' a li veigniez.
L' ONCLE. Vous estes moult bien enseigniez.
Sus ! levez vous, amis Arnault ;
De cuer iray joiant et bault.
Ça alons ment nous deux ensemble.
( Ils se rendent dans le château de la Gaudine )

Scène IV. Le château de la Gaudine.
L’ONCLE. ( Désignant le marquis ) Je le voy la, si com me semble:
Nous sommes venuz bien a point.
( Au marquis ) Qu' est ce la, biaux niez ? en quel point,
Qui me mandez ?
LE MARQUIS. Biaux oncles, moult bien demandez
Et voulentiers le vous diray.
En Pruce vueil aler, pour vray,
Mettre aux aventures mon corps.
Je sui jounes et assez fors
Et riche homme, la Dieu mercy.
Je ne sers de nulle rien cy,
Et la je apprendray la guerre ;
Si que pour gouverner ma terre,
Biaux oncles, tant con seray la
Vous ay je mandé par deça
Et dès maintenant chevetain
Vous en fas sur touz souverain:
Car de vous sur touz je me fy ;
( Montrant son épouse ) Mais de la dame que veez cy
Vous pri tresespeciaument
Que la me gardez loyaument ;
C' est quanque j' aim.
L' ONCLE. Biaux niez, tenez pour tout certain
Que ma niéce vous garderay
Et vo terre gouverneray
Si bien que quant retournerez,
Se Dieu plaist, honneur y arez
Et moy aussi.
LE MARQUIS. Biaux oncles, je vous en mercy ;
Je ne vous vueil plus demander.
Dame, a Dieu vous vueil conmander.
Je vous pri, soiez preude fame
Et vueilliez pour moy prier, dame,
Je vous en proy.
LA MARQUISE. Mon chier seigneur loyal, le roy
De paradis qui es cieulx maint
A honneur vostre corps ramaint
Et a grant joie.
L' ONCLE. Biaux niez, il fault que vous convoie ;
Si fera messire Almaurry
Et Ernault aussi que vezcy.
Il appartient.
LE MARQUIS. Or soit donc, puis qu' il esconvient ;
Esmouvons nous.
LA MARQUISE. ( Embrassant le marquis )
A Dieu, a Dieu, mon seigneur doulx !
Mon ami, lasse ! je ne say
Se jamais je vous reverray.
La tresdoulce vierge Marie
Vueille estre en vostre compagnie,
Car ceste compagnie voir
Me fait au cuer grant dueil avoir ;
Je n' en puis mais.

Elle pleure )

LA DAMOISELLE. E ! dame, souffrez vous huy mais.
Est ce bien fait d' ainsi plourer ?
Vous vous ferez des gens moquer
De tel dueil faire.
LA MARQUISE. Ha ! chiére amie debonnaire,
Mon solaz pers et m' amistié,
Si que se j' ay de li pitié,
C' est bien raison.
( Le marquis, son oncle, Ernaut et le premier
chevalier se sont avancés jusqu’au seuil du château ).
LE MARQUIS. Biaux oncles, il est mais saison
De retourner. Alez a Dieu ;
Gardez bien ma femme et mon lieu.
( À Ernaut ) Ernaut, avecques moy venez,
( Au premier chevalier ) Mais vous vous en retournerez,
Sire Almaurry.
PREMIER CHEVALIER. Chier sire, pas ne vous desdy ;
Je feray vostre voulenté.
Dieux a honneur et a santé
Vous ramaint, sire.
ERNAUT. Amen chiet bien icy a dire.
A Dieu trestouz !
L' ONCLE. A Dieu, Ernault, a Dieu, niez doulx !
Messire Almaurry, retournons.
( Ils se séparent ; l’oncle et le premier chevalier
reviennent auprès de la marquise )
( À la marquise ) Belle niéce, nous revenons
Pour vous compagnier et garder
Et les besongnes regarder
Qui sont a faire.
LA MARQUISE. Faites ent, oncle debonnaire,
Tout vostre vueil.
L' ONCLE. Niepce, bien dites ; pour ce vueil
Les registres aler veoir,
Et sur ce pourray pourveoir
A voz besongnes.
LA MARQUISE. Damoiselle, sanz plus d' eslongnes
Querir, venez avecques moy
En nostre eglise ou j' ay, par foy,
Un poy affaire.
LA DAMOISELLE. Treschiére dame debonnaire,
Vez me cy preste, a brief parler,
En quel lieu qu' il vous plaise aler
De vous suivir.
LA MARQUISE. Je vois la vierge requerir,
Damoiselle, pour mon seigneur,
Que Dieu le ramaint a honneur.
( La marquise se rend à l’église avec la demoiselle )

Scène V. L’église.
( La marquise entre dans l’église en compagnie de sa demoiselle )
LA MARQUISE. ( À la demoiselle ) Tenez vous cy, ne vous soit paine.
( Avançant vers la statue de la Vierge ) Vierge royal, puis et fontaine
De pitié, d' amour et de grace,
Dame, confortez ceste lasse
Qui de cuer devost vous appelle.
Glorieuse vierge pucelle,
Donnez moy tel priére faire,
Vierge, qui a vous puisse plaire
Et a la sainte trinité,
Troys personnes en unité,
Pére, filz et saint esperit,
Et priez au doulx Jhesu Crist
Qu' a mon seigneur vueille estre aidant
Si que le voie reparrant
Sain et sauf arriére en ce lieu.
Et si vous requier, mére Dieu,
Que me gardez de l' anemi ;
Et touz les jours venray icy
Vous deprier, haulte royne,
Dame des archanges tresdigne ;
Vueilliez a ma priére entendre,
Car je doubte moult de mesprendre
Vers vostre enfant.
( Le diable apparaît à l’extérieur de l’église et observe
la marquise en prière )
LE DYABLE. Haro ! que j' ay le cuer dolant
Et aray se tant ne puis faire
Que je puisse a ma part attraire
La femme au marquis qui s' en va
Oultre mer: il li mecherra
Se j' onques puis ains qu' il retourne ;
Mes elle a desja passé bourne
Et est auques hors de mes laz.
Mais ainsi n' eschappera pas ;
Combien que Marion la rouce,
Qui tout adès nous est rebource,
Serve de cuer a son pouoir:
Je li feray meschief avoir
Se j' onques puis.
LA MARQUISE. ( Continuant sa prière )
Vierge royal, fontaine et puis
De doulceur, de misericorde,
De mon doulx seigneur vous recorde,
Glorieuse vierge Marie.
Gardez que son cuer ne varie
Le faulx Sathenaz deputaire
Et m' ottroiez tel chose faire
Que nostre sauvement y soit.
Je croy, damoiselle, qu' il soit
Temps de raler en no manoir,
Car il est, je le croy de voir,
Bien hault diner.
LA DAMOISELLE. Ma dame, sanz plus sejourner,
Mouvez et je vous suiveray,
Et si vueilliez tenir de vray
Que j' ay grant fain.
( Elles retournent au château )
LE DYABLE. Haro ! que j' ay le ventre plain
De dueil et de sanglante rage
Quant je ne puis en mon servage
Mettre la femme du marquis !
Elle a le cuer trop fort espris
De requerir la mére Dieu.
( Montrant le château )
Mais je li pance d' un tel jeu
A jouer qui fort li nuira:
Se je puis, son oncle gerra
La nuit qui vient avecques elle ;
Et s' il avient qu' elle soit telle
Qu' elle s' en garde, tant feray
Qu' a son oncle en teste mettray
Qu' il pensera de la trahir,
Par quoy il la face morir.
( On voit l’oncle aller au-devant de sa nièce )
C' est bien a point ; je le voy la
Ou devers sa niéce s' en va.
Je me vois bouter dedanz li ;
De moy ne peut estre parti
N' aler arriére.

Scène VI. Le château de la Gaudine.
L' ONCLE. ( À sa nièce ) Qu' est ce la, belle niéce chiére ?
Est il bien temps de retourner ?
J' ay puis fait pour vous attourner
Mainte besongne.
LA MARQUISE. Par la mére Dieu de Boulongne,
Tant veez vous miex qu' est a faire ;
Et se riens veez a refaire,
Pour Dieu soit fait.
L' ONCLE. Dieu mercy, rien n' y a meffait
Que je sache. Que feray je,
Belle niéce ? Me serray je
Decoste vous ?
LA MARQUISE. Oil, s' il vous plaist, oncle doulx,
Je vous em proy.
L' ONCLE. ( S’étant assis auprès d’elle ) Voulentiers: certes je vous voy
Moult voulentiers, n' en doubtez mie,
Conme celle qui est m' amie
Sus autre toute.
LA MARQUISE. Vostre amie sui je, sanz doubte,
Et par nature et par lignage,
Quant seigneur m' est par mariage
Vostre nepveu.
L' ONCLE. Niéce, je vous promet et veu,
Soit que j' en soie ou non repris,
De vostre amour sui cy espris
Que je ne scé qu' en doye faire,
N' envers vous ne m' en puis plus taire
Bien cuit mourir s' il n' est ainsy
Que vous aiez de moy mercy
Et que de vous soie privez,
Et je vous pri ne m' estrivez
Point du contraire.
LA MARQUISE. Oncle, bien vous peussiez taire
De moy parler de tel langage.
Ou avez vous pris ce courage ?
Dya ! se je vouloie ce faire,
Si m' en devriez vous retraire.
Je croy, par foy, que m' essaiez.
Mais, oncle, ne vous esmaiez:
Ja, se Dieu plaist, tel deshonneur
Ne feray envers mon seigneur ;
Et ne m' en parlez plus, pour Dieu,
Car je ne pourroie estre en lieu
Ou vous fussiez.
L' ONCLE. Certes, niepce, se sceussiez
Conment de vostre amour forment
Sui surpris, je croy qu' autrement
Respondissiez.
LA MARQUISE. Certes, vous ne me pourriez
Monstrer que ce soit cy amour,
Mais grant honte et grant deshonnour,
Au mains a moy, je vous dy voir ;
Et pour ce vous fas je savoir,
Prenons que je voulsisse amer,
Ne se pourroit mon cuer donner
A ce que m' amour eussiez
Ne que ja de moy joissiez ;
Nanil, sanz faille.
L' ONCLE. Dame, je n' en puis mais ; or aille
Ainsi conme il pourra aler.
Jamais ne vous en quier parler,
Ençois men vois, pour l' oublier,
En voz besongnes emploier
En quelque lieu.
LA MARQUISE. C' est bien dit ; alez, de par Dieu,
Ou vous vouldrez.
( La marquise se retire )
L' ONCLE. ( Seul ) Las ! je sui malement navrez,
Car j' ains, dont moult me puis blasmer,
Celle qui ne me veult amer,
Ainçois asprement me refuse,
Dont j' ay la pensée confuse.
Mais chiérement li venderay,
Car si grant honte li feray
Que ne le pourra amender.
( S’approchant de Galot, le nain du marquis )
Galot, je te vueil demander
En secré, ne m' encuse pas,
Se pour m' amour faire vouldras
Ce que diray.
GALOT. Sire, conmandez: je feray,
Se fait peut estre.
L' ONCLE. Il te fault ja assez tost mettre
En la chambre de la marquise.
Sez tu conment ? en telle guise
Que nulx ne sache que la soiez ;
Et après ce, mais que tu voies
Qu' elle soit endormie bien,
Delez elle en son lit te tien
Jusques a tant que la venray
Et d' emprès li te leveray ;
Car j' ay mis et gagié de fait
Qu' aussi com j' ay dit sera fait
Sanz riens remaindre.
GALOT. Sire, je doy doubter et craindre
Que ne s' en courrouce ma dame,
Car en tout le monde n' a fame
A qui je soie tant tenuz ;
Et s' elle se courrouce, nulz
Ne me fera vers li ma pais:
Ainsi sa grace a touzjours mais
Aray perdu.
L' ONCLE. Galot, n' aiez cuer esperdu ;
De ce pren je sur moy la charge.
Je te seray escu et targe,
N' en aies doubte.
GALOT. Dont sera vo voulenté toute,
Sire, acomplie.
L' ONCLE. Galot, or ne le laisse mie,
Va penser de bien besongnier ;
Et se tu me fais gaaignier,
Je te promet et si me vant
Qu' a touz les jours de ton vivant
Riche seras.
GALOT. Sire, ne vous en doubtez pas,
Je vois la besongne esploitier
Et moy en sa chambre mucier
En un quignet.
L' ONCLE. Garde bien que deffaut n' y ait
Que ne t' y truisse.
GALOT. Non ara il voir, que je puisse ;
Ce vous afferme.
( Galot va se cacher dans la chambre de la marquise )
L' ONCLE. ( Seul ) Or say je bien, dedans court terme
Feray si grant honte a ma niepce
Qu' il ne sera jusqu' a grant piéce
Qu' il ne l' en doie souvenir.
Trop m' a volu pour vil tenir
Pour s' amour que requis li ay.
Certes des chevaliers iray
Querre qui avec moy venront,
Qui contre elle tesmoingneront
Ce qu' aront veu.
( Il sort )

Scène VII. En un autre endroit du château.
LA MARQUISE. Damoiselle, se j' eusse beu
Je deisse que je fusse yvre.
Ne me puis avoir a delivre
Tant sui chargiée de sommeil.
Gardez cy ; aler dormir vueil
Un seul petit.
LA DAMOISELLE. Dame, quant si grant appetit
En avez, alez de par Dieu.
Je ne me mouvray de ce lieu
S' arez dormi.
( La marquise se retire dans sa chambre. Entre l’oncle,
suivi de deux chevaliers )
L' ONCLE. Seigneurs, vous venrez avec my,
Car de vous moult bien a faire ay:
Certes un fait vous monsterray
Villain et lait.
PREMIER CHEVALIER. Sire, il n' est nul de nous qui n' ait
Grant desir de faire voz grez.
Menez nous partout ou vouldrez,
Car touz prestz sommes.
SECOND CHEVALIER. Voire, et si vaudrons bien deux hommes,
S' il y convient nulz cox ruer ;
Car noz corps bien esvertuer
A point sarons.
L' ONCLE. C' est bien dit. Seigneurs, or alons.
Je doy un grant mechief trouver
Que vous m' aiderez a prouver,
Se mestier est, car il me touche,
Afin que n' en aie reprouche.
Suivez moy ; je m' en vois devant.
( Il s’approche de la demoiselle )
Damoiselle, venez avant:
Ou est la marquise ?
LA DAMOISELLE. Sire, n' a guéres que si prise
Estoit de sommeil, par ma foy,
Qu' elle est alée dormir un poy,
N' a pas granment.
( L’oncle se rend dans la chambre, suivi des deux chevaliers et de la demoiselle )

Scène VIII. La chambre de la marquise.
( L’oncle entre dans la chambre et montre à la demoiselle et aux deux
chevaliers la marquise endormie sur son lit, le nain Galot allongé auprès d’elle. )
L' ONCLE. Par mon chief, il va autrement.
Messire Almaurry, levez sus:
Nous sommes honniz et perduz.
Venez veoir euvre cruelle ;
Et vous, suivez moy, damoyselle.
Veez, seigneurs, quel mauvestié !
Dites, doit on avoir pitié
D' ardoir une si faite dame
Qui si deshonneure et diffame
Un tel homme que le marquis,
Et qui ce meschant nain a pris
Pour acomplir sa lecherie,
Afin c' on n' aperçoive mie
Son grant hontage ?
PREMIER CHEVALIER. Certes, c' est pitié et dommage
Quant se meffait si noble dame.
Eveilliez vous, eveilliez, dame ;
Trop fort dormez.
LA MARQUISE. Egar ! biaux seigneurs, que querez
Vous cy endroit ?
L' ONCLE. Dame, vostre ribaut destroit,
Qui lez vostre costé se gist.
( Au nain ) Mais, par le sanc que Dieu me fist,
Jamais a femme ne jerras
N' a marquis honte ne feras.
De ce lit te sacheray hors
Et de ce coustel par le corps
Te donrray. Tien, pour ta desserte:
Droiz est que tu voises a perte ;
Trop as fait mal.
( Il poignarde le nain )
LA MARQUISE. Ha ! tresdoulce vierge royal,
Dont vient ceste grant trahyson ?
Ha ! oncle, a tort et sanz raison
Sui diffamée, c' est pechié.
Dieu scet qu' a mon corps n' a touchié
Au moins pour euvre de nature,
Ne li ne autre creature,
Ne ne fist onques vraiement
Que mon chier seigneur seulement.
Diex, a tesmoings je t' en appelle
Et toy, doulce vierge pucelle:
Fays y vertuz.
L' ONCLE. Dame, je croy bien, levez sus,
Mais nous veons bien le contraire.
Il n' en fault plus enqueste faire:
Le fait si est assez prouvé.
Mais puis que je vous ay trouvé
En si vilaine mesprison,
Certes vous venrez en prison.
( Aux chevaliers ) Seigneurs, vous deux l' en enmenrez
Et en prison la garderez
Tant que soit venuz le marquis.
Quant il ara du fait enquis,
Si en face ce qu' il voudra.
Avant, avant: enmenez la
Appertement.
PREMIER CHEVALIER. Voulentiers: ça, dame, alons ment,
Puisqu' il le veult.
SECOND CHEVALIER. Grant chose a en " faire l' esteut" ;
Avant passez.
( Les deux chevaliers la font sortir brutalement de sa chambre )
LA MARQUISE. Seigneurs, j' ay de douleur assez.
Je vous pri, pour Dieu, humblement
Qu' a moy mener courtoisement
Au moins vous plaise.
L' ONCLE. Passez, passez, dame mauvaise.
Certes s' a droit de vous ouvrasse,
Maintenant ardoir vous menasse
Sanz respit prendre.
( L’oncle et les deux chevaliers conduisent la marquise dans la prison du château )

Scène IX. La prison, à l’extérieur puis à l’intérieur.
PREMIER CHEVALIER. Dame, cy vous convient aprendre
Et savoir qu' est prison fermée.
Entrez ens tost ; sanz demourée
Delivrez vous.
LA MARQUISE. Lasse ! se j' ay dueil et courroux,
Je n' en puis mais, quant vilener
Me voy si et emprisonner
Sanz cause. Ha ! doulce mére Dieu,
Confortez moy ; trop est ce lieu
Obscur et noir.
( Elle entre dans la prison dont la porte est refermée )
L' ONCLE. Seigneurs, il vous fault cy manoir ;
Et gardez cy ceste prison
Que par la vostre mesprison
Elle n' eschappe.
PREMIER CHEVALIER. Il sara bien jouer soubz chappe,
Sire, qui la nous ostera,
Car nul devers li n' entrera,
Tant soit grant maistre.
L' ONCLE. Seigneurs, je ne la vueil conmettre
Fors qu' a vous ; or en faites tant
Que ne soiez pas consentant
De son meffait.
SECOND CHEVALIER. Sire, sire, il sera bien fait,
N' en aiez doubte.
L' ONCLE. J' en mett sur vous la charge toute
Et si m' en vois par de dela.
A Dieu vous dy ; or y parra
Con le ferez.
( L’oncle part ; les deux chevaliers restent en faction devant la porte )
LA MARQUISE. ( A l’intérieur de la prison, priant la Vierge )
Doulce mére Dieu, soufferrez
Vous qu' ainsi soie dyffamée
A tort et que la renommée
Aie d' avoir fait avoultire ?
Dame, trop ay au cuer grant ire
Quant de si laide trayson
Sui accusée sanz raison,
Car onques jour je ne pensay,
Combien c' on m' en ait fait essay,
A faire telle mauvaistié.
Ha ! dame, par vostre pitié,
Vueilliez y telles vertuz faire
Qu' a touz evidanment appaire
S' ay tort ou droit.

ACTE II.
Scène I. Aux environs du château de la Gaudine, quelques mois plus tard.
( Entrent le marquis et Ernaut )
LE MARQUIS. Puis que nous sommes cy endroit,
Ernaut, a mon oncle en irez
Et si le me saluerez,
Et li direz de mon estat,
Et que sanz plus faire debat
Il viengne a l' encontre de moy
Et qu' il amaine avecques soy
Toutes mes gens.
ERNAUT. Sire, voulentiers diligens
Seray de ce message faire,
Et si li saray bien retraire
Ce que me dictes, n' en doubtez.
( Ernaut se rend auprès de l’oncle du marquis )

Scène II. Le château du marquis de la Gaudine.
( Entre Ernaut )
ERNAUT. ( À l’oncle ) Diex vous croisse honneur et bontez.
Mon seigneur, oiez mon langage.
Je vous fas savoir con message
De par mon seigneur le marquis
Qu' il est retourné du pais
De Pruse et est de cy bien près.
Si vous mande que soiez près
Et voz gens, et qu' a li veigniez
Et compagnie li teigniez
Tant qu' il soit ceens a repos.
Ainsi com je le vous propos
Il le m' a dit.
L' ONCLE. Amis, ja n' en serez desdit,
Que bien veigniez en verité !
A il depuis touzjours esté
Haistié et sain ?
ERNAUT. Oil, sire, par saint Germain,
Et s' a puis fait a gentillesce
Mainte honneur par sa grant prouesce
Et mainte jouste fort jousté.
Pour Dieu n' y ait plus arresté ;
Venez vous ent.
L' ONCLE. Ernault, voulentiers ;
( au premier chevalier ) sus briefment.
Messire Almaurry, s' en alons
A mon nepveu, quant nous l' avons
De cy bien près.
PREMIER CHEVALIER. Sire, alons ; je suis moult engrès
Que je le voie.
L' ONCLE. ( Aux deux chevaliers ) Seigneurs, il vous fault mettre a voye.
Suivez moy sanz arrestoison ;
Mais gardez que celle prison
Soit bien fermée.
SECOND CHEVALIER. Si ferons nous sanz demourée ;
Avant alons ; ( passant devant la prison ) tout est bien clos.
Sire, de vous nous soit desclos
Ou vous nous pensez a mener,
Qui nous avez volu haster
Si malement.
L' ONCLE. Contre mon nepveu vraiement
Qui vient, si con mandé le m' a.
( Ils sortent du château )

Scène III. Aux environs du château.
( L’oncle, suivi des deux chevaliers, avance vers son neveu )
L’ONCLE. Egardez, je le voy ja la.
Pour l' amour Dieu, avançons nous.
Biau doulx nepveu, bien vegniez vous !
Conment vous a il puis esté ?
Vous tenez bien du corps chaté,
A ce que voy.
LE MARQUIS. Biaux oncles, bien, foy que vous doy
Et vous, estes vous sains et druz ?
Seigneurs, bien soiez vous venuz,
Touz ensemble et chascun par soy !
Conment vous est ? dites le moy,
Je vous em pry.
LES CHEVALIERS. Mon seigneur, bien, vostre mercy,
Et vous conment ?
LE MARQUIS. Dieu mercy, bien et liement.
Par Dieu, conment le fait ma femme ?
Dites, mon oncle, par vostre ame,
La verité.
L' ONCLE. Sire, elle est en bonne santé,
Ce m' est advis.
LE MARQUIS. Hé dia ! vous me tournez le vis,
Qui malement me reconforte.
Je voy bien que c' est ; elle est morte !
Halas ! m' amie.
L' ONCLE. Non est, biau niez, n' en doubtez mie ;
Mais il le vaulsist miex, par m' ame,
Car elle ert une vaillant femme ;
Je n' en dy plus.
LE MARQUIS. Il me fault oir le surplus.
Qu' i a il ? je le vueil savoir.
Je vous pri, dites m' en le voir
Sanz riens celer.
L' ONCLE. Que voulez vous ? a brief parler,
Je l' ay mise en forte prison,
Car fait a si grant mesprison
Que son ribault de vostre nain
A fait, et ceci tout a plain
Ont veu ces chevaliers cy,
Moy et la damoiselle aussy,
Car on le m' avoit endité ;
Et, pour savoir la verité,
Touz ensemble en la chambre entrasmes,
Et la en un lit les trouvasmes
Touz deux couchiez, dont sanz delay
Du dueil que j' oz le nain tuay ;
Cecy est vray.
LE MARQUIS. Helas ! en qui me fieray
Des ores mais ? C' estoit ma joie.
Par ceste ame, je tant l' amoie
Que je n' en savoie que faire,
Et elle m' a fait tel contraire !
Voirement est il folz, par m' ame,
Qui se fie en amour de fame.
Haro ! biaux oncles, ne puis croire
Que ceste chose cy soit voire.
Avant, avant: pensons d' aler.
Je la voulray oir parler
Certainement.
L' ONCLE. Certes, mais il n' est autrement
Que je vous compte.
LE MARQUIS. Seigneurs, sanz plus faire lonc compte,
Puis que je sui cy a requoy,
Amenez la par devant moy ;
Or tost bonne erre.
PREMIER CHEVALIER. Sire, nous la vous alons querre
Quant vous agrée.
( Le second chevalier va ouvrir la porte de la prison )
SECOND CHEVALIER. Dame, issez hors sanz demourée.
A mon seigneur venir vous fault
Le marquis, qui de ce deffault
Trop grant dueil a.
LA MARQUISE. Seigneurs, j' iray ou vous plaira ;
Appareilliée en suiz et preste.
Lasse ! ne feray pas la feste
Qu' a son retour cuidoie faire.
( La marquise avance vers son époux et se jette à ses pieds )
Ha ! mon chier seigneur debonnaire,
Aiez de moy compassion
Et pitié, pour la passion
Que Jhesu Crist pour nous souffri
Quant a son pére en croix s' offri
Pour noz meffaiz.
LE MARQUIS. Hé ! dame, et qui cuidast jamais
Que me feissiez tel diffame ?
L' ay je desservi, belle dame ?
Dittes me voir.
LA MARQUISE. Ha ! lasse, si puist m' ame avoir
Paradis, qui touzjours durra,
Quant de ce corps departira,
Conme je suis de ce meffait
Innocent, et que pas n' ay fait
Ce qui m' est mis sus a grant tort,
Combien que je voy que la mort
M' en fault encorre.
L' ONCLE. Certes ne vous en doit rescourre
Amour ne pitié nullement,
Ou vous ferez faux jugement,
Biaux niez, que le nain fut trouvé
Couchié avec li tout prouvé ;
Ce scet chascun.
LA MARQUISE. Mon treschier seigneur, il n' est qu' un
Qui le voir en sache, que Diex,
Et celi en plorant des yex
Tray a tesmoing.
LE MARQUIS. Dame, il vous sera bien besoing.
Avant, seigneurs, renmenez la
Et puis l' en en ordenera
Selon raison.
PREMIER CHEVALIER. Sus, dame, venez en prison,
Il esconvient.
( Les deux chevaliers reconduisent la marquise en prison )
LA MARQUISE. Lasse ! or va bien ma vie au nient,
Quant sanz pitié, dur et amer
M' est cil qui me soloit amer,
C' est mon bon seigneur le marquis.
Il n' a pas bien le voir enquis
De la besoingne.
PREMIER CHEVALIER. Dame, entrer vous fault sanz eslongne
Icy dedans.
LA MARQUISE. Voulentiers, seigneurs, sanz contens,
Combien que ce me soit ennuiz.
Je suiz dedans ; or pouez l' uiz
Tirer a vous.
PREMIER CHEVALIER. C' est voir, dame, et si ferons nous
Et a la clef le fermerons.
( Au second chevalier, après avoir refermé la porte de la prison )
C' est fait, sire ; or nous en alons
Vers mon seigneur.
SECOND CHEVALIER. Sire, j' en ay desir greigneur
Que ne pensez.
( Les deux chevaliers reviennent près du marquis )
LE MARQUIS. ( À son oncle ) Oncles, je sui touz trespensez.
Que ferons nous de la marquise ?
Je vueil que fin en soit cy prise.
Vous qu' en direz ?
L' ONCLE. Je ne scé, biau niez, qu' en ferez ;
Mais se cent foiz estoit ma femme
Je la feroye ardoir, par m' ame,
Puis qu' elle m' aroit fait tel trait.
Encore s' elle eust attrait
A soy un noble homme de pris,
Ce fust une ; mais elle a pris,
Un nain contrait, mal affaittié.
Hé ! sire, qui en a pitié
Pendu soit il !
LE MARQUIS. ( Au premier chevalier )
Et vous assez estes soubtil,
Messire Almaurri de la Paille.
Qu' en jugez vous, vaille que vaille,
Par vostre advis ?
MESSIRE ALMAURRY. Sire, vezcy que j' en devis.
A faire bien un jugement
Fault deux choses: premiérement
Justice et puis misericorde,
Car raison veult et droit s' accorde
Que les maufaitteurs on pugnisse,
Mais bon juge en faisant justice
Doit avoir touzjours, bien s' i gart,
A misericorde regart
Aussi conme il a a justice.
Voir est c' on doit pugnir le vice,
Sire, mais du malfaitteur voir
Doit on misericorde avoir
Pour tant qu' il est ou homme ou femme.
Je le dy pour tant ; ceste dame
A moult meffait, ce poise moy:
Mais je croy, sire, par ma foy,
S' elle est jugée tellement
Qu' elle ait pour pitié seulement
De prison pardurable peine,
Sanz son corps mettre a mort villaine,
Ce sera bon.
LE MARQUIS. Je voy bien vostre opinion.
Et vous qu' en dittes ?
SECOND CHEVALIER. Sire, en un cas seroit bien quittes
Tel meffait qui le pugniroit
Par prison, et si souffiroit:
Car se femme s' estoit meffaitte
Par ygnorance ou par souffraite,
Conme plusieurs sont qui le font,
Ou par mauvais mariz qu' ilz ont,
Cy devroit bien ouvrer pitié.
Mais je ne voy que mauvaistié
Pure ou fait ceste dame cy ;
Pour quoy a messire Almaurry,
Par foy, sire, pas ne m' acors,
Mais a vostre oncle m' en recors
Du tout en tout.
LE MARQUIS. Or pais: nous sommes a un bout.
Seigneurs, je vous diray, par m' ame,
Il me fait moult mal que la dame
Me convient condampner a mort,
Et nul ne s' en doit, s' il n' a tort,
Merveillier, car forment l' amoye
Con celle qu' espousée avoie.
Mais je vous dy en audience
Qu' elle sera, c' est ma sentence,
Demain devant touz aux champs arse,
Et fust la royne de Tarse,
Ja soit ce qu' el me fait si mal
Que pour lui vouldroie estre ou val
D' entre Goth et Magoth tout nu,
Mais qu' il ne li fust advenu,
Tant l' ain encor et tant l' ay chier.
Si que, seigneurs, sanz plus preschier,
Alez, si querez le bourrel
Et faites faire l' appareil
Pour la justice.
ERNAUT. Au bourrel duit tout cest office.
Mon chier seigneur, je le vois querre.

Scène V. Chez le bourreau.
( Entre Ernaut )
ERNAUT. ( Au bourreau ) Pierre du pré, vien t' en bonne erre
Estache, feu, corde aprester
Et si penses de toy haster,
Car il le fault.
LE BOURREL. Sire, il n' i ara nul deffault ;
Est ce homme ou femme ?
ERNAUT. C' est pour la marquise ma dame,
Dont pitiez est.
LE BOURREL. Je vois faire que tout soit prest,
Mon amy doulx.
( Le bourreau va dresser, avec des aides, une potence et un bûcher )

Scène VI. La prison.
( Entre le second chevalier )
SECOND CHEVALIER. Qu' est ce la ? Dame, dormez vous ?
Dites me voir.
LA MARQUISE. Certes je n' en ay nul vouloir,
Ains sui de cuer a grant mechief.
Pour Dieu, dites moy a quel chief
Est ma besoingne.
SECOND CHEVALIER. Dame, priez Dieu qu' il vous doingne
Remission, car, sanz mentir,
Au jour d' ui vous convient mourir.
Pour Dieu, ne vous desesperez,
Ainçois de bon cuer requerez
La tresdoulce vierge Marie,
Tant conme vous estes en vie,
Ce vous conseil.
LA MARQUISE. Puis qu' ainsi est, faire le vueil.
Sire, alez un po loing de moy.
( Le second chevalier retourne auprès du marquis )
Ha ! vierge mére et fille au roy
De paradis, c' est li vray Diex,
Regardez moy de voz doulx yex,
Qui ravoiez les desvoiez,
Et aucun confort m' envoiez
Par quoy dampnée ne soit m' ame.
Si voirement con tu scez, dame,
Qu' a tort sui si emprisonnée
Et sanz cause a mort condampnée,
Me doingnez vous grace et victoire,
Que je ne perde mon memoire
De vous avoir touzjours en bouche
Pour honte ne pour lait reprouche
Qui fait me puist estre au jour d' ui,
Ainçois par ce cruel annuy
C' on a de moy faire en propos,
Dame, m' ottroiez le repos
Qui touzjours dure.

Scène VII. Le Paradis.
NOSTRE DAME. Sus, mi ange, bonne aleure
Alons m' amie consoler
Que la voy forment desoler.
Je vueil que li soit desservi
Ce que de bon cuer m' a servy.
Alez ci devant moy chantant
Que son cuer soit joie sentant
En vous oir.
GABRIEL. Dame, nous ferons par desir
Ce qu' il vous plaist nous conmander.
Michiel, il nous convient chanter
Par doulx accors.
MICHIEL. Gabriel, a dire m' acors
Ce rondel ici a voiz clére.
RONDEL. Vierge royne, fille et mére
Au Dieu de toute creature,
Onc de grace ne fuz avére,
Vierge royne, fille et mére,
D' obscurté touzdis en lumiére
Jettes ceulx que veulx prendre en cure.
( Les archanges accompagnent Notre-Dame auprès de
la marquise en chantant ce rondeau )

Scène VIII. La prison.
NOSTRE DAME. ( À la marquise ) Doulce amie, en Dieu t' asseure
Et si laisses ton lamenter.
Ne te vault riens tel dementer
Des ores mais.
LA MARQUISE. Lasse ! dame, je n' en puis mais.
Conment m' en pourroy je tenir ?
A tort sui jugie a mourir ;
N' atens que l' eure.
NOSTRE DAME. M' amie, tais toy ; plus ne pleure.
Mon filz Jhesus, qui est vray Dieux,
A ta clameur oy des cieulx
Et l' a receue en pitié ;
Et pour ç' a toy par amistié
Suis venue, ne doubtes pas.
Secourue au besoing seras
Et eschapperas ceste paine
A t' onneur, soies ent certaine.
A Dieu te dy ; or loe Dieu.
Mi ange, alons men de ce lieu,
Car temps en est.
MICHIEL. Chiére dame, nous sommes prest
A voz grés faire.
GABRIEL. Michiel, il ne nous fault pas taire
En alant, ains nous deduisons
Et nostre rondel pardisons
A lie chiére.
RONDEL. D' obscurté touzdis en lumiére
Jettes ceulx que veulx prendre en cure,
Vierge royne, fille et mére
Au Dieu de toute creature.
( Les archanges raccompagnent Notre-Dame au Paradis
en chantant le même rondeau )
LA MARQUISE. Ha ! mére Dieu, con d' amour pure
Nous amez qui sommes saval,
Et conme il péche grief et mal
Qui ne pense de toy servir !
Conment pourray je desservir
Ceste bonté que m' avez faite ?
Certes, dame, mes cuer s' affaitte
A vous loer toute ma vie
Et servir: d' autre chose envie
Avoir ne quier.

Scène IX. Aux environs du château de la Gaudine.
( Entre le chevalier Anthénor suivi de Grimaut son écuyer )
ANTHENOR. Grimaut, je te pri et requier,
Puis que nous par cy revenons
D' oultre mer ou esté avons
Au saint sepulcre et Dieu requis,
Alons men veoir le marquis,
Car pour certain je le verroye
Moult voulentiers et si feroie
De bon cuer ce qui li plairoit.
Car jamais de moy ne pourroit
Estre rendu la courtoisie
Que me fist ma dame m' amie,
La marquise qui est sa femme,
Et je croy qu' ou monde n' a dame
Meilleur de li en conscience.
J' estoye de mort en balance,
Tu le scez, quant le riche roy
Me mescrut et se print a moy
En disant que traistre estoye
Quant sa femme li fortreoye.
Helas ! et il n' en estoit rien,
Mais toutesvois il m' avint bien
Qu' il me dist qu' excusé seroye
Se je m' amie ly monstroie ;
Et alors ne sos que penser,
Si dis pour ma vie tenser
Que la marquise estoit m' amie.
Mais cela ne li souffist mie,
S' il n' en avoit appercevance ;
Et convint que en sa presence
Je preisse le hardement
De li demander plainement
Un baisier qu' elle m' y donna,
Et delivré fu par cela
De la mescrantise du roy.
Ceste courtoisie, par foy,
Ne li pourroye jamais rendre ;
Et pour ce vueil mon chemin prendre
Par la Gaudine.
GRIMAUT. Alons, sire, par amour fine:
Je vois devant pour hostel prendre.

Scène X. Une hôtellerie près du château de la Gaudine.
( Entre Grimaut ; Anthénor le suit )
Biaux hostes, vueillez moy entendre.
Pourrons nous ceens hebergier
Et avoir de bon a mengier
Pour nostre argent ?
L' OSTE. Sire, oil, vous me semblez gent
Nobles ; bien serez hebergiez.
Entrez ens et aise couchiez
Et sans riote.
GRIMAUT. Sa, mon seigneur, vezci nostre hoste
Qui nous fera aise, se dit,
Et s' arons blans draps et mol lit
Sur toute rien.
ANTHENOR. Et nous le paierons moult bien.
Je le vueil, entre ens ; Diex y soit.
Seoir me vueil ici endroit ;
A boire ! a boire !
L' OSTE. Tantost, sire ; vezcy un voire.
Tenez ; essaiez, mon seigneur:
Je me vans que c' est du meilleur
De ceste ville.
( L’hôtelier sert du vin à Anthénor )
ANTHENOR. Il est bon, hoste, par saint Gille:
Vous en avez m' amour acquis.
Dites moy que fait le marquis ;
En savez rien ?
L' OSTE. Dieu mercy, sire, il le fait bien,
Et nostre dame.
ANTHENOR. Et que fait ma dame sa femme ?
Je vous en pry.
L' OSTE. Trop mal, sire, ce poise my,
Se Dieu me voie.
ANTHENOR. Et pour Dieu convient que j' en oye
La verité.
L' OSTE. Mon seigneur a ouen esté
En Pruce. Or vous dy qu' il laissa
Ma dame a son oncle et bailla
Aussi sa terre a gouverner.
Mais en la chose a tant d' amer
C' on dit que le nain fu trouvé
Avec ma dame tout prouvé
Couchié avec elle en son lit
Et la en faisoit son delit.
S' en ot l' oncle si grant despit
Que le nain tua sanz respit
Et puis mist ma dame en prison.
Or est pour ceste mesprison
Du marquis meismes jugée
Et a ardoir est condampnée,
Dont le peuple plus de cent mille
Pleure et gemist aval la ville,
Car un chascun de cuer l' amoit
Pour les grans biens qu' elle faisoit:
N' avoit cure de nulle triche,
Ains estoit au povre et au riche
Doulce et courtoyse.
ANTHENOR. Biaux hostes, par m' ame, il m' en poise:
Se je le peusse amender ?
Or vous vueil je cy demander
Se je pourray pour mon avoir
Un bon harnois de guerre avoir,
Bien fait pour moy.
L' OSTE. Oil, sire, foy que vous doy.
J' en ay un ceens bon et cointe
Ou il ne fault plate ne pointe.
S' il vous plaist, vous l' essaierez ;
S' il est bon, vous l' acheterez
Ce qu' il vaulra.
ANTHENOR. Voulentiers, hostes, monstrez ça,
Pour Dieu, bonne erre.
L' OSTE. Chier sire, je le vous vois querre.
( L’hôtelier apporte une armure )
Tenez: est il et gent et frais ?
Je le vous baille a touz essais,
N' en doubtez point.
ANTHENOR. Or essaions s' il m' est a point,
Par amours, maistre.
L' OSTE. Il n' y a qu' oster ne que mettre,
Ce m' est avis.
( Anthénor endosse l’armure )
ANTHENOR. Hostes, tout a vostre devis
En paieray ; c' est un mot court.
Mais, pour Dieu, alez vers la court ;
Et se vous veez que l' en isse
Pour aler faire la justice,
Venez le moy tantost nuncier
Par quoy je me puisse avancier
D' estre au devant.
L' OSTE. Sire, ne fineray mais tant
Qu' a la court soie.
( I’hôtelier sort )
ANTHENOR. Et toy, Grimaut, se Dieu te voie,
Vas mettre la selle au coursier
Et gars qu' en arçon n' en estrier
Rien il ne faille.
GRIMAUT. Mon seigneur, voulentiers, sanz faille
G' y vois courant.
( Grimaut sort )
ANTHENOR. ( Resté seul, priant la Vierge )
Vierge a tous besoings secourant
Qui de cuer devost vous appelle,
Trop sui, dame, esbahis de celle
Qui assez tost arce doit estre,
Conment elle a peu conmettre
Tel meffait, que ja l' essaiay,
Mais si vraie en cuer la trouvay
Et si bonne que ne puis croire
Que ce meffait soit chose voire ;
Et ce m' esmeut, dame, a debatre
Qu' el ne muire et de m' en combatre,
Pour pitié. Ha ! vierge Marie,
Or ne say je se fas folie,
Car trop muable est cuer de femme:
Pour ce vous pri, tresdoulce dame,
Qu' aussi qu' en bonne entencion
Vois pour elle estre champion,
Soit qu' elle ait ou non ait mespris,
Gardez hui m' onneur et mon pris
Par vostre grace.

ACTE III.
Scène I. Le Paradis.
NOSTRE DAME. Sus, my ange, sanz plus d' espace
Alons men a ce chevalier,
Et chantez si qu' esmerveillier
Faciez les gens.
MICHIEL. Nul de nous n' en yert negligens:
Doulce vierge, bien chanterons.
Avant, Gabriel: que dirons
A ceste foiz ?
GABRIEL. Michiel, disons cy d' une vois
Ce rondel cy qui est jolis.
RONDEL. Marie, en faiz et en dis
Se doit de joie esmouvoir
Qui vous peut oir et veoir,
Amer et servir touzdis,
Marie, en faiz et en dis
Con dame de paradis,
Car vous li faites avoir
Grace et paiz a vo doulx hoir.
( Les deux archanges accompagnent Notre-Dame
auprès d’Anthénor en chantant ce rondeau )

Scène II. L’hôtellerie.
( Entrent Notre-Dame et les deux archanges )
NOSTRE DAME. Biaux amis, ne t' esteut doloir
De faire ce champ de bataille,
Car tu y es tenuz sanz faille.
Si te membre que ja pieça
Conment la dame te baisa
Et te monstra signe d' amour
Pour garder et toy et t' onnour,
Voire, et pour toy sauver la vie ;
Et si n' estoit de riens t' amie,
Car onques ne t' avoit veu,
Mais que pour pitié qui meu
L' ot et pour garder sa cousine
De honte, la riche royne.
Avec ce je te fas savoir
Qu' elle est une Susanne voir
Acusée de grief meffait,
Lequel elle n' a pas meffait:
Ce saras tu, ne t' en esmaies.
Mais pour ce que ne te retraies
D' aler pour la dame combatre
Me sui je cy venue embatre,
Qui sui de paradis royne.
Fay que ton bon propos s' affine
Seurement ; a Dieu te dy.
My ange, alons nous ent de cy:
Il en est temps.
GABRIEL. Dame, nous ferons sanz contens
Vostre vouloir. Avant, Michiel.
Pardisons en alant au ciel
A voiz serie.
MICHIEL. Quant de moy je n' y faudray mie,
Michiel amis.
RONDEL. Com dame de paradis,
Car vous li faites avoir
Grace et paiz a vo doulx hoir.
Marie, en faiz et en diz
Se doit de joie esmouvoir
Qui vous peut oir et veoir.
( Les deux archanges raccompagnent Notre-Dame
au Paradis en chantant ce rondeau )
ANTHENOR. Mére Dieu, bien doit on avoir
En vous servir s' entencion.
Dame, grant consolacion
M' avez fait en double maniére
Dont je vous graci ; la premiére,
Par pitié qui en vous habonde,
M' avez visité ; la seconde
Est, dame, que je ne savoie
Du fait le voir, ains m' en doubtoye ;
Or en suis je seur par vous.
Pour quoy appareillié sui touz
De moy combatre.

Scène III. Le château de la Gaudine.
( Entre le bourreau )
LE BOURREL. Seigneurs, je vous dy sanz debatre
Que tout est prest.
LE MARQUIS. Attaingnez la donc ; temps en est.
Seigneurs, au bourrel soit livrée ;
Pour Dieu, qu' elle soit delivrée
Ysnel le pas.
L' ONCLE. Bourriau, scés tu que tu feras ?
Garde que si hault soit assise
En la charrette et de tel guise
Que de touz puist estre veue
Par quoy plus de honte hait eue
De son meffait.
LE BOURREL. N' en doubtez: il sera bien fait.
Laissiez venir.

Scène IV. Devant la prison.
( Les deux chevaliers suivis du bourreau se rendent à la prison.
Une foule s’amasse sur leur passage ; parmi elle, l’hôtelier )
PREMIER CHEVALIER. ( Faisant sortir la marquise )
Dame, sanz vous plus ci tenir,
Venez vous ent.
( La marquise sort, le chevalier la livre au bourreau qui lui lie les mains )
LA MARQUISE. Seigneurs, vois j' a mon jugement ?
Dites me voir.
SECOND CHEVALIER. Dame, oil voir ; pensez d' avoir
Desoresmais Dieu en memoire,
Et priez la dame de gloire
Que par sa grant misericorde
Au jour d' ui appaise et accorde
A Dieu vostre ame.
( Les deux chevaliers et le bourreau conduisent la marquise
vers son époux . L’hôtelier se détache de la foule et revient chez lui )

Scène V. L’hôtellerie.
( Entre l’hôtelier )
L' OSTE. ( À Anthénor ) Las ! sire, j' ai veu ma dame
Bailler au bourrel en ses mains,
Et il n' en fait ne plus ne mains
Qu' il feroit d' une povre garce:
Mener la veult ou sera arsse.
Tout le monde la plaint et pleure.
Pour Dieu, ne faites plus demeure:
Montez bonne erre.
ANTHENOR. ( Qui s’est précédemment armé )
C' est fait ; je voys mon cheval querre
Et monter, sire.

Scène VI. Le château de la Gaudine.
( Une charrette est arrêtée devant le château. On voit plus
loin le lieu du supplice ( potence et bûcher ). Entre la marquise,
les mains liées, sous la conduite des deux chevaliers et du bourreau. )
LA MARQUISE. ( A la foule qui s’est amassée sur son passage )
Hé ! bonnes gens, je puis bien dire
Que ce n' est mie de merveille
Se chascun de moy s' esmerveille.
Priez Dieu qu' il me tiengne en foy,
Car je pren sur l' ame de moy
Que je sui innocent et pure
Du fait pour quoy a tel laidure
Sui demenée.
LE MARQUIS. Seigneurs, la chose est ordenée
Ainsi conme l' en vous dira.
( Montrant la charrette ) Le bourrel tout a pié ira
Devant, la charrette menant,
Et vous deux irez costoiant
La dame, et vous irez après,
Biaux oncles. Or soiez engrés
De mouvoir ; je demourray ci.
Femme, Diex ait de toy mercy
Par sa pitié.
L' ONCLE. Mouvez, seigneurs, par amistié
Isnellement.
SECOND CHEVALIER. Sire, nous ferons bonnement
Vostre plaisir.
ERNAUT. Bourrel, vaz ce cheval saisir
Et le maine si con tu dois,
S' avoir ne veulx de mes cinc doiz
Un bon tatin.
LE BOURREL. Je n' ay cure de tel patin,
Sire, j' aim miex faire m' office.
Hary ! avant: Diex le garisse
Et saint Eloy.
( Le convoi se forme comme l’a ordonné le marquis : la
marquise monte sur la charrette, les deux chevaliers
se placent de chaque côté et l’oncle, derrière elle ; le
bourreau, à pied, fait avancer le cheval )
PREMIER CHEVALIER. Dame, se savez riens de quoy
Vous repreigne la conscience,
Dites le nous en audience:
Espurgiez vous.
LA MARQUISE. Certes, nanil, mon ami doulx,
Ainçois vous di, si ait Diex m' ame,
Qu' a honte sui et a diffame
A tort menée.
( Au moment où part le convoi, Anthénor arrive à cheval et,
lui barrant la route, l’oblige à s’arrêter )
ANTHENOR. ( À l’oncle et aux chevaliers )
Ho ! seigneurs, il fault qu' arrestée
Soit la dame, pour voir le dy ;
Car maintenir vueil et si dy
Qu' elle est jugée sanz raison,
N' onques ne fist la mesprison
C' on li mett sus.
L' ONCLE. Tu n' y es pas a temps venuz,
Ne riens n' en sera fait pour toy.
Bourrel, chasse avant, par ta foy ;
Va touzjours, va.
SECOND CHEVALIER. Sire, vraiement non fera,
Car je vois le cheval saisir
Tant que le marquis son plaisir
Ait entendu.
( Le second chevalier vient immobiliser le cheval en le
prenant en bride à la place du bourreau )
PREMIER CHEVALIER. Pleust ore au doulx roy Jhesu
Que ce chevalier delivrast
Ma dame, et que le fait trouvast
A faux prouvé.
ANTHENOR. ( Au marquis ) Sire marquis, a point trouvé
Vous ay ; escoutez me parler.
Je dy sanz plus avant aler
Qu' a tort condampnez ceste dame,
Et s' il a ci homme ne femme
Qui ose dire du contraire,
Je sui prest de l' espée traire
Et moy combatre.
LE MARQUIS. Biaux oncles, il vous fault debatre
Ce qu' il dit. L' avez entendu ?
Respondez ; n' y ait attendu:
Le fait vous touche.
L' ONCLE. Biaux niez, il ment parmy la bouche.
Qui es tu ? dy.
ANTHENOR. Qui je sui ? ne vous chaille qui.
Tant y a je sui chevalier,
Et plus dire ne vous en quier.
( Lançant son gant ) Mais vezci mon gage pour elle.
A il ici celui ne celle
Qui le sien baille ?
L' ONCLE. Oil, voir, j' en feray bataille
Contre toy, et dy que tu mens
Et que bons est li jugemens.
( Jetant à son tour son gant ) Vezci mon gant.
LE MARQUIS. Nous n' irons donques plus avant,
Si me soit Dieu misericors.
Je verray la force des corps,
Car le champ a pié se fera.
Au jour d' uy verray qui sera
Bon ou mauvays.
L' ONCLE. Si chier mot ne dist onques mais,
Biaux niez ; je voys mes armes prendre.
Tantost reviens ; faites m' attendre
Qu' il ne se meuve.

L’oncle sort )

ANTHENOR. Ne doubtez, non, c' on me repreuve
Que je fuie: ja Dieu ne vueille ;
Nanil, et veisse ma brueille
Gysant a terre.
LE MARQUIS. Sire, qui voulez ceste guerre
Faire, dites moy vostre nom.
Dont venez vous ? ne quel raison
Vous a meu ?
ANTHENOR. Se Dieu plaist, il sera sceu,
Sire, briefment.
( L’oncle rentre armé )
L' ONCLE. Or ça, faux chevalier, conment
Le veulz tu dire ?
ANTHENOR. Je dy ainsi, entendez, sire,
Qu' a tort est a mort condampnée
La dame qui si noble est née
Et c' onques le fait ne pensa ;
Et Dieu, qui les enfans tensa
De mort en la fornaise ardant,
Et je si li serons garant,
Si com je pens.
L' ONCLE. ( Tirant son épée ) Et je dy certes que tu mens
Et te prouveray le contraire
A m' espée que je vueil traire.
Gar toy de moy.
ANTHENOR. Je ne vous doubte, par ma foy.
Or vous gardez de moy aussy.
( Frappant de sa dague un premier coup )
Vous arez ce premier cop cy
De conmensaille.
L' ONCLE. Ains que parte ceste bataille,
Ne sera si bon ton escu
Que je ne te rende vaincu
Con faux traistre.
ANTHENOR. Du champ vous feray avant istre,
Si plaist a la vierge honnourée
En qui me fy ; ( Brandissant son épée ) vezla m' espée.
A mes deux mains vous courray sus ;
Puis que vous tien vous irez jus.
( Anthénor se précipite sur l’oncle, tenant à la fois
son épée et sa dague, et le terrasse )
Or y es tu. ( Le menaçant de ses armes ) Dy, larron, dy
La verité, ou je t' affy
Je t' occirray.
L' ONCLE. Ha ! biaux niez, mercy, je feray
Ce que voulrez.
LE MARQUIS. Ho ! sire, en ce point vous tenrez,
Que je le vueil.
ANTHENOR. Sire marquis, point ne me dueil
De voz grez faire.
LE MARQUIS. Avant, oncle, il vous fault retraire
Du fait le voir.
L' ONCLE. Vueillez de moy mercy avoir,
Biaux niez, pour Dieu le vous requier.
Ne puis contre ce chevalier:
Il est jounes, je sui ja viex ;
Si en a d' avantage miex
Que je n' ay, sire.
ANTHENOR. ( Laissant l’oncle se relever )
Sire marquis, faites li dire
Le voir, et qu' il ne mente point,
Ou rendez le moy en tel point
Con le tenoye.
LE MARQUIS. Sy arez vous, se Dieu me voie,
Ou voir dira.
L' ONCLE. Helas ! biaux niez, conment ! morra
Vostre oncle a honte ?
LE MARQUIS. Oncle, sanz faire plus lonc compte,
Dites nous donques verité
Et on ara de vous pitié.
Ce non, je vous rendray u point
Que je vous pris, n' en doubtez point ;
C' est la parclose.
L' ONCLE. Las, je ne sçay rien de la chose
Que demandez.
LE MARQUIS. ( Ordonnant la reprise du duel )
Avant ! avant ! ensemble alez,
Et face chascun son devoir,
Mais en ce point serez mis voir
Qu' estiés avant.
ANTHENOR. Traistre, jamais en avant
N' irez, foy que doy a saint George.
Ceste dague parmy la gorge
Vous bouteray.
L' ONCLE. Ha ! frans hons, mercy ! je diray
Le mauvais mot.
ANTHENOR. Or dy, mauvais, dy dont tantost
La verité.
L' ONCLE. Conme faux plain d' iniquité
Vous recongnois, biau niez marquis,
Que d' amer la dame requis.
Mais elle, conme bonne et sage,
Refusa moy et mon langage,
Dont j' oz tel dueil et tel desdaing
Que je fis tant devers le naing
Qu' avec la dame se coucha,
Mais onques a li n' atoucha,
Ains s' i coucha en paour grant:
Si li promis je que garant
Envers vous de ce li seroye.
Et après ce je qui vouloye
Acomplir ma grant desverie,
Quant la dame fut endormie,
Pris des chevaliers, si entrasmes
En la chambre ou le nain trouvasmes
Couchié, qui ne savoit pourquoy.
La le tuay, afin que moy
N' encusast de ma mesprison,
Et puis mis la dame en prison.
Ainsi sans cause pourchacié
Ly ay ce meschief et bracié
Qu' elle a eu.
ANTHENOR. Sire, se j' ay fait mon deu,
Puis que le traistre vous livre
Donnez moy congié qu' a delivre
Mette la dame.
LE MARQUIS. Sire, c' est bien raison, par m' ame ;
Alez et si la desliez.
Onques mais jour ne fu si liez.
( À son oncle ) Oncle, vous ay j' a moy attrait
Pour moy faire sy vilain trait,
Qui me vouliez faire a mort
Mettre ma propre femme a tort ?
Par mon chief, n' en estes pas quittes,
Ainçois par les plus tresdepittes
Voies que je pourray trouver
Vous feray a grief mort livrer.
Tost, seigneurs, sanz arrestoison
Alez le me mettre en prison
Et en bons fers.
ERNAUT. De voz grez faire sui appers ;
Passez, passez.
SECOND CHEVALIER. Uns telz fers vous seront lassez,
Sire, par les piez et les mains
Qui poisent bien deux cens du moins,
Ne vous deplaise.
( Ernaut et le second chevalier conduisent l’oncle en prison, l’y enchaînent
et l’y enferment. Anthénor a cependant ôté ses liens à la marquise )
ANTHENOR. ( À la marquise ) Treschiére dame, or soiez aise
Et s' obliez vostre doleur,
Recouvré avez vostre honneur
Et s' estes delivrée a plain.
( Lui tendant la main ) Sa, de par Dieu, ça, celle main,
Si descendez.
( La marquise descend de la charrette et se jette à ses pieds )
LA MARQUISE. Sire, qui secoru m' avez,
A voz piez me doy bien jetter.
Pour Dieu, plaise vous a oster
Ce bacinet si que vous voie.
Congnoistre ainsi ne vous pourroye
Jamais nul jour.
ANTHENOR. ( Otant son casque ) Dame, voulentiers, sanz sejour.
Me veez vous ?
LA MARQUISE. Ha ! loyal chevalier sur touz,
Anthenor sire, acolez moy.
Frans homs, bien mercier vous doy
Et l' eure que vous vy premier.
( Anthénor embrasse la marquise )
Certes, or vous vueil je baisier
Et bouche et piez.
LE MARQUIS. Dame, pardonner me vueilliez
Mon meffait, et je vous en pri.
Sire, vostre nom sanz destry
Me vueilliez dire.
ANTHENOR. Anthenor de Biauchastel, sire,
Sui nommez, voir.
LE MARQUIS. Vous venrez en nostre manoir,
Sire ; je vous deffens l' aler.
J' ay tant oy de vous parler
Qu' assez vous congnois par renom,
Dieu mercy, que vous avez bon,
Et il a bien apparu cy,
Biau sire, dont je vous mercy.
Car mis m' avez de grant tristesse
Et de grant doleur en leesce,
Et la dame pour qui j' avoie
Plus dueil que dire ne pourroye,
Dont a touzjours vous ameray ;
Et certes destruire feray
Le traistre, si com direz:
Vous meisme juges en serez ;
Et de ma terre la moitié
Toute vous doing par amistié.
Alons nous en, sanz plus debatre,
Avant, seigneurs, pour nous esbatre ;
Et pour oblier nostre dueil,
Chantez ensemble, je le vueil,
Ce chant plaisant et amoureux:
« Pour l' amour du temps gracieux. »
Explicit.
( Tous chantent cette chanson )