Miracle XXII

Ego quasi vitis fructificavi suavitatem odoris, etc.,
Ecclesiastici XXIIII^o. Ces paroles proposées en
latin veulent ainsi dire en françois : J' ay conme
la vigne fruttifié soueveté d' odeur. Entre Sapience qui est
le filz de Dieu et Marie, la vierge benoite, a une tresgrant
affinité, car Sapience est creerresse de Marie conme
pére et Marie est de Sapience vraie mére, si conme elle
mesmes le tesmoingne Ecclesiastici XXIIII^o : Qui creavit
me requievit in tabernaculo meo : Celui qui m' a creé a
reposé en mon tabernacle, c' est a dire a pris en moy char
humaine ; et pour ce et non mie sanz cause sont appropriées
les paroles de Sapience a Marie, laquelle regardant
en ce monde nous envaist, par le procès de l' espitre de
laquelle j' ay pris les paroles proposées au conmencement,
et nous attrait a elle considerer en trois maniéres. Premiérement
pour raison de sa conmendacion en ce qu' elle
dit : Ego quasi vitis ; ego mater pulcre dileccionis, etc..
in me gracia omnis vite, etc. : Je sui conme la vigne ; je
sui mére de bele amour ; en moy est grace de toute vie et
verité. Secondement pour raison de son invitacion, car
elle dit : Transite ad me : Venez a moy vous qui me
convoitez. Tiercement pour raison de sa remuneracion :
Qui edit me, etc. ; qui audit me, etc. : Ceulz qui me
menguent et boivent aront encore soif et fain. Yci dit
elle mains et fait plus, et veés le procès que fait la vierge
benoite en ceste espitre : premiérement elle est soy conmandant ;
secondement nous semonnant et envaissant ;
tiercement les consentans a son imitacion remunerant.
Et toutes ces choses attraient et aleichent. Et premiérement
sa conmendacion qui est trible, selon trois
clauses, esquelles trois choses sont signiffiées selon l' ordenance
de la lettre, c' est assavoir, quelle chose est de
elle : Ego quasi vitis ; après quelle chose est elle : Ego
mater, etc. ; et après quelle chose est en elle : In me gracia
omnis vite, etc. . Or veons premiérement quelle chose
est elle. Elle dit qu' elle est mére de belle amour. Ici
met quatre vertuz ordenans quatre de ses affeccions,
c' est assavoir joie, esperance, douleur et paeur. Car elle
n' ot joie mais que par charité ou de charité ; pour ce
s' appelle elle mére de belle amour : Mater pulcre
dileccionis. Ne elle n' ot esperance mais que en sainteté ; pour
ce dit elle : Sancte spei. Ne elle n' ot paour mais que
avec reverence : et timoris. Ne elle n' ot doleur mais
que avec congnoissance : et agnicionis. Et est telle la
diferance de ces quatre que joie est de present, esperance
du futur, douleur du mal present et paeur du mal a venir.
Ainsi donques doivent ordener les bonnes personnes
leurs affeccions que charité engendre en eulz joie, reverence,
paeur et douleur, soit acompaigniée de prudence
et saintée d' esperance. Oultre par ces quatre pren quatre
vertuz que Marie ot contre quatre vices. Elle s' appelle
mére de belle amour contre le vice de delit de charnalité,
mére de paour contre tout orgueil et vanité, mére de
grandeur ou de force contre pusilanimité et mére de
sainte esperance contre avarice et cupidité. Beneurée est
bien la personne en la congregacion qui en ces quatre
choses ensuit Marie. Ainsi appert quelle chose est elle ;
c' est qu' elle est mére de belle amour. Or veons après
quele chose est en elle, car miex vault ce qui dedans est
repost et mucié. Il s' ensuit : In me gracia omnis vite et
veritatis. L' espitre dit qu' en li est grace de toute voie de
verité. Et ici met aussi quatre choses, car elle dit qu' elle
est adresce et voie aux meserrans, verité aux ignorans,
vie aux morans, vertu aux deffaillans. Mais note bien ce
qu' elle dit qu' en li est grace de toute vie, qui est treble,
car il est une vie qui est de mariage, l' autre de continence
et de veuvage, et la tierce est de virginité en l' estage.
Donques Marie est vie en exemple des mariez, des
continens et des vierges, et de ces trois est il dit Ecclesiastici
XXIIII^o. In Jacob inhabita : Marie, habite en Jacob,
c' est quant aux mariez ; et in Israel hereditare : et pren
ton heritage en Israel, quant aux continens ; et in electis
meis mitte radices : et met et envoie tes racines en mes
esleuz, quant aux vierges. Ou autrement est elle en grace
de toute voie, c' est assavoir des conmençans, des prouffitans
et des parfaiz. Aussi di je qu' en li est grace de
toute verité, qui est treble, car en elle est verité de vie, de
doctrine et de justice. Beneuré est bien donques le lieu
ou regne ceste treble verité, c' est assavoir verité de vie
en conversacion, verité de doctrine en predicacion et verité
de justice en correccion. Aussi est en elle toute esperance
de vie. Car c' est l' esperance aux pecheurs, aux repentans
et aux justes. Par elle est donné pardon aux
pecheurs, grace aux repentans et gloire aux justes, et
ainsi nous appert sa conmendacion selon trois similitudes
qu' elle met ; premiérement par similitude de vigne : Ego
quasi vitis ; secondement par similitude de mére : Ego
mater, etc. ; et tiercement par similitude de fontaine : In
me gracia omnis vite, etc. . Se tu considéres la vigne tu y
treuves merveilleuse delectableté tant en l' odeur, tant en
la fleur conme ou fruit : l' odeur a soueveté, la fleur agreableté
et le fruit doulceur : et tout ce trouveras tu en Marie ;
mais je me passe de l' exposer pour brieté. Après se
tu considéres Marie conme mére, tu la trouveras de merveilleuse
fecondité pour quatre condicions d' affeccion
amoureuse qu' elle met, dont la premiére est biauté ; pour
ce dit elle : Ego mater pulcre dileccionis : je suis mére
de belle amour ; secondement, qu' elle est de songneuse
et tendriére amour ; pour ce dit elle : et timoris ; tiercement
qu' elle est de discréte et certaine amour ; pour ce
dit : agnicionis ; et quartement qu' elle est de forte et
ferme amour ; pour ce dit elle : et sancte spei. Pour
quoy dit un devot clerc : Marie, Benoite es tu qui sur les
thrones, Les pucelles et les mathrones Tiens privilége d' excellence ;
Tu es rousée, vaine de miel, Puiz de doulceur,
en qui de fiel ne d' amer n' ot onques semence. ça jus
pecheurs te magniffient, Lassus en toy se glorifient Ceulx
qui ont gloire souveraine ; Ton enfantement a l' onneur
Fu des femmes et pour l' amour Aussi de creature humaine.
Si li prions que par sa doulce misericorde elle
nous doint grace de faire chose en ce siécle par quoy
nous puissons venir a la beneurté pardurable avec le
pére et le filz et le saint esperit, qui est unus Deus benedictus
in secula seculorum. Amen.
Cy conmence un miracle de saint Panthaleon que
un empereur fist decoler avec Hermolaus et ses
deux compaignons qui l' avoient baptizé.

ACTE I.
Scène 1. Nicomédie, une rue.
LE PÉRE. Entens a moy, Panthaleon.
Biau filz, avis m' est qu' il est bon
Que tu saches aucun mestier,
Par quoy, se tu en as mestier,
Ton estat par honneur maintiengnes
Sanz ce qu' en dangier d' autrui viengnes ;
Et toy qu' en dis ?
PANTHALEON. Pére, je sui cil qui touz dis
A vo vouloir faire m' assens.
Vous savez, je n' ay pas tant sens
N' engin si vray ne si entier
Que je sache qui m' a mestier
Si bien con vous.
LE PÉRE. Tu as dit voir, mon enfant douls.
Pour ce le te diz j', or entens :
Tu as assez aage et temps
D' apprendre, et si as bon engin.
Si j' en parle a maistre Morin,
Vourras tu bien avec lui estre ?
C' est des mires le meilleur maistre
Que l' en sache en tout ce pais.
Estre ne dois pas esbahis
De m' en respondre.
PANTHALEON. Oil voir ; alez l' en semondre,
S' il vous plaist, et si l' en touchiez.
S' il me veult avoir, si sachiez
Toute s' entente.
LE PÉRE. Tu dis bien, g' i vois sanz attente
Et si n' y sejourneray point:
Je le voy, c' est trop bien a point.
( Entre maître Morin, tandis que Panthaléon se retire chez lui )
Plaise vous, sanz plus oultre aler,
Maistre Morin, a moi parler,
Je vous en pri.
MAISTRE MORIN. Voulentiers. Or ça, sanz detri,
Que voulez dire ?
LE PÉRE. Je vous demant, dites moi, sire,
Se vous vouldriés a apprentiz
Prendre Panthaleon mon filz :
Dites oil.
MAISTRE MORIN. Vostre filz ? et quel aage a il ?
Dites le moy.
LE PÉRE. Maistre Morin, foy que vous doy,
Il a plus de quinze ans passez.
Il est biau valeton assez
Et bien appert.
MAISTRE MORIN. Se tel con vous dites m' appert,
Sire, voulentiers le prendray.
Mais s' il vous plaist, je le verray
Tout avant euvre.
LE PÉRE. La veue le voir en descuevre,
Et vous ne dites que raison.
Venez ent jusques en maison :
Vous le verrez.
MAISTRE MORIN. Alons, ja desdit n' en serez
De ma partie.

