Mirper21

Cy conmence un miracle de Nostre Dame de Barlaam,
maistre d' ostel du roy Avennir, qui converti
Josaphat, le fil du roy, et depuis converti Josaphat
son pére le roy et touz ses gens.

ACTE I.
Scène 1. Le palais royal.
LE ROY.
Seigneurs, je vous pri et requier,
Dites me voir de ce que quier.
Vous estes astrologiens,
Les plus haulx de sens et d' engiens
Tenuz de toute ceste terre.
Or entendez que vueil enquerre :
Vezci mon filz orphelinet
De mére, car trespassée est.
Dites moy, sera il ja grant ?
De savoir ay le cuer engrant
Quelx il sera.
PREMIER ASTROLOGIEN. Sire, pour certain il fera
De soy un puissant et riche homme
Et tel que de ci jusqu' a Rome
N' ara pareil.
DEUXIESME ASTROLOGIEN. Roys, or entens que dire vueil.
Cest enfant ici que tu as
Sera grant homme, mais non pas
En ce pais dont es seigneur,
Mais en un autre trop meilleur
Et trop plus noble, ja n' en doubtes.
Plus je dy qu' il tenra, escoutes,
La loy et foy des chrestiens
Que maintenant sur toutes riens
Hez et parfuis.
LE ROY. Je l' en garderay, se je puis.
Seigneurs, savez que vous ferez ?
( Montrant une demeure )
En ce manoir la le menrez,
Et gardez bien que point n' en isse,
Et si ne soiez pas si nice
Que de nesune enfermeté
Li parlez ne de povreté,
De mort aussi ne de viellesce
Ne de chose qui a tristesce
Lui puist la pensée esmouvoir,
Ne que par nul il puist avoir
De Crist aucune mencion,
Afin que son entencion
De riens n' y mette.
PREMIER CHEVALIER. Vostre voulenté sera faitte
Si bien, sire, par touz noz diex
Qu' il ne verra qu' esbaz et jeux
Et leesces, pour le tenir
De penser au temps a venir,
A brief parler.
LE ROY. C' est bien dit ; pensez d' en aler,
Et tenez bien tout clos sur vous,
Et soiez songneux et jalous
De li garder.
L' ESCUIER. A ce sarons bien regarder.
Mon seigneur, s' il vous plaist, g' yray
Devant vous et le porteray
Entre mes braz.
PREMIER CHEVALIER. Tu diz bien ; prens l' ysnel le pas
Et va devant.

L’écuyer prend l’enfant dans ses bras et entre
dans demeure ivi du premier chevalier

Scène 2. Une église.

LE PRESCHEUR. Doulx Diex, ce m' est le cuer grevant
Que les gens de ce pais voy
Vivre ydolatres sanz ta foy
Tenir ne croire en toy, doulx Diex ;
Ce me fait si mal que j' ains miex
Morir, sire, entre eulx pour t' amour emeure
Que ne leur monstre sanz demour
Conment es cielx pére as sanz mére,
Et mére en terre euz sanz pére,
Et conment tu t' abandonnas
A morir pour nous et donnas.
Yci a de gent moult grant masse
Conmencier vueil sanz plus d' espasse
Un sermon que je leur feray.
Se Dieu plaist aucun en trairay
A loer Dieu et son doulx nom.
Penitenciam agite, appropinquabit enim regnum celorum, Mathei IIII^o.

Adveniat regnum
tuum

Penitenciam,
etc.

Penitenciam agite.

Appropinquabit, etc.

Penitenciam agite

ille qui est benedictus Deus in secula seculorum

Amen

BARLAAM. ( Qui a écouté attentivement le sermon )
Las ! onques mais n' oy sermon
Faire, s' ay je en mains lieux esté
Qui parlast de si grant bonté
Ne de si haulte amour de fait
Com Crist a tout le monde a fait
A ce que ce seigneur ci dit ;
Et je le croy sanz contredit.
Si me vueil a l' aourer mettre
Et de touz biens mondains desmettre
Pour gangnier des cieulx l' eritage
Rendre me vois en hermittage
Et mon corps en paine asservir
Pour l' amour ce Dieu desservir
Et me faire crestienner :
A li me vueil du tout donner,
C' est mon propos.
( Il se rend en un ermitage ).

Scène 3. Le palais royal.
LE ROY. Je suis esbahiz que je n' oz
Nulles nouvelles de mon filz,
Ne puis c' on l' en mena ne fis.
Il m' en fault nouvelles avoir.
Musehault, vaz moy tost savoir
A ceulx qui de mon filz sont gardes
Conment il le fait, et si gardes
Que leur maintien et leur atour
Me saches dire a ton retour
Sanz mentir goute.
LE MESSAGIER. Mon chier seigneur, n' en aiez doubte,
Je vous promet quant revenray
A dire tresbien vous saray
De vostre filz et de ses gens
Tout le maintien, car diligens
Seray du veoir et d' enquerre.
Puis qu' il vous plaist, g' i vois bonne erre.
( Musehault se rend dans la demeure où est enfermé le fils du roi ).

Scène 4. La demeure de Josaphat.
LE MESSAGIER. ( Au premier chevalier et à son écuyer )
Mes seigneurs, noz dieu Apolo,
Tervagant, Mahon et Juno
Vous vueillent en bien maintenir
Et touz jours en joie tenir
Et en leesce.
PREMIER CHEVALIER. Musehault, bien veignes tu ! Qu' est ce ?
Dont viens ainsi ?
LE MESSAGIER. De mon seigneur le roy qui ci
M' a envoié, soiez en fis,
Savoir conment le fait son filz
Ci entre vous.
PREMIER CHEVALIER. Nous le faisons si bien que nous
Ne pensons qu' a nous solacier,
Vivre en joie, chanter, dancier :
Je te di voir.
LE MESSAGIER. De son fil, s' il vous plaist, veoir
Moult liez seroie.
PREMIER CHEVALIER. C' est de li veoir tresgrant joie,
Tant a doulx et plaisant visage,
Tant est humain, courtois et sage,
Et tu le verras sanz targier.
( Lui montrant l’enfant )
Voiz le la. De li, messagier,
Dy que te semble.
LE MESSAGIER. A mon seigneur le roy ressamble
Miex c' on ne le pourroit pourtraire
Pour ce devers la court retraire
Me vueil sanz plus faire debat :
De ceens voi assez l' estat,
Qu' est noble et grant.
L' ESCUIER. Selon que le cuer as engrant
De faire fais.
LE MESSAGIER. A Mahon vous conmant huy mais.
Sachiez d' errer ne fineray
Jusqu' a tant qu' au roy reseray,
Et ce sera a terme court.
( Il revient auprès du roi ) .

Scène 5. Le palais royal.
LE MESSAGIER. ( Au roi ) Mon seigneur, je vien de la court
Vostre enfant chier.
LE ROY. Et qu' as tu trouvé, messagier ?
Ne me mens mie.
LE MESSAGIER. Que j' ay trouvé ? toute gaudie,
Touz solaz, touz esbatemens,
Tout glay, certes pas ne vous mens ;
Et ce qui le miex m' a pleu,
C' est que j' ay vostre filz veu
En tresbon point.
( Entre le deuxième chevalier ).
DEUXIESME CHEVALIER. De maistre d' ostel n' avez point,
Sire : un nouviau vous en fault faire
Barlaam vous ne vostre affaire
Petit mais prise.
LE ROY. Ceste nouvelle ou l' as tu prise ?
Me veulz tu faire courroucier
Au plus sage et vray conseillier
Qu' entour moy aie ?
DEUXIESME CHEVALIER. Non, sire, mais c' est chose vraie
Qu' il s' en est alé es desers,
Conme hermite povre convers,
Servir des chrestiens le dieu.
Mais ne sçay pas le propre lieu
Ou est alé.
LE ROY. Or pais, ne m' en soit plus parlé.
J' en sui courrouciez vraiement.
Si en feray tant que briément
Revenra ou mal li venra.
( Au messager ) Musehault, aler te faulra,
Amis, dès maintenant bonne erre
Par les desers d' Inde la terre :
N' y laisse hermite nul que puisses
Ou ne voises, tant que tu truisses
Barlaam, et quant tu l' aras
Trouvé, de par moy li diras
Qu' il ne mette pas en delay
Que ci ne viengne, et que je l' ay
En grant desir.
LE MESSAGIER. Mon chier seigneur, vostre plaisir
Feray bonnement, c' est raison.
Je m' en vois sanz arrestoison.
A Mahom, sire, vous conmant.
( Il quitte le palais royal ).

Scène 6. Le désert de la terre de Sennar.
( Musehault s’engage sur une route ).
LE MESSAGIER. Ce chemin tenray ci devant ;
D' errer me convient bien pener
Et penser conment assener
Je pourray miex a mon chemin.
( Il s’arrête ).
En ma bouteille a de bon vin
Et j' ay grant soif ; si en buray
Ici un trait, puis m' en iray
Sanz faire assiete ne mengier.
( Il boit un coup, puis arrive à destination ).
Or suis je aise, frès et ligier
Con se venuz fusse en un char.
En la terre sui de Sennar
Ou l' en me dit que d' ermitages
A plus qu' ailleurs sur les boucages
Et sur le grant chemin conmun.
J' en voy la, ce m' est avis, un.
Je vois savoir qui y habite.
( S’avançant vers l’ermitage de Barlaam )
Mahon vous gart, biau pére hermite :
Adressiez moy.
BARLAAM. Quelle est l' adresce, amis ? De quoy
Avez mestier ?
LE MESSAGIER. Sire, un hermitte serche et quier
Qui Barlaam se fait nommer.
Avez vous point oy parler
Ou il repaire ?
BARLAAM. Et qu' avez vous a li a faire,
Mon ami chier ?
LE MESSAGIER. Vezci, sanz longuement preschier,
Sire, qui me fait ci venir.
Le roy, mon seigneur, Avennir
Vous mande (bien vous recognois :
Barlaam estes, a la vois)
Que sanz delay vous atournez
A ce qu' a sa court retournez,
Car fain a de parler a vous,
Si que, s' il vous plaist, mettons nous,
Sire, au retour.
BARLAAM. Ou nom de Dieu, mon creatour,
Puis qu' il me mande a li iray.
Alons, plus n' y sejourneray :
Devant alez.
LE MESSAGIER. Je vois, puis que vous le voulez.
( Barlaam suit le messager ).

Scène 7. Le palais royal.
LE MESSAGIER. ( A Barlaam, sur le chemin du retour )
Une chose vous demandasse
Voulentiers, se faire l' osasse,
Sire Barlaam : c' est pour quoy
Avez relenquy nostre loy
Et touz noz diex.
BARLAAM. Amis, je l' ay fait pour le miex.
Tiens, de touz voz diex ce n' est riens :
Il n' est foy que des crestiens ;
Et ce clérement te prouvasse
Se nous eussions bien espasse.
Mais je ne le te puis moustrer,
( Montrant l’entrée du palais ) Car nous sommes près pour entrer
Devant le roy.
LE MESSAGIER. C' est voir. Or vous en cessez coy.

Entrant dans le palais, et montrant au roi Barlaam qui attend sur le seuil

Pour qui trouver peine et ahan
Ay moult eu.
LE ROY. Barlaam, di : qui t' a meu
Que de toute honneur desnué
T' es pour estre en vilté mué ?
Folz, bien as perdu ton avis :
Povre es de corps, meigre de vis,
Vestu d' ort et vil garnement,
Qui soloies si richement
Vivre et vestir si nobles draps.
De toy feront enfans leurs gas
Conme d' un sot.
BARLAAM. Roys, je te respons a ce mot :
Se veulz savoir raison pour quoy,
Tes ennemis hors d' entour toy
Chace et deboute.
LE ROY. Qui sont il ? et se d' eulx as doubte,
Vueilles le dire.
BARLAAM. Sire, c' est convoitise et yre :
Ces deux l' omme pas ne despeschent,
Mais si le troublent et empeschent
Que veoir ne peut verité.
Pour ce vous requier qu' equité
Viengne en place, sire, et prudence,
Puis qu' ay de parler audience
Par vostre ottroy.
LE ROY. Soit fait con tu dis, je l' ottroy.
Dy sanz respit.
BARLAAM. Sire, les folz ont en despit
Les choses qui sont, pour un point,
Qu' il cuident qu' il ne soient point,
Et s' efforcent moult d' avoir celles
Qui ne sont pas, ainsi com s' elles
Fussent choses vraies appertes,
Ce que ne sont pas. Adecertes,
Qui la doulceur ne congnoistra
Des choses qui sont ne pourra
La verité de ceulx apprendre
Qui ne sont pas choses n' entendre,
C' est tout certain.
LE ROY. Des choses qui sont plus a plain
Me di, Barlaam, qui sont elles,
Et aussi te demant de celles
Qui pas ne sont.
BARLAAM. Sire roys, or m' entendez dont.
Tant com chascuns est en ce monde,
Il s' efforce a ce qu' il habonde
A avoir des biens temporex,
Des honneurs et deliz charnex
Qui ne sont pas biens proprement,
Car il faillent conmunement,
Et ce peut on assez savoir ;
Car quant miex les cuide homme avoir,
Lors li vient aucune aventure,
Perte d' amis ou la mort sure
Qui de ses biens le met tout hors :
Si tost com l' ame a hors du corps,
Ainsi les y fault touz laisser,
Et nientmoins pour les amasser
Par aventure s' est dampnez.
Dont ne les doit nulz homs senez
Pour choses qui soient tenir,
Puis qu' au besoing n' en peut joir.
Mais les choses, sire, qui sont,
Qui touz jours l' ome vivre font
Et maintenir de bien en miex,
Si sont croire qu' il est un Diex
Regnant tout seul en deité,
Qui par s' infinie bonté
Ordonna que son fil venroit
En terre et qu' il nous sauveroit
Et il si fist, car char humaine
Prist en vierge de grace plaine.
Se vous me demandez conment,
Je vous respon que simplement
Fu fait par le saint esperit,
Qui de Dieu nostre frére fist,
Et pour ce que si grant estoit
Le pechié qu' Adan fait avoit,
Nostre pére, quant mort la pomme,
Que digne n' estoit point pur homme
De satisfaire a Dieu le pére.
Pour ce nasqui de vierge mére
Dieu le filz, qui tant nous ama
Que l' amende pour nous paia
Quant en croiz souffri la mort sure
Par amour qui fu sanz mesure ;
C' est la foy que crestien tiennent,
C' est la voie par quoy il viennent
A cognoistre et amer les choses
Ou toutes doulceurs sont enclosez.
C' est a penser, se dit l' escript,
Aux graces que fait Jhesu Crist
Et a fait a l' umain lignage
Et a desirer l' eritage
De paradis.
LE ROY. Seuffre toy, seuffre de telz diz,
Ou tu me verras courroucier :
Car se promis au conmencier
Ne t' eusse que j' osteroie
Yre de moy, je te feroie
Ardoir en un feu maintenant.
Me vas tu ici sermonnant
De truffes ? fui de ci ; va t' en.
Que Mahon te mette en mal an !
Se jamais te voi de mes yex,
Morir te feray, par noz diex,
A grief martire.
( Barlaam s’éloigne ).
DEUXIESME CHEVALIER. Tost li avez abatu, sire,
Sa jangle. Il s' en va tout honteux,
Et s' a esté de mort doubteux
Forment aussi.
( Le roi et le deuxième chevalier sortent ) .
BARLAAM. ( Resté seul ) E ! Diex, pour quoy n' est il ainsi
Qu' il ne m' a fait morir pour toy ?
Bien feusse eureux s' en ta foy
Morusse ainsi.
( Il sort ).

ACTE II.
Scène 1. La demeure de Josaphat. Une douzaine d’années plus tard.
JOSAPHAT. ( Devenu adulte, au premier chevalier )
Sire, je sui en grant soussi
De savoir la raison pour quoy
Me fait ci mon seigneur le roy
Con se fusse reclus tenir,
Qu' aler ne puis hors ne venir,
N' onques en ma vie ne fis.
J' en sui forment, soiez en fis,
Triste de cuer, n' est pas merveille.
Si vous pri, sire, c' on le veille
A mon seigneur faire savoir
Et qu' ay perdu, si ay je voir,
Le goust de boire et de mengier ;
Et ce me peut moult dommagier
S' il n' y pourvoit.
PREMIER CHEVALIER. Et qui voulez vous qui y voit
Pour li nuncier ?
JOSAPHAT. Envoiez y vostre escuier :
Il souffira.
PREMIER CHEVALIER. Sire, tout maintenant ira.
( A son écuyer ) Escuier, entens ça a moy.
Va t' en a mon seigneur le roy
Et li dy que son filz hors mettre
Fault de ci, ou il ne peut estre
Guères en vie.
L' ESCUIER. Sire, de faire ay grant envie
Vostre plaisir. G' i vois en l' eure
Et si n' y feray pas demeure.
( L’écuyer se rend auprès du roi ).

Scène 2. Le palais royal.
L’ESCUIER. ( Au roi ) Mon seigneur, Mahon vous doint joie.
Vostre filz, sire, a vous m' envoie :
Il chiet d' anuy en tel dangier
Qu' il pert le boire et le mangier :
Ou partir du chastel li fault
Et cueillir air, ou sanz deffault
Ne vivra pas.
LE ROY. ( Au deuxième chevalier ) Alez le querre isnel le pas.
Ses gens et li tout m' amenez
Et compagnie li tenez,
Je vous en pri.
DEUXIESME CHEVALIER. Sire, voulentiers sanz detri.
( A l’écuyer ) Escuier, alons men, alons.
( Ils se rendent auprès de Josaphat ).

Scène 3. La demeure de Josaphat.
LE DEUXIEME CHEVALIER. ( A Josaphat )
Chier sire, querre vous venons.
Partez de ci et voz gens touz.
Mon seigneur le roy veult que vous
Parmy sa terre chevauchiez
Et esbatez et solaciez :
Venez vous ent.
PREMIER CHEVALIER. Il a droit, que trop longuement
A ci esté.
JOSAPHAT. Certes, vous dites verité ;
A mon corps en est pis d' assez
Or avant, devant moy passez :
Je vous suivray.
L' ESCUIER. Tout devant le premier iray,
C' est de raison.
( Josaphat et les deux chevaliers suivent l’écuyer ).

Scène 4. Sur le chemin du palais royal.
( Un lépreux, agitant sa cliquette, vient demander l’aumône à Josaphat ).
LE MESEL. Je voy venir de gent foison :
Mes cliquettes me fault hochier.
Vostre aumosne, mon seigneur chier,
A ce malade.
JOSAPHAT. Tant est, seigneurs, laide et mausade
Celle chose que je la voy
Qu' esbahiz en suis touz par foy.
Quelle chose est ce ?
DEUXIESME CHEVALIER. C' est un homme que moult apresse,
Sire, mal de mesellerie,
Qui sur toutes est maladie
Moult reprouvée.
JOSAPHAT. Puis qu' elle est en homme trouvée,
L' a donc chascun ?
PREMIER CHEVALIER. Nanil, sire, pas de cent un.
S' en chascun tel mal se feroit
Ou autre damage, seroit
Trop malement.
JOSAPHAT. Donc congnoist on ceulx plainement
Qui tel mal ont a soustenir,
Ou viennent il sanz diffinir ?
Dites me voir.
DEUXIESME CHEVALIER. Sire, il n' est homme qui savoir
Puist les choses qui sont a estre,
Ne lay ne clerc, tant soit grant maistre
Ne bien lettré.
( Un homme très âgé, appuyé sur son bâton, vient à
son our demander l’aumône à Josaphat ).
UN VIEL HOMME. E ! Mahom, je croy je n' istré
Jamais nul jour de ceste paine.
Viellesce a feiblece me maine ;
Ne puis mais aler sanz baston
Sire, donnez m' un petit don,
Maille ou denier.
JOSAPHAT. Seigneurs, cest homme merveillier
Me fait plus que l' autre devant.
A paine peut aler avant.
Biau preudon, dire me vueillez
A droit : qu' est ce que babillez ?
Point ne l' entens.
UN VIEL HOMME. Mon doulx seigneur, la main vous tens.
Donnez m' aucune chose, sire.
Autrement ne le vous puis dire,
Que trop sui viex.
JOSAPHAT. Je ne sçay qu' il dit, par noz diex.
Laissons, alons men sanz detri,
Et si me dites, doulx ami,
Pour quoy tielx est.
PREMIER CHEVALIER. Ce qui en cest estat le met,
C' est qu' il a moult d' ans qu' il fu nez,
Car a tel estat destinez
Sont vielles gens.
JOSAPHAT. Et quelle est la fin ? Diligens
Sui du savoir.
PREMIER CHEVALIER. La fin, sire, c' est la mort, voir,
A quoy on vient.
JOSAPHAT. Or demande je s' il convient
Les uns morir, les autres non.
Respondez m' a ceste raison
Ce qu' en savez.
DEUXIESME CHEVALIER. Sire, ce point savoir devez :
Touz fault morir.
JOSAPHAT. Et dedans quans ans peut venir
La mort a homme ?
DEUXIESME CHEVALIER. Certes quant homme vit la somme
De quatre vins ans, dire l' ose,
Ou de cent au plus, c' est grant chose.
Lors de viellesce est ou conduit,
De la quelle la mort s' ensuit
Tantost après.
( Ils arrivent au palais royal )

Scène 5. Le palais royal.
PREMIER CHEVALIER. ( Montrant le roi )
Du roy mon seigneur sommes près.
Je le voy la. A li alons
Touz ensemble, et le saluons
Con devons faire.
JOSAPHAT. En ce ne pouons nous meffaire ;
Saluer le vueil le premier.
( S’avançant vers le roi ) Mahon, mon pére et seigneur chier,
Soit de vous garde.
LE ROY. Filz, bien vegniez. Quant vous regarde,
Je suis touz liez, car il m' est vis
A la couleur de vostre vis
Qu' estes tout sain.
JOSAPHAT. Mon seigneur, sachiez de certain
Qu' en moy point de filz n' eussiez
Briément se vous me feissiez
La tenir encore un petit.
J' ay perdu tout mon appetit:
Puis deux mois, c' est merveille grande,
N' ay trouvé saveur en viande
Qu' aie mengié.
LE ROY. Biau sire, et je vous doin congié
D' aler esbatre ou vous voulrez.
( Désignant un domicile attenant ) Cel hostel la pour vous prenrez,
Car je le vueil.
JOSAPHAT. Sire, je feray vostre vueil.
Tout maintenant donques iray,
Puis qu' il vous plaist, et y feray
Mon tinel estre.
( Josaphat se rend avec sa suite dans le logis désigné ).

Scène 6. Le logis de Josaphat.
PREMIER CHEVALIER. Sire, ne vous pouez miex mettre :
Je scé bien de pieça l' ostel.
Regardez ; vezci un lieu bel
Ou riens ne fault.
JOSAPHAT. ( A l’écuyer et au premier chevalier )
Voir est : ici seoir me fault ;
( S’étant assis ) Et si vueil que vous deux issiez
De ci et que vous m' i laissiez
Seul une piéce.
L' ESCUIER. A chose nulle qui vous siesce,
Sire, ne contredirons pas.
Alons nous ent isnel le pas
De ci endroit.
PREMIER CHEVALIER. Alons, tu diz bien et as droit ;
Je le t' acors.
( Le premier chevalier et l’écuyer sortent ).
JOSAPHAT. ( Resté seul ) En moy ay touz jours se remors
Que vivre ne puis sans viellesce,
Dont je suis moult esbahiz qu' est ce
De vie d' omme : c' est un nient,
Car com plus vit plus viex devient,
Plus vit et plus pert senz et force
Et plus la mort sur lui s' efforce.
Après la mort que devient il ?
Je ne sçay. Hé ! s' aucun soubtil
Peusse trouver ne savoir
Qui m' en sceust dire le voir,
Moult me feust bel.

ACTE III.
Scène 1. Le Paradis.
DIEU. A l’archange Gabriel ) Entens ça a moy, Gabriel,
A Barlaam de ci t' en vas
Et li diz qu' il ne laisse pas
Qu' au fil d' Avennir roy ne viengne
Et qu' il li monstre et li enseigne
Conment aux biens celestiens
Maine la foy des chrestiens
Et quelle elle est. Or vas bonne erre.
Es desers de Sennar la terre
Demeure et est.
GABRIEL. D' obeir a vous sui tout prest,
Pére des cieulx, c' est bien raison.
Pour c' y vois sanz arrestoison.
( Il se rend auprès de Barlaam ).

Scène 2. L’ermitage de Barlaam dans le désert de Sennar.
GABRIEL. Amis Barlaam, entens moy.
A Josaphat le filz du roy
T’en vas. Dieu veult que li denonces
La foy crestienne et prononces
Comment de la vierge nasqui
Homme qui est Diex, voire, et qui
Toute chose forma de nient
Sanz lequel croire nul ne vient
Aux grans joies de paradis.
Or vas et si li monstre et dis :
Dieu le te mande.
( Gabriel se retire au Paradis ).
BARLAAM. Loée en soit sa bonté grande !
Puis qu' il li plaist en l' eure iray,
Mais cest habit ci changeray
Et prendray de marchant l' abit.
( Il enfile un habit de marchand ).
C' est fait. ( Priant ) Vraiz Diex, a mon labit
Et a ma paine regardez
Con vostre, sire, et me gardez
De mal dire et de mal penser.
( Il quitte son ermitage ).

Scène 3. Sur la route du logis de Josaphat.
BARLAAM. ( Rencontrant l’écuyer )
Amis, vueillez moy assenser
De ce que je vous vueil enquerre.
Marchant sui, qui ay une pierre
A vendre precieuse et fine,
Qui les avugles enlumine,
Qui fait oir les non oyans
Et fait parler les non parlans,
Et qui aux folz donne sagesce.
Conment peusse avoir adresce
A ce qu' au filz du roy parlasse
Et que ma pierre li moutrasse ?
Dites le moy.
L' ESCUIER. Un sage homme sembles par foy,
Amis, qui te voit ou visage ;
Mais tu es folz en ton langage :
Onques pierre n' ot tel puissance.
J' ay bien en pierres congnoissance :
Or la me moustres, je t' en pri,
Et s' elle est telle, sanz detri
Je feray qu' a li parleras
Et qu' a grant honneur en venras :
De ce ne doubte.
BARLAAM. Ma pierre est, amis, or escoute,
Telle, se saches de certain,
Que personne qui n' a l' ueil sain
Et entiére chaasté ne garde,
S' il vient a ce qu' il la regarde,
Sa veue pert ysnel le pas.
Et je voy que sains yex n' as pas :
Pour ce la te vueil escondire.
Mais j' ay bien pour voir oy dire
Que tresbiaux yex, sains et nez, porte
Le filz du roy, et n' est pas morte
En li chasté.
L' ESCUIER. Puis qu' elle est telle en verité,
Je ne quier point c' on la me moustre,
Car ma chasteé est passée oultre
Et si n' ay mie bien sains yex.
Mais or entens ci pour ton miex.
Devant mon seigneur te menray
Maintenant, et si li diray
Ton fait.
( Ils sont arrivés devant le logis de Josaphat ).

Scène 4. Le logis de Josaphat
L’ESCUIER. ( Entrant dans le logis et s’avançant vers Josaphat )
Mon chier seigneur, vezci
Un marchant qui, seue mercy,
Vous apporte une telle pierre
Que je cuide qu' en nulle terre,
A ce qu' il dit, n' ait la pareille.
C' est noble chose et grant merveille
De ses vertuz.
JOSAPHAT. ( Allant au-devant de Barlaam )
Amis, bien soiez vous venuz.
De vostre venue ay grant joie.
Pourroit il estre que je voie
Celle pierre que vous avez ?
Je vueil qu' enprès moy vous seez :
Venez avant.
( Il fait avancer et s’asseoir auprès de lui Barlaam ).
BARLAAM. Chier sire, honneur me faites grant,
Que n' avez pas ma petitesse
Regardé, mais a la largesse
De vostre grant beninité,
Et c' est bien fait en verité.
Se de ma pierre demandez,
Vezci que j' en dy : entendez.
Il est voir q' un Dieu fist ce monde
Et toute riens qui y habonde
Et l' omme fist a sa samblance,
Auquel segnourie et poissance
Il donna sur toute autre chose,
Et sanz ce que je riens vous glose
Mais que die selon la lettre,
Le mist en paradis terrestre.
La li furent habandonné
Touz les fruiz, et congié donné
De mengier en, fors d' un : helas !
Ce conmant trespassa li las,
Qu' il crut au conseil de sa femme,
Dont il chey en tel diffame
Que se gousté n' en eust point,
De mort n' eust esté ja point,
Mais pour ytant qu' il en gousta,
Dieu de ce lieu hors le bouta :
Un temps pot puis vivre et durer,
Mais mort li convint endurer,
Et par lui nous y fault touz courre :
N' est nul, non, qui s' en puist rescourre.
Mais Diex qui en sa deité
A de personnes trinité
Voiant conment en son servage
Sathan tenoit humain lignage
Et qu' en enfer touz descendoient
A la value qu' il mouroient,
Son fil en terre nous tramist,
Qui en une vierge se mist
Et la prist nostre humanité,
Et de la tresgrant charité
Qu' il ot a nous si s' enyvra
Que d' enfer il nous delivra
Et fist nostre redempcion ;
Par la benoite passion
Que Juifs li firent souffrir,
A quoy de gré se voult offrir,
Com vrais homs qu' il fu et vraiz Diex.
Et afin que l' entendez miex
Pur homme ne pouoit de fait
Amender a Dieu le meffait
Qu' avoit fait l' omme premerain,
Car tuit tenoient du levain
Du pechié de leur premier pére
Et ici vueil qu' il vous appére
Qu' ange n' y estoit point tenuz,
Car homme n' estoit pas venuz
D' ange, ne n' avoit sa nature,
Dont selon raison et droiture
Homme avoit de deux mors la somme
Jusqu' a tant que Diex devint homme,
Qui de tout ce l' omme acquitta
En quoy par delit s' endebta
Quant mort la pomme.
JOSAPHAT. Un point vous demant ci, preudomme :
Puis qu' il estoit vray Diex, conment
Senti il peine ne tourment
Ne souffry mort ?
BARLAAM. J' ay dit devant en mon recort
Qu' en ly deux natures avoit,
De quoy l' une divine estoit :
Ceste ne senti point de peine,
Mais seulement nature humaine
La mort endura et senti,
Qui la mort a mort abati.
Et combien qu' en li habita
La mort, il se resuscita
Par la vertu de sa nature
Divine, qui dura et dure
Sanz fin et sanz conmencement ;
Et si tenez certainement
Qu' en la fin un tel jour sera
Que conme homme et Dieu il venra
Les bons et les mauvais jugier,
Les maux fera sanz fin vengier,
Et aux bons donrra sanz fin gloire.
A ce devroient penser voire
Les folz qui aux ydoles servent,
Qui rien fors enfer ne desservent.
Folz sont il voir et plain de rage,
Qui aourent leur propre ouvrage
Et ce que de leurs mains ont fait,
Et puis les appellent de fait
Leurs dieux, qui les sauve et les garde,
Et eulx mesmes sont des diex garde ;
C' est bien fantosme et desverie.
Sire, aussi ne me taiz je mie
De ceulx qui tant aiment ce monde,
En qui toute malice habonde.
Il ressemblent, ce m' est avis,
Un homme qui ot trois amis.
Le premier ama plus que soy ;
Au second avoit telle foy
Qu' autant con soy meisme l' amoit ;
Le tiers le moins amé clamoit.
Or avint que devant le roy
Fu semons pour aucun desroy :
A son grant ami fuit bonne erre
Pour aide et conseil requerre
En li monstrant conment touz jours
L' ot amé. Cil a briez moz cours
Li dit : Je ne te cognois point ;
Mais puis que tu es en tel point,
Se mestier est, de moy aras
Deux linsieux dont te couvreras.
Quant l' ot, de li, mat et confus,
Se part, s' est au second venuz
Et le pria con le premier.
L' autre dist : Merler ne m' en quier,
Mais tant feray je bien pour toy :
Jusqu' a l' uis du palais le roy
Voulentiers te convoieray
Et puis tantost m' en revenray.
Quant ces moz li a oi dire,
De li se part a cuer plain d' ire,
Et aussi qu' en desesperance
D' aler au tiers ami s' avance.
Quant devant li vint, si baissa
La chiére et cheoir se laissa,
Et li dist : A toy parler n' ose,
Car ne t' ay pas, c' est vraie chose,
Amé con deusse avoir fait ;
Toutes voies je sui de fait
Maintenant en grant triboul mis,
Et si ay a touz mes amis
Failli : pour Dieu, ne me faux pas.
Cil li respont isnel le pas :
Voir, treschier ami te repute ;
Or ne doubte nul qui t' empute,
Car devant le roy m' en iray
Pour toy et te delivreray.
Ce premier ami, sire, qu' est ce ?
C' est possession de richesce
Que li mondain a grant labour
Assemblent de nuit et de jour,
Et a tant de periz s' esperdent ;
Et quant de ce siecle departent,
Ne sont leurs corps las ne leurs piaux
Couvers fors des plus viez drapiaux :
Si a povre tresor, emy !
Et après le second amy
Femme et enfans et parens sont
Qui jusques a la fosse vont
Ou le mort enterrent et bournent
Et puis arriére s' en retournent.
Mais le tiers est pour verité
Foy, esperance et charité,
Aumosne qui les pechiez cuevre
Et estaint, et toute bonne euvre
Que nous pouons ci aval faire,
Par quoy nous pouons a Dieu plaire,
Qui gracieux a Dieu nous livrent
Et des ennemis nous delivrent
Que nous avons.
JOSAPHAT. Mon chier ami, par voz raisons
Congnois du monde le deffaut
Et voy que touz morir nous fault
Et ne savons quant ne conment ;
Après je voy tout clérement,
Combien que ne soie pas viex,
Que ce n' est rien que de noz diex.
Dès ci les reni pour venir
A la foy que vous voy tenir.
Sachiez qu' avec vous m' en iray :
Pére et honneurs, tout laisseray
Pour Dieu servir.
BARLAAM. S' ainsi vous voulez asservir
A Dieu, vous ressemblerez, sire,
Un jouvencel dont vous vueil dire,
A qui on voult femme espouser,
Et celui pour la refuser
S' en fouy : cure n' en avoit ;
Et tant ala qu' en un lieu voit
La fille d' un povre homme orant,
Et en Dieu loant labourant ;
Si li dist : Que faites vous, dame ?
Je vous voy une povre femme
Et Dieu loez aussi de fait
Con se riche vous eust fait.
Celle respont, qui fu benigne :
Si com petite medicine
Souvent de grant douleur delivre,
Aussi di je tout a delivre
Graces des petiz dons c' on rent
Causent fait et vouloir souvent
De grans dons faire, sire ; et oultre
Grans choses de Dieu, ce vous moustre,
Ay pris et receu de fait
Conment a s' ymage m' a fait,
Et entendement et memoire
M' a donné, voire, et a sa gloire
M' a appellé, et ouvert l' uis
De son paradis, ou je puis
Entrer, se n' est pour mon deffaut.
Donques bien loer le me fault
Pour tiex biens ; raison y ay belle.
Cil qui vit sage la pucelle
La demanda par mariage.
Son pére li dit, qui fu sage :
Ne la peuz avoir, biaux amis ;
En trop bas lieu veux estre mis ;
Tu es de nobles gens estraiz,
Et je suis en povreté traiz.
Le jouvencel dist : Ne m' en chaille ;
S' il vous plaist, ma femme ert sanz faille.
Le povre homme dist : Amis, taiz te.
Je n' en ay plus : que m' en desmette
Et qu' entre tes mains l' en enmaines ?
Nanil, se sont paroles vaines.
Le jouvencel dist : Se je l' ay,
Sire, avecques vous demourray,
Et menray la vie et l' estat
De vous, sanz faire nul debat.
Le preudomme a ce s' assenti ;
Et cil tantost se desveti
De ses garnemens precieux :
Jus les jetta, s' en print uns vieux,
La fille espousa, ce me semble.
Ainsi demourérent ensemble
Eulz trois une piéce de temps
En paiz, sanz noise et sanz contens.
Quant son gendre ot bien esprouvé
Le preudomme, et il ot trouvé
Qu' il li fu loyal et certain,
Qu' avint il ? Un jour par la main
Le prist, en sa chambre le maine
Qui ne fu mie trop vilaine.
La li moustra de l' avoir tant
Qu' onques veu n' en ot autant.
Et quant ot veu tout a tour,
Ains que de la feist retour,
Le preudomme par bonne entente
Tout li donne et tout li presente
Beninement.
JOSAPHAT. Pére, je congnois clérement
Que ceci avez dit pour moy.
Mais dites moy par vostre foy,
Quans ans pensez vous bien avoir
Et ou demourez ? Du savoir
Ay grant desir.
BARLAAM. Sire, quant vous vient a plaisir,
J' ay d' aage quarante cinc ans
Et suis es desers habitans
De la terre de Sannar ditte :
La demeure je et habitte
En hermitage.
JOSAPHAT. Pére, il semble a vostre visage
Que soixante dix ans passez
Avez d' aage et plus assez,
En verité.
BARLAAM. Se vous de ma nativité
Voulez touz les ans compter, sire,
Vous pourrez bien verité dire ;
Mais de compter n' ay pas envie
En la mesure de ma vie
Les ans qu' au monde ay despendu
Et en vanitez espandu,
Car mors estoie en l' ame lors,
Et on ne doit pas les ans mors
Dire ans de vie.
JOSAPHAT. Je n' ay de riens si grant envie,
Pére, ce vous di en appert,
Conme d' avec vous en desert
Aler manoir.
BARLAAM. Sire, je vous fas assavoir,
Se si chaudement y venez,
La compagnie, ce tenez,
De nous deux ne durera point ;
Et avec ce vous di ce point :
Cause seray et mocion
De faire persecucion
A mes fréres, si ques, pour Dieu,
Demourez, sire, en vostre lieu
Jusques a tant que vous verrez
Temps que miex venir y pourrez.
Je vous ay monstré nostre foy.
Or la gardez et baisez moy,
Si m' en iray.
JOSAPHAT. Sire, voulentiers le feray,
Bien la m' avez sceu preschier.
( L’ayant embrassé ) Dieu le vous rende, pére chier.
Certes voulentiers m' en alasse
Avec vous, se je ne doubtasse
Ce qu' avez dit.
BARLAAM. ( Faisant le signe de la croix et la bénédiction )
Chier sire, du saint esperit,
De Dieu le pére et Dieu le filz
Soiez seigniez et beneiz.
A Dieu ! pour le miex vous ay dit.
Attendez encore un petit :
Si vauldra miex.
( Barlaam sort. Entre le premier chevalier ).
PREMIER CHEVALIER. Sire, noble estes et gentiex :
Quant ferez aux diex sacrefice ?
Ne devez pas conme homme nice
Vivre sanz foy.
JOSAPHAT. Non fas je voir : amis, tais toy.
De tes diex ne me parles plus.
Ou filz de la vierge, Jhesus,
Croy fermement.
PREMIER CHEVALIER. Sire, si creez folement ;
Quant vostre pére le sara,
Bien scé qu' il s' en courroucera.
Ceste creance delaissez
Et a nostre loy vous plaissez,
Qu' il ne vous hache.
JOSAPHAT. Certes, je vueil bien qu' il le sache.
Mais a la court vas, je t' en pri,
Et li denonces sanz detri
Hardiement.
PREMIER CHEVALIER. Puis qu' il vous plaist, hardiement,
Sire, maintenant li vois dire.
( Il se rend auprès du roi ).

ACTE IV.
Scène 1. Le palais royal.
PREMIER CHEVALIER. ( Au roi ) Nous sommes honniz, treschier sire :
Vostre filz s' est mis a la foy
Des crestiens, et nostre loy
Laisse et despise.
LE ROY. Haro ! conment ? dy m' en la guise.
Qui m' a ce fait ?
PREMIER CHEVALIER. Sire, a li est venuz de fait
Un hermite nommé Barlaam,
Que Mahon mette huy en mal an,
Qui tellement l' a atourné
Qu' a la loy du tout l' a tourné
Des crestiens.
LE ROY. Se je le tien en mes liens,
Par Mahom, chier li venderay.
Las ! je ne say que je feray,
Tant ay courrouz.
ARACHIS. Sire, sire, confortez vous :
Je vous diray m' entencion.
Je scé de nostre nascion
Un hermite qui, ce me semble,
En touz cas Barlaam ressemble.
Se vous voulez, querre l' iray
Et com prisonnier l' amenray,
Et il Barlaam se nommera,
Et après un jour pris sera
De faire a li deputoison
Des deux loys, et il par raison
La foy crestienne au premier
Soustendra, et au derrenier
Se laira vaincre en rappellant
Tout ce qu' il avoit par avant
Enseigné. Ainsi vostre filz
Revenra a vous, j' en sui fis,
Voire a merci.
LE ROY. Par Mahon, c' est bien dit qu' ainsi,
Arachis, avancez ceste euvre
Par quoy mon filz briément recuevre
Qui perduz est.
ARACHIS. Sire, a vostre vouloir sui prest.
Je le vois querre.
( Arachis sort ).
LE ROY. Certes, le cuer de dueil me serre
Quant mon filz m' a en tel despit
Qu' il laisse ma loy. Sanz respit
Vois a li parler.
( Il se rend auprès de son fils ).

Scène 2. Le logis de Josaphat.
Le ROY. ( Entrant ) Biau filz, qu' est ce ?
Pour quoy m' as mis en tel tristesce
Que ma viellesce deshonneures,
Que noz diex laisses et aeures
Un dieu estrange ?
JOSAPHAT. Pére, j' ay fait un noble change :
J' ay fui tenébres, c' est voir,
Pour la vraie lumiére avoir,
Et l' erreur par quoy j' ay mespris
Ay laissié, s' ay verité pris.
Ne vous traveilliez pas en vain,
Car nient plus que de vostre main
Ne pouez le ciel atouchier
Ne la mer aussi asseichier,
Ne me pourrez vous rappeller
De Crist servir, a brief parler,
Com crestien.
LE ROY. E ! las chetiz, or voy je bien
Que pour les biens que je t' ay fait
Je sui cause de ce meffait ;
Car je t' ay plus fait, j' en sui fiz,
C' onques pére ne fist a filz :
Et pour ce conme hors du sens,
Plain d' orgueil, a faire t' assens
De ma voulenté le contraire.
Ce point me sceurent bien retraire
Les astrologiens senez.
Qui me dirent quant tu fuz nez
Que plain seroies d' arrogance
Et aussi d' inobedience.
Je treuve bien qu' il dirent voir.
Mais certes je te fas savoir
Qu' a honte de moy partiras
Ou tu ma voulenté feras ;
Et se ton ennemi me fais,
De peine te donray tel fais
Qu' onques tel n' ot homme par mi,
Tant ait esté mon ennemi
Et mal vueillant.
JOSAPHAT. Pére, trop me vois merveillant
Que de mon bien vous adolez.
Je tien que pére est afolez
Qui du bien son fil se courrouce.
Se vostre cuer de mon bien grouce
Ne que vous me faciez contraire,
En sus de vous me verrez traire
Et conme un serpent vous fuiray,
Ne pére ne vous nommeray
Certes jamais.
LE ROY. Ore souffrir me fault hui mais.
Je m' en vois ; tu t' aviseras,
Et je croy que grant sen feras
D' obeir moy.
( Entre Arachis que l’on vient de voir indiquer
par un geste à Nachor qui l’accompagnait une
salle voisine où se tenir dans le palais ).
ARACHIS. Bien vous debatez, sire roy,
Sanz raison : l' enfant est novice ;
S' il a mespris par aucun vice,
Il s' en gardera conme sage.
Nouvelles : Barlaam est en cage.
Tant l' ay quis que je l' ay trouvé.
Il m' a assez peine donné,
Je vous promet.
LE ROY. Alons men ; puis qu' en prison est,
Je li feray honte et annuy
Ains qu' il soit mais tel jour conme huy,
Par ces deux yex.
( Le roi et Arachis sortent ).
JOSAPHAT. ( Resté seul ) Ha ! doulx Jhesus, sire, vray Diex,
Bien m' est sourse douleur amére,
Quant prison est Barlaam mon pére,
Mon pére voire vraiement
Quant est de m' ame au sauvement.
Or n' ay je plus d' amis au monde,
Si est bien droiz que mon cuer fonde
En pleurs, en soupirs et en plains.
Ha ! Barlaam, pour vous sui plains
De dueil et d' ire.

Scène 3. Le Paradis.
DIEU. Gabriel, a Josaphat dire
Vas qu' il laisse son dueil ester
Et que Barlaam sanz doubter
N' est emprisonnez ne pris, non,
Mais c' est un qui Nachor a nom,
Qui li ressemble.
GABRIEL. Vray Dieu, sire, et vray homme ensemble,
Dire li vois ysnel le pas.
( Il se rend auprès de Josaphat )

Scène 4. Le logis de Josaphat.
GABRIEL. ( Entrant, à Josaphat seul ) Amis, ne te courrouce pas
Pour Barlaam, car anuncier
Te vien qu' il n' est pas prisonnier
Ne tenuz de ton pére encor,
Ains est un qui a nom Nachor.
Fay bonne chiére.
( Gabriel remonte au Paradis ) .
JOSAPHAT. Ha ! Dieu, la vostre merci chiére
Quant n' est pas pris !

Scène 5. Le palais royal.
LE ROY. Arachis, j' ay le cuer espris
De dueil pour mon filz : n' est merveille,
Car il dit que vueille ou ne veille
Crestien sera.
ARACHIS. Ce qui plus, sire, le fera
Faire vo vouloir plainement,
C' est : parlez a li doulcement ;
Car lait parler chace et retrait
L' enfant, mais doulx parler l' attrait
S' autrement ne se veult donter,
Prenez un jour de desputer
De nostre loy encontre celle
Qu' il tient pour meilleur et plus belle.
Et si li dites qu' il ara
Barlaam que tenez, qui sera
De sa partie.
LE ROY. Arachis, j' ay grant aatie
D' ouvrer selon vostre conseil.
Pour ce devers li raler vueil.
( Ils se rendent au logis de Josaphat ).

Scène 6. Le logis de Josaphat.
LE ROY. ( Entrant, à son fils ) Biau filz, acole moy et baise,
Oncques sanz toy je ne fu aise,
Grant joie pren en ta jonesce :
Portes honneur a ma viellesce,
Car touz jours seult honneur venir
A l' enfant qui se veult tenir
Obediant et doubtant pére,
Et qui ne l' est si le compére,
Car mal en vient.
JOSAPHAT. Pére, il est un temps qu' il convient
Amer, en autre fault hair,
Temps de paiz et temps d' envair,
C' est a dire temps de bataille,
Si que je ne doy point, sanz faille,
Tant estre a vous obeissant
Que pour vous soie Dieu laissant
Par qui sui nez.
LE ROY. Puis que tu es si obstinez
Que desobeissant te voy,
Soions d' acort et moy et toy
De faire une deputoison
De noz loys : ce n' est que raison.
Ton maistre Barlaam tien pris,
Qui t' a ceste creance apris :
Devers toy et pour toy l' aras,
Et des autres qui que voulras ;
Et je pour nostre loy deffendre
Volray de noz clers aussi prendre.
( Il montre les deux astrologues qui l’accompagnent ).
S' a Barlaam en vient le miex,
Je lairay pour ta loy noz diex ;
Et s' il est vincu tu larras
Ta creance et si revenras
A nostre loy.
Certes, pére, je m' y ottroy,
Mais que Barlaam me bailliez.
De l' oir faire sui touz liez :
Avant ! soit faitte.
LE ROY. Si sera elle et tost parfaitte,
Car j' ay ausi, si com je pense,
Les clers touz prez a ma despense
Pour desputer.
JOSAPHAT. Alons men donc sanz rioter,
Je vous en pri.
LE ROY. Alons. Arachis, sanz detri,
Alez tost et si m' amenez
Barlaam qu' en prison tenez,
Il a ja je ne scé combien,
Et si faites vous savez bien
Que je vueil dire.
ARACHIS. Vous dites voir :se fas mon, sire.
G' y vois.
( Il se rend auprès de Nachor )

Scène 7. Le palais royal.
ARACHIS. ( Entrant, à Nachor ) Nachor, biau doulx amis,
Querre vous vien pour estre mis
En grant honneur se vous voulez.
Devant le roy vous en venez
Et dites que Barlaam estes
L' ermitte ; ileucques fort vous faittes
Conme crestien de tenir
Leur foy et de la soustenir ;
Et un po en desputerez,
Mais assez tost vous vous lairez
Vaincre des gens de nostre loy :
Par ce rarons le filz du roy,
Qu' est crestien.
NACHOR. Certes je le vous feray bien.
Arachis : a po de langage,
Je scé de leur loy tout l' usage.
Alons bonne erre.
( Ils se rendent au logis de Josaphat ).

Scène 8. Le logis de Josaphat.
ARACHIS. ( Montrant Nachor qui le suit )
Vezci Barlaam que vien de querre,
Mon seigneur chier.
LE ROY. Biau filz, pour tantost despeschier,
Vezci Barlaam que vous livre.
Or die et deffende a delivre
La loy d' entre vous crestiens :
Ja ne li mefferay en riens,
Soit en seur.
JOSAPHAT. Sire, ce soit en bon eur.
Baarlaam, or entens a moy.
Tu scés conment je suis par toy
En la foy de Crist entroduit.
Je ne scé qu' a faire on t' a duit,
Mais se la soustiens et deffens,
Je te dy que c' est mes assens
De finer crestien ma vie,
Qui qu' en ait engaigne n' envie ;
Se tu te laisses surmonter,
Je te promet a brief compter
La vilenie que j' aray
En l' eure sur toy vengeray,
Car la langue te trairay hors
De la gueule et le cuer du corps,
Et aux chiens mengier les donray :
Ainsi aux autres mousterray
Conment se devront entremettre
De fil de roy en erreur mettre
Ne decevoir.
NACHOR. Sire, j' en feray mon devoir ;
Ne vous esmouvez point en ire.
Sire roys, que voulez vous dire
Contre crestiens ?
LE ROY. Avant, seigneurs, avant ; je tiens
Que cesser li ferez sa jangle.
Mettez le me tost math en l' angle ;
Parlez a li.
PREMIER ASTROLOGIEN. Barlaam, tu es seul celui
Qui as trahi le filz du roy,
Et d' erreur l' as mis en arroy.
Pour quoy l' as fait ?
NACHOR. Barlaam sui je, qui de fait
Ay le filz du roy hors osté
D' erreur et non mie bouté
En erreur, non.
PREMIER ASTROLOGIEN. Respons moy a ceste raison.
Puis que les roys et les grans hommes
Et les sages plus que ne sommes
Noz diex croient et les honneurent
Et conme vrays diex les aeurent,
Conment es tu si hors du sens
Que tu oses ne te consens
A faire encontre ?
NACHOR. Or entendez ci. Je vous monstre
Que Grieux et les Caldeiens
Et aussi les Egipciens
Par erreur et contre droiture
Ont fait leurs dieux de creature.
Li Caldeien le premier
Tiennent et croient, sire chier,
Des elemens que ce sont dieux
Pour ytant qu' ilz voient as yeux
Qu' au prouffit des hommes sont fait,
Et toute voie de leur fait
Vient souvent a corrupcion
Homme et a mainte passion.
Après je vous monstre des Grieux
Que de faulx hommes ont fait diex,
Con fu Saturne qui menga
Ses enfans et si se trencha
Les genitailles et en mer
Les jetta ; ce fu fait amer.
Puis ont volu en escript mettre
Jupiter le roy des diex estre,
Et toutes voies dient il
Que souvent par son art soubtil
Se transfourma en une beste
Pour pechié faire deshonneste,
Que nous appellons advoultire.
Des Egipciens vous vueil dire
Qu' il ont les bestes adouré
Conme leurs dieux et honnouré.
Les uns aouré ont pourciaux,
Les uns viaux, les autres aigniaux
Si que je di touz ceulx ci sont
En erreur et contre Dieu font,
Contre raison et droit escript.
Mais li crestien dit de Crist,
Qui le fil du treshault aeurent,
En erreur mie ne labeurent,
Car il aourent le vray Dieu
Qui par puissance est en tout lieu,
Qui de la destre Dieu le pére
Descendi en la vierge mére
Ou fist merveille, ce me semble,
Car Dieu et limon joint ensemble
Et la divine majesté
Conjoint a nostre enfermeté,
Et li qui estoit infiniz
Qui par pechié nous vit finiz
Se voult tant par amour aherdre
A nous que, sanz ce qu' estoit perdre,
Voult estre homme que n' estoit mie,
Et a nous mors redonna vie
Sa dine mort.
DEUXIESME ASTROLOGIEN. Tu argues malement fort.
Or me di ce que vueil enquerre :
Se cestui filz qui vint en terre
Fust vraiz Diex, com tu fais acroyre,
Avecques Dieu son pére en gloire,
Di moy conment morir peust ;
Ou si fu vrais homs qui eust
Souffert mort, com je t' oy compter,
Conment pot il mort surmonter ?
Car homs mortel resusciter
Ne peut, ne Diex mort endurer,
Ne Diex et homme, se me semble,
Ne pot il oncques estre ensemble :
Je ne scé conment dire l' oses,
Car ce sont deux contraires choses,
Chascun le voit.
NACHOR. De truffes parlés qui vous oit,
Car je vous ay par ma doctrine
Monstré qu' a nature divine
Fu nature humaine adjoustée
Sanz estre point en char muée
Ne la char en divinité,
Et parmi celle humanité
Que Dieu, qui estoit invisibles,
Prist se fist il a nous visibles,
Et par sa mort nature humaine
Sauva, et peine osta par paine.
Et combien qu' a la mort s' offri,
La deité rien ne souffri,
Nanil, mais elle mist a mort
Mort quant il surreci de mort
En corps humain.
LE ROY. Ho ! je deffens jusqu' a demain,
Seigneurs, ceste deputoison.
Il est d' aler diner saison :
Laissiez ce plait.
JOSAPHAT. Pére, puis qu' estre ainsi vous plait,
Je vous requier donques que j' aie
Mon maistre hui mais en ma mennaie
Pour avoir avec li conseil,
Et vous voz maistres, bien le veil ;
Ou se mon maistre retenez
Que voz clercs huy mais me donnez.
A l' un faire serez d' accort
De ces deux, ou vous arez tort,
Se m' est avis.
LE ROY. J' ouverray selon ton devis ;
Barlaam aras avec toy
Et j' aray mes clers avec moy.
Tien, maine l' en.
( Le roi et Arachis se dirigent vers la porte ).
ARACHIS. ( Bas, au roi ) C' est le miex qu' il ait Barlaam,
Car j' espoir quant il parlera
Ja a li qu' il le tournera
A nostre loy.
LE ROY. ( Idem ) Aussi l' espére je, par foy.
Pour ce l' ay fait.
( Le roi et Arachis sortent suivis des astrologues ).
JOSAPHAT. ( Resté seul avec Nachor ) De joie m' avez huy refait,
Amis, par voz parlers honnestes.
Ne doubtez : bien scé qui vous estes.
Certes Barlaam n' estes mie,
Mais Nachor, qui d' astrologie
Estes dit maistre.
NACHOR. Haro ! sire, conment peut c' estre
Que le savez ?
JOSAPHAT. A demander pas ne l' avez,
Nachor, mais ce vous ai j' a dire ;
Savoir le m' a fait celui sire
Qui le monde de nient crea,
Puis par sa mort le recrea,
Si conme hui l' avez dit, amis.
Certes s' en vous ne se fust mis,
N' eussiez ja sens ne puissance
D' avoir parlé de sa naisçance
Ne de s' amére passion
Ne de sa resurreccion
Si haultement con fait avez ;
Mais il veult que soiez lavez
Par baptesme, et que le servez
Si que sa grace desservez
Et que puissiez avoir sa gloire ;
Et se bien avez en memoire
Conment jugier il nous venra
Et conment rendre nous faulra
Raison et de faiz et de diz,
Et qu' est enfer et paradiz,
Ce monde petit priserez ;
Et se le faites vous ferez
Certes que sage.
NACHOR. Je vous di bien j' ay en courage,
Sire, jamais ne fineray
Jusqu' a tant que baptesme aray ;
Et je sçay bien ou le doy prendre
Et sachiez qu' après m' iray rendre
En un hermitage et bouter
Pour moy hors du monde jetter
Et pour li servir jour et nuit.
A Dieu, sire ! ne vous ennuit :
Certes g' y vois.
( Il sort ).

ACTE V.
Scène 1. Le palais royal.
THEODAS. ( Au roi ) Seigneurs, je ne fui puis deux moys
Autant com je sui esbahiz.
Sire, Nachor s' est tout hors mis
De nostre loy par le langage
De vostre hoir, et en hermitage
Va demourer con crestien.
Mais se voulez, je vous di bien,
Je feray tant que vostre filz
Retournera, soiez en fiz,
A nostre loy.
LE ROY. Se tu le fais, en nom de moy,
D' or feray faire ton ymage
Et li feray autel hommage
Et autel sacrefice ou miex
Conme je fas aux autres diex,
Je te promett.
THEODAS. Rois, donc hors d' entour ton filz mett
Touz ses servans ; a ce ne failles,
Et pour li servir ne li bailles
Mais que femmes bien acesmées
Et pucelles gentes parées
Qui soient avec li touz jours
Et touz temps de nuiz et de jours.
Car c' est la chose, a dire voir,
Qui plus joune homme decevoir
Peut et attraire.
LE ROY. Alez me querre sanz retraire
La fille du roy, Sanceline,
Qui de nouvel est orfeline.
Je la vueil avecques li mettre.
Se femme le peut a point mettre
El le mettra.
DEUXIESME CHEVALIER. Sire, en l' eure fait vous sera.
Je meismes la vous vois querre.
( Il se rend chez Sanceline ).

Scène 2. La demeure de Sanceline.
DEUXIESME CHEVALIER. ( Entrant ) Dame, entendez que vueil requerre
Pour mon seigneur le roy vous pri
Que veigniez a li sanz detri
Parler un poi.
LA FILLE. Sire, voulentiers faire doy
Bien tant pour li, g' y suy tenue.
Avecques moy sanz attendue
Venez, Lorine.
LA DAMOISELLE. Vostre vouloir de cuer benigne
Feray, ma dame.
( Sanceline et Lorine suivent le deuxième chevalier ).

Scène 3. Le palais royal.
LA FILLE. ( Avançant vers le roi ) Sire roy, Mahon vous gart l' ame !
A vostre mant vien, c' est raison.
Dites moy pour quelle achoison
Vous me mandez.
LE ROY. Belle, sagement demandez.
Mon filz, se sachiez, crestien
Est de fait, voire, mau gré mien,
Et je l' en vueil, se puis, retraire.
Et a la loy que tien ratraire.
Si vueil que le gouvernement
Aiez de li tout plainement.
Se vous le pouez attourner
A ce qu' il vueille retourner
A nostre loy par quelque voye,
Ne doubtez que ne vous pourvoie
Si bien qu' a mari vous l' arez
Et royne après moy serez
De ce pais.
LA FILLE. Sire, ne soiez esbahiz
S' il est crestien orendroit
Car je vous dy, soit tort soit droit,
Je l' en retrairay, nul n' en doubte,
Mais que parler sanz plus m' escoute
Une seule heure.
LE ROY. C' est bien. Or alons sanz demeure,
Et je le vous mettray en main.
( Tous se rendent auprès de Josaphat ).

Scène 4. Le logis de Josaphat.
LE ROY. ( Entrant ) Biau filz, vezci que je t' amain.
Je ne vueil plus qu' homme te garde :
Ceste dame t' ara en garde,
Qui belle est et qui a corps gent,
Et s' est née de noble gent.
Dame, avecques li demourrez ;
Biaux seigneurs, et vous en venrez
Avecques moy.
L' ESCUIER. A vostre gré faire m' ottroy,
Sire, c' est droiz.
PREMIER CHEVALIER. Si sommes noz en touz endroiz,
C' est de raison.
( Le roi se retire avec l’écuyer et le premier chevalier ).
JOSAPHAT. M' amie, j' ay bien achoison,
Puis qu' avecques moy vous tenez,
De vous dire que bien devez
Loer par euvres et par fait
Dieu qui si belle vous a fait
De corps, mais c' est a vous diffame
Quant tele n' estes devers l' ame ;
Car s' elle fust belle et honneste,
Ce fust et bonne chose et nette
Que de vous, dame.
LA FILLE. Conment savez vous que mon ame
Est orde, sire ?
JOSAPHAT. Puis qu' en Jhesu Crist nostre sire,
Qui de la destre Dieu le pére
Descendi en la vierge mére,
Qui est vraiz Diex, n' avez creance,
Ne que pris n' avez renaiscence
Par baptesme, c' est vraie chose,
Qu' elle est orde, bien dire l' ose :
Orde, car s' ainsi trespassez,
Touz ses bons jours ara passez
Et es tourmens d' enfer sera
Mise tant com Diex durera ;
Et en ces griefs tourmens iront
Ceulx qui par foy creu n' aront
Que Crist est Diex.
LA FILLE. Se tu desires pour le miex
Qu' aux ydoles ne serve point,
Ottroies moy donques ce point
Que prendre me vueilles a femme.
Fille de roy sui, noble dame.
Li crestien n' ont pas horreur
De mariage, ains a honneur
Le tiennent et a chose honneste,
Dont maint patriarche et prophète
Et Pierre, des appostres l' un,
Furent, si con dient aucun,
Mariez. Dont sanz toy meffaire
De moy peuz bien ta femme faire,
Ta loy gardée.
JOSAPHAT. Femme, c' est parole gastée :
Car ja soit ce que crestien
Puist femme avoir, je te dy bien,
Ceulx en sont hors pour verité
Qui de garder virginité
Ont fait les veuz.
LA FILLE. Or soit, amis, si com tu veulz ;
Mais se mon ame veulz sauver,
Un petit don te vueil rouver :
S' il te plaist, tu le me feras ;
C' est qu' avec moy maizhui gerras,
Et je te promet de ma main
Crestienne seray demain.
Se d' un grant pecheur tu me diz
Que les anges de paradis
Font joie quant il se repent,
A celui qui son temps despent
Pour li en bien faire avoier
N' est mie deu grant loyer ?
Si est, voir ; dont, se tu as sens,
A ce que je requier t' assens,
Et ainsi tu me sauveras,
En quoy grant merite acquerras
Et preu a t' ame.
JOSAPHAT. ( Priant Nore-Dame ) Ha ! mére Dieu, tresdoulce dame,
Envoyez moy vostre confort.
Assailliz sui malement fort
Et temptez si diversement
Ne scé que faire nullement,
Dame, se par toy n' ay secours.
A toy m' en vueil fouir le cours,
A toy vien, royne des cieulx :
Regarde moy de tes doulx yeulx,
Ou je sui pris et mal bailliz.
De toutes pars sui assailliz.
Ceste femme si me propose
Qu' a gesir avec li m' expose
Et crestienne devenra :
Par ce son ame sauvera,
Se dit, mais n' en scé pas le voir ;
Après ma char fait esmouvoir
Sathan par sa suggestion
Au fait de fornicacion,
Auquel ne me vueil assentir.
Si vueilles, dame, consentir
Que mon ame ne maine a perte
Ceste temptacion desperte ;
Et je de ci ne partiray,
Dame, tant que tout dit aray
Vostre psaultier.
( Il commence la récitation de l’office de la Sainte Vierge )

Scène 5. Le Paradis.
DIEU. Mére, alez ent en ce moustier
A Josaphat qui vous deprie :
Si devotement mercy crie
Que je vueil qu' il soit secoruz.
De temptacion est feruz
Trop malement.
NOSTRE DAME. Filz, obeir vueil bonnement
A ce que vous plaist conmander.
Anges, sanz le vous demander,
Venez ent faire compagnie,
Et en alant ne laissiez mie
Que ne chantez.
GABRIEL. Doulce dame, voz voulentez
Ferons du tout.
MICHIEL. Il ne nous doit point estre a coust :
Gabriel, disons sanz demour.
( Ils chantent ) .
RONDEL. Fleurs des fleurs, par laquelle odour
Ame de pechié est sauvée
Et a l' amour Dieu ramenée,
Digne estes sur toutes d' onnour,
Benoite avant que fussiez née,
Fleurs des fleurs, par laquelle odour
Ame de pechié est sauvée.
( Gabriel et Michel accompagnent Notre-Dame
au logis de Josaphat en chantant ce rondeau ).

Scène 6. Le logis de Josaphat.
NOSTRE DAME. ( Entrant, à Josaphat qui lit l’office )
Amis, pour ce que ta pensée
As mis et ta devocion
En moy, par grant dileccion
Te vien veoir et conforter
Et de par mon filz enorter,
Qui est le roy de paradis,
Que ne croies de rien aus dis
Sanceline, n' a ses paroles :
Elles sont et faulces et foles ;
Mais de bien faire te souviengne,
Si qu' en la fin t' ame parviengne
Au royaume qui est sanz fin.
S' amé as mon filz de cuer fin
Et moy, aimes nous miex touz jours,
Et dedans un petit de jours
De ce siecle trespasseras
Et sanz fin avec nous seras.
( Aux archanges ) Ralons nous en a Dieu, amis :
Faites qu' a fin soit ce chant mis
A mon raler.
MICHIEL. Gabriel, sanz en plus parler,
Disons joyans et sanz errour.
RONDEL. Fleur qui sur touz biens a valour,
Sanz vous n' est point grace donnée :
Pour c' estes es cieulx couronnée,
Fleur des fleurs par laquelle oudour
Ame de pechié est sauvée
Et en l' amour Dieu ramenée.
( Les anges raccompagnent Notre-Dame au Paradis en chantant
ce rondeau tandis que Josaphat adresse cette prière )
JOSAPHAT. ( Priant ) Ha ! vierge, com beneurée
Recreacion ay eu
De ce que ci vous ay veu !
Fi, fi, fi de biauté humaine
Et fi de la joie mondaine !
Certes jamais ne fineray
Tant que hors jetté m' en seray,
Car il m' annuye.

Scène 7. Le palais royal.
LE ROY. Je doubt que mon filz ne s' en fuie.
Teodas, devers li alons,
Et a li encores parlons
De son affaire.
THEODAS. Sire, ce sera bon a faire,
Et si sarons se Sanceline
L' a point attraitt a son convine
N' a sa cordelle.
LE ROY. C' est bien dit.
( Ils se rendent auprès de Josaphat et de Sanceline ).

Scène 8. Le logis de Josaphat.
LE ROY. Et qu' est ce la, belle ?
Conment vous va ?
LA FILLE. Vostre filz un cuer de pierre a.
Il n' est nul qui le puist flechir
Ne muer. Vez le ça venir.
Il vient d' orer.
LE ROY. Filz, venez vous de labourer
Ou de quel lieu ?
JOSAPHAT. Je vien d' aourer le vray Dieu,
Qui nous a faiz et deffera
Touz et toutes quant li plaira :
A li en est.
LE ROY. Touz jours es par ton parler prest,
Quant moy et toy sommes ensemble,
De moy courroucier, ce me semble.
Laisse moy de ton Dieu ester,
Et me croy : je cuit sanz doubter
Que miex feras.
JOSAPHAT. Pére, un jour venra que seras
Trait devant li, vueilles ou non,
Et si li renderas raison
Et compte de toute ta vie.
La se vengera de l' envie
Et de l' ennuy et des debaz
Qu' a crestiens pour li fait as,
Se ne t' avises.
THEODAS. Josaphat, merveilles devises.
Conment ! nous veulz tu faire entendre
Q' un jour venra qu' il faudra rendre
Raison de quanque on ara fait ?
Quant seroit ce jugement fait
Ny a fin mis ?
JOSAPHAT. Quant, Theodas, biaux doulx amis ?
Aussi tost conme oeil euvre et clot,
Car il n' est rien a Dieu repost :
Toutes choses voit clérement
Et scet dès le conmencement.
Autrement Diex ne seroit pas :
Muser ne fault point sur ce pas.
Et si sachiez bien sanz doubtance
Ceulx qui sont hors de sa creance
Et qui n' ont saint baptesme pris
Sanz fin seront de feu espris.
Je te dy voir.
THEODAS. Je t' ay cuidé prendre et avoir,
Josaphat, mais tant m' as apris
Qu' a ton Dieu croire me rens pris ;
Car je cognoys en verité
Qu' il convient de neccessité
Qu' un Dieu soit qui touz biens merisse
Et qui les maux aussi punisse,
Et nul n' en est a dire a droit
Fors cil dont parles orendroit,
Et pour ç' a li servir m' ottroy :
Si fera mon seigneur le roy,
S' il me veult croire.
LE ROY. Theodas, est ce chose voire
Que le crerez ?
THEODAS. Sire, oil, et vous si ferez,
Pour estre de toulz maulx delivres ;
Car je voy par mesmes noz livres
Qu' ainsi est com vostre filz dit :
Si le creez sanz contredit,
Je le conseil.
LE ROY. Puis que le me loez, je vueil,
Biau filz, crestien devenir,
Ne jamais je ne vueil tenir
Ce royaume, mais le vous quitte
Et si m' en iray estre hermitte
Pour pardon avoir des meffaiz
Que j' ay ça en arriére faiz.
Diex, ce dittes en voz recors,
Est tant doulx et misericors
Qu' il n' est tant mauvaise personne
A qui ses pechiez ne pardonne
Se de cuer li crie mercy,
Et je le pense a faire ainsy
Certainement.
JOSAPHAT. Pére, ne doubtez nullement
Quant baptesme receverez
De touz pechiez lavez serez.
Si vous diray que nous ferons :
Touz ensemble nous en irons
A Barlaam le saint preudomme
Qui nous devisera en somme
Ce que pour nostre sauveté
Nous convient de neccessité
Faire ; alons y.
THEODAS. Alons, car le conseil de ly
En ce cas nous peut moult valoir,
Et je tien que de grant vouloir
Nous aidera.
LE ROY. Je croy que voirement fera :
Or y alons.
DEUXIESME CHEVALIER. Mon seigneur, avec vous volons
Touz estre aussi crestiennez.
Puis qu' a ce vous estez donnez,
Si faisons nous.
JOSAPHAT. E ! seigneurs, benoiz soiez vous !
Grant grace au jour d' ui Dieu vous fait.
Avant : alons men touz de fait
A Barlaam par ce boucage.
Je scé moult bien son hermitage.
( Josaphat conduit le roi, Théodas et les deux chevaliers
à l’ermitage de Barlaam ).

Scène 9. L’ermitage de Barlaam.
JOSAPHAT. Vez le la ; je le voiz huchier.
Barlaam, pére et ami chier,
Parlez a moy.
BARLAAM. Je voiz la. Qui est ce que j' oy ?
Ha ! filz, Dieu vous ait en sa garde !
De vous me donnasse envis garde :
Conment vous va ?
JOSAPHAT. Bien, biau pére. Diex fait nous a
Grace apperte et miracle gent.
Mon seigneur mon pére et sa gent
Ay avec moy ci amenez,
Pour estre touz crestiennez ;
Mais moult y ay eu a faire.
Pour Dieu, biau pére, en cest affaire
Soiez songneux.
BARLAAM. Ha ! tresdoulx Dieu, roy glorieux,
Conme on doit bien glorifier
Ton saint nom et magniffier !
Certes, chascun y est tenuz.
Seigneurs, bien soiez vous venuz !
Assez brief vous baptiseray ;
Vous venrez ou je vous menray ;
La trouverons les fons touz prestz.
G' iray devant et vous après,
Pour ce que ne savez le lieu ;
Et en alant, en loant Dieu
Et la vierge qui le porta,
Ceste antaine ou biau deport a
Chanterons ensemble a hault ton :
Ave, regina celorum.
( Tous suivent Barlaam qui les conduit vers
une église, en chantant cette antienne ).
Explicit