Miracle XV

Cy conmence un miracle de Nostre Dame conment
un enfant resucita entre les braz de sa mére que
l' en vouloit ardoir pour ce qu' elle l' avoit noié.

ACTE I.
Scène 1. La demeure de la dame et de son mari.
S' il pleust a Dieu nostre sire
Que vous veisse enfans avoir,
J' aroye tresgrant joye, voir,
Et bien y a raison pour quoy :
Car, Dieu mercy, je sçay et voy
Que nous avons de biaus menages
Et s' avons de grans heritages
Et foison de biens temporiex,
Si que s' a Dieu pleust c' un fiex
Ou une fille nous donnast,
Qui après nous les possessast,
Au moins quant je trespasseroie
Que sceusse a qui les lairoie,
Ce me seroit a grant confort
Et si en prendroie la mort
Miex en bon gré.
LA DAME. Certes, quant je suis a secré,
Mon seigneur, et seule me voy,
Je dy souvent : Et Diex ! pour quoy
Ne te plaist il que j' aie enfant ?
Et m' avient souvent qu' en pensant
A ce moult grant piéce demeure,
Et quant j' ai bien pensé je pleure
Et fais dueil fort.
LE MARI. Dame, preuz n' est le desconfort.
S' il ne li plaist point n' en arons.
Mais je vous diray que ferons :
Il est temps d' aler a l' eglise
Pour oir le divin servise
Et le sermon c' on y doit faire.
Venez y, ma suer debonnaire ;
G' y vois : or ne vous detriez
Et la nostre dame priez
Humblement et de devot cuer,
Et je aussi feray, ma suer.
( À son valet ) Or tost, Gençon, pren mon mantel ;
Fay, si vien après moy ysnel
Jusqu' au moustier.
LE VALLET. Mon seigneur, puisqu' avez mestier
De moy, sachez que tout prest suy.
( Lui apportant un manteau ) Alez devant et je vous suy
Sanz plus attendre.
LA DAME. ( À sa chambrière ) Agnesot, va mes heures prendre ;
Fay tost, si me convoieras
Au moustier, puis t' en revenras
Quant la seray.
LA CHAMBERIÉRE. Dame, voulentiers le feray ;
Je n' en seray mie rebource.
( Lui apportant un livre d’heures dans son étui )
Vezcy les heures en leur bource
Alons nous ent.
LA DAME. Alons, m' amie, appertement,
Car je desire la venir
A temps pour le sermon oir.
( La dame et son mari se rendent à l’église
accompagnés de leurs serviteurs respectifs )

Scène 2. L’église dédiée à Notre-Dame.
( Ils entrent à l’église )
LA DAME. Dieu mercy, je vien bien a point ;
De sermon encor n' y a point.
Je prenderay ycy ma place.
Agnesot, que Dieu preu te face ;
Va t' en garder l' ostel bonne erre.
Ja assez tost me reviens querre
Quant point sera.
LA CHAMBERIÉRE. Voulentiers.
( La chambrière quitte l’église et retourne dans
la demeure de ses maîtres )

Priant la Sainte Vierge

Ave Maria

Gracia plena, dominus tecum, benedicta tu in
mulieribus et benedictus fructus ventris tui.
Dame, deffendez moy d' annuy
Et me donnez grace de vivre,
Si que m' ame s' en voit delivre
De pechié, quant il avenra
Que de mon corps departira,
S' il vous est bel.
LE SERMON. Missus est angelus Gabriel
In secula seculorum.
LE MARI.. ( Priant à son tour la Sainte Vierge )
Tresor de consolacion,
Souveraine dame des cieulx,
E ! mére Dieu, de voz doulx yex,
Qui plain sont de misericorde,
Par qui a Dieu treuvent accorde
Ceulx qui de cuer sont repentant,
Vueillez me regarder et tant
Que par le vostre saint plaisir
Puisse avenir a mon desir,
C' est que ligniée puisse avoir
Telle que vous et vo doulz hoir
En puissez estre loez, dame,
Et que le sauvement de m' ame
Y puist estre, et non autrement.
Amen. Sa, Gençon, alons ment
Sa en la ville ou affaire ay.
A l' ostel m' en retourneray
Assez briefment.
LE VALLET. Sire, voulentiers vraiement.
Alez, de par sainte Marie,
Devant ; je ne vous lairay mie,
Mon seigneur chier.
( Le mari quitte l’église en compagnie de son valet.
On voit à ce moment la chambrière sortir de la
demeure de sa dame en direction de l’église )
LA CHAMBERIÉRE. ll me fault huy mais avancier
D' aler savoir se s' en venra
Ma dame, que grant piéce a ja
Qu' avec li au moustier alay.
Je la vois querre ; n' y feray
Plus demourée.
LA DAME. ( Priant dans l’église )
E ! tresdoulce vierge honnorée
Qui le fruit de vie portastes,
Qui vierge homme et Dieu enfantastes
Et qui vierge fustes après
L' enfanter, dame, a mes regrez
Que cy vous bée a descouvrir
Deignez vos oreilles ouvrir
De pitié et m' entendez, dame.
Je sui une brehaingne fame
Qui desire l' eure veoir
Qu' enfant peusse concevoir.
Mais je croy, selon mon propos,
Que Dieu ceste grace forclos
M' a pour ce que je n' en suis digne.
Si ne say je, vierge benigne,
Car je sens ma condicion
Muée et ma complexion
Si que ce que souloie amer
M' aist maintenant sur et amer :
Pour ce d' estre grosse doubte ay,
Mais de certain pas ne le say ;
Car onques tel chose n' apris.
Pour ce, vierge d' excellent pris,
De ce me vueillez faire ottry
Que ce ne le suis, je vous pri
De cuer que ma priére oiez
Et a vostre doulz filz proiez
Qu' envers moy tant par grace approuche
Que destaint me soit ce reprouche
Que je ne soie plus nommée
Brehaigne, mais mére clamée,
Et que tel enfant puisse avoir
Qui me doint cause de savoir
Ordener mes faiz et mes diz,
Si qu' avoir puisse paradis
En la parfin.

Scène 3. Le Paradis.
DIEU.. ( À Notre-Dame ) Mére, je voy que de cuer fin
Ces gens la vous servent et aiment
Et devotement vous reclaiment
Et vous prient et main et soir
A ce que de leurs corps avoir
Puissent enfant.
NOSTRE DAME. Chier filz, s' ilz en sont desirant,
Puis que vous veez qu' ilz me servent,
Pour ce je vous pri qu' ilz desservent
Qu' ilz aient leur petticion,
Afin qu' en leur affeccion
Soit miex causée en vraie amour
Raison de servir nuit et jour
Vous et moy, sire.
DIEU. Mére,je vous puis pour voir dire
La femme a enfant conceu
Combien qu' encore cogneu
Ne l' ait ; briefment le sentira.
Mais se bien ou mal li fera
Ne vous diray je nullement,
Mais ce sera au sauvement
De touz les deux.
NOSTRE DAME. Filz, on doit dire que li deulx
Soit beneurez qui affine
Si bien qu' en gloire qui ne fine
Fait venir l' ame.

Scène 4. L’église.
LA DAME. ( Attendant sa chambrière )
Voiz ! pour la glorieuse dame,
Ma chamberiére bien me tient,
Quant elle ne va ne ne vient
Et si l' ay cy tant attendue.
( Surprise ) Dieu ! que senz je qui se remue
En moy si fort et qui si boute ?
( Prenant son ventre entre ses mains )
Vraiement je ne fas point doubte,
C' est enfant qu' ainsi sanz mouvoir.
E ! mére Dieu, bien doy avoir
De vous servir affection,
Quant par vous a l' entencion
Suiz venue ou je plus tendoie,
Dame, par vostre grace a joie.
Quant vous plaira m' en delivrez,
Si qu' il soit, quant il sera nez,
Plaisant a touz.
( Entre la chambrière dans l’église )
LA CHAMBERIÉRE. Ma dame, vous en venrez vous ?
Je vous vien querre.
LA DAME. Oil, alons nous ent bonne erre :
Je n' attendoie fors que toy.
Que n' es tu revenue a moy
Plus tost ? J' ay devant cest autel
Musé grant piéce. Est a l' ostel
Ton maistre ? dy.
LA CHAMBERIÉRE. Nanil, dame, ce vous affi.
Puis qu' il s' en parti n' y entra,
S' il n' est venuz puis que ving ça ;
N' en doubtez mie.
( La chambrière et sa dame quittent l’église et retournent au logis )

Scène 5. La demeure de la dame etde son mari.
( On voit à ce moment le mari etson valet se rendre eux aussi au logis )
LE MARI. ll me semble, conment c' on die,
Gençon, nous ne pouons miex faire
Que de nous vers l' ostel retraire.
Il en est huy mais heure et temps,
Car il est, si conme je pens,
Près de disner.
LE VALLET. Voir est, combien qu' a desjuner
Soie encore, mon chier seigneur ;
Je vous dy bien, j' ay fain greigneur
Que n' oy pieça.
LE MARI. De tant mangeras tu miex ja.
Sueffres toy ; si n' en parles plus.
( Le mari et sa dame se retrouvent devant leur demeure )
Dame, dame, li doulx Jhesus
Soit avec vous.
LA DAME. Bien veignez vous, mon seigneur douls.
Qu' est ce ? quel chiére ?
LE MARI. Bonne, dame, non mie chiére.
Et vous conment ?
LA DAME. Bonne, sire, se Dieu m' ament.
( Ils pénètrent dans leur demeure, les serviteurs s’éloignent )
Seez vous cy decoste moy ;
J' ay a parler a vous. LE MARI. De quoy ?
LA DAME. De quoy, mon seigneur ? de nouvelles
Que vous diray bonnes et belles,
Mais qu' il vous plaise.
LE MARI. ( S’asseyant auprès de son épouse )
Oil, dame, par saint Nicayse,
Je vueil que vous les me dictez.
Faites, si vous en acquictez
De les moy dire.
LA DAME. Voulentiers les vous diray, sire,
Car j' espoir que vous en arez
Grant joie quant vous les orrez.
Je suis grosse de vif enfant
Et si l' ay ja porté sentant
Plus de deux mois, se Dieu me gart,
Et se je le vous dy a tart,
Ne vous en devez merveillier,
Car femme doit moult resoingner
De dire qu' elle ait conceu
Jusqu' a tant qu' elle l' ait sceu
Estre de vray.
LE MARI. Dame, de ces nouvelles j' ay
Tresgrant joie, foy que doy m' ame.
E ! loée soit nostre dame !
Or ne fui je pieça si liez.
Dame, pour Dieu, ne vous vueilliez
Partir de ceens pour riens née
Tant que vous soiez relevée,
Se me creez.
LA DAME. ( Éprouvant de la douleur )
Ha ! Dieu, les rains et les costez !
Sainte Marie !
LE MARI. Qu' est ce la ? qu' avez vous, m' amie ?
N' en mentez point.
LA DAME. Sire, il m' est avis c' on m' ait point
D' un coustel au cuer maintenant,
Tant s' est remué mon enfant
En moy forment.
LE MARI. Vous en devez bien grandement
Mercier la vierge Marie,
Et pouez savoir qu' il a vie,
Puis qu' il se meut en vous ainsi.
M' amie, ne mouvez de cy :
Gardez de travail vostre corps.
Pour Dieu mercy, n' alez point hors
Ce n' est a messe.
( Le cousin entre dans leur demeure )
LE COUSIN. Dieu gart ces gens ! Biau cousin, qu' est ce ?
Avez diné ?
LE MARI. Nanil, cousin, par verité.
Dont venez vous ? conment vous va ?
Savez se rien de nouvel a
Venu au Dan ?
LE COUSIN. Cousin, il n' i ot puis un an
Tant conme il a de bonnes choses.
Ce m' a mandé par lettres closes
Nostre hoste, si que je conseil,
J' ay ja prest tout mon appareil,
Que sanz delay nous en alons
Par quoy des premiers la soions,
Se bon vous samble.
LE MARI. Je lo que nous alons ensamble,
Cousin, ou que ce soit diner
Et la pourrons nous ordener
Nostre besoingne.
LE COUSIN. Or alons doncques sanz esloingne.
Ou sera ce ?
LE MARI. Chiez Petillon, a la lymace,
Se vous voulez.
LE COUSIN. Or vous diray que vous ferez.
Prenez ma cousine congié,
Car si tost conme arons mengié,
C' est m' entente, nous en yrons
Sanz retourner et monterons
A Saint Lorens.
LE MARI. Vous dites bien ; je m' y assens.
( Se tournant vers la dame et prenant congé d’elle )
Dame, a Dieu ; en Flandres m' en vois.
Il sera bien avant deux mois
Que je retourne, au mien cuidier ;
Mais, si plaist a Dieu moy aidier,
Je tien nous y arons prouffit.
Gardez tout. A Dieu qui vous fist
Vous conmans, dame.
LA DAME. Dieu vous ottroit de corps et d' ame,
Mon seigneur, et joie et santé,
Qui vous ramaint par sa bonté
Sain et sauf, sire.

Scène 6. Le château de la ville.
( Entrent le comte, le chevalier, l’avocat, deux sergents d’armes )
LE CONTE. Or entendez ce que vueil dire.
Seigneurs, il est bien verité
Que je ne puis pas ma conté
Gouverner par moy seulement,
Sanz gens avoir, et mesmement
Pour la terre dont est creue,
Qui de nouvel m' est escheue
Et dont j' ay fait au roy hommage.
Or savez vous, pour mon dommage
Eschiver, j' ay mestier de garde
Qui mes villes justice et garde,
Et qui congnoisse sur mes hommes,
Especialement ceste ou sommes.
Car pour ç' amenez vous y ay
C' un juge establir y voulray.
Si vous pri que vous me doingniez
Conseil et aucun m' enseigniez
Qui bon y soit.
LE CHEVALIER. De quanque mon cuer en conçoit
Je n' en say nul si bon eslire
Conme seroit le maire, sire,
De Tortevoye.
L' ADVOCAT. Certes dire aussi le vouloie.
Il est subtilz et cler veant,
Bien entendant et arguant.
Il a biau lengage en la bouche
Et si est sanz nul mal reprouche,
Dont miex le pris.
LE CONTE. Puis que vous loez qu' il soit pris,
ll me plaist bien certainement.
Alez le querre appertement,
Sergent, alez.
PREMIER SERGENT. D' ARMES. Il ne fault que plus en parlez,
Sire, je vois sanz plus cy estre.
( Le premier sergent s’éloigne en direction du logis du maire )
Aussi scé je moult bien son estre ;
Je le voy ou contre moy vient.
( Au maire qu’il voit approcher ) Ça, maire, ça, il vous convient
A mon seigneur tantost venir.
Alons men sanz nous plus tenir
Cy par amour.
LE MAIRE. Sohier, je ne quier cy demour
Faire, puis que vous me hastez.
Alons, je suis touz aprestez
De son gré faire.
( Il suit le sergent qui le conduit auprès du comte )
PREMIER SERGENT. D'ARMES. Mon chier seigneur, vezcy le maire
Que demandez.
LE CONTE. Bien veigniez, maire : or m' entendez.
Je me lo de vous grandement,
Car servi m' avez loyaument
Tant conme avez esté mon maire,
Et pour ce vous vueil baillif faire
De ceste ville.
LE MAIRE. Mon chier seigneur, plus de cent mille
Merciz de l' onneur que m' offrez ;
Mais, pour Dieu, que vous en souffrez :
N' en suis pas digne.
LE CONTE. Je say tant de vostre convine
Et de vostre renom sanz vice
Que je vueil qu' aiez ceste office.
Or paiz atant.
LE CHEVALIER. Mon seigneur vous fait honneur grant,
Maire, ne la refusez point.
Faites touzjours bien et a point
Et bien arez.
SECOND SERGENT. D' ARMES. Voire, mais vous nous en donrrez
A boire, maire.
LE MAIRE. Vous arez, amis debonnaire,
Quanque voulrez.
L' ADVOCAT. Maire, de ceste honneur pourrez
Encores venir a greigneur ;
C' est l' entente de mon seigneur,
Je vous promet.
LE CONTE. Par saint George, voirement est,
S' il le dessert, a brief parler.
Or ça, il nous en fault raler
Puis qu' establi bailli l' avons,
Et aux assises revenrons
D' uy en quinzaine.
LE MAIRE. S' il plaist a Dieu, g' y mettray paine
Telle que g' y aray honneur
Et vous prouffit, mon chier seigneur :
De ce me vent.
LE CONTE. Bien est ; or tost alez devant.
Sohier, faites nous destasser
Ces gens si que puissions passer
Aisiement.
PREMIER SERGENT. D' ARMES..
( Faisant s’écarter la foule sur le passage du comte et de sa suite )
Voulentiers, sire, vraiement.
Alez arriére sanz delay
Ou vraiement je vous ferray
Sus sanz demour.

Scène 7. La demeure de la dame, sa chambre. Deux mois plus tard.
LA DAME. Agnesot, toy pri par amour,
Conseille moy que je feray.
Onques mais enfant ne portay ;
Pour ce me vois je plus doubtant.
Parmy le ventre ay doleur tant
Et par les reins sanz tant d' angoisse
Qu' il m' est avis c' on les me froisse,
Ma doulce amie.
LA CHAMBERIÉRE. Dame, ne vous decevez mie ;
Mandez la ventriére briefment.
Vous traveilliez certainement,
Bien dire l' os.
LA DAME. Diex ! Diex ! le ventre ! Dieux ! le dos !
Doulce mére Dieu, que feray ?
Ha ! Dieux ! si grief mal n' enduray
Onques mais jour.
LA CHAMBERIÉRE. Gençon, sanz plus faire sejour,
Vas tantost la ventriére querre
Et la fay cy venir bonne erre :
Delivres toy.
LE VALLET. Est ç' ore a certes par ta foy ?
Dy, Agnesot.
LA CHAMBERIÉRE. Oil : fay la venir tantost
Pour l' amour Dieu.
LE VALLET. Je n' arresteray point en lieu
Tant qu' en son hostel aie esté.
( Le valet se rend chez la sage-femme )

Scène 8. Chez la sage-femme.
LE VALLET.. Berthe, que Dieu vous doint santé.
Venez a ma dame bonne erre.
Par moy vous a envoié querre,
Car fort travaille.
LA VENTRIÉRE. Elle n' a garde, non, sanz faille :
Je la vi au moustier orains.
Espoir sant elle mal es rains
Du fais de l' enfant qu' elle porte ;
Si lui est avis qu' elle est morte
Se tantost n' a la sage femme.
Pour ce qu' elle est bien riche dame
Nonpourquant voulentiers iray ;
De li bien payer me feray.
Sa, alons ment
( Ils se rendent chez la dame )

Scène 9. La chambre de la dame et une pièce attenante.
LA DAME. Mére Dieu, mére Dieu, coment
Passeray ceste douleur cy ?
Tresdoulce mére Dieu, mercy.
Diex ! les rains ! Diex !
LA CHAMBERIÉRE. Ma dame, je pense c' un fiex
Arez : ce me dit vostre cri.
Pacience aiez, je vous pri,
En vostre mal.
LA DAME. Ha ! Agnesot, ma suer loyal,
Je croy c' onques mais telle ondée
N' endura femme qui soit née
Com j' ay fait ore.
LA CHAMBERIÉRE. Ce ne sont que roses encore.
Ma dame, soiez en certaine ;
Car il n' y ara sur vous vaine,
Quant venra a l' enfantement
Qui ne rompe, fors seulement
Du petit doit.
( Entre le valet suivi de la sage-femme )
LE VALLET. Berthe, entrez leens, bon exploit.
Ça demourray.
LA VENTRIÉRE. Tu diz bien ; je vois sanz delay.
Diex soit seens et saint Mandé.
Dame, vous m' avez demandé ;
Pour ce vien cy.
LA DAME. Ha ! Berthe m' amie, mercy.
Ne me say conment contenir ;
Je croy que je suis au fenir,
Tant sui malade.
LA VENTRIÉRE. De dire rondel ne balade,
Dame, ne vous chaille maishuit.
Nous prendrons bien nostre deduit
Ailleurs huy mais.
LA DAME. Pour Dieu mercy, laissiez m' en pais !
Trop sanz angoisse et grant ahan.
Ami Dieu, sire saint Jehan,
Et vous, mére Dieu debonnaire,
Jettez me hors de ceste haire
Par quelque tour. Diex ! que feray ?
Diex ! Diex ! je croy que je mourray
En ceste place.
LA VENTRIÉRE. Se Dieu plaist, il nous fera grace
Briément et sainte Marguerite,
De qui vezcy la vie escripte :
Mettez sur vous.
( Elle lui tend le livre que la dame place sur son ventre )
LA CHAMBERIÉRE.. E ! biau sire Dieux, faites nous
Joieux et de mére et d' enfant.
Trop sueffre angoisse et douleur grant
Iceste femme.
( Entre le mari, revenant de son voyage )
LE MARI.. ( Au valet ) Qu' est ce, Gençon ? ou est ta dame
Ne Agnesot ?
LE VALLET. Mon seigneur, je croy qu' assez tost
Orrez dire qu' enfant avez.
Leens travaille, or le savez,
Grant piéce a ja.
LA CHAMBERIÉRE. ( Arrêtant le mari sur le seuil de la chambre )
Mon seigneur, attendez me la ;
Je vois un po a vous parler.
Ne vous en vueillez pas aler,
Sire, depriez nostre dame
Qu' elle vous vueille vostre femme
Sauver lui et sa porteure,
Car elle est en telle aventure
Que se Dieu sa grace n' y met,
Ly et l' enfant, je vous promet,
Sont au morir.

Elle rentre dans la chambre

LE MARI. ( Resté seul ) Elas ! que pourray devenir ?
( Priant Notre-Dame ) Doulce mére Dieu, je vous proy
De cuer plaise vous sauver moy
Ma doulce compaigne loyal
Et que l' enfant, vierge royal,
Dont travaille puist mettre hors
Sain et sauf, vivant l' ame ou corps,
Si qu' il puist recevoir baptesme
Et de la sainte huile et du cresme
Estre enoint conme crestien,
Et je vous promet une rien
Que pour chose, tant me soit male,
Ne lairay qu' au Puy de la Sale
Ne voise mon corps traveillier
Et en vostre moustier veillier
Com pelerin.
LA DAME. Dieux ! je croy que suis a ma fin.
Dieux ! Dieux ! or ne say que je face.
E ! mére Dieu, faites moy grace :
Je n' en puis plus.
LA VENTRIÉRE.. ( Ayant délivré la mère de son enfant )
Or pais, de par le doux Jhesus.
Dame, voz griez maus sont passez.
Vous avez enfant : demandez
Quel enfant c' est.
LA DAME. Et pour Dieu, mon enfant quel est ?
Dites le moy.
LA VENTRIÉRE. Dame, par la foy que vous doy,
C' est un biau filz.
LA DAME. Or en soit loez Jhesu Criz,
Qui par grace li ait donné
A estre de bonne heure né !
Car, mon enfant, il vault miex naistre
De bonne heure que de bons estre,
Selonc m' entente.
LA VENTRIÉRE. ( À la chambrière )
Agnesot, sanz plus faire attente,
Alon men au moustier errant
Faire crestien cest enfant,
Car au naistre a eu tant paine
Que je ne suis mie certaine
Que guères vive.
LA CHAMBERIÉRE. Contre ce conseil point n' estrive.
Or alons, Berthe.
LE MARI. ( Abordant la servante quand elle sort de la
chambre avec la sage-femme tenant l’enfant dans ses bras )
Agnesot, moult es ore apperte.
Conment va, dy ?
LA CHAMBERIÉRE. Bien, mon seigneur, la Dieu mercy.
Vous avez un fil sanz doubter
Que nous portons crestienner.
Courez devant ; faites ouvrir
L' eglise et les fons decouvrir,
Car besoing est.
LE MARI. De ce faire suis trestout prest ;
Je vois devant.
( Ils vont à l’église et reviennent quelques temps plus
tard auprès de la dame restée dans sa chambre )
LA VENTRIÉRE. Nous vous rapportons vostre enfant
Crestien, dame ; c' est son preu.
Gardez le bien d' yaue et de feu,
Sy c' on ne vous en puist reprendre,
Set ans, et li faites apprendre
Sa credo et sa patenostre
Pour son honneur et pour le vostre,
Car c' est raison.
LA DAME. Berthe, je croy bien que c' est mon ;
Si le feray.
LA VENTRIÉRE. Dame, a Dieu vous conmanderay.
Je vois ailleurs ou l' en m' atent.
Mais revisiter vueil souvent
Ceste maison.
LE MARI. ( À la dame ) Doulce amie, pour l' achoison
De l' aventure ou vous estiez
Ainçois que vous enfantissiez,
Je requis la vierge Marie
Que garant vous fust et amie
Et je son pelerin seroie
S' elle vous delivroit a joie.
Dieu mercy, vous estes delivre
Et si voy vous et l' enfant vivre.
Si vous dy, je ne fineray
Tant qu' ou moustier veillié aray
Nostre dame c' on dit du Puy,
Car vraiement, dame, j' y suy
Par veu tenuz.
LA DAME. Sire, il me plaist, sanz dire plus,
Quanqu' il vous plaist.
LE MARI. A Dieu, dame, sanz plus de plait,
Pensez de vous tenir toute ayse.
Je revenray, mais qu' a Dieu plaise,
Avant que relevez, ce croy.
Gençon, tu venras avec moy,
Mais qu' il t' agrée.
LE VALLET. Mon seigneur, c' est bien ma pensée.
Il ne vous en fault plus parler ;
Seul ne vous lairay pas aler.
Avant, mouvons.
LE MARI. Alons men, de par Dieu, alons
Puis qu' ainsi est.
( Le mari sort accompagné de son valet )
LA CHAMBERIÉRE. Ma dame, le baing est tout prest
Pour y entrer quant vous plaira.
Je tieng que grant bien vous fera.
Entrez dedans.
LA DAME. Agnesot, et je m' y assens,
Mais a par moy ne m' y puis mettre.
D' aidier moy te fault entremettre
Tant que g' y soie.
LA CHAMBERIÉRE. Voulentiers, se Dieu me doint joye.
Ma dame, or sa.
( La chambrière conduit sa dame versla cuve du bain )

ACTE II.
Scène 1. Le tribunal dans le château.
LE JUGE. Or me dites conment ce va.
Tristan, trop me puis merveillier.
Je ne voy devant moy plaidier
Cause nulle dont bien me viengne,
Ne ne fis, dont il me souviengne,
Il a ja plus d' un mois entier.
Dites moy, je le vous requier,
Que veult ce dire ?
LE SERGENT. Ne vous y say respondre, sire,
Foy que vous doy.
LE JUGE. Et je le sçay bien, par ma foy.
En la taverne despendues
Sont, et en voz bourses pendues,
Sonnant ; et conment ? vez le cy.
Quant d' aucun vous tenez saisy
Qui aucune chose a meffait,
Je say trop bien conment on fait :
Ains que j' en aie congnoissance
Il vous ample de vin la pence
Et vous est la bourse fourrée :
Ainsi m' amende est recelée,
Que point n' en ay.
LE SERGENT. Sire, par m' ame, je feray
Bon serement c' onques encore,
Puis que sergent sui jusqu' a ore,
Ce que vous dites ne m' avint,
Ne du faire ne me souvint,
Ne je ne quier.
LE JUGE. Je vous en croy bien, ami chier ;
Voir vous estes le non pareil.
Des autres plus dire n' en vueil ;
Entens a moy ; n' en parlons plus.
Par ceste ville sus et jus
T' en vas tout bellement querant
Un petit homme de corps grant
Vestu d' un royé en travers
Fait de pers rouge et de blanc pers,
C' on appelle Lupin Coquet :
Il a deux bons yex, mais borgne est.
Quant trouvé l' aras, si te peines
Et fai tant que tu le m' amaines
Ou mort ou vif.
LE SERGENT. Sire, je feray sanz estrif
Vostre conmandement ; c' est droiz.
Dès maintenant enquerir voiz
Ou il demeure.

Scène 2. La chambre de la dame.
LA DAME. ( Dans la cuve de son bain )
Agnesot, se Dieu te sequeure,
Or me vas querre mon enfant.
Je sui de li tenir engrant
Dedans ce bain.
LA CHAMBERIÉRE. Dame, si m' aist saint Germain,
Je ne le feray mie envis,
Mais a tout vostre plain devis ;
( La chambrière va prendre le nouveau-né et le remet à sa mère )
Dame, tenez.
LA DAME. Sa, mon doulx enfant, sa venez.
Ores scez tu que tu feras,
Agnesot ? Bien tost t' en yras
Dire a ma conmére Marie
Que par amour ne laisse mie
Que cy ne viengne, sanz debatre,
Avec moy soy un po esbatre,
Que je l' en pri.
LA CHAMBERIÉRE. Dame, voulentiers : sanz detri
G' y vois courant.

La chambrière sort

Scène 3. Une rue de la ville.

LE SERGENT. ( Faisant une halte )
J' ay ja grant piéce esté querant
Ce que mon maistre enchargié m' a,
Et si n' en truis ne ça ne la
Nulles nouvelles ; qu' est ce cy ?
Encores veulz j' aler par cy
Tout au lonc enquerre et savoir
Se je le pourroie veoir
Aucunement
( Il prend une autre direction )

Scène 4. La chambre de la dame.
LA DAME. ( Tenant le nouveau-né dans la cuve du bain )
Mon enfant, je suis malement
Traveillie de toy tenir.
Egar ! que met tant a venir
De la ou est ma chamberiére ?
La male passion la fiére !
Elle me fait si ennuyer
Qu' il me fault ycy apuier
Pour dormir, tant ay grant sommeil.
Un petit de l' ueil cligner vueil
Tant qu' elle viengne.
( La dame s’endort la tête appuyée contre le bord de la cuve et ne
s’aperçoit pas qu’elle noie le nouveau-né. La chambrière rentre alors )
LA CHAMBERIÉRE. Ma dame, en santé Dieu vous tiengne.
Elle dort, si con m' est avis.
Ou a elle son enfant mis ?
Pas ne le tient. Diex ! que feray ?
Lasse ! lasse ! que devenray ?
Lasse ! son enfant est noyé.
( Retirant de la cuve le nouveau-né inanimé )
Lasse ! mal sonmes avoié
Et elle et moy.
LA DAME. ( S’éveillant en sursaut )
Agnesot, vien avant : dy moy
Qu' est ce ? qu' as tu ?
LA CHAMBERIÉRE. ( Lui montrant le corps de l’enfant )
Dame, nous avons tout perdu.
Vous avez en vostre dormant
En ce bain noié vostre enfant :
C' est grant damage.
LA DAME. ( Poussant des gémissements )
Ha ! lasse ! meschant ! que feray je ?
Lasse ! lasse ! maleureuse !
Lasse ! chetive ! dolereuse !
Ay je mort mon enfant je mismes ?
A ! tresdoulx Dieu, pére hautismes,
Cy a douleur dure et amére
Que l' enfant est mort par la mére
Qui en a fait l' occision.
Certes droite conclusion
Juge en moy qu' ainssi avenra :
La mére pour l' enfant mourra ;
Si seront deux mors assez dures,
Assez miserables et sures.
Lasse ! de quel heure fu née ?
Ma fin de douleur destinée
Est, ce me semble.

Scène 5. Devant la maison de la dame, puis à l’intérieur.
LE SERGENT. ( Passant dans la rue )
J' oy haro de femmes ensemble
Leens ; je vueil aler savoir
Se mon maistre y pourra avoir
Une amende a droit ou a tort.
( Le sergent entre dans la maison )
Qui veille ceens ne qui dort ?
Y a il ame ?
LA CHAMBERIÉRE. Oil, sire, moy et ma dame,
Vous plaist il rien ?
LE SERGENT. Oil ; mon Dieu, savoir vueil bien
Qu' avez ceens a cy crier :
Ne m' en vueillez le voir nier,
Ou vraiement je t' enmenray
Avec moy et si te mettray
En fort prison.
LA CHAMBERIÉRE. Certes, sire, par mesprison
Avons ceens un meschief grant :
Ma dame a noyé son enfant
Dont elle gist.
LE SERGENT. Ne m' en di plus : il me souffist.
Et ou est elle ?
LA CHAMBERIÉRE. Vez la la en douleur cruelle
Encore en bain.
LE SERGENT. ( Pénétrant dans la chambre )
Dame, je met a vous la main
De par le baillif mon seigneur,
Et pour plus seurté greigneur
Avoir, entens ça, chamberiére :
Garde bien qu' en nulle maniére
Ta dame de ceens ne parte,
Car sur toy tournera la perte
S' elle se meut.
LA DAME. Ja doubter ne vous en esteut,
Tristan, n' en suis pas bien aisie.
( Le sergent sort )
Sa, vien ; fay que soie couchie,
Agnesot, oste moy de cy.
Mére Dieu, par vostre mercy
Confortez moy.
LA CHAMBERIÉRE. Dame, pour l' amour Dieu vous proy
Gardez ne vous desesperez,
Mais l' aide Dieu esperez ;
Ce vous conseil.
( La chambrière aide la dame à sortir de la cuve et à s’étendre sur son lit )

Scène 6. Le tribunal.
( Entre le sergent )
LE SERGENT. Sire, un grant fait dire vous vueil.
En alant ou vous m' envoiez
J' ay trouvé c' uns enfes noiez
A esté n' a mie granment
Et de sa mére proprement
Qui encore en gist de jesine.
Si ay d' elle pris la saisine
Et des biens touz.
LE JUGE. Ou est ce, Tristan, amis douz ?
Savoir le fault.
LE SERGENT. ( Montrant la demeure )
Sire,c' est a cel hostel hault
Que la veez.
LE JUGE. Sanz ce que point vous asseez,
Tost menez m' y.
LE SERGENT. Sire, il me plaist, par saint Remy.
Or me suiez ; devant iray.
( Ils sortent )

Scène 7. La maison de la dame.
( Entrent le sergent et le juge )
LE SERGENT. C' est icy, sire ; j' enterray
Tost avant vous.
LE JUGE. Amis, de ce sui tout jalous.
Sa, chamberiére, ou est la dame ?
Dy moy verité, par ton ame ;
Ne me mens point.
LA CHAMBERIÉRE. Par m' ame, elle est en petit point
En son lit, sire.
LE JUGE. Maine nous y tost sanz plus dire
Isnel le pas.
LA CHAMBERIÉRE. Venez : ne vous contredy pas,
Sire ; je n' ose.
( La chambrière conduit le juge et le sergent
dans la chambre de la dame )
LE JUGE. Dame, entendez cy une chose
Que je vous bée a pronuncier,
Et ne vous vueilliez courroucier.
En a un enfant mis a mort
Seens, je ne say par quel sort,
Si que savoir vueil qui ç' a fait.
Dame, savez vous de ce fait
Ne tant ne quant ?
LA DAME. Il me poise que j' en say tant,
Sire, mais il ne peut autre estre.
Ne le vueillez sur ame mettre,
Car en verité j' en descoulpe
Tout le monde : moye est la coulpe,
Ne nulz fors moy coulpe n' y a ;
Je vous diray conment il va.
Je sui une povre acouchée
De grant douleur au cuer touchée.
Ores quant en mon bain entray
Ma chamberiére demanday
Mon enfant avoir pour baignier
Et pour lui ses membres aisier.
Quant je le ting entre mes braz,
Voir est qu' il ne demoura pas
Que de dormir l' affeccion
Me vint par la subgeccion
De l' ennemi : si m' endormi,
Et en dormant mes braz ouvri,
Et mon enfant si m' eschapa :
Ainsi en l' yaue se noya
Par ma meschance.
LE JUGE. Monstrez le moy sanz detriance.
Ou est il, dame ?
LA DAME. Sire, je ne say, par mon ame,
Ou il est. Qu' en vault le mentir ?
La douleur que sa mort sentir
Me fait m' est grief tourment et rage.
Lasse ! je muir ; lasse ! j' enrage,
Quant m' en souvient.
LE JUGE. Veoir le me fault, c' est pour nient.
Sa, chamberiére, vien avant.
Qu' avez vous fait de cel enfant ?
Ne me mens goute.
LA CHAMBERIÉRE. Sire, du bain l' ostay sanz doubte.
A jointes mains vous cri mercy.
De bonne foy l' apportay cy
Ou vous le veez.
LE JUGE. Dame, il fault que vous vous levez.
Vous m' avez dit, bien m' en remort,
Que vous avez cest enfant mort.
Vestez vous tost appertement,
Car vous en venrez vraiement
Com prisonniére.
( La dame se lève et sa chambrièrel’aide à se vêtir
tandis qu’elle rononce la réplique suivante : )
LA DAME. Lasse ! or voy je bien que priére
Cy endroit rien ne me vauldra.
A honte mourir me fauldra :
Nulle riens n' y vault l' estriver.
E ! Diex, com cy a dur lever
Qui ma vie a grief douleur fine !
Onques mais femme de jesine
Ne releva si dolereuse.
Ha ! doulce vierge glorieuse,
Ceste dolente pecheresse
Qui tant a au cuer de detresce,
Par vostre grace confortez.
Car en moy est desconfors telz
Qu' a espoir nul ne me say prendre
Fors de honteuse mort attendre,
Se par vous, vierge, secourue
Ne sui. Sire, je sui vestue,
Puisqu' il vous plaist.
LE JUGE. Par m' ame, dame, il me desplaist
Qu' il le me convient faire ainsi.
Ore il nous fault partir de cy.
Chamberiére, entens ma raison :
Touz les biens de ceste maison
Et l' ostel aras en baillie.
Sur peine de perdre la vie
Garde que rien n' en soit osté
Tant qu' il ait esté ordené
C' on en fera.
LA CHAMBERIÉRE. Sire, quanqu' il y est sera
Gardé bien et seurement.
De ce ne doubtez nullement,
S' il plaist a Dieu.
LE JUGE. Dame, avant, partons de ce lieu :
Avec nous vous en fault venir.
Tristan, vueillez la soustenir
Et la laisse a son aise aler.
Delivre toy sanz plus parler :
Il est ja tart.
LE SERGENT. Sus, dame, que Diex y ait part.
Alons men tost.
LA DAME. ( Quittant sa chambrière en l’embrassant )
A Dieu, chiére amie Agnesot :
Tu n' as mais en moy point de dame.
Prie Dieu qu' il ait de mon ame
Mercy, car le corps va a perte.
Tu vois bien que c' est chose apperte :
Jamais cy ne retourneray.
Pour ç' a Dieu te conmanderay,
M' amie chiére.
LA CHAMBERIÉRE. Lasse, j' ay bien de mate chiére
Faire cause et raison sanz faulte
Pour vous, ma dame. A Dieu. La haulte
Royne d' amour et de grace
A vostre ame vray pardon face,
Se plus n' avez de jours a vivre
Ou briément doint qu' estre delivre
Puissez a joie.
( La dame est emmenée par le juge et le sergent au château )

Scène 8. Le château.
( Ils entrent dans la partie où se trouve située la prison )
LA DAME. Lasse ! chetive ! je soloie
Desirer que Dieu tant m' amast
Qu' enfant concevoir me donnast.
Mais il pert bien que ne savoie
Que c' estoit que je demandoie,
Car par un qu' ay eu tout seul
Me fauldra a honte et a deul
Mourir sur terre.
LE JUGE. ( Montrant la porte d’une cellule )
Or tost, Tristan, leens l' enserre
Si qu' elle n' ysse.
LE SERGENT. Sire, je n' ay pas cuer si nice
Qu' ouvert li laisse huis ne fenestre.
Entrez, dame, ycy vous fault estre
Un po de temps.

Le sergent ferme la porte à clef

LA DAME. ( Seule à l’intérieur de la cellule )
E ! Dieux ! ou sui je ? ou ? tout seens
Ne voi lieu dont clarté me viengne.
Mére Dieu, de moy vous souviengne ;
Dame, trop sui desconfortée :
Onques mais si dure portée
Femme ne porta com j' ay fait.
Ha ! mon bon seigneur, quant ce fait
Sarez, au cuer arez grant rage.
Certes vostre pelerinage
A grant douleur vous tournera,
Mais encore vous doublera
La douleur quant vous orrez dire
La mort amére et le martire
Qu' a souffrir pour ce fait attens,
Ne jamais ne venrez a temps
Que plus vous voie, ami loyal.
Ha !tresdoulce vierge royal,
C' est ce qui plus me desconfit,
Car onques homme tant ne fist
Pour femme conme il a pour moy,
N' onques homme n' ama, ce croy,
Autant femme conme il m' amoit :
Touzjours s' amie me clamoit.
Or est fait : plus ne le verray.
Lasse ! chetive ! que feray ?
Bien me doit li cuers fondre en lermes,
Car de ma vie est brief li termes
Et la fin honteuse et despite.
Doulce vierge, par ta merite
Estain mon dueil et mon ennuy :
En toy me fy, en toy m' apuy,
Toy de cuer lo et loeray ;
Toy seule gloriffieray,
Car seulement par ta puissance
J' atens a avoir delivrance
Et brief secours.

Scène 9. Près du château.
( Entrent l’avocat, le chevalier, le comte et le sergent d’armes )
LE CHEVALIER. Mon seigneur, huy a quinze jours
Que vous promistes a venir
En ce chastiau la pour tenir
Voz assises ; il est grant jour.
Alons y sanz faire sejour,
S' il vous agrée.
LE CONTE. Par foy, c' estoit bien ma pensée ;
Oublié ne l' avoie pas.
Alons y tost ysnel le pas.
Vous deux m' aiderez a jugier.
Alez devant ; alez, Sohier,
Que je vous voie.
LE SERGENT D' ARMES. ( Écartant la foule sur le passage du comte)
Voulentiers, sire. Faites voie !
Avant ! avant ! sus de cy ! sus !
Par amour, traiez vous en sus
De ce chemin.

Scène 10. Le château où se tient le tribunal.
( Entrent le sergent, le chevalier, le comte, l’avocat ; le bailli les accueille )
LE BAILLIF Mon chier seigneur, par saint Copin,
Vous soiez li tresbien venuz
Et a grant joie receuz,
Et vous, mes seigneurs, touz ensemble.
Vous n' avez pas, si com me semble,
Esté oblieux de venir
Cy pour voz assises tenir.
Irez seoir ?
LE CONTE. Oil, baillif ; je vueil veoir
L' entencion et le propos
D' entre vous sur les faiz plus gros
De ceste court.
L' ADVOCAT. Or nous delivrez brief et court,
Baillif : il en est temps huy mais.
Faites enconmencier les plais.
Or sus ! bonne erre.
SECOND SERGENT. D' ARMES. Mon seigneur, je vous vueil requerre,
Tandis que serez cy endroit,
Que je voise boire ou que soit :
J' ai soif trop grant.
LE CONTE. De ce avez vous cuer engrant
Souvent, mon ami, bien le say.
Alez, revenez sanz delay
Yci bonne erre.
( Sort le second sergent )
LE BAILLIF. ( Au premier sergent ) Or nous va celle femme querre,
Tristan, que tenons prisonniére.
Je vueil qu' elle soit la premiére
En jugement.
LE SERGENT. Sire, je vois, se Dieu m' amant.
( Le sergent fait sortir la dame de la cellule où elle est enfermée )
Sa, dame, sa, passez avant ;
Yssez hors, n' alez demourant ;
Delivrez vous.
LA DAME. Tristan, je vois, mon ami doulz.
Que me veult on ?
LE SERGENT. Alons men sanz arrestoison.
Ge ne le sçay pas bien, par m' ame.
( Conduisant la dame vers le bailli et ceux qui l’entourent )
Sire, vezcy la bonne dame
Que demandez.
LE BAILLIF Mon chier seigneurs, or entendez,
Et vous, mes seigneurs, touz aussi.
Ceste dame que veez cy
A mort un anfant qu' elle avoit
Duquel encore elle gisoit :
Pour ce la tien je prisonniére.
Or dites en quelle maniére
J' en ouverray.
LE CHEVALIER. Ma sentence vous en diray.
Justice et droiz, qui bien y garde,
Si dient et jugent c' on l' arde :
C' est ce qu' en dy.
LA DAME. Ha ! mes seigneurs, mercy ! mercy !
Ne regardez pas le meffait
Quel il est, mais conment fu fait,
En quel lieu, par quelle aventure,
Afin que de moy creature
Povre, chetive et miserable
Chascun ait le cuer piteable
Aucunement.
LE CONTE. Tu diz bien, femme. Or dy conment
Le fait avint de point en point,
Et gardes que ne mentez point,
Car de tant con plus nous diras
Verité, plus tost grace aras
D' entre nous touz.
LA DAME. Certes creez, mon seigneur doulx,
Que ja de mot n' en mentiray,
Mais verité pure diray.
Il est voir que je me baingnoye
Conme acouchiée que j' estoye
D' un filz qui tant m' a donné paine
Que j' en travaillay bien quinzaine
Et fu de mort en aventure,
Pour quoy de cuer par grant ardure
Mon vray compaignon et ami
Se voua a aler pour my
Nostre Dame du Puy requerre.
Lasse ! pour lui le cuer me serre
De douleur, et je n' en puis mais,
Car veoir ne le cuit jamais,
Et s' est alez pour moy orer.
Donc doy je bien pour ly plourer.
Ore de li me tays atant.
Sire, pour baingnier mon enfant
Requis, et il me fu baillié,
Mais mon povre corps traveillié
Avoie tant et estourmy
Qu' assez tost après m' endormy
Ou baing, et l' enfant de mes mains
M' eschappa. N' y a plus ne mains :
Il est com je le vous recorde.
Si vous requier misericorde
A vous touz ; ne sçay plus que dire,
Car certes assez me martire
Le dueil que j' ay.
LE CONTE. Remet la en sauf sanz delay,
Sergent.
( Le sergent reconduit la dame dans sa cellule )
Sa, or parlons ensemble.
Par foy, biaux seigneurs, il me semble,
Ce fait est de grant pitié plain,
Je le vous vueil bien dire a plain ;
Car c' est dure chose et amére
A croire qu' avenist a mére
Qu' a mort mist son enfant jamais
Ou trop aroit le cuer mauvais,
Si que je ne m' accorde mie
Qu' elle perde pour ce la vie,
Mais c' on li pardoint son meffait,
Car, par ma foy, elle m' a fait
Pitié au cuer.
LE SERGENT. D' ARMES. Je ne me peusse a nul fuer
Estre aussi tenuz de plourer.
Sire, quant je l' oy parler ;
N' en doubte nulz.
L' ADVOCAT. Ore, sire, je sui venuz
Cy pour ce que je vous conseille.
Vous dites une grant merveille,
Et trop grant don voulez donner
D' un tel fait a plain pardonner,
Ja soit ce que pour bien le dites.
En pensez vous a estre quittes,
Se la quittez ? nanil, par foy ;
Et vezcy la raison pour quoy :
Combien, sire, que soiez conte
Et homme dont on fait grant compte,
Si est il voir que vous avez
Souverain, et vous le savez,
De qui voz fiez sont tuit tenu ;
Et si tost qu' il ara sceu
Que vous n' arez justice fait,
Il mettera la main de fait
Sur toute vostre seigneurie
Et si dira, je n' en doubt mie,
Que de droit li sera acquise.
Or regardez en quelle guise,
Sire, vous vous voulez deffaire,
Se pour pitié laissiez a faire
Droite justice.
LE CHEVALIER. Marie ! je tenrroie a nyce
Le seigneur, se grace faisoit
A autruy et soy defaisoit
Par celle grace.
LE SERGENT. D' ARMES. Sire, il vault miex donques c' on face
Justice, et que point ne tardez,
Que ce que la terre perdez
Dont estes conte.
LE CONTE. Aussi aym je miex que a honte
Muire, puis qu' elle a fait le vice,
Que pour lui ma terre perdisse,
Se m' aist Diex.
L' ADVOCAT. Sire, aussi le vous vault il miex,
Par verité.
LE CONTE. Je conmans qu' il soit endité
A hault cri, en plain quarrefour,
Que tantost sanz faire sejour
De chascun hostel un homme isse
Qui viengne veoir la justice,
Et que l' en voit dire au bourrel
Qu' il s' en voit au devant ysnel
L' appareil faire.
LE BAILLIF Tristan, vaz y tost sanz retraire.
Tu oz bien que mon seigneur dit.
Vaz, si le faiz sanz contredit :
Or t' en avance.
LE SERGENT. Je vois, par saint Denis de France ;
Je sui d' avoir ja fait engrans.
( Il sort )

Scène 11. Une place publique.
LE SERGENT. ( Faisant sa proclamation )
Or entendez, petiz et grans,
Mon seigneur le conte vous mande
A touz ensamble et si conmande
De chascun hostel un homme ysse
Et si s' en viengne a la justice
Sanz nul demour.
LE COUSIN. Tristan, je vous pri par amour
Que vous me vueillez denuncer
Qui est ce c' on veult justicer.
Est ç' homme ou femme ?
LE SERGENT. Sire, c' est celle bonne dame
Qui l' autrier noya son enfant
Par meschief, dont est pitiez grant.
Je m' en revois au bourrel dire
Qu' il appareille et qu' il attire
Ce qu' il i fault.
LE COUSIN. E ! mére Dieu, dame du hault
Firmament, vezcy grant damage.
Ceste dame de bon courage
Estoit et preude femme fine,
Et par meschief fault qu' elle fine
Selon le monde a deshonneur.
E las ! chier cousin, grant doleur
Arez quant vous sarez cecy.
Je ne vueil plus demourer cy :
Aux champs m' en vois bien hors de voie
A fin telle que ne la voie
Mener destruire.

Scène 12. Campagne aux alentours de la ville.
( Entrent le mari et son valet )
LE MARI. Or nous pouons nous bien deduire
Desoremais, Gençon amis,
Car, Dieu mercy, nous avons mis
Nostre pelerinage a fin.
Il n' a c' un trop po de chemin
Jusqu' a l' ostel ; tost y serons ;
Si pense que nous trouverons
La relevée de nouvel
Qui ja nous fera grant revel,
Et si verray mon petit filz.
C' est ce qui plus, soiez en fiz,
Me donne joye.
LE VALLET. Par ma foy, mie ne vouldroie
Pour dix livres de bons deniers
Qu' il me convenist les centiers
Raler, sire, dont nous venons.
Pour Dieu, ce chemin affinons
Isnel le pas.
LE MARI. Or escoute : tu t' en yras
A mon cousin tout seul devant
Et li diras que je li mant
Que l' estat de maison me mande
Tout, et a li me reconmande
Assez de fois.
LE VALLET. Voulentiers, mon seigneur, g' y vois
Sanz targier point.
( Le valet se sépare de son maître )

Scène 13. La place publique et le tribunal.
LE SERGENT. ( Voyant arriver le bourreau )
Raoulet, je te truis bien a point.
Vas, si apreste ton affaire,
Car tantost fault justice faire
De celle femme qui noya
Son enfant, dont arse sera.
Or t' en depesche.
LE BOURREL. Il ne m' y fault hoe ne besche.
Alez dire au baillif j' aray
Fait en l' eure, et qu' a ly iray
Tout maintenant.
LE SERGENT. Or fay tost :je m' en vois devant.
( Le bourreau va dresser le bûcher ; le sergent revient
au tribunal, devant le bailli et les autres juges )
Mes seigneurs, le bourrel ara
En l' eure fait, puis il venra
Icy, ce dit.
LE BAILLIF. Nous l' attenderons un petit,
Puis qu' ainsi va.

ACTE III.
Scène 1. Campagne aux alentours de la ville. Une chapelle.
( Le valet s’avance, tandis que lemari est resté à l’arrière )
LE VALLET. Il me semble que je voy la
Le cousin mon maistre ; c' est mon.
A li vois sanz arrestoison.
( Abordant le cousin ) Dieu vous gart, sire.
LE COUSIN. Dieu te doint bien faire et bien dire,
Gençon. Qu' est ce ? ou est mon cousin ?
N' est il pas venu le chemin
Avecques toy ?
LE VALLET. Si est, sire, foy que vous doy.
Je l' ay laissié bien près de cy.
Si vous prie, pour Dieu mercy,
Qu' avant qu' il se face apparoir
Que l' estat li faciez savoir
De sa femme et de son hostel
Et s' il y a rien de nouvel
Ou mal ou bien.
LE COUSIN. Gençon, je ne t' en diray rien,
Mais avec toy a lui yray,
Car telle chose li diray
Que je ne te diroie pas.
Alons nous ent ysnel le pas
Sanz plus cy estre.
LE VALLET. Alons, sire.
( Ils se dirigent vers le mari qui attend )
Veez vous mon maistre
Par devant nous ?
LE COUSIN. Oil, Gençon, mon ami doulx.
A li m' en vois sanz demourée.
Abordant le mari ) Biau cousin, la vierge honnorée
Soit loée : en bon point vous truis.
Conment vous a esté depuis
Que ne vous vi ?
LE MARI. Tresbien, cousin, par saint Remy.
Et vous, avez vous se bien non ?
Conment le fait on en maison ?
Ne me mentez.
LE COUSIN. Je le vous diray, s' acoutez.
Je ne vueil point, se Dieu me voie,
Que vous aillez par ceste voie :
De ça tournons.
LE MARI. Cousin, en mon hostel serons
Plus tost par cy.
LE COUSIN. Vous n' irez pas, je vous en pri.
Or me creez.
LE MARI. Vous me samblez touz effraez.
Pour Dieu, dites moy, qu' y a il ?
Vous doubtez vous d' estre en peril
Contre nul ame ?
LE COUSIN. Nanil, cousin, par nostre dame,
Ne ne fis onques.
LE MARI. Aucune chose y a il donques
Qui ne va mie bien a point.
Je vous pri, ne m' en mentez point ;
Dites m' en voir.
LE COUSIN. C' est nient ; il le vous fault savoir.
Cousin, venez vous en, venez.
Certes point de femme n' avez
Ne point d' enfant.
LE MARI. Las ! qu' est ce que m' alez disant,
Cousin ? Vezcy parole amére.
Ay je perdu et filz et mére
Trestout ensemble ?
LE COUSIN. Oil voir, cousin, ce me semble :
Ainsi est il.
LE MARI. Elas ! chetif ! par quel peril ?
Que je le sache.
LE COUSIN. Certes avis m' est c' on me sache
Le cuer, tant ay dueil et hachie
Quant il fault que je le vous die.
Vezcy tout le fait. Ma cousine
Baignoit un jour de sa gesine,
Et son enfant avecques li :
En baingnant elle s' endormy,
Et l' enfant si lui eschapa
Des mains si qu' ou bain se noya.
Le haro conmença si grant
Que la justice y vint errant.
Prise fu ; a mort est jugée,
Maintenant sera amenée
Ardoir : n' en vault riens le mentir.
Pour ce n' ay volu consentir
Que ce chemin la alissiez
Afin que ne l' encontrissiez.
Or savez du fait l' aventure.
Si vous pri pour la vierge pure
Gardez ne vous desconfortez,
Mais prenez en vous confors telz
Que vostre ame en puist valoir miex,
Et dites que loé soit Diex
De quanqu' il fait.
LE MARI. Elas ! chetif ! qu' ay je meffait
A vostre filz, vierge Marie ?
Je croy qu' il ne soit homs en vie
Plus maleureux que je sui.
Elas ! je cuidoie au jour d' uy
Avoir un jour plain de leesse,
Mais je l' ay plain de grant tristesse.
Ha ! compaigne loyalle et vraie,
Ta mort trop me tourmente et plaie
Quant par tel meschief je te pers,
Car tes tourmens qui sont apers
Aus gens me sont aussi ou cuer
Et m' engoissent si pour toy, suer,
Qu' a paine sçay je mais parler.
Las ! quelle part pourray aler ?
Las ! qui me reconfortera ?
Las ! conment sanz mort portera
Mon povre cuer le dueil que j' ay ?
Las ! se m' esbahis et esmay,
N' est de merveille.
LE COUSIN. Soufrez, cousin, c' on vous conseille.
Biau sire, je vous cri mercy.
Venez ent sanz plus estre cy
Ou vous mainray.
LE MARI. Certes, biau cousin, je n' iray
En maison nulle, tant soit belle,
Devant ce qu' en celle chappelle
Aie esté encore une piéce ;
Mais que jamais ne vous meschiéce,
Alez veoir ma povre femme
Et me rapportez, par vostre ame,
Ce que pourrez de ses regrez,
Car du savoir ay cuer engrez,
Et la maniére de sa fin.
Je vous attenderay, cousin,
Droit la dedans.
LE COUSIN. Cousin, je feray sanz contens
Vostre plaisir ; c' est de raison.
Va t' en avecques lui, Gençon :
Point ne le laisse.
LE VALLET. Nanil, tant qu' en telle tristesse
Je le voie estre.
( Le cousin se retire. Le mari et sonvalet entrent dans la chapelle )
LE MARI. ( Priant la Vierge Marie ) E ! dame, de qui daigna naistre
Li Diex qui toute chose a fait,
Qui tant en grace t' a parfait
Qu' en corps et en ame t' a mis
Lassus en son hault paradis
Ou de touz sains es honnorée,
Des anges servie et loée
Conme leur dame et leur maistresse,
Dame, moi qui sui en tristesse
Et en desconfort sanz mesure,
Regarde en pitié, vierge pure,
Car a toy seule me demente,
A toy me complain et lamente
Com cil qui en affliccion
Est d' amére compunccion.
Qu' en puis je mais, vierge Marie ?
J' ay desiré toute ma vie
Que ta grace a ce m' avoyast
Que Diex un enfant m' envoyast.
Mais se par toy m' a entendu,
Cest enfant m' est trop chier vendu,
Car onques a pére n' a mére
Ne donna fors qu' angoisse amére
Et bien y pert, vierge pucelle,
Car par lui muert a honte celle
Qu' ay espousé par mariage,
Dont a po que de dueil n' enrage
Et que mon cuer par my ne créve,
Tant me tourmente et tant me gréve
La paine qu' il ly fault encourre.
Las ! et je ne sçay ou recourre
Qu' a toy, fontaine de pitié.
Si te pri que de t' amistié
Monstre aucun petit a ce las
Que toute joie et touz soulas
Ont eslongié.

Scène 2. Le Paradis.
NOSTRE DAME. Chier filz, donne moy le congié
Que la jus voise visiter
Un mien ami que lamenter
Voy sanz mesure.
DIEU. Chiére mére, bonne aleure
Alez y, car il me plaist bien.
Vostre vouloir si est le mien ;
Vous le savez.
NOSTRE DAME. Or sus, Jehan, de cy levez,
Et vous, Eloy, Agnés, et vous.
Venez avec moy la jus tous
Par compagnie.
SAINT JEHAN . Ce ne refuseray je mie,
Dame, mais a vostre plaisir
Sui de touz poins prest d' obeir :
C' est de raison.
SAINT ELOY. Nous ne pouons sanz mesprison
De ce, Jehan, nous excuser.
Aussi vueil je sanz refuser
Son vouloir faire.
NOSTRE DAME. Or tost, alons men sanz retraire
Droit a celle chappelle la.
Un mien loyal sergent y a
Que je voi trop desconforter,
Si que pour li reconforter
A li yrons.
LE PREMIER ANGE. Dame, vostre vouloir ferons :
Il appartient.
SECOND ANGE. C' est bien dit, et puis qu' a ce vient,
Alons men chantant touz ensemble,
C' est bien a faire, ce me semble,
Ce rondel qui est bel et dous.
LE RONDEL. Royne des cieulx, qui en vous
Servir met son entencion
Moult fait bonne opperacion.
Quanque pour vous fait li est doulz
Et plaisant sanz confusion.
Royne des cieulx, qui en vous
Servir met son entencion
Dieu a ami et les sains touz,
Et si noble perfeccion
Que de gloire a refeccion.
Royne des cieulx, qui en vous
Servir met son entencion,
Moult fait bonne opperacion.
( Notre-Dame descend du Paradis accompagnée des deux
anges chantant ce rondeau et des deux saints Jean et Eloi )

Scène 3. La chapelle.
( Notre-Dame et son cortège pénètrent dans la chapelle )
NOSTRE DAME. ( Au mari ) Amis, ta lamentacion
Laisse ester huymais par amour.
Trop longuement y faiz demour.
Met toy en pais.
LE MARI. Helas ! dame, je n' en puis mais
Se je pleure et suis esbahiz,
Car de douleur suis envahiz
Dure et cruelle.
NOSTRE DAME. Et pour Dieu, mon chier ami, quelle ?
Dites le moy.
LE MARI. Las ! a po que je ne marvoy.
Dieux m' avoit fait grace si grant
Qu' il m' avoit donné un enfant
D' une femme qu' espousé ay
Si bonne que meilleur ne say,
Et s' estoit quanque desiroie.
Las ! mais j' en ay petite joye,
Car l' aventure est si amére
Que noyé l' a sa propre mére,
Qui encore de lui gisoit,
Ou baing ou elle se baingnoit
Pour ce que s' endormi ou baing.
Or l' a pris justice en sa main
Et sy est jugée a ardoir
En l' eure. Doi je bien avoir
Grant douleur ? dites me voir, dame.
Mon enfant voy mort par ma femme,
Qui me met en affliccion,
Et si voy qu' a destruccion
Ma femme muert pour son enfant.
Ou est le cuer qui ne me fend
De dueil, d' angoisse et de meschief ?
Lever n' oseray mais le chief
Contre ame née.
NOSTRE DAME. Mon ami, ceste destinée,
Je te promet, n' est qu' une espreuve,
Et te dy bien, se Dieu te treuve
Souffrant en ceste adversité,
Doulcement croy pour verité
Que telle joie te donrra
Qui contre ton duel doublera
Pour tout certain.
LE MARI. Dame, tout est dessoubz sa main :
Or en face a son saint plaisir.
Je ne vueil riens ne ne desir
Que son vouloir.
NOSTRE DAME. S' ainsi le fais, tu fais savoir ;
Et si te dy qu' il avenra
Que ta besongne a bien venra
Si que t' en tendras pour contens.
Ralons nous en : il en est temps
Trestouz ensemble.
SAINT ELOY. Dame, bien dites, ce me semble :
Je m' y accort.
SAINT JEHAN. Faisons donc encore un recort
En alant de nostre rondel.
Il me samble de chant tresbel
Et bon aussi.
LE PREMIER ANGE. Conmençons au partir de cy
Car je sui de chanter jalous.
RONDEL. Dieu a ami et les sains touz
Et si noble perfeccion.
( Les deux anges et les deux saintsraccompagnent
Notre-Dame au Paradis en chantant ce rondeau )
LE MARI. Diex ! est ce songe ou vision ?
Qu' est la dame ore devenue
Qui cy endroit estoit venue ?
Elle s' en va soudainement.
Perdue l' ay, ne say conment,
Mais doulcement m' a conforté
Et si doulcement enorté
Que pour s' amour cy demourray
Et la grace a Dieu requerray
Que m' a promise.

Scène 4. Place publique.
Foule. Un bûcher est dressé.
LE BOURREL. Mes seigneurs, s' il vous plaist que mise
Soit huy celle femme a sa fin,
Temps en est, s' aucun n' a affin
Qui la requiére.
LE CONTE. Je n' en feray riens pour proiere.
Avant ! traiez la de prison,
Et si soit sanz arrestoison
Menée ardoir.
LE SERGENT. Mon seigneur, a vostre vouloir :
En l' eure je la vous vois querre.
( Le sergent fait sortir la dame de prison )
Sa, dame, yssez de cy bonne erre.
Venez avant.
LA DAME. Je vois. Diex, a vous me conmant
Et en vostre saintisme garde ;
Sire, mon corps deffens et garde
De mort vilaine.
( Le sergent conduit la dame devantle bailli et le comte )
LE SERGENT. Vezcy la femme que j' amaine
Devant vous, sire.
LE BAILLIF. Dame, n' y vault riens contredire :
Il vous convient mort recevoir.
Bourrel, fai de li ton devoir.
Je ne vous say miex conseillier.
Priez Dieu qu' il vous vueille aidier
Et vous doint pacience, dame,
Telle que ne perdez pas l' ame
Avec le corps.
LA DAME. Ha ! tresdoulx Dieu misericors,
Se d' angoisse le cuer me fault,
Qu' en puis je mais, quant il me fault
Ce monde a honte trespasser ?
He ! seigneurs, se ne puis passer
Qu' il ne me conviengne destruire,
Pour Dieu, faites que bien tost muire
A ce que par longue doulour
Ne renie mon creatour,
Je vous en pri.
LE CONTE. Menez la vous deux sanz detri.
Oz tu, Tristan, et toy, bourrel ?
Nous irons après vous ysnel :
Alez devant.
LE BOURREL. Or sa, dame, passez avant :
Cy ne nous pouons plus tenir.
A vostre fin vous fault venir.
Priez ces gens que pour vous prient
Et que leurs patenostres dient
Chascun pour vous.
( Le bourreau lie la dame et la conduit vers le bûcher ;
le bailli, le chevalier et le comte les suivent )
LA DAME. A Dieu, a Dieu, mes amis touz,
Par especial mon ami,
Mon loyal seigneur, mon mari !
Lasse ! se veoir le peusse
Plus aisiement en morusse.
Or ne peut estre, bien le voy.
E ! bonne gent, priez pour moy
Que Dieu me soit si vray affin
Que m' ame prengne a bonne fin,
Car certes j' en ay bien mestier.
( S’arrêtant, au comte ) Sire conte, je vous requier
Et vous pri pour l' amour de Dieu
Qu' arrestons ycy en ce lieu
Et que me fassiez ceste grace
Qu' avant ce que plus oultre passe
Que je voie la creature
Pour qui je vois a tel laidure
Recevoir mort.
LE CONTE. Certes, femme, je le t' accort.
Or tost, tost, Tristan, vaz le querre
Et le m' apporte cy bonne erre,
Si le verra.
LE SERGENT. Je feray ce qu' il vous plaira,
Mon chier seigneur ; j' y vois suiant.

Le sergent va chercher le corps de l’enfant et le présente au comte

Tenez, sire, vezcy l' enfant
Que demandez.
LE CONTE. Monstrez li, baillif : n' atendez
Ne tant ne quant.
LE BAILLIF. ( Montrant le corps de l’enfant à la dame )
Ores, femme, vezcy l' enfant
Que tu demandes a veoir,
Que tu as mort. Or me dy voir
Qu' en veulz tu faire ?
LA DAME. Ha ! cher sire, vueille vous plaire
Que tenir le puisse un petit
Et baisier pour mon appetit
Ressasier.
LE BAILLIF Je ne le te vueil refuser :
Tien, voiz le cy.
LA DAME. ( Pressant l’enfant contre elle, prisonnière de ses liens )
E ! doulx enfes, Diex ait mercy
De t' ame et de la moie ensemble.
Bien m' est changée, ce me semble,
La joye que de toy avoie
Quant en mon ventre te portoye
Jusqu' a tant que j' en traveillay.
Mais dès lors pour toy enduray
Tant de paine et tant de martire
Qu' il n' est homs qui le peust dire
Jusques a l' eure de ton naistre.
( Priant Notre-Dame ) Ha ! mére au tresdoulx roy celestre,
Je vous rens graces, c' est droiture.
J' ay moult de foiz mis cuer et cure
En vous prier que m' oissiez
A ce qu' enfant me donnissiez,
Car d' enfant avoir j' esperoie
Que me venist solaz et joie ;
Mais, dame, s' il vous a pleu
Que j' aye cestui cy eu,
Si voy je qu' il est du contraire,
Car pour lui me voy a mort traire,
A mort, lasse ! voire honteuse
Et si laide et si angoisseuse
Que du penser m' esbahis toute.
Or est la compagnie route
De ton pére et de moy par toy,
Doulx enfes, certes mais par moy,
Si est bien droiz que le compére.
Vray Dieu, reconfortez le pére,
Car a plourer ara assez
Quant nous deux verra trespassez
Et il y ara bien raison.
En plourant, mon doulx enfançon,
Te vueil baisier, puis te lairay
Et pour ta mort morir iray,
Chétive ! lasse < ( Yci crie l' enfant) >
( Elle fait un baiser à l’enfant qui se met aussitôt à pleurer )
Mon seigneur, regardez la grace
Que Dieu et la vierge Marie
Ont cy fait. L' enfant si a vie :
Oez le braire.
LE CONTE. Ha ! doulce vierge debonnaire,
Vous doit on servir et loer,
Vous doit on de cuer aorer,
Car a ceulx qui a vous s' otrient
Estes, puis que de cuer vous prient,
Appareillie.
L' ADVOCAT. Sire, conmandez c' on deslie
La femme et qu' a plain soit delivre,
Puis que nous veons l' enfant vivre :
Il appartient.
LE BAILLIF. Vous dites voir : aussi convient
Quant elle sera deliée
Qu' elle soit au moustier menée
Pour la mére Dieu mercier
De ses vertuz et li loer
De sa tresgrant misericorde.
Bourrel, oste li celle corde
Dont tu l' as si estroittement
Liée : fay appertement
Conme ligiers.
LE BOURREL. Par m' ame, sire, voulentiers,
N' en doubtez pas.
( Le bourreau délie la dame )

Scène 5. La chapelle.
( Le cousin entre dans la chapelle et réveille le mari qui s’y est endormi )
LE COUSIN. Sus, cousin, sus, ysnel le pas.
C' est trop dormy.
LE MARI. Las ! j' ay le cuer si estormi
Et si pesant, au dire voir,
De dueil que je ne sçay avoir
En moy maniére.
LE COUSIN. Biau cousin, faites lie chiére.
Vostre femme ne mourra mie,
Car sachiez vostre enfant a vie.
Telles vertuz y a fait Diex
Dont tout le monde pleure aux yex
De pitié pour la grant merveille.
Il a couleur aussi vermeille
Conme belle rose en esté,
Et si vous di pour verité
Vostre femme mort le tenoit
Et en pleurant se complaignoit
De la doulour qu' avoit pour li.
Si avint, chier cousin, qu' ainsi
Qu' elle le cuida mort baisier
Pour sa douleur amenuisier
Et pour y prendre aucun confort,
L' enfant s' escria bien et fort
A haulte alaine.
LE MARI. Ha ! mére Dieu de grace plaine,
Des desolez conforterresse,
Qui es des desvoiez adresse
Et de ceulx qui ont esperance
En toy salut et vraie aidance,
Toute belle de corps et d' ame,
Je te mercy, tresdoulce dame,
Je te lo, je te glorify
De tout mon cuer te magnify
Pour les graces et le bienfait
Qu' autre foiz et ores m' as fait.
Par toy suis hors de grant tristesse,
Par toy ay recovré leesse
Plus que mon cuer ne peut comprendre.
Cousin, je ne puis plus attendre
Que ne voise veoir ma femme,
Puis que Dieu de si grief diffame
L' a delivrée.
LE COUSIN. Or alons donc sanz demourée :
Il me plaist bien.
( Le mari suit son cousin sur la place où le bûcher a été dressé )

Scène 6. La place publique. Foule.
LE BOURREL. ( Montrant au comte la dame qu’il a déliée )
Sire, entour li n' a mais du mien
Corde ne fil.
LE CONTE. Il me plaist bien.Ores, femme, de grant peril
Es eschapée, bien le voiz.
Toute ta vie a Dieu en doiz
Grant guerredon.
LA DAME. Certes, sire, je li fais don
De moy toute desoremais.
Sa serve vueil a touzjours mais
Estre, car faire ne puis miex,
Et a celle qui est des cieulx
Dame royal.
( Entrent le mari et son cousin )
LE MARI. ( Embrassant son épouse )
Ma suer, ma compaigne loyal,
M' amie chiére, acole moy.
Certes, j' ay moult esté pour toy
Plain de tristesce.
LA DAME. ( L’embrassant à son tour )
E ! Diex, or double ma leesce.
Mon chier seigneur, mon ami dous,
Voir quant il m' a membré de vous
Plus grief douleur au cuer sentoie
Que de la mort que j' atendoie,
Ce m' est avis.
LE CHEVALIER. Bourrel, sanz plus faire devis,
Puis que tu as cy fait, va t' en ;
( Au sergent ) Mais demeure avec nous, Tristan.
Dame, plus ycy ne parlez :
Droit au moustier vous en alez
Mercier la vierge Marie
Et nous vous tenrons compagnie
De cuers entiers.
LA DAME. Sire, bien dites : voulentiers
Faire vueil quanque conmandez.
Mon seigneur, avec moy venez,
S' il vous agrée.
LE MARI. Dame, alons, c' est bien ma pensée.
Je ne m' en tenroie a nul fuer.
( Tous les personnages présents se rendent à l’église, suivis de la foule )

Scène 7. L’église dédiée à Notre-Dame.
( Tous entrent dans l’église )
LE MARI. Or ça, mercions ci de cuer
Devant ces femmes et ses hommes
La mére Dieu, puis que nous sommes
En son eglise.
LA DAME. Sire, faire vueil sanz faintise
Vostre conmandement : c' est droiz.
Vierge mére au doulx roy des rois,
Dame de la terre et du ciel,
Doulce en penser plus que nul miel,
De tout mon cuer je te graci,
De tout mon pouoir te mercy,
Quant tu m' as daingnié regarder
Et de honteuse mort garder,
Si est bien droiz que je te serve.
Pour ce desoresmais ta serve
Vueil estre par especial
Et moy toute, vierge royal,
A toy donner.
LE MARI. E ! vierge, qui guerredonner
Te pourroit en nulle maniére
Si grant bonté ne si entiére
Conme tu m' as fait, doulce dame ?
Tu m' as delivrée ma femme
De mort telle con scet chascun,
Et a l' enfant dont n' avons qu' un
Qui par la mére estoit ja mors,
As mis la vie arriére ou corps,
Vierge pucelle.
LE CONTE. Biau preudon, puis que vezcy celle
Que tu diz qui est t' espousée,
Combien qu' ait esté opposée
A mourir de nous par son fait,
Pardonné li est son meffait
Et pure ynocent la te rens
Devant toutes ces bonnes gens,
Car a Dieu plaist, si con me semble,
Que vous soiez encore ensamble :
Or vous maintenez saintement.
Avant ! biaux seigneurs, alons ment
Et les laissons.
L' ADVOCAT. Mon seigneur, vo vouloir ferons :
Il appartient.

Le comte et son entourage sortent de l’église ;
la dame et son mari les suivent

LE MARI. ( Arrêtant le bailli ) Sire baillif, un mot pour nient :
Je vous suppli que m' entendez.
Assez evidanment savez
L' onneur, le bien, la courtoisie
Que m' a fait la vierge Marie,
Et certes se je l' oublioie
Assez plus que mauvais seroye.
Mais, sire, ce n' est pas m' entente,
Ainçois vueil mouvoir sanz attente
De cy, ne je ne fineray
Jamais tant que requis l' aray
(Ne m' en face nul contredit)
En un lieu moult devot c' on dit
Nostre Dame de Fineterre ;
Et pour ce je vous vueil requerre
Que de mon enfant curateur,
Se je muir, soiez et tuteur,
Vous ( Montrant son cousin ) et mon cousin qui cy est ;
Et dès maintenant mes biens met
Touz en voz mains.
LA DAME. Sire, il n' y a ne plus ne mains :
Se Dieu plaist, n' irez pas sanz moy,
Car j' ay cause aussi bien pour quoy
Je doie mon corps traveillier
Con vous avez : si vous requier
Qu' avec vous aille.
LE MARI. Pour Dieu, doulce suer, ne vous chaille
De venir y, car c' est trop loing,
Et trop vous convendroit grant soing
Prendre et grant cure.
LA DAME. J' ay fiance en la vierge pure
Qu' elle touzjours m' aidera.
Voit ainsi conme aler pourra,
Certes g' iray.
LE MARI. Dame, pas ne vous desdiray.
Or paiz atant : laissons l' estrif.
Cousin, et vous, sire baillif,
Pour l' amour Dieu le droiturier
Faites ce que je vous requier ;
Et dès maintenant pour touz lais
Touz mes biens et l' enfant vous lais
Et le vous charge.
LE BAILLI . Vous me requerez de grant charge,
Sire, mais pour la bonne foy
Qu' en vous voy, je le vous ottroy
Et si vous fais bien assavoir,
Puis que dès cy voulez mouvoir,
De nous serez tant convoiez
Que hors de la ville soiez ;
Et si tost que retournerons,
Vostre cousin et moy irons
Faire inventoire de voz biens,
Afin que perdu n' y ait riens,
Mais tout gardé.
LA DAME. Mon seigneur, or n' y ait tardé :
Mouvons dès cy sanz detrier ;
Par amour vous en vueil prier,
Car la doulce vierge Marie
M' a fait si haulte courtoisie
Que je doy bien desirer faire
Aussi chose qui lui puist plaire
Et viengne a gré.
LE COUSIN. Certesvous dites verité :
Vous y devez bien peine mettre.
Cousine, avant ! sanz plus cy estre,
Pensez de vous mettre a chemin.
Alez devant, alez, cousin,
Appertement.
LE MARI. Voulentiers, cousin, vraiement
Suivez moy, dame.
( Le mari et sa dame sortent d’un côté, le cousin et le bailli de l’autre )

Scène 8. Le Paradis.
NOSTRE DAME. Chier filz, je voy que celle femme,
Qui par vous a esté tensée
De mort, met toute sa pensée
A vous servir et mercier,
A vous loer et gracier
De ce que fait avez pour li
Et nient mains si fait son mari.
Ne sont pas plains d' ingratitude,
Car empris ont par grant estude
A aler vous et moy requerre
Si loing que la ou fine terre,
Qui est grant paine.
DIEU. Vous devez, mére, estre certaine
Que je sçay et voy leur entente
Qui moult me plaist et atalente,
Car en vraie amour est fondée
Et pour ce leur sera souldée
Si com direz.
NOSTRE DAME. Chier filz, ceste honneur leur ferez,
S' il vous plaist, et je vous em pri
Qu' après eulx alons sanz detry.
Vezcy qui seront noz convoiz
Et chanteront a haulte voiz,
Si que pour leurs cuers resjoir
Vous leur donrrez du chant oir,
S' il vous plaist, grace.
DIEU. Il me plaist, mére, qu' il se face.
( Aux deux anges et aux deux saints Eloi et Jean )
Seigneurs, vous oez qu' elle dit.
Or sus, trestouz, sanz contredit
Si en alons.
SAINT ELOY. Vray Dieu, vostre vouloir ferons.
( À ses compagnons ) Mes amis, sanz faire descort,
Je vous pri chantons par accort
Et de doulx traiz.
RONDEL. Gent corps en biauté parfaiz,
Et par faiz
Vierge sur toutes parfaite,
Bien a celui grace a fais,
Gent corps en biauté parfaiz,
Et doulcement es refaiz
Est refaiz
Qui en vous servir s' affaitte,
Gent corps en biauté parfaiz
Vierge sur toutes parfaite.
( En chantant ce rondeau, les deux anges et les deux saints
font escorte à Dieu et à Notre-Dame qui descendent du
Paradis pour se rendre dans la même direction que la dame
et son mari, vers le lieu de pèlerinage de Notre-Dame du
Finisterre )