Scène 2. Chez le père de Panthaleon ( le sénateur Eustore )
LE PÉRE. Panthaleon, chiére espartie,
Biau filz, faites ce seigneur cy,
Quant li plaist estre venuz cy
Pour vous veoir.
PANTHALEON. D' onneur vous veuillent pourveoir
Noz diex, chier maistre.
MAISTRE MORIN. Ore, biau filz, voulrez vous estre
Voulentiers mire ?
PANTHALEON. Ce qui plaira mon pére, sire ;
A li en est.
MAISTRE MORIN. Pour ce que le voi gent et net,
Sire, voulentiers le prendray
Et le mestier li apprendray
Parfaittement, s' en li ne tient.
Mais je vous di bien qu' i convient
Qu' il me serve set ans entiers,
Et dix livres de voz deniers
Avoir avec.
LE PÉRE. Je vous paieray d' argent sec
Voulentiers. Or l' en amenez
Et vous pri que li apprenez
Le fait de degré en degré
Si que je vous en sache gré.
Mais je voulray, ne vous ennuit,
Qu' avecques moy chascune nuit
Viengne jesir.
MAISTRE MORIN. Soit, puis que vous vient a plaisir,
De ce ne vueil plus barguignier.
Or ça, biau filz, alons gaignier.
( Panthaléon suit maître Morin sur une place de la ville )

Scène 3. Nicomédie, l’échoppe de maître Morin
sur une place. Rues environnantes.
MAISTRE MORIN. ( Désignant son échoppe de médecin )
Yci endroit en ceste place
Nous fault du jour estre une espace
Savoir s' aucune ame y venra
Qui affaire de moy ara
Par quelque voie.
PANTHALEON. Maistre, j' ay de faire grant joye
Vostre vouloir.
MAISTRE MORIN. Or ne met pas en nonchaloir,
Quant tu besoingnier me verras,
De regarder con tu feras
Soit d' une plaie descouvrir,
Soit de la laver et ouvrir,
Soit de mettre y emplastre ou tente
Et de la lier : la t' entente
Aies et l' ueil.
PANTHALEON. Maistre, de ce point ne me dueil
Que vous me dites.
( Entre un voisin )
LE VOISIN. Maistre Morin, pour estre quittes
De ce que je vous ay promis
Vous viens je querre, chiers amis.
Ne vous voi ci que besongnier :
Alons men sanz plus eslongnier,
Par fine amour.
MAISTRE MORIN. Panthaleon, sanz plus demour
Faire, va t' en jusqu' a demain.
Mais reviens icy assez main,
Car j' y seray.
PANTHALEON. Vostre conmandement feray,
Maistre, c' est droiz.
( Maître Morin suit le voisin qui l’emmène chez lui ;
Panthaléon prend le chemin du retour, quand entrent sur la
place Hermolaüs et ses frères Ypocrates et Hérippé )
HERMOLAUS. ( Voyant Panthaléon et le montrant à ses frères )
Or regardez en touz endroiz
Un enfant bien moriginé.
A Dieu puist il estre donné !
Herippé, et vous, Ypocras,
Regardez le venir le pas :
Qui est il ore ?
YPOCRATES. Pére, il est filz a Eustore
Le senateur.
HERIPPÉ. Pleust a Dieu le createur
Qu' il eust telle congnoissance
Qu' il eust guerpi mescreance
Pour nostre loy.
HERMOLAUS. Ha ! doulx Jhesu, souverain roy,
Noblement l' ariez embelli.
Je vueil un po parler a li.
( Hélant Panthaléon ) Biau filz, ça venez un petit :
J' ay de parler grant appetit
A vous sanz doubte.
PANTHALEON. Sire, voulentiers gens escoute
Anciens parler conme vous.
Que me direz vous, sire doulx,
Que j' aye a gré ?
HERMOLAUS. Filz, je vous demande en secré
Le vostre nom.
PANTHALEON. L' en m' appelle Panthaleon,
Filz Eustore.
HERMOLAUS. Biau filz, je vous demans encore
Sanz plus quel Dieu vous aourez,
Et pour quel bien vous labourez
En li servir.
PANTHALEON. Sire, les biens que desservir
Poons de servir a noz diex
Sont moult grans, ce dit on, mais quiex ?
Je n' en sui pas ore recors.
Mais plusieurs diex, ce vous recors,
Conme ceulx par qui sommes né,
Par qui le monde est gouverné
Et par qui les choses ont fin,
Ceulx croy j' et aour de cuer fin
A mon pouoir.
HERMOLAUS. Es tu de nul mestier ? Le voir
Me vueilles dire.
PANTHALEON. Oil : apprentiz sui a mire,
N' a pas granment.
HERMOLAUS. Biau filz, je te dy vraiement,
Toy et touz ceulx qui en telx diex
Croient, soient jounes ou viex,
Et qui ont jusques ci creu
Sont si malement deceu
Qu' i se dampnent et corps et ames,
Soient hommes ou soient fames.
Car tu doiz tenir et savoir
Qu' il n' est qu' un Dieu, saches de voir,
Qui nous a faiz et deffera
Et apprès nous refformera
Noz propres corps.
PANTHALEON. Et conment nous sera il lors ?
Biau sire, dites.
HERMOLAUS. Es cieulx conme sains esperites
Aront les bons leur mansion;
Les mauvais a dampnacion
Pardurable en enfer pour lors
Seront en ames et en cors.
Croy, biau filz, que pas ne te mens
La soufferront divers tourmens
Dont nul ne peut dire la somme,
Et a bon droit, car Diex a homme
Tant amé, la seue mercy,
Que des cieulx en ce monde cy
Vint prendre en vierge char humaine,
Et pour oster homme de paine
Souffri en croiz peine mortel :
Si li devons bien faire autel
Se nous voulons sa gloire avoir.
Mais tant te fas je bien savoir
Qu' a celle gloire nul ne vient
Se ceste creance ne tient
Qu' après sa mort monta es cieulx,
Vrais Diex, vraiz homs, et homs vrais Diex
Est regnans en gloire celestre;
Mais aussi te vueil je promettre
Que se tu as en lui creance
Il te donrra telle puissance
Que de trestoutes maladies
Gueriras, mais que dessus dies :
" Ou nom Jhesu", faisant ce signe
De croiz ( Il fait ce signe ), sanz autre medicine
Ny herbe mettre.
PANTHALEON. Vous serez mon pére et mon maistre
Dès ore mais, et vous croiray,
Et ceste creance tenray.
Certes voulentiers vous escoute,
Mais aler m' en fault, car je doubte
Trop demourer.
HERMOLAUS. Biau filz, Dieu vous vueille honnorer.
Alez a Dieu.
( Hermolaüs et ses frères se retirent chez eux. Panthaléon reprend
sa route et voit à ce moment un enfant poursuivi par un serpent )
L' ENFANT. Haro ! ou iray n' en quel lieu ?
Ce serpent grant a desmesure
Semble qu' il mette peine et cure
A moy prendre, et qu' ailleurs ne bée.
Las ! vez le cy gueule baée
Ou me suit pour moy transgloutir.
Mahon, vueillez me garantir
De mort villaine !
PANTHALEON. Ce mau serpent forment se paine
De cel enfant la devourer,
Dont le fait de paour plourer
Et le met forment en esmay.
Je croy que je vueil faire essay
S' en pourroit estre despeschié
Par le Dieu dont m' a tant preschié
Ce bon prestre Hermolaus.
Prier le vueil. ( Priant en faisant le signe de la croix au-dessus du serpent )
Tresdoulx Jhesus,
Qui souffris mortel passion
Pour l' umaine redempcion,
Si conme Hermolaus le dit,
Sire, je te pri sanz respit,
Se tu puez, ceste beste livre
A mort et l' enfant faiz delivre
Qui de paour a grant effrois,
Par la puissance de ta crois
Que faire vueil sur ceste beste,
Qui est hideuse et deshonneste.
Ou nom de Jhesu, beste fiére,
Requier que mort en toy se fiére
Qui te cravante.
( Le serpent meurt )
L' ENFANT. N' ai mestier que plus me demente,
Mais que com joieux me deporte.
Car je voi que la beste est morte,
Qui si me suivoit pour mengier.
Or sui je hors de son dangier :
Joyant m' en vois.
( L’enfant sort )
PANTHALEON. Ha ! tresdoulx Jhesus, s' a ma vois
Et au signe que j' ay si fait
De ta crois as donné de fait
Vertu de ceste beste occire,
Que puis je de ton pouoir dire ?
Sire, loez soit ton saint nom !
Certes il n' est Diex se toy non.
Touz autres diex pour toy reny
Et de mon cuer hors les bany.
Baptizier me vois faire errant.
( Il gagne en courant la demeure d’Hermolaüs )

Scène 4. La demeure d’Hermolaüs.
PANTHALEON. ( Entrant ) Pére, je vien a vous courant.
Baptisez moy, ce vous requier,
Pour mon sauvement que je quier
Et que vueil faire.
HERMOLAUS. Biau filz, en ce ne peuz meffaire,
Et j' en ay grant joie pour voir.
Mais qui te muet ? di m' en le voir,
Se Dieu t' aist.
PANTHALEON. Ne m' avez vous promis et dit
Que s' estre vueil crestienné
Mire devenray si sené
Qu' il ne sera mal quel qu' il soit,
Se de ma main cure reçoit,
Que je ne garisse et affine
Sanz mettre quelque medicine,
Mais qu' "ou nom Jhesu" seulement ?
Vous le m' avez dit vraiement :
Dont n' avez mie ?
HERMOLAUS. Oil, par la vierge Marie,
Et je croy tu le prouveras,
Après que crestien seras;
N' en doubtez point.
PANTHALEON. Je l' ay ja prouvé par un point
Que je vous vueil cy diviser :
Ne scé con m' en poy adviser.
Ainsi conme orains m' en aloie,
Je trouvay la en celle voie
Un hideux serpent qui suivoit
Un enfant qu' estrangler vouloit;
Et me fu advis qu' il le tint;
S' en oy pitié. Lors me souvint
De ce que m' aviez enseignié,
Si que le serpent j' ay seignié
En priant Jhesu qu' il morust,
Par quoy a l' enfant secourust;
Et le serpent isnel le pas
Morut ilec, n' en doubtez pas,
Et l' enfant tout sain s' en ala,
Si que quant j' ay veu cela,
Je di : Jhesu Crist c' est celi
Qui est vrais Diex, et pour c' en li
Creans vueil estre.
YPOCRATES. Pére, loons le roy celestre,
Quant, pour attraire a sa creance
Cest enfant ci, a sa puissance
Ainsi moustrée.
HERIPPÉ. A ce que miex la chose oultrée
Soit, pére, faites nous savoir
Conment il puist baptesme avoir :
C' est de raison.
HERMOLAUS. Conment ? sanz point d' arrestoison
Au moustier saint Pol le menrons
Et la baptesme li donrrons.
Ça, alons ment.
( Hermolaüs et ses fils conduisent Panthaléon à l’église Saint-Paul )

Scène 5. Une rue de Nicomédie.
LE PÉRE. ( Sortant de chez lui ) Je suis esbahiz malement
En quel lieu mon filz tant se tient
Que vers moy ne va ne ne vient,
Ne ne fist puis que je le mis
Apprentiz. Par chiez ses amis
S' il y seroit point vois savoir.
Bien mal me fait, a dire voir,
Quant si longuement l' ay perdu :
Le cuer me fait tout esperdu.
( Entre Gomas )
Gomas, bon jour vous doint Mahom.
Ne savez de Panthaleon
Dire nouvelle ?
GOMAS. Nanil, par Dyanne la belle
Que nous aourons conme deesse.
Pour quoy le dites, cousin ? Qu' est ce ?
A il que bien ?
LE PÉRE. Par Mahom, cousin, n' en scé rien :
Ne le vi, il a set jours hui,
Dont j' ay au cuer dueil et annuy,
Ne je ne scé ou je le quiére.
Je m' en revoys par cy derriére
Chiez son maistre Morin le mire,
Pour savoir s' il m' en sara dire
Nouvelle aucune.
GOMAS. Non ferez, car il est pour une
Cure faire alé jusqu' au Pas,
Si que, cousin, n' y alez pas :
Vous museriez.
LE PÉRE. Haa ! par ce point vous me feriez
Estre hors de doubte, cousin,
Car je pense qu' en ce chemin
L' ait mené; pour ç' attenderay
Son retour et si m' en yray,
Tarde que tarde.
GOMAS. Chier cousin, alez a la garde
De touz noz dieux.
( Le père rentre chez lui )

Scène 6. L’église Saint-Paul.
HERMOLAUS. ( Quittant l’église ) Ore, Panthaleon biau fiex,
Puis que vous baptesme avez pris
Et que la foy vous ay appris
Qui appartient a crestien,
Dès ores mais gardez la bien
Et quanque pourrez l' essaussiez,
Ne pour chose ne la laissiez
C' on vous tourmente.
PANTHALEON. Sire, ce n' est mie m' entente,
S' il plaist a Dieu.
HERMOLAUS. Or en ralez en vostre lieu :
Fait avez ci assez demour.
Diex vous doint sa grace et s' amour :
Priez pour moy.
PANTHALEON. Voulentiers, et vous, ce vous proy,
Pour moy aussi.
YPOCRATES. Dieu le face par sa merci
De gloire digne.
HERIPPÉ. Celle qui est des cieulx royne
Li vueille estre dame et amie.
Si ne faudra a grace mie
Amour de Dieu.
( Panthaléon retourne chez lui )

ACTE II.
Scène 1. Chez le père de Panthaléon.
LE PÉRE. ( A son fils qui entre )
Filz, dont viens tu, ne de quel lieu ?
Elas ! tu m' as bien empeschié
De dueil, si as fait grant pechié.
J' ay ci musé pour toy touz jours.
Au mains me dy ou ces huit jours
Demouré as.
PANTHALEON. Pére, ne vous courrouciez pas.
Mon maistre un homme pris avoit
En cure, lequel il devoit
Garir dedans dix jours ou mains.
Si y a si bien mis les mains
Qu' il l' a tout gari et curé.
Pour ç' avons nous tant demouré,
Car de sa maison ne partismes
Jusqu' a tant que nous en venismes
Hier puis dynée.
LE PÉRE. Mal fu sa personne onques née.
Onques mais que je sache n' oy
Tant de courrouz ne tant d' annoy
Jour de ma vie.
PANTHALEON. Pére, si a esté folie.
Or laissons ester ce parler.
A mon maistre m' en vueil raler
Sanz plus attendre.
LE PÉRE. T' en vas tu ? or pense d' apprendre
Bien ton mestier.
PANTHALEON. Si feray j', il m' en est mestier.
( Il retourne auprès de maître Morin )

Scène 2. L’échoppe de maître Morin sur une place.
PANTHALEON. Maistre, je vous salu, c' est drois,
Com cil qui sui en touz endroiz
Vostre subjet.
MAISTRE MORIN. Panthaleon, moult bien vous siet
A saluer, par Mahonmet,
Et a parler, dont moult bel m' est.
Ne vous vi mais il a huit jours.
Ou avez puis esté touzjours
A verité ?
PANTHALEON. Sire, mon pére a acheté
Hors de la ville un heritage
Ou il appartient grant gaingnage,
Et pour ycellui pourveoir
L' avons ensemble esté veoir.
Or le savez.
MAISTRE MORIN. S' a Mahon plaist, bien fait avez.
Ore pour ta science acroistre,
Il te fault les herbes congnoistre
De quoy tes oingnemens feras
Quant tu de moy parti seras.
Biau filz, c' est une.
PANTHALEON. Maistre, j' en congnois bien aucune :
Je congnois ortie et sarfueil,
Persil, macidoine et milfueil;
Et si congnois moult bien cresson
Olenois, voire, et seneçon,
Tenasie, coq, lis et mente,
Moron, plantin et une gente
Fueille qui est nommée doque.
Ne cuidez pas que je vous moque :
Toutes ceus cy congnoys je bien,
Et avec ce langue de chien
Quant je la voy.
MAISTRE MORIN. Panthaleon, biau filz, avoy !
S' a point les savoies bien mettre
Dygne seroies d' estre maistre.
Or te diray que tu feras :
D' aucunes cueillir m' en yras,
Et je te mousterray conment
Tu en feras bon oingnement
Au retourner.
PANTHALEON. Maistre, g' i vois sanz sejourner :
Si tost conme diné aray,
Assez vous en apporteray.
( Il quitte maître Morin. Seul, priant sur le chemin de sa demeure )
E ! doulx Jhesu Crist, roy celestre,
Sire, plaise toy qu' il puist estre
Que mon pére soit a ta loy
Converti aussi conme moy !
Pour son sauvement le desir.
Sire, ce soit ton saint plaisir,
Si com c' est le mien, tu le scez.

Scène 3. Chez le père de Panthaléon.
PANTHALEON. ( Entrant ) Je viens, pére. Est diner passez ?
Vieng je trop tart ?
LE PÉRE. Nanil, filz, se Mahon me gart :
Assez estes venuz a point.
Ceens ne dinerons nous point.
Nous yrons diner chiez le page,
Qui le nous fera a l' usage
De son pais.
PANTHALEON. ( Montrant deux idoles, l’une assise et l’autre debout )
J' ay long temps esté esbahiz,
Et suis encore, sachiez, sire,
D' une chose que vous vueil dire,
Pour quoy est ce qu' adès seant
Voy l' un des dieux et l' autre estant,
Ne le seant estant n' est point,
Ne l' estant ne siet ? de ce point
Ay admiracion trop grande
Que ne siet cilz, ce vous demande,
Et cilz ne liéve.
LE PÉRE. Ta question est fort et griéve :
Par mon salut, je ne cuit mie
Qu' en ceste ville ait homme en vie
Qui ce point te sceust espondre.
De ma part ne t' en scé respondre,
Car en ce ne me congnois goute;
Mais tu m' as mis en telle doubte
Que jamais pour ceste raison
N' iert que je n' aye soupeçon
Qu' i ne soient mie vraix diex,
Car ilz sont, ce voi j' a mes iex,
Telx com tu dis.
( Ils sortent )

Scène 4. Une rue de Nicomédie
( Panthaléon et son père voient au-dehors un aveugle, Antime )
L' AVUGLE. Elas ! conme est povre et mendis
Et desconfortez qui ne voit !
Il n' a bien ne joie ou qu' il voit
Et si chiet en grant desconfort.
Ha ! Mahon, qui saroit com fort
Il m' ennuie, il s' esbahiroit
Et de moy grant pitié aroit.
Quant me recors et me remembre
Que je ne souloie avoir membre
Qui ne fust sain conme une pomme,
Et je sui ore si povre homme
Que je ne me voy ou conduire,
Est il rien qui tant me peust nuire ?
Nanil, sanz doubte.
PANTHALEON. Biaux amis, un petit m' escoute.
Tu te complains et te lamentes
Et trop malement te dementes
Pour ta veue, ne m' en merveil.
Se croire vouloies conseil,
Encor la pourras tu ravoir
Et aussi clérement veoir
Conme onques fis.
L' AVUGLE. Sire, soiez certains et fis
Qu' il n' est riens que je ne feisse
Pour recouvrer le benefice
De ma veue.
PANTHALEON. En l' heure te sera rendue,
Se laissier veulz la loy paienne
Et prendre la foy chrestienne :
Bien dire l' ose.
L' AVUGLE. Ne me fault il faire autre chose
Pour la ravoir ?
PANTHALEON. Saches, biau frére, nanil voir.
Dès si tost com tu aras dit
De cuer : Je croy en Jhesu Crist,
Bien te sera.
L' AVUGLE. Dès maintenant dont ce sera.
Doulx Jhesu Crist, et près et loing,
A vous croire et servir me doing
Conme vray Dieu, filz Dieu le pére :
Sire, par ceste foy m' appére
Qu' estes vraiz Diex.
PANTHALEON. Sueffre : je vueil touchier tes yex.
( Imposant les mains sur les yeux de l’aveugle et priant )
Sire, a qui le costé fendi
Longis l' avugle un venredi,
Dont il yssi et yaue et sanc
Qui coula de vostre saint flanc,
Sur ses mains, et si bel ouvra
Que sa veue recouvra,
Pour quoy il vous cria merci,
Sire, aussi a cest homme ci
Rendez la veue en ceste voie,
Par quoy chascun congnoisse et voie
Que sur touz estes seul vraiz Diex.
( A l’aveugle ) Frére, euvre ou nom Jhesu tes yex
Et cler en voies.
L' AVUGLE. Touz mes pleurs sont muez en joies,
Car je voy tresparfaittement,
Dont Jhesu mercy haultement;
Car puis qu' il m' a fait ceste grace,
Sire, je vueil sanz plus d' espace
Baptesme avoir.
LE PÉRE. Or puis je clérement savoir
Que noz diez n' ont nulle maistrie,
Mais que c' est fole ydolatrie
Que de les com diex honnourer.
Jhesu seul doit on aourer.
Panthaleon, or voi je bien,
Filz, que vous estes crestien.
Si feray je, ce vous denonce.
A la loy paienne renonce
Dès cy endroit.
PANTHALEON. Certes, pére, vous avez droit,
A brief parler.
L' AVUGLE. Sire, pour Dieu, pensons d' aler
La ou baptesme recevray,
Car ne mengeray ne buvray
Paien jamais.
LE PÉRE. Aussi ne feray je moy, mais
Que celui trouver puisse a point
Qui les gens baptise et enoint
De l' uile sainte.
PANTHALEON. Je vous menray a tel qui mainte
Foiz celle sainte office a fait,
Qui est catholique parfait.
Suivez moy.
( Panthaléon conduit son père et l’aveugle chez Hermolaüs )

Scène 5. Chez Hermolaüs.
PANTHALEON. ( Entrant ) Hermolaus pére,
Qu' en vous la Dieu grace s' appére.
Parlez a nous.
HERMOLAUS. Panthaleon, que voulez vous,
Mon enfant chier ?
PANTHALEON. Pére, sanz vous longues preschier
De cest homme, sachez sans doubte,
Que maintenant ne veoit goute,
Dont malement se dolosoit,
Quant je li dis que s' il vouloit
Croire en Jhesu Crist, voire, et prendre
Crestienté, que sanz attendre
Aussi cler verroit qu' il fist onques,
Et il s' i assenti; adonques
En seignant li touchay les yex,
Dont il voit aussi bien ou miex
Conme il fist onques, Dieu merci.
Mon pére, qui a ce fait ci
Veu, s' en est si merveilliez
Qu' il est, sire, touz conseilliez
Qu' il se veult de la loy demettre
Sarrazine et crestien estre;
Pour ce vient ci.
HERMOLAUS. Doulx Jhesu Crist, je vous graci,
Quant ainsi vous plaist a ouvrer.
Or ça, seigneurs, pour recouvrer
Grace qui voz pechiez destruise
Et qui droit a Dieu vous conduise,
Puis que c' est vostre voulenté,
Venez prendre crestienté
Ou vous menray.
L' AVUGLE. Sire, voulentiers le feray
De moye part.
LE PÉRE. Sy feray je, car il m' est tart
Que l' aie eu.
( Panthaléon, son père et l’aveugle suivent Hermolaüs à l’église
Saint-Paul, où Panthaléon a reçu le baptème )

Scène 6. Une rue de Nicomédie.
( Entre un homme handicapé, Mondot, qui se déplace avec des béquilles )
LE CONTRAIT. Las ! se le cuer ay esmeu
A dueil faire j' ay bien raison,
Quant ne scé de quelle achoison
Ceste maladie me viengne,
Que je n' ay pié qui me soustiengne,
Ains me fault tenir deux eschaces
Et mon corps trainer par les flaches
Se je vueil nulle part aler.
Helas ! on ne soloit parler
De bel homme se de moy non.
Or ay du tout perdu ce nom,
Car contrait sui et mehaingniez,
( Entre maître Morin )
Ha ! maistre Morin, bien veigniez :
Chiez vous m' en aloie tout droit.
Pourroit il estre en nul endroit
C' on peust garison avoir
De tel mal com j' ay, pour avoir,
Et estre sain ?
MAISTRE MORIN. Une demande fais en vain :
Je ne scé; mais que souffrir puisses
Que tes jambes taste et tes cuisses,
Je t' en diray tantost le voir
Se jamais garison avoir
Pourras ou non.
LE CONTRAIT. Maistre, or y gardez : que Mahon
Vous doint s' amour.
MAISTRE MORIN. Je le te feray sanz demour
Presentement.
( Maître Morin palpe les jambes de l’homme handicapé )
LE CONTRAIT. Vous me bleciez trop malement
Luec endroit, maistre.
MAISTRE MORIN. La main n' i puis plus souef mettre,
Je ne scé de quoy tu te plains;
Mais c' est le mal dont tu es plains
Qui les nerfs t' a retrait sanz doubte.
Je te di tu as une goute
Que nous appellons palasine,
Contre laquelle medicine
Nulle ne vault.
LE CONTRAIT. Elas ! ainsi donques me fault
Mes jours finer ?
MAISTRE MORIN. C' est voirs, et nient moins se finer
Pouoies d' un cuer de fenis,
Ton mal seroit du tout fenis
Ligiérement.
LE CONTRAIT. Et n' est il riens qui autrement
Me puist valoir ?
MAISTRE MORIN. Nanil voir, car en nonchaloir
Tu l' as trop mis.
LE CONTRAIT. Las ! or voy je que mes amis
Ay touz perduz en verité,
Puis que j' ay perdu ma santé :
N' est nulle doubte.
MAISTRE MORIN. Garde bien qu' en toy ne se boute
Dueil quel qu' il soit.
LE CONTRAIT. Sire, de vous pren congié. Voit
Si com pourra !
( L’homme handicapé se retire )
MAISTRE MORIN. Espier vueil ou il yra :
Courrouciez est.
( Maître Morin le suit )
Scène 7. L’église Saint-Paul.
HERMOLAUS. ( Sortant de l’église ) Ore, biaus seigneurs, avis m' est
Que moult grant joie avoir devez
Du baptesme que vous avez,
Et que chascun est bien tenuz
D' amer Dieu. Or gardez que nulz
De ceste foy ne vous retraie
Pour biau parler qu' il vous retraie,
Ne pour menace.
L' AVUGLE. Pour chose c' on me die ou face,
Certes jamais n' aoureray
Aus ydoles, ne ne croiray.
Biau pére, a Dieu !
LE PÉRE. Pére, mais que viengne en mon lieu,
Je vous promet je destruiray
Quanque en maison en trouveray,
Soiez en fis.
L' AVUGLE. Sire, de vous et vostre filz
Pren congié. A Dieu vous conmans.
Es priéres me reconmans
D' entre vous deux.
PANTHALEON. A Dieu ! amis, soiez bien preuz
A Dieu amer.
( Panthaléon et son père se séparent de l’aveugle et
d’Hermolaüs qui partent dans des directions différentes )

Scène 8. Chez le père de Panthaléon.
( Entrent Panthaléon et son père ; celui-ci renverse aussitôt
les deux idoles et les écrase au sol à coups de talons )
LE PÉRE. Mahom, Mahom, qui que blasmer
M' en doie, plus ne demourrez
Ceens; de la trebucherez.
Passez jus par male aventure :
Folz est qui en vous met sa cure.
Filz, fas je bien ? Le chief li froisse,
Afin c' on ne le recongnoisse
Jamais nul jour.
PANTHALEON. Pére, ne doit que deshonnour
Avoir tel dieu.
LE PÉRE. Biau filz, qui que le prengne a jeu,
Après le vueil porter noier,
Et d' ilec me vueil avoier
D' aler droit en Jherusalem
Ou le vray Dieu a grant ahan
Pour nous moru.
PANTHALEON. Pére, vous a bien tant feru
S' amour au cuer ?
LE PÉRE. Je ne cuide ja a nul fuer
L' eure veoir, a brief parler,
Que meuz soie a y aler.
Filz, mes biens et mon hostel garde,
Car le mouvoir forment me tarde :
A Dieu te di.
PANTHALEON. Pére, mie ne vous desdi,
Mais au mains vous convoieray
Ou avecques vous m' en iray,
S' il vous agrée.
LE PÉRE. Pour ce que soit chose secrée,
Filz, non ferez.
( Le père sort emportant les débris des idoles pour les jeter à l’eau )

ACTE III.
Scène 1. Une place , l’échoppe du médecin. Quelques mois plus tard.
( Entre, en compagnie d’Antime l’aveugle guéri, Mondot, l’homme handicapé
qui se déplace sur des béquilles. On voit Panthaléon et maître Morin à
l’intérieur de l’échoppe )
LE CONTRAIT. Elas ! bien sui deshonnorez.
Mon mal de jour en jour empire,
Et si ne puis nulle part mire
Trouver qui m' en sache guerir.
Certes je voulroie mourir
Tout maintenant.
L' AVUGLE. Amis, c' est grant desavenant
De la mort ainsi desirer :
Ne savez vous considerer
Autre confort ?
LE CONTRAIT. Nanil, j' ay angoisse trop fort
Et qui jamais ne prenra fin,
Se me dient li medecin.
Laissiez m' en pais.
L' AVUGLE. Aussi ne cuiday je jamais
Veoir, amis, n' a pas granment,
Car les yex estains longuement
Avoie euz, point n' en veoie,
Quant me trouva en plaine voie
Un jonne home qui m' aproucha,
Qui si tost qu' i les me toucha
Il me gari tout nettement,
Sanz emplatre ny oingnement
Mettre y n' ointure.
LE CONTRAIT. Tant vous fist il plus belle cure.
Helas ! mon ami, qui est il ?
Ne scé s' il seroit si soubtil
Que de mon mal me garisist.
Je feisse quanqu' il voulsist
Certainement.
L' AVUGLE. Et je tieng et croy fermement
Que de ce mal te garira
Se tu fais ce qu' il te dira.
Or t' en advise.
LE CONTRAIT. Quelque chose qu' il me divise,
Je la feray.
L' AVUGLE. Donques je le t' enseigneray.
( Montrant Panthaléon debout dans l’échoppe )
Voiz tu la ce jonne homme estant ?
C' est celi, n' en soiez doubtant,
Qui m' a gueri.
LE CONTRAIT. Aler m' en vueil donques a li
Ysnel le pas.
( L’aveugle et l’homme handicapé s’avancent vers l’échoppe )
MAISTRE MORIN. ( A l’aveugle ) Mon ami, ne me mentez pas.
Vous avez dit que la veue,
Que vous aviez du tout perdue,

( Montrant Panthaléon auprès de lui ) Par cel homme avez recovré.
Conment a il sur vous ouvré ?
Dites le moy.
L' AVUGLE. Sire, voulentiers, par ma foy :
Il me dist, se croire vouloie,
En Jhesu Crist, que je verroie;
Et je du cuer m' y assenti
Et tantost sur mes yex senti
Son doit, dont croiz dessus me fist.
Onques autre chose n' y mist,
Si vi en l' eure.
MAISTRE MORIN. Il tient donques et si honneure
Crestienté ?
L' AVUGLE. C' est voirs, si fas j' en verité.
Dès si tost que poy regarder,
Babtiser me fis sans tarder
Et sui crestien.
MAISTRE MORIN. Va t' en : qu' il ne t' en soit doubt bien
Encor de pis.
( L’aveugle se retire )
LE CONTRAIT. ( A Panthaléon ) Ha ! sire, je qui sui despis
De touz pour ce que sui contrait
Et que li nerf me sont retrait,
Dont je palis souvent et taing,
Vueillez regarder mon meshaing
Et prendre en cure.
PANTHALEON. Se je te garis et te cure,
Laisseras tu la loy paienne
Pour tenir la foy crestienne
De cuer loyal ?
LE CONTRAIT. Certes oil, franc cuer royal,
Tresvoulentiers.
PANTHALEON. Or te deslie : endementiers
M' aviseray.
LE CONTRAIT. ( Se défaisant ) Sire, voulentiers le feray.
Deslié sui.
PANTHALEON. Or entens : ( Faisant le signe de la croix et la bénédiction ) ou nom de celui
Qui est appellé Jhesu Crist,
Qui des propheties l' escript
Tout acomplit et affina,
Quant en la croiz pour nous fina,
Soies tu beneiz et seigniez
Et de tes membres meshaingniez
Gariz a plain.
LE CONTRAIT. Or ne me dueil je mais ne plain
Ne de mal ne sui agrevez.
( Il se dresse sur ses pieds, en laissant tomber ses béquilles )
Vez me ci sur mes piez levez.
Sire, se je vous lo j' ay droit,
Quant sur moy avez cy endroit
Fait si biau fait.
PANTHALEON. Mon ami, ce n' ay je pas fait :
Ç' a fait Jhesu, le roy de gloire,
Que tu doiz aourer et croire :
Promis li as.
LE CONTRAIT. Sire, ne li mentiray pas.
Je m' en vois faire baptiser
Pour ma conscience appaiser.
A Dieu, chier sire !
PANTHALEON. A Dieu, amis, qui te gart d' ire !
Prie pour moy.
LE CONTRAIT. Sire, voulentiers : je le doy
Certes bien faire.
( Mondot, l’homme guéri de son handicap, se rend à l’église.
Maître Morin s’avance hors de l’échoppe, tandis que
Panthaléon reste à l’intérieur )
MAISTRE MORIN. ( A part ) Ma science ne mon affaire
Ne vault mais rien en ce pais,
Dont je sui forment esbahiz.
Lonc temps a que je ne fis cure;
N' est nulz qui ait mais de moy cure.
Chascun a Panthaleon cuert,
Et chascun garist et secuert.
J' en ay grant dueil et grant envie.
Ma chevance pers et ma vie,
Mais la seue li feray perdre,
S' a point puis l' empereur aherdre.
Je m' en vueil a sa court aler
Savoir s' a li pourray parler :
( Il se rend au palais de l’empereur )

Scène 2. Le palais de l’empereur.
MAISTRE MORIN. ( Entrant ) Je le voy la, c' est bien a point.
Mon chier seigneur, Mahon vous doint
Honneur sanz fin.
L' EMPEREUR. Bien veigniez vous, maistre Morin.
Quel vent vous boute ?
MAISTRE MORIN. Mon seigneur, vous l' orrez sans doubte.
Sachez qu' il a en ceste ville
Un jonne homme qui par sa guille
Fait aux gens despiter noz diex,
Et pour ce qu' il les puisse miex
Attraire a la loy de Jhesum
Qui fu pendu conme larron,
Les avugles fait veoir cler
Et les contraiz fait droit aler,
Aux mehaigniez leurs maux tarist
Si qu' il semble qu' il les garist.
Au mains congnois je bien l' avugle
Qui ne veoit rien plus qu' un bugle,
Qui voit bien con vous maintenant.
Sire, je vous le di pour tant
Que s' ainsi le laissiez durer,
Je doubt qu' en la fin endurer
N' en faille ennuy.
L' EMPEREUR. J' en venray a chief au jour d' uy.
( Aux deux sergents ) Alez vous deux avecques li,
Et tu leur monstreras celi
Qui a esté enluminez,
Et tantost si le m' amenez
Ci en present.
MAISTRE MORIN. Sire, de cuer tout me present
A vostre vueil.
PREMIER SERGENT. Alez devant, je le conseil;
Nous vous suivrons.
DEUXIESME SERGENT. Il dit bien; voirement ferons.
C' est le meilleur.
( Ils suivent maître Morin au dehors )

Scène 3. Une place devant le palais.
( Maistre Morin leur montre Antime l’aveugle )
MAISTRE MORIN. E gardez : vez le la, seigneur.
Alez le prendre.
PREMIER SERGENT. Ça, maistre, il vous fault sanz attendre
Venir a l' empereur bonne erre,
Qui par nous vous envoie querre;
C' est sanz mentir.
L' AVUGLE. Alons, seigneurs, sanz alentir. Je suis tout prest.
( Les deux sergents accompagnés de maître Morin conduisent l’aveugle au palais )

Scène 4. Le palais impérial.
DEUXIESME SERGENT. ( Présentant l’aveugle à l’empereur )
Sire, vezci qui venuz est
A vostre mant.
L' EMPEREUR. Bien est. Amis, je te demant,
Es tu cil qui granment esté
As sans veoir ? Di verité
Hardiement.
L' AVUGLE. Oil, mon seigneur, vraiement,
Je sui celi.
L' EMPEREUR. Or me respons : qui t' a gari
Si que tu vois ?
L' AVUGLE. Jhesu Crist, vray Diex et vray roys,
Qui de nient a fait tout le monde,
Celui qui justiffie et monde
Les pecheurs, cil que toute gent
Doivent croire, par son sergent
Qui nommez est Panthaleon,
M' a gari. Si est bien raison
Que ceste bonté recongnoisse
Et que sa loenge j' acroisse
A mon pouoir.
L' EMPEREUR. Donques a ce que puis veoir
Tu es crestien ?
L' AVUGLE. C' est voirs; autrement conme un chien,
Sire, vivroie.
L' EMPEREUR. ( Au premier sergent ) Garde que ci plus ne le voie.
Je te conmant si con m' as chier
Que le chief li voises tranchier
Aus champs la hors.
PREMIER SERGENT. Sire, voulentiers, et dès lors
Que j' aray fait ci revenray.
( A l’aveugle ) Sa, maistre, assez tost vous feray
Taire tout coy.
L' AVUGLE. Amis, puis que je scé pour quoy
Tu me maines pour mettre a fin,
J' en loe Dieu et de cuer fin
Le te pardoing.
PREMIER SERGENT. De tel pardon n' ay pas besoing.
Avant :
( Le premier sergent fait avancer l’aveugle hors du palais )

Scène 5. La place devant le palais.
LE SERGENT. ( Arrêtant l’aveugle ) a genoulz vous mettez.
Morir vous fault ci, n' en doubtez;
Ce vous promet.
( L’aveugle s’agenouille. Entre Panthaléon )
PANTHALEON. ( Considérant ce qui se passe, à part )
Ce crestien qu' a mort on met
Me fait pitié, n' est pas merveille,
Et ce tirant s' i appareille
De grant maniére.
PREMIER SERGENT. Estens le col, baisse la chiére :
Tien, vas, maishui n' en aras mains.
( Il lui tranche la tête )
Jamais ne de piez ne de mains
Ne s' aidera.
PANTHALEON. ( S’avançant vers le premier sergent )
Amis, dites : qui vous donrra
Vostre vin, souffrerez vous bien
C' on emporte ce crestien
Pour mettre en terre.
PREMIER SERGENT. De ce que me venez requerre
Convenroit qu' il fust fait secré;
Mais qu' aray je s' a vostre gré
Vous lais ce corps ?
PANTHALEON. Je vous donray, ce vous accors,
Quatre florins.
PREMIER SERGENT. Mais qu' ilz soient d' or, bons et fins.
A quant paier ?
PANTHALEON. En l' eure, pour vous appaier :
Tendez la main.
( Panthaléon donne au sergent les quatre florins )
PREMIER SERGENT. Or le prenez hui ou demain,
Quant vous plaira.
PANTHALEON. Je vois querre qui m' aidera
A l' emporter.
PREMIER SERGENT. Et je compagnie porter
Vois l' emperére.
( Le premier sergent retourne auprès de l’empereur.
Entre l’homme handicapé qui a été guéri )
PANTHALEON. Amis, se m' amour avez chiére,
Je vous pri, aidiez m' un tantet
A mettre en sauf ce corps qui est
Pour la foy Jhesu Crist martir.
Ennuit le pense ensevelir
Et mettre en terre.
LE CONTRAIT. Voulentiers, sire, alons bonne erre :
Que vous soiez le bien venuz !
A vous plus qu' a nul sui tenuz,
Bien m' en souvient.
PANTHALEON. Or ça : porter le nous convient
En cel anglet.
LE CONTRAIT. Sus de la, sus.
( Ils soulèvent le corps et le mettent avec la tête en un endroit caché )
Sire, il y est ;
Voulez plus rien ?
PANTHALEON. Nanil, amis, il est moult bien.
A Dieu alez !
( Ils se séparent )

ACTE IV.
Scène 1. Le palais impérial.
MAISTRE MORIN. Sire, se vous ne conmandez
Prendre Panthaleon de fait,
De vostre emprise n' avez fait
Chose qui vaille.
L' EMPEREUR. Entre vous deux, conment qu' il aille,
Alez et si le m' amenez,
Et gardez que ne revenez
Sanz li vers moy.
DEUXIESME SERGENT. Sire, a voz grez faire m' ottroy.
( Au premier sergent ) Alons, compains, nous deux ensemble :
Penses tu point ou il te semble
Que le truissons ?
PREMIER SERGENT. Je cuit se nous en alissons
La ou gist le crestien mort,
Nous le trouverions : c' est mon sort.
Or y alons.
DEUXIESME SERGENT. Soit. Ho ! de li plus ne parlons :
( Ils sortent )

Scène 2. La place devant le palais.
( Entrent en même temps de deux côtés différents les deux
sergents et Panthaléon )
DEUXIESME SERGENT. ( Au premier ) Je le voi venir ça avant.
Contre li m' en vois au devant.
( Abordant Panthaléon ) Panthaleon, ne scé plus dire,
Venir vous fault sanz contredire
A l' empereur.
PANTHALEON. En bonne heure soit ce, seigneur;
Si y alons.
( Panthaléon suit les deux sergents auprès de l’empereur )

Scène 3. Le palais impérial.
DEUXIESME SERGENT. ( Faisant entrer Panthaléon )
Mon seigneur, nous vous amenons
Panthaleon.
L' EMPEREUR. Es tu ce qui mire es si bon
Que les avugles renlumines
Sanz mettre y nulles medicines,
Et les contraiz aussi redresses,
Et toutes maladies cesses
Par paroles tant seulement ?
Dy me voir, se Mahon t' ament,
Quelles sont elles ?
PANTHALEON. Sire, elles sont plaisans et belles,
Car elles sont du doulz Jhesu,
Homme et Dieu, qui de l' ort palu
D' enfer par sa mort nous retrait,
Afin qu' en gloire feussons trait
Avec son pére.
L' EMPEREUR. Il convient qu' autrement m' appére
Ce que tu dis; point ne l' entens.
Di moy a quelle fin tu tens
Plus en appert.
PANTHALEON. Je di que tout homme se pert
Et se met a dampnacion
Qui a foy ny entencion
A autre dieu qu' a Jhesu Crist,
Car il est de lui seul escript,
Puis qu' a ce dire sui meuz :
Videte quod ego solus
Et non sit deus preter me :
Entre vous, de qui diffamé
Sui par ignorance de foy,
Veez qu' autre dieu n' est que moy.
Pour quoy ? car il est dit après
En ce lieu mesmes par exprès :
J' occiray et vivre feray,
Je naverray et gariray,
Et si n' est nul, au paraler,
Qui de ma main puist eschaper.
Et pour ce vous debvriez soubzmettre
A lui, sire, et crestien estre
Pour vous sauver.
L' EMPEREUR. Il te fauldroit bien miex prouver
Qu' il soit vraiz diex.
PANTHALEON. Or le faisons, s' il vous plaist, miex :
Faites venir ci en present
Quelque malade ou mort present
Et soit tenu sanz detrier
Pour dieu celui qui par prier
Ou le malade garira
Ou le mort resuscitera,
Soit le dieu ou plus vous fiez
Ou Jhesus le crucifiez
Lequel j' aour.
L' EMPEREUR. Vas me querre, vas sanz demour
Les prestres a noz dieux servans.
Qu' a moy viegnent tost, ce leur mans
Et les em pri.
DEUXIESME SERGENT. Mon seigneur, je vois sanz detri.
( Le deuxième sergent sort )

Scène 4. La demeure des deux prêtres.
DEUXIESME SERGENT. ( Entrant, aux prêtres )
Seigneurs, je vous truis bien a point,
Venez vous ent sanz tarder point
A l' emperiére.
PREMIER PRESTRE. Yci ne fault mie priére,
Mais qu' il conmande.
DEUXIESME PRESTRE. Grant joie ay de ce qu' il nous mande.
Alons pour faire son vouloir :
Nous n' en pouons que miex valoir.
Avant, passez.
( Les deux prêtres suivent le deuxiême sergent au palais impérial )

Scène 5. Le palais impérial.
PREMIER PRESTRE. ( S’avançant vers l’empereur )
Mon seigneur, ne scé que pensez,
Qui si en haste nous mandez :
Vez nous ci, sire; or conmandez
Vostre plaisir.
L' EMPEREUR. C' est mon vouloir et mon desir
Que cel homme que voy la courbe
Faciez ci avec vous en tourbe
Venir bonne erre.
PREMIER SERGENT. Mon chier seigneur, je le vois querre.
( Le premier sergent sort )

Scène 6. La place devant le palais.
( Passants et badauds sur la place )
PREMIER SERGENT. ( Abordant un bossu, Sadoth )
Bon homme, sanz vous ci tenir
Il vous fault jusques ça venir.
Or faites brief.
LE COURBE HOMME. Amis, le haster m' est moult grief.
Alez devant, je vous suivray
Tout le plus tost que je pourray
Voire a mon aise.
(Le premier sergent conduit le bossu à l’intérieur
du palais, des badauds suivent par curiosité )

Scène 7. Le palais impérial.
( Le premier sergent, suivi des badauds, conduit le bossu devant l’empereur )
L' EMPEREUR. ( Aux prêtres ) Seigneurs, je vous pri qu' il vous plaise
De cuer aux ydoles prier
Que cel homme sanz detrier
Vueillent garir, a celle fin
Que Mahom, voire, et Apolin
Et noz autres diex aourés
Soient de ceulz et honnourés
Qui les vitupérent et blasment
Com dyables et les diffament
Cy devant moy.
PREMIER PRESTRE. Sire, nous en ferons nous doy
Maintenant quanque en pourrons faire
Conme ordenez a tel affaire.
( S’adressant à la statue d’une idole ) Berith, mon dieu, de ta puissance,
Sire, nous faiz cy demonstrance :
Par ta bonté, par ta largesce,
Cest homme garis et redresce
( Montrant les badauds parmi l’assistance ) Si que ce peuple ait achoison
Et nouvelle cause et raison
De toy loer et aourer,
De toy servir et honnourer
Conme vray dieu.
DEUXIESME PRESTRE. ( S’adressant à trois autres idoles )
Mon dieu Astaroth, de cuer pieu
Soiez a ma priére enclin,
Et vous, Mahom et Apolin,
Devotement vous pri mercy :
Monstrez vostre puissance cy
Et garissez la maladie
De cest homme, afin que l' en die
Et croye l' en par verité
Qu' en vous a vraie deité
Sanz fin regnable.
L' EMPEREUR. Vostre priére est po valable,
Seigneurs, a ce que je voy ci.
( Le bossu reste tel qu’il était )
Penthaleon, or prie aussi
Ton Dieu, si verrons qu' il fera,
Se ce contrait cy garira
Ou non par toy.
PANTHALEON. Doulx Jhesu Crist, si com je croy
Que pour ce que tu te livras
A mort, d' enfer nous delivras
Et pour c' en ce monde venis
Et, toy Dieu, homme devenis
Et preis humaine nature,
Ceste contraite creature
Pour ta sainte foy essaucier
Vueilles garir et redrecier
En present, ( montrant à son tour les badauds )
que ces gens le voient,
Par quoy conme vray Dieu te croient
Et recongnoissent.
LE COURBE HOMME. ( Se redressant et se tenant droit )
Les os m' estendent et me croissent :
Je croy que je me vueil drescier.
Seigneurs, bien me doy esleescier :
Gari me sens par tout le corps.
Certes au Dieu croire m' accors,
Panthaleon, que vous creez,
Et si dy que par lui creez
Fu tout le monde.
PREMIER PRESTRE. Tais toy. Que Mahon te confonde !
Saches se l' emperiére estoie
En tel lieu mettre te feroie
Que ne verroies piez ne mains
De cest an, soies en certains,
Tant as tu dit.
DEUXIESME PRESTRE. Mais celui doit estre maudit
Qui les hommes ainsi bestourne
Qu' a croire en un Dieu les atourne,
Qui tant par ce monde courut
Qu' avecques deux larrons morut.
A cestui doit on courir seure
Qui noz diez het et deshonneure,
Et l' a mort mettre.
MAISTRE MORIN. Par Mahom, vous dites voir, maistre,
Et se le fait m' appartenoit
Sanz mort de ci ne partiroit :
Car par sa science nouvelle
Pourra faire la gent rebelle
Contre vous, sire.
L' EMPEREUR. Panthaleon, bien oy dire
As du viel Antime conment
Il a souffert paine et tourment
Pour ce Jhesu qu' il tant prisoit
Et pour noz diex qu' il desprisoit,
Et si n' a gaires ?
PANTHALEON. Je scé bien que par moult de paires
De tourmens, sire, il a passé,
Mais ne l' avez pas tant lassé
Que l' aiez peu vaincre, non;
Et se tel viellart pour le non
Dieu a voulu tant soustenir,
Je qui sui jeune et a venir
Encore doy je miex souffrir
Et moy a plus grant peine offrir
Pour avoir plus noble victoire
Et pour couronne avoir de gloire
Avec Antime.
L' EMPEREUR. Par le Dieu que j' aour hautime,
C' est Baal, n' en aras ja mains.
Avant : mettez a li les mains.
Se de moy servir estes liez,
Yci tout nu le despoulliez
( Désignant un poteau de supplice au dehors du palais )
Et le liez a celle estache
De cordes aussi c' une vache,
Et a brandons de feu ardans
Li ardez et costez et flans
Jusqu' a l' entraille.
DEUXIESME SERGENT. Si ferons nous, sire, sanz faille.
( Les deux sergents font sortir Panthaléon )

Scène 8. La place devant le palais.
( Les deux sergents conduisent Panthaléon au poteau )
DEUXIESME SERGENT. ( Au premier sergent )
Compains, puis qu' a ce faire vient,
Avant : despoullier le convient
Premiérement.
PREMIER SERGENT. Or nous en delivrons briément.
Sa, ce chaperon sanz riote.
Or avant : et surcot et cote
Fault despoullier.
( Le premier sergent dépouille Panthaléon de ses vêtements :
chaperon, surcot et cotte )
DEUXIESME SERGENT. C' est fait; ja en ferons moullier
De vin noz pances.
PREMIER SERGENT. J' ay bien pensé ce que tu penses :
Ce ferons mon certainement.
Or nous fault aviser conment
Le lierons.
DEUXIESME SERGENT. Fagot, bien nous en chevirons.
D' une corde par la poitrine
Et d' une autre par my l' eschine
Sera lié a ceste estache,
Et afin qu' il ne se destache
Lui lierons les mains en croiz
Par derriére, se tu m' en croiz,
Et les piez a l' estache aussi.
( Lui tendant une corde ) Tien, boute ceste corde cy
Dessoubz s' essaille.
PREMIER SERGENT. Je vois bien, il l' ara tost belle.
Tu veulz que je les noe ensemble :
( Le premier sergent lie les mains de Panthaléon derriêre le
dos et l’attache par la poitrine et par la taille au poteau )
Sont il bien noez ? que t' en semble ?
Regardes cy.
DEUXIESME SERGENT. Si est cestui, ce croy j', aussi,
Car les reins comprent et les mains.
( Montrant les pieds) Or ne fault fors, mais c' est du mains,
Lier dessoubz.
PREMIER SERGENT. Tu as dit voir, mon ami doulx.
Tantdis conme g' iray au feu,
Delivres t' en; fays y un neu
De celle corde.
DEUXIESME SERGENT. Il me plaist. Va, je le t' acorde :
Or t' en avance.
( Le deuxième sergent lie les pieds, tandis que
le premier va chercher les torches )

Scène 9. Le Paradis.
DIEU. ( A Notre-Dame ) Mére, j' ay d' aler desirance
A Panthaleon mon ami
Que je voy la lié par my
Le corps, pour grief tourment porter.
( Aux archanges ) Avec moy, pour li deporter,
Venez, et vous, anges, aussi.
Or sus, descendez jus de cy
Ysnellement.
PREMIER ANGE. Vray Dieu, vostre conmandement
Acomplirons.
DEUXIESME ANGE. Voire, et en alant chanterons
De cuer joieux.
PREMIER ANGE. Prenons ensemble entre nous deux :
En ce ne pouons meffaire.
( Ils chantent )
RONDEL. Dieu poissans, roy debonnaire,
Eureuse est la personne
Qu' a mort pour vous s' abandonne;
S' on li fait peine en corps traire
Et nient moins s' amour vous donne,
Dieu poissant, roy debonnaire,
Eureuse est la personne;
Car il en a pour salaire
De beneurté couronne
Ou gloire sanz fin foisonne.
Dieu poissant, roy debonnaire
Eureuse est la personne
Qu' a mort pour vous s' abandonne.
( Dieu et Notre-Dame, précédés des deux archanges,
se rendent sur le lieu du supplice )

Scène 10. La cour devant le palais impérial.
PREMIER SERGENT. ( Apportant des torches )
Sa, je reviens. Ains qu' il soit nonne,
Maistre, vous ferons escumer.
Ces brandons nous fault alumer
Sanz plus attendre.
DEUXIESME SERGENT. Tu dis voir, et aus costez tendre
De ce chetif.
PANTHALEON. ( Priant ) Jhesu, Jhesu, filz Dieu le vif,
Pour toy sui mis en sacrefice.
Or m' ottroies le benefice
Du don de force.
PREMIER SERGENT. ( Montrant au deuxième sa torche éteinte,
en dépit de ses efforts pour l'allumer )
Compains, qu' est ce cy ? plus m' efforce
A mon brandon cler faire ardoir
Et plus destaint. A dire voir,
Trop m' en merveil.
DEUXIESME SERGENT. ( Laissant tomber sa torche )
Autel dire du mien te vueil :
Vez la, ne le puis plus tenir.
( Montrant sa main paralysée ) Ma main sens morte devenir :
Perdue l' ay.
PREMIER SERGENT. ( Montrant ses deux mains paralysées )
Après toy n' ay pas long delay.
Les moies deus sens si mal estre
Qu' i me semble que goute flestre
Les me menjusse.
( L’empereur sort du palais )
L' EMPEREUR. Conment ! seigneurs, se je loing fusse,
Vous le laissiciez tost en pais !
Ferez vous autre chose huy mais
De voz brandons ?
DEUXIESME SERGENT. ( Montrant ses mains immobilisées )
Sire, les mains perdu avons :
Enchanté sommes.
L' EMPEREUR. ( Se tournant vers les prêtres )
Conseilliez moy entre vous hommes
Que je feray.
PREMIER PRESTRE. Sire, bien vous conseilleray :
Il ne fault mie qu' i recuevre ;
Nous trois metterons mains en euvre :
( Montrant une chaudière ) Vezla une grande chaudiére :
Nous l' asserrons en tel maniére
Qu' il ara bon feu tout entour;
La ferons mourir sanz retour
Panthaleon a grief tourment
Par boulir dedans longuement,
Se vous voulez.
L' EMPEREUR. Il me plaist, seigneurs. Or alez,
Delivrez vous.
DEUXIESME PRESTRE. Mon chier seigneur, chascun de nous
Est prest de faire vostre vueil.
Certes embesongnier m' y vueil
Tresvoulentiers.
MAISTRE MORIN. Alons, et je feray le tiers
De cuer aussi.
PREMIER PRESTRE. Or ça : ceste chaudiére ci
Fault asseoir en ceste place.
( Maître Morin et les deux prètres transportent la chaudière
non loin du poteau où Panthaléon reste lié )
Ho ! bien est : ne fault fors c' on face
Que ce maleureux soit dedans,
Envers, en seant ou adans,
N' en chaut lequel.
DEUXIESME PRESTRE. Aler deslier de ce pel
Le convient et amener ci.
G' i vois; or y venez aussi,
Maistre Morin.
MAISTRE MORIN. Voulentiers, ami, de cuer fin.
( Le deuxième prêtre et maître Morin s’approchent du poteau )
Desliez le hault et je bas.
Panthaleon, mal te meslas
D' ame garir.
DEUXIESME PRESTRE. ( Déliant Panthaléon ) Voire, quant le convient morir
A telle paine.
MAISTRE MORIN. ( Idem ) Avant ce que l' en plus te paine,
Laisse les cures, c' est ton miex,
Et sacrefies a noz diex,
Si feras sens.
PANTHALEON. Par foy, ce n' est pas mes assens
Que pour nul ci n' en autre lieu
Je croie ni aoure dieu
Que Jhesu Crist.
DEUXIESME SERGENT. Alons men : il est tout escript
Que devons faire.
PREMIER PRESTRE. Seigneurs, abreigons nostre affaire :
Puis qu' il a noz diex en despit,
Faisons le mourir. Sanz respit
Soit icy mis.
( Maître Morin et le second prêtre conduisent Panthaléon près de la chaudière )
PANTHALEON. ( Priant ) Jhesu, vray dieux et vrais amis,
Ton confort m' envoie et t' aide
De ce tourment, car j' ay grant hide
Selon ma sensualité
Et la povre fragilité
De ma charongne.
( Dieu, suivi de son cortège, s’est approché de Panthaléon )
DIEU. Ne doubtes, non, que je t' eslongne,
Panthaleon; près sui de toy.
Aies bonne fiance en moy.
Entres en la chaudiére a plain
( Lui prenant la main ) Et je te tenray par la main,
Et verras que pour toy feray
Et combien ami te seray.
Va com hardis.
PANTHALEON. Ha ! doulx Jhesus, s' acouardiz
Ay esté, pardonnez le moy.
Seigneurs, trop esbahiz vous voy
Quant ne m' osez la paine offrir
Que pour mon Dieu vueil bien souffrir
Et endurer.
L' EMPEREUR. Seigneurs, trop le laissiez durer :
N' est pas bien fait.
MAISTRE MORIN. Avant : touz ensemble de fait
Cy dedans tantost le jettons.
( Ils le jettent dans la cuve )
Il y est : au feu nous mettons
Bon faire et grant.
DEUXIESME PRESTRE. Sachiez j' en ay le cuer engrant,
Par Mahonmet.
( Ils allument un feu sous la chaudière )
DIEU. Gabriel, vas : je te conmet
A ce feu destaindre qu' il font.
Je vueil contre ce qu' il meffont
Un po monstrer de ma puissance
Pour croistre amour et esperance
En mes amis.
GABRIEL. Sire, a nient sera tost mis,
Quant le voulez.
( Gabriel éteint le feu sous la chaudière )
PREMIER PRESTRE. Egar ! le feu s' en est volez
Soudainement; n' en y a goute.
Il a joué, seigneurs, sanz doubte
D' anchantement.
MAISTRE MORIN. ( S’évanouissant )
Je me muir, seigneurs, vraiement :
Le cuer me fault.
DEUXIESME PRESTRE. ( Se tenant la tête et tombant )
Bonnes gens, venez a l' assault.
Le dieu Panthaleon ou chief
M' a feru, dont j' ay tel meschief
Que je me muir.
PREMIER PRESTRE. ( Se tordant de douleur )
Haro ! l' en m' esrache le cuir
Par tout le corps. Las ! que feray ?
Yci d' angoisse enrageray.
C' est fait, c' est fait.
DIEU. ( Reprenant la main de Panthaléon )
Panthaleon, pour toy de fait
Ay volu ces gens mettre a fin.
Se tu m' as amé de cuer fin,
Encore m' aimes.
NOSTRE DAME. Amis, qui mon filz ton dieu claimes,
Saches com tu plus l' ameras
Et com plus pour lui soufferras,
Tant seras plus beneurez
Et des anges plus honnourez
Lassus en gloire.
DIEU. Elle te dit parole voire.
( Lâchant la main de Panthaléon ) Ici te lais, es cieulx m' en vois.
Alez devant a haulte vois
Vous deux chantant.
MICHIEL. Gabriel, disons or avant
Au miex que le sarons faire.
RONDEL. Car il en a pour salaire
De beneurté couronne
Ou gloire sanz fin foisonne.
( Les archanges, précédant Dieu et Notre-Dame, remontent
au Paradis en chantant ce rondeau )
L' EMPEREUR. Ha ! mauvaise et fausse personne,
Is, hors, is de celle chaudiére.
( Panthaléon sort de la cuve et s’avance vers l’empereur )
Qui te meut en telle maniére
Que tu as ci ocis ces gens
Et les autres faiz negligens
De servir aux diex et separes,
Et de ne scé quel Dieu te pares
Et fais monneste ?
PANTHALEON. Je te dy bien dit le prophéte,
Qui dit des mauvais qu' a ce chéent
Que leurs maux sur leurs chiés leur chéent,
Et il dit voir.
L' EMPERÉRE. Puis qu' ainsi est, fay me savoir
Qui t' a si bien endottriné,
Je t' en pri, et si obstiné
En ta science.
PANTHALEON. Un saint homme de conscience
Qui nommez est Hermolaus.
Il est tel que je croy n' est nulz
Meilleur de lui.
L' EMPEREUR. S' il peut estre que parle a lui,
Je te pri fais tant que ci viengne,
Et que m' endottrine et enseigne
Com toy a fait.
PANTHALEON. Venir le vous feray de fait
Et bien brief, sire.
( Il sort. Les deux sergents viennent vers l’empereur )
PREMIER SERGENT. ( Faisant remuer ses doigts et ses mains )
Mon seigneur, nous vous venons dire
Que noz mains nous sont revenues
Que nous jugions avoir perdues
Oultréement.
DEUXIESME SERGENT. Il dit voir, sire, vraiement.
Noz diex en soient aourez,
Par qui en sommes restorez,
C' est sanz doubtance.
L' EMPEREUR. Seigneurs, tost verrez bonne enfance :
Panthaleon m' est alé querre
Celui par qui ainsi meserre.
Il cuide que croire le doie,
Mais il n' en est pas a deux doie.
Laissiez venir.
PREMIER SERGENT. S' en mes mains peut jamais venir,
Certes je li venderay chier
Ce que les mains m' a fait sechier
Et amortir.

ACTE V.
Scène 1. Le Paradis.
DIEU. Mére, de ci nous fault partir.
Aler vueil a Hermolaus.
Vous venrez avecques moy sus,
Car il me plaist.
NOSTRE DAME. Mon Dieu, chier filz, voire sanz plait.
Entre vous, anges, descendez
Et a bien chanter entendez
Nous convoiant.
GABRIEL. Nous le ferons de cuer joiant,
Dame de gloire.
MICHIEL. Gabriel, c' est bien chose voire.
Sus : disons a chant hautain.
( Ils chantent )
RONDEL. Esjois toy, cuer humain,
A qui Dieu sa mére amaine :
Par amour t' ont pris en main.
Esjois toy, cuer humain,
En eulz loent soir et main
Non pas de loenge humaine :
Esjois toy, cuer humain,
A qui Diex sa mére amaine.
( Les archanges, précédant Dieu et Notre-Dame, se rendent
dans la demeure d’Hermolaüs en chantant ce rondeau )

Scène 2. La demeure d’Hermolaüs.
DIEU. ( Entrant suivi de son escorte )
Hermolaus, tien de certain
Pour ce qu' amé m' as de cuer fin,
Le temps approuche de ta fin.
Ce te fas je savoir. Mais quoy ?
Soies perseverans en foy
Et si grant merite acquerras
Qu' en gloire couronne en aras
De vray martir.
HERMOLAUS. Ha ! sire Diex, a mon partir
Ton saint et bon ange m' envoie,
Qui me conduie et mette en voie
De vray repos.
NOSTRE DAME. Persevére en ton bon propos,
Et tu a ce ne fauldras pas,
Chier filz. ( Aux archanges ) Ralons nous ent le pas,
Anges, or tost : alez devant
Et chantez d' accort. Or avant,
Sanz plus cy estre.
GABRIEL. Dame de la gloire celestre,
Nous ferons vostre voulenté.
Michiel, de nous deux parchanté
Soit nostre rondel a plain.
RONDEL. En eulz louent soir et main
Non pas de loenge humaine.
Esjois toy, cuer humain
A qui Diex sa mére amaine.
( Dieu et Notre-Dame remontent au Paradis , précédés
des archanges qui chantent ce rondeau. Entre Panthaléon )
PANTHALEON. Pére, c' est bien chose certaine,
L' emperiére par moy vous mande,
Car il a voulenté trop grande
De veoir vous.
HERMOLAUS. Panthaleon, biau filz doulx,
Si yray sanz contredit.
C' est voir ce que hui m' a dit
Jhesu Crist que mon temps vient.
Puis qu' aler m' y esconvient,
Alons bon pas.
( Hermolaüs et Panthaléon se rendent au palais impérial )

Scène 3. Le palais impérial
PANTHALEON. ( Introduisant Hermolaüs devant l’empereur )
Sire, vezci, n' en doubtez pas,
Le bon preudomme.
L' EMPERéRE. Dy, demeures tu seul, bon homme ?
Ne me mens mie.
HERMOLAUS. Sire, nanil, j' ay compagnie
De deux fréres, je vous dy bien,
Preudommes qui sont crestien,
Dont l' un Ypocrates a nom,
L' autre Herippé, et ont renom
De grant bonté.
L' EMPERéRE. De les veoir ay voulenté.
Alez les querre.
PREMIER SERGENT. Sire, pour vostre grace aquerre
Je les vous vois faire venir.
( Le premier sergent se rend dans la demeure d’Hermolaüs )

Scène 4. La demeure d’Hermolaüs.
PREMIER SERGENT. ( A Hérippé et Ypocrates )
Seigneurs, sanz vous plus ci tenir,
Venez vous ent a l' empereur.
Ne vous en pouez a honneur
Mie excuser.
HERIPPÉ. Non ferons nous. Sanz ci muser,
Frére, alons ment.
YPOCRATES. Alons : si doubt je vraiement
Que jamais ci ne retournons.
Je lo qu' un po ci sejournons
Pour Dieu prier.
HERIPPÉ. Aussi fas j'. Amis, detrier
Nous souffrez un petit icy,
Mon frére et moy et vous aussi,
Par fine amour.
PREMIER SERGENT. Mais que ne faciez long demour,
Bien m' i consens.
YPOCRATES. Nanil, ce ne seroit pas sens.
( Priant ) Doulx Jhesu Crist, se pour ta foy
Nous convient souffrir, je te proy
Qu' en t' amour nous tiengnes si fors,
Quelques paines qu' aient les corps,
Que pour paine ne pour martire
C' on nous face, ne perdons, sire,
Ta vision.
HERIPPÉ. ( Idem ) Sire, qui par provision
D' infinie amour et bonté
As volu prendre humanité
Et toi Dieu et homme moustrer
Et mort as mort par mort oultrer,
Sire, plaise toy quant venrons
Devant l' emperére et serons
Mis a raison que par toy voient
Tel signe avenir qu' il te croient
Seul vray Dieu estre.
PREMIER SERGENT. Seigneurs, vous pouez bien trop mettre
A faire voz affliccions,
Et si ne sont qu' inlusions :
Vous moquez vous ?
YPOCRATES. Ha ! chier sire, pardonnez nous
S' un petit demouré avons.
Sus, biau frére, si en alons :
Yl en est temps.
HERIPPÉ. Biau frére, alons, bien vous entens,
Ou nom de Dieu.
( Hérippé et Ypocrates suivent le premier sergent au palais impérial )

Scène 5. Le palais impérial.
( A peine sont-ils entrés que la terre tremble et un feu traverse la salle )
L' EMPEREUR. Regardez, si tost com ce lieu
Ces anchanteurs approuchié ont,
Les diex tant courrouciez s' en sont
Que la terre ay senti trembler
Et feu par l' air ont fait voler.
<Icy trebucheront les ydoles.>
( Les idoles tombent au sol )
Ç' avez veu ?
PANTHALEON. Emperiére, trop deceu
Vous voy se voz dieux ont ce fait
Que vous dites : pour quoy de fait
Se sont il si vilment laissié
Trebuchier que tout sont froissié ?
( Montrant les débris des statues ) Vous les veés.
L' EMPEREUR. Tu es uns ennemis desvez;
Et sachez je ne mengeray
Tant que de toy vengié seray.
Ou tu noz diex aoureras
Ou tu vilainement mourras :
Pren l' un des deux.
PANTHALEON. Par foy, ce seroit mal et deulz
Que j' aoure telz diex ne croye
Qui ne sont que fust ou que croye
Et que mon bon Dieu deguerpisse.
Je n' ay mie le cuer si nice
Que je le face.
L' EMPEREUR. Avant, seigneurs; en celle place
Les menez ensemble touz quatre
Liez, qu' il ne puissent combatre
Ne vous en riens point occuper.
( Désignant Hermolaüs et ses deux frères )
De ces trois les testes coper
Premiérement ainsi le vueil,
( Désignant Panthaléon ) Si que cestui le voie a l' ueil;
Et si ne se veult convertir,
Si soit ainsi conme eulz martir :
C' est ma sentence.
DEUXIESME SERGENT. Mon seigneur, ja n' ara en ce
Deffault que dites.
PREMIER SERGENT. Tu diz voir, nous en morrons quittes
Assez briément.
( Les deux sergents emmènent leurs prisonniers hors du palais )

Scène 6. La place devant le palais.
DEUXIESME SERGENT. Les mains yci premiérement,
Fagot compains, leur lierons,
Et puis si les en enmenrons
Touz mettre a mort.
PREMIER SERGENT. Tu diz bien, et je m' y accort.
Or les lie, et tandis g' iray
Crier c' on viengne sanz delay
Veoir la justice d' eulx quatre.
( Tandis que le deuxième sergent leur lie les mains,
le premier s'éloigne et lance sa proclamation )
Or escoutez sanz plus debatre :
De par mon seigneur l' emperiére,
Vous conmans en ceste maniére :
Ne laissiez pour un ne pour el
Que pour chascun homme un ostel
Ne viegne tost a la justice :
Qui n' y venra fera que nice,
Soit en certains.
DEUXIESME SERGENT. ( Appelant le premier sergent )
Regarde. Ont il lié les mains
Estroittement ?
PREMIER SERGENT. Oil voir.
( A la foule qu’il fait entrer ) Avant, alons ment :
Passez, merdaille.
LE CONTRAIT. ( Pénétrant dans le palais )
Il m' ennuie qu' il fault que j' aille
A la justice maintenant,
Et s' avoie ailleurs convenant
Ou je faudray.
LE COURBE HOMME. ( Idem ) Cy endroit plus ne me tendray,
Je m' en vois veoir la justice,
Que ne soie tenu pour nyce
Et negligent.
DEUXIESME SERGENT. ( A ses prisonniers )
Or ça, maleureuse gent,
Qui tant en Jhesu vous fiez,
S' a noz diex ne sacrefiez,
Les testes vous copperay cy.
Ja n' en arez autre mercy,
Par ceste teste.
HERMOLAUS. Biaus amis, de ce dire tais te,
Car tu gastes quanque tu diz.
Ne perderons pas paradiz
Pour tes falourdes.
DEUXIESME SERGENT. Puis que vous les tenez a bourdes,
Pensez de vous agenoiller ;
( A Hermolaüs qui s’est agenouillé )
Vous arez cela le premier.
( Il lui tranche la tête )
( A Ypocrates ) Et toy, sacrefieras tu
A noz diex, ou que feras tu ?
Respons me brief.
YPOCRATES. J' ay plus chier a avoir le chief
Yci coupé en ceste place
Qu' envers Jhesus tant me mefface
Que le renie.
DEUXIESME SERGENT. Puis qu' estre veulz de sa mesnie,
Besse toy; tien, pren ce lopin.
( Ypocrates s’agenouille ; il lui tranche la tête )
( A Hérippé ) Et toy, veulz tu a Apolin
Sacriffier ?
HERIPPÉ. Ce n' est pas chose en quoy fier
On se doie, amis, nullement,
Mais Jhesu Crist tant seulement
Doit on com Dieu magniffier
Et a li seul sacriffier.
A lui seul, a lui sacriffi,
De touz voz autres diex di fi :
Ce n' est que songe.
DEUXIESME SERGENT. Chier comparras ceste mençonge.
L' as tu dit ? agenoille toy.
( Hérippé s’agenouille )
Tien, or demeure la tout coy;
Pren celle prune.
( Il lui tranche la tête )
PREMIER SERGENT. Panthaleon, il n' y a qu' une.
Vous veez la fin de ces corps :
Autel arez, ce vous recors,
Ou vous aourerez noz diex.
Ne scé se vous amerez miex
Morir que vivre.
PANTHALEON. Amis, par ceste mort delivre
Seray de la mort pardurable;
Pour ce l' ay je bien agreable,
Et bien me plaist.
PREMIER SERGENT. Je ne vous en tenray plus plait.
Baissiez vous et tendez le col.
( Pantahaléon s’agenouille et tend le cou. Quand le premier
sergent frappe, la lame de l’épée se tord )
Qu' est ce cy ? Ay je espée a fol ?
Estre souloit la miex tranchant
Qui fust de cy jusqu' a Larchant,
Et au ferir s' est si pliée
Com se fust de cire gommée,
Ne plus ne mains.
DEUXIESME SERGENT. ( Joignant les mains et s’inclinant devant Panthaléon )
Ha ! sire doulx, a jointes mains
Vous requier, ce don nous donnez
Que vostre mort nous pardonnez,
Car je congnois bien par ce signe
Que vous estes un homme digne
Et plain de bien.
PANTHALEON. Biaux seigneurs, je vous di combien
Que vous me vueillez a mort mettre,
S' a mon Dieu ne plaist et mon maistre,
De riens ne me pouez grever;
Mais pour voz cuers plus eslever
A lui amer et li congnoistre
Et voz entendemens acroistre
Vous a il fait ce signe ci.
( Priant ) Sire, par la vostre mercy,
Secourez m' ame a ce besoing.
( Aux deux sergents ) Biaux seigneurs, ma mort vous pardoing
Puis que me requerez pardon :
Faites de moy tout a bandon
Vostre plaisir.
PREMIER SERGENT. Puis qu' avez la mort en desir
Et que vous la nous pardonnez,
Faire nous fault que vous finez
Yci de fait.
( Il lui tranche la tête )
DEUXIESME SERGENT. Alons men, puis que tu as fait.
( A l’empereur ) Sire, ces gens sont decolez.
Dites nous des corps que voulez
Que l' en en face.
L' EMPEREUR. Laissiez les la en celle place

Aus bestes et aus chiens rungier.

Sans plus ci estre alons mengier,
Passez devant.
PREMIER SERGENT. ( A la foule ) Faites voie ci. Or avant
Ligiérement.

Scène 7. Le Paradis.
DIEU. Anges, alez ysnellement
La jus et faites un recort
D' un rondel chanter par accort
Tandis que les gens entremettre
Verrez des corps en sauf lieu mettre
De ces quatre la mes amis,
Qui pour mon nom sont a mort mis;
Et le chantez si doucement
Que ces gens esjoissement
Y prengnent et miex congnoissance
D' avoir a moi ferme creance.
Or tost, alez.
ANGES. Si ferons nous quant le voulez :
C' est bien raison.
( Les deux archanges se rendent en chantant
ce rondeau sur le lieu du supplice )

Scène 8. La place devant le palais.
LE CONTRAIT. ( Montrant les cadavres décapités )
Sadoth, vezci sanz mesprison
Gens mis a fin.
SADOTH. Vous dites voir, Mondot voisin.
Il me font au cuer grant pitié,
Au moins cestuy pour l' amistié
Et la grace qu' en moy hier mist,
Car courbe estoie et il me fist
Ainsi droit estre.
LE CONTRAIT. Faisons le bien. Alons les mettre
Et mucier ci en cest destour;
Et quant ja failli sera jour
Ou que soit les enterrerons,
Et je cuide que nous ferons
Nostre deu.
SADOTH. Le volez vous ? ja recreu
Ne m' en verrez : sus, sanz mot dire.
Or alez devant, alez, sire :
Delivrez vous.
( Ils mettent les cadavres dans un endroit caché, puis
sortent. Les deux archanges approchent alors. )
MICHIEL. Gabriel, disons, ami dous,
Ce rondel, bel est d' acors.
( Ils chantent )
RONDEL. Diex puissans misericors
Par vostre misericorde
Amours les pecheurs racorde
A vous, si a dous accors,
Diex puissans misericors;
Et avec ce le recors
De voz graces c' on recorde
Plusieurs a bien faire encorde.
Dieux puissans misericors,
Par vostre misericorde
Amour les pecheurs recorde.
Explicit